༄༅། །ཕྱི་ལོ་༢༠༡༧ ཟླ་ ༥ ཚེས་ ༣༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕོ་བྲང་མཇལ་འཕྲད་ཁང་དུ་ཝི་ཏི་ནམ་གྱི་CEOཚོགས་པས་གསོལ་འདེབས་དང་གོ་སྒྲིག་ཞུས་དོན་ལྟར་ཝི་ཏི་ནམ་གྱི་དགེ་འདུན་པ་དང་ཚོང་པ། སྒྱུ་རྩལ་བ། ཤེས་ཡོན་ཅན་སོགས་མི་སྣ་ ༡༡༥ ཙམ་ལ་ནང་ཆོས་ངོ་སྤྲོད་དང་བཀའ་འདྲི་ཁག་གཅིག་ལ་བཀའ་ལན་གནང་ཡོད་པ་རེད།
དེ་ཡང་ཞོགས་པ་ཆུ་ཚོད་ ༩།༠༠ པ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གཟིམ་ཆུང་ནས་དགའ་ལྡན་ཕོ་བྲང་མཇལ་འཕྲད་ཁང་དུ་ཕེབས་ཏེ་ཐོག་མར་བཞུགས་སྒར་རྡ་སར་ཕེབས་ཡོད་མཁན་གྱི་ཝི་ཏི་ནམ་གྱི་ཆོས་ཞུ་བ་རྣམས་དང་དེ་བཞིན་ཝི་ཏི་ནམ་གྱི་ས་ཁུལ་གསུམ་དུ་དྲ་བརྒྱ་བརྒྱུད་གསུང་ཆོས་ཞུ་བཞིན་པ་རྣམས་ལ་འཚམ་འདྲི་མཛད་རྗེས། ཤེས་རབ་སྙིང་པོ་གསུང་འདོན་གནང་དགོས་ཕེབས་དོན་ལྟར། ཆོས་ཞུ་པ་ཚོས་ཝི་ཏི་ནམ་གྱི་སྐད་ཐོག་ཤེས་རབ་སྙིང་པོ་གསུང་འདོན་གནང་། དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནང་ཆོས་ངོ་སྤྲོད་དབུ་འཛུགས་ཀྱིས་བཀའ་སློབ་སྩལ་དོན། ད་ལྟ་ང་ཚོ་དུས་རབས་ ༢༡ པའི་ ༢༠༡༧ ལ་སླེབས་ཡོད་པ་རེད། ཁ་སང་སྐད་ཆ་བྱུང་བ་ལྟར་འཛམ་གླིང་འདིར་མི་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་རེད་དེ་སྡུག་བསྔལ་མང་པོ་ཞིག་ཆེད་དུ་གཉེར་ནས་བཟོས་པ་མིན་ཀྱང་། སེམས་ཀྱི་འགྲོ་སྟངས་ཡག་པོ་མ་ཤེས་པའི་རྐྱེན་གྱིས་ཆགས་སྡང་གི་གཞན་དབང་ལ་བཏང་ནས་སྡུག་བསྔལ་མང་པོ་ཞིག་ཡོང་བཞིན་ཡོད། འདི་ལྟ་བུའི་དུས་ཚོད་ལ་དངོས་པོ་ཡར་རྒྱས་གཅིག་པུས་སྡུག་བསྔལ་ཉུང་དུ་གཏོང་ཐབས་ཡོད་པ་མ་རེད། སེམས་ཀྱི་ཞི་བདེ་ཟེར་བ་ནི་ཚོང་ཁང་ནས་ཉོ་རྒྱུ་མེད་ལ། ཨེམ་རྗེས་སྨན་བཅོས་བྱེད་རྒྱུ་ཡང་མེད། སེམས་ཀྱི་ཆགས་སྡང་ཉུང་དུ་གཏོང་བར་སེམས་སྦྱོར་བརྡར་བྱེད་དགོས། དེ་བྱེད་པ་ལ་སེམས་ཀྱི་འགྲོ་སྟངས་ཤེས་དགོས། དེ་ནས་སེམས་མ་བཏུལ་བ་ཐུལ་བར་བྱས་ཏེ་འགྲོ་དགོས།
དེར་བརྟེན་འཛམ་གླིང་འདིར་ཆོས་དད་ཡོད་མཁན་ཡིན་ནའང་རེད། ཆོས་ལ་དོ་སྣང་མེད་མཁན་ཡིན་ནའང་རེད། གང་ལྟར་བྱམས་བརྩེ་ནི་ཚང་མར་དགོས་པ་ཞིག་ཡིན། ཁ་སང་སྐད་ཆ་བྱུང་བ་ལྟར་མིའི་ལྷན་སྐྱེས་ཀྱི་རང་བཞིན་དེ་བྱམས་བརྩེའི་རང་བཞིན་ཅན་རེད་ཅེས་ཚན་རིག་པས་ཀྱང་ཤོད་བཞིན་ཡོད། དེ་བས་ཆོས་དད་ཡོད་མེད་གང་ལྟར་ཡང་མིའི་སྤྱི་ཚོགས་ནང་ལ་ཕ་མའི་བྱམས་བརྩེས་བསྐྱངས་ཏེ་ལྷག་པར་དུ་མ་ཡི་བྱམས་བརྩེའི་འོག་ནས་གསོན་ནས་བསྡད་ཡོད་པ་རེད། ཆུང་ཆུང་སྐབས་བྱམས་བརྩེའི་སེམས་ཡོད་པ་དེ་མིའི་ཀླད་པའི་རྣམ་དཔྱོད་ཀྱི་རྒྱབ་རྟེན་གྱི་ཐོག་ནས་མུ་མཐུད་ནས་ཡར་རྒྱས་གཏོང་ཐུབ་པ་ཞིག་བྱེད་དགོས། བྱམས་བརྩེ་ཡར་རྒྱས་གཏོང་བ་ནི་དད་པ་བྱས་ནས་བྱམས་བརྩེ་ཡར་རྒྱས་ལ་གཏོང་རྒྱུ་ཡོད་ཀྱང་། གཙོ་བོ་མིའི་རང་བཞིན་གྱི་རྣམ་དཔྱོད་ཀྱི་ཐོག་ནས་འཕྲལ་ཕུགས་ལ་ཁེ་གྱོང་གང་ཡོད་པའི་བསམ་བློའི་ཐོག་ནས་བྱམས་བརྩེ་ཡར་རྒྱས་ལ་གཏོང་ཐུབ་པ་ཞིག་ཡོང་ཐུབ་ཀྱི་རེད་ལ་དེ་ཤུགས་ཆེ་བའང་ཡོད་པ་རེད།
ཆོས་ནས་དད་པ་དང་སྙིང་རྗེ་གལ་ཆེན་པོར་གསུང་གིན་ཡོད་པ་རེད་བརྗོད་པ་ཡིན་ན་ཧ་ཅང་ཡག་པོ་རེད། ཡིན་ནའང་། ཕར་དེད་ནས་སོང་ཚེ་དཀོན་མཆོག་གིས་གསུང་གིན་འདུག་ཟེར་བ་ལྟ་བུ་དང་། ཆོས་ཀྱི་ནང་དུ་གསུངས་འདུག་ཟེར་བ་ལྟ་བུ་ཆགས་ཀྱི་འདུག གཙོ་བོ་རྒྱུ་མཚན་ལ་བསམ་བློ་གཏོང་དགོས། ཚན་རིག་པས་ཞིབ་འཇུག་བྱས་ཏེ་བྱམས་བརྩེ་གལ་ཆེན་པོ་ཡིན་པ་ཤོད་ཀྱི་ཡོད་པ་རེད། ང་རང་ཚོས་ཀྱང་རྒྱུན་ཤེས་ཐོག་ནས་(comon sense )བསམ་བློ་བཏང་བ་ཡིན་ན་ཁོང་ཁྲོ་ཅན་གྱི་མི་ཞིག་བྱེད་དམ་བྱམས་བརྩེ་ཅན་གྱི་མི་ཞིག་བྱེད་བརྟག་དཔྱད་བཏང་ན་ཤེས་ཀྱི་རེད། དེར་བརྟེན་ངོས་ནས་ནམ་རྒྱུན་དུས་རབས་ ༢༡ པ་འདི་བྱམས་བརྩེ་ལྡན་པའི་དུས་རབས་ཤིག་བཟོ་ཐུབ་ན་ཡག་པོ་འདུག་ཅེས་ཤོད་བཞིན་ཡོད། བྱམས་བརྩེའི་འཛམ་གླིང་བཟོ་བར་ཆོས་བརྒྱུད་ཁག་ཚང་མར་འགན་ཡོད་པ་རེད། ནུས་པ་ཡོད་པ་རེད། དེའི་ནང་ནས་ད་ལྟ་སྐབས་སུ་བབ་པ་ནི་སངས་རྒྱས་པའི་ཆོས་ཆགས་ཡོད་པ་རེད། ཨེ་ཤ་ཡའི་ལུང་པ་འབར་མ། ཐའེ་ལན། ཤྲི་ལིང་ག ཀམ་པོ་རི་ཡ། ལའོ་སི། དེ་བཞིན་ཝི་ཏི་ནམ་དང་རྒྱ་ནག ཀོ་རུ་ཡ། ཉི་ཧོང་། མན་གྷོ་ལི་ཡ། བོད་བཅས་ཚང་མ་ཕལ་ཆེར་ཡོངས་རྫོགས་ནང་པའི་རྒྱལ་ཁབ་རེད། ཡུལ་ལུང་འདི་དག་གི་ནང་དུ་ཁ་ཆེའི་ཆོས་ལུགས་བྱེད་མཁན་དང་ཡི་ཤུའི་ཆོས་ལུགས་བྱེད་མཁན། ཧིན་རྡིའི་ཆོས་ལུགས་བྱེད་མཁན་ཡོང་གི་ཡོད་ཀྱང་། ལུང་པ་སྤྱི་ཡོངས་ནས་བཤད་ན་འདི་དག་ནི་ཕ་མེས་ནས་ནང་པའི་ལུང་པ་སངས་རྒྱས་པའི་ཆོས་བྱེད་མཁན་ཆགས་ཀྱི་འདུག
བཅོམ་ལྡན་འདས་སངས་རྒྱས་ནས་ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་ནང་དུ་གནས་པར་བྱ། །ཞེས་བཅོམ་ལྡན་འདས་ཀྱིས་ཟབ་པ་དང་ཞི་བ་སྤྲོས་བྲལ་འོད་གསལ་བ་འདུས་མ་བྱས་པའི་ཆོས་ཤིག་མངོན་དུ་གྱུར་ནས་བཅོམ་ལྡན་འདས་ཁོང་གིས་ཉམས་ལེན་གནང་། ཉམས་ལེན་གནང་བའི་འབྲས་བུར་དྲི་མ་མཐའ་དག་བཅོམ་ནས་མངོན་པར་རྫོགས་པར་སངས་རྒྱས་པ་བྱུང་སོང་ཡང་། ངས་ཟབ་པ་དང་ཞི་བ་སྤྲོས་བྲལ་འོད་གསལ་བ་འདུས་མ་བྱས་པའི་ཆོས་འདི་ད་ལྟ་མར་བཤད་པ་ཡིན་ན་སྐབས་དེར་རྒྱ་གར་ལ་ཡོད་པའི་ཆོས་ལུགས་བདག་ཏུ་སྨྲ་བའམ་བདག་ཏུ་ལྟ་བ་ཆགས་ཡོད་པས་བཅོམ་ལྡན་འདས་ཀྱིས་གསུང་རྒྱུ་དེ་རན་པོ་ཞིག་ཡོང་གི་མེད་པས་གནས་སྐབས་ངས་ཆོས་གསུང་གི་མིན་ཞེས་ཞག་ཞེ་དགུའི་རིང་ལ་བཅོམ་ལྡན་འདས་ཀྱིས་ཆོས་གསུངས་ཡོད་པ་མ་རེད། རིམ་གྱིས་བཅོམ་ལྡན་འདས་ཀྱི་འཁྲིས་ལ་བཅར་མཁན་མང་པོ་ཞིག་གིས་བཅོམ་ལྡན་འདས་གྲུབ་ཐོབ་ཆེན་པོ་ཞིག་ཡིན་པ་མཐོང་སྡོད་ཀྱི་ཡོད་པ་དང་། ལོ་དྲུག་དཀའ་སྤྱད་གནང་བ་སོགས་ཀྱིས་མི་འདྲ་བ་ཞིག་ཏུ་མཐོང་གི་ཡོད་པ་རེད། བཅོམ་ལྡན་འདས་ཀྱི་འཁྲིས་ལ་བཅར་མཁན་མང་དུ་མང་དུ་ཕྱིན་ནས་ཟབ་ཞི་སྤྲོས་བྲལ་འོད་གསལ་བ་འདུས་མ་བྱས་ཀྱི་སྙིང་དོན་ཡོད་པའི་ཆོས་དེ་བསྟན་ནའང་ཕལ་ཆེར་རན་ས་རེད་དགོངས་པའི་སྐབས་སུ་ཝ་ར་ཎ་སི་རུ་ཆོས་འཁོར་དང་པོ་གསུངས་པ་རེད། བཅོམ་ལྡན་འདས་ཀྱི་ཆོས་འཁོར་དང་པོ་བདེན་པ་བཞིའི་ཆོས་འཁོར་རེད། སྡུག་བསྔལ་བདེན་པ། ཀུན་འབྱུང་བདེན་པ། འགོག་པའི་བདེན་པ། ལམ་གྱི་བདེན་པ་སོགས་བདེན་པ་བཞི་དང་། མི་རྟག་སོགས་བཅུ་དྲུག དེའི་དོན་དག་རྡོག་རྡོག་ཅིག་བཤད་པ་ཡིན་ན་ཆོས་ཀྱི་སྡོམ་བཞི། ལྟ་བ་བཀར་བཏགས་ཀྱི་ཕྱག་རྒྱ་བཞི། འདུས་བྱས་ཐམས་ཅད་མི་རྟག་པ། ཟག་བཅས་ཐམས་ཅད་སྡུག་བསྔལ་བ། ཆོས་ཐམས་ཅད་སྟོང་ཞིང་བདག་མེད་པ། མྱ་ངལ་ལས་འདས་པ་ཞི་བ་ཞེས་གསུངས་འདུག
བཅོམ་ལྡན་འདས་ཀྱིས་ཤམ་ཐབས་ཟླུམ་པོར་བགོ་བ་ལ་བསླབ་པར་བྱའོ་ཞེས་གསུངས་པ་ནས་བཟུང་འདུལ་བའི་སྐོར་གསུངས་ཀྱི་ཡོད་པ་རེད། དེ་སྔོན་པཱ་ལིའི་སྐད་ཀྱི་སྡེ་སྣོད་གསུམ་གྱི་བཀའ་བསྡུ་གནང་ནས་ཡོང་སྐབས་རིམ་གྱིས་པཱ་ལའི་ནང་ལ་སྡེ་སྣོད་གསུམ་བྱུང་བ་རེད། དེང་སང་ཤྲི་ལིང་ག འབར་མ། ཐའེ་ལན། ཀམ་པོ་རི་ཡ། ལའོ་སི། དེ་བཞིན་ཝི་ཏི་ནམ་དང་། རྒྱ་ནག སོག་པོ། བོད་བཅས་ཚང་མ་ལ་འདུལ་བའི་ཉམས་ལེན་ཡོད་པ་རེད། བདེན་པ་བཞིའི་རྣམ་གཞག་ནང་པ་ཡོངས་རྫོགས་ལ་ཁྱབ་ཡོད། ཆོས་ཀྱི་ལྟ་གྲུབ་ཀྱི་རྨང་གཞི་ཆགས་ཡོད་པ་རེད། ལྟ་བ་བཀར་བཏགས་ཀྱི་ཕྱག་རྒྱ་བཞི་མི་འདོད་མཁན་ཡིན་ན་དད་པའི་ཆ་ནས་ནང་པ་ཡིན་ནའང་ལྟ་གྲུབ་ཀྱི་ཆ་ནས་ནང་པ་མ་རེད་ཅེས་རྗོད་མཁན་ཡང་ཡོད་པ་རེད། ཅེས་སོགས་སངས་རྒྱས་པའི་ཆོས་ལེགས་སྦྱར་གྱི་ཆོས་བརྒྱུད་དང་པཱ་ལའི་ཆོས་བརྒྱུད་གཉིས་ཀྱི་ནང་དུ་འདུ་བ་དང་། པཱ་ལའི་ཆོས་བརྒྱུད་དུ་སྡེ་སྣོད་གསུམ་དང་ལེགས་སྦྱར་གྱི་ཆོས་བརྒྱུད་དུ་འཁོར་ལོ་བར་པ་དང་ཐ་མ་ཡོད་སྐོར་བཀའ་གནང་རྗེས། ལེགས་སྦྱར་གྱི་ཆོས་བརྒྱུད་ནི་རིག་པ་རྩལ་འདོན་བྱས་ཏེ་རྒྱུ་མཚན་ལ་བརྟེན་ནས་དཔྱད་པ་གཏོང་གི་ཡོད་པས། པཎ་གྲུབ་བཅུ་བདུན་བསམ་བློ་བ་ཆེན་པོ་ཡིན་སྐོར་བཅས་བཀའ་གནང་རྗེས་བྱང་ཆུབ་སེམས་འགྲེལ་དང་ལག་ལེན་སོ་བདུན་མའི་བརྗོད་བྱ་སྤྱི་སྒྲོམ་ངོ་སྤྲོད་མཛད། དེ་ཡང་བྱང་ཆུབ་སེམས་འགྲེལ་ནི་ལྟ་གྲུབ་ཀྱི་རྣམ་གཞག་ཡིན་པ་དང་། ལྟ་གྲུབ་ཉམས་ལེན་གྱི་ནང་དུ་ཁྲིད་པའི་སྐབས་སུ་ལག་ལེན་སོ་བདུན་མའི་ནང་དུ་ཁྲིད་ནས་ཉམས་སུ་ལེན་དགོས་སྐོར་ངོ་སྤྲོད་གྲུབ་མཚམས། རྡ་རམ་ས་ལར་ཕེབས་ཡོད་མཁན་དང་། ཝི་ཏི་ནམ་གྱི་Hanoi དང་། Ho chi minh ciiy གཞན་ཡང་། Hai phong བཅས་ས་ཁུལ་གསུམ་ནས་དྲ་ཐོག་བརྒྱུད་བཀའ་སློབ་ལ་གསན་གཟིགས་གནང་མཁན་བཅས་ཀྱི་ཁྲོད་ནས་ཁག་ཅིག་གིས་དྲི་བ་ཞུས་པར་བཀའ་ལན་སྩལ་པ་དང་། མཐར་དགེ་སེམས་མངོན་དུ་གྱུར་བའི་ཐོག་ནས་ཤི་བ་ཡིན་ན་སྐྱེ་བ་རྗེས་མ་སྐྱེ་བ་བཟང་པོ་ཞིག་ལེན་པ་བརྒྱ་ཆའི་བརྒྱ་ཐམ་པ་ཐག་ཆོད་པ་རེད། ཅེས་བཀའ་གནང་སྟེ་ཉིན་གཉིས་རིང་གི་ཝི་ཏི་ནམ་གྱི་ཆོས་ཞུ་བར་ཆོས་འབྲེལ་གནང་སྒོ་མཇུག་ལེགས་པར་གྲུབ་ཡོད་པ་བཅས།།
