༄༅།།ཕྱི་ལོ་ ༢༠༡༦ ཟླ་ ༡༠ ཚེས་ ༣ ཉིན་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་ཐའེ་ཝན་གྱི་དད་ལྡན་ཆོས་ཞུ་བས་ཇི་ལྟར་གསོལ་བ་བཏབ་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་ཆོས་ཞུ་བ་རྣམས་ལ་འཕགས་པ་ལྷས་མཛད་པའི་དབུ་མ་བཞི་བརྒྱ་པའི་གསུང་ཆོས་དབུ་འཛུགས་མཛད་ཡོད་པ་རེད།
དེ་ཡང་སྔ་དྲོ་ ༨ དང་སྐར་མ་ ༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ཕོ་བྲང་ནས་སྤོས་སྣེས་མདུན་བསུ་དང་བཅས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་བསྐྱངས་ཏེ་བཞུགས་ཁྲིར་༸ཞབས་སོར་འཁོད་མཚམས་རྒྱ་སྐད་ཀྱི་ཐོག་ཤེས་རབ་སྙིང་པོ་གསུང་འདོན་གནང་པ་དང་། དེ་ནས་༸གོང་ས་མཆོག་གིས་ཆོས་ཞུ་བ་རྣམས་ལ་འཚམ་འདྲིའི་བཀའ་སློབ་སྩལ་དོན། དེ་རིང་ཆེད་དུ་བྱ་བའི་གདུལ་བྱ་གཙོ་བོ་ཐའེ་ཝན་ནས་ཆེད་དུ་ཕེབས་པའི་བསྟན་འཛིན་བྱམས་ཆེན་གྱི་ཆོས་ཚོགས་ཀྱི་རབ་བྱུང་ཕོ་མོ་དང་། ཉེ་ཆར་གསར་དུ་སྒྲུབ་པའི་རབ་བྱུང་ཕོ་མོ་རྣམ་པ་ཚོ། དེ་བཞིན་གནས་བརྟན་བགྲེས་པ་ཚོ་དང་། བསྟན་འཛིན་བྱམས་ཆེན་གྱི་ཆོས་ཚོགས་ཁུངས་ཀྱི་ཆོས་གྲོགས་ཚོ། དེ་མིན་གྱི་ཐའེ་ཝན་ལ་ཡོད་པའི་ས་དགེ་བཀའ་རྙིང་རིས་མེད་ཀྱི་ཆོས་ཚོགས་ནས་ཕེབས་པ་རྣམས་དང་། ཕལ་ཆེར་སྐམ་ས་ཆེན་མོ་ནས་ཀྱང་འགའ་ཤས་ཡོད་པ་རེད།
ལོ་རྒྱུས་ཀྱི་ཐོག་ནས་སངས་རྒྱས་བཅོམ་ལྡན་འདས་ཀྱི་ཆོས་ཉམས་ལེན་གྱིས་རྗེས་སུ་འབྲང་མཁན་ལ་རྒྱ་མི་རིགས་སྤྱི་ཡོངས་ཀྱི་ཆ་ནས་སངས་རྒྱས་ཀྱི་རྗེས་འབྲངས་ཆགས་ཀྱི་འདུག འཛམ་གླིར་འདིར་རྒྱ་རིགས་ཡོད་ས་དཔེར་ན་ཨ་རིའི་ལོ་སི་ཨན་ཇི་ལི་སི་(os angeles)དང་ནེའུ་ཡོག་སོགས་རྒྱ་མི་རིགས་མང་པོ་ཡོད་སའི་ས་ཁུལ་དུ་ནང་པའི་ལྷ་ཁང་འདུག དེ་བཞིན་ཝི་ཏི་ནམ་གྱི་ཚོགས་པ་ཡོད་ས་མང་ཆེ་བའང་ནང་པའི་ལྷ་ཁང་འདུག ཨོ་སི་ཁྲི་ལི་ཡར་མཚོན་ནའང་ཝི་ཏི་ནམ་གྱི་ཆོས་ཚོགས་ཤིག་ཡོད་པ་དང་ནང་པའི་ལྷ་ཁང་ཡང་ཆེན་པོ་གཅིག་འདུག མ་ལིས་ཤི་ཡ་མཚོན་ནའང་རྒྱ་རིགས་མང་པོ་ཡོད་པ་དང་མང་པོ་ཞིག་ནང་པ་རེད། ཨིན་དི་ནི་ཞིས་ཡ་ཡང་དེ་བཞིན་རེད། དེར་བརྟེན་ལོ་རྒྱུས་ཀྱི་ཐོག་ནས་ཕ་མེས་ནས་སངས་རྒྱས་པའི་ཆོས་ཀྱི་རྗེས་སུ་འབྲང་མཁན་ཆགས་ཡོད་པ་རེད།
ངོས་ཀྱིས་ནམ་རྒྱུན་འདི་ལྟར་བརྗོད་ཀྱི་ཡོད། པཱ་ལའི་ཆོས་བརྒྱུད་འཛིན་མཁན་གྱི་འབར་མ། ཐའེ་ལན་ཌི། ཤྲིལིངྒ། ཀམ་པོ་ཌི་ཡ། ལའོ་ས་སོགས་བཅོམ་ལྡན་འདས་ཀྱི་དགེ་ཕྲུག་རྒན་ཤོས་ཆགས་ཡོད་པ་རེད། དེའི་རྗེས་ལ་ཏཀྴ་ཤི་ལ་དང་ནཱ་ལེནྡྲ། བྷྲི་ཀྲ་མ་ཤི་ལ་སོགས་ཡར་རྒྱས་ཀྱིས་བསྟན་པའི་གཞི་མ་ཚུགས་ནས་ལེགས་སྦྱར་གྱི་ཆོས་བརྒྱུད་དེ་གཙོ་བོ་རེད། དེར་བརྟེན་པཱ་ལའི་ཆོས་བརྒྱུད་འཛིན་པ་རྣམས་ནི་བཅོམ་ལྡན་འདས་ཀྱི་དགེ་ཕྲུག་རྒན་ཤོས་རེད། དེ་ནས་འདུལ་བའི་ཉམས་བཞེས་པཱ་ལའི་ཆོས་བརྒྱུད་དང་ལེགས་སྦྱར་གྱི་ཆོས་བརྒྱུད་གཉིས་ཕྲན་བུའི་རྒྱས་བསྡུས་མ་གཏོགས་གཅིག་མཚུངས་རེད། ལེགས་སྦྱར་གྱི་ཆོས་བརྒྱུད་འཛིན་མཁན་སྔ་ཤོས་ཕལ་ཆེར་རྒྱ་ནག་ཡིན་པ་འདྲ། དེ་ཡང་ཀླུ་སྒྲུབ་ཀྱི་རྗེས་འབྲང་ཆགས་པ་རེད།
ལེགས་སྦྱར་ཆོས་བརྒྱུད་འཛིན་མཁན་གྱི་ངོས་ནས་བཤད་པ་ཡིན་ནའང་ཁྱོད་རང་ཚོ་དགེ་ཕྲུག་རྒན་པ་ཆགས་བསྡད་ཡོད་པ་རེད། རྒྱ་ནག་ལ་དུས་རབས་བདུན་པའི་གོང་ནས་ནང་ཆོས་དར་བ་དང་བོད་ལ་དུས་རབས་བདུན་པ་ནས་མགོ་ཚུགས་པ་རེད། དེར་བརྟེན་ལོ་རྒྱུས་ཀྱི་ཐོག་ནས་རྒྱ་མི་རིགས་ལེགས་སྦྱར་ཆོས་བརྒྱུད་འཛིན་མཁན་གྱི་ནང་ནས་བསླབ་པ་བགྲེས་པ་དང་དགེ་ཕྲུག་རྒན་པ་ཆགས་བསྡད་ཡོད། ང་ཚོ་བོད་དང་སོག་པོ་ནི་དགེ་ཕྲུག་གཞོན་པ་ལྟ་བུ་རེད། ཡིན་ནའང་། ཤེས་ཚད་བསྡུར་དགོས་བྱུང་ན་དགེ་ཕྲུག་གཞོན་པ་ཚོ་སྐྱོ་པོ་རང་ཡོད་པ་མ་རེད།
མཁན་ཆེན་ཞི་བ་འཚོ་ནི་ལྟ་གྲུབ་སྨྲ་བའི་མཁས་པ་ཆེན་པོ་ཡིན་པ་དང་། དེའི་ཐོག་ལ་ཁོང་ཚད་མ་ལ་ཧ་ཅང་མཁས་པ་ཡིན་པས་བོད་ལ་ནཱ་ལེནྡྲའི་ཆོས་བརྒྱུད་ངོ་སྤྲོད་གནང་བ་དང་། ཁོ་རང་ལྟ་གྲུབ་སྨྲ་བ་དང་ཚད་མ་བ་ཡིན་པས་ཁོང་གི་དགེ་ཕྲུག་ཚོས་ཀྱང་ལྟ་གྲུབ་གཏན་ལ་ཕབ་དུས་ཚད་རིག་པའི་ལམ་ནས་གཏན་ལ་ཕབ་པ་གཙོ་བོ་བྱས་པ་དང་། ཁོང་གི་དྲིན་ལ་བརྟེན་ནས་བོད་གངས་ཅན་ལྗོངས་རང་ནས་ཀྱང་ས་སྐྱ་པཎྡྲིཏ་ཀུན་དགའ་རྒྱན་མཚན་གྱིས་རིག་གཏེར་མཛད་ཡོད་པ་དང་། དེ་ལ་སོགས་པ་བོད་གངས་ཅན་ལྗོངས་ལ་ཚད་མའི་གཞུང་མཛད་མཁན་མང་པོ་བྱུང་འདུག
ཉེ་ཆར་ང་ཚོས་བསྡོམས་ཐོར་ཞིབ་འཇུག་བྱེད་སྐབས། རྒྱ་གར་ནས་ཚུར་བསྒྱུར་བ་བཀའ་འགྱུར་དང་བསྟན་འགྱུར་པོ་ཏི་སུམ་བརྒྱ་ཙམ་ལ་བོད་གངས་ཅན་གྱི་ལྗོངས་ནས་བོད་ཀྱི་མཁས་པ་ཚོས་དགོངས་འགྲེལ་བརྩམས་པ་ཕལ་ཆེར་པོ་ཏི་ཁྲི་གཉིས་ཙམ་འདུག གང་ལྟར་བོད་ལ་དར་སྲོལ་ཧ་ཅང་ཆེན་པོ་བྱུང་འདུག གཙོ་བོ་མཁན་ཆེན་ཞི་བ་འཚོའི་བཀའ་དྲིན་རེད། ཁོང་རང་ཉིད་ནཱ་ལེནྡྲའི་མཁས་པའི་དབང་པོ་ཡིན་པ་དང་། བཤད་མ་ཐག་པ་ལྟར་ལྟ་གྲུབ་ཀྱི་སྐོར་བཤད་སྐབས་ཚད་མའི་ལམ་ནས་གསུང་མཁན་ཞིག་ཡིན། དཔེར་ན། དབུ་མ་རྒྱན་གྱི་མགོ་དེར་ལམ་སེང་གཏན་ཚིགས་བཀོད་ནས་ལྟ་བའི་རྣམ་གཞག་གསུང་གི་འདུག གཅིག་དུ་བྲལ་གྱི་གཏན་ཚིགས་བྱས་ནས་གཙོ་བོ་གཏན་ཚིགས་རང་བྱས་ནས་གསུངས་ཡོད། གང་ལྟར་སངས་རྒྱས་པའི་གཞུང་ནས་གསུང་པའི་ཚད་མ་རིག་པ་དེ་ཕལ་ཆེར་བོད་ལ་ཡོད་པ་བཞིན་ནང་པའི་ལུང་པ་གཞན་སུ་ལའང་མེད་པ་ལྟ་བུ་འདུག དེ་དང་ཆབས་ཅིག་དེ་ལྟ་བུའི་བརྗོད་བྱ་ལྟ་གྲུབ་དང་ཚད་མའི་སྐོར་བཤད་སྐབས་ཕལ་ཆེར་བོད་ཡིག་དང་བོད་སྐད་ལས་ལྷག་པ་མི་འདུག སྔ་མོ་ལེགས་སྦྱར་གྱི་གཞུང་བོད་ལ་སྒྱུར་གྱིན་སྒྱུར་གྱིན་བོད་སྐད་ཡར་རྒྱས་ཕྱིན་པ་རེད། དེར་བརྟེན་ལེགས་སྦྱར་དང་བོད་སྐད་ཚིག་གཉིས་ཏག་ཏག་འགྲོ་གི་ཡོད།
གང་ལྟར་དེ་རིང་འདིར་ལོ་རྒྱུས་ཀྱི་ཐོག་ནས་བཅོམ་ལྡན་འདས་ཀྱི་རྗེས་འབྲང་། དེའི་ནང་ཚན་ནས་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་གཅིག་མཚུངས་ཡིན་སྟབས། ཁྱེད་རང་ཚོར་ལོ་མང་ཞིག་ནས་ཆོས་འབྲེལ་བྱེད་རྒྱུའི་གོ་སྐབས་བྱུང་བ་རེད། དེ་རིང་འདིར་ཡང་བསྐྱར་ཆོས་འབྲེལ་བྱེད་རྒྱུའི་གོ་སྐབས་བྱུང་བ་ངོས་རང་ཧ་ཅང་དགའ་པོ་བྱུང་། ཁྱེད་རང་ཚོ་གྲ་སྒྲིག་བྱེད་མཁན་དང་སྒེར་པ་སོ་སོས་འགྲོ་སོང་བཏང་སྟེ་དཀའ་ངལ་ཁྱད་དུ་བསད་པའི་ཐོག་ནས་འདིར་ཡོང་བ་རེད། ཐུགས་རྗེ་ཆེ་ཟེར་གྱི་ཡིན།
དེ་དང་ཆབས་ཅིག་ཡུལ་གྲུ་གཞན་དེ་སྔ་སངས་རྒྱས་པའི་ཆོས་མ་དར་སའི་ནུབ་ཕྱོགས་རྒྱལ་ཁབ་ཁག་ནས་ནམ་རྒྱུན་ཡོང་བཞིན་ཡོད་རེད། དེ་རིང་ཡང་འདིར་གང་འཚམ་སླེབས་ཡོད་འདུག ནང་པའི་ཆོས་ཟེར་ན་ལོ་རྒྱུས་ཐོག་ནས་ཕལ་ཆེར་ཨེ་ཤ་ཡའི་ཆོས་ལྟ་བུ་ཆགས་ཡོད། ལོ་རྒྱུས་ཐོག་ནས་དཀྱིལ་ཤར་ཡུལ་གྲུ་ Middle East ནས་བྱུང་པའི་ཡི་ཤུའི་ཆོས་ལ་ཆ་བཞག་ན་ཨེ་ཤ་ཡའི་ལུང་པའི་ནང་ལ་མང་པོ་ཡོད་རེད། ཆོས་བརྒྱུད་གཙོ་ཆེ་བ་འདི་དག་ཧ་ལམ་རྒྱལ་སྤྱིའི་ཆོས་ལྟ་བུ་ཆགས་ཀྱི་འདུག དེར་བརྟེན་ནང་པའི་ཆོས་ཡིན་ནའང་དེ་སྔ་ཤར་ཕྱོགས་ནས་ཡོང་བ་རེད། དེ་རིང་ཁ་སང་འཛམ་གླིང་སྒང་ལ་ཕན་ཚུན་ཧ་ཅང་གི་འབྲེལ་བ་ཟབ་པོ་ཡོད་པ་དང་། འགྲོ་བཞུད་བདེ་པོ་དང་གནས་ཚུལ་མང་པོ་གོ་ཐུབ་ཀྱི་ཡོད་པས་མང་པོ་ཞིག་གིས་སངས་རྒྱས་པའི་ཆོས་ལ་དོ་སྣང་བྱེད་ཀྱི་འདུག དེ་རིང་འདི་ལའང་ནམ་རྒྱུན་ནས་ཡོང་གི་ཡོད་ལྟར་མང་པོ་ཞིག་སླེབས་ཡོད་པ་རེད། དེ་དང་ཆབས་གཅིག་རྒྱ་གར་རང་གི་ཡུལ་པ་གང་འཚམ་ཡོད་པ་འདྲ། ཁྱེད་རང་ཚོ་བཅོམ་ལྡན་འདས་རང་གི་འཁྲུངས་ཡུལ། དཔལ་ནཱ་ལེནྡྲའི་པཎ་གྲུབ་བཅུ་བདུན་ཚང་མ་རྒྱ་གར་བ་རེད། རྒྱ་གར་བ་ཚོ་ལ་ཆ་བཞག་ན་ནཱ་ལེནྡྲའི་མཁས་པའི་དབང་པོ་ཚོས་མཛད་པའི་རྣམ་དཔྱོད་ཀྱི་ལེགས་བཤད་རྣམས་རྒྱ་གར་རང་གི་རིག་གཞུང་ཆགས་ཀྱི་ཡོད། དེར་བརྟེན་ཁྱེད་རང་ཚོ་རྒྱ་གར་བ་འདིར་ཡོད་པ་རྣམས་སོ་སོའི་ཕ་མེས་ཀྱི་རིག་གནས་གཏིང་ཟབ་ཡོད་པ་འདི་ལ་བདག་པོ་རྒྱག་གི་ཡོད་རེད། དེ་ལ་དོ་སྣང་བྱེད་པ་ཧ་ཅང་གི་ཡག་པོ་རེད། ཕ་མེས་ཀྱི་གཅེས་ནོར་ཆགས་ཡོད། དེ་རིང་ཁ་སང་གི་རྒྱ་གར་ནང་ལ་སངས་རྒྱས་པའི་ཆོས་ཡིན་ནའང་འདྲ། སངས་རྒྱས་པའི་ལྟ་གྲུབ་ཡིན་ནའང་འདྲ། དེ་བཞིན་སངས་རྒྱས་པའི་ཚད་མ་རིག་པའི་སྐོར་ལ་དོ་སྣང་བྱེད་མཁན་མང་དུ་འགྲོ་བཞིན་འདུག འདི་ཧ་ཅང་ཡག་པོ་རེད། རང་གི་ཕ་མེས་ཀྱི་གཅེས་ནོར་ལ་དོ་སྣང་བྱས་ནས་བདག་པོ་བརྒྱབ་གི་ཡོད་རེད། ཧ་ཅང་ཡག་པོ་རེད།
དེ་རིང་ཆོས་འབྲེལ་བྱེད་རྒྱུ་དེ་སངས་རྒྱས་པའི་ཆོས་དཔལ་ནལེནྡྲའི་བརྒྱུད་པ་གཙོ་བོ་དཔལ་མགོན་འཕགས་པ་ཀླུ་སྒྲུབ་ཀྱི་སྲས་ཀྱི་མཐུ་བོ་སློབ་དཔོན་ཨཱརྱ་དེ་བའི་གསུང་དབུ་མ་བཞི་བརྒྱ་པའི་བཤད་ལུང་མདོར་བསྡུས་ཤིག་ཞུ་རྒྱུ་དང་། ངོས་ཀྱིས་བཤད་ལུང་ཞུ་ས་ནི་ཁུ་ནུ་བླ་མ་རིན་པོ་ཆེ་བསྟན་འཛིན་རྒྱལ་མཚན་གྱི་སྐུ་མདུན་ནས་གཞུང་ཆེན་བཅུ་གསུམ་ནང་ནས་བྱམས་ཆོས་སྡེ་ལྔ་ངོས་ལ་ཐོབ་པ་རེད། བྱམས་ཆོས་སྡེ་ལྔའི་མངོན་རྟོགས་རྒྱན་ནི་གླིང་རིན་པོ་ཆེ་སྐུ་མདུན་ནས་ཞུས་པ་ཡིན། དེ་མིན་གྱི་བྱམས་ཆོས་ལྷག་མ་རྣམས་ནི་རྒན་རིག་འཛིན་བསྟན་པའི་སྐུ་མདུན་ནས་ཞུས་པ་ཡིན། གཞུང་ཆེན་བཅུ་གསུམ་གྱི་ནང་གི་དབུ་མ་རིགས་ཚོགས་དྲུག་མཚན་ཞབས་རིན་པོ་ཆེའི་སྐུ་མདུན་ནས་ཚར་གཅིག་ཐོབ་པ་རེད། རྩ་བ་ཤེས་རབ་ཁུ་ནུ་བླ་མ་རིན་པོ་ཆེའི་སྐུ་མདུན་ནས་ཚར་གཅིག་ཐོབ་ཡོད། ཁོང་ལེགས་སྦྱར་ལ་མཁས་པ་ཡིན་པས་ལེགས་སྦྱར་གྱི་གཞུང་ནས་ཏོག་ཙམ་གོ་བསྡུར་གནང་ནས་བཤད་པ་གནང་སྟེ་ཧ་ཅང་ཕན་ཐོགས་ཆེན་པོ་ཡོང་གི་འདུག གཞུང་ཆེན་བཅུ་གསུམ་ནང་གི་བཞི་བརྒྱ་པ་ནི་ཁུ་ནུ་བླ་མ་རིན་པོ་ཆེའི་སྐུ་མདུན་ནས་ངོས་ལ་ཐོབ་པ་རེད། དེ་རིང་འདིར་རྟེན་དཔལ་ལྡན་ཟླ་བ་གྲགས་པས་མཛད་པའི་བཞི་བརྒྱ་པའི་འགྲེལ་པའི་མགོ་ནས་རྟེན་འབྲེལ་གྱི་ཚུལ་དུ་མར་ཏོག་ཙམ་བཀླག་དགོས་བསམ་པ་དྲན་བྱུང་། ཡིན་ནའང་དེའི་ལུང་ངོས་ལ་ཐོབ་ཡོད་པ་མ་རེད། ཞེས་སོགས་ཀྱི་བཀའ་སློབ་དང་ཆོས་འབྲེལ་དབུ་འཛུགས་ཀྱིས་དངོས་བསྟན་སྟོང་ཉིད་ཀྱི་རིམ་པ་དང་སྦས་དོན་མངོན་རྟོགས་ཀྱི་རིམ་པ་ཇི་ལྟར་སླེབས་པའི་སྐོར་སོགས་ངོ་སྤྲོད་མཛད།
ཆུ་ཚོད་ ༡༠ ཙམ་ནས་དད་ལྡན་ཆོས་ཞུ་བ་རྣམས་ལ་དོགས་འདྲིའི་སྐོར་བཀའ་འདྲི་ཞུ་རྒྱུའི་གོ་སྐབས་གནང་བ་ལྟར་ཆོས་ཞུ་བའི་ཁྲོད་བྱང་ཆུབ་སེམས་ཀྱི་ཕན་ཡོན་དང་། ཉིན་ཞག་ཕྲུགས་གཅིག་རིང་ཇི་ལྟར་དུ་སྒོམ་དགོས་མིན་སོགས་བཀའ་འདྲི་ཞུས་ཤིང་། དེ་རྗེས་གསུང་ཆོས་འཕྲོ་སྐྱོང་གིས་ཆུ་ཚོད་ ༡༡ ཡོལ་ནས་ཉིན་དང་པོའི་གསུང་ཆོས་མཇུག་ལེགས་པར་སྒྲིལ་ཡོད་པ་དང་། ཐེངས་འདིར་ཉིན་གྲངས་བཞིའི་རིང་གི་དབུ་མ་བཞི་བརྒྱ་པའི་གསུང་ཆོས་ལ་ཐེ་ཝན་ནས་ཆོས་ཞུ་བ་གྲངས་ ༡༡༠༠ དང་། རྒྱ་ནག་ཆོས་ཞུ་བ་གྲངས་ ༣༢ ཕེབས་ཡོད་པ་དང་། དེ་བཞིན་རྒྱ་གར་གྱིས་མཚོན་ཕྱི་རྒྱལ་ཡུལ་གྲུ་ཁག་ ༦༥ ནས་བཅར་བའི་ཆོས་ཞུ་བ་གྲངས་ ༡༦༣༨ དང་། རང་རིགས་བཅས་ཁྱོན་མི་གྲངས་ ༦༦༠༠ བརྒལ་བ་ཕེབས་ཡོད་པ་བཅས།།
