ཕྱི་ལོ་ ༡༩༧༨ ཟླ་ ༦ ཚེས་ ༡༣ ཉིན་དོལ་རྒྱལ་སྐོར་ལ་སྩལ་བའི་བཀའ་སློབ།

ཕྱི་ལོ་ ༡༩༧༨ ཟླ་ ༦ ཚེས་ ༡༣ ཉིན་རྣམ་གྲྭ་མཁན་པོ་བློ་བཟང་ཉི་མ་དང༌། དགེ་བཤེས་བློ་བཟང་བསྟན་འཛིན། རྣམ་གྲྭའི་ལས་སྣེ་དང༌། རྒན་གྲས་ཉི་ཤུ་རྩ་གཉིས། གནས་ཆུང་བ་རྒན་གྲས་ལྔ། རིགས་ལམ་སློབ་གྲྭའི་དགེ་རྒན་གཉིས། བཞུགས་སྒར་དུ་གཏན་སྡོད་རྒྱུད་གྲྭ་སྨད་སྟོད་ཀྱི་འཐུས་མི་གཉིས། དམིགས་བསལ་བཅར་འཐུས་བཀའ་འཁྲོལ་ཨ་རི་ཁུལ་བཅའ་སྡོད་རྭ་སྟོད་སྐྱོང་བླ་སྤྲུལ་སྐུ་དང༌། ཉག་རེ་སྐལ་བཟང་ཡེ་ཤེས་བཅས་པར་རྒྱལ་ཆེན་ཤུགས་ལྡན་ལམ་དོལ་རྒྱལ་སྐོར་བཀའ་སློབ་སྩལ་བ་གསུང་དཔར་ནས་ཕབ་བཤུས་སླར་སྤྱན་ཞུས་ལ་བསྐྱར་སྣོན་རེ་ཟུང་སྩལ་བ་བཅས་ཞལ་བཤུས་ཞུས་པ།

དེ་རིང་ངས་སྒྲུང་གཅིག་ཤོད་འདོད་བྱུང༌། དེང་སང་རྒྱལ་ཆེན་ཤུགས་ལྡན་གྱི་སྐོར་ལ་སྐད་ཆ་ཕྲན་བུ་ཕྲན་བུ་ཡོང་གི་ཡོད་སྟབས། ངས་རྣམ་གྲྭ་དང༌། གནས་ཆུང་བ་ཁྱེད་རང་ཚོར་རྒྱལ་ཆེན་ཤུགས་ལྡན་གྱི་སྐོར་ལ་འགྲེལ་བཤད་ཅིག་བརྒྱབ་ན་བསམ་བྱུང༌། ཁྱེད་རང་ཚོས་ཤེས་གསལ་རེད། བར་ལམ་རྒྱལ་ཆེན་ཤུགས་ལྡན་སྐོར་ལ་འགྱུར་བ་ཕྱིན་ཡོད་པ་དང༌། འགྱུར་བ་འགྲོ་སྟངས་ཐོག་མཐའ་བར་གསུམ་གྱི་གནས་ཚུལ་དངོས་བརྗེན་རྣམས་བཤད་ན་བསམ་པ་དྲན་བྱུང༌། སྐུ་ཞབས་མཁན་པོ་དང་སྐད་ཆ་བྱུང༌། གཞན་དག་སུས་ཀྱང་འདི་སྐོར་ད་ཕན་གང་ཡང་ཤེས་ཀྱི་མེད། རྒྱལ་ཆེན་གྱི་ཐོག་མའི་འབྱུང་ཁུངས་ནི། ྋསྐྱབས་རྗེ་རིན་པོ་ཆེས་མཛད་པའི་བསྟོད་པའི་འགྲེལ་པའི་ནང་གསུངས་པ་བཞིན། སྤྲུལ་སྐུ་གྲགས་པ་རྒྱལ་མཚན་ནས་བྱུང་བར་གསུངས། སྤྲུལ་སྐུ་གྲགས་པ་རྒྱལ་མཚན་ཁོང་རང་གི་གཤིས་ཀ་དང༌། དགོངས་པ་བཞེས་སྟངས་དེ་ཚོ་ཡག་པོ་ཞིག་ཡོད་པ་རེད་བསམ་གྱི་འདུག གྲགས་པ་རྒྱལ་མཚན་གྱི་གསུང་འབུམ་བྲིས་མ་ཞིག་ངས་མཐོང་བྱུང་བ་དེའི་ནང་ཁོང་གི་གསང་རྣམ་ཡང་འདུག ཁོང་སློབ་སྦྱོང་ཡག་པོ་དང༌། ཐུགས་དུལ་པོ་ཡག་པོ་ཡོད་ཚོད་འདུག ཁོང་གི་གསུང་ནང་བླ་མའི་རྣལ་འབྱོར་ཁག་ཁ་ཤས་འདུག གཅིག་གི་ནང་ལ་དབུས་སུ་སྟོན་པ་ཐུབ་པའི་དབང་པོ་དང༌། དེའི་མཐའ་བསྐོར་ལ་སློབ་དཔོན་རིན་པོ་ཆེ་དབུས་སུ་བཞུགས་པར་དེའི་མཐའ་རྙིང་མ་བརྒྱུད་པའི་བླ་མ་རྣམས་ཀྱིས་བསྐོར་བ༑ ས་ཆེན་ཀུན་དགའ་སྙིང་པོ་གཙོ་བོར་བྱས། དེའི་མཐའ་ལ་ས་སྐྱའི་བླ་མ་རྣམས་ཀྱིས་བསྐོར་བ། མར་མི་དྭགས་གསུམ་གཙོ་བོར་གྱུར་པ་ལ་བཀའ་བརྒྱུད་བླ་མ་རྣམས་ཀྱིས་བསྐོར་བ། རྗེ་རིན་པོ་ཆེ་ཡབ་སྲས་གཙོ་བོར་བྱས་པ་ལ་དགེ་ལུགས་བླ་མ་རྣམས་ཀྱིས་བསྐོར་བ། མདུན་དུ་ཆོས་འབྲེལ་དངོས་ཐོབ་རྩ་བའི་བླ་མ་པཎ་ཆེན་ཆོས་རྒྱན་དང༌། ྋརྒྱལ་དབང་ལྔ་པ་གཉིས་ཡོད་པ། དེ་འདྲའི་ཚོགས་ཞིང་ཞིག་བསྒྲིགས་ནས་ཡོད་པ་དང༌། དེ་དང་རྗེས་འབྲེལ་གྱི་དངོས་གཞི་ཡན་ལག་བདུན་པའི་ཕྱག་འཚལ་བའི་ཡན་ལག་དང༌།

རྗེས་སུ་ཡི་རངས་པའི་ཡན་ལག དེ་ཚོའི་སྐབས་ལ་ས་དགེ་བཀའ་རྙིང་གི་བླ་མ་གོང་མ་ཚོའི་མཛད་པའི་སྙིང་པོ་རྣམས་བཀོད་ནས་དེ་འདྲའི་ཡོན་ཏན་དྲན་པའི་སྒོ་ནས་ཕྱག་འཚལ་བ་དང༌། བསྟོད་པ་བྱེད་རྒྱུ་ཡོད་པ། མཇུག་བྱང་ལ་དེང་སང་ཆོས་ལུགས་ཀྱི་ཐོག་ནས་སྡིག་པ་ཚབས་པོ་ཆེ་ཞིག་བསགས་ཏེ་ངན་སོང་ལ་ལྷུང་བའི་རྒྱུ་སྒྲུབ་མཁན་ཡོང་གི་འདུག དེ་འདྲའི་དགག་བྱ་སེལ་བའི་དོན་དུ་འདི་ཆེད་དུ་གཉེར་ནས་བསྒྲིགས་པ་ཡིན་ཞེས་གསུངས་འདུག ངས་དེ་མཐོང་སྟེ་ཡག་པོ་རེད་བསམ་པ་དྲན་བྱུང༌། རྣམ་ཀུན་རྒྱལ་ཆེན་ཕྱོགས་ལྷུང་ཡོད་པ་ལྟ་བུར་བརྩི་གི་ཡོད་ཀྱང༌། གྲགས་པ་རྒྱལ་མཚན་གྱི་གསུང་ནང་དེ་འདྲ་ཞིག་ཡོད་སྟབས་ཡག་པོ་རེད་བསམ་བྱུང༌། ྋརྒྱལ་དབང་བསོད་ནམས་རྒྱ་མཚོའི་རྣམ་ཐར་ནང་སྐབས་ཤིག་ཡང་སྲིད་རིན་པོ་ཆེས་གཟིམ་ཆུང་ནང་ཆུ་རྩེད་མཛད་པས་ཞབས་ཞུ་དྲུང་གསུང་རབ་པས་མ་མགུ་ནས་སྙན་སྒྲོན་ཕུལ་བ་མ་གསན་ན་ང་ནི་པཎ་ཆེན་བསོད་ནམས་གྲགས་པས་བདག་པོ་བསྐྱོན་པ་ཡོད། གཟིམ་ཁང་གོང་ལ་འགྲོ་གི་ཡིན་ཞེས་དེ་འདྲ་བགྲངས་ཀྱི་ཡོད་པ་གསལ་འདུག དེའི་བབས་ནས་བལྟས་ན་ཡང་གཟིམ་ཁང་འོག་ཅེས་པ་རྒྱལ་བ་རིན་པོ་ཆེའི་བླ་བྲང་དང༌། གཟིམ་ཁང་གོང་ཞེས་པ་སྤྲུལ་སྐུ་གྲགས་པ་རྒྱལ་མཚན་ན་རིམ་བཞུགས་སའི་བླ་བྲང་གཉིས་ཀ་དར་རྒྱས་ཆེན་པོ་ཡོད་པ་དང༌། དེ་འདྲའི་རྐྱེན་གྱིས་གཤམ་འོག་ལས་ཀ་བྱེད་མཁན་ཚོའི་ནང་དུ་ཡང་ཕྲན་བུའི་མཐུན་མི་མཐུན་གྱི་གནས་ཚུལ་ཞིག་ཏན་ཏན་ཡོད་ཚོད་འདུག ྋགོང་ས་ལྔ་པ་ཆེན་པོའི་རྣམ་ཐར་ནང་སྐབས་ཤིག་གཟའ་འཛིན་དང་བསྟུན་མ་ཤའི་ལས་སྦྱོར་གནང་རྩིས་ཀྱིས་བདུན་ཕྲག་གཅིག་གི་མཚམས་བཞུགས་རྩིས་སྐབས་ལ་སྔ་དྲོ་སྐུ་ཉོབ་མདངས་ཆེན་པོ་བྱུང་སྟེ་ཐུན་ལེགས་པོ་ཡེ་མ་བྱུང༌། དེ་ཉིན་གཟིམ་ཁང་གོང་གི་སྤྲུལ་སྐུ་བསྙུན་གྱི་འདུག་ཅེས་གློ་བུར་དུ་ལན་ཞིག་འབྱོར། ྋགོང་ས་ལྔ་པ་ཆེན་པོ་ཕེབས་པའི་སྐབས་ལ་འབྱུང་པོ་ཞིག་གིས་བརླམས་པས་ཐུགས་དྲན་མི་ཟིན་པར་ཡོད་པར་གཟིགས་ཤིང༌། ྋརྒྱལ་དབང་ཉིད་ཀྱི་སྐུའི་ཉོབ་མདངས་དེ་ཡང་གདོན་གྲིབ་ཡིན་པ་འདྲ་འདུག་ཅེས་གསུངས་པ་གསལ་གྱི་འདུག དགེ་འདུན་རྒྱ་མཚོའི་རྣམ་ཐར་ལ་བལྟས་ན་ྋརྒྱལ་དབང་རིམ་པར་གནས་སྙིང་རྒྱལ་པོའི་ཆོ་འཕྲུལ་ཞིག་ཡོད་པར་སྣང༌། ཡང༌། ྋརྒྱལ་དབང་རྣམ་ཐར་ནང་དུ་གསལ་གྱི་མེད་ཀྱང། སྤྱིར་བཏང་བཤད་རྒྱུན་ཞིག་ལ་དར་བརྫོང་རྒྱབ་ནས་བཀྲོངས་པ་རེད་ཅེས་ཤོད་ཀྱི་ཡོད། ཡང༌། གྲགས་པ་རྒྱལ་མཚན་གྱི་སྐུ་སྐྱེ་གོང་མ་ཞིག་ལ་གནས་ཆུང་གིས་བསྐུལ་བ་རེད་ཅེས་ཟེར་རྒྱུན་ཞིག་ཀྱང་ཡོད། དེ་ཚོ་སྤྱིར་བཏང་ཡིག་ཆའི་ནང་ཡོད་པས་ན་ངས་ཞིབ་བཤད་མ་དགོས་པ་བྱས། གང་ལྟར་ཡོངས་གྲགས་ཀྱི་གནས་ཚུལ་ལ་ྋགོང་ས་ལྔ་པ་ཆེན་པོ་དང༌། གྲགས་པ་རྒྱལ་མཚན་གཉིས་འབྲེལ་བ་ཞིག་ཆགས། དེ་ནས་སྤྲུལ་སྐུ་གྲགས་པ་རྒྱལ་མཚན་དྲེགས་པའི་སྐུར་བཞེངས་པ་རེད་ཅེས་སྐད་ཆ་ཞིག་ཡོང་གི་ཡོད།

ཡང༌། ྋགོང་ས་ལྔ་པའི་ཡོངས་གྲགས་ཀྱི་རྣམ་ཐར་ནང་ཡོད་པ་བཞིན་དོལ་རྒྱལ་ཆེན་གྱི་ཆོ་འཕྲུལ་རྣམ་འགྱུར་གང་ལ་གང་འཚམས་ཤིག་བྱུང༌། དེ་མེད་པ་བཟོ་རྒྱུའི་ཐབས་ཤེས་ལ་ྋགོང་ས་ལྔ་པ་རང་ནས་ཀྱང་དྲག་ལས་གནང་བའི་ལོ་རྒྱུས་ཡོད་པ་དང༌། དེ་བཞིན་སྨིན་གྲོལ་གླིང་གི་རིག་འཛིན་གཏེར་བདག་གླིང་པ་དང༌། རྡོ་རྗེ་བྲག་གི་རིག་འཛིན་པདྨ་འཕྲིན་ལས་ཁོང་གཉིས་ནས་གཅིག་གིས་ཨེ་ཝཾ་དང༌། གཅིག་གིས་རྩེ་ལ་སྦྱིན་སྲེག་དུས་གཅིག་ལ་གནང་བའི་ལོ་རྒྱུས་ཤིག་ཡོད་ཚོད་འདུག རིག་འཛིན་པད་འཕྲིན་གྱི་རྣམ་ཐར་ནང་སྐབས་དེར་དོལ་རྒྱལ་ཆེན་གྱི་ཆེད་དུ་དམིགས་ནས་དྲག་པོའི་སྦྱིན་སྲེག་གནང་བའི་སྐབས་ལ་ཤ་རྗེན་མེར་བསྲེགས་བཏང་བའི་དྲི་མ་དངོས་སུ་ཚོར་བ་ཞིག་བྱུང༌། དེ་ནས་བཟུང་སྟེ་ཤུལ་མེད་དུ་སོང་བའི་ལོ་རྒྱུས་གསུང་རྒྱུན་གཅིག་ཡོད། ཡང༌། རིགས་གཅིག་ལ་བསེ་ཁྲབ་པས་རྒྱལ་ཆེན་ལ་གྲོགས་འཕྲིན་ལས་བྱས་ཏེ་སྲེག་མ་ཐུབ་པའི་ལོ་རྒྱུས་ཀྱང་ཡོད་པ་རེད། ཡང༌། སྤྲུལ་སྐུ་གྲགས་པ་རྒྱལ་མཚན་དྲག་པོ་ལ་བཞེངས་ཚར་བའི་རྗེས་ལ་ཁོང་པཎ་ཆེན་བློ་བཟང་ཆོས་རྒྱན་གྱི་སློབ་མ་ཡིན་སྟབས་བཀྲ་ཤིས་ལྷུན་པོར་ཕེབས། བཀྲ་ཤིས་ལྷུན་པོར་རྣམ་སྲས་རྟ་བདག་བརྒྱད་ཀྱིས་བཀྲ་ཤིས་ལྷུན་པོའི་དགོན་པ་བསྐོར་ནས་ནང་དུ་མ་ཐར་བའི་ལོ་རྒྱུས་ཡོངས་གྲགས་ཡོད་པ་དེ་རེད། འདི་སྐོར་ལ་བསམ་བློ་གཏོང་དགོས་པ་ཞིག་ཆགས་ཀྱི་འདུག དེའི་སྐབས་བཀྲ་ཤིས་ལྷུན་པོར་བཞུགས་པའི་པཎ་ཆེན་བློ་བཟང་ཆོས་རྒྱན་དགེ་ལུགས་པའི་བསྟན་པའི་བདག་པོར་ཡོད་པ་དང༌། ཁོང་ཉིད་ཀྱི་སློབ་མ་གྲགས་པ་རྒྱལ་མཚན་དགེ་ལུགས་པའི་བསྟན་པའི་དོན་དུ་དྲག་པོའི་སྐུར་བཞེངས་པ་ཞིག་ཡིན་ན། རྗེ་བླ་མས་སྐྱེས་བུ་གསུམ་གྱི་སྲུང་མར་བསྔགས་པའི་ནང་ཚན་རྣམ་ཐོས་སྲས་ཀྱིས་གྲོགས་འཕྲིན་དགའ་བསུ་ཞུ་དགོས་ཚོད་རེད། གང་ལྟར་བླ་མའི་ཞལ་ལ་གཟིགས་ནས་ཕེབས་པའི་སྐབས་ལ་རྒྱུ་མཚན་ག་རེ་ཡིན་རུང་མིན་རུང་ཞལ་མཇལ་དམ་འདོགས་མ་བྱུང་ནས་གནས་ཚུལ་གྲ་མ་འགྲིགས་ཤིག་ཐོན། དེ་ནས་སྐབས་དེའི་ས་སྐྱའི་བདག་ཁྲི་ནས་བདག་པོ་སྐྱོན་རྒྱུའི་དགོས་པ་ཞིག་གཟིགས་ཚོད་ནས་བདག་པོ་བསྐྱོན་ཏེ་ས་སྐྱ་དང་འབྲེལ་བ་ཡོང་སྟངས་འདི་འདྲ་རེད། དེ་འདྲ་བའི་གནས་ཚུལ་ལོ་རྒྱུས་གཅིག་ཡོད།

དེ་མིན་ྋརྒྱལ་དབང་དྲུག་པ་ཚངས་དབྱངས་རྒྱ་མཚོས་རྙིང་མའང་ཤུགས་ཆེན་པོ་གནང་ཡོད་ཚོད་རེད། ྋགོང་ས་ྋལྔ་པ་ཆེན་པོའི་མཛད་སྲོལ་དྲི་མ་མ་ཡལ་བར་བསྡད་ཡོད། དེ་རྗེས་ྋརྒྱལ་མཆོག་བདུན་པ་ཆེན་པོའི་སྐབས་ལ་དགེ་ལུགས་གཙང་མ་གནང་བ་རེད། གཅིག་བྱས་ན་རྒྱལ་ཆེན་གྱི་འབྲེལ་བ་ཡོང་དགོས་ཚོད་ཡིན་ནའང༌། ྋརྒྱལ་མཆོག་བསྐལ་བཟང་གི་གསུང་ནང་རྒྱལ་ཆེན་དང་འབྲེལ་བ་ཡོད་པའི་གླེང་རྩ་བ་ནས་མི་འདུག དེ་ནས་ྋརྒྱལ་བ་རིམ་བྱོན་སྐུ་མདུན་སྐུ་གོང་མ་ལ་ཐུག་གི་བར་ྋརྒྱལ་བ་སྐུ་ཕྲེང་རིམ་བྱོན་གྱི་ནང་ལ་རྒྱལ་ཆེན་དང་འབྲེལ་བ་ཡོད་པ་རྩ་བ་ནས་ཡོད་ས་མ་རེད། ྋརྒྱལ་མཆོག་ཚུལ་ཁྲིམས་སམ། ྋལུང་རྟོགས་གཉིས་སུ་ཡིན་གཅིག་ཁམས་ནས་ཕེབས་ལམ་ཞིག་ལ་རྒྱལ་ཆེན་སྐུ་ཕེབས་ཞིག་གིས་མཇལ་ཁ་ཞུས་པའི་ལོ་རྒྱུས་ཤིག་འདུག

དེ་ནི་ས་གནས་དེ་གའི་གནས་ཚུལ་ཞིག་ལས། དེ་ལས་སྤྲོས་པའི་ྋརྒྱལ་བ་སྐུ་ཕྲེང་རིམ་བྱོན་དང་དམིགས་སུ་བསལ་བའི་འབྲེལ་བ་ཡང་གང་བྱུང་མི་འདུག པཎ་ཆེན་བློ་བཟང་ཡེ་ཤེས་སྐབས་ནི་འབྲེལ་བ་བྱུང་ཚོད་མི་འདུག དེའི་རྗེས་ཀྱི་པཎ་ཆེན་དཔལ་ལྡན་ཡེ་ཤེས་ཀྱི་སྐབས་ལའང་འབྲེལ་བ་ཨེ་ཡོད་བསམ་པ་འདུག བསྟན་པའི་ཉི་མའི་སྐབས་ལ་གང་འདྲ་ཡིན་མིན་ངས་གསལ་པོ་མི་ཤེས། བསྟན་པའི་དབང་ཕྱུག་གི་སྐབས་ལ་འཁོན་འགྲས་བྱུང་བའི་ལོ་རྒྱུས་ཤིག་ཤོད་ཀྱི་ཡོད། དེ་དང་པོ་བསྟེན། དེ་ནས་འཁོན་འགྲས་ཤོར་བ་ཡིན་ནམ། དང་པོ་ནས་འབྲེལ་བ་དམིགས་བསལ་མེད་པ་འཁོན་འགྲས་ཤོར་བ་ཇི་ཡིན་མི་ཤེས། དེ་ནས་ྋརྒྱལ་བ་སྐུ་གོང་མའི་སྐབས་ལ་སྤྱིར་བཏང་ལྷ་ཕེབས་མཁན་མང་པོ་ཞིག་ལ་དམ་དྲག་གནང་བ་དང༌། ལྷག་པར་རྒྱལ་ཆེན་གྱི་ཐོག་ལ་དམ་དྲག་ཤུགས་ཆེན་པོ་གནང་ཡོད་ཚོད། ལྷ་ས་སྤྲོ་བདེ་ཁང་གསར་ལ་རྒྱལ་ཆེན་སྐུ་ཕེབས་མི་ཆོག་པའི་དམ་དྲག་བཀའ་འགོག་ནི་གནང་མེད། རྒྱ་ཁྱབ་ལ་དམ་དྲག་གི་བཀའ་རྒྱ་ཞིག་བཀྲམས་ཡོད་ཚོད་འདུག སྐབས་དེར་འབྲས་སྤུངས་ལ་ཡང་དམ་དྲག་ཤུགས་ཆེན་པོ་བྱུང་སྟེ་འབྲས་སྤུངས་སྔགས་ཁང་ནང་རྒྱལ་ཆེན་གྱི་སྐུ་གཅིག་ཡོད་ཚོད་དེ་ཡང་མར་འདོན་དགོས་པ་དང༌། སྤྲོ་བདེ་ཁང་གསར་ལ་དུང་རྒྱ་གཏོང་མཁན་འབྲས་སྔགས་ནས་ཡོང་ལམ་ཞིག་ཡོད་པ་དེ་ཡང་མཚམས་བཞག་འདུག དེ་བཞིན་དགའ་ལྡན་ལའང་ཁང་ཚན་འགའ་ཤས་ནང་རྒྱལ་ཆེན་བསྟེན་མཁན་ཚོར་སྐབས་དེར་དམ་དྲག་ཤུགས་ཆེན་པོ་བྱུང༌། སྐུ་གོང་མས་དམ་དྲག་གནང་བའི་རྗེས་འབྲེལ་སྐབས་དེར་དགའ་ལྡན་ཁྲི་པ་མི་ཉག་ཨ་མྲིའམ། ཡེ་ཤེས་དབང་ལྡན་ཡིན་ཚོད་ཁོང་གིས་ཀྱང་དེའི་ཐོག་ལ་མཇུག་གནོན་ཤུགས་ཆེན་པོ་གནང་ནས་གང་ལྟར་དགའ་ལྡན་གླིང་ནང་ལ་རྒྱལ་ཆེན་བསྟེན་རྒྱུ་མངོན་གསལ་ཆུང་ཆུང་བྱེད་དགོས་པའི་གནས་ཚུལ་བྱུང་ཚོད་འདུག དེ་ཚོ་སྐུ་གོང་མའི་སྐབས་ལ་བྱུང་བ་རེད།

དེ་ནས་ངོས་ནས་ནོར་འཁྲུལ་བྱས་པ་རེད། ངས་ནོར་འཁྲུལ་གང་འདྲ་བྱས་པ་རེད་ཟེར་ན། ྋརྒྱལ་བ་སྐུ་ཕྲེང་གོང་མ་དེ་ཚོའི་རང་ལུགས་ཀྱི་འགྲོ་སྟངས་ཤིག་ཡོད་པ་དེའི་སྒང་ལ་འགྲོ་སྡོད་རང་ཚུགས་ཐུབ་པ་ཞིག་མ་བྱུང་བ་རེད། དེ་ཡང་གྲོ་མོར་ཕྱིན་པའི་སྐབས་ལ་གྲོ་མོ་དུང་དཀར་དགོན་པར་སྡོད་རྒྱུ་འཁེལ། གྲོ་མོ་དུང་དཀར་དགོན་པར་དྲག་པོ་རྒྱལ་ཆེན་སྐུ་ཕེབས་རྒྱུ་དང༌། འདུལ་འཛིན་ཞི་བའི་སྐུ་ཕེབས་རྒྱུ་ཡོད་པ་རེད། སྐུ་བསྟེན་ཁོང་རང་མཁས་པ་ཤེས་བྱ་ཡོན་ཏན་ཡོད་མཁན་ཅིག་མ་ཡིན་ནའང༌། སྐུ་ཕེབས་པའི་སྐབས་ལ་ལུང་གསལ་པོ་དང་ངོ་སོ་ཐོན་པོ་ཡག་པོ་ཡོད་ཚོད་འདུག དེ་འདྲའི་ཐོག་ནས་སྐབས་དེར་ང་ལྷ་ས་ནས་གྲོ་མོར་འགྲོ་དགོས་གློ་བུར་གྱི་གནས་ཚུལ་ཞིག་ཆགས། གནས་ཆུང་སྐུ་བསྟེན་དང༌། དགའ་གདོང་སྐུ་བསྟེན་གཉིས་ཀ་ཆིབས་ཞབས་ཁོངས་སུ་ཡོད་པ་མ་རེད། དེ་དུས་གནས་དགའ་གཉིས་ལ་འཆར་ཅན་ལོ་གསོལ་དབྱར་གསོལ་དགུན་གསོལ་གྱི་སྤྱན་འདྲེན་ལས་དམིགས་བསལ་གཟིམ་ཆུང་སྤྱན་འདྲེན་བཏང་ནས་ཉེ་པོ་བྱས་པ་སོགས་གང་ཡང་བྱུང་མེད། མ་གཞི་དེ་ཕན་ཆད་ཀྱི་ངའི་གནས་སྟངས་ཕྲུག་གུ་ཆུང་ཆུང་ཞིག་འཚར་ལོངས་བྱེད་པའི་སྐབས་རེད། སོ་སོས་བསམ་བློ་བཏང་སྟེ་རང་དབང་གི་ཐོག་ནས་ལྷའི་གནས་ཚུལ་ཕར་བཞག་སྟེ་སྤྱིར་བཏང་ཡང་ངས་དེ་ཙམ་བསམ་བློ་འཁོར་ཐུབ་ཀྱི་མེད། གང་ལྟར་ཡང་སྙིང་སྐབས་དེར་གནས་དགའ་གཉིས་མེད་པ་དང༌། ཚུར་ཕྱོགས་འདིར་རྒྱ་བོད་གཉིས་གྲོས་མཐུན་བྱེད་རྒྱུས་མཚོན་པའི་གནས་ཚུལ་རྙོག་ཁྲ་མང་པོ་བྱུང༌། ལས་བྱེད་ཚོའི་ཁོངས་ནས་ཕར་ལྷ་སར་ལོག་དགོས་ཟེར་མཁན་གཅིག་དང༌། ཚུར་རྒྱ་གར་ལ་འགྲོ་དགོས་ཟེར་མཁན་ཁག་ཅིག་སོགས་ཀྱི་ཐག་གཅོད་ཧ་ཅང་བྱེད་ཁག་པོའི་གནས་ཚུལ་མང་པོ་བྱུང༌། དེ་འདྲའི་སྐབས་ལ་འདུལ་འཛིན་སྐུ་ཕེབས་ཡག་པོ་གཅིག་འཁྲིས་དེར་ཡོད་པ་བྱས། ཕྱོགས་གཅིག་ནས་ང་རང་གི་ངོས་ནས་རྗེ་ཕ་བོང་ཁ་ལ་དད་པ་ཆེན་པོ་ཡོད་པ་དེ་འདྲའི་རྐྱེན་ཞེན་ཁོག་དང་སེམས་ཐག་ཉེ་པོ་ཞིག་ཆགས། ྋསྐྱབས་རྗེ་ཁྲི་བྱང་རིན་པོ་ཆེ་ནས་ཀྱང་ཐུགས་མཉེས་པོ་གནང་གི་ཡོད་པ་དེ་འདྲས་ཀྱང་རྐྱེན་བྱས། གང་ལྟར་རྐྱེན་མང་པོ་ཞིག་འཕྲད་དེ་ཐ་མ་གྲོ་མོར་གཟིམ་ཆུང་དུ་འདུལ་འཛིན་སྤྱན་འདྲེན་ཞུས་པ་རེད། སྤྱན་འདྲེན་གཏོང་སྐབས་དགའ་ལྡན་ལྷ་བརྒྱ་མར་སྟག་ཕུའི་གསང་རྟ་བསྐྱོན་ནས་བཏོན་གྱི་འདུག སྐུ་ཕེབས་པའི་སྐབས་ལ་ཡང་ཆོས་གོས་སྣམ་སྦྱར་དང༌། པཎ་ཞྭ་བཞེས། ཡིན་མདོག་ཁ་པོ་འདུག ངོས་ལ་ཕྱོགས་ནས་སྡོང་པོ་འགྱེལ་བ་ལྟ་བུའི་ཕྱག་འཚལ་གྱི་འདུག ལུང་འདྲ་དོགས་གཅོད་ཞུས་པའི་སྐབས་ལ་གསལ་པོ་གང་ལ་གང་འཚམས་འདུག ཚར་གཅིག་གི་སྐབས་ལ་ད་ལྟ་དགའ་ལྡན་དུ་རྗེ་རིན་པོ་ཆེར་དགོངས་བསྐོར་ཞུས་ནས་ཡོང་བ་ཡིན་ཞེས་ཐག་ཆོད་མདོག་ཁ་པོ་དང༌། ཡིན་མདོག་ཁ་པོ་གསུངས་བྱུང༌།

དེ་ནས་གྲོ་མོ་ནས་ལྷ་སར་ལོག་ཁར་རྒྱལ་ཆེན་བསྟེན་རྒྱུའི་བསམ་ཚུལ་ཤུགས་ཆེ་རུ་ཕྱིན་ནས་དུང་དཀར་དགོན་པའི་ཚོམས་ཆེན་ནང་ཤུགས་ལྡན་དྲག་པོ་སྤྱན་འདྲེན་ཞུས། དེ་ལ་རྒྱས་ཆས་གསར་པ་བཟོས་ནས་ཕུལ། ཐོག་མ་རྒྱལ་ཆེན་དང་འབྲེལ་བ་ཡོང་སྟངས་དེ་འདྲ་བྱས་ནས་བྱུང་བ་རེད། ྋརྒྱལ་བ་སྐུ་ཕྲེང་བཅུ་བཞི་པས་རང་ཚུགས་ཟིན་མ་ཐུབ་པར་ྋརྒྱལ་དབང་གོང་མའི་ལམ་ལ་ཏག་ཏག་འགྲོ་མ་ཐུབ་པའི་ནོར་འཁྲུལ་དང་པོ་དེ་དུས་བྱས་པ་རེད། ྋསྐྱབས་རྗེ་སྟག་བྲག་རིན་པོ་ཆེ་རྒྱལ་ཐོག་གནང་བའི་སྐབས་དགེ་བཤེས་ཚེ་དབང་བསམ་གྲུབ་ནས་ལྕགས་པོ་རི་དང༌། སྤྱན་བསལ་གླིང་ཁར་འཇིགས་བྱེད་ཀྱི་སྒོ་ནས་དྲག་པོའི་འཕྲུལ་འཁོར་སྒྲུབ་ཏུ་འཇུག་གནང་སྐབས་དང༌། ང་གྲོ་མོར་འགྲོ་ཤུལ་དུ་དགེ་བཤེས་ཚེ་དབང་བསམ་གྲུབ་ནས་རྒྱས་པའི་འཕྲུལ་འཁོར་དང༌། དབང་གི་འཕྲུལ་འཁོར་སྒྲུབ་སྟེ་གྲོ་མོར་ཆེད་མངགས་བཏང་བྱུང་བ་བཅས་ཁོང་དང་འབྲེལ་བ་ཕྲན་བུ་བྱུང་བ་དང༌། དེ་ནས་གྲོ་མོ་ནས་ལྷ་སར་སླེབས་པའི་རྗེས་ལ་གཟིམ་དཔོན་མཁན་པོ་བྱམས་པ་ཆོས་བཟང་དང༌། དགེ་བཤེས་ཚེ་དབང་བསམ་གྲུབ་གཉིས་ཧ་ཅང་ཉེ་པོ་རེད། དགེ་བཤེས་ཚེ་དབང་བསམ་གྲུབ་ལྕགས་ཟམ་ལ་བཞུགས་ཀྱི་ཡོད་ལ། ཆོས་འཁོར་ཡང་རྩེའི་རྒྱལ་ཆེན་ཆོས་རྗེ་ད་ལྟ་མོན་གྷོ་ལ་ཡོད་པ་དེ་དང་དགེ་བཤེས་ཚེ་དབང་བསམ་གྲུབ་གཉིས་ཉེ་པོ་ཡོད་ཚོད་འདུག དེ་འདྲའི་ཐོག་ནས་སྐབས་ཤིག་ལ་ཆོས་འཁོར་ཡང་རྩེའི་རྒྱལ་ཆེན་གྱི་ལུང་བསྟན་གཅིག་དགེ་བཤེས་ཚེ་དབང་བསམ་གྲུབ་ནས་གཟིམ་དཔོན་བྱམས་པ་ཆོས་བཟང་བརྒྱུད་ང་ལ་བསྐུར་བྱུང༌། དེ་རྗེས་གཞི་ནས་གཟིམ་དཔོན་བྱམས་པ་ཆོས་བཟང་བརྒྱུད་དགེ་བཤེས་ཚེ་དབང་བསམ་གྲུབ་སར་ཡར་མར་ཆིབས་གཡོག་བཏང༌། ཆིབས་གཡོག་གི་མདུན་ལ་ལུང་ཞུའི་ས་བོན་འདྲ་བསྐུར་ཏེ་དགེ་བཤེས་ཚེ་དབང་བསམ་གྲུབ་བརྒྱུད་ནས་ཆོས་འཁོར་ཡང་རྩེའི་རྒྱལ་ཆེན་ལ་ལུང་ཞུ་ཐེངས་འགའ་ཤས་བྱས་པ་ཡིན། དེའི་སྐབས་ལ་ཆོས་འཁོར་ཡང་རྩེའི་རྒྱལ་ཆེན་གྱི་ལུང་དོན་ལྟར་ལྷ་ས་ཞོལ་དཔར་ཁང་གི་འཇིགས་བྱེད་དང༌། རིག་བྱེད་མ། དུས་འཁོར་བཅས་པའི་སྐུ་བཞེངས་པ་རེད། དེ་འདྲ་ཞིག་གི་སྐབས་ལ་འདུལ་འཛིན་གྱི་ལུང་ཞིག་ནང་འཆར་ལོའི་ལོ་གསར་ཚེས་གསུམ་ལ་ངས་རྒྱལ་ཆེན་གྱི་བསྐང་གསོ་རྒྱས་པ་ཞིག་འདོན་དགོས་ཀྱི་ཡོད། དེ་བྱུང་ན་དེ་ལ་མཚན་མ་བརྟག་དཔྱད་བྱེད་རྒྱུ་ཞིག་ཡོང་ཞེས་གསུང་བྱུང༌། དེ་ནས་རྗེས་ལོའི་ལོ་གསར་ཟླ་བ་དང་པོའི་ཚེས་གསུམ་ཉིན་འཆར་ཅན་ལྷ་མོའི་ཚེས་གསུམ་ཟན་བསྒྲིལ་བྱ་རྒྱུའི་ཚེས་གཏོར་འདོན་སྐབས་ལ་ཞོགས་པ་ལྷ་མོའི་འཕྲིན་བཅོལ་བཏོན་པའི་ཞོར་ལ་རྒྱལ་ཆེན་གྱི་བསྐོང་གསོ་རྒྱས་པ་དེ་བཏོན། དེ་དུས་གཟིམ་ཆུང་དུ་རྒྱལ་ཆེན་སྐུ་ཐང་དང༌། སྐུ་གང་ཡང་མེད་སྟབས་ྋསྐྱབས་རྗེ་ཁྲི་བྱང་རིན་པོ་ཆེའི་སྐུ་མདུན་ནས་རྒྱལ་ཆེན་གྱི་སྐུ་ཐང་ཞིག་གཡར་པོ་ཞུས་ཏེ་བཤམས། དེ་ནུབ་རྨི་ལམ་ལ་ནོར་བུ་གླིང་ཁའི་མགོན་པོ་ཁང་གི་རྒྱབ་ལོགས་སུ་སྤང་གཤོངས་ཡོད་ས་དེར་ཉི་འོད་དྭངས་པོ་མེད་པ་ཞིག་མུས་དེར་མེ་ཏོག་སེར་ཆེན་གང་འཚམས་དང༌། སྤང་ཁའི་སྒང་ལ་གཡག་ཁ་ཤས་ཤིག་འདུག དེ་ནས་མཁན་པོ་དམ་པ་བསྟན་བྱུང༌། མཁན་པོ་དམ་པའི་ཕྱག་ལ་གསེར་སྐྱོག་ནང་མར་ཁུ་བླུགས་པ་ཞིག་བསྟན་བྱུང་དེ་ཚོ་ཡག་པོ་རེད། གཡག་ཁ་ཤས་ཡོད་པ་དེ་ཚོ་ཐེ་ཚོམ་སྐྱེ་གཞི་རེད། དེང་སང་བསམ་གཞིགས་བྱས་ན་གཡག་དེ་ཚོས་དམ་སྲི་མཚོན་གྱི་ཡོད་པ་འདྲ། དེ་འདྲའི་རྨི་ལམ་ཞིག་བསྟན་བྱུང༌། དེ་ནས་བཟུང་སྟེ་ལོ་ལྟར་ཟླ་བ་དང་པོའི་ཚེས་གསུམ་ལ་རྒྱན་ཆེན་བསྐང་གསོ་རྒྱས་པ་རེ་གཞེས་ནིང་ལོ་བར་བཏོན་པ་རེད།

དེ་མཇུག་ལ་ྋསྐྱབས་རྗེ་ཁྲི་བྱང་རིན་པོ་ཆེའི་སྐུ་ཐང་ལ་དཔེ་བལྟས་ནས་རྒྱལ་ཆེན་གྱི་སྐུ་ཐང་གསར་པ་ཞིག་བཞེངས་པ་ཡིན། དེ་ྋསྐྱབས་རྗེ་ཁྲི་བྱང་རིན་པོ་ཆེའི་རྣམ་ཐར་ནང་དུའང་གསལ་འདུག དེ་འདྲ་ཞིག་གི་སྐབས་ལ་ངས་ཆོས་འཁོར་ཡང་རྩེའི་རྒྱལ་ཆེན་ལ་བརྟག་དཔྱད་ཆེད་ཉིན་གཅིག་སྤྱིར་བཏང་ལུང་ཞུ་ནང་བཞིན་ཡི་གེའི་ནང་དོན་དག་མ་བཀོད་པར་གསང་ཏར་གྱི་ཨང་ཀི་བཀོད་དེ་བཏང་བ་ཡིན། དེའི་ལན་ལ་གོ་བ་བླངས་ན་ལེན་རྒྱུ་ཡོད་པའི་བཟོ་འདྲ་པོ་གསལ་པོ་རང་མེད་པ། མར་ཨང་གྲངས་བཀོད་དེ་བཏང་བ་ལ་མི་འདོད་པའི་རྣམ་འགྱུར་འདྲ་པོ་ཕྲན་བུ་འདུག དེ་ནས་བཟུང་སྟེ་འབྲེལ་མ་བྱས་པ་རེད། ཆོས་འཁོར་ཡང་རྩེའི་རྒྱལ་ཆེན་དེ་སྐུ་གསོལ་ཞུས་པ་སོགས་གང་ཡང་ཡོད་པ་མ་རེད། ཁྲི་བྱང་རིན་པོ་ཆེ་བརྒྱུད་ནས་སྤང་ལུང་རྒྱལ་ཆེན་ལ་འཕྲིན་བཅོལ་འདྲ་རེ་ཟུང་བྱུང་ཡོད་ན་མ་གཏོགས་གཞན་དག་གང་ཡང་མེད། ངས་ལོ་གསར་ཚེས་གསུམ་ལ་རྒྱལ་ཆེན་གྱི་བསྐང་གསོ་རྒྱས་པ་རེ་དང༌། ནམ་རྒྱུན་ཉིན་རེའི་ཁ་འདོན་གྱི་འཕྲིན་བཅོལ་ཁོངས་མགོན་ཆོས་ལྷ་མོ་རྣམ་སྲས། ཞལ། ལྕམ་སྲིང༌། རྒྱལ་པོ་སྐུ་ལྔ་བཅས་ཀྱི་མཇུག་རང་ཉིད་ཡི་དམ་ཟེར་བའི་རྒྱལ་ཆེན་འཕྲིན་བཅོལ་དེ་ཆག་མེད་དུ་བཏོན་པ་རེད། རྒྱལ་ཆེན་དང་འབྲེལ་བ་ཐོག་མར་ཡོང་སྟངས་དང༌། བར་གྱི་གནས་སྟངས་དེ་འདྲ་ཞིག་རེད། དེ་སྔ་སྐུ་གོང་མའི་སྐབས་ལ་གནས་ཆུང་གི་ལུང་བསྟན་ཞིག་ནང༌། དགོས་པའི་མཆོད་རྟེན་ནག་པོར་བཞག །མི་དགོས་བྲག་ལ་སྐུ་དཀར་གསོལ། །ཞེས་གསུངས་ཡོད་པ་བཞིན། ངས་ྋརྒྱལ་བ་སྐུ་ཕྲེང་རིམ་བྱོན་སྐབས་ནས་འབྲེལ་བ་ཡོད་པ་དང༌། དེ་ལས་ཐག་རིང་ཙམ་བྱས་ན་བོད་རྗེ་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐབས་ནས་འབྲེལ་བ་ཡོད་པ། ད་དུང་དེ་ལས་ཐག་རིང་བ་བྱས་ན་རྒྱལ་པོ་དཀོན་མཆོག་འབངས་ནས་འབྲེལ་བ་ཡོད་མཁན་གྱི་རྒྱལ་པོ་སྐུ་ལྔ་དང༌། ལྷག་པར་རྡོ་རྗེ་གྲགས་ལྡན་དང་དམིགས་བསལ་འབྲེལ་བ་ཟབ་པོ་ཞིག་མ་བྱུང་བའི་ཁར། གཞུང་གི་ཆབ་སྲིད་ཀྱི་འགན་དང༌། ྋརྒྱལ་བ་སྐུ་ཕྲེང་རིམ་བྱོན་ལ་འབྲེལ་བ་གང་ཡང་མེད་པའི་ལྷ་གསར་པ་གཅིག་ལ་འབྲེལ་བ་ཆགས་པ་ལྟ་བུ་དེ་འདྲ་ཞིག་བྱུང་བ་རེད། ཡིན་ན་ཡང༌། རྒྱ་ནག་ལ་མ་ཕྱིན་གོང་ཙམ་ནས་གནས་དགའ་གཉིས་གཟིམ་ཆུང་དུ་སྤྱན་འདྲེན་གཏོང་རྒྱུ་འགོ་ཚུགས་ཤིང༌། དེ་ནས་བཟུང་སྟེ་གནས་དགའ་གཉིས་རིམ་པར་གཟིམ་ཆུང་སྤྱན་འདྲེན་བཏང༌། བློ་ཐག་ཉེ་པོ་དང༌། ཕན་ཚུན་རྒྱུད་ཚོད་ལོན་པ་ལྟ་བུ་ཆགས་དུས་སྤྱིར་བཏང་ལྷ་མི་ཀུན་སྤྱོད་གཅིག་ཟེར་བ་ལྟར་ལུང་ཡང་ཇེ་གསལ་དུ་ཕྱིན། སྐད་ཆ་ཡང་དྲི་བདེ་པོ་ཆགས་པ་རེད། དེ་ནས་བཟུང་སྟེ་ཆོས་འཁོར་ཡང་རྩེའི་རྒྱལ་ཆེན་དང༌། གཞན་དག་ལ་འབྲེལ་བ་བྱེད་དགོས་པ་དངོས་ཡོད་གནས་ཚུལ་གྱི་ཐོག་ནས་ཡོང་གི་མེད། གནས་དགའ་གཉིས་ཐད་ཀར་སྤྱན་འདྲེན་བཏང་གིན་བཏང་གིན་བྱས། གནས་དགའ་གཉིས་ཀྱི་ཐོག་ནས་ཐག་མ་ཆོད་པའི་རིགས་ཟན་བརྟག་བསྒྲིལ་གྱིན་བསྒྲིལ་གྱིན་བྱས་པ་རེད། ཟན་བརྟག་གི་ཐོག་ནས་ཀྱང་ངོ་མཚར་སྐྱེ་བའི་གནས་ཚུལ་མང་པོ་ཞིག་བྱུང་བ་དེ་ངས་ད་ལྟ་འབྲེལ་བ་མེད་སྟབས་བརྗོད་དགོས་དོན་མི་འདུག

དེ་ནས་ཕྱི་ལོ་ ༡༩༥༦ ལོར་རྒྱ་གར་ལ་ཡོང་རྒྱུར་རྒྱ་མིའི་བཀག་འགོག་འགལ་རྐྱེན་ཀ་ཀོར་གནས་ཚུལ་མང་པོ་བྱུང་སྐབས་གནས་ཆུང་གིས་དཀའ་རྙོག་གང་ཡང་མེད་པས་བཞེད་དོན་ལྷུན་གྱིས་འགྲུབ་ཡོང་ཞེས་ལུང་ཕེབས་པ་ལྟར་ཐ་མ་ལྷུན་གྱིས་གྲུབ་པའི་གནས་ཚུལ་བྱུང་བ་རེད། ཡང༌། དེ་དུས་རྒྱ་གར་ནས་ཕར་ལྷ་སར་ལོག་དང་མ་ལོག་སྐོར་ལའང་གནས་ཚུལ་དཀའ་རྙོག་མང་པོ་ཞིག་བྱུང་བར་གནས་དགའ་གཉིས་སྤྱན་འདྲེན་བཏང༌། ལྷག་པར་གནས་ཆུང་ནས་རྒྱ་གར་ནང་བསྡད་ན་དགོས་པ་གང་ཡང་མེད་པས་བོད་ལ་ལོག་ན་ལེགས་ཞེས་ཐག་གཅོད་གཙང་མའི་བཀའ་ལུང་གནང༌། དེ་ནས་ཕྱི་ལོ་ ༡༩༥༩ ལོར་ཟིང་འཁྲུག་ལངས་པའི་སྐབས་གནས་ཆུང་སྤྱན་འདྲེན་ཐེངས་ཁ་ཤས་ཞུས། ཐ་མ་ནོར་བུ་གླིང་ཁ་ནས་བྲོས་རྒྱུའི་དུས་ཚོད་སྔ་རྗེས། ཚེས་གྲངས། ལམ་ཕྱོགས་ག་འགྲོ་དགོས་སོགས་ཆ་ཚང་གནས་ཆུང་ནས་ཐག་གཅོད་གནང་ནས་ཡོང་བ་རེད། གང་ལྟར་ཉེ་ཞོ་མེད་པར་གྲ་འགྲིགས་འཐུས་ཚང་བྱུང་བ་རེད། གནས་དགའ་གཉིས་དང༌། ལྷག་པར་གནས་ཆུང་འདི་དོན་དག་འགངས་ལ་ཐུག་པའི་སྐབས་ལ་ཡིད་ཆེས་འཕེར་ངེས། བསླུ་བ་མེད་པའི་ཐག་ཆོད་པོ་ཞིག་རེད། དེ་ནས་རྒྱ་གར་ལ་སླེབས། ཐོག་མར་མ་སུ་རི་དང༌། དེ་རྗེས་རྡ་རམ་ས་ལར་སླེབས་ཚར་ཙམ་ཞིག་ལ་ངས་ྋསྐྱབས་རྗེ་ཁྲི་བྱང་རིན་པོ་ཆེ་ནས་རྒྱལ་ཆེན་གྱི་སྲོག་གཏད་ཞུ་འདོད་བྱུང་བས་ཁྲི་བྱང་རིན་པོ་ཆེར་སྙན་སེང་ཡང་ཞུས། སྐབས་དེར་ཁྲི་བྱང་རིན་པོ་ཆེར་མི་འདི་ཡིན་ངོ་ཆ་གསལ་པོ་མི་འཕྲོད་པ་ཞིག་གིས་ལམ་རིམ་ཆེན་མོ་དགའ་ལྡན་དཔར་རྙིང་སྤུས་དག་པོ་ཞིག་འབུལ་མཁན་བྱུང༌། ཁྲི་བྱང་རིན་པོ་ཆེ་ནས་ཀྱང་རྒྱལ་ཆེན་སྲོག་གཏད་ཞུ་སྐབས་ལམ་རིམ་ཕྱག་དཔེ་ཞིག་དགོས་རྒྱུར་སྐབས་དེར་དཔེ་ཆ་དེ་གནང་གི་ཡིན་ཞེས་གྲ་སྒྲིག་གནང་ནས་བཞག དེ་ནས་སྡོད་ཁང་སརྦག་ཨ་ཤ་རམ་ནས་ཐེག་ཆེན་ཆོས་གླིང་ལ་སྤོས་ཚར་ཙམ་ཞིག་ལ་གནས་དགའི་སྤྱན་འདྲེན་ཞིག་གི་སྐབས་གནས་ཆུང་གིས་ཨ་གསས་འཁྱམས་པོ་བསྟེན་རྒྱུ་འདི་འགྲིགས་ཀྱི་མི་འདུག་ཅེས་གསུང་གི་འདུག ངའི་བསམ་པར་ཨ་གསས་འཁྱམས་པོ་ཟེར་བ་དེ་སྐུ་གོང་མའི་སྐབས་རྒྱལ་ཆེན་ཤུགས་ལྡན་ལ་ཟེར་རྒྱུའི་སྐད་ཆ་ཞིག་ཡིན་འདུག་པ་དེ་གསུང་གི་ཡོད་དམ་སྙམ་པ་དེ་དོན་གནས་ཆུང་ལ་དྲིས་པས་དེ་ཡིན་གསུང་བྱུང༌། དེ་ཡིན་ན་དེང་སང་རྒྱལ་ཆེན་བསྟེན་མཁན་མང་པོ་རེད། གནས་ཆུང་ཆོས་སྐྱོང་གི་ཞལ་ནས་རྒྱལ་ཆེན་བསྟེན་ན་འགྲིགས་ཀྱི་མི་འདུག་གསུངས་ན་མི་མང་པོའི་སེམས་ནང་ལ་དམ་ཚིག་བསྲེས་ལྷད་འགྲོ་གི་རེད། ཞལ་ཁ་བཞུགས་ན་ཡག་གི་རེད་ཅེས་ཞུས་པ་ཡིན། ལགས་གསུངས་ཏེ་དུས་དེ་ནས་བཟུང་སྟེ་ཕ་རྒོད་བླ་མའི་ཞལ་ལུང་གི་དེབ་སེར་པོ་མ་ཐོན་བར་ཧ་ལམ་ལོ་བདུན་བརྒྱད་ཙམ་སོང་རིང་གནས་ཆུང་གིས་ཚིག་གཅིག་གསུངས་མ་བྱུང༌།

དེ་ལྟར་གནས་ཆུང་གིས་དེ་འདྲ་གསུངས་སྐབས་མི་མང་པོའི་སེམས་ཟང་ཟིང་བྱས་ནས་དཀྲོགས་རྐྱེན་ལ་འགྲོ་ཡོང་བསམ་ནས་ངས་ཟོལ་མེད་ལྷག་བསམ་རྣམ་དག་གི་ཐོག་ནས་ཞལ་ཁ་བཞུགས་ཞུས་ཏེ། དུས་དེ་ནས་བཟུང་ཚིག་གཅིག་སྒྲོས་གཅིག་གསུང་གི་མི་འདུག འོན་ཀྱང་ང་ལ་སྤྱང་གྲུང་ཞིག་སླེབས་པ་རེད། རྒྱལ་ཆེན་གྱི་སྲོག་གཏད་ཞུ་རྒྱུ་དེ་ཡག་པོ་མི་འདུག་བསམ་པ་དྲན་བྱུང༌། དེའི་སྐབས་དེར་ཆ་བཞག་ན་ང་རྒྱལ་ཆེན་ལ་དགའ་མོས་ཡོད། ྋསྐྱབས་རྗེ་ཕ་བོང་ཁའི་ཆོས་བརྒྱུད་ཐོག་ནས་བྱས་ནའང་ཞེན་ཁོག་གཅིག་ཡོང་གི་ཡོད་པ་རེད། གནམ་འདིའི་ཁ་འོག་ན་གནས་ཆུང་རྒྱུས་ཡོད་པའི་མི་སུ་ཡོད་ཟེར་ན་མངོན་ཤེས་ཡོད་པའི་མི་ཚོ་ཕར་བཞག སྤྱིར་བཏང་མིའི་ནང་ལ་གནས་ཆུང་རྒྱུས་ཡོད་ཆེ་ཤོས་ཀྱི་མི་དེ་ང་ཆགས་ཡོད། དེ་བཞིན་ངའི་རྒྱུས་ཡོད་ཆེ་ཤོས་དེ་ཡང་ཕལ་ཆེར་གནས་ཆུང་ཆགས་ཡོད་པ་རེད། ནམ་རྒྱུན་ཕྱི་ལ་གསུང་རྒྱུན་གཅིག་ལ་རྒྱལ་ཆེན་གནས་ཆུང་གིས་བསྐུལ་བ་རེད། དེར་བརྟེན་གནས་ཆུང་དང་རྒྱལ་ཆེན་མི་འགྲིགས་པ་ཡོང་ཤེས་ཀྱི་མ་རེད་ཅེས་བསྟོད་འགྲེལ་གྱི་ནང་ལའང་ཁྲི་བྱང་རིན་པོ་ཆེས་གསུངས་ཡོད་ལ། སྤྱིར་བཏང་གསུང་རྒྱུན་འདི་འདྲ་ཞིག་ཡོད། ཕྱི་ནས་ག་རེ་བཤད་རུང་མ་བཤད་རུང་གང་ལྟར་གནས་ཆུང་དང་རྒྱལ་ཆེན་གཉིས་མ་མཐུན་པའི་གནས་ཚུལ་ཞིག་ཆགས་ཡོད། ངའི་ངོས་ནས་གནས་ཆུང་ལྷ་རྙིང་མི་རྙིང་རེད། རྒྱལ་ཆེན་ལྷ་གསར་མི་གསར་རེད། འདི་གཉིས་ནས་གཅིག་འདེམས་དགོས་ན་ངས་གནས་ཆུང་འདེམས་རྒྱུ་ལས་རྒྱལ་ཆེན་འདེམས་ཤེས་ཀྱི་མ་རེད། དེར་བརྟེན་རྒྱལ་ཆེན་གྱི་སྲོག་གཏད་ཞུ་རྒྱུ་མི་འདུག་བསམ་ནས་སྲོག་གཏད་ཞུས་མེད། འོན་ཀྱང་ལམ་སེང་ཐག་གཅོད་བྱེད་བདེ་པོ་ཞིག་མེད་སྟབས་གསེར་ཀོང་རིན་པོ་ཆེ་ང་གཉིས་གོ་བསྡུར་ཞིག་བྱུང༌། བར་ལམ་གནས་ཚུལ་འདི་དང་འདི་འདྲ་ཞིག་ཡོང་གི་འདུག་ཅེས་གནས་ལུགས་ཆ་ཚང་ཞུས་པ་ཡིན། དེ་ཡང་ངས་གསེང་ཀོང་རིན་པོ་ཆེའི་དྲུང་ནས་ལམ་སྒྲོན་བཤད་ལུང་ཞུ་བའི་སྐབས་སུ་ཡིན། གསེར་ཀོང་རིན་པོ་ཆེ་ང་གཉིས་གསུང་ཆོས་ཀྱི་བར་ལ་གསོལ་ཇ་མཆོད། བཀའ་མོལ་ཞུ་སྐབས་ཐོག་ཁའི་སྒང་ལ་རྡོ་གཅིག་ཐག་སེ་གཞུས་ནས་ཐག་སྒྲ་ཆེན་པོ་ཞིག་ཀྱང་བྱུང༌། དེ་རྗེས་ཡོངས་འཛིན་རིན་པོ་ཆེར་འདི་དང་འདིའི་གནས་ཚུལ་བྱུང་སོང༌། ད་ནི་གང་འདྲ་བྱས་ན་ལེགས་ཞེས་དགོངས་སྐོར་ཞུས་པར་ཡོངས་འཛིན་རིན་པོ་ཆེ་ནས་གནས་ཚུལ་དེ་ཤིན་ཏུ་གལ་ཆེན་པོ་རེད། སྲོག་གཏད་མ་ཞུས་ན་ལེགས་ཞེས་གསུངས་བྱུང༌། ཁྲི་བྱང་རིན་པོ་ཆེར་སྔོན་དུ་སྲོག་གཏད་ཞུ་རྒྱུའི་སྙན་སེང་ཞུས་ཟིན་སྟབས་ཁྲི་བྱང་རིན་པོ་ཆེ་རང་ལ་གནས་ལུགས་ཇི་བྱུང་གསལ་པོ་བྱས་ཏེ་ཞུས་ནས་ད་ཆ་སྲོག་གཏད་ཞུ་གི་མིན་ཞེས་མཚམས་འཇོག་བྱས་པ་ཡིན། དེ་སྐབས་ནང་དོན་ངས་སྲོག་གཏད་ཞུ་དང་མི་ཞུའི་སྐོར་གྱི་གནས་ཚུལ་ཐག་གཅོད་བྱས་པ་ལས། ལོ་གསོལ་འདོན་རྒྱུ་དང༌། ནམ་རྒྱུན་འཕྲིན་བཅོལ་འདོན་རྒྱུ་གཉིས་ལ་འགྱུར་བ་གང་ཡང་མ་བཏང་བར་འཆར་ཅན་རང་བྱས་པ་ཡིན། དེ་ནས་སྐབས་ཤིག་གནས་ཆུང་གིས་ལུང་ཞིག་ནང༌། གཙུག་ལག་ཁང་དུ་གུ་རུའི་འབུམ་ཚོགས་ཞིག་འབུལ་དགོས། དེ་ཕུལ་ན་བོད་དོན་སྤྱིར་རྟགས་མཚན་ཡོང་ཞེས་གསུངས་བྱུང༌། ཐོག་མར་གུ་རུའི་འབུམ་ཚོགས་འབུལ་བའི་སྐབས་དེ་ལ་ང་ཚོར་རྙིང་མའི་ཆོ་ག་རྒྱུས་ལེགས་པོ་མེད་ཅིང༌། ངེད་རང་གི་ལག་པར་གསང་བ་རྒྱ་ཅན་གྱི་དཔེ་ཆ་ཡང་འབྱོར་རྒྱུ་ཡིན། དཔེ་ཆ་བརྩད་ཞིབ་སྐབས་ཐུའུ་བཀྭན་གྱི་གསུང་རྟ་མགྲིན་གསང་སྒྲུབ་སྐོར་གྱི་རྟ་པོད་ནང་ཚེས་བཅུ་གཏོང་སྟངས་དང༌། ཚོགས་འབུལ་སྟངས་སྐོར། སློབ་དཔོན་ལ་ཚོགས་འབུལ་དགོས་པའི་རྒྱུ་མཚན་བཅས་བཀོད་པ་ཡག་པོ་ཞིག་འདུག་པ་དེ་གཞིར་བཞག་བྱས། དེའི་ཕྱོགས་བསྒྲིགས་ཁོང་རང་གིས་གནང་བ་མ་གཏོགས་གཙོ་བོ་ྋརྒྱལ་བ་དགེ་འདུན་རྒྱ་མཚོའི་གསུང་དང༌། པཎ་ཆེན་བློ་བཟང་ཆོས་རྒྱན་གྱི་གསུང་གཉིས་ཕྱོགས་བསྡེབས་བྱས་པ་ཞིག་རེད། བར་སྐབས་ང་ཚོས་གཙུག་ལག་ཁང་དུ་འདོན་པ་དེ་རེད།

དེ་ནས་ལོ་ཤས་རྗེས་ཕྱི་ལོ་ ༡༩༧༥ ཤིང་ཡོས་སྤྲེལ་ཟླ་ཚེས་བཅུའི་འབུམ་ཚོགས་ཚུགས་པའི་སྐབས་ལ་དགེ་ལུགས་པའི་གྲྭ་པ་ཁ་ཤས་དང༌། ཨ་ཎི་ཁ་ཤས་ཡོང་ལ་མི་ཡོང་བྱས་བྱུང༌། བོད་མི་ཚང་མ་རང་བཙན་འདོད་ཀྱི་ཡོད་པའི་སྐད་ཆ་རེད། གཙུག་ལག་ཁང་དུ་སློབ་དཔོན་གྱི་སྐུ་བཞེངས་པ་དང༌། འབུམ་ཚོགས་འབུལ་རྒྱུ་ང་བསྟན་འཛིན་རྒྱ་མཚོ་སྒེར་གྱི་དོན་ལ་མིན། བོད་སྤྱི་པའི་བླ་མ་དུས་ཚོད་སྙིགས་མ་ནག་པོའི་ཕྱོགས་ཀྱི་མི་དང་མི་མིན་འབྱུང་པོའི་རིགས་ཁ་རྒྱས་ནས་ཡོང་བའི་སྐབས་ལ་ཐུགས་བསྐྱེད་དམ་བཅའ་དམིགས་བསལ་ཡོད་པ་དང༌། བོད་འབངས་ཀྱི་ངོས་ནས་ཀྱང་ལས་དང་བསོད་ནམས་ཀྱི་འབྲེལ་བ་དམིགས་བསལ་ཡོད་པའི་དགོས་པ་རྒྱུ་མཚན་འབྲེལ་བ་དེ་སློབ་དཔོན་རིན་པོ་ཆེ་རེད། དེས་ན་ང་ཚོས་སློབ་དཔོན་རིན་པོ་ཆེར་གསོལ་བ་འདེབས་རྒྱུ་གལ་ཆེན་པོ་རེད། སྤྱི་པའི་དོན་དག་གལ་ཆེ་དོན་ཆེ་ཞིག་ལ་འདི་འདྲ་བྱེད་པ་ནི་མི་བདེ་ཙམ་བྱུང༌། དེ་རྗེས་བརྟག་དཔྱད་བྱེད་པའི་སྐབས་ལ་དེབ་ཞེད་སྣང་ཆེན་པོ་ཞིག་དོན་འདུག དེ་ལ་བརྟེན་ནས་ཨ་ཎི་ཚོ་བླ་འདར་ནས་ཡོང་མ་ནུས་པ་རེད་ཅེས་ཤོད་མཁན་འདུག དེའི་རྗེས་རྩད་གཅོད་བྱེད་སྐབས་ཕ་རྒོད་བླ་མའི་ཞལ་ལུང་ཟེར་བའི་དེབ་སེར་པོ་དེ་མཐོང་བྱུང༌། ཛེ་སྨད་རིན་པོ་ཆེས་ང་ལ་གསང་བ་བྱས་པ་རེད། ངས་ཚོགས་ལ་ཡོང་ལ་མ་ཡོང་ཇི་བྱས་རྩད་གཅོད་བྱེད་པའི་སྐབས་ལ་གཞི་ནས་གནས་ཚུལ་དེ་འདྲ་གོ་ཐོས་བྱུང་བ་མ་གཏོགས་ངས་ཤེས་མ་བྱུང༌། ཕྱི་ལ་པར་ཐོན་ཚང་མ་ཚར་བ་རེད། དེ་ནས་ཉིན་མ་གཅིག་གཉིས་ཀྱི་རྗེས་ལ་གདོང་ཐོག་བསྟན་པའི་རྒྱལ་མཚན་གྱིས་བྲིས་པའི་དགག་པའི་དེབ་དེ་ཁོ་རང་གི་ལག་བྲིས་ཀྱི་ཡི་གེ་དང་མགས་པར་ཕུད་ཡིན་ཞེས་འབྱོར་བྱུང༌། དེབ་སེར་པོ་དང༌། གདོང་ཐོག་གི་དགག་པ་གཉིས་ཀ་མཐོང་བྱུང༌། དེའི་སྐབས་ལ་དངོས་གནས་བློ་གང་འཚམས་ཕམ་བྱུང༌། ངས་རང་གི་ཤག་གི་ནང་ལ་སྡོད་པའི་སྐབས་ལ་ཁ་འདོན་ག་རེ་བྱེད་ཀྱི་ཡོད་རུང་མེད་རུང༌། ངས་ཡིག་ཚང་འདིའི་ནང་ལ་ཡོང་དུས་སྤྱི་པའི་སྤྱི་མི་ཞིག་བྱས་ནས་སྡོད་ཀྱི་ཡོད། དགེ་ལུགས་པ་ཡིན་ཞེས་ཕྱོགས་སུ་ལྷུང་གི་མེད་ལ། རྙིང་མ་ཡིན་ཞེས་ཕྱོགས་སུ་ལྷུང་གི་མེད། ས་སྐྱ་ཡིན་ཞེས་ཕྱོགས་སུ་ལྷུང་གི་མེད། བཀའ་བརྒྱུད་པ་ཡིན་ཞེས་ཕྱོགས་སུ་ལྷུང་གི་མེད། ཨ་མདོ་དང་ཡས་མས་ཟེར་བ་སུ་གཅིག་གི་ཕྱོགས་སུ་མ་ལྷུང་བར་ངས་སྤྱི་པའི་སྤྱི་མི་ཞིག་བྱས་ནས་སྡོད་ཀྱི་ཡོད། སྤྱི་མི་ཞིག་བྱས་ནས་བསྡད་པའི་ཉེར་ལེན་ལས་ཚང་མའི་སྣང་བར་འགྲོ་མི་འགྲོ་སྣ་ཚོགས་རེད། གཅིག་གི་སྣང་བ་ལ་ཕྱིན་ན་གཅིག་གི་སྣང་བ་ལ་མ་འགྲོ་མཁན་ལྟ་བུ་ཕྲན་བུ་ཡོང་གི་འདུག དཔེར་ན༑ དགེ་ལུགས་པའི་གྲས་ནས་ངས་དགེ་ལུགས་པར་བདག་གཅེས་བྱེད་ཀྱི་མི་འདུག་མདོག་མདོག དེ་བཞིན་རྙིང་མ་དང༌། བཀའ་བརྒྱུད་པའི་གྲས་ནས་ཀྱང་ཕྲན་བུ་བཤད་ཡོང་གི་འདུག འོན་ཀྱང་གནས་ཚུལ་འདི་ནི་སྤྱི་མི་ཡིན་པའི་རྟགས་མཚན་རེད་བསམ་པ་མ་གཏོགས། དེ་ལས་ལྷག་པའི་ང་ལ་རྣམ་རྟོག་གང་ཡང་མེད། ངས་སྤྱི་པའི་དོན་དག་ལ་དངོས་གནས་དྲང་གནས་གང་ཡོང་ཅི་ཡོང་གི་འཁུར་བླངས་ཏེ་སྡོད་པའི་སྐབས་འདིར། དེ་སྔ་བློ་མ་རངས་པའི་མིའམ། ཡང་ན། གནས་ཚུལ་མ་ཤེས་མཁན་ཞིག་གིས་དཀྲོགས་རྐྱེན་བཟོས་ན་དེ་ཡོང་སྲིད་པ་རེད། དེ་ཆོས་ཉིད་རེད། ངས་ངེར་པར་དུ་དག་པ་སྟེར་རྒྱུ་ཡིན། དེ་གཉིས་ཀ་མིན་པའི་སྐུ་ཞབས་ཛེ་སྨད་ལྟ་བུ་ལ་ཕྱོགས་གཅིག་ནས་ཆོས་ལུགས་སྐོར་ལ་ྋརྒྱལ་བ་རིན་པོ་ཆེའི་སྔ་ཕྱིའི་སྲིད་བྱུས་སམ་ལྟ་སྟངས་ག་འདྲ་ཞིག་ཡོད་མེད་ཆ་ཚང་རྒྱུས་མངའ་ཡོད་པ་རེད། དགེ་རྒན་འོས་སྦྱོང་ཐོག་མ་འགོ་འཛུགས་པའི་སྐབས་རྡ་རམ་ས་ལ་ཤོད་དུ་ཁང་པ་འགྲིགས་མིན་བྱུང་སྟེ་ཀང་རར་ཚུགས་པའི་སྐབས་ངས་ཉིན་གཅིག་ཀང་རར་ཆེད་མངགས་ཕྱིན། ཁོང་ཚོའི་སྡོད་ཁང་ཉམས་ཆེ་ས་དེར་གཞོགས་གཅིག་ལ་ཀུན་བདེ་གླིང་དང༌། གཞོགས་གཅིག་ལ་ཛེ་སྨད་བསྡད། ངས་དཀྱིལ་དུ་བསྡད་ནས་དགེ་རྒན་འོས་སྦྱོང་པ་ཚོར་ངས་འགྲེལ་བཤད་རིང་པོ་ཞིག་བརྒྱབ་པ་ཡིན། དེའི་ནང་ཆོས་ལུགས་སྐོར་ལ་གལ་ཏེ་ལྟ་བ་སྐྱོན་མེད་ནི་རི་བོ་དགེ་ལྡན་པའི་ལྟ་བ་འདི་རེད། དགེ་ལྡན་པའི་ལྟ་བ་མ་གཏོགས་གཞན་དག་གི་ལྟ་བ་རྣམས་སྐྱོན་ཡོད་པར་ངོས་འཛིན་བྱས་ཏེ། གལ་ཏེ་དེ་ལྟར་བདེན་ན་བོད་གངས་ཅན་ལ་རྗེ་རིན་པོ་ཆེ་མ་བྱུང་སྔོན་ལ་སངས་རྒྱས་ཀྱི་གོ་འཕང་ཕར་ཞོག ཚོགས་ལམ་ཆེ་འབྲིང་ཡན་ཆད་ཐོབ་པའི་གང་ཟག་གཅིག་ཀྱང་མ་བྱུང་ཞེས་བརྗོད་དགོས་བྱེད་ཀྱི་རེད། རྗེ་རིན་པོ་ཆེ་མ་བྱུང་གོང་ལ་བོད་ལ་ཟུང་འཇུག་གི་གོ་འཕང་ཐོབ་མཁན་མང་པོ་བྱུང་ཡོད། དེ་རྣམས་ལྟ་བ་ཕྱིན་ཅི་ལོག་པ་ངེས་པའི་སྟེང་ནས་འགྲོ་དགོས་པ་ལས་ལྟ་སྒོམ་སྤྱོད་པ་མ་ནོར་བ་ཞིག་རང་རྒྱུད་ལ་མེད་པར་ཚོགས་ལམ་ཆེ་འབྲིང་ཡན་འགྲོ་ཐུབ་ཀྱི་མ་རེད་ཅེས་ངས་བཤད་པ་ཡིན།

རྒྱུ་མཚན་དེ་འདྲ་ཡིན་དུས་བཀའ་རྙིང་ས་དགེ་ཚང་མ་སངས་རྒྱས་བདེ་བླག་ཏུ་སྒྲུབ་པའི་མདོ་སྔགས་ཟུང་འབྲེལ་གྱི་ཟབ་ཆོས་ཤ་སྟག་ཡིན་པས། ང་ཚོས་ཆོས་ལུགས་ཀྱི་ཕྱོགས་རིས་དང་བཟང་ཞན་གྱི་སྐད་ཆ་ཤོད་རྒྱུ་བསྡད་མི་འདུག་ཅེས་གསལ་པོ་བྱས་ནས་བཤད་པ་ཡིན། སྐབས་དེར་ཛེ་སྨད་རིན་པོ་ཆེ་ཡོད་སྟབས་མ་གོ་མ་ཐོས་མེད་པར་ཆ་ཚང་ཐོས་ཡོད། མི་ཤེས་པ་ཡོང་ཤེས་ཀྱི་མ་རེད། གཉིས་ནས་ྋསྐྱབས་རྗེ་ཁྲི་བྱང་རིན་པོ་ཆེའི་སྟབས་བྱས་ནས་ཛེ་སྨད་རིན་པོ་ཆེ་ངས་རྒྱ་ནག་ལ་འཁྲིད་པ་ཡིན། ༡༩༥༦ ལོར་སངས་རྒྱས་མྱང་འདས་ཀྱི་དུས་ཆེན་སྐབས་རྒྱ་གར་ལ་འཁྲིད་པ་ཡིན། དེ་ནས་ ༡༩༥༩ ཟིང་འཁྲུག་བྱུང་ནས་ཁོང་རྒྱ་གར་ལ་སླེབས་རྗེས་འདྲ་འདྲའི་ནང་ནས་མི་འདྲ་ཙམ་བྱས་ནས་སློབ་གྲྭའི་དགེ་རྒན་འོས་སྦྱོང་ཆེད་འཛུགས་བྱས་པ་དེའི་འགོ་བྱེད་ལ་བསྐོས་པ་ཡིན། དེ་འདྲ་བྱས་ཏེ་གནས་ཚུལ་ཆ་ཚང་ཤེས་མཁན་དང༌། བཟང་པོས་མཐའ་བསྐྱངས་ཏེ་བསྐྱངས་པའི་མི་གཅིག་གིས་བྱེད་སྟངས་དང༌། ཁ་ཐབས་དེ་འདྲ་ཞིག་བྱས་པ་རེད། ངས་བོད་པའི་དོན་དག་ལ་བསམ་བློ་བཏང་སྟེ་སྲིད་བྱུས་བཟུང་བ་དེར་འཕྱར་བ་གྲུ་འདེགས་ཀྱི་ཆར་པ་ཆུ་གྲོགས་སུ་འགྲོ་བའི་ཕན་ཐོགས་ཤིག་བྱེད་མ་ཐུབ་ནའང༌། གནོད་སྐྱོན་འགྲོ་རྒྱུའི་ལས་ཀ་བྱེད་རྒྱུ་དེ་བབས་འོས་ཡོད་པ་ག་ནས་ཡིན། དེ་ལྟར་ཡིན་དུས་བྱེད་སྤྱོད་འདི་ནི་གལ་སྲིད་ཤེས་བཞིན་ཁྱད་གསོད་མིན་ནའང༌། སྣང་ཆུང་ཁྱད་གསོད་བྱས་པ་ཞིག་ཡིན་པ་བརྒྱ་ཆ་བརྒྱ་ཐམ་པ་ཐག་བཅད་ཆོག་པ་ལོང་བས་བལྟས་ཀྱང་ཤེས་ཀྱི་རེད། དེར་བརྟེན་དངོས་གནས་བློ་ཕམ་ཆེན་པོ་བྱུང༌། མི་གཞན་དག་ནས་ཀྱང་གནས་ཚུལ་གང་འདྲ་ཞིག་མཐོང་གི་རེད། ྋརྒྱལ་བ་རིན་པོ་ཆེ་ནས་འདྲ་འདྲའི་ནང་ནས་མི་འདྲ་བར་ཆ་བཞག་ནས་ལས་ཀ་བསྐུལ་སའི་མི་ཞིག་གིས་དེབ་དེ་འདྲ་ཞིག་བྲིས། དེ་ྋསྐྱབས་རྗེ་ཁྲི་བྱང་རིན་པོ་ཆེའི་ཞལ་གསུང་ཡིན་པ་རེད། ྋསྐྱབས་རྗེ་ཁྲི་བྱང་རིན་པོ་ཆེ་ངའི་བླ་མ་རེད། དེ་འདྲ་ཡིན་དུས་མི་བསམ་བློ་གཏོང་མཁན་ཞིག་ཡིན་ན་ཨ། ཁ་གསང་ལོས་དང༌། ཁ་གཏིང་གི་ཁྱད་པར་ཙམ་མ་གཏོགས་དེ་ཚོ་འགྲོ་ཕྱོགས་གཅིག་གྱུར་རེད། ྋརྒྱལ་བ་རིན་པོ་ཆེའི་བླ་མས་དེ་འདྲ་གསུང་གི་ཡོད། ྋརྒྱལ་བ་རིན་པོ་ཆེ་ནས་དམིགས་བསལ་གཟིགས་བསྐྱངས་གནང་སའི་མི་ཞིག་ནས་དེ་འདྲ་བཤད་ཀྱི་ཡོད་པ་རེད། གང་ལྟར་ྋརྒྱལ་བ་རིན་པོ་ཆེ་ནས་སྤྱི་པའི་སྲིད་བྱུས་ཕྱོགས་རིས་མེད་ཅེས་འདྲ་ཆགས་པོ་གསུང་གི་ཡོད་ཀྱང༌། རྡོ་དོན་ངོ་མའི་སྲིད་བྱུས་སམ། སྙིང་ཕུགས་ཀྱི་བསམ་བློའི་འཁྱེར་སོ་དེ་འདྲ་ཞིག་ཡིན་པ་རེད་བསམ་པ་དྲན་གྱི་རེད། དེ་ལ་ྋསྐྱབས་རྗེ་ཁྲི་བྱང་རིན་པོ་ཆེ་ཡིན་ནའང་དགོངས་བཞེས་གནང་དགོས་པ་ཞིག་དང༌། ཛེ་སྨད་རིན་པོ་ཆེ་ཡིན་ནའང་བསམ་བློ་གཏོང་དགོས་པ་ཞིག་ཡིན་ནའང་དེ་ལྟར་མ་བྱུང་བ་རེད། ཕྱོགས་གཅིག་ནས་དེབ་ནང་གི་དོན་དག་དེ་ཚོ་སྒྲ་ཇི་བཞིན་བཞིན་པ་ཁས་བླང་དུ་རུང་མི་རུང་ཡང་ཐེ་ཚོམ་གྱི་གཞི་ཆེན་པོ་རེད་ལ། མཐར་གཏུགས་ན་ཡིན་ནམ་བསམ་བྱུང་ཟེར་རྒྱུ་མ་གཏོགས་ཨེ་ཡོད་སྙམ། གལ་ཏེ་དེ་བདེན་པའི་དབང་དུ་བཏང་རུང་བསྟོད་རར་འགྲོ་དང་སྨད་རར་འགྲོ་ཆ་མ་གཏོགས་པ་རེད། ལྷག་པར་རི་བོ་དགེ་ལུགས་པའི་ཆེ་བ་ཆོས་སྐྱོང་རྩོད་པ་ཅན་གཅིག་ལ་ཐུག་པ་འདྲ་པོ་བྱས་ན་དགོས་པ་གང་འདྲ་འདུག ཅི་སྟེ་བསྟོད་རར་འགྲོ་གི་ཡོད་ནའང་དགོས་པ་ལས་དགག་བྱ་ཆེ་བས་ཤོད་མ་འོས་པའི་སྐད་ཆ་ཚིག་རེད་མ་གཏོགས་ད་ལྟ་དེ་བཤད་ནས་ག་རེ་ཕན་ཐོགས་གང་ཞིག་ཡོད་དམ། ལར་ནས་རྩ་བའི་གླེང་གཞི་དགེ་ལྡན་བསྟན་ལ་བསྲེ་ལྷད་འཇུག་བྱེད་ཅེས་པའི་བསྲེ་ལྷད་ཀྱི་དོན་མི་གཅིག་གིས་ས་དགེ་བཀའ་རྙིང་རིས་མེད་ཀྱི་ཆོས་བྱས་པ་ལ་ཟེར་བ་ཡིན་ན་ྋརྒྱལ་བ་གོང་མ་སྤྱི་དང༌། ལྷག་པར་གཉིས་པ་གསུམ་པ་ཁྱད་པར་དུ་ལྔ་པ་ལས་བསྲེ་ལྷད་ཆེ་བ་སུ་ཡོད། དེ་ལྟར་ན་ཁོང་གིས།

བློ་བཟང་རྒྱལ་བ་གཉིས་པའི་བསྟན་པ་ལ། །
བསྲེ་ལྷད་མེད་པའི་རྣམ་ཐར་འཁྱོངས་པར་ཤོག །

ཅེས་གསུངས་པ་ཞལ་བརྫུན་ཆེན་པོ་རེད། ཁོང་དགེ་སློང་མཁས་པ་ཞིག་གིས་མངོན་སུམ་ལ་བསྙོན་པའི་བརྫུན་གོག་དེ་འདྲ་ག་ནས་གསུངས། གལ་ཏེ་བསྲེ་ལྷད་ཀྱི་གོ་དོན་དེ་ལྟར་ཡིན་ན་མཁས་གྲུབ་ཐམས་ཅད་མཁྱེན་པའི་གསུང་ལྟ་ཁྲིད་མུན་སེལ་སྒྲོན་མེའི་ནང་དཔལ་ས་སྐྱ་པའི་ཀུན་གཞི་རྒྱུ་རྒྱུད་ལ་འཁོར་འདས་དབྱེར་མེད་ཀྱི་ལྟ་བ་སྒོམ་ཚུལ་ཞོར་འཕྲོས་སུ་གསུངས་ནས་དེའི་ཆོས་སྐད་རྗེ་བླ་མའི་ལྟ་བ་སྐྱོང་ཚུལ་ལ་མི་བསྲེ་བར་གསུངས་ཏེ་གདམས་ངག་ཐམས་ཅད་བརྡ་ཆད་ཕར་བསྲེ་ཚུར་བསྲེའི་བློ་བཟོ་སྣ་ཚོགས་ཀྱིས་གདམས་ངག་སོ་སོའི་ཐུན་མིན་ཐ་སྙད་ཐམས་ཅད་ཆལ་ཆོལ་དུ་བཏང་མི་རུང་ཚུལ་དང༌། ཡང་མན་ངག་གཞན་གྱི་དོན་དང་ཐ་སྙད་འདིར་བསྲེ་བར་མི་བྱ་ཞིང༌། འདི་ནས་ཀྱང་དེ་དག་ཏུ་བསྲེ་བར་མི་བྱ་སྟེ། དེ་ལྟར་བསྲེ་ན་མན་ངག་ཐམས་ཅད་རང་སྲོལ་འཕྱུག་འགྲོ་བའི་རྐྱེན་དུ་གསུང་འདུག་པས། དགེ་ལུགས་པས་ས་རྙིང་གི་ཆོས་བྱས་ན་མི་འགྲིགས་པ་དང༌། ས་རྙིང་སོགས་ཀྱིས་དགེ་ལུགས་པའི་ཆོས་བྱས་ནའང་མི་འགྲིགས་པར་འགྲོ་རྒྱུ་རེད། དེ་ལྟར་ན་རྒྱལ་ཚབ་མཁས་གྲུབ་ཁོང་རྣམ་པ་ནས་བཟུང་བའི་དགེ་ལུགས་དགེ་བཤེས་མང་པོ་བསྲེ་ལྷད་གཏོང་མཁན་ཆགས་པ་རེད་ལ། ད་ལྟ་དགེ་ལུགས་པ་འགའི་མཐོང་སྣང་ལ་དགེ་ལུགས་པ་ཞིག་གིས་རྙིང་ཆོས་སོགས་ཉན་ན་མི་འགྲིགས་པའི་ཕྱོགས་དང༌། ཡང་རྙིང་མ་པ་ཞིག་གིས་ལམ་རིམ་ཉན་ན་སྤྲོ་སྤྲོ་བྱེད་པ། དགེ་ལྡན་གྱི་ཆོས་རྙིང་མར་བསྲེ་བའི་བསྲེ་ལྷད་བྱས་ཏེ་མཁས་གྲུབ་རྗེའི་དགོངས་པ་དང་འགལ་འགྲོ་གི་ཡོད་པ་རེད།

མདོར་ན་ཕྱི་ནང་ཐུག་པ་ལྟར་གཅིག་གིས་གཅིག་ལ་རྒྱབ་བསྟན་ནས་སྡོད་དགོས་ཚོད་རེད། དེས་ན་བསྲེ་ལྷད་གྱི་དོན་ནི་མི་གཅིག་གིས་རིས་མེད་བྱས་པར་གོ་རྒྱུ་མིན་པར་སོ་སོའི་ཐུན་མིན་གསུང་ལུགས་ཕར་བསྲེ་ཚུར་བསྲེས་ཆལ་ཆོལ་དུ་བཏང་བར་གོ་རྒྱུ་ཡིན་པ་འདྲ། དེས་ན་ྋརྒྱལ་དབང་ལྔ་པའི་དགེ་ལུགས་ཀྱི་ལམ་ཁྲིད་འཇམ་དཔལ་ཞལ་ལུང་ནང་ས་རྙིང་གི་ཐུན་མིན་བརྡ་ཆད་བསྲེས་ལྷད་མེད་ཅིང༌། རྫོགས་ཆེན་ལྟ་ཁྲིད་རིག་འཛིན་ཞལ་ལུང་ནང་ས་དགེའི་ཐུན་མིན་བརྡ་ཆད་བསྲེས་ལྷད་མེད་པར་རང་རང་གི་ལུགས་སྲོལ་བརྡ་ཆད་གཙང་མར་ཡོད་པ་འདི་མཁས་གྲུབ་ཐམས་ཅད་མཁྱེན་པའི་དགོངས་པ་ངོ་མ་རེད་སྙམ་པ་འདུག རྒྱན་ལས། འགྲོ་ལ་ཕན་པར་བྱེད་རྣམས་ལམ་ཤེས་ཉིད་ཀྱིས་འཇིག་རྟེན་དོན་སྒྲུབ་མཛད་པ་གང༌། །ཞེས་གསུངས་པ་ལྟར་ཐེག་ཆེན་ལ་མོས་པའི་གང་ཟག་གཅིག་གིས་གྲུབ་མཐའ་གོང་འོག་ཐེག་པ་ཆེ་ཆུང་ཐམས་ཅད་ལ་ཐོས་བསམ་སྒོམ་པ་དགོས་པ་བཞིན་དུ་ས་དགེ་བཀའ་རྙིང་ཐམས་ཅད་ལ་ཡང་རྒྱུད་ཚོད་དང་བསྟུན་པའི་ཐོས་བསམ་སྒོམ་པ་བྱེད་པ་བསྔགས་པའི་འོས་ལས་སྐྱོན་ག་ལ་ཡིན། བར་སྐབས་དེབ་དེ་ཐོན་པའི་རྐྱེན་བྱས་ནས་གདོང་ཐོག་རིན་པོ་ཆེའི་དགག་པ་ཞིག་བྱུང༌། གདོང་ཐོག་གི་དགག་པ་བྱུང་བའི་མཚམས་ཝཱར་ཎ་ཁུལ་དགེ་ལུགས་པ་གང་འཚམས་ཤིག་ནས་ནད་མ་ཐེག་པར་དེ་ལ་དགག་ལན་ཞིག་འབྲི་གི་ཡིན་ཞེས་གྲ་སྒྲིག་བྱས་ལུགས་ཤོད་མཁན་བྱུང༌། དགེ་ལུགས་པ་འགའ་ཤས་ནས་གདོང་ཐོག་གི་དེབ་དེ་གདོང་ཐོག་གིས་བྲིས་པ་མ་རེད། བདུད་འཇོམས་རིན་པོ་ཆེ་ནས་བྲིས་ཏེ་མིང་གདོང་ཐོག་གིས་ཁྱེར་བ་རེད་ཅེས་དེ་འདྲ་ཤོད་མཁན་ཡང་བྱུང་ཚོད་སྣང༌། དེ་ག་འདྲ་ཞིག་འདུག་གམ། ཛེ་སྨད་རིན་པོ་ཆེ་དང་གདོང་ཐོག་ཁོ་རང་གཉིས་གདོང་ཐུག་རྩོད་པ་བྱུང་བར་ཁྱད་པར་གང་ཡང་མི་འདུག་སྟེ། ཛེ་སྨད་ཀྱི་དེབ་དེ་དགེ་ལུགས་པའི་བླ་མ་གཙོ་བོ་ཁྲི་བྱང་རིན་པོ་ཆེ་ནས་གསུངས་པ་ཡིན་ཞེས་དངོས་སུ་བཀོད་ཡོད་པ་དང༌། གདོང་ཐོག་གི་དགག་པ་དེ་འདུད་འཛོམས་རིན་པ་ཆེ་ནས་བྲིས་པ་རེད་ཟེར་དུས་ཐུག་ས་དེ་ཁྲི་བྱང་རིན་པོ་ཆེ་དང༌། བདུད་འཛོམས་རིན་པོ་ཆེ་རྣམ་གཉིས་ལ་ཐུག་ཡོང་གི་ཡོད། ད་ཆ་དངོས་གནས་དྲང་གནས་ཆོས་ལུགས་ནང་ཁུལ་འཁྲུག་རྩོད་སྤེལ་རྒྱུའི་ཛ་དྲག་གི་གནས་ཚུལ་ཞིག་ཆགས་ཡོང་གི་ཡོད་དུས། ཆོས་དོན་ལས་ཁུངས་ཀྱི་མིང་ཐོག་ནས་རྩ་བའི་དུག་རྩ་ཛེ་སྨད་ཀྱི་དེབ་འདིས་བྱས་ཤིང༌། དེང་སང་དུས་ཚོད་གཉན་འཕྲང་གི་སྐབས་འདིར་ཕན་ཚུན་ཚང་མས་བསྟན་པ་སྤྱི་ལ་ཕན་པའི་བསམ་ཤེས་ཡག་པོ་ཞིག་བྱེད་དགོས་པ་ལས། དཀྲོགས་རྐྱེན་རིགས་བྱས་ན་མི་འགྲིགས་ཞེས་ཆོས་དོན་ལས་ཁུངས་ནས་ཆེད་གཉེར་གྱིས་གསལ་བསྒྲགས་བྱས་པའི་རྗེས་ལ་དགེ་ལུགས་ནང་ནས་དགག་པ་བྱུང་ཡོད་པ་མ་རེད། རྙིང་མ་འགས་ཀྱང་དེ་དུས་གྲ་སྒྲིག་ཕྲན་བུ་བྱས་འདུག་ཀྱང༌། ཆོས་དོན་ལས་ཁུངས་ཀྱི་གསལ་བསྒྲགས་དེ་ཐོན་པའི་རྗེས་ལ་ཆོས་དོན་གྱི་གསལ་བསྒྲགས་ལ་ཉན་ནས་ལྷིང་འཇགས་སུ་བསྡད་དེ་རྙིང་མ་རང་ཁུངས་ནས་དགག་པ་བྱུང་མེད། གདོང་ཐོག་ཁོང་རང་སྒེར་གྱི་ཆོས་ལུགས་ས་སྐྱའི་ཐོག གྲུབ་མཐའ་རིས་མེད་ལ་དད་པ་དག་སྣང་བྱེད་མཁན་གཅིག་གི་ཐོག་ནས་དགག་པ་དེ་བྲིས་པ་རེད། གནས་ཚུལ་དེ་འདྲ་བྱུང་ནས་གང་ལྟར་དཀྲོགས་རྐྱེན་ཆེན་པོ་ཡོང་གྲབས་བྱེད་པའི་སྐབས་རེད། ངའི་བསམ་བློའི་ནང་ལ་ད་ལྟ་བར་དུ་ཞེ་ས་མ་ཞུས་ན་གནས་ཆུང་ཞལ་བཀག་སྟེ་བཞག་པ་ཡིན། ད་ཆ་གནས་ཆུང་ཞལ་བཀག་སྟེ་བཞག་ན་ང་མ་དྲང་པ་རེད་བསམ་ནས་ཉིན་མ་གཅིག་གཟིམ་ཆུང་སྤྱན་འདྲེན་སྐབས་ལ་ངས་གསལ་པོ་བྱས་ཏེ་བཀའ་འདྲི་ཞུས་པ་ཡིན། སྔོན་མ་ལོ་བརྒྱད་དགུའི་གོང་ལ་གནས་ཆུང་ནས་ཨ་གསས་འཁྱམས་པོ་བསྟེན་ན་འགྲིགས་ཀྱི་མི་འདུག་ཅེས་གསུང་བྱུང༌། དེ་དུས་ངས་ཟོལ་མེད་ཀྱིས་ཁྱེད་རང་ཞལ་ཁ་བཞུགས་ན་ཞེས་ཞུས་པ་ཡིན། ཆོས་སྐྱོང་ནས་ཀྱང་ད་ལྟ་བར་དུ་འཇམ་ཐིང་ངེར་བཞུགས་པ་ཐུགས་རྗེ་ཆེ་ཞུ་རྒྱུ་ཡིན། ད་ཆ་ཕར་ཕྱོགས་ནས་རྐང་བརྐྱངས་ལག་བརྐྱངས་གང་བྱུང་མ་བྱུང་བཤད་ཆོག་གི་ཡོད་པ་རེད། ངས་ཚུར་ཕྱོགས་འདིར་གནས་ཆུང་ཞལ་བཀག་སྟེ་བཞག་ན་ང་མ་དྲང་པ་རེད། ཁྲིམས་ལུགས་ལྟར་བྱས་ནའང་ཕར་ཕྱོགས་དེ་ནས་གང་ཡང་བཤད་ཆོག་པ་དང༌། ཚུར་ཕྱོགས་ནས་བཤད་མི་ཆོག་པར་བཀག་ན་དྲང་པོ་མིན། ད་ཆ་གནས་ཆུང་གི་ངོས་ནས་ག་རེ་གསུང་རྒྱུ་ཡོད་ནའང་གསུང་ཤོག དེ་ལ་ངས་དྲང་བདེན་གྱི་རྒྱབ་སྐྱོར་བྱ་རྒྱུ་ཡིན་ཞུས་པ་ཡིན། གཞི་ནས་ཆོས་སྐྱོང་གིས་ལྷོད་ལྷོད་བྱས་ནས་རྒྱལ་ཆེན་ཤུགས་ལྡན་གྱི་སྔ་ཕྱིའི་ལོ་རྒྱུས་མང་པོ་ཞིག་གསུངས་པའི་རྡོ་དོན། རྒྱལ་ཆེན་ཤུགས་ལྡན་འདི་བསྟེན་ན་ཕན་ལས་གནོད་པ་ཆེ་བ་ཡིན། དེང་སང་རྒྱལ་ཆེན་བསྟེན་མཁན་ཚོར་མི་ཁ་དང༌། ནང་བཀྲ་མི་ཤིས་པ་གང་འདྲ་ཞིག་ཡོང་གི་ཡོད་མེད། ཐ་མ་གྲ་མ་འགྲིགས་གང་འདྲ་ཞིག་དོན་གྱི་ཡོད་མེད་ཞིབ་བརྟགས་གནང་ན་མཐོང་ཐོས་སུ་ཡོད་པ་དེ་ཡིན།

ཡང་ན། རྒྱལ་ཆེན་བསྟེན་མཁན་དེ་རྣལ་འབྱོར་པ་དངོས་གནས་རྟོགས་པ་མཐོན་པོར་སླེབས་པ་ཞིག་ནས་ཤིན་ཏུ་གསང་བའི་ཚུལ་གྱིས་བསྟེན་པ་ཡིན་ན་ལས་ད་ལྟའི་བྱེད་སྟངས་འདི་འདྲ་བྱས་ན་ཁེ་ལས་ཉེན་ཆེ་བ་དང༌། དགེ་ལས་སྐྱོན་ཆེ་བ་ཡིན་ཞེས་དང༌། ལྷག་པར་དུ་རྒྱལ་ཆེན་ཤུགས་ལྡན་བསྟེན་ན་འདོད་ཁམས་བདག་མོ་ལ་ཕོག་ཐུག་འཁོན་དོགས་ཡོང་གི་ཡོད་ཅེས་གསུངས་བྱུང༌། གནས་ཚུལ་དེ་ལྟར་བྱུང་ནས་རྒྱལ་ཆེན་གྱི་གནས་ཚུལ་དེ་རྣམས་ངས་ཤེས་པ་རེད། གནས་ཆུང་དང་རྒྱལ་ཆེན་མཐུན་དང་མི་མཐུན་གླེང་གཞི་ཡོད་ཀྱང༌། ལྷ་མོ་དང་འཁོན་གྱི་ཡོད་པའི་སྐད་ཆ་འདི་ད་རེས་དང་པོ་རེད། ལྷ་མོ་འཁོན་གྱི་ཡོད་ན་གནས་ཚུལ་ཤིན་ཏུ་འགངས་ཆེན་པོ་དང་༌། གནད་འགག་ཆེན་པོ་ཞིག་ལ་ཐུག་གི་ཡོད་དུས་ངའི་ངོས་ནས་ཏན་ཏན་ཞིག་བྱས་ན་ཡག་པོ་འདུག་བསམ་བྱུང༌། དེའི་སྐབས་ཡོས་ལོའི་ཟླ་བ་ ༦།༧ ཙམ་ཡིན། ངས་འཕྲིན་བཅོལ་འདོན་རྒྱུ་དེ་འཆར་ཅན་ལྟར་འདོན་གྱི་ཡོད། དེ་རྗེས་དགུན་མཚམས་འབྲུག་གི་ལོ་གསར་དང་ཐག་ཉེ་པོར་སླེབས། ལོ་གསར་སྐབས་ལ་འཆར་ཅན་བསྐང་གསོ་རྒྱས་པ་འདོན་གྱི་ཡོད་པ་ཡིན་དུས་ད་ཆ་བསྐང་གསོ་འདོན་དང་མི་འདོན་བརྟག་དཔྱད་ཏན་ཏན་ཞིག་བྱས་ན་བསམ་བྱུང༌། སྐབས་དེར་ཉེ་ཆར་ཁྲི་བྱང་རིན་པོ་ཆེའི་དྲུང་ནས་སྤྱན་རས་གཟིགས་རྒྱལ་བ་རྒྱ་མཚོའི་བཀའ་དབང་ཞུས་ནས་ཡོད་པས། སྤྱན་རས་གཟིགས་རྒྱལ་བ་རྒྱ་མཚོའི་སྒེར་སྔགས་དང༌། རྐང་ཡིག་དྲུག་བསགས་ནས་མཚམས་ཤིག་ལ་བསྡད་ཡོད། སྐབས་དེར་གྲྭ་ཚང་མཁན་པོ་ཝཱ་ཎར་ཚེམས་བཟོ་རུ་ཕེབས་ནས་བཞུགས་མེད། ཁོང་ཡར་ཕེབས་པ་དང་ལྷ་མོའི་གཟབ་གསོལ་ཞིག་ཚོགས་ཏེ་ཟན་བརྟག་བསྒྲིལ་རྒྱུ་དང༌། ཟན་བརྟག་གི་ཐོག་ནས་གང་ཕེབས་བྱུང་ནའང་དེ་དོན་སྤང་བླང་བྱེད་དགོས་བསམ་ནས་བློ་བསྒྲིལ་ས་དེ་ཟན་བརྟག་ཐོག་ལ་བསྒྲིལ་ནས་ཐག་གཅོད་བྱེད་རྒྱུ་བྱས་པ་ཡིན། ཡོས་ལོའི་ཟླ་ ༡༢ ཚེས་ ༡༥།༡༦ ཙམ་ལ་སྐུ་ཞབས་མཁན་པོ་ཡར་ཕེབས་བྱུང༌། ཚེས་ ༡༨།༡༩ ཙམ་ལ་ང་དང༌། སྐུ་ཞབས་མཁན་པོ། གྲྭ་ཚང་གི་ཆོག་གྲྭ་བཅོ་ལྔ་ཙམ་བཅས་ནས་ལྷ་མོའི་བསྐང་གསོ་ཞིག་བཏོན། དེའི་ཉིན་མོ་འབྲུག་སྐད་རྒྱག་པ་སོགས་གནས་གཤིས་འཚུབ་པོ་ཞིག་བྱུང༌། དེ་ནས་ཟན་བརྟག་མ་བསྒྲིལ་གོང་ལ་མངའ་གསོལ་ཞིག་བཏོན།

རྣལ་འབྱོར་སྲུང་མའི་གཙོ་བོར་མངའ་གསོལ་གྱི། །

ཞེས་པའི་སྐབས་གློག་ཞུ་ཤི་སོང༌། རྡ་རམ་ས་ལ་གློག་བརྟན་པོ་རང་མེད་པ་འཆར་ཅན་ཡིན་པས་དེ་ལ་གཅིག་བྱས་ན་རྣམ་རྟོག་བྱེད་རྒྱུ་གང་ཡང་ཡོད་ཀྱི་མ་རེད་བསམ་བྱུང༌། གཅིག་བྱས་ན་གལ་སྲིད་མཚན་མ་འདྲ་ཡིན་པ་ཡིན་ན། དེ་ལོས་བདེན་བསམ་བྱུང༌། གང་གིས་ཟེར་ན། དཔལ་ལྡན་ལྷ་མོ་ྋརྒྱལ་མཆོག་དགེ་འདུན་གྲུབ་པ་ནས་བཟུང་ཏེ་དངོས་གནས་གཅིག་ཆོག་ཀུན་འདུས་ཀྱི་ཆོས་སྐྱོང་ཞིག་ཡོད་བཞིན་དུ་དེས་མ་ཆོག་པར་ངས་རྒྱལ་ཆེན་བསྟེན་གྱི་ཡོད་སྟབས།

རྣལ་འབྱོར་སྲུང་མའི་གཙོ་བོར་མངའ་གསོལ་གྱི། །

ཞེས་པ་དེ་ཚིག་སྐམ་པོ་ཞིག་ཆགས་པ་རེད། དོན་དག་ངོ་མའི་ཐོག་ལ་དེ་ལྟར་མ་ཡིན་པའི་བཟོ་འདྲ་པོ་ཞིག་ཆགས་ཡོང་དུས། དེའི་མཚན་མ་ཡིན་ན་ནི་ལོས་བདེན་བསམ་པ་རང་དྲན་བྱུང༌། དེ་ནས་དངོས་གཞི་ཟན་བརྟག་བསྒྲིལ་སྐབས་དོན་གསུམ་བྱུང་ཡོད། དང་པོར། རྒྱལ་ཆེན་ད་མུས་བཞིན་བསྟེན་ན་བཟང་ཟེར་བ་གཅིག་ཡོད། དེ་ཕེབས་ན་རྒྱལ་ཆེན་གྱི་ཉིན་རེ་ཉིན་རེའི་འཕྲིན་བཅོལ་དང༌། ལོ་རེའི་བསྐང་གསོ་འདོན་རྒྱུ་དེ་ཚོ་བསྒྱུར་བཅོས་འགྲོ་མ་དགོས་པ་བྱ་རྩིས་ཡིན། གཉིས་པར། རྒྱལ་ཆེན་ཤིན་ཏུ་གསང་བའི་ཚུལ་གྱིས་བསྟེན་ན་བཟང་ཟེར་བ་གཅིག་ཡོད། དེ་ཕེབས་ན་གྲྭ་ཚང་མཉམ་དུ་བསྐང་གསོ་འདོན་མ་དགོས་པར་ང་རང་གཅིག་པུས་བསྐང་གསོ་བཏོན་བསམ་པ་དྲན་བྱུང༌། འཕྲིན་བཅོལ་ང་རང་རྟག་པར་འདོན་མུས་ལྟར་བཏོན་ན་བསམ་པ་བྱུང༌། གསུམ་པར། རྒྱལ་ཆེན་བསྟེན་རྒྱུ་མཚམས་འཇོག་བྱས་ན་བཟང་ཟེར་བ་གཅིག་ཡོད། དེ་ཕེབས་ན་འཕྲིན་བཅོལ་དང༌། བསྐང་གསོ་འདོན་མ་དགོས་པར་ཅམ་འཇོག་བྱེད་རྒྱུ་འཆར་རྩིས་བཀོད་ནས། ང་ཚོ་ཚང་མས་རེ་རེ་ནས་ཧྱབོཿབདུན་མ་སྟོང་ཕྲག་གཅིག་རེ་བགྲངས། མངའ་གསོལ་ཞིག་བཏོན། གལ་ཆེན་པོར་རྩིས་ཏེ་སྨོན་འདུན་ཤུགས་དྲག་དང་བཅས་ཏེ་ཟན་བརྟག་དོན་གསུམ་པོ་དེ་བསྒྲིལ་བ་ཡིན། བབས་ཐོན་ཡོང་བ་ལ་རྒྱལ་ཆེན་བསྟེན་རྒྱུ་མཚམས་འཇོག་བྱེད་ཅེས་པ་བབས་ཐོན་བྱུང༌། དེ་ཉིན་གྲྭ་ཚང་གི་མཁན་པོ་གསར་པ་སུ་བསྐོ་ཡང་མིང་དོན་འགའ་ཤས་ཟན་བརྟག་བསྒྲིལ་ཏེ་སྐུ་ཞབས་མཁན་པོ་ཐོན་པ་རེད། ཟན་བརྟག་བསྒྲིལ་ཚར་བའི་རྗེས་ལ་ང་རང་གི་ངོས་ནས་སྤང་བླང་བྱེད་ཕྱོགས་སྐོར་ལ་ཐག་ཆོད་པ་བྱུང་སྟེ་ཞེ་བློ་བདེ་སོང༌། དེ་བཞིན་གནས་ཆུང་ཆོས་སྐྱོང་གིས་དེ་གོང་ནས་གསུངས་པ་དེ་ཚོ་དངོས་གནས་དྲང་གནས་ཀྱི་བདེན་པ་ར་འཕྲོད་པའི་གནས་ཚུལ་ཞིག་བྱུང་བས་ན་སེམས་ཀྱི་གཏིང་ནས་ངེས་ཤེས་འདྲོངས་པ་དང༌། ཡ་མཚན་སྐྱེ་བའི་གནས་ཚུལ་ཞིག་བྱུང༌། དེའི་ནུབ་མོ་འཕྲིན་བཅོལ་དེ་ཅུང་ཟད་འཇོག་མ་ཤེས་པ་འདྲ་པོ་ཞིག་བྱུང༌། དེ་ནུབ་ཉར་ཁར་འཕྲིན་བཅོལ་བཏོན་པ་ཡིན། ཞོགས་པའི་ཐོ་རེངས་ཀྱི་རྨི་ལམ་ལ་རྣམ་ཀུན་ཡོངས་འཛིན་རྣམ་གཉིས་དང༌། གསེར་ཀོང་རིན་པོ་ཆེ་སོགས་ཀྱི་དྲུང་ནས་གསུང་ཆོས་ཞུ་སའི་ཁང་མིག་ནང་ཕྲ་མའི་མདུན་དེར་གདན་འབོལ་གདན་ཆ་གཅིག་བཏིང་འདུག་པ་དེའི་སྟེང་དུ་ཁྲི་བྱང་རིན་པོ་ཆེ་བཞུགས་འདུག བཞུགས་ས་དེ་གྲལ་མཇུག་སྒོ་འགྲམ་གྱི་འབོལ་གདན་གཤམ་མ་དེར་བཞུགས། དབུ་ས་གདན་སྒང་ལ་བཞག ཉམས་དམའ་པོ་བྱས་ནས་གཟིམས་བཞུགས་འདུག ངས་དེར་སླེབས་པ་དང་ཁྲི་བྱང་རིན་པོ་ཆེར་འདི་འདྲ་གནང་ནས་མ་གཟིམ། གཟིམ་ན་དབུ་སྒོ་ལ་མ་གཟིགས་པར་དབུ་ཡར་ཕྱོགས་ནས་འབོལ་གདན་གཉིས་ཀའི་སྒང་དེར་ཡག་པོ་བྱས་ནས་གཟིམ་ན་ཞུས་སོང༌། ཁྲི་བྱང་རིན་པོ་ཆེ་ནས་མ་རེད། ད་ང་འགྲོ་གི་ཡིན་གསུང་གི་འདུག ད་འོ་ན་གསོལ་ཇ་ཞིག་བཏེགས་ན་ཞུས་པར། མིན་འགྲོ་གི་ཡིན་གསུང་གི་འདུག འོ་ན་ཆབ་བསྐོལ་ཞིག་བཏེགས་ན་ཞུས་པར་ཆབ་བསྐོལ་བཞེས་ཀྱི་ཡིན་གསུང་གི་འདུག ངའི་ལག་པར་གྷི་ལ་སི་དང༌། ཇ་དམ་ཞིག་འཁྱེར་ནས་ཆབ་བསྐོལ་ཕུལ་སོང༌། དེ་ནས་ཁྲི་བྱང་རིན་པོ་ཆེ་ནས་ཆབ་བསྐོལ་དེ་བཞེས་སོང༌། ཆབ་བསྐོལ་དེ་དང་མཉམ་དུ་ཕྱི་རྒྱལ་གྱི་སྨན་སྔོ་སྐྱ་རིལ་བུ་ཆ་གཅིག་བཞེས་སོང༌། དེ་བཞེས་ཚར་བ་དང༌། ད་འགྲོ་གི་ཡིན་གསུང་གི་འདུག དེ་ནས་ངས་མར་ཕེབས་བསྐྱེལ་ཞུས་སོང༌། སྒོ་ནས་ཐོན་ཚར་བའི་རྗེས་ལ་ཁང་པ་འདི་མིན་པར་སྡོད་ཁང་རྙིང་པའི་ལྟག་སྒོ་ཐོན་ནས་རྡོ་སྐས་ཡོད་ས་དེ་ནས་ཡར་ཐབ་ཚང་གི་ངོས་ནས་ཕྱིར་ཕེབས་སོང༌། ཁྲི་བྱང་རིན་པོ་ཆེ་ཕེབས་ངས་མར་ཕེབས་བསྐྱེལ་ཞུས་སོང༌། སྒོ་ནས་ཐོན་ཚར་བའི་རྗེས་ལ་ཁང་པ་འདི་མིན་པར་སྡོད་ཁང་རྙིང་པའི་ལྟག་སྒོ་ཐོན་ནས་རྡོ་སྐས་ཡོད་ས་དེ་ནས་ཡར་ཐབ་ཚང་གི་ངོས་ནས་ཕྱིར་ཕེབས་སོང༌། ཁྲི་བྱང་རིན་པོ་ཆེ་ཕེབས་ཚར་བའི་རྗེས་ལ་ཡིག་ཚང་གི་གཡས་གཡོན་ལ་མི་ཁམས་པ་འདྲ་པོ་སྟོད་གོག་དམར་ཧྲེང་བྱས་པ་རེ་ཟུང་འདུག ངའི་བསམ་པར་ཁོང་ཚོ་དད་པ་བྱས་ནས་འདིར་མཇལ་ཁར་བཅར་བ་རེད་བསམ་བྱུང༌། དེ་ནས་ང་ཡར་ལོག་ཡོང་བ་ཡིན། དེ་འདྲའི་རྨི་ལམ་ཞིག་བྱུང༌། གཉིད་སད་པ་དང་བསམ་བློར་ཁྲི་བྱང་རིན་པོ་ཆེ་དང་རྒྱལ་ཆེན་ཐུན་མོང་མ་ཡིན་པ་རེད། ད་ལྟའི་རྨི་ལམ་འདི་རྒྱལ་ཆེན་གྱི་རྟགས་ཤིག་ཡིན་པ་ཤིན་ཏུ་གསལ་པོ་འདུག དབུ་འཕངས་དམའ་པོ་འདི་གནས་ཆུང་གིས་བཀའ་ལུང་དང༌། ལྷ་མོའི་ཟན་བརྟག་ནས་ྋརྒྱལ་བ་རིན་པོ་ཆེས་རྒྱལ་ཆེན་བསྟེན་རྒྱུ་མཚམས་འཇོག་བྱེད་དགོས་ཞེས་བབས་པ་ཡིན་སྟབས་དབུ་འཕངས་དམས་པ་ལྟ་བུ་ཆགས་པ་རེད། ཡིན་ནའང་ངའི་ཐོག་ནས་མ་འགྲིགས་པ་གང་ཡང་མེད་པ་བྱས། ཁྲི་བྱང་རིན་པོ་ཆེས་ཕེབས་ཀྱི་ཡིན་གསུངས། ངས་ཕེབས་བསྐྱེལ་ཞུས་ནས་དགའ་དབྱེ་འཛུམ་བྲལ་བྱས་པ་རེད། དེ་ཤིན་ཏུ་གསལ་པོ་ཞིག་བྱུང་སྟེ་གོ་བ་དེ་འདྲ་ཞིག་ཆགས་པ་རེད། དེ་མིན་འདི་སྐོར་ཕྱོགས་གཅིག་ལ་རྒྱལ་ཆེན་དྲེགས་པ་ཞིག་ལ་ཐུག ཡང་སྒོས་ལྷག་པར་ཅན་དུ་ཁྲི་བྱང་རིན་པོ་ཆེ་རང་གི་བླ་ལ་ཐུག་པ་དང༌། ཕྱོགས་གཅིག་ལ་གནས་ཆུང་དང༌། ལྷ་མོ་གཉིས་ལ་ཐུག་པ་བཅས་ང་དེ་རྣམས་ཀྱི་དཀྱིལ་དུ་བྱ་སྟངས་བྱེད་སྟངས་མི་ཤེས་པའི་དཀའ་ངལ་ཆེན་པོ་འཕྲད་བྱུང༌། གང་ལྟར་ཐ་མ་ཟན་བརྟག་ནས་དེ་ལྟར་བབས་པ་དང༌། རྨི་ལམ་ལ་རྒྱལ་ཆེན་ངོས་ནས་འཕྲེང་དོགས་གང་ཡང་མེད་པའི་གནས་ཚུལ་གསལ་པོ་ཞིག་ཆགས་དུས་བློ་བདེ་པོ་བྱུང༌།

དེ་ནས་ང་རང་སྒེར་ངོས་ནས་རྒྱལ་ཆེན་བསྟེན་གསོལ་བྱེད་ཕྱོགས་སྐོར་ལ་སྤང་བླང་མིག་ཁ་ཕྱེ་བ་ལྟ་བུ་བྱུང་སོང་སྟེ། གྲྭ་ཚང་གྲྭ་པ་མཉམ་དུ་ལོ་གསོལ་འདོན་རྒྱུ་དེ་གྲྭ་ཚང་གི་གྲྭ་པའི་མིག་གི་མཐོང་སར་བསྒྱུར་བཅོས་གཏོང་དགོས་པ་དང༌། དེ་བསྒྱུར་བཅོས་འགྲོ་དུས་འགྲེལ་བཤད་ཞིག་མ་རྒྱབ་ནའང་མི་འགྲིགས་མཁན། འགྲེལ་བཤད་རྒྱབ་པ་ལ་ཡང་ཕྲན་བུ་ལབ་མ་ནུས་མཁན་ལྟ་བུར་གང་འདྲ་ཞིག་དགའ་བ་ཡོད་དམ་བསམ་བྱུང༌། ང་རང་གི་ངོས་ནས་སྤང་བླང་བྱེད་ཕྱོགས་དེ་ཆུ་ཐག་ཆོད་པོ་བྱུང་སོང་ཡང༌། མི་ལ་བཤད་དང་མ་བཤད་ཆུ་ཐག་མ་ཆོད་པ་ཡིན་སྟབས། ཤོ་མོ་ཞིག་བརྒྱབ་པ་ཡིན། ཤོ་མོ་རྒྱབ་པའི་སྐབས་ལ། རྒྱལ་ཆེན་བསྟེན་གསོལ་བྱེད་སྟངས་ཟན་བརྟག་ནང་ཇི་ལྟར་ཕེབས་པ་བཞིན་མི་ལ་མ་ལབ་པར་གསང་བ་བྱས་ནས་ཁ་རོགས་བསྡད་པ་ལེགས་དང༌། མི་ལ་ཇི་ལྟར་རིགས་པའི་འགྲེལ་བཤད་རྒྱབ་ན་ལེགས་ཞེས་མོ་རྒྱབ་པར། མི་ལ་ལབ་ན་ལེགས་པ་བབས་སོང༌། དེ་བབས་པས་ན་དེ་ཉིན་གྲྭ་ཚང་མཁན་པོ་འདི་གའི་ཡིག་ཚང་དུ་སྐད་བཏང་སྟེ་ཁ་སང་ང་ཚོས་ཟན་བརྟག་བསྒྲིལ་བ་དེ་དག་གནད་སྨིན་ལོས་གང་འདྲ་བྱུང་སོང་ངམ་ཞེས་དྲིས་པར། མཁན་པོས་སྤྱིར་བཏང་ནི་ྋརྒྱལ་བ་རིན་པོ་ཆེས་ཟན་བརྟག་བསྒྲིལ་གནང་བ་དེ་ལ་གནད་སྨིན་དང་མ་སྨིན་ཞུ་རྒྱུ་གང་ནས་ཡོང༌། གནད་སྨིན་པ་ཞིག་མ་གཏོགས་ཡོང་ཡག་མེད་པ་རེད།

ལྷག་པར་ད་རེས་ཟན་བརྟག་གནང་བའི་སྐབས་ལ་ཧྱབོཿབདུན་མ་སྟོང་ཕྲག་གཅིག་བགྲངས། ཐུགས་སྨོན་མཚམས་སྦྱོར་ཤུགས་དྲག་གནང་ནས་ཟན་བརྟག་གནང་བ་དེ་ལ་བསླུ་བ་གཏན་ནས་ཡོད་པ་མ་རེད་ཟེར་གྱི་འདུག གལ་སྲིད་བསླུ་བ་མེད་ན། དེའི་དོན་དག་འདི་འདྲ་རེད་ཅེས་དོན་དག་སྔ་ཕྱིའི་ཡོང་རྐྱེན་རྣམས་ཆ་ཚང་གཅིག་བཤད་པ་ཡིན། སྐུ་ཞབས་ང་གཉིས་རྒྱ་མིའི་བརྗོད་སྟངས་ལྟར་བྱས་ན་བློ་མཐུན་པ་རེད། ཁོང་སྤོབས་པ་མཐོ་པོ༑ ང་རྒྱལ་ཚ་སི་སི། མགོན་མཁྲེགས་པོ། དགེ་ལུགས་ལ་ཞེན་ཁོག་ཆེན་པོ་ཞིག་ཡིན་ནའང་དཔལ་ཆེན་ཕུར་པར་དད་མོས་ཆེན་པོ་གནང་གི་ཡོད། རྡོ་དོན་ངའི་སྲིད་བྱུས་ག་རེ་ཡོད་པ་དེར་བརྒྱ་ཆ་བརྒྱ་ཐམ་པ་རྒྱག་གཅིག་མཆོངས་གཅིག་ངོ་ལྐོག་ཟོལ་མེད་པ་བྱས་ནས་འགྲོ་མཁན་ཞིག་ཡིན། དེར་བརྟེན་ཁོང་གཤེགས་པའི་རྗེས་ལའང་ངའི་སེམས་ནང་མི་དེ་སྙིང་རྗེ་བསམ་ནས་ཕངས་ཀྱི་ཡོད། རྒྱལ་ཆེན་ཤུགས་ལྡན་གྱི་སྐོར་ལ་ཐོག་མཐའ་བར་གསུམ་གྱི་གནས་ཚུལ་ཁ་སང་བར་དུ་ག་རེ་བྱུང་བ་དེ་རྣམས་ངས་འགྲེལ་བཤད་རྒྱག་དུས་རྒྱག་གཅིག་མཆོངས་གཅིག་རེད། དེ་ལ་རྣམ་རྟོག་ཐེ་ཚོམ་བྱེད་དོན་རྩ་བ་ཉིད་ནས་མེད་ལ། ཡིན་དང་ཡིན་ཞེས་ཟེར་བྱུང༌། དེ་ནས་ངས་ད་ཆ་ལོ་གསོལ་གྱི་རྒྱལ་ཆེན་བསྐང་གསོ་འདོན་མ་དགོས་པ་ཡིན་ཞེས་མངགས། དེ་ནས་གྲྭ་ཚང་དུ་ནམ་རྒྱུན་འཕྲིན་བཅོལ་འདོན་པའི་སྐབས་ལ་རྒྱལ་ཆེན་གྱི་འཕྲིན་བཅོལ་སྐབས་རེ་འདོན་གྱི་ཡོད་པ་དེ་དང༌། ལྷག་པར་གཟིམ་ཆུང་དུ་དགོང་དྲོའི་སྲོད་གསོལ་ལ་བར་སྐབས་ནས་རྒྱལ་ཆེན་འཕྲིན་བཅོལ་ཡང་འཆར་ཅན་བྱས་ནས་འདོན་གྱི་ཡོད་པ་དེ་རྐྱེན་ཞིག་མ་འཕྲད་པར་དུ་ལམ་སེང་རྒྱས་བསྡུས་བྱེད་སྟབས་མི་བདེ་བས་དུས་སྐབས་ཤིག་འཕྲད་རྒྱུར་དེ་མཚམས་ལབ་ཞེས་སྐུ་ཞབས་མཁན་པོ་ང་གཉིས་གོ་བསྡུར་དེ་ལྟར་བྱས། ཁོང་རང་རྒྱལ་ཆེན་སྲོག་གཏད་ཞུས་ཏེ་བསྟེན་མཁན་སོང་དེ་ལ་བཀག་འགོག་བྱེད་ཀྱི་མ་རེད། བསྟེན་ཆོག་གི་རེད། ད་རེས་ཀྱི་གནས་ཚུལ་དེ་ཚོ་གསང་བ་བསམ་གྱིས་མི་ཁྱབ་པའི་གནས་ཚུལ་ཞིག་རེད། སྔོན་ཆད་རྭ་ལོ་ཙཱ་བ་དང༌། དར་མ་མདོ་སྡེ། གཉན་ལོ་ཙཱ་བ་སོགས་གཅིག་གིས་གཅིག་ལ་མཐུ་རྒྱབ་སྟེ་གསོད་རེས་བཏང་བ་རེད། མ་འཆམས་པའི་མཐར་ཐུག་པ་གསོད་རེས་གཏོང་རྒྱུ་རེད། རྣལ་འབྱོར་པ་གཅིག་གིས་གཅིག་ལ་མཐུ་རྒྱབ་སྟེ་གསོད་ཀྱི་ཡོད་པ་རེད། རྣལ་འབྱོར་པ་དེ་ཚོ་གསང་སྔགས་ལ་ནུས་པ་ཐོན་པའི་གདེང་ཚོད་རྙེད་པའི་རྣལ་འབྱོར་པ་ཡིན་དུས་བྱང་ཆུབ་ཀྱི་སེམས་རྒྱུད་ལ་མེད་པ་ཞིག་ཡོང་ཤེས་ཀྱི་མ་རེད། བྱང་སེམས་རྒྱུད་ལ་ཡོད་པའི་རིག་པ་འཛིན་པ་མཚན་ཉིད་པ་གཅིག་གིས་སྤྱིར་བཏང་འབུ་སྲིན་གྱི་སྲོག་ལའང་རྒོལ་གྱི་མ་རེད། འོན་ཀྱང་རྣལ་འབྱོར་པ་གཅིག་གིས་གཅིག་ལ་མཐུ་རྒྱག་རེས་བྱས་ནས་གསོད་པའི་ལོ་རྒྱུས་ཡོང་གི་ཡོད་པ་དེ་དངོས་གནས་སྤྱིར་བཏང་བྱས་ན་ཤིན་ཏུ་འགལ་འཛོལ་རེད། འོན་ཀྱང་དེ་ང་རང་ཚོ་སོ་སོའི་སྐྱེ་བོའི་བློས་བསམ་དུ་མེད་པའི་གནས་ཚུལ་ཞིག་དང༌། དགོས་པ་རྒྱུ་མཚན་གཞན་ཞིག་གི་ཐོག་ནས་ཡོང་གི་ཡོད། དེ་ལ་གསང་བ་བསམ་གྱིས་མི་ཁྱབ་པའི་གནས་ཚུལ་ཟེར་བ་རེད། ཅེས་ངས་སྐུ་ཞབས་མཁན་པོ་ལ་འགྲེལ་བཤད་རྒྱབ་སྟེ་ཞུ་རྒྱུ་བྱུང༌། རྒྱལ་ཆེན་བསྟེན་ན་རྒྱལ་པོ་སྐུ་ལྔ་དང༌། ལྷ་མོར་ཕོག་ཐུག་ཆེན་པོ་འགྲོ་གི་ཡོད་པའི་གནས་ཚུལ་ཞིག་གསལ་པོ་བྱུང་བ་རེད། ཡིན་ཀྱང་དེ་རྒྱུ་མཚན་དུ་བྱས་ཏེ་གཅིག་ལ་བསྟོད། གཅིག་ལ་སྨད་དེ་སྐུར་བ་འདེབས་དགོས་དོན་གང་ཡང་མེད། ང་ཚོ་བཏང་སྙོམས་སུ་བསྡད་ན་འགྲིགས། ཁྱེད་རང་རྒྱལ་ཆེན་བསྟེན་རྒྱུ་དེ་ཡང་མུ་མཐུད་བསྟེན་ན་མ་འགྲིགས་པ་གང་ཡང་མེད། ཅེས་ལབ་པ་ཡིན། དེའི་དགོང་དྲོ་ནས་བཟུང་རྒྱལ་ཆེན་གྱི་འཕྲིན་བཅོལ་འདོན་རྒྱུ་དེ་ཡང་ཅམ་བཞག་བྱས་ཏེ་བློའི་ཡུལ་དུ་མ་འཁོར་བ་བྱས་པ་ཡིན། རྒྱལ་ཆེན་འཁོན་དོགས་ཀྱི་བཟོ་འདྲ་བོ་ཏིལ་འབྲུ་ཙམ་ཡང་མེད་པར་གཉིད་སྐྱིད་ཐག་ཆོད་ཁུག་གི་འདུག མཚམས་མཚམས་ཁྲག་རྒྱས་ནས་གཉིད་མ་ཁུག་པ་བྱེད་ཀྱི་ཡོད་པ་ལས་ལྷ་འདྲེའི་ཆོ་འཕྲུལ་མིན་ནམ་བསམ་པ་གང་ཡང་མ་བྱུང༌།

དེའི་རྗེས་ལ་རྒྱལ་ཆེན་མིན་ནམ་བསམ་པའི་རྨི་ལམ་ཐེངས་གཅིག་གཉིས་བྱུང༌། དེ་ནི། ཁང་ཆུང་ཞིག་ནང་ཁྲི་བྱང་རིན་པོ་ཆེ་བཞུགས་པ་དང༌། ཁྲི་བྱང་རིན་པོ་ཆེ་ནས་ད་ང་འདིར་སྤོས་ཡོད་གསུང་གི་འདུག གྲྭ་རྐྱང་ལྟ་བུ་བྱས་ནས་བཞུགས་འདུག ཞབས་ཕྱི་ཞུ་མཁན་གྲྭ་པ་ཆུང་ཆུང་ཞིག་འདུག ང་འདིར་སྐྱིད་པོ་འདུག་གསུང་གི་འདུག ངས་དེར་མེ་ཏོག་གཅིག་ཕུལ་སོང༌། དེ་གཅིག་མིན་ནམ་བསམ་པ་བྱུང༌། དེ་ནས་ལོ་གསར་ཚེས་གསུམ་ཉིན་ངས་མཆོད་གཡོག་ལ་ད་རེས་དེ་སྔ་བོད་ཀྱི་ལུགས་སྲོལ་ལྟར་ལྷ་མོ་རྐྱང་རྐྱང་བཏོན་ཏེ་འགྲིགས་པ་བྱེད་ཀྱི་ཡིན་ཞེས་མངགས། རྒྱལ་ཆེན་ཞེས་དམིགས་སུ་བསལ་བའི་སྐད་ཅ་གང་ཡང་མ་དགོས་པ་བྱས། སྐབས་རེ་ལྷ་མོའི་ཐོག་ང་ཚོས་མགོན་ཆོས་བེཀ་ཙེ་སོགས་ཀྱང་བཏོན་པ་རེད། སྐབས་དེར་རྒྱུ་མཚན་མང་པོ་མ་བརྗོད་པར། བོད་ལ་སྔོན་མ་གང་བཏོན་པ་བཞིན་འདོན་གྱི་ཡིན་ཞེས་བཤད་པ་ཡིན། དེ་དུས་རྣམ་གྲྭ་ཁྱེད་རང་ཚོས་གནད་དོན་གང་ཡང་གོ་ཡོད་ཀྱི་མ་རེད། དེ་ནས་འབྲུག་ལོའི་ཟླ་བ་དང་པོའི་ཚེས་བཅུ་ཉིན་གནས་ཆུང་གི་ལུང་ལ། དམར་ནག་གཉིས་ལ་ྋརྒྱལ་བ་སྐུ་ཕྲེང་རིམ་བྱོན་གྱིས་འཕྲིན་ལས་གཉེར་དུ་གཏད་པའི་དགྲ་ལྷར་མིང་བཏགས་ཏེ་ཡོད་པ་ལ། འདྲེ་ཤར་གྱི་ཕྱོགས་སུ་གནས་པ་ལ་གླུད་ནུབ་སྒོར་གཏོང་བའི་དཔེ་དོན་ལྟར་མ་སོང་བ་དགོས་པའི་ལུང་དེ་སྐྱོན་སོང༌། ལུང་དེའི་དགོངས་དོན་དེ་མིང་རྒྱབ་འཁུར་གྱི་ལྷ་མོ་དང་རྒྱལ་པོ་སྐུ་ལྔ་ལ་རྩེ་གཅིག་ངོ་ཐོན་མེད་པ་དང༌། ལྷ་གསར་མི་གསར་གསོལ་མཆོད་བྱས་པ་འགྲིགས་ཀྱི་མེད་པའི་དགོངས་པ་ཡིན་པ་དེ་ངས་གསལ་པོ་ཤེས་བྱུང༌། དེར་བརྟེན་དེའི་ཉིན་མོ་བཀའ་ཤག་སྤྱན་འདྲེན་སར་འཆར་ཅན་ཡོད་པ་ནས་སྤྱན་འདྲེན་གྲུབ་པ་དང་ཡར་ཕེབས་ཤོག་ཅེས་སྐད་བཏང་སྟེ། ད་གིན་ཆོས་སྐྱོང་གི་ལུང་སྐྱོན་པའི་དགོངས་དོན་འདི་འདྲ་རེད་ཅེས་ཞིབ་གླེང་བྱས་ཏེ། ཐོག་མར་རྒྱལ་ཆེན་དང་འབྲེལ་བ་ཡོང་སྟངས། བར་དུ་རྒྱལ་ཆེན་འཕྲིན་བཅོལ་བཏོན་སྟངས། གནས་ཆུང་གིས་ཐོག་མར་ལུང་སྐྱོན་པའི་སྐབས་ལ་ངས་ཞལ་རོག་བཞུགས་ཞེས་ཞུས་སྟངས། དེ་རྗེས་དེབ་སེར་པོ་ཐོན་པའི་སྐབས་ལ་ཁྲིམས་ས་ལྟ་བུ་ཡིན་ན་དྲང་ཐིག་ལ་གནས་དགོས་པ་ཡིན་དུས་བློ་གཟུ་བོར་གནས་པའི་ཐོག་ནས་གནས་ཆུང་ལ་བཀའ་འདྲི་ཞུ་སྟངས། གནས་ཆུང་གི་ལུང་སྐྱོན་སྟངས། ད་དུང་གལ་ཆེ་ཡང་ནན་གྱིས་ཟན་བརྟག་བསྒྲིལ་སྟངས་སོགས་ཆ་ཚང་བཀའ་བློན་ཚོར་ཞུས། ད་ཆ་བོད་གཞུང་གི་གཞུང་ཞབས་ཤིག་གིས་བོད་གཞུང་དང༌། ངེད་དང་འབྲེལ་བའི་ཆ་ནས་རྒྱལ་པོ་སྐུ་ལྔ་དང༌། ལྷ་མོ་རེད་ལས་རྒྱལ་ཆེན་ལ་གསོལ་མཆོད་བྱེད་རྒྱུ་འགྲིགས་ཀྱི་མ་རེད། ཡང༌། སོ་སོ་སྒེར་གྱི་ངོས་ནས་རྒྱལ་ཆེན་བསྟེན་གསོལ་བྱེད་པ་ནི་ཆོས་དད་རང་མོས་རེད། དེ་སོ་སོའི་འདོད་མོས་ལྟར་བྱས་ན་འགྲིགས། བོད་གཞུང་གི་ཆབ་སྲིད་དང་འབྲེལ་བའི་སྒོ་ནས་རྒྱལ་ཆེན་ལ་འཕྲིན་ལས་གཉེར་གཏོད་བྱས་ན་མི་འགྲིགས། དེ་གནས་ཚུལ་ཐ་དད་རེད་ཅེས་གནས་ཚུལ་གསལ་པོ་ཞུས་པ་ཡིན། དེ་ནས་སྐུ་ཞབས་མཁན་པོར་གྲྭ་ཚང་དབུ་ཆོས་བརྒྱུད་ནས་ད་རིང་ནས་བཟུང་སྟེ་གྲྭ་ཚང་ལ་རྒྱལ་ཆེན་གྱི་འཕྲིན་བཅོལ་འདོན་མི་དགོས་པ་དང༌། ལོ་རེའི་བསྐང་གསོ་རྒྱས་པ་ཡང་འདོན་མི་དགོས་ཞེས་མངགས་ཏེ་དམ་དྲག་བྱས་པ་ཡིན། ཟླ་བ་དང་པོའི་ཚེས་བཅུ་ལ་གནས་ཚུལ་དེ་བྱུང༌། ཟླ་བ་དང་པོའི་ཚེས་བཅུ་གཉིས་ཡིན་པ་ཡོད། ཡོངས་འཛིན་རིན་པོ་ཆེ་རྡོ་རྗེ་གདན་ནས་ཡར་ཕེབས་ཏེ་མཇལ་བར་དེའི་སྐོར་གྱི་གནས་ཚུལ་ཆ་ཚང་ཞུས་པ་ཡིན། ཚེས་ ༡༣ ཉིན་ཁྲི་བྱང་རིན་པོ་ཆེ་མའེ་སོར་ནས་ཡར་ཕེབས་ཏེ་མཇལ་བྱུང༌། གནས་ཚུལ་སྔ་རྗེས་ཐམས་ཅད་གཅིག་དང་གཉིས་ཀྱིས་གསལ་པོ་ཞུས་པ་ཡིན། ཁྲི་བྱང་རིན་པོ་ཆེ་ནས་ཟན་བརྟག་དང༌། གནས་ཆུང་ནས་དེ་འདྲ་ཕེབས་ཡོད་ན་དངོས་འབྲེལ་རེད། བསླུ་བ་ཡོད་པ་མ་རེད། གནས་ཆུང་ལ་ཆ་བཞག་ན་འགག་དོག་སར་སླེབས་དུས་བསླུ་བ་མེད་པའི་ལུང་ཨང་གི་དང་པོ་གང་འདྲ་གནང་གི་ཡོད་མེད་ཤེས་གསལ་ཡིན། དེ་བཞིན་ཟན་བརྟག་ལ་ཆ་བཞག་ནའང་ལྷ་མོ་གསུང་བྱོན་མའི་སྐུ་ཐང་ལ་ཟན་བརྟག་བསྒྲིལ་བ་རེད། དེ་ཡང་ྋགོང་ས་ལྔ་པ་ཆེན་པོ་ཐེངས་གཅིག་གཤེགས་ཚར་རྗེས་སྡེ་སྲིད་ནས་གསང་སྒོ་ལོ་ག་ཚོད་དགོས་མིན་སོགས་སྡུག་སྐད་ཞུ་འབོད་ཤུགས་དྲག་བྱེད་པའི་སྐབས་ལ་ལྗགས་དབུགས་ཆད་ཚར་བ་དེ་ཡང་སྐྱར་ཚུར་གསོས་ནས། གལ་ཆུང་བ་དེ་ཚོ་ཁྱེད་རང་གིས་བློ་ཐག་གཅོད། གལ་ཆེ་བ་དེ་ཚོ་ྋརྒྱལ་བ་དགེ་འདུན་རྒྱ་མཚོའི་ཐུགས་ཀྱི་རྟེན་ལྷ་མོ་གསུང་བྱོན་མའི་སྐུ་ཐང་མདུན་དུ་ཟན་བརྟག་བསྒྲིལ་ནས་ཐག་གཅོད་བྱེད། དེ་ལ་བསླུ་བ་མི་ཡོང་ཞེས་གསུངས་པའི་སྐུ་ཐང་འདི་རེད། འདི་ལ་ཟན་བརྟག་བསྒྲིལ་ནས་ད་ལྟ་ཕན་ལ་བསླུ་བ་གང་ཡང་བྱུང་ཡོད་པ་མ་རེད། བསླུ་བ་མེད་ཐག་ཆོད་རང་རེད། དངོས་གནས་དྲང་གནས་དགོས་པ་རྒྱུ་མཚན་ཡོད་ཐག་ཆོད་ཡིན་པ་རེད་ཅེས་དང༌། འོན་ཀྱང་ད་ལྟ་ལྷ་མོ་དང་རྒྱལ་ཆེན་ཤུགས་ལྡན་གཉིས་མ་འཆམས་པ་ལྟ་བུའི་གནས་ཚུལ་དེ་ཕལ་ཆེར་བོད་ཀྱི་བསྟན་སྲིད་དང་འབྲེལ་བའི་ཐོག་ནས་ཡིན་པ་ལས། སྤྱིར་བཏང་ལྷ་མོ་དང་ཤུགས་ལྡན་གཉིས་མ་འགྲིགས་པ་རྩ་བ་ནས་ཡོད་ཀྱི་མ་རེད་ཅེས་གསུངས་བྱུང༌། ཁྲི་བྱང་རིན་པོ་ཆེ་ནས་ཡིད་ཆེས་གནང་གི་མི་འདུག གཞུང་གི་བསྟན་སྲིད་ཀྱི་ཐོག་ནས་ཏན་ཏན་ཡིན་གྱི་རེད། ྋརྒྱལ་བ་ལྔ་པའི་སྐབས་ལ་ཐུན་མོང་དང་ཐུན་མོང་མ་ཡིན་པའི་གནས་ཚུལ་མང་པོ་ཞིག་ཡོང་གི་ཡོད་ཙང་དེ་འདྲའི་ཐོག་ནས་ཡིན་གྱི་རེད་ཅེས་ཁྲི་བྱང་རིན་པོ་ཆེ་ནས་གོ་བ་དེ་འདྲ་ཞིག་བསྐྱོན་གྱི་འདུག གང་ལྟར་ཁྲི་བྱང་རིན་པོ་ཆེར་ཆ་ཚང་ཞུས་པ་ཡིན་ལ༑ ང་རང་ཡང་ཧ་ཅང་བློ་བདེ་པོ་བྱུང༌། དེ་ནས་ཁྲི་བྱང་རིན་པོ་ཆེ་ནས་འདི་གར་སྐུ་ཐང་ཞིག་ཡོད་པ་དེ་རྒྱལ་ཆེན་བསྟེན་གསོལ་བྱེད་མཁན་ཞིག་ལ་གནང་ན་ཡག་པོ་མ་རེད་དམ་གསུང་གི་འདུག རྒྱལ་ཆེན་སྐུ་ཐང་ཡོད་པ་དེ་དྲན་ཡང་མ་བྱུང༌། ད་ལྟ་བར་དུ་བརྗེད་པ་རེད། དེ་ལམ་སེང་གཞན་དག་ལ་སྤྲོད་དགོས་ཨེ་ཡོད། འདི་གར་སྐུ་ཐང་གཞན་དག་བྱིངས་ཆེ་དེ་ཚོ་མཉམ་དུ་བཞག་ན་འགྲིགས་ཀྱི་མིན་འགྲོ། ངེས་མེད་ངས་ཉར་མ་ཆོག་པ་དེ་འདྲ་ཡོད་ན་ཁྲི་བྱང་རིན་པོ་ཆེར་འབུལ་གྱི་ཡིན། དེ་ཡང་ཉར་ཆོག་དང་མི་ཆོག ཡང་ན་ཟན་བརྟག་བསྒྲིལ་ནས་ཐག་གཅོད་ཀྱི་ཡིན། ཡང་ན༑ གནས་ཆུང་ལ་བཀའ་འདྲི་ཞུ་གི་ཡིན་ཞེས་ཞུས་པ་ཡིན། ཚེས་ ༡༤ ཉིན་ལོ་གསར་པའི་གཟིམ་ཆུང་སྤྱན་འདྲེན་འཁེལ་བ་དེའི་སར་ངས་དོགས་གཅོད་ཞུས་པ་ཡིན། བར་ལམ་ཆོས་སྐྱོང་གིས་གསུངས་པ་དང༌། ཟན་བརྟག་བསྒྲིལ་བ་དེ་གཉིས་རྩེ་མཐུན་བབས་ནས་བློ་བདེ་པོ་ཡག་པོ་བྱུང༌། ངའི་ངོས་ནས་སྤང་བླང་འདི་ལྟར་བྱ་རྒྱུ་ཡིན། ད་ཆ་འདི་གར་རྒྱལ་ཆེན་གྱི་སྐུ་ཐང་ཞིག་ཡོད་པ་དེ་ངས་ཉར་ན་འགྲིགས་ཀྱི་ཡོད་ན་ནི་ཉར་གྱི་ཡིན། དེ་མིན་ཁྲི་བྱང་རིན་པོ་ཆེར་འབུལ་གྱི་ཡིན་པས་གང་དགའ་ཞེས་ཞུས་པར། ཆོས་སྐྱོང་གིས་དྲག་ཤུལ་དང་བཅས་སློབ་དཔོན་མཐོང་བ་དོན་ལྡན་གྱི་གནས་ནས་ད་ལྟ་རང་དོར་དགོས་གསུང་བྱུང༌། སྤྱན་འདྲེན་གྲུབ་མ་ཐག་ཏུ་ལམ་སེང་མཆོད་གཡོག་ལགས་སྐུ་ཐང་དེ་ཁྲི་བྱང་རིན་པོ་ཆེར་འབུལ་དུ་བཏང་བ་ཡིན། དེ་འདྲ་བྱས་ནས་གཙང་མ་བཟོས་པ་ཡིན། དེ་ལེའུ་གཅིག་ཡིན།

དེ་ནས་ངས་རྙིང་ཆོས་དག་སྣང་རྒྱ་ཅན་ཁོངས་ཀྱི་བཀའ་བརྒྱད་སྤྱི་དྲིལ་གྱི་བསྙེན་པ་གཏོང་སྐབས་རྨི་ལྟས་བཟང་པོ་མང་དུ་བྱུང་ཡང་སྐབས་དོན་མིན་པས་ཤོད་རྒྱུ་མིན། འབྲུག་ལོའི་དབྱར་གཞུང་དུ་ལ་དྭགས་ལ་དུས་འཁོར་དབང་ཆེན་བྱེད་པའི་ཆེད་འགྲོ་གོང་དེར་དགའ་ལྡན་བྱང་རྩེ་གྲྭ་ཚང་ནས་ཐུགས་དམ་ཞིག་འབྱོར་བྱུང༌། དེའི་ནང་བར་ལམ་བྱང་རྩེ་གྲྭ་ཚང་ནང་བཀྲ་མི་ཤིས་པ་རྒྱུན་མཐུད་བྱུང་བ་དང༌། སློབ་གཉེར་བ་མང་པོར་གྲ་མ་འགྲིགས་ཡོང་གི་འདུག སྤྱིར་བཏང་ཐུགས་དམ་ཁག་གི་ནང་ལ་སྲུང་མའི་འཁུ་དོག་ཡོད་པའི་རྣམ་པ་ཡོང་གི་འདུག བར་ལམ་ཁྲི་བྱང་རིན་པོ་ཆེར་བཀའ་སློབ་ཞུས་ཏེ་ལྷ་མོའི་རྟེན་རྫས་གསར་བཙུགས་དང་འབྲེལ་ཟབ་གསོལ་གནད་སྨིན་བསྒྲུབས་པ་ཡིན། ད་ཆ་ལྷ་མོའི་འཁོན་དོགས་འདྲ་ཡོད་མེད་མོ་ཞིག་རྒྱག་རོགས་ཞེས་གསལ་འདུག ཐུགས་དམ་ས་བོན་དེ་གསེར་ཀོང་རིན་པོ་ཆེའི་བསྟན་པ་འཛིན་མཁན་གྱི་གྲྭ་ཚང༌། བསླབ་པ་སློབ་གཉེར་ཡོད་པ་ཞིག་རེད། བྱང་རྩེ་གྲྭ་ཚང་ལ་བསླབ་པ་སློབ་གཉེར་ཡོད་པའི་ཐུགས་རྗེ་བཀའ་དྲིན་ལ་བརྟེན་ནས་དེང་སང་ངས་བེད་སྤྱོད་བྱེད་རྒྱུ་ཡོད་པའི་གསེར་ཀོང་རིན་པོ་ཆེ་དང༌། སྐུ་ཞབས་མཁན་པོ་སོགས་བཏང་འགྲོ་བཞག་སྡོད་འཕེར་བ་མང་པོ་ཡོང་གི་ཡོད། ད་ཆ་བསླབ་པ་སློབ་གཉེར་ཡོད་སའི་གྲྭ་ཚང་ལ་ཉམས་གུད་བྱུང་ན་རྗེའི་བསྟན་པ་ལ་གནོད་རྐྱེན་ཞིག་ཆགས་ཡོང་དུས་གལ་ཆེན་པོ་རེད། ཁོང་རང་ཚོས་དོགས་མ་ཆོད་པར་ང་ལ་དྲིས་པ་རེད། ངས་མོ་ཤབ་རེ་ཤོབ་བེ་ཞིག་རྒྱབ་ནས་ཐག་བཅད་ན་འགྲིགས་ཐབས་མི་འདུག་བསམ་ནས་གལ་ཆེན་པོ་ཞིག་ལ་བརྩིས་ཏེ་ཟན་བརྟག་བསྒྲིལ་བ་ཡིན། ཟན་བརྟག་ལ་བྱང་རྩེ་གྲྭ་ཚང་ནང་བཀྲ་མི་ཤིས་པ་རྒྱུན་མཐུད་ནས་ཡོང་བ་འདི་ལྷ་མོ་འཁོན་པ་ཡིན་ནམ། མིན་ཞེས་བསྒྲིལ་བར། ལྷ་མོ་འཁོན་པ་ཡིན་ཞེས་བབས་སོང༌། ལྷ་མོ་འཁོན་པ་ཡིན་ན། ལྷ་མོ་འཁོན་པའི་རྒྱུ་རྐྱེན་གཞན་དག་ཅིག་ཡིན་ནམ། རྒྱལ་ཆེན་བསྟེན་ཆེས་པའི་དབང་གིས་ལྷ་མོ་འཁོན་པ་ཡིན་ཞེས་བསྒྲིལ་བར། རྒྱལ་ཆེན་བསྟེན་ཆེས་པའི་དབང་གིས་ལྷ་མོ་འཁོན་པ་ཡིན་ཞེས་བབས་སོང༌། དང་པོར་ལྷ་མོ་འཁོན་པོ་ཡིན་ཞེས་དང༌། གཉིས་པར་ལྷ་མོ་འཁོན་པའི་རྒྱུ་རྐྱེན་རྒྱལ་ཆེན་བསྟེན་ཆེས་པའི་དབང་གིས་ཡིན་ཞེས་བབས་དུས་ང་ལ་ཡང་བསྐྱར་ངེས་པ་རྙེད་སོང་ཡང༌། དེ་ཐུགས་དམ་བཀའ་ལན་ནང་བྲིས་ན། མི་མང་པོའི་བསམ་བློའི་ནང་མཐོང་ཕྱོགས་དང་བསམ་ཕྱོགས་གང་འདྲ་ཞིག་ཆགས་གྲབས་ཡོད་ཚོད་མ་ཐིག་པ་དང༌། མ་བྲིས་ནའང་ཁོང་ཚོས་འགངས་ཆེན་པོ་ཞིག་ལ་ཐུག་སྟེ་ང་ལ་དྲིས། ངས་གནས་ཚུལ་ངོ་མ་དེ་མིན་པ་ཞིག་བཤད་ན་བཤད་པས་འགྲིགས་ཀྱི་མི་འདུག དེ་ལྟར་བྱེད་ཁག་པོ་བྱུང༌། དེ་ནས་གསེར་ཀོང་རིན་པོ་ཆེ་དང༌། སྐུ་ཞབས་མཁན་པོ་གཉིས་སྐད་བཏང་སྟེ། བྱང་རྩེ་གྲྭ་ཚང་གི་ཐུགས་དམ་སྐོར་ལ་ངས་གལ་ཆེ་དོན་ཆེ་བྱས་ནས་ཟན་བརྟག་བསྒྲིལ་བ་ཡིན། ཟན་བརྟག་དོན་ཚན་གཉིས་བསྒྲིལ་བར། བབས་སྟངས་འདི་ལྟར་བབས་སོང༌། ད་ཆ་དེ་གསལ་པོ་བྱས་ནས་ལབ་ན་ལབ་པས་མི་འགྲིགས། མ་ལབ་ན་མ་ལབ་པས་ཀྱང་མི་འགྲིགས་པའི་ཁག་པོ་འདུག ཁྱེད་རང་གཉིས་ཀྱི་རྒྱུས་ཡོད་བྱས་ན་གང་འདྲ་བྱས་ན་ལེགས་པ་འདུག་ཅེས་གོ་བསྡུར་བྱས་པ་ཡིན། དེ་ནས་ཐ་མའི་མཇུག་བསྡོམས་ལ་ཐུགས་དམ་བཀའ་ལན་ནང་གསལ་པོ་རང་བྲི་མ་དགོས་པ་བྱས། ལྷ་མོ་འཁོན་པའི་སྐྱོན་ཡིན་པས་ལྷ་མོ་རང་ལ་གཙོ་བོར་འཕྲིན་བཅོལ་དགོས་པ་དང༌། ལྷག་པར་སྔོན་བསྟེན་སྲུང་མ་མིན་པའི་སྔར་མེད་གསར་སྤྲོས་ཀྱི་རིགས་ལ་འཛེམས་ཆ་བྱེད་དགོས་ཞེས་གོ་རྒྱུ་ཡོད་པ་ཞིག་བྲིས། ངག་ཐོག་ནས་ཁྱེད་རང་གཉིས་ཀྱིས་བྱང་རྩེ་གྲྭ་ཚང་གི་གྲྭ་པ་དོ་བརྟན་རིགས་ལ་སྐབས་སུ་བབས་པའི་འགྲེལ་བཤད་རྒྱག་འོས་རྒྱབ་ན་འགྲིགས་ཀྱི་རེད་ཅེས་ཞུས་པ་ཡིན། སྐབས་དེར་བྱང་རྩེ་གྲྭ་ཚང་གི་ཐུགས་དམ་བཀའ་ལན་ཞུ་མཁན་གྲྭ་པ་ཞིག་ཡོད་འདུག་པ་དེ་ལ་སྐུ་ཞབས་མཁན་པོ་དང༌། གསེར་ཀོང་རིན་པོ་ཆེ་གཉིས་ཀས་མངགས་ཚོད་མ་ཟད། གྲྭ་ཚང་ལ་ཡི་གེ་ཡང་བཏང་ཡོད་ཚོད་འདུག བྱང་རྩེ་གྲྭ་ཚང་ནང་ལ་སྲོག་གཏད་ཞུས་པ་མང་པོ་བྱས། ཁོང་ཚོས་བསྐང་གསོ་དང་འཕྲིན་བཅོལ་ཚོགས་ཆེན་ནང་འདོན་གྱི་ཡོད་འདུག་ཀྱང༌། དེ་རྗེས་རྒྱས་བསྡུས་བསྒྱུར་བཅོས་ཕྲན་བུ་བྱས་འདུག

དེ་ནས་འབྲུག་མོའི་ལས་བསྡོམས་ཚོགས་ཆེན་སྐབས་ལ་བློ་གླིང་མཁན་པོ་ཡེ་ཤེས་ཐུབ་བསྟན་དང༌། བྱང་རྩེ་མཁན་པོ་དགེ་འདུན་བཟང་པོ༑ སེར་བྱེས་མཁན་པོ་ལེགས་ལྡན་བཅས་འདིར་འབྱོར་ངོས་འཕྲད་སར་ཁོང་ཚོར་ངས་དེ་སྐོར་འགྲེལ་བཤད་ཆ་ཚང་བརྒྱབ་པ་ཡིན། བྱང་རྩེ་མཁན་པོ་དགེ་འདུན་བཟང་པོར་བྱང་རྩེ་གྲྭ་ཚང་དུ་ཇི་བྱས་དྲི་བརྩད་ཀྱང་བྱས་པར། ཚོགས་འདོན་སོགས་ལ་བསྒྱུར་བཅོས་བྱས་ལུགས་ཟེར་གྱི་འདུག ཁོང་ཚོར་འགྲེལ་བཤད་ཆ་ཚང་བརྒྱབ་པའི་རྗེས་ལ་སྐུ་ཞབས་མཁན་པོས་ད་དུང་གྲྭ་ཚང་ནང་དམ་དྲག་གང་ལ་གང་འཚམས་བྱས་པ་འདྲ། དེ་ནས་ན་ནིང་རྒྱ་གར་ལྷོ་ཕྱོགས་ལ་འགྲོ་ཁར་བྱང་རྩེ་གྲྭ་ཚང་ནས་ཐུགས་དམ་གཉིས་པ་ཞིག་འབྱོར་བྱུང༌། དེའི་ནང་ན་ནིང་ཐུགས་དམ་ཞུས་པའི་དགོངས་དོན་ཞབས་བརྟན་རྣམས་བསྒྲུབས་ཚར་བ་ཡིན། ད་ཆ་ལྷ་མོའི་འཁོན་དོགས་ཞི་ཡོད་དམ་མེད། གཙང་མ་ཆགས་ཡོད་དམ་མེད་མོ་རྒྱབ་རོགས་བྱེད་ཅེས་ཐུགས་དམ་ཞིག་འབྱོར་བྱུང༌། དེ་ཡང་ངས་གལ་ཆེ་དོན་ཆེར་བརྩིས་ཏེ་སྤྱིར་ཕྱོགས་བསྐྱོད་གལ་ཆེའི་སྐབས་ལྷ་མོའི་སྟོང་ཚོགས་རེ་འབུལ་གྱི་ཡོད་པས་སྐབས་དེར་ཟབ་གསོལ་དང་སྟབས་བསྟུན་ཟན་བརྟག་བསྒྲིལ་བ་ཡིན། བྱང་རྩེ་གྲྭ་ཚང་ལ་ལྷ་མོའི་འཁོན་དོགས་ཡོད་པ་དེ་ཞི་ཡོད་དམ་མེད་ཅེས་བསྒྲིལ་བར་ད་དུང་ཞི་མེད་ཅེས་བབས་སོང༌། ཞི་མེད་ན། དེ་ཞི་ཐབས་སུ་ལྷ་མོའི་བསྐང་བཤགས་ཚོགས་བསྐོང་འགྲོ་གང་ཆེ་ཞིག་གསོག་དགོས་པ་ཡིན་ནམ། རྒྱལ་ཆེན་བསྟེན་གསོལ་དམ་དྲག་ད་དུང་ཤུགས་ཆེ་རུ་གཏོང་དགོས་ཀྱི་ཡོད་དམ། ཞེས་བསྒྲིལ་བར། རྒྱལ་ཆེན་བསྟེན་གསོལ་ད་དུང་དམ་དྲག་ཤུགས་ཆེ་རུ་གཏོང་དགོས་ཞེས་པ་བབས་སོང༌། ང་མའེ་སོར་ལ་འགྲོ་རན་སྟབས་ཐུགས་དམ་བཀའ་ལན་ལམ་སེང་ཡིག་ཐོག་ཏུ་མ་བྲིས། དེ་ནས་ང་མའེ་སོར་ལ་འབྱོར་སྐབས་བྱང་རྩེ་མཁན་པོར་གོ་བསྡུར་ཞིག་བྱས་པ་ཡིན། ཁ་སེང་ཐུགས་དམ་གཉིས་པ་དེ་ཡང་ཟན་བརྟག་བསྒྲིལ་ནས་འདི་ལྟར་བབས་སོང་བས་གང་འདྲ་ཞིག་དགའ་བ་འདུག་གམ་ཞེས་ལབ་པར། བྱང་རྩེ་གྲྭ་ཚང་གི་ལས་སྣེ་དགེ་བཤེས་འགའ་ཤས་ཤིག་ཐོག་ལ་བསླབ་བྱ་འགྲེལ་བཤད་ཅིག་རྒྱག་རོགས་ཟེར་གྱི་འདུག དེ་ནས་དགའ་ལྡན་ལ་མཆོད་མཇལ་ཞུ་བའི་ཉིན་མོ་དེར་བྱང་རྩེའི་གཟིམ་ཆུང་ཆུང་ཆུང་ཞིག་ཡོད་པ་དེའི་ནང་སྐུ་ཞབས་མཁན་པོ་དང༌། དབུ་མཛད། བྱང་རྩེའི་དགེ་བཤེས་རྒན་པ་འགའ་ཤས་བཅས་ཁོང་ཚོ་མི་བཅུ་གྲངས་ཤིག་ལ་བྱང་རྩེའི་ཐུགས་དམ་སྔ་རྗེས་གཉིས་ཀྱི་སྐོར་ལ་འགྲེལ་བཤད་མདོར་བསྡུས་ཤིག་རྒྱབ་པ་ཡིན། དེ་མ་གཏོགས་ངའི་སྐོར་གྱི་གནས་ཚུལ་རྣམས་ཤོད་དགོས་དོན་མི་འདུག་ལ་བཤད་མེད།

ད་ཆ་རྡོ་དོན་གནས་ཚུལ་འདི་དག་ལ་ཁྱེད་རང་ཚོས་གོ་བ་བླངས་ནས་བསམ་བློ་བཏང་ན། ངའི་གནས་ཚུལ་འདི་ཚོ་སྔ་རྗེས་མང་པོ་ཞིག་ནས་བྱུང་བ་དང༌། དོ་དོ་ཏན་ཏན། མ་ལན་མ་འགྱོད་པ་ཞིག་གི་སྒོ་ནས་བྱས་ཡོད་པ་ལས་ངས་ཧ་རེ་ཧུ་རེ་བྱས་ནས་ཐག་བཅད་པ་རྩ་བ་ཉིད་ནས་མིན། བརྟག་དཔྱད་སྔ་རྗེས་རིམ་པར་བྱས་པ་སྔ་རྗེས་གུང་མཐུན་པའི་ཐོག་ནས་གང་ལྟར་རྒྱལ་ཆེན་བསྟེན་ན་ལྷ་མོའི་འཁོན་དོགས་ཡོང་གི་ཡོད་པ་དེ་ལུང་བརྟག་སྔ་རྗེས་དང༌། ཚད་ཐུབ་དཀའ་ཡང་ལུང་བརྟག་གི་བབས་དང་བསྟུན་སྔ་རྗེས་ཀྱི་རྨི་ལྟས་འགའི་གོ་རྒྱུ་བྱུང་བ་བཅས་རྟགས་ཧ་ཅང་གསལ་པོ་བྱུང༌།

ངས་ད་གིན་བརྗེད་གྲབས་བྱས་པ་རེད། ངས་གནས་ཆུང་ལ་ཐོག་མར་རྒྱལ་ཆེན་སྐོར་ཕར་ཞུས་ནས་ཚུར་འགྲེལ་བཤད་སྐྱོན་པའི་སྐབས་ལ་རྒྱལ་ཆེན་བསྟེན་ན་ཕན་ལས་གནོད་ཆེ་བ་ཡིན། དེ་འདྲ་ཡིན་དུས་སྐུ་མདུན་སྐུ་གོང་མ་གསེར་ཞལ་འཚོ་བཞུགས་སྐབས་ལའང་འདྲེ་ངས་སྙན་སེང་ཞུ་རྒྱུ་འཁེལ་བྱུང་ཞེས་གསལ་པོ་བྱས་ནས་གསུང་གི་འདུག ཡང་ཤུགས་ལྡན་སྐོར་གནས་ཚུལ་གཞི་ནས་རྩད་གཅོད་ཉམས་ཞིབ་བྱེད་པའི་སྐབས་ལ་དེ་སྔ་གོ་བོ་ཆོས་ཟུར་གྱི་སྐབས་སྤྱི་སྒེར་འགའ་ཤས་ལའང་རྒྱལ་ཆེན་བསྟེན་ན་གནས་ཆུང་འཁོན་གྱི་ཡོད་པའི་རྟགས་ཤུགས་ཆེན་པོ་ཡོད་པ་ཞིག་རེད་འདུག དེ་འབྲས་སྤུངས་ཀྱི་དགེ་བཤེས་རྒན་པ་ཚོའི་ངག་རྒྱུན་ལ་གསལ་པོ་ཡོད་པ་ཞིག་རེད། དེ་བཞིན་དེ་སྔ་འབྲས་སྤུངས་ལ་སྤྲུལ་སྐུ་གྲགས་པ་རྒྱལ་མཚན་འདྲེ་ལ་སྐྱེ་བ་ག་ལ་སྲིད་ཅེས་པའི་ལུང་ཞིག་ཀྱང་གསུང་འདུག ངེད་རང་གི་རྨི་ལམ་ཞིག་ལའང་དེ་དོན་གསལ་པོ་ཞིག་བྱུང་སྟེ་ཆ་འཛིན་འོས་མིན་བཤད་དཀའ། དེ་མཚུངས་འབྲས་སྤུངས་དགེ་བཤེས་རྒན་པ་ཁ་ཤས་ཀྱི་ངག་རྒྱུན་ལ་ྋསྐྱབས་རྗེ་ཕ་བོང་ཁ་ལ་གནས་ཆུང་གི་འཁོན་དོགས་ཡོད་པ་རེད་ཅེས་པའི་བཤད་རྒྱུན་ཡང་འདུག དེ་བཞིན་རྗེ་ཕ་བོང་ཁའི་སློབ་མ་བྲག་གཡབ་རྟོགས་ལྡན་ཁམས་ཁུལ་དགེ་ལུགས་པའི་དགོན་པ་མང་པོ་ཞིག་ལ་ཞབས་བཅགས་ནས་ཕེབས་པའི་སྐབས་ཁོང་རང་ཤུགས་ལྡན་ཤུགས་ཆེན་པོ་བསྟེན་གྱི་ཡོད་སྟབས་རྒྱལ་ཆེན་དར་ཁྱབ་ཆེན་པོ་ཆགས་ཚོད་འདུག དེ་ལྟར་གསར་དུ་རྒྱལ་ཆེན་ཤུགས་ཆེན་པོ་བསྟེན་མཁན་གྱི་དགོན་པ་དང༌། བླ་བྲང༌། མི་ཁྱིམ་ཁག་མང་པོར་ལོ་ནས་ལོ་མེལ་བརྟག་དཔྱད་ཡུན་རིང་བྱས་པའི་སྐབས་ལ་གང་ལྟར་ཐ་མ་དེར་གྲ་མ་འགྲིགས་མང་པོ་ཐོན་པའི་གནས་ཚུལ་བྱུང་བ་འདྲ་པོ་འདུག

གང་ལྟར་ཟན་བརྟག་དང༌། གནས་ཆུང་གི་བཀའ་ལུང་ཐོག་ནས་གནས་ཚུལ་ཡོང་སྟངས་འདི་ཚོར་ངེས་ཤེས་རྙེད་རྒྱུ་བྱུང་བ་རེད། དེ་དང་དེ་མཚུངས་ཀྱི་ལོ་རྒྱུས་གནས་ཚུལ་དང༌། ངེད་རང་གི་མཐོང་ཆོས་གནས་ཚུལ་ཅི་རིགས་ནས་ཀྱང་ཉམས་ཞིབ་བྱེད་སྐབས་གནས་ཚུལ་ཁྱད་མཚར་ཞིག་ཏན་ཏན་ཡོང་གི་འདུག དེ་འདྲ་ཡིན་དུས་གཞི་ནས་ཞོར་ཞོར་ལ་གནས་ཆུང་ལ་བཀའ་འདྲི་དོགས་གཅོད་ཞུས་པའི་རྡོ་དོན་སྙིང་པོར། ལྷ་མོ་འཁོན་པའི་རྒྱུ་རྐྱེན་ནི་གཙོ་བོ་གཅིག་རི་བོ་དགེ་ལུགས་པའི་བསྟན་པ་འདི་ལ་གཉེར་གཏད་སྲུང་མ་སྐྱེས་བུ་གསུམ་གྱི་སྲུང་མ་ཡིན་པ་དང༌། སྐྱེས་བུ་གསུམ་གྱི་སྲུང་མས་མ་ཆོག་པར་ཆོས་སྐྱོང་གསར་པ་ཞིག་ཀུན་ལས་ལྷག་པ་ལྟ་བུ་ཆགས་ཡོང་དུས་དཔལ་ལྡན་ལྷ་མོ་འཁོན་པའི་རྒྱུ་རྐྱེན་གཅིག་དེ་ཡིན་འདུག རྒྱུ་རྐྱེན་གཞན་ཞིག་ལ། ྋརྒྱལ་དབང་གོང་མ་རིམ་བྱོན་གྱི་བཀའ་བསྒོས་གཉེར་གཏད་ཐུན་མོང་མ་ཡིན་པའི་སྲུང་མ་དེ་ལྷ་མོ་རེད། དེ་ལ་འགྲན་ཟླ་ལྟ་བུའི་དྲེགས་པ་གསར་པ་ཞིག་བསྟེན་པ་དེས་ཀྱང་ལྷ་མོ་འཁོན་གཞི་གཅིག་བྱུང་འདུག ཡང༌། ད་ལྟའི་རྒྱལ་ཆེན་ཁོག་བརླམས་འདི་པཎ་ཆེན་བསོད་ནམས་གྲགས་པའི་སྐྱེ་སྲིད་མིན་པ་དང༌། སྤྲུལ་སྐུ་གྲགས་པ་རྒྱལ་མཚན་གྱི་སྐྱེ་སྲིད་ཀྱང་མིན་པ་འདྲ། འོ་ན། ག་རེ་རེད་ཟེར་ན། སྨོན་ལམ་ལོག་པ་ཞིག་ཡིན་ཚོད་འདུག དེ་འདྲའི་རྐྱེན་གྱིས་རྒྱལ་ཆེན་བསྟེན་གསོལ་ཤུགས་ཆེན་པོ་བྱེད་མཁན་དེ་ལ་གང་བྱས་ཀྱང་མི་ཁ་འདྲ་ཡོང་མཁན་གཅིག་དང༌། ྋརྒྱལ་བ་རིན་པོ་ཆེས་འགོ་འཁྲིད་པའི་བོད་སྤྱི་པའི་དོན་ལ་སྐབས་རེ་ཁྲག་གེ་འཁྲུག་གེ་ཡོང་བ་རྒྱུ་རྐྱེན་གཅིག་ཆོས་སྐྱོང་དེའི་ཆོ་འཕྲུལ་ཡིན་ཚོད་འདུག

ཡང༌། ངས་གནས་ཆུང་ལ་དེ་འདྲ་ཡིན་ན། ྋསྐྱབས་རྗེ་ཕ་བོང་ཁ་དངོས་གནས་དྲང་གནས་རྣལ་འབྱོར་པ་རྟོགས་པ་ཐོབ་པའི་བླ་མ་ཚད་ལྡན་ཞིག་ཡིན་རྒྱུ་རེད། དེས་ཆོས་སྐྱོང་ཚད་ལྡན་ཞིག་ལ་ཞལ་གྱིས་བཞེས་ཀྱི་ཡོད་པ་རེད། དེ་བཞིན་འདིའི་སྲོག་གཏད་ཀྱི་བརྒྱུད་པ་སྟག་ཕུ་རྡོ་རྗེ་འཆང་ལ་དག་སྣང་བྱུང་སྟེ་འདུལ་འཛིན་གྲགས་པ་རྒྱལ་མཚན་ཞལ་གཟིགས། དེ་ནས་བྱུང་བ་ཡིན་པ་རེད། དེ་གང་འདྲ་ཡིན་ནམ་ཞེས་དོགས་གཅོད་ཞུས་པར། ཆོས་སྐྱོང་གིས་ཐག་ཆོད་པོ་བྱས་ནས་གསུང་པ་ལ། ྋསྐྱབས་རྗེ་ཕ་བོང་ཁ་ལ་རིག་འཛིན་ཆེན་པོ་ཞེས་མཚན་བསྟོད་གསུང་གི་འདུག རིག་འཛིན་ཆེན་པོ་དེའི་སྐུ་ཚེའི་སྨད་ལ་ནོར་འཁྲུལ་ཆེན་པོ་བྱུང་ཡོད། ནོར་འཁྲུལ་ཆེན་པོ་བྱུང་བའི་རྐྱེན་བྱས་ནས་ང་པེ་དཀར་རྒྱལ་པོ་འཁོན་པ་ཅི་ལ་ཡིན་ཏེ། རིག་འཛིན་ཆེན་པོ་དེའི་སྐུ་ཚེ་མཛད་པ་ཐ་མའི་སྐབས་རྣམ་རྟོག་མི་ཤིས་པ་ཇི་བྱུང་རྩད་གཅོད་གནང་ན་མཁྱེན་པ་ཡོད། དེའི་ཡང་སྲིད་རྒྱ་གར་ལ་གཤེགས་པ་དེ་གཤེགས་པའི་སྐབས་ལའང་མཚན་མ་ངན་པ་ག་འདྲ་བྱུང་རྩད་གཅོད་བྱས་ན་ཤེས་པ་ཡོད། དེ་ཙམ་དུ་མ་ཟད། དེའི་ཡང་སྲིད་བརྒྱུད་མར་བཅས་པའི་སྐུ་ཚེ་མཛད་འཕྲིན་མཐའ་འཁྱོངས་ཡོང་གི་མ་རེད་ཅེས་གསུང་གི་འདུག

ྋསྐྱབས་རྗེ་ཕ་བོང་ཁ་ལ་གྲ་མ་འགྲིགས་བྱུང་བ་དེ་མི་མང་པོས་ཤེས་ཀྱི་ཡོད་པ་རེད། མང་པོའི་བསམ་ཚུལ་ལ། ྋསྐྱབས་རྗེ་ཕ་བོང་ཁ་དགེ་ལུགས་པའི་བསྟན་པའི་ཐོག་ལ་མཛད་རྗེས་ཆེན་པོ་བྱུང་བ་དེས་རྐྱེན་པས་རྙིང་མ་སོགས་གྲུབ་མཐའ་གཞན་ཕྱོགས་ནས་གཏད་ཡོད་པ་རེད་ཅེས་ངན་ཁག་དེ་རྙིང་མ་བའི་ཐོག་ལ་གཡོག་གི་ཡོད་ཀྱང༌། གནས་ལུགས་ངོ་མ་དེ་འདྲ་ཡིན་བཟོ་མི་འདུག དེ་དམར་ནག་གཉིས་ཀྱི་ཐོག་ནས་བཀའ་ཆད་ལྟ་བུ་ཡོང་གི་ཡོད་པ་འདྲ།

དག་སྣང་སྐོར་ལ། དག་སྣང་ལ་གཉིས་ཡོད། རྩ་གསུམ་ལྷ་ཡི་བྱིན་རླབས་ཀྱི་ཐོག་ནས་བྱུང་བའི་དག་སྣང་གཅིག་དང༌། བར་ཆད་ཀྱི་དབང་གིས་བྱུང་བའི་དག་སྣང་གཅིག་སྟེ་གཉིས་ཡོད། འདི་བར་ཆད་ཀྱི་དབང་གིས་བྱུང་བའི་དག་སྣང་དེ་ཡིན་ཨེ་ཡིན། ཞེས་གསུང་གི་འདུག དེ་འདྲའི་གནས་ཚུལ་ཛ་དྲག་པོ་དང༌། ཁ་ནས་ཤོད་མི་ནུས་པ་ལྟ་བུ་འདུག ལོ་འགའི་སྔོན་དུ་གནས་ཆུང་གིས་ཐོག་མའི་ལུང་བསྐྱོན་མ་བསྐྱོན་མཚམས་དེ་འདྲ་ཞིག་གི་སྐབས་ནུབ་གཅིག་རྨི་ལམ་ལ་ྋསྐྱབས་རྗེ་ཕ་བོང་ཁ་མཇལ་ཏེ་རྒྱལ་ཆེན་སྲོག་གཏད་ཞུ་དགོས་གསུང་བྱུང༌། དེ་མདུན་གླིང་རིན་པོ་ཆེའི་ཕྱག་མཛོད་ལགས་ཡོང་ནས་དེ་དོན་འགྲིགས་ཀྱི་རེད་ཟེར་བྱུང༌། འོན་ཀྱང་ཕ་བོང་ཁའི་ཕྱག་ངར་ལ་རྨ་ཤུལ་ཁྲག་དོན་བསྡད་པས་ངེད་རང་གི་བློར་དངངས་སྐྲག་དང་མི་བདེ་བ་ཆེན་པོ་བྱེད་པ་ཞིག་བྱུང༌། ད་ཆ་བསམས་སྐབས་བར་ཆད་ཀྱི་ཆོ་འཕྲུལ་ཡིན་པ་འདྲ་བསམ་པའི་ངེས་ཤེས་རྙེད་ཀྱི་འདུག འདི་ཞོར་འཕྲོས་ཡིན།

སྐབས་དོན་གོང་སྨྲོས་གནས་ཚུལ་འདི་ཛ་དྲག་ཧ་ཅང་རང་ཆེ་བས་ང་ཡང་འགན་མ་བཟོད་པར་ཐོག་མར་ཡོངས་འཛིན་ཁྲི་རིན་པོ་ཆེར་ཞིབ་ཕྲ་ཞུས་པ་ཡིན། དེ་ཙམ་བག་ཚ་གནང་གི་མི་འདུག དེ་ནས་ཁྲི་བྱང་རིན་པོ་ཆེར་ཆ་ཚང་ཞུས་པ་ཡིན། ཁྲི་བྱང་རིན་པོ་ཆེར་མ་ཞུས་ན་བློས་མ་བཟོད་མཁན་ཞིག་འདུག ཞུ་སར་སླེབས་དུས་ཞུ་མ་ནུས་མཁན་ལྟ་བུ་བྱུང༌། འོན་ཀྱང་ཁྲི་བྱང་རིན་པོ་ཆེ་ད་ལྟ་བར་དུ་སྐུ་ཚེ་མཛད་པ་འཕྲིན་ལས་བཟང་མཐའ་འཁྱོངས་པ་རེད། ཡིན་ནའང་བོད་ལ་ཇི་སྲིད་སངས་རྒྱས་བསྟན་པ་མ་ནུབ་བར་དུ་ྋསྐྱབས་རྗེ་རིན་པོ་ཆེ་ནས་ཐུགས་བསྐྱེད་དམ་བཅའ་བཙན་པོའི་སྒོ་ནས་སྐུའི་ཡང་སྲིད་ཕེབས་དགོས་པ་དང༌། ང་ཚོའི་ངོས་ནས་དེ་དོན་སྨོན་ལམ་དང་རེ་བ་རྒྱག་དགོས་པ་ཞིག་རེད། དེ་ཚོའི་ཐོག་ལ་གྲ་མ་འགྲིགས་བྱུང་ན་ཡག་པོ་མ་རེད། ཁྲི་བྱང་རིན་པོ་ཆེ་ནས་རྒྱལ་ཆེན་བསྟེན་གནང་བ་དེ་ད་ལྟ་སྐུ་ཚེ་འདི་ལ་གསར་པ་བཟོས་གནང་བ་མིན་པར་སྐུ་གོང་མའི་སྐབས་ནས་བསྟེན་གནང་གི་ཡོད་པ་རེད། དེ་མཚམས་འཇོག་གནང་དགོས་པ་གང་ཡང་མེད། འོན་ཀྱང་ལྷ་མོ་ནི་དཀོན་མཆོག་གོང་ཕུད་རེད། དེ་འོག་རྒྱལ་པོ་སྐུ་ལྔ་བཅས་མི་ཚང་གཅིག་ལ་ཆ་བཞག་ན་མི་ཚང་དེའི་འགན་འཁུར་གཙོ་བོ་ཕྱག་མཛོད་ལྟ་བུར་ངོས་འཛིན་གནང་རྒྱུ་ཞིག་དང༌། ཤུགས་ལྡན་དེའི་འོག་གི་གཉེར་པ་ལས་བྱེད་ཕལ་པ་ལྟ་བུར་ངོས་འཛིན་གནང་སྟེ། གང་ལྟར་སོ་སོའི་སྐྱེས་ལྷ་ཡུལ་ལྷ་ལྟ་བུ་ཞིག་ལ་ངོས་འཛིན་གནང་སྟེ་གསོལ་མཆོད་དང༌། འཕྲིན་བཅོལ་གནང་ན་མ་འཐུས་པ་གང་ཡང་ཨེ་ཡོད་སྙམ། དེ་མིན་ཐུགས་ཀྱི་གཏད་སོ་རྒྱལ་པོ་སྐུ་ལྔ་དང་འདྲ་མཉམ་མམ། ཡང་ན། རྒྱལ་པོ་སྐུ་ལྔ་ལས་ལྷག་པ་ལྟ་བུའི་དགོངས་པ་བཞེས་ན། ྋསྐྱབས་རྗེ་ཕ་བོང་ཁ་བླ་མ་བསམ་གྱིས་མི་ཁྱབ་པ་ཡིན་ནའང་གནས་ཚུལ་དེ་འདྲ་བྱུང་བ་རེད། རྒྱལ་པོ་སྐུ་ལྔའི་འཁུ་དོག་ཉེན་ཁ་ཡོད་པ་རེད། དེ་དགོངས་པར་བཅངས་དགོས་ཀྱི་འདུག་ཅེས་ངས་ཁྲི་བྱང་རིན་པོ་ཆེར་གསལ་པོ་ཞུས་པ་ཡིན། ཡོངས་འཛིན་ཁྲི་རིན་པོ་ཆེ་ལ་ནི་མཛད་དཀའ་གང་ཡང་མེད་ལ། སྔར་ནས་འབྲས་སྤུངས་དགེ་བཤེས་དབུ་མཁྲེགས་ཐག་ཆོད་ཅིག་རེད། དེ་ལྟར་གནས་ཚུལ་འདི་རྣམས་གཙོ་བོ་ཡོངས་འཛིན་རྣམ་གཉིས་ཀྱིས་ཆ་ཚང་མཁྱེན། དགོངས་པར་ཆུབ་པ་དེ་འདྲ་ཡིན། ཁྲི་བྱང་རིན་པོ་ཆེར་རྒྱལ་ཆེན་གྱི་སྐོར་ལ་གནས་ཚུལ་འགངས་ཆེན་པོ་དེ་འདྲ་ཞིག་འདུག ད་ཆ་ངས་རྒྱལ་ཆེན་ལ་དམ་དྲག་བྱེད་སྐབས་ཤེས་པ་དང་མི་ཤེས་པ་སྣ་ཚོགས་ཀྱིས་བཀའ་འདྲི་བཀའ་སློབ་ཞུ་མཁན་ཡོང་སྐབས་སྔ་ཕྱིའི་ཡོང་རྐྱེན་ཆ་ཚང་ཐུགས་ཆུབ་ཡོད་སྟབས་དེ་བསྟུན་གང་ལ་དེ་འཚམས་ཡིན་ཅིག་མིན་ཅིག་བཀའ་སློབ་གསལ་བཤད་གནང་རོགས་གནང༌། ངས་བརྒྱ་ཐམ་པ་སྟོང་ཐམ་པ་བཤད་པ་ལས་ཁྲི་བྱང་རིན་པོ་ཆེས་བཀའ་སློབ་ཚིག་གཅིག་གནང་ན་རྒྱལ་ཆེན་བསྟེན་མཁན་ཚོར་དེ་ཕན་ཐོགས་ཆེ་བ་ཡོང་གི་རེད། རྒྱལ་ཆེན་ཁྲི་བྱང་རིན་པོ་ཆེ་ནས་གཙོ་བོར་བསྟེན་གནང་གི་ཡོད་སྟབས་རྒྱལ་ཆེན་བསྟེན་གནང་མཁན་ཁོང་རང་གིས་དགོས་པ་རྒྱུ་མཚན་གཟིགས་ནས་འགྲེལ་བཤད་བསྐྱོན་པ་ཡིན་ན་དེ་ལ་ཡིད་ཆེས་ཞུ་གི་རེད། ངས་འགྲེལ་བཤད་རྒྱག་གི་ཡོད་ཀྱང་དེ་ལ་ཡིད་ཆེས་བྱེད་མི་བྱེད་སྣ་ཚོགས་རེད། དེར་བརྟེན་ཁྲི་བྱང་རིན་པོ་ཆེ་ནས་བཀའ་སློབ་གནང་ན་ཡག་པོ་འདུག་ཅེས་ཞུས་པ་ཡིན། དེ་བཞིན་ཡོངས་འཛིན་ཁྲི་རིན་པོ་ཆེར་ཡང་བཀའ་སློབ་གནང་རོགས་གནང་ཞུས་པ་ཡིན།

ད་ལྟ་བར་དུ་མཁན་པོ་ལས་ཟུར་དྲག་པ་འགའ་རེ་དང༌། དགེ་བཤེས་དྲག་པ་རེ་ཟུང་ལ་དངོས་སུ་ཐུག་ནས་འགྲེལ་བཤད་ཕྲན་བུ་བརྒྱབ་པ་ལས་ཚོགས་པ་ལྟ་བུར་ཚིག་གཅིག་ཀྱང་བརྗོད་མེད། ད་ཆ་གཙོ་བོ་རྣམ་གྲྭ་དང༌། གནས་གྲྭ་ཐུན་མོང་ལ་བར་ལམ་གྱི་གནས་ཚུལ་རྣམས་འགྲེལ་བཤད་བྱས་ན་གང་འདྲ་ཡོང་བསམ་ནས་བརྟག་དཔྱད་བྱེད་སྐབས་བཟང་པོ་འདུག བརྟག་དཔྱད་བྱས་པའི་ཐོག་ནས་ད་རིང་འདིར་ཁྱེད་རང་ཚོ་འཛོམས་པའི་སར་འགྲེལ་བཤད་བྱས་པ་ཡིན། ཤེས་སོང་ངམ། སྔ་ཕྱི་བར་གསུམ་གྱི་གནས་ཚུལ་རྣམས་ངེས་པ་བྱེད་དགོས། སྟངས་འཛིན་བྱེད་དགོས་པ་འདི་ངས་འདོད་མི་འདོད་བྱས་པ་གང་ཡང་མིན། སྔ་ཕྱི་བར་གསུམ་གྱི་ཡོང་རྐྱེན་རྣམས་ལ་ཁྱེད་རང་ཚོས་བལྟས་ན་ཤེས་ཀྱི་རེད། རྩ་བ་འགངས་ནི་ཆེན་པོ་ཆགས་པའི་གནས་ཚུལ་འདི་རེད། ཁྱེད་རང་ཚོ་སོ་སོའི་ངོས་ནས་ཀྱང་ཏན་ཏན་བྱེད་དགོས་པ་གཅིག་དང༌། མིས་གནས་ཚུལ་འདྲ་མིན་ཤོད་མཁན་དེ་འདྲ་ཡོང་མདོག་ཁ་པོ་རེད། སྐབས་སུ་བབས་པའི་འགྲེལ་བཤད་རྒྱག་དགོས་པ་བྱུང་ན། ད་ལྟ་ངས་ལབ་པ་འདི་རྣམས་དངོས་དངོས་བརྗེན་བརྗེན་གྱི་གནས་ཚུལ་ཤ་སྟག་ཡིན། གནས་ཚུལ་འདི་རྣམས་ཀྱི་ཐོག་ནས་འགྲེལ་བཤད་རྒྱབ་ན་བློ་གཟུ་བོར་གནས་པ་དང༌། རྒྱུ་མཚན་ལ་བརྟག་དཔྱད་བྱེད་མཁན་ཞིག་ཡིན་ན་ནི་གོ་རྟོགས་ཤིག་ཡོང་མདོག་ཁ་པོ་རེད། དེར་བརྟེན་ཁྱེད་རང་ཚོས་སྐབས་སུ་བབས་པའི་འགྲེལ་བཤད་རྒྱག་དགོས་བྱུང་ན་འགྲེལ་བཤད་རྒྱབ་ན་ཡག་པོ་རེད། འདིར་ཚོགས་པ་འདྲ་པོ་ཡོད་པ་གྲྭ་ཚང་དང༌། གནས་ཆུང༌། ཁྱེད་རང་ཚོ་རྒྱུད་གྲྭ་སྨད་སྟོད་གཉིད་ནས་གྲོང་ཆོག་རྒྱུགས་མཁན་ཚོགས་ཁག་རེ་ཡོད་པ་རེད། མ་གཞི་རྒྱུད་གྲྭ་སྨད་སྟོད་ཀྱི་མཁན་བླ་གཉིས་ཀར་ལབ་ཡོད། ཁོང་ཚོས་ཆ་ཚང་ཤེས་ཀྱི་ཡོད། ཁྱེད་རང་ཚོ་གྲོང་ཆོག་རྒྱུགས་མཁན་གྲས་ནས་གྲྭ་ཚང་སྐུ་ཞབས་ཚོ་ལ་ན་ནིང་ངས་མ་འདོན་ཞེས་ལབ་ཚར་བ་ཡིན། ཕར་ཕྱོགས་ནས་རྒྱལ་ཆེན་འདོན་དགོས་ཟེར་མཁན་འདུག་ན་གྲྭ་ཚང་ལ་ཕྱག་བཞེས་མེད་ཅེས་ལབ་རྐྱང་རེད། ཡིན་ནའང་རྒྱུད་གྲྭ་སྨད་སྟོད་གཉིས་ཀྱི་གྲོང་ཆོག་རྒྱུགས་མཁན་ཚོའི་ཐོག་ནས་ལམ་སེང་སྡུམ་སྟེ་བཅད་སྟབས་མ་བདེ་བ་འདྲ་པོ་གལ་སྲིད་ཡོད་ན་ཡང༌། མི་དགོས་པ་གཙོ་བཟུང་བྱས་ན་ཡག་པོ་རེད། ཁྱེད་རང་རྒྱུད་པ་རང་ལ་རྗེ་བཙུན་ཤེས་རབ་སེང་གེ་ཡབ་སྲས་ནས་བསླབ་པའི་ཆོས་སྐྱོང་རྣམ་གཉིས་ཀྱིས་མི་ཆོག་པ་ཅི་ཡོད། དེས་ན་ཁྲོ་བཅུ་རྒྱས་པ་ཞིག་བཏང༌། དྲུག་ཅུ་མ་ཞིག་ཕུལ། དེས་མི་འགྲིགས་པ་ཡོང་མི་ཤེས་པ་ཞིག་རེད། སོ་སོས་སློབ་སྦྱོང་བྱས་པ་དང་བླ་མ་གོང་མ་ཚོས་མ་ཆད་མ་ལྷག་པ་ཞིག་རྩིས་སྤྲད་ནས་བཞག་ཡོད་པ་དེ་གའི་གཞུང་བསྲངས་ནས་ཕྱིན་ན་ཡག་ཤོས་རེད། དེས་མ་ཆོག་པ་གང་ཡང་མེད། བསྐང་གསོ་ཁྲ་ཁྲ་ཟིང་ཟིང་མང་པོ་མི་དགོས་པ་བྱས་ན་ཡག་པོ་མིན་ནམ། ཡང་ཅི་སྟེ་ངེས་མེད་སྦྱིན་བདག་གི་ངོ་ལ་བལྟས་ནས་མ་འདོན་ཀ་མེད་ལྟ་བུ་བྱུང་ནའང༌། སྤྲོས་པ་ཆུང་བ་ཞིག་བྱས་ན་ཡག་པོ་མིན་ནམ་བསམ་གྱི་འདུག རྒྱུད་པའི་བསྐང་གསོའི་ནང་མེད་པའི་འདོན་པ་གཞན་དག་འདོན་དགོས་བྱུང་ན་ལྷ་མོ་དང༌། སྐུ་ལྔ་གཙོ་བོ་བྱས། རྒྱལ་ཆེན་འདོན་དགོས་པ་བྱུང་ན་འཕྲིན་བཅོལ་མདོར་བསྡུས་ཤིག་འདོན་པ་མ་གཏོགས། དགྲ་ལྷའི་རྒྱལ་པོ་ལྟ་བུའི་མཐོང་དང་ཆ་འཇོག་མི་དགོས་པ་བྱས་ན་ལེགས། ད་ཚང་མས་ཤེས་སོང་ངམ།

རིགས་ལམ་སློབ་གྲྭའི་དགེ་རྒན་ལ་ན་ནིང་རོབ་ཙམ་ཞིག་ལབ་པ་ཡིན། ད་རིང་གནས་ཚུལ་ཞིབ་ཕྲ་ཤེས་རྟོགས་བྱུང་བ་རེད། ཁྱེད་རང་ཚོ་དགེ་བཤེས་ནང་ཚགས་དང༌། ངོ་ཤེས་པ་ཚོར་བཤད་བདེ་པོ་དང༌། དོ་སྣང་ཡོད་པ་འདྲ་བྱུང་ན་འགྲེལ་བཤད་རྒྱབ། ཤེས་སོང་ངམ། གནས་ཚུལ་གསལ་པོ་ཞིག་ཤེས་ཐུབ་པ་བྱུང་ན་ཡག་པོ་རེད། གནས་ཚུལ་མ་ཤེས་པར་ཁྲོག་ཐེབས་ན་ཡག་པོ་མི་འདུག

དེ་ནས་སྐུ་ཞབས་ཛེ་སྨད་ཀྱི་གནས་ཚུལ་དེ་ཡང་དེབ་དེ་ཐོན་རྒྱུ་ཡིན་པའི་གནས་ཚུལ་གྱིས་རྐྱེན་པས་ཡིན་ས་རེད། གང་ལྟར་ཐོག་མར་རྒྱུད་སྟོད་བླ་མ་དབུ་མཛད་འོས་འཆར་ལ་འབྱོར་དུས། དང་པོ་སྐུ་ཞབས་བླ་ཏི་དང༌། དེ་ནས་ཛེ་སྨད། དེ་ནས་དགེ་བཤེས་མིང་རིམ་བཞིན་མོ་རྒྱབ་པ་ཡིན་རྩ་བ་ནས་བཟང་པོ་ཞིག་བབས་མ་བྱུང༌། བྱེད་མ་ཤེས་པར་ཟླ་ཤས་ཤིག་བཞག་པ་ཡིན། དེ་འདྲ་ཞིག་གི་སྐབས་ལ་སྐུ་ཞབས་མཁན་ཟུར་རྣམ་རྒྱལ་འདིར་མཇལ་ཁ་ཞིག་ལ་ཕེབས་བྱུང་བར་བླ་མ་དབུ་མཛད་ཀྱི་འོས་འཆར་རྣམས་ལ་མོ་རྒྱབ་པར་བཟང་པོ་ཞིག་བབས་ཀྱི་མི་འདུག དྲག་པ་ཞིག་སུ་འདུག་གམ་ཞེས་དྲིས་པར། རྣམ་རྒྱལ་གྱིས་ཛེ་སྨད་རིན་པོ་ཆེ་ལ་རྒྱུད་པ་ཚོས་རེ་འདུན་ཆེན་པོ་ཞུ་གི་འདུག་གསུང་བྱུང༌། དེ་དངོས་གནས་རེད་ཡག་པོ་འདུག འོས་ངེས་ཐེག་ངེས་རེད་ལབ་པ་ཡིན། དེ་ནས་སྐུ་ཞབས་ཐུག་ཚར་བ་དང༌། ལམ་སེང་ཛེ་སྨད་རིན་པོ་ཆེ་རང་ལ་མོ་ཞིག་རྒྱབ་པ་ཡིན། མོ་བཟང་པོ་རྩ་བ་ནས་བབས་མ་བྱུང༌། ཁྱད་མཚར་བསམ་ནས་གཡུགས་བཞག་པ་ཡིན། ཡང༌། དེ་ནས་ཟླ་བ་གཅིག་གཉིས་ཕྱིན་པའི་རྗེས་ལ་རྒྱུད་པའི་བླ་མ་དབུ་མཛད་གཏན་མ་འཁེལ་ན་འགྲིགས་ཀྱི་མ་རེད་བསམ་ནས་ཡང་སྐྱར་མོ་ཞིག་རྒྱབ་པ་ཡིན། ཁྱོན་ནས་བཟང་པོ་ཞིག་བབས་མ་བྱུང༌། གང་ལྟར་མོ་ཚར་གསུམ་གྱི་ཐོག་ནས་ཛེ་སྨད་རིན་པོ་ཆེ་བཀག་སོང༌། དེ་བཀག་ཚར་ཙམ་ཞིག་ལ་དེབ་སེར་པོ་དེ་ཐོན་པ་རེད། དེ་ལྟར་ཡིན་དུས་ཙ་ན་ཛེ་སྨད་རིན་པོ་ཆེའི་ཆད་པ་ལྟ་བུ་རིང་པོར་མི་ཐོགས་པར་ཡོང་རྒྱུའི་རྒྱུ་ནུས་པ་མཐུ་ཅན་དུ་གྲུབ་ཚར་བ་ཡིན་སྟབས་མོ་ལ་མ་བབས་པ་འདྲ། མོ་ལ་བབས་ཏེ་རྒྱུད་སྟོད་བླ་མ་ཆགས་ཚར་ན་དེབ་ཐོན་ཏེ་རྙོག་ཁྲ་བྱུང་ན་ཡང་གནས་སྟངས་རྩ་བ་བརྟན་དུ་འགྲོ་གི་ཡོད། ཁྱད་མཚར་ཞིག་འདུག གཞན་དེ་ག་ཡིན། བཀྲ་ཤིས་བདེ་ལེགས་ཞེས་སྩལ།། །།