༄༅། །ཕྱི་ལོ་ ༡༩༨༦ ཟླ་ ༣ ཚེས་ ༣ ཉིན་ྋགོང་ས་ྋསྐྱབས་མགོན་ཆེན་པོ་མཆོག་ནས་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་བླ་མ་མཆོད་པའི་བཀའ་ཁྲིད་སྐབས་དོལ་རྒྱལ་སྐོར་སྩལ་བའི་བཀའ་སློབ།
དེ་ཡང་ལམ་རིམ་སྨོན་ལམ་ལས། སྐྱེས་བུ་གསུམ་གྱི་ལམ་གྱི་སྲུང་མའི་གཙོ། །མྱུར་མཛད་མགོན་དང་རྣམ་སྲས་ལས་གཤིན་སོགས། །ཞེས་གསུངས་པ་བཞིན། སྐྱེས་བུ་གསུམ་གྱི་སྲུང་མ་ཞེས་སྤྱན་རས་གཟིགས་དྲག་ཏུ་ཁྲོས་ནས་སྲུང་མའི་རྣམ་པར་བསྟན་པ་མགོན་པོ་ཕྱག་དྲུག་གཙོ་བོ་སྐྱེས་བུ་ཆེན་པོའི་སྲུང་མ་དང༌། ཚུལ་ཁྲིམས་གཙང་མ་སྲུང་རྒྱུ་དེ་རྣམ་སྲས་དགྱེས་པའི་རྒྱུ་མཆོག་ཡིན། མ་གཞི་འཇིག་རྟེན་ལས་འདས་པའི་སྲུང་མ་ཚང་མ་ཚུལ་ཁྲིམས་གཙང་མར་དགྱེས་ན་ཡང༌། རྣམ་སྲས་ལ་རང་གི་ཐུན་མོང་མ་ཡིན་པའི་རྒྱུ་མཚན་གཅིག་ཡོད། སྐྱེས་བུ་འབྲིང་གི་སྐབས་ལ་བསླབ་པ་གསུམ་དང༌། དེའི་ནང་ཚན་ནས་ཚུལ་ཁྲིམས་ཀྱི་བསླབ་པའི་ཉམས་ལེན་གཙོ་བོར་བསྟན་པ་ཡིན་དུས་སྐྱེས་བུ་འབྲིང་གི་སྲུང་མ་དེ་རྣམ་སྲས་ཡིན། སྐྱེས་བུ་ཆུང་ངུའི་སྐབས་སུ་ལས་འབྲས་དགེ་སྡིག་འདོར་ལེན་བྱེད་རྒྱུ་གཙོ་བོ་ཡིན་སྟབས། དགེ་སྡིག་ཤན་འབྱེད་དམ་ཉམས་སྲོག་གི་གཤེད། ། ཅེས་གསུངས་པ་བཞིན་དམ་ཅན་ཆོས་རྒྱལ་ནི་དགེ་སྡིག་ཤན་འབྱེད་དེ༑ སྐྱེས་བུ་ཆུང་ངུ་དང་ཐུན་མོང་བའི་སྲུང་མ་ཡིན་པ་བཅས་འདི་ལྟར་རེད། གང་ལྟར་རི་བོ་དགེ་ལུགས་པའི་ཕྱག་བཞེས་ལ་སྲུང་མ་བསྟེན་རྒྱུ་དེ་ཡང་ལམ་གྱི་འགྲོས་དང་མཐུན་པ་ཞིག་དགོས་པར་གསུངས་ཡོད། ཐུན་མོང་མ་ཡིན་པའི་རྗེ་རིན་པོ་ཆེའི་སྲུང་མ་བཤད་ན་མགོན་པོ་དང་ཆོས་རྒྱལ་གཉིས་ཡིན། དེ་ལྟར་ཡིན་སྟབས་རྒྱུད་སྨད་ལ་ཆོས་རྒྱལ་གཙོ་བོ་ཡིན་པས་རྟག་ཏུ་བརྐྱངས་བསྐུམས་མ་འདོན་པ་དང༌། རྒྱུད་སྟོད་ལ་རྟག་ཏུ་མགོན་པོའི་མྱུར་མཛད་མ་འདོན་པ་ཡིན།
འདི་གཉིས་དངོས་གནས་དགེ་ལུགས་པའི་བསྟན་པ་འཛིན་མཁན་གྱི་གྲྭ་ཚང་འདུས་སྡེ་གཙོ་བོ་གཉིས་ཡིན། དངོས་གནས་བཀའ་དྲིན་ཆེན་པོ་རེད་འདུག རྒྱུད་སྡེའི་འཆད་ཉན་གསང་བ་འདུས་པ་གཙོ་བོ་ཡིན། རྒྱུད་དེའི་འཆད་ཉན་དུས་ད་ལྟ་བར་དུ་རྐང་གྲངས་མ་ཆད་ཙམ་འཛིན་མཁན་དེ་རྒྱུད་པས་བཟུང་ཡོད། བླ་མ་སྐུ་སྒེར་གྱི་གསུང་ཆོས་རྒྱ་ཆེན་པོ་གནང་མཁན་ཚོའི་ནང་རྒྱུད་སྡེའི་ཁྲིད་གནང་མཁན་ཉུང་ཉུང་ཡིན། དེར་བརྟེན་རྒྱུད་རིམ་རྒྱུད་པའི་རྒྱུད་རིམ་ཁོ་རང་ལ་གཏུགས་རྒྱུ་ལས་དེ་མིན་ཁག་པོ་རེད། དུས་ད་ལྟ་ཡིན་ནའང་འདུས་པའི་འཆད་ཉན་གྱི་རྒྱུན་མ་བརླག་པ་དེ་རྒྱུད་པ་གྲྭ་ཚང་གཉིས་ཀྱི་བཀའ་དྲིན་ལྟ་བུ་ཡིན། ཧ་ཅང་ཡག་པོ་རེད་འདུག མགོན་ཆོས་གཉིས་དང༌། དེའི་ནང་ཚན་ནས་དགེ་ལུགས་པའི་ཐུན་མོང་མ་ཡིན་པ་ནི་ཆོས་སྐྱོང་ཡང་འཇམ་དབྱངས་གསུངས་པ་ལྟར་ཆོས་རྒྱལ་ཡིན། ཆོས་རྒྱལ་ཕྱི་ནང་གསང་གསུམ་གྱི་ནང་ནས་གཙོ་བོ་ནང་སྒྲུབ་ཡིན་ཞིང༌། རྗེ་རིན་པོ་ཆེས་བརྐྱངས་བསྐུམས་མ་མཛད་པ་ལྟར་ནང་སྒྲུབ་དེ་གཙོ་བོ་ཡིན། དེ་གསུམ་གཙོ་བོ་ཡིན། དགེ་ལུགས་པའི་སྲུང་མ་དེ་གསུམ་ལས་དགོས་པ་མེད། ངས་ཁ་ཤས་ལ་རྩེད་མོ་དང་བཅས་ཤོད་ཀྱི་ཡོད། རི་བོ་དགེ་ལུགས་པ་ལ་ཉི་མ་གཅིག་དམ་ཅན་ཆོས་རྒྱལ་གཤེགས་འདུག་ཟེར་ནས་བསྔོ་རྟེན་འབྱོར་གྱི་འདུག་ན། དགེ་ལུགས་པ་ལ་སྲུང་མ་གསར་པ་གཅིག་བཙལ་དགོས། དེ་ལྟར་མ་བྱུང་བར་དུ་དགེ་ལུགས་པ་ལ་ཆོས་སྐྱོང་གཞན་དག་དགོས་དོན་མེད་ཅེས་ངས་བཤད་ཀྱི་ཡོད།
འདི་ལ་གནད་འགག་ཡོད། ང་རང་ཚོའི་བླ་མ་བློ་བཟང་ཐུབ་དབང་རྡོ་རྗེ་འཆང་ལ་ཆགས་སྡང་ཉེ་རིང་ག་ལ་ཡོད། ཉེ་རིང་ཆགས་སྡང་རྩ་བ་ནས་མེད། ཡིན་ནའང་གདུལ་བྱའི་ངོས་ནས་ཁྱེད་ནི་བླ་མ། ཁྱེད་ནི་ཡི་དམ། ཁྱེད་ནི་མཁའ་འགྲོ་ཆོས་སྐྱོང་སྟེ། ཞེས་གསོལ་བ་བཏབ་ན་འཕྲིན་ལས་གཅིག་ཡོང་རྒྱུ་ཡོད། དེ་བཞིན་དུ་ཆོས་སྐྱོང་ཚོ་ལ་ཡིན་ན་ཡང་ས་བཅུའི་དབང་ཕྱུག་ཆོས་སྐྱོང་དེ་ཚོ་ལ་ཉེ་རིང་ཆགས་སྡང་ག་ནས་ཡོད། ང་རང་ཚོའི་ངོས་ནས་ཆོས་སྐྱོང་ཟེར་ནའང་ཁྱེད་རང་ཡིན། ཞི་བའི་འཕྲིན་ལས་སྒྲུབ་མཁན་ཡང་ཁྱེད་རང་ཡིན། རྒྱས་པའི་འཕྲིན་ལས་སྒྲུབ་མཁན་དེ་ཡང་ཁྱེད་རང་ཡིན། དབང་གི་འཕྲིན་ལས་སྒྲུབ་མཁན་དེ་ཡང་ཁྱེད་རང་ཡིན། དྲག་པོའི་འཕྲིན་ལས་སྒྲུབ་མཁན་དེ་ཡང་ཁྱེད་རང་ཡིན་ཞེས་བརྗོད་ན་ཕན་གྱི་རེད། རྗེ་རིན་པོ་ཆེས་བཀའ་བསྒོས་གཉེར་གཏད་ཡོད་མཁན་དང༌། རྗེ་བཙུན་ཤེས་རབ་སེངྒེ་མན་ཆད་ནས་བཟུང་ཐུན་མོང་མ་ཡིན་པའི་བཀའ་བསྒོས་གཉེར་གཏད་ཡོད་མཁན་གྱི་ཆོས་སྐྱོང་དེ་ཚོ་འཆར་ཅན་ལྟ་བུར་ཕྱིན། དེ་མིན་གྱི་ལྷ་གསར་པ་འདྲ་མིན་བསྟེན་ན་ཡག་པོ་མེད། བརྟག་དཔྱད་བྱེད་དགོས་པ་ཞིག་རེད་འདུག ལམ་སང་བཟང་པོ་གཡམ་རྒྱུགས་བྱེད་མི་རུང༌། བླ་མ་སྐྱེས་ཆེན་དམ་པ་དེ་འདྲས་ཐུན་མོང་མ་ཡིན་པའི་སོ་སོའི་སྒོས་ཀྱི་ཆོས་སྐྱོང་འདྲ་མིན་གནང་མཁན་དེ་འདྲ་ཡོད། དེ་སོ་སོའི་གསང་བ་བསམ་གྱིས་མི་ཁྱབ་པའི་རྣམ་ཐར་རེ་ཡོད་པས་བྱུས་གཏོགས་བྱེད་དགོས་པ་གང་ཡང་མི་འདུག དགེ་ལུགས་པ་སྤྱིའི་འགྲོ་སྟངས་ཀྱི་ཐོག་ནས་བཤད་ན། ད་ལྟ་ཞུས་པ་བཞིན་ཁ་ནས་སྐྱེས་བུ་གསུམ་གྱི་སྲུང་མ་ཞེས་ལམ་སྤྱིའི་འགྲོ་སྟངས་དང་མཐུན་ལུགས་མང་པོ་ཞིག་ཤོད་བཞིན་དུ་དངོས་སུ་ལག་ལེན་དུ་སྐྱེལ་སྐབས་ཤར་ནུབ་གོ་འཛོལ་བའི་ལྟ་བུ་བྱས་ན་ཡག་པོ་མེད། དེའི་སྐོར་ང་ལ་སྐད་ཆ་བཤད་རྒྱུ་མང་པོ་ཡོད། ང་ལ་ཉམས་མྱོང་མང་པོ་ཞིག་བྱུང༌། ལོ་མང་རིང་བརྟག་དཔྱད་བྱས་ནས་ང་རང་ལ་ཉམས་མྱོང་མང་པོ་བྱུང་བའི་ཐོག་ནས་སྐད་ཆ་བཤད་ཀྱི་ཡོད། གང་ལྟར་སྐྱེས་བུ་གསུམ་གྱི་སྲུང་མ་དེ་གཙོ་བོ་ཡིན།
དེ་ནས་རྒྱུད་ཀྱི་སྐབས་ནས་དངོས་སུ་བསྟན་པའི་སྲུང་མ་མགོན་པོ་ཕྱག་བཞི་དེ་གཙོ་བོ་ཡིན། མགོན་པོ་གུར་ དང༌། མགོན་པོ་ཞལ། གུར་ཞལ་གྱི་བཀའ་སྡོད་གྲས་ལ་ལྕམ་སྲིང་སླེབས་ཡོང་གི་ཡོད། ལྕམ་སྲིང་དྲེགས་པའི་རྗེ་བོ་ལྟ་བུ་ཡིན་ཞེས་པ་ལྟར་ཡིན་ཡང་དྲེགས་པའི་ཁོངས་སུ་མེད། མ་གཞི་ང་རང་ཚོ་མིའི་རྒྱུད་ཚོད་ཐིག་རྒྱུ་དེ་ཕྱིར་མི་ཟློག་པའི་རྟགས་ཀྱི་སྐབས་ནས་རྒྱུད་ཚོད་དཔག་རྒྱུ་ཡོད། འོན་ཀྱང་མིའི་རྒྱུད་ཚོད་ཐིག་རྒྱུ་ཁག་པོ་རེད། ལྷག་པར་ལྷའི་རྒྱུད་ཚོད་ཐིག་རྒྱུ་དེ་ལས་ཀྱང་ཁག་པ་ཡོད། དེར་བརྟེན་སྲུང་མ་དེ་ཚོའི་གྲས་ཁ་ཤས་འཇིག་རྟེན་པ་རེད་ཟེར་ནས་མར་བཞག་དགོས་པ་ལྟ་བུ་དང༌། ཡང་ཁ་ཤས་འཇིག་རྟེན་ལས་འདས་པ་རེད་ཟེར་ནས་ཡར་བཞག་དགོས་པ་དེ་ཚོ་ཁག་པོ་རེད། རྒྱུ་མཚན་གང་འདྲ་ཞིག་གི་ཐོག་ལ་ཁུངས་བཅོལ་ནས་གསུང་གི་ཡོད་དམ་མི་ཤེས།
དཔལ་ལྡན་ལྷ་མོ་རི་བོ་དགེ་ལུགས་པའི་ཐུན་མོང་མ་ཡིན་པའི་སྲུང་མ་ནི་རེད་མི་འདུག རྗེས་ཡབ་སྲས་སྐབས་དམིགས་བསལ་གྱི་འབྲེལ་བ་གང་ཡང་ཡོད་ས་མ་རེད། ཐམས་ཅད་མཁྱེན་པ་དགེ་འདུན་གྲུབ་པས་དཔལ་ལྡན་ལྷ་མོར་ཐུན་མོང་མ་ཡིན་པའི་འབྲེལ་བ་བྱུང༌། དགེ་འདུན་གྲུབ་པས་བཀྲ་ཤིས་ལྷུན་པོ་ལ་ལྷ་མོ་དེ་གཙོ་བོ་གནང༌། ཐམས་ཅད་མཁྱེན་པ་དགེ་འདུན་རྒྱ་མཚོ་དེའི་ཡང་སྲིད་ཡིན་དུས་ལྷ་མོ་གཙོ་བོ་གནང༌། དགེ་འདུན་རྒྱ་མཚོ་འབྲས་སྤུངས་སུ་ཕེབས་ནས་འབྲས་སྤུངས་ཁྲི་པ་གནང་བའི་མཇུག་ཏུ་སེ་རའི་ཁྲི་པའང་གནང་སྟེ། སེར་འབྲས་ཀྱི་ཁྲི་པ་གནང་ནས་བཞུགས་དུས་འབྲས་སྤུངས་ལ་ལྷ་མོ་གཙོ་བོ་བྱེད་རྒྱུ་དེ་ཆགས་པ་ཡིན་ས་རེད། དུས་ཕྱིས་སེར་འབྲས་ནས་ཡན་ལག་དང༌། ཉིང་ལག་གི་ཚུལ་དུ་བུ་དགོན་ལྟ་བུ་མདོ་སྟོད་སྨད། དབུ་གཙང་ས་ཁུལ་མང་པོ་ཞིག་ཏུ་ཁྱབ་པ་ལ་བརྟེན་ནས་དཔལ་ལྡན་ལྷ་མོ་དགེ་ལུགས་པའི་དགོན་པ་མང་པོ་གཅིག་གི་སྲུང་མར་གྱུར། འབྲས་སྤུངས་དང་འབྲེལ་བ་ཡོད་པའི་ཆ་ནས་གནས་ཆུང་རྡོ་རྗེ་གྲགས་ལྡན་ཡང་དེ་བཞིན་བྱས་ནས་དགེ་ལུགས་པའི་དགོན་པ་མང་པོ་ཞིག་གི་སྲུང་མར་གྱུར་པ་རེད། འབྲས་སྤུངས་དང་ཐུན་མོང་མ་ཡིན་པའི་འབྲེལ་བ་ཡོད་པའི་རྒྱུ་མཚན་གྱི་ཐོག་ནས་བཀྲ་ཤིས་འཁྱིལ་དང༌། སྐུ་འབུམ། བཀྲ་ཤིས་འཁྱིལ་གྱི་ཁོངས་གཏོགས་དགོན་པ་མང་པོ་དང༌། སྐུ་འབུམ་གྱི་འབྲེལ་ཡོད་དགོན་པ་མང་པོ་ལ་དེ་འདྲའི་འབྲེལ་བ་བྱུང་འདུག གང་ལྟར་ཡང་སྙིང་འདི་ཚོ་གནས་ཚུལ་ཐ་དད་ཡིན་པས་བཤད་དགོས་པ་དང་གནད་མི་འདུག དཔལ་ལྡན་ལྷ་མོ་དང༌། དེ་འདྲའི་འཇིག་རྟེན་ལས་འདས་པའི་སྲུང་མ་དེ་ཚོ་ཚོགས་ཞིང་ནང་ལ་སོ་སོའི་བསྟེན་པའི་སྲུང་མ་གལ་ཆེ་བ་རྣམས་འདི་འདྲ་བྱས་ཏེ་བཀོད་པ་རེད།
ཐམས་ཅད་བཀོད་དགོས་པའི་རྒྱུ་མཚན་ཅང་མེད། ཚོགས་ཞིང་གི་གྲས་ལ་འཇིག་རྟེན་པའི་ལྷ་བཀོད་ན་སྐྱབས་འགྲོ་སྟོངས་པའི་ཉེན་ཁ་ཡོད་པ་ཆེས་ནན་པོ་བྱས་ཏེ་ྋརྒྱལ་མཆོག་བསྐལ་བཟང་རྒྱ་མཚོ་དང༌། ཕུར་ལྕོགས་ངག་དབང་བྱམས་པ་སོགས་ཀྱིས་ཡང་ཡང་གསུང་གི་ཡོད་ཅེས་ཁྲིད་ཡིག་གནང་གསལ་ཡོད་པས་འཇིག་རྟེན་པའི་སྲུང་མ་ཚོགས་ཞིང་ནང་ལ་བཀོད་རྒྱུ་མེད། དཔེར་ན། རྒྱལ་པོ་སྐུ་ལྔ་ལྟ་བུ་ད་ལྟ་ཞུས་པ་བཞིན་ངའི་ངོས་ནས་ཆ་བཞག་ན་ཐུན་མོང་མ་ཡིན་པ་དང༌། དགའ་ལྡན་ཕོ་བྲང་གི་ཐུན་མོང་མ་ཡིན་པའི་སྲུང་མ་ཆགས་ཡོད།
ཡིན་ནའང་འཇིག་རྟེན་དྲེགས་པའི་ཚུལ་བཟུང་ནས་འཇིག་རྟེན་དྲེགས་པའི་ཁོངས་སུ་ཡོད་པ་ཡིན་དུས་གལ་ཏེ་ཚོགས་ཞིང་ནང་བཀོད་ན་སྐྱབས་འགྲོའི་བསླབ་བྱ་དང་འགལ་ཡོང་གི་རེད། ཤེས་སོང་ངམ། དཔེར་ན། རྒྱལ་པོ་སྐུ་ལྔ་ལྟ་བུ་ངེས་པ་དོན་ལ་ྋརྒྱལ་བ་རིགས་ལྔའི་རྣམ་སྤྲུལ་ཡིན་ཞེས་པ་ལྟར་ཏན་ཏན་ཡིན་གྱི་རེད། ཐུན་མོང་གདུལ་བྱའི་སྣང་ངོར་དགོས་པ་རྒྱུ་མཚན་དང་འབྲེལ་བའི་ཐོག་ནས་དྲེགས་པའི་ཚུལ་ལ་བཞེངས་པ་ཡིན་དུས་ང་རང་ཚོའི་འཇིག་རྟེན་ཡོངས་གྲགས་ཀྱི་བསྟེན་ཚུལ་དེ་དྲེགས་པ་སྤྱིར་བཏང་གཞིར་བཞག་ཐོག་ནས་བསྟེན་དགོས་པ་ལས་ངེས་དོན་གཅིག་རེད་ཟེར་ནས་དེའི་ཐོག་ནས་མགོ་འབུལ་ལུས་འབུལ་ཞུ་རྒྱུ་མེད། དེ་འདྲ་ཡིན་དུས་དེ་དང་དེ་འདྲའི་དྲེགས་པའི་གྲས་ལྷ་འདྲ་མི་འདྲ་དེ་ཚོའི་གྲས་ཀྱང༌། དེ་དེ་བཞིན་བྱས་ནས་གསོལ་འདེབས་ཞུ་སྟངས་འཕྲིན་ལས་བཅོལ་བ་ལྟ་བུ་བྱ་རྒྱུ་རེད་མ་གཏོགས་མགོ་འབུལ་ལུས་འབུལ་བྱས་ན་ཡག་པོ་ཡོད། བཟང་པོ་གཡམ་རྒྱུགས་འདི་འདྲའི་ཐོག་ནས་ཀྱང་སྐྱོན་ལྷགས་པའི་ཉེན་ཁ་ཡོད།
ལྷག་པར་བོད་སྤྱི་དང་འབྲེལ་བའི་རྒྱུ་མཚན་གྱི་ཆ་ནས། དེ་རིང་འདིར་ཁྱེད་རང་ཚོ་བོད་ནས་འབྱོར་བ་གང་ཙམ་ཡོད། བར་ལམ་དོལ་རྒྱལ་གྱི་སྐོར་ལ་ངས་རྙོག་ཁྲ་མང་པོ་བཤད་དགོས་པའི་གནས་ཚུལ་ཆགས་པ་རེད། རྒྱ་གར་ལ་ཡོད་པ་ཚོས་ཤེས་གསལ་ཡིན་པས་ངས་འདིར་བསྐྱར་བཤད་བྱེད་དགོས་དོན་མི་འདུག སྐད་ཆ་རྙིང་པ་རེད། ང་རང་ཡང་བཤད་འདོད་གང་ཡང་མི་འདུག ཡིན་ན་ཡང་ྋརྒྱལ་བ་རིན་པོ་ཆེས་འཇོན་གྱི་མི་འདུག་སྟེ༑ བོད་སྤྱི་པའི་དོན་དག་གི་འགན་ངའི་ཐོག་ཏུ་བབ་ཡོད་པ་ལ་གཞན་སུ་གཅིག་གིས་གཡར་སྐྱོར་གཡོན་སྐྱོར་བྱེད་མཁན་མི་འདུག སྤྱི་པའི་འགན་ང་ལ་འཁྲི་དུས་དེ་ལ་དཔགས་པས་ཁ་ཤས་ལ་ཁ་ཕོག་སྣ་ཕོག་འགྲོ་གི་ཡོད་ཀྱང་སྤྱི་པའི་དོན་དག་ལ་མ་ལབ་ན་འགྲིགས་ཀྱི་མི་འདུག གང་ལྟར་བར་ལམ་དོལ་རྒྱལ་ལམ་རྒྱལ་ཆེན་ཤུགས་ལྡན་སྐོར་ལ་རྙོག་ཁྲ་མང་པོ་ཞིག་བྱུང་བ་རེད།
རྒྱ་གར་ལ་སྡོད་མཁན་ཁྱེད་རང་ཚོས་གནས་ཚུལ་ཤེས་ཀྱི་ཡོད་པས། ལབ་དགོས་དོན་གང་ཡང་མི་འདུག བོད་ནས་ཡོང་བ་ཁྱེད་རང་ཚོས་འདིར་གང་ལྟར་བརྟག་དཔྱད་མ་བྱས་པར་རི་བོ་དགེ་ལུགས་པའི་ཆོས་སྐྱོང་རེད་ཟེར་ནས་གཡམ་རྒྱུགས་བྱས་པ་ཡིན་ན་བོད་བསྟན་སྲིད་སྤྱིའི་ཆ་ནས་ཡག་པོ་མེད། དེ་ལ་ཏན་ཏན་གཅིག་འདུག དེ་ཡིན་པའི་རྒྱུ་མཚན་རྙོག་པོ་མང་པོ་མི་ཤེས་ཀྱང༌། ད་ལྟ་བརྗོད་པ་བཞིན་དྲེགས་པའི་རིགས་དེ་ཐུན་མོང་གདུལ་བྱའི་སྣང་ངོ་ལ་ག་རེ་ཤར་བ་དེ་གཞིར་བཞག་ཐོག་ནས་བསྟེན་དགོས། གསང་བ་བསམ་གྱིས་མི་ཁྱབ་པའི་གནས་ཚུལ་དེ་ང་ཚོའི་སྤྱོད་ཡུལ་མ་རེད། ང་རང་ཚོའི་རྒྱུད་ལ་ཐབས་ཤེས་ཀྱི་རྟོགས་པ་རིམ་པས་སྐྱེས་ནས་གསང་བ་བསམ་གྱིས་མི་ཁྱབ་པའི་དོན་དེ་མངོན་དུ་བྱེད་ཐུབ་པ་ཞིག་དང༌། སྤྱོད་ཐུབ་པ་ཞིག་དང༌། སྤྱོད་ནུས་པ་ཞིག་ཏུ་སོ་སོའི་རྒྱུད་ཚོད་སླེབས་སོང་ན་གནས་ཚུལ་ཐ་དད་རེད། དེ་འདྲའི་གསང་བ་བསམ་གྱིས་མི་ཁྱབ་པའི་གནད་དོན་དེ་རང་གི་སྤྱོད་ཡུལ་དུ་གྱུར་མ་ཐུབ་པའི་རིང་ལ་ང་ཚོས་ཐུན་མོང་གདུལ་བྱའི་སྣང་ངོའི་གྲགས་ཚོད་དེའི་རྗེས་སུ་འབྲངས་ནས་འགྲོ་དགོས།
དེའི་ཐོག་ནས་བཤད་ན། རྒྱལ་ཆེན་ཤུགས་ལྡན་དང་པོའི་ཡོང་ཁུངས་བཤད་ཡོང་དུས། ྋགོང་ས་ལྔ་པ་ཆེན་པོ་དང་མ་འགྲིགས་པར་རྒྱལ་ཆེན་ཤུགས་ལྡན་བྱུང་བ་མ་གཏོགས། ྋགོང་ས་ལྔ་པ་ཆེན་པོ་དང་འགྲིགས་དྲགས་ནས་རྒྱལ་ཆེན་ཤུགས་ལྡན་བྱུང་བ་ཞིག་མ་རེད། ྋགོང་ས་ལྔ་པ་ཆེན་པོས་དགའ་ལྡན་ཕོ་བྲང་དང་པོ་འཛུགས་མཁན་དེ་ཡིན། འདི་འདྲའི་ཐོག་ནས་དཔེར་ན་ད་ལྟའང་བོད་ནང་བོད་མི་མང་པོ་ཞིག་གིས་ྋརྒྱལ་བ་བསྟན་འཛིན་རྒྱ་མཚོ་ཞེས་ང་ལ་རེ་ལྟོས་ཆེན་པོ་བྱེད་ཀྱི་ཡོད། ངས་འཇོན་གྱི་ཡོད་པ་མ་རེད། དངོས་གནས་ངས་དེ་རིང་ཁ་སང་བོད་སྤྱི་པའི་དོན་དག་གི་གནས་ཚུལ་གཉན་འཕྲང་ཅན་དང༌། འགག་དོག་པོ་འགན་ཆེན་པོ་འདི་འདྲ་ཞིག་ཁྱོགས་མཁན་མི་གཅིག་ཆགས་མེད། ཡིན་ན་ཡང་སོ་སོའི་ཚེ་སྔོན་མའི་ལས་དང་སྨོན་ལམ་དང༌། བོད་སྤྱི་པའི་ཐུན་མོང་མ་ཡིན་པའི་ང་རང་ཚོའི་ལས་འབྲེལ་གྱི་ཐོག་ནས་ང་ཨ་མདོའི་ཕྲུ་གུ་ལུང་པ་རྒྱུས་མེད་ཁུག་ཀྱོག་གཅིག་ནས་ྋརྒྱལ་བ་རིན་པོ་ཆེའི་ཡང་སྲིད་གྲས་ལ་སླེབས་པ་རེད། ང་རང་སོ་སོའི་སྒེར་གྱི་ཉམས་ལེན་གྱི་གནས་སྟངས་ག་རེ་ཡིན་རུང་མིན་རུང༌། སྤྱིའི་ཐོག་ནས་ང་ྋརྒྱལ་བ་རིན་པོ་ཆེའི་ཁྲི་དེའི་སྒང་ལ་བསྡད་ཡོད་པ་དང༌། ྋགོང་ས་ལྔ་པ་ཆེན་པོའི་ཁྲི་དེའི་སྒང་ལ་བསྡད་དེ་ྋགོང་ས་ལྔ་པ་ཆེན་པོའི་མཇུག་མཐུད་ཀྱི་ཡོད་པ་རེད། སྤྲུལ་སྐུ་གྲགས་པ་རྒྱལ་མཚན་དང༌། གཟིམ་ཁང་གོང་དགའ་ལྡན་ཕོ་བྲང་དང་མ་འགྲིགས་པའི་གླེང་གཞི་འདིའི་ཐོག་ནས་བྱུང་བ་ཡིན་དུས་ཕྱི་ནང་རྟེན་འབྲེལ་གྱི་གནད་ཀྱིས་མ་འགྲིགས་པ་གཅིག་ཡོང་གི་ཡོད་ས་རེད། ངས་ཟུར་དུ་རྒྱལ་ཆེན་ཤུགས་ལྡན་ལ་ཡག་ཤག་ཉེས་ཤག་བཤད་དགོས་དོན་གང་ཡང་མེད། ང་རང་ལ་ཆ་བཞག་ནའང་རྒྱལ་ཆེན་ཤུགས་ལྡན་ལ་འབྲེལ་བ་བྱུང་ཡོད། ཡིན་ནའང་དུས་ཕྱིས་བསྟན་སྲིད་སྤྱིའི་གནས་ཚུལ་གཅིག་ལ་ཐུག་ཡོང་དུས་མ་བདེ་བ་གཅིག་ཆགས་ཡོང་གི་འདུག བསྟན་སྲིད་སྤྱི་ཙམ་མ་ཟད་པའི་རི་བོ་དགེ་ལྡན་པའི་གནས་ཚུལ་ལ་ཆ་བཞག་ཀྱང་དམ་ཅན་ཆོས་རྒྱལ་གྱི་ཐོག་ནས་ཕྲན་བུ་འགྲིགས་ཀྱི་མེད་པ་འདྲ། དེར་བརྟེན་ང་རང་ཚོ་ཐ་མལ་པའི་ཐུན་མོང་གདུལ་བྱའི་སྣང་ངོའི་འགྲོ་སྟངས་གཞི་ལ་བཞག་པའི་ཐོག་ནས་བྱེད་སྟངས་ཤེས་པ་ཞིག་དགོས་ཀྱི་ཡོད།
རི་བོ་དགེ་ལུགས་པས་ཐ་སྙད་ཚད་གྲུབ་ཟེར་བ་དེ་གལ་ཆེན་པོ་བརྩི་བ་རེད། ཐ་སྙད་ཚད་གྲུབ་ཟེར་བ་དེ་སེམས་ཅན་ལས་དང་པོ་བའི་སྣང་ཚུལ་གྱི་བློ་དེ་གལ་ཆེན་རྩི་གི་ཡོད། རྩི་དགོས་པའི་རྒྱུ་མཚན་དེ་ལས་རྒྱུ་འབྲས་ཀྱི་བླང་དོར་གྱི་དོན་ལ་གཏུགས་ནས་གསུངས་ཡོད། རྫོགས་ཆེན་གྱི་ལྟ་བ་བཤད་ཡོང་རྒྱུ་དེ་འབྲས་བུའི་དུས་ཀྱི་སྐོར་གཙོ་བོ་བྱས་ནས་གསུང་གི་ཡོད། ས་སྐྱའི་གསལ་སྟོང་ཟུང་འཇུག་གི་འཁོར་འདས་དབྱེར་མེད་ཀྱི་ལྟ་བ་གསུང་རྒྱུ་དེ་ལམ་གྱི་གནས་སྐབས་ཀྱི་རྣལ་འབྱོར་པའི་ཉམས་ལེན་གྱི་སྟོབས་ཀྱིས་འཆར་ཚུལ་གཙོ་བོར་གསུངས་ཡོད། འཇམ་མགོན་བླ་མ་ཙོང་ཁ་པ་ཆེན་པོས་རི་བོ་དགེ་ལྡན་པས་ཐ་སྙད་ཚད་གྲུབ་འཇོག་རྒྱུ་དེ་ང་རང་ཚོ་ཐ་མལ་པའི་སེམས་ཅན་གྱི་གནས་སྐབས་ཀྱི་བློ་ལ་འཆར་ཚུལ་རྣམས་གཙོ་བོ་བྱས་ནས་གསུངས་ཡོད། དེ་འདྲའི་གསུང་རྒྱུན་གཅིག་ཡོད་པ་དེ་ལ་ཕྲན་ཙམ་བསམ་བློ་གཏོང་ས་ཞིག་ཡོད། གང་ལྟར་དེ་འདྲའི་གནས་ཚུལ་རྣམས་ང་ཚོས་ཤེས་དགོས་རྒྱུ་པ་ཞིག་རེད་འདུག ཤེས་སོང་ངམ། མི་སྒེར་སོ་སོའི་གནས་ཚུལ་ཐ་དད་རེད། ཆོས་བྱེད་དང་མི་བྱེད་སོ་སོ་རང་དབང་རེད། དེར་བརྟེན་སྲུང་མ་ག་འདྲ་བསྟེན་དང་མ་བསྟེན། ཡི་དམ་གང་འདྲ་བསྟེན་དང་མ་བསྟེན་ཟེར་རྒྱུ་དེ་སོ་སོའི་རང་དབང་ཡིན་པ་ལས། དེར་སུ་གཅིག་གིས་རྙོག་ཁྲ་བཤད་མཁན་མེད། བོད་སྤྱི་པའི་དོན་དག་དང༌། བོད་བསྟན་སྲིད་ཀྱི་དོན་དག་ལ་ཐུག་ཡོང་དུས། དཔལ་ལྡན་ལྷ་མོ་གཙོ་བོ་ཡིན། དེ་དང་འབྲེལ་བའི་རྒྱལ་པོ་སྐུ་ལྔ། བསྟན་མ་བཅུ་གཉིས་དེ་ཚོ་གཙོ་བོ་ཡིན། རི་བོ་དགེ་ལུགས་པ་སྤྱི་ལ་ཐུག་ཡོང་དུས་གཙོ་བོ་དམ་ཅན་ཆོས་རྒྱལ་དང༌། མགོན་པོ། དེའི་ནང་ནས་གཙོ་བོ་དམ་ཅན་ཆོས་རྒྱལ་རེད། དེ་ཡང་ཤེས་དགོས་པ་རེད།
ཁྱེད་ཚོ་ཨམ་ཅོག་ཚ་གི་མི་འདུག་གམ། གང་ལྟར་སྲུང་མའི་འགྲོ་སྟངས་ད་ལྟ་ཞུས་པ་བཞིན་ཚོགས་ཞིང་གི་གྲས་ལ་འཇིག་རྟེན་པའི་དྲེགས་པ་བཀོད་ན་ཉེན་ཁ་ཆེན་པོ་ཡོད། ངའི་གོ་ཐོས་གཅིག་ལ། ཁམས་ཕྱོགས་ས་ཆ་ཁ་ཤས་ལ་གཤིན་པོའི་རྗེས་འཇུག་ཆེད་རྒྱལ་ཆེན་ལ་འབུམ་ཚོགས་འབུལ་མཁན་དེ་འདྲ་ཡོང་གི་ཡོད་ས་རེད། གཅིག་བྱས་ན་དགོས་པ་རྒྱུ་མཚན་ཆེན་པོ་ཡོད་ལས་ཆེ། བསྟན་པ་སྤྱིའི་རྣམ་གཞག་གི་འགྲོས་དང་བསྟུན་ནས་བཤད་ན་དེ་ཡག་པོ་མ་རེད། ཡང་ངས་དག་སྐྱེལ་ཞུ་དགོས་པ་གཅིག་ལ། འདི་ཚོའི་གྲས་ཀྱི་རྙོག་ཁྲ་དེའི་སྐོར་ལ་ངས་ཐོག་མཐའ་བར་གསུམ་ལ་ང་རང་གི་བློ་རྣམ་དཔྱོད་ཆེ་མདོག་ཁ་པོ་བྱས་ནས་བཤད་པ་དང་བསྟན་པ་གང་ཡང་མེད། འདི་ཚོ་ཚང་མར་མོ་བརྒྱབ་པ་དང༌། ཟན་བརྟག་བསྒྲིལ་བ་སོགས་ཏན་ཏན་བྱས་ཏེ་ཐག་བཅད་པ་ཞིག་ཡིན། གཞན་དག་ཕར་ཞོག་དེ་རིང་འདིར་བཀའ་ཆོས་ཚོགས་པ་འདིའི་སར། དེའི་སྐོར་འགྲེལ་བཤད་རྒྱག་དང་མི་རྒྱག་ཀྱང་ངས་མོ་བརྒྱབ་ནས་ཐག་བཅད་པ་ལས་ངས་ཕོ་རྒོད་མདོག་ཁ་པོ་བྱས་ནས་བརྗོད་པ་གང་ཡང་མིན། ཤེས་སོང་ངམ།
དྲེགས་པ་དེ་ཚོའི་གྲས་དང༌། དེ་བཞིན་ཡུལ་ལྷ་གཞི་བདག་དེ་ཚོའི་གྲས་བསྟེན་མི་ཆོག་ཟེར་བ་མིན། དེ་ཚོའི་གྲས་བསྟེན་གསོལ་ཆོག་གི་རེད། དཔེར་ན་ནང་པ་ནང་ཚགས་གྲོགས་པོ་དེ་འདྲར་ལས་བཅོལ་བ་ལྟ་བུ་བྱས་ནས། དཔེར་ན་སོ་སོར་མི་ལག་གཅིག་བསྒྲིགས་དེ་ལ་ལྟོ་ཆས་སྤྲད་དེ། ཁྱེད་རང་དེ་རིང་ང་ལ་རོགས་བྱེད་རོགས་ཞེས་བརྗོད་པ་ལྟར་བྱས་ན་འགྲིགས། དེ་སོ་སོའི་བླ་མ་བསྟེན་པ་དེ་འདྲ་གང་ཡང་མིན། སྐྱབས་ལ་བསྟེན་པ་གང་ཡང་མིན། གྲོགས་པོ་མི་ལག་བསྒྲིགས་པ་ཡིན། དེ་བཞིན་དུ་དྲེགས་པ་དེ་ཚོའི་གྲས་སོ་སོ་སྒེར་གྱིས་བསྟེན་གྱི་ཡོད་པ་དང༌། འབྲེལ་བ་ཡོད་པ་དེ་འདྲ་ཡིན་ན། དེ་ཚོར་གཏོར་མ་སྦྱིན། འཕྲལ་སེལ་གྱི་འཕྲིན་ལས་བཅོལ་ན་དེ་ལྟར་བྱེད་ཆོག་གི་རེད། ང་རང་ཚོ་བོད་ལ་དུས་ཕྱིས་བསངས་གསོལ་མང་པོ་བྱེད་ཀྱི་འདུག་པ་དེ་ཡག་པོ་རེད། ནང་པ་སངས་རྒྱས་པའི་ཆོས་ངོ་ཐོག་གཏིང་ཟབ་པོའི་ཐོག་ནས་སྐད་ཆ་བཤད་ན་བསངས་གསོལ་ཟེར་རྒྱུ་དེ་ཚོའི་གྲས་དེ་འདྲ་ཞིག་རེད། ཧ་ཅང་མནངས་ཆེ་རྒྱུ་གང་ཡང་མེད། ཡིན་ན་ཡང་ད་ལྟ་དང་འབྲེལ་བའི་གནས་སྐབས་ལ་བསངས་ཞེས་པའི་ཚིག་དེའི་གོ་དོན་མ་དག་པ་བསངས་བའི་གོ་བ་ཞིག་ཡོད་པ། འདི་འདྲའི་ཐོག་ནས་གང་ལྟར་མི་གཙང་བའི་གྲིབ་དང༌། བཙོག་གྲིབ་དང༌། ཉམས་གྲིབ། འཁོན་གྲིབ། དམ་གྲིབ་ཟེར་རྒྱུ་དེ་གྲས་བསངས་པ་ལ་ཁོ་རང་ཁོ་རང་གི་རྫས་ཀྱི་ནུས་པ་གཅིག་ཡོད་ས་རེད། སྤྱིར་བཏང་ང་རང་ཚོའི་གྱོན་གོས་དང༌། ཁང་པའི་ནང་ལ་དྲི་མ་ངན་པ་ཞིག་ཡོད་པ་ཡིན་ན་བསངས་གཅིག་བདུག་ན་དྲི་མ་ངན་པ་བསངས་ཐུབ་ཀྱི་ཡོད་པ་ལྟར། འདི་འདྲའི་རྟེན་འབྲེལ་གྱི་ཆོས་ཉིད་ཀྱིས་གང་ལྟར་ནང་གི་དམ་གྲིབ། ཉམས་གྲིབ། འཁོན་གྲིབ། བཙོག་གྲིབ་ཟེར་བ་དེ་འདྲ་ཡོད་ན་བསངས་དེ་ཚོའི་གྲས་ཏིང་ངེ་འཛིན་གྱིས་བྱིན་གྱིས་བརླབས། མོས་པ་བྱས་ནས་ཡོང་དུས་ཕན་གྱི་ཡོད་ས་རེད། བར་སྐབས་བོད་ལ་དངོས་གནས་དམ་གྲིབ་དང༌། ཉམས་གྲིབ། འཁོན་གྲིབ་ཟེར་བ་དེ་ཚོ་རྩ་བ་ནས་ལུང་པར་མ་ཤོང་བ་ལྟ་བུ་བྱུང་ཡོད།
དེར་བརྟེན་བསངས་གསོལ་བྱེད་རྒྱུ་ཕན་ཐོགས་ཡོང་རྒྱུ་རེད། ལྷག་དོན་རྒྱ་མིའི་ངོར་བོད་པའི་ཆོས་དད་ཀྱི་རྣམ་པ་མཚོན་པ་ཞིག་ཆགས་ཡོད། ཡག་པོ་འདུག ནང་པ་སངས་རྒྱས་པའི་ཆོས་ཀྱི་གཏིང་རིང་པོའི་སྐད་ཆ་བཤད་ན་ལྷ་རྒྱལ་ལོ་བརྗོད་པ་གཅིག་པུས་འགྲིགས་ཀྱི་མ་རེད། ང་ཚོ་ལ་དྭགས་ལ་ཕྱིན་པའི་སྐབས་སུ་ཡུལ་མི་ཚོས་ཀི་ཀཱི་བསྭོ་བསྭོ་ལྷ་རྒྱལ་ལོ་ཞེས་བརྗོད་པ་རེད། དེ་དུས་སྐད་ཆ་བྱུང༌། ལྷ་དེ། ཐུབ་དབང་ལྷ་ཡི་ལྷ་ལ་ཕྱག་འཚལ་ལོ། །ཞེས་པའི་ལྷ་དེ་ལ་གོ་ན་ཡག་པོ་འདུག གཞན་ྋརྒྱལ་བ་རིན་པོ་ཆེ་ང་དགེ་སློང་གཅིག་ཡིན་པ་ལ། བཙན་གཅིག་ཡོང་གི་ཡོད་པ་ལྟ་བུ། ཀི་ཀྭི་བསྭོ་བསྭོ། ལྷ་རྒྱལ་ལོ། ལྷ་རྒྱལ་ལོ་ཞེས་བརྗོད་ན་འཇུག་པོ་མ་རེད། སྔོན་མ་ཁྲི་བྱང་རིན་པོ་ཆེ་ལ་གསུངས་རྒྱུ་འདུག རྭ་སྒྲེང་ཁུལ་ལ་ཉིན་གཅིག་ལྷ་གཅིག་ཕེབས། ལྷ་དེ་ལ་ལྷ་ག་རེ་ཡིན་ཞེས་དྲིས་པས། ང་དགེ་བཤེས་པོ་ཏོ་བ་ཡིན་ཞེས་བརྗོད་པ་རེད་ཟེར། ལྷ་ཆས་ནི་བཙན་ཞྭ་གྱོན་ཡོད། བཙན་ཞྭ་གྱོན་མཁན་ཕུ་དང་ཕུ་ཟེར་མཁན་ཁོ་རང་དགེ་བཤེས་པོ་ཏོ་བ་ཡིན་ཟེར་གྱི་ཡོད་པ་རེད། ཅེས་བཀའ་སྩལ།། །།
