༄༅། །ཕྱི་ལོ་ ༢༠༡༦ ཟླ་ ༩ ཚེས་ ༡༩ ཉིན་༸གོང་ས་མཆོག་སི་ཊར་སི་བྷག་ Strasbourg ནས་པོ་ལེན་ཌིར་ཆིབས་ཞལ་མ་བསྒྱུར་གོང་ Elle magazine ཞེས་པའི་དུས་དེབ་ཀྱི་གསར་འགོད་པ་ལྕམ་སྐུ་ Dorothée Werner ལགས་ཀྱིས་བཀའ་འདྲི་ཞུས་པར་ཁོར་ཡུག་གི་གལ་གནད་དང་།འགྲོ་བ་མི་རྣམས་ལ་གཅིག་མཚུངས་ཀྱི་འདུ་ཤེས་དགོས་ཚུལ། དེ་བཞིན་བུད་མེད་ཀྱི་གནས་བབས་སྤྱི་དང་ལྷག་པར་སྤྱི་ཚོགས་ནང་བུད་མེད་ཚོས་འགོ་ཁྲིད་ཀྱི་འགན་ཁུར་མང་ཙམ་ལེན་དགོས་པའི་གལ་གནད་སོགས་ཀྱི་དྲི་བར་བཀའ་ལན་མཛད།
དེ་རྗེས་སི་ཊར་སི་བྷག་གི་རིག་གཞུང་དང་འབྲེལ་བའི་བདུན་རེའི་དུས་དེབ་ weekly cultural magazine ཞེས་པའི་གསར་འགོད་པའི་བཅར་འདྲི་ཞུས་པར་བཀའ་ལན་སྩལ་ཡོད་པ་དང་། དེ་ཡང་༸གོང་ས་མཆོག་གིས་སྐྱེ་བ་སྔ་མ་ཧ་ཅང་གསལ་པོར་དྲན་མཁན་གྱི་བྱིས་པ་མང་པོ་ཞིག་གཟིགས་མྱོང་ཡོད་སྐོར་དང་།༸གོང་ས་མཆོག་སྔ་མོ་ནས་ཚན་རིག་ལ་ཐུགས་སྣང་མཛད་པའི་སྐོར་སོགས་བཀའ་ལན་སྩལ་རྗེས་ཆིབས་སྒྱུར་གོ་སྒྲིག་གི་དང་བླངས་ཞབས་ཞུ་བ་མི་གྲངས་༥༠ཙམ་ལ་མཇལ་ཁ་དང་སྐུ་པར་ལྷན་སྒྲོན་གནང་བ་དང་། དེ་ནས་སི་ཊར་སི་བྷག་ནས་མཁའ་ལམ་བརྒྱུད་པོ་ལེན་ཌིའི་གྲོང་ཁྱེར་ Wroclaw གནམ་ཐང་དུ་༸ཞབས་སོར་འཁོད།སྐབས་དེར་གྲོང་སྡེའི་སྤྱི་ཁྱབ་པ་སྐུ་ཞབས་ Rafal Dutkiewicz མཆོག་གིས་ཕེབས་བསུའི་སྣེ་ལེན་ཞུས་ཏེ་བཞུགས་གནས་མགྲོན་ཁང་དུ་ཕེབས་སྐྱེལ་ཞུ་སྐབས་ཁུལ་དེར་གནས་སྡོད་བྱེད་མཁན་དང་སློབ་གཉེར་གནང་བཞིན་པའི་བོད་མི་རྣམས་ཀྱིས་ལག་ཏུ་དཀར་གཙང་མཇལ་དར་སོགས་ཐོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས།
༸གོང་ས་མཆོག་ཁུལ་དེར་༸ཞབས་སོར་འཁོད་མ་ཐག་ཆེད་མངགས་རྒྱལ་ས་ཝར་སོ་ནས་མཇལ་བཅར་དུ་བཅར་བའི་པོ་ལན་ཌིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་མཇལ་ཁ་སྩལ།
ཕྱི་ཚེས་ ༢༠ ཉིན་བཟོད་སྲན་དང་སྡུམ་སྒྲིག་ Forgiveness and Reconciliation ཅེས་པའི་བརྗོད་གཞི་དང་འབྲེལ་བའི་འགྲེམས་སྟོན་གཟིགས་སྐོར་མཛད་པ་དང་སྦྲགས། Depot History Centre ཞེས་པར་རང་དབང་གི་སྐོར་བཀའ་སློབ་སྩལ་བ་དང་།
ཚེས་ ༢༡ ཉིན་ཡོ་རོབ་རྒྱལ་ཁབ་པོ་ལན་ཌིའི་ Wroclaw གྲོང་ཁྱེར་ནས་རྒྱང་ཐག་སྤྱི་ལེ་༥༠སར་ཆགས་པའི་ Swidnica གྲོང་ཁྱེར་ནང་དུ་རྟེན་གཞི་བྱས་པའི་ཞི་བདེའི་མཆོད་ཁང་ Church of Peace ཞེས་པའི་ཡི་ཤུའི་ལྷ་ཁང་དུ་ཆིབས་སྒྱུར་བསྐྱངས།ལྷ་ཁང་དེ་ནི་འཛམ་གླིང་མཉམ་འབྲེལ་རྒྱལ་ཚོགས་ཀྱིས་འཛམ་གླིང་གཅེས་ནོར་དུ་ངོས་འཛིན་གནང་བཞིན་ཡོད་པ་དང་། དེ་ཉིན་གྱི་མཛད་འཕྲིན་ཐོག་མར་པོ་ལན་ཌིར་གནས་སྡོད་བྱེད་བཞིན་པའི་བོད་མི་དང་སོག་པོ་མི་གྲངས་༣༠ལྷག་གིས་མཇལ་ཁ་བཀའ་སློབ་སྩལ།
བོད་ལ་ཐུན་མོང་མ་ཡིན་པའི་སྐད་དང་ཡི་གེ་ཡོད་པ་དང་། དེང་སྐབས་ནང་པ་སངས་རྒྱས་པའི་ཆོས་ཚུལ་འགྲེལ་བཤད་ཡང་དག་པ་ཞིག་རྒྱག་དགོས་ན་བོད་སྐད་ལས་ལྷག་པ་མེད་སྐོར་བཀའ་སྩལ་བ་མ་ཟད། སྔ་མོ་བོད་པ་འགའ་ཤས་རང་ཉིད་བོད་ནས་ཡོང་བ་ཡིན།ཞེས་བརྗོད་རྒྱུར་ངོ་ཚ་བྱེད་མཁན་བྱུང་ཡང་དེང་སྐབས་དེ་ལྟ་བུ་བྱེད་མཁན་མེད་པ་དང་། བོད་མི་ཡིན་བསམས་པའི་གདེངས་སྤོབས་བྱ་རྒྱུར་རྒྱུ་མཚན་ཆ་ཚང་ཡོད་པའི་ལམ་སྟོན་དང་། དེ་བཞིན་རྒྱུ་མཚན་དང་གོམས་འདྲིས་ལ་གཞི་བཅོལ་ནས་ང་ཚོའི་རྒྱུད་ལ་བྱམས་བརྩེའི་ས་བོན་ཡོད་པ་དེ་རྒྱ་སྐྱེད་གཏོང་ཐབས་བྱེད་དགོས་པ་དང་། བཀའ་འགྱུར་བསྟན་འགྱུར་གྱི་གཞུང་གི་ནང་དུ་ནང་པའི་ཚན་རིག་དང་ལྟ་གྲུབ།དེ་བཞིན་ནང་ཆོས་ཉམས་ལེན་གྱི་སྐོར་ཧ་ཅང་ཕྱུག་པོ་ཡོད་པ་མ་ཟད་ནང་པའི་ཚན་རིག་དང་ལྟ་གྲུབ་ཀུན་བཏུས་ཀྱི་པོད་རྒྱས་བསྡུས་རྩོམ་སྒྲིག་པར་བསྐྲུན་ཟིན་དེ་བོད་ཡིག་ནང་བཀྲམ་ཡོད་པ་དང་། རིམ་བཞིན་ཨིན་སྐད་དང་རྒྱ་སྐད།འཇར་མན་སོགས་ནང་བསྒྱུར་རྒྱུའི་ལས་རིམ་ཞིག་བང་སྒྲིག་ཡོད་པས་དེབ་དེ་དག་བཀླག་ནས་གོ་བསྡུར་བྱེད་ཐུབ་ན་ཕན་ཐོགས་ཡོད་སྐོར་བཀའ་སྩལ།
དེ་རྗེས་མཇལ་ཞུ་བ་སོག་རིགས་རྣམས་ལ་སོག་ཡུལ་དུ་དར་ལམ་བརྒྱུད་ནས་སངས་རྒྱས་ཀྱི་བསྟན་པ་ཐོག་མ་དར་ཚུལ་དང་། བར་དུ་འགྲོ་མགོན་ཆོས་རྒྱལ་འཕགས་པས་སོག་ཡུལ་དུ་སངས་རྒྱས་ཀྱི་བསྟན་པ་སྤེལ་ཚུལ། དེ་རྗེས་༸རྒྱལ་དབང་སྐུ་ཕྲེང་གསུམ་པ་བསོད་ནམས་རྒྱ་མཚོས་སོག་ཡུལ་དུ་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛད་ཚུལ་དང་། དེ་བཞིན་༸གོང་ས་སྐུ་ཕྲེང་བཅུ་གསུམ་པ་མཆོག་སོག་ཡུལ་དུ་བཞུགས་པ་ཙམ་དུ་མ་ཟད། སོག་སྐད་མཁྱེན་གྱི་ཡོད་པ་དང་།བོད་སོག་གཉིས་ལོ་རྒྱུས་ཐོག་འབྲེལ་བ་ཧ་ཅང་ཉེ་པོ་ཡོད་པ་བཀའ་གནང་བ་དང་། མགོན་པོ་གང་ཉིད་མཆོག་ཕྱི་ལོ་ ༡༩༧༩ ལོར་སོག་ཡུལ་དུ་ཆིབས་སྒྱུར་ཐེངས་དང་པོ་བསྐྱངས་སྐབས་དེར་དགའ་ལྡན་ཐེག་ཆེན་གླིང་དུ་བརྟན་བཞུགས་ཕུལ་བར་ཚོགས་བཅར་བ་ཚང་མས་མིག་ནས་མཆི་མ་བཏང་བའི་སྐོར་དང་། མགོན་པོ་གང་ཉིད་མཆོག་གིས་སྟོང་ཉིད་ཀྱི་ལྟ་བར་ལོ་ངོ་ ༦༠ རིང་གོམས་འདྲིས་མཛད་པའི་རྐྱེན་དེ་ཡང་སོག་པོའི་མཚན་ཞབས་དངོས་གྲུབ་ཚོགས་གཉིས་ཀྱི་བཀའ་དྲིན་ལ་བརྟེན་ནས་བྱུང་བ་ཞིག་ཡིན་སྐོར་བཀའ་སློབ་སྩལ་རྗེས་ཞི་བདེའི་མཆོད་ཁང་དུ་ཆིབས་སྒྱུར་བསྐྱངས་ཡོད་པ་བཅས།། །།
