༄༅། །ཕྱི་ལོ་ ༢༠༡༦ ཟླ་ ༩ ཚེས་ ༡༣ ཉིན་གྱི་སྔ་དྲོ་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ས་གནས་ཀྱི་གསར་འགྱུར་བརྒྱུད་ལམ་ཁག་གཅིག་དང་དུས་དེབ་ཀྱི་གསར་འགོད་པར་དབུ་མའི་ལམ་གྱི་སྲིད་བྱུས་སྐོར་དང་། ༸སྐུའི་ཡང་སྲིད་སྐོར་དེ་བཞིན་ཁུར་འཁྱེར་གྱི་མཛད་འགན་གསུམ་གྱི་སྐོར་ལ་བཀའ་སློབ་སྩལ་བ་དང་བཀའ་འདྲི་ཁག་ལ་བཀའ་ལན་ཡང་སྩལ་བ་དང་། ཉིན་རྒྱབ་ཁྲིམས་རྩོད་པའི་ལྷན་ཚོགས་སུ་ཚོགས་མི་གྲངས་ ༣༥༠ ཙམ་ལ་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ་ཐད་འགན་འཁུར་ལེན་ཕྱོགས་སྐོར་ལ་ལམ་སྟོན་བཀའ་སློབ་སྩལ་རྗེས་ཁྲིམས་རྩོད་པའི་ལྷན་ཚོགས་ནས་༸གོང་ས་མཆོག་ལ་ཆེ་བསྟོད་ཀྱི་གཟེངས་རྟགས་ཤིག་འབུལ་ལམ། དེ་རྗེས་ཧྥ་རན་སིར་གནས་སྡོད་བོད་རིགས་སུམ་སྟོང་བརྒལ་བ་ལ་མཇལ་ཁ་སྩལ་ཁ་ཡོད་པ་རེད།
དེ་ཡང་བོད་བོད་རིགས་ཚོགས་པའི་གསོལ་འདེབས་གོ་སྒྲིག་བྱས་པ་ལྟར་ཧྥ་རན་སའི་རྒྱལ་ས་ཕ་རེ་སི་རུ་ཕྱི་དྲོ་ཆུ་ཚོད་ ༤།༣༠ སྟེང་ཚོགས་ཁང་དུ་༧ཞབས་སོར་འཁོད་ཡོད་པ་དང་། བོད་རིགས་ཚོགས་པའི་འབྲེལ་ཡོད་ལས་བྱེད་ནས་འཚམས་འདྲི་ཞུས་བོད་རིགས་ཚོགས་པའི་སློབ་གྲྭའི་སློབ་མ་དང་བོད་རིགས་ཚོགས་པའི་ཟློས་གར་བ་ཐུན་མོང་གིས་དཔལ་རྒྱལ་བ་ཀརྨ་པ་མཆོག་གིས་ལྗགས་རྩོམ་མཛད་པའི་རྒྱལ་བའི་བསྟོད་པ་ཞེས་པའི་མཉམ་གཞས་གཟིགས་འབུལ་ཞུས་པ་དང་། དེ་རྗེས་ཧྥ་རན་སིའི་བོད་རིགས་ཚོགས་པའི་ཚོགས་གཙོ་བསྟན་པ་ལགས་ཀྱིས་ཧྥ་རན་སའི་བོད་མིའི་གནས་སྟངས་དང་ལས་བསྡོམས་མདོར་བསྡུས་སྙན་སྒྲོན་ཞུས་རྗེས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་སློབ་བཀའ་དྲིན་སྩལ་དོན།
ང་རང་ཚོས་སྐྱེ་བ་སྔ་ཕྱི་ཁས་ལེན་གྱིན་ཡོད་པ་རེད། དེར་བརྟེན་ལས་དང་སྨོན་ལམ་གྱི་འབྲེལ་བ་ཡོད་པའི་བོད་གངས་ཅན་པའི་ཆ་ཤས་སུ་གཏོགས་པ་ཁྱོད་ཚོ་ལ་ཐུག་པའི་གོ་སྐབས་བྱུང་བ་རེད། ཧ་ཅང་དགའ་བོ་བྱུང་། ཁྱེད་རང་ཚོ་ས་གནས་ཕྱི་རྒྱལ་ཡུལ་གྲུ་ག་བར་བསྡད་ཡོད་ནའང་ང་རང་བོད་པ་ཡིན་བསམ་པའི་འདུ་ཤེས་དེ་མ་བརླག་པར་བསྡད་ཡོད་པ་རེད། བོད་མི་ཡིན་བསམ་པའི་འདུ་ཤེས་དེའི་ཐོག་ནས་སོ་སོ་སྒེར་གྱི་འཚོ་ཐབས་ངེས་པར་བྱེད་དགོས་པ་རེད། དེ་དང་ཆབས་ཅིག་བོད་སྤྱི་བའི་དོན་དག་ལའང་ལས་བསྡོམས་ནང་བཤད་པ་བཞིན་ཚང་མས་སེམས་ཁུར་བྱེད་བསྡད་ཡོད་པ་རེད། གལ་ཆེ་ཤོས་ལོ་སྟོང་ཕྲག་གི་ལོ་རྒྱུས་ཡོད་པའི་བོད་མི་རིགས་དང་ཆོས་དང་རིག་གཞུང་གཏིང་ཟབ་ཡོད་པ་དེ། ད་ལྟ་དུས་ཚོད་དཀའ་ངལ་གཉན་འཕྲང་ཅན་གྱི་ནང་ཡོད་པ་རེད། བོད་རྒྱ་ཆེ་མི་མང་གིས་བོད་ནང་དུ་ཁོག་ནས་མེ་འབར་ནའང་ཁ་ནས་དུ་བ་ཐོན་མི་ཆོག་ཟེར་བ་ལྟར་བསྡད་ཡོད་པས་ང་ཚོ་རང་དབང་ལུང་བ་ནང་ལ་ཡོད་པ་ཚོས་བོད་རྒྱ་ཆེ་མི་མང་གི་ཚབ་བྱས་ཏེ་འཛམ་གླིང་རང་དབང་ལུང་བའི་ནང་ལ་བོད་པ་ཟེར་བ་ཇི་འདྲ་ཞིག་ཡིན་པ་དང་། བོད་ཀྱི་ཆོས་དང་རིག་གཞུང་། སྐད་ཡིག་བཅས་ཇི་འདྲ་ཞིག་ཡོད་པ་སྟོན་ཐུབ་པ་ཡོང་གི་ཡོད་རེད། སྤྱིར་བཏང་ང་ཚོ་བོད་པ་ཨ་རི་དང་རྒྱ་གར། དེ་བཞིན་ཡོ་རོབ་ཀྱིས་མཚོན་པའི་ཡུལ་གྲུ་ཁག་གང་ལ་ཡིན་ནའང་། ཡུལ་མི་ཚོས་བོད་པ་ཟེར་དུས་དྲང་པོ་དང་སེམས་པ་བཟང་པོ། སྐྱག་རྫུན་མི་བཤད་མཁན། ཡ་རབས་ཀྱི་སྤྱོད་པ་བཟང་པོ་ཅན་ཞིག་ལ་མང་ཆེ་བས་ངོས་འཛིན་བྱེད་ཀྱི་འདུག ཡིན་ནའང་། དེང་སྐབས་བོད་པ་ནང་ཁུལ་རྒྱག་རེས་བརྒྱག་པ་དང་སྐྱག་རྫུན་བཤད་པ་སོགས་མིང་ཆད་ཡོང་བའི་སྐྱོན་ཕྲན་བུ་ཡོང་བསྡད་ཡོད་པ་རེད། སྤྱི་ཡོངས་ཀྱི་ཆ་ནས་ཡག་པོ་རེད་ཟེར་དགོས་པ་རེད། ད་ལྟའི་བར་ཚང་མས་ཕྱག་ལས་ཧུར་ཐག་གིས་བྱས་བསྡད་པ་རེད། ཐུགས་རྗེ་ཆེ་ཞུ་གི་ཡིན།
ང་ཚོ་བོད་མི་བཙན་བྱོལ་བ་ཚོ་དངོས་གནས་དམ་ཚིག་ལ་རྒྱ་གཅིག་གྱུར་དད་པ་དམ་ཚིག་གཡོ་བ་མེད་པར་སོ་སོ་ཆོས་དང་རིག་གཞུང་ལ་དོ་སྣང་བྱས་བསྡད་ཡོད་པ་དེ། བོད་ནང་ལ་ཡོད་པའི་རྒྱ་ཆེ་མིང་མང་། འཇིགས་དངངས་འོག་ལ་ཡོད་བསྡད་པ་ཚོས་གོ་ཡོང་དུས། ཏན་ཏན་གཞིས་ལུས་རྒྱ་ཆེ་མི་མང་སེམས་ལ་སྤོབས་པ་སྐྱེ་བ་དང་། སྤྲོ་བ་སྐྱེ་བ་ཞིག་ཡོང་གི་ཡོད་པ་རེད། ང་ཚོ་བཙན་བྱོལ་བ་ཆགས་ནས་ལོ་ང་བདུན་ཕྱིན་པ་རེེད། ད་དུང་ཡིན་ནའང་བོད་པ་ཡིན་བསམ་པའི་འདུ་ཤེས་དེ་མ་བརྗེད་པའི་སྟེང་ནས་ཧུར་ཐག་བྱེད་དགོས་པ་རེད། ཤེས་སོང་ངམ།
ང་ཚོ་བོད་མི་རིགས་ཀྱིས་རིགས་ཞེན་བྱེད་པ་ནི་ཆགས་སྡང་གི་དབང་གིས་སོ་སོ་མིའི་རིགས་ཀྱི་ཞེན་ཁོག་བྱས་པ་ཕལ་ཆེར་མ་རེད། ང་ཚོ་བོད་པས་སོ་སོའི་མི་རིགས་དང་སྐད་ཡིག རིག་གཞུང་ལ་དགའ་ཞེན་བྱེད་པ་དེེེར། འཛམ་བུའི་གླིང་སྤྱི་ལ་ཕན་ཐོགས་པའི་ནུས་པ་ཡོད་པ་ཞིག་ཏན་ཏན་རེད། ང་ཚོར་སོ་སོའི་མི་རིགས་ལ་ཆོས་དང་རིག་གཞུང་གཏིང་ཟབ་ཡོད་པ་དང་སྐད་ཡིག་ཟུར་དུ་ཡོད་པས་ཆོས་དང་རིག་གཞུང་ལ་དགའ་ཞེན་བྱེད་པ་དང་། བདག་པོ་བརྒྱབ་སྟེ་ཞེན་ཁོག་བྱས་པ་དེ་རྒྱུ་མཚན་ལྡན་པ་ཞིག་རེད། ང་ཚོའི་ཆགས་སྡང་གི་སྐད་ཆ་ཕལ་ཆེར་མ་རེད། བོད་པ་གང་དུ་ཡོད་ནའང་སོ་སོའི་སྐད་ཡིག་སྲུང་རྒྱུ་ཧ་ཅང་གལ་ཆེན་པོ་རེད། ཁྱོད་ཚོས་སློབ་གྲྭ་ཟུར་དུ་བཙུགས་འདུག་དེ་ཧ་ཅང་ཡག་པོ་རེད། ད་ལྟ་བོད་རིགས་མི་རབས་རྗེས་མ་ཚོས་བོད་ཡིག་ཤེས་པ་ཞིག་བྱེད་དགོས། ང་རང་ཚོ་ལ་སངས་རྒྱས་ཀྱི་ཆོས་ཤིག་ཕ་མེས་ནས་ཡོད་པ་རེད། ཆོས་རྒྱལ་བཀའ་དྲིན་ཅན་ཚོ་དང་། ལྷག་པར་ཆོས་རྒྱལ་ཁྲི་སྲོང་ལྡེ་བཙན་གྱི་སྐབས་མཁན་སློབ་ཆོས་གསུམ་གདན་འཛོམས་ནས་གཙོ་བོ་མཁན་ཆེན་ཞི་བ་འཚོའི་ཐུགས་རྗེ་བཀའ་དྲིན་ལ་བརྟེན་ནས་ང་ཚོ་བོད་ལ་ཡོད་པའི་ཆོས་བརྒྱུད་དེ་ནཱ་ལཎྡྲའི་ཆོས་བརྒྱུད་ཡིན་པ་དང་། ནཱ་ལཎྡྲའི་ཆོས་བརྒྱུད་ནང་ཚད་མ་རིག་པ་གཙོ་བོ་བྱས་ཏེ་ནང་དོན་རིག་པའི་ལྟ་གྲུབ་གཏན་ལ་ཕབ་ནས་འགྲོ་གི་ཡོད་རེད། ཅེས་དང་།
སངས་རྒྱས་པའི་ཆོས་པ་ཞིག་ཡོང་བ་ལ་སངས་རྒྱས་པའི་ལྟ་གྲུབ་ལ་སློབ་བྱས་ནས་ཤེས་ནས་དད་པ་ཐོབ་པ་ཞིག་དགོས་པ་རེད་མ་གཏོགས། སྲོལ་རྒྱུན་གྱི་སྲོལ་ལྟ་བུ་དང་ང་ཚོ་ལུང་བ་ནང་བའི་ལུང་པ་ཡིན་ཞེས་སངས་རྒྱས་ཆོས་ཚོགས་མ་རེ་བཏོན། མ་ཎི་རེ་བགྲངས་ནས་བསྡད་པ་གཅིག་བུས་ཡོང་གི་མ་རེད། རྒྱ་གར་ལྷོ་ཕྱོགས་ལ་ལོ་གཉིས་གསུམ་བཞི་ལ་བསྟུད་མར་ཆོས་འབྲེལ་རྒྱ་ཆེན་པོ་བྱས་པ་ཡིན། དེ་དུས་ངོས་ནས་མཇུག་བསྡོམས་སྐབས་བརྗོད་རྒྱུ་བྱུང་། ཆོས་དེ་དབང་རྟུལ་དད་པའི་རྗེས་འབྲངས་དང་དབང་རྣོན་ཆོས་ཀྱི་རྗེས་འབྲངས་ཞེས་གཞུང་ནང་ངོས་འཛིན་ཡོད་རེེད། སངས་རྒྱས་པའི་ཆོས་དེ་དབང་རྣོན་ཆོས་ཀྱི་རྗེས་འབྲངས་ཀྱིས་དགོས་སོགས་ཆོས་བཞི་ཐོག་གནས་ངོ་སྤྲད་ཏེ་སྲོལ་དེའི་ཐོག་ཕྱིན་པ་ཡིན་ན་སངས་རྒྱས་བསྟན་པ་དེ་ལོ་བརྒྱ་ཕྲག་ཁ་ཤས་ལ་བསྡད་ཐུབ་ཀྱི་རེད། འགྲེལ་བཤད་ཐོག་ནས་མ་ཕྱིན་པར་དད་པ་གཅིག་བུའི་ཐོག་ནས་དབང་རྟུལ་དད་པའི་རྗེས་འབྲངས་ཀྱི་སྟེང་ནས་ཕྱིན་པ་ཡིན་ན་སངས་རྒྱས་ཀྱི་ཆོས་ལོ་ག་ཚོད་བསྡད་ཐུབ་ཀྱི་ཡོད་པ་ངོས་ནས་བཤད་ཤེས་ཀྱི་མེད་ཅེས་བཤད་པ་ཡིན། དེར་བརྟེན་དབང་རྣོན་ཆོས་ཀྱི་རྗེས་འབྲངས་ཀྱི་ཆོས་དེ་བརྟག་དཔྱད་བྱས་ནས། རྒྱུ་མཚན་བསམ་བློ་བཏང་ནས། དད་པ་ཡིན་ནའང་ཤེས་རབ་ཀྱི་གྲོགས་དང་བཅས་པ། སྙིང་རྗེ་ཡིན་ནའང་ཤེས་རབ་ཀྱི་གྲོགས་དང་བཅས། དེ་འདྲ་ཞིག་གི་ཐོག་ནས་འགྲོ་དགོས་ཀི་རེད། གཞུང་དང་ཉམས་ལེན་དེ་ཤེས་རབ་ཀྱི་གྲོགས་དང་བཅས་པའི་དད་པ་དེ་གནས་བཞིན་དུ་འགྲོ་དགོས་ཀི་རེད་དེ། སོ་སོས་སློབ་སྦྱོང་མ་བྱས་ན་ཡོང་ཐབས་མི་འདུག ཅེས་དང་།
བོད་ཡིག་ནང་ཡོད་པའི་སངས་རྒྱས་པའི་ལྟ་གྲུབ་དེ་སློབ་སྦྱོང་བྱེད་ཐུབ་ན་ཆོས་དད་མེད་མཁན་ཞིག་ཡིན་ནའང་གཞུང་ཆེན་ཚོའི་ནང་སེམས་ཁམས་རིག་པ་དང་ཚད་མ་རིག་པའི་སྐོར་ཧ་ཅང་ཞིབ་ཚགས་པོ་ཡོད། དེ་དག་འབྱུང་ས་ནི་བཀའ་འགྱུར་བསྟན་འགྱུར་ནས་བྱུང་བ་རེད། ནང་པའི་དཔེ་ཆ་ནང་ནས་བྱུང་བ་རེད། འོན་ཀྱང་བེད་སྤྱོད་བྱེད་ཡུལ་ནི་འཛམ་གླིང་སྤྱི་ལ་བེད་སྤྱོད་བྱེད་ཐུབ་པ་ཞིག་ཕལ་ཆེར་རེད་འདུག ཚད་མ་རིག་པ་ཆ་བཞག་ན་ཚན་རིག་པ་ཚོས་བརྟག་དཔྱད་བྱེད་ཡོང་དུས་ཚད་མ་རིག་པའི་འགྲོ་སྟངས་བཞིན་བྱེད་ཀྱི་འདུག དེ་བཞིན་སེམས་ཁམས་རིག་པའི་སྐོར་ཆ་བཞག་ན། འཛམ་གླིང་གི་ཚན་རིག་པ་སྙན་གྲགས་ཡོད་མཁན་གྱིས་སངས་རྒྱས་པའི་གཞུང་ནང་ཡོད་པའི་སེམས་ཁམས་རིག་པ་སྐོར་ལ་ཧ་ཅང་དོ་སྣང་བྱེད་ཀྱི་འདུག དེ་ལྟ་བུའི་དགོས་པ་རྒྱུ་མཚན་ལ་བརྟེན་ནས་འདས་པའི་ལོ་བཅུ་ཕྲག་ནང་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ཡོད་པ་དེ་དག་བརྗོད་བྱའི་ཆ་ནས་དུམ་བུ་གསུམ་དུ་ཕྱེ་ནས་ཚན་རིག་སྡེ་ཚན་གཅིག ལྟ་གྲུབ་སྡེ་ཚན་གཅིག སངས་རྒྱས་པའི་ཆོས་སྐོར་སྡེ་ཚན་གཅིག་བཅས་སྡེ་ཚན་གསུམ་ཕྱེ་སྟེ་དེའི་ནང་སེམས་ཁམས་རིག་པ་གཙོ་བོར་གྱུར་པའི་ཚན་རིག་གི་སྐོར་ཟུར་དུ་བཏོན་ནས་བོད་ཡིག་ནང་ཐོན་ཡོད། ཨིན་ཇི་དང་རྒྱ་ཡིག ཧིན་རྡི། དེ་བཞིན་ཕྱི་རྒྱལ་ཡུལ་གྲུ་ཁག་ཁ་ཤས་ཀྱི་སྐད་ཡིག་ནང་བསྒྱུར་རྒྱུ་འགོ་བཙུགས་ཏེ་འགྲོ་བཞིན་ཡོད། དེ་ཚོའི་གྲས་ནི་འཛམ་གླིང་སྤྱི་ལ་ཕན་ཐོགས་བྱེད་ཐུབ་རྒྱུ་ཞིག་རེད། ངོས་ཀྱིས་འཛམ་གླིང་སྤྱི་ལ་བྱམས་བརྩེ་སྤེལ་དགོས་རེད་ཅེས་འབོད་སྐུལ་དང་འབད་བརྩོན་བྱེད་ཀྱི་ཡོད། བྱམས་བརྩེ་སྤེལ་བར་སེམས་ཁམས་རིག་པའི་སྐོར་ཤེས་དགོས། དེར་བརྟེན་ནུབ་ཕྱོགས་རྒྱལ་ཁབ་ཁག་གི་ནང་སེམས་ཁམས་རིག་པར་ Psychology ཟེར་དུས་་ཚད་དམའ་བོ་ཞིག་མ་གཏོགས་མི་འདུག སྤྱིར་རྒྱ་གར་འཕགས་པའི་ཡུལ་ནི་དངོས་གནས་དྲང་གནས་སེམས་ཁམས་རིག་པའི་སྐོར་ཧ་ཅང་སྤུས་དག་པོ་དང་ཞིབ་ཚགས་པོ་འདུག འོན་ཀྱང་རྒྱ་གར་ནང་དེར་དོ་སྣང་བྱེད་མཁན་མེད། སྔར་ཡིན་ན་མུ་སྟེགས་པའི་མཁས་པ་དེ་འདྲ་ཡོང་གི་ཡོད་ཀྱང་ཕྱིས་སུ་མི་འདུག། ཐེངས་ཤིག་ལྡི་ལིར་རྒྱལ་སྤྱིའི་ཧིན་དུ་ཆོས་ལུགས་འཛིན་མཁན་ཚོའི་ཚོགས་ཆེན་ཞིག་ཚོགས་པ་རེད། དེ་དུས་ངོས་རང་་ཤོག་ཟེར་གྱི་འདུག དེ་དེས་ངོས་ཀྱིས་འབོད་སྐུལ་བྱས་པ་ཡིན། སྔ་མོ་དུས་རབས་གཉིས་པ་དང་གསུམ་པའི་སྐབས་སུ་ནཱ་ལེནྡྲའི་མཁས་པ་དེ་འདྲས་གཞུང་རྩོམ་པའི་སྐབས་སུ་མུ་སྟེགས་པའི་མཁས་པ་མང་པོ་ཡོད་པའི་རྟགས་འདུག ནང་པ་དང་མུ་སྟེགས་པའི་མཁས་པ་དབར་བགྲོ་གླེང་བྱས་ཏེ་དཔྱད་བསྡུར་བྱས་པ་བྱུང་འདུག དེ་དུས་མུ་སྟེགས་པའི་མཁས་པ་ཧ་ཅང་མང་པོ་ཡོད་པ་རེད་འདུག འདི་སླར་གསོ་བྱེད་དགོས་རེད། མུ་སྟེགས་པའི་ཆོས་བརྒྱུད་འཛིན་མཁན་ཚོས་ཆོ་ག་དང་འདོན་པ་འདྲ་ཞིག་འདོན་པ་ཙམ་གྱི་འདང་གི་མ་རེད། སློབ་སྦྱོང་བྱེད་རྒྱུ་གལ་ཆེན་པོ་རེད། ཅེས་འབོད་སྐུལ་ཞུ་རྒྱུ་བྱུང་།
སྔར་ཕྱུག་པོ་ཡོད་རེད་དེང་སྐབས་ཉམས་ཡོད། རྒྱ་གར་མཁས་པའི་རྣམ་དཔྱོད་རྩལ་ནས་ཐོན་པའི་རིག་པའི་འགྲོ་སྟངས། དེ་བཞིན་སེམས་ཁམས་རིག་པའི་སྐོར་དེ་ཚོའི་གྲས་ནི་བོད་གཅིག་པུ་མ་གཏོགས་གཞན་སུ་ལའང་མི་འདུག དེ་ང་ཚོ་བོད་པའི་གཅེས་ནོར་ཆགས་ཀྱི་ཡོད། དེ་འགྲེལ་བཤད་བརྒྱག་རྒྱུ་བོད་ཡིག་ཐོག་འགྲེལ་བཤད་བརྒྱབ་པ་ནང་བཞིན་རྒྱ་ཡིག་ནང་དེ་ལྟར་བསྒྱུར་བ་མི་འདུག རྒྱ་སྐད་ནང་བརྡ་རྙིང་པ་དེ་འདྲའི་ཐོག་ནས་ཡོད་པ་ཡིན་སྟབས། དེང་སྐབས་བརྡ་རྙིང་དེ་དག་གཞི་ནས་སློབ་སྦྱོང་བྱེད་ན་མ་གཏོགས་ཡོང་མི་ཐུབ་པ་ལྟ་བུ་ཞིག་དང་། གོང་དུ་བརྗོད་པ་བཞིན་གཞུང་མང་པོ་ཞིག་བསྒྱུར་ཡང་མི་འདུག དེ་འདྲ་ཡིན་དུས་འཛམ་གླིང་སྤྱི་ལ་ཆ་བཞག་པ་ཡིན་ནའང་ང་ཚོ་བོད་པའི་བོད་ཡིག་ནང་ཡོད་པའི་སེམས་ཁམས་རིག་པ་གཙོ་བོར་གྱུར་པའི་ལྟ་གྲུབ་སྐོར་དེ་དག་འཛམ་གླིང་སྤྱི་ལ་ཕག་ཐོགས་བྱེད་ཐུབ་རྒྱུ་ཞིག་ཏན་ཏན་འདུག འདི་ང་རང་ཚོས་ངོས་ཟིན་པ་བྱས་ཏེ། འཛམ་གླིང་སྤྱི་ལ་ཞབས་འདེགས་དང་ཕན་ཐོགས་བསྒྲུབ་ཐུབ་རྒྱུའི་ཆ་རྐྱེན་དང་ནུས་པའམ་གོ་སྐབས་ཡོད་པ་འདི་ང་ཚོས་བདག་པོ་བརྒྱབ་ཐུབ་དགོས། ཤེས་སོང་ངམ།
ང་ཚོ་དེ་སྔ་བཙན་བྱོལ་ལ་ཡོད་པའི་སྐབས་ལ་སོ་སོ་རང་མགོ་ཐོན་ཙམ་བྱུང་ན་བསམ་པ་མ་གཏོགས་གཞན་གང་ཡང་མེད། དེ་ནས་རིམ་པས་འཛམ་གླིང་འདི་རྒྱུས་ཡོད་ཆགས་ཡོང་དུས་ང་ཚོའི་རིག་གཞུང་གི་ཐོག་ནས་འཛམ་གླིང་ལ་ཕར་ཕན་ཐོགས་བྱེད་ཐུབ་པའི་ཆ་རྐྱེན་གཅིག་ཡོད་པ་མཐོང་ཡོང་གི་འདུག དེར་བརྟེན་བོད་ཀྱི་ཆོས་དང་རིག་གཞུང་གི་དོན་གྱི་བདག་པོ་དེ་བོད་མི་མང་རེད། བོད་མི་མང་གིས་བདག་པོ་བརྒྱབ་དགོས་ཀྱི་ཡོད་རེད། དེ་ལྟ་བུའི་ལྟ་གྲུབ་བཟང་པོ་ལ་བདག་པོ་བརྒྱབ་ཅེས་པ་ནི་མཆོད་གཤོམ་ནང་བསྒྲིགས་རྒྱུ་མིན་པར་སློབ་སྦྱོང་བྱེད་ནས་ཤེས་ཡོན་དེ་སེམས་ཀྱི་ནང་འཇགས་པ་ཞིག་བྱུང་ན་བདག་པོ་བརྒྱབ་ཐུབ་ཀྱི་རེད། དེ་སློབ་སྦྱོང་བྱེད་ནས་ཡོང་གི་རེད་མ་གཏོགས་སྨོན་ལམ་བརྒྱབ་ནས་ཡོང་རྒྱུ་མེད། དེར་བརྟེན་ད་ལྟ་ངོས་ཀྱིས་བཤད་པ་བཞིན་དགོན་སྡེ་ཁག་ཚོས་སློབ་སྦྱོང་བྱེད་ནས་གྲུབ་འབྲས་ཡག་པོ་ཐོན་ཡོད། བཙུན་མའི་དགོན་པ་ཚོས་ཀྱང་སློབ་སྦྱོང་བྱས་ནས་གྲུབ་འབྲས་ཡོག་པོ་ཐོན་ཡོད། ད་ཆ་མང་ཚོགས་སྐྱ་བོ་ཕོ་མོ་ཚོས་སློབ་སྦྱོང་བྱེད་རྒྱུའི་ཐོག་དོ་སྣང་བྱེད་དགོས་ཀྱི་འདུག ད་ལྟ་ངོས་ཀྱིས་བཤད་པ་རྣམས་བོད་ཡིག་ཐོག་ཐོན་ཡོད། དེ་ཚོ་ཁྱེད་ཚོས་དུས་རྟག་ཏུ་མིན་པར་མཚམས་རེ་གུང་གསེང་སྐབས་རུབ་རུབ་བྱེད་རྒྱུ་བྱུང་སྐབས་འགྲེལ་བཤད་རྒྱག་ཐུབ་མཁན་ཚོས་འགྲེལ་བཤད་བརྒྱབ། ཁྱེད་རང་ཚོས་ཀྱང་དོ་སྣང་བྱས། འཛིན་གྲྭ་ཚོགས་རྒྱུ་ཡོང་རྒྱུ་མེད་ནའང་ཞར་དང་ཞོར་ལ་དོ་སྣང་བྱེད་དགོས། ཁྱེད་རང་ཚོ་ཁྱིམ་ཚང་གཅིག་ནང་ཡིན་ནའང་དགའ་དགའ་སྐྱིད་སྐྱིད་ལ་ཚོགས་པའི་སྐབས་ལ་འབྲེལ་བ་མེད་པའི་སྒྲུང་བཤད་རྒྱུ་དང་གློག་བརྙན་བལྟས་བསྡད་པ་ལྟ་བུ་མ་ཡིན་པར་བོད་ཡིག་ཀློག་ནས་འགྲེལ་བཤད་བརྒྱབ་པ་དང་གྲོས་བསྡུར་བྱེད་ན་ཏན་ཏན་ཕན་ཐོགས་ཡོང་གི་རེད། ཚད་མ་རིག་པ་སློབ་སྦྱོང་བྱེད་ན་བསམ་བློ་གྲུང་རུ་འགྲོ་གི་རེད། བསམ་བློ་གྲུང་པོ་བྱུང་ན་སོ་སོའི་ལྟོ་གོས་ལས་ཀ་ཡིན་ནའང་ཡག་པོ་དང་ཚགས་ཚུད་ཆགས་ཀྱི་རེད། འདི་ཁྱེད་ཚོར་འབོད་སྐུལ་ཞུ་འདོད་བྱུང་། དེ་རིང་ཁ་སང་གང་སར་དེ་ལྟར་འབོད་སྐུལ་བྱེད་ཀྱི་ཡོད།
རྒྱ་མི་དང་བོད་པ། ཉེ་ཧོང་སོགས་ཀྱི་ནང་པ་ཚོར་དུས་རབས་ཉེར་གཅིག་གི་ནང་པ་བྱེད་དགོས་རེད། དུས་རབས་ཉེར་གཅིག་གི་ནང་པ་ཟེར་ན་གང་འདྲ་རེད་ཅེ་ན་སློབ་སྦྱོང་ཡོད་པའི་ཐོག་ནས་ཤེས་ནས་དད་པ་ཐོབ་པ་བྱུང་ན་དུས་རབས་ཉེར་གཅིག་གི་ནང་པ་ཆགས་ཀྱི་རེད། རྒྱུ་མཚན་གང་ཡང་བཤད་རྒྱུ་མེད་པར་སྐྱབས་སུ་མཆི་ཞེས་བཤད་བསྡད་པ་ཡིན་ན་དུས་རབས་ཉེར་གཅིག་གི་ནང་ཆགས་ཀྱི་མེད། སྔ་མོའི་འདས་པའི་དུས་རབས་ནང་མི་ལ་ཤེས་ཡོན་མེད་པར་རྨོངས་དད་ཁོ་ནའི་འོག་འགྲོ་བའི་འགྲོ་སྟངས་ཞིག་ཆགས་གི་འདུག དེ་ལ་ང་ཚོས་བསྒྱུར་བཅོས་དང་ཡར་རྒྱུས་གཏོང་དགོས་པ་ཧ་ཅང་གལ་ཆེན་པོ་འདུག དེར་བརྟེན་ངོས་ཀྱིས་དུས་རབས་ཉེར་གཅིག་གི་ནང་པ་ཞིག་བྱེད་དགོས་འདུག་ཅེས་བཤད་ཀྱི་ཡོད། འདི་ཁྱེད་ཚོར་བཤད་འདོད་བྱུང་། གཞན་དམིགས་བསལ་གང་ཡང་ཞུ་རྒྱུ་མི་འདུག
ཆབ་སྲིད་ཐོག་ངོས་ལ་དམིགས་བསལ་འགན་མེད། འོས་བསྡུའི་ཐོག་ནས་ཕེབས་པའི་སྲིད་སྐྱོང་གིས་འགན་བཞེས་ཀྱི་ཡོད་རེད། ངོས་ཀྱིས་བོད་དོན་དུ་འགན་ལེན་རྒྱུ་གཙོ་བོ་ནི་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་མི་ཉམས་གོང་འཕེལ་ཡོང་བ་དང་གཅིག བོད་ཡིག་སྐོར་དོ་སྣང་བྱེད་རྒྱུ་དང་རིམ་པས་བོད་ཡིག་གི་སུམ་རྟགས་དེ་འདྲ་ཏོག་ཙམ་ཡར་རྒྱས་གཏོང་རྒྱུར་ཕལ་ཆེར་ཁ་ཤས་ཀྱིས་མཐོང་ཚུལ་འདུག་ལ། ཡོད་པའི་བཟོ་འདུག གཙོ་ཆེན་བོད་ཀྱི་ཁོར་ཡུག་སྐོར་ལ་ངོས་ཀྱིས་ལས་འགུལ་སྤེལ་ཏེ་འགན་ཁུར་གྱི་ཡོད། དེར་བརྟེན་ཁྱེད་ཚོས་དེ་ལྟར་དོ་སྣང་བྱེད་ན་བོད་ཡིག་ལ་ཞེན་ཁོག་སླེབས་ཀྱི་རེད། བོད་ཡིག་ལ་གཞི་ནས་ངོ་མཚར་འདྲ་པོ་སྐྱེས་ཀྱི་རེད། དཔེར་ན་ངོས་ལ་ཆ་བཞག་ན། དེ་སྔ་དོ་སྣང་གང་ཡང་མེད། དེ་ནས་ཚུར་མི་མང་པོ་ཐུག་པ་དང་། ལྷག་པར་ཚན་རིག་པ་དང་ཐུག་ནས་བགྲོ་གླེང་དང་གོ་བསྡུར་བྱས་ཡོང་དུས་ང་ཚོ་ཉམ་དམའ་བོ་བྱེད་མི་དགོས་པར་སྤོབས་པ་དང་འདེང་ཚོད་ཡོང་གི་འདུག དཔལ་ནཱ་ལནྡྲའི་མཁས་པ་མང་པོས་བརྩམས་པའི་གཞུང་རྣམས་ལ་སློབ་སྦྱོང་བྱས་པར་བརྟེན་ཧ་ཅང་ཕན་ཐོགས་པོ་བྱུང་ཡོད། ངོས་ཀྱིས་བོད་ཀྱི་ཆོས་དང་རིག་གཞུང་། གཙོ་བོ་ལྟ་གྲུབ་རྣམ་གཞག་སྐོར་ཕྱུག་པོ་ཡོད་པ་དེ་དག་ཉམས་པ་སོར་ཆུད་མི་ཉམས་གོང་འཕེལ་ཡོང་རྒྱུ་དང་། དེ་ནས་བོད་ཀྱི་ཁོར་ཡུག་ཐོག་འགན་འཁུར་གྱི་ཡོད།
ཆབ་སྲིད་ཀྱི་གནས་ཚུལ་ཆ་བཞག་པ་ཡིན་ན། རྒྱ་ནག་ལ་འགྱུར་བ་ཏན་ཏན་འགྲོ་གི་ཡོད། རྒྱ་ནག་གཞུང་གི་རིགས་ཁ་ཤས་ཀྱིས་མཁྲེགས་པོ་བྱེད་བཞིན་ཡོད། རིགས་ཁ་ཤས་ཀྱིས་དངོས་ཡོད་གནས་ཚུལ་ཡིན་པ་ཞིག་ལ་བསམ་བློ་གཏོང་མཁན་ཡོད་པ་རེད་འདུག དེར་བརྟེན་དུས་ཀྱི་འགྱུར་འགྲོས་དང་མཉམ་དུ་དེ་སྔའི་སྲིད་བྱུས་མཁྲེགས་པོ་འདི་རང་གཞན་གཉིས་ཕུང་རེད་མ་གཏོགས་ཕན་གང་ཡང་མེད། རྒྱ་ནག་རང་ལའང་ཆ་བཞག་ན། མི་མང་ཚོ་ཡིད་ཆེས་བརླག་རྒྱུ་ཞིག་མ་གཏོགས་བཙན་པོ་བྱས་ཏེ་ཞེད་སྣང་བསྐུལ་ནས་བསྡུས་པ་ཞིག་མ་གཏོགས་དངོས་གནང་རང་དབང་ལྡན་པའི་ཐོག་ནས་སྤྱི་མོས་བྱས་པ་གང་ཡང་མི་འདུག རྒྱལ་ཁབ་ཆེན་པོ་དེ་འདྲ་ཞིག་གིས་དེ་འདྲའི་ཐོག་ནས་ཁུངས་འཁྱོལ་རྒྱུ་ཧ་ཅང་ཁག་པོ་རེད། གང་ལྟར་འཛམ་གླིང་སྤྱི་དང་མཐུན་པ་འགྲོ་དགོས་རྒྱུ་རེད་མ་གཏོགས་དེ་འདྲའི་ཧ་ཅང་གུ་དོག་པོ་བྱས་ནས་འགྲོ་རྒྱུའི་དུས་ཚོད་ཡོལ་འགྲོ་གི་རེད། རྒྱ་ནག་ཏན་ཏན་འགྱུར་བ་འགྲོ་གི་རེད།
བོད་རྒྱ་ཆེ་མི་མང་གི་སེམས་ཤུགས་ལ་ཆ་བཞག་ན། རྒྱུན་དུ་ཉམས་པ་མེད་པར་བསྡད་ཀྱི་འདུག མི་རབས་བརྗེས་ཀྱང་ཕྲུ་གུ་ཆུང་ངུའི་གྲས་དེ་དག་སོ་སོའི་བོད་མི་རིགས་ཀྱི་ཞེན་ཁོག་དང་ལ་རྒྱ་ཧ་ཅང་ཤུགས་ཆེན་པོ་འདུག བོད་ནང་གི་རྒྱ་ཆེ་མི་མང་གི་སེམས་ཤུགས་དང་། དེང་སྐབས་རྒྱ་ནག་ཏུ་ནང་པ་ཕལ་ཆེར་ས་ཡ་བཞི་བརྒྱ་ཙམ་འདུག ནང་པ་དེ་ཚོ་གྲས་ཀྱིས་བོད་ཀྱི་ནང་པའི་ཆོས་ལ་ཧ་ཅང་དགའ་པོ་བྱེད་ཀྱི་འདུག དེང་སྐབས་རྡ་སར་ཧ་ལམ་བདུན་ཕྲག་རེ་རེའི་ནང་རྒྱ་ནག་ནས་ཡོང་བའི་རྒྱ་མི་བཅུ་གྲངས་རེ་འཆར་ཅན་ཡོང་བཞིན་འདུག དེ་དག་གིས་ཧ་ཅང་དགའ་པོ་བྱེད་ཀྱི་འདུག ངོས་ཀྱིས་དུས་དུས་ལ་རྒྱ་རིགས་ཚོར་ནང་ཆོས་འགྲེལ་བཤད་བརྒྱབ་རྒྱུ་དེ་འདྲ་བྱེད་ཀྱི་ཡོད།
དེ་སྔ་རིག་གནས་གསར་བརྗེ་སྐབས་སུ་ཆོས་ལུགས་ཚང་མ་རྩ་མེད་བཟོ་རྒྱུའི་འབད་བརྩོན་བྱས་པ་རེད། འབད་བརྩོན་བྱས་པ་དེས་ནུས་པ་གང་ཡང་མ་ཐོན་པར་བར་སྐབས་ནས་ཆོས་ལ་དོ་སྣང་བྱེད་མཁན་ཧ་ཅང་མང་དུ་ཕྱིན་ཏེ་ཡི་ཤུ་མང་དུ་འགྲོ་གི་འདུག ལྷག་པར་ནང་པའི་ཆོས་ལ་དོ་སྣང་བྱེད་མཁན་ཧ་ཅང་མང་དུ་འགྲོ་བཞིན་འདུག དེ་དག་ང་ཚོའི་མཐུན་པའི་ཕྱོགས་རེད། འཛམ་གླིང་ཕྱི་ལོག་ལ་ཆ་བཞག་ནའང་བོད་ཐོག་དོ་སྣང་བྱེད་མཁན་དང་བོད་པར་ཤ་ཚ་བྱེད་མཁན་ཤུགས་ཆེ་རུ་འགྲོ་གི་འདུག དེ་འདྲའི་གནས་སྟངས་འོག་གཙོ་ཆེ་མ་རྩ་ལྟ་བུ་བོད་རྒྱ་ཆེ་མི་མང་གི་སེམས་ཤུགས་ཧ་ཅང་ཆེན་པོ་འདུག དེ་ལ་ཕྱོགས་བསྡོམས་བརྒྱབ་པ་ཡིན་ན། བདེན་པའི་མཐའ་ཏན་ཏན་གསལ་ཐུབ་ཀྱི་རེད། བརྒྱ་ཆ་བརྒྱ་ཐམ་པ་ཡིད་ཆེས་བྱེད་ཐུབ། དུས་ཚོད་ག་དུས་ཡོང་མིན་བཤད་ཐུབ་ཀྱི་མ་རེད། དེར་བརྟེན་ཁྱེད་རང་ཚོ་ཚང་མ་སེམས་པ་སྐྱིད་པོ་དང་བློ་བདེ་པོ་བྱོས། ཞེས་སོགས་ཀྱི་བཀའ་སློབ་སྩལ།།
