དང་པོ། ཕྱི་ནང་གི་ལྟ་བའི་ཁྱད་པར་དང༌། ཆོས་ཀྱི་ཕན་ཡོན།
སངས་རྒྱས་བཅོམ་ལྡན་འདས་ཀྱི་ཆོས་འདི་ལོ་ཉིས་སྟོང་ལྔ་བརྒྱའི་གོང་དུ་སྟོན་པ་བཀའ་དྲིན་ཅན་ཉིད་རྒྱ་གར་འཕགས་པའི་ཡུལ་དུ་སྐུ་བལྟམས་ཤིང༌། རིམ་བཞིན་ཁྱིམ་ནས་ཁྱིམ་མེད་པར་རབ་ཏུ་བྱུང༌། མཐར་མངོན་པར་རྫོགས་པའི་སངས་རྒྱས་ཏེ་ཆོས་ཀྱི་འཁོར་ལོ་རིམ་པར་བསྐོར་བར་མཛད། དེ་རྗེས་སྟོན་པའི་བསྟན་པ་འཛིན་མཁན་ཡོངས་གྲགས་བསྟན་འཛིན་གྱི་སྐྱེས་ཆེན་ཀུན་གྱི་གཙུག་ཕུད་ལྟ་བུ་བསྟན་པ་འདི་ལ་སྟོན་པ་གཉིས་པ་ལྟར་གྲགས་པ་དཔལ་མགོན་འཕགས་པ་ཀླུ་སྒྲུབ་དང༌། དེ་བཞིན་འཕགས་པ་ཐོགས་མེད་ལ་སོགས་པ་དེ་དག་ནས་རིམ་པར་བརྒྱུད་དེ་ཤི་རི་ལངྐ་དང༌། ཐའེ་ལན་ཌི། འབར་མ་ལ་སོགས་པ་དང༌། དེ་བཞིན་རྒྱ་ནག་གི་ཡུལ་དང༌། ཀོ་རི་ཡ། ཉི་ཧོང༌། ཝི་ཏི་ནམ་བཅས་དང༌། གཞན་ཡང་རྒྱ་གར་ནས་ཐད་ཀར་བོད་གངས་ཅན་གྱི་ལྗོངས་སུ་རིམ་པས་སངས་རྒྱས་ཀྱི་ཆོས་དར་འཕེལ་བྱུང་ཞིང༌། དེ་ནས་ཆེན་པོ་ཧོར་གྱི་ཡུལ་ཁག་ལ་དར་འཕེལ་བྱུང་སྟེ་ཡོངས་གྲགས་བྱས་ན་ལོ་ཉིས་སྟོང་ལྔ་བརྒྱ་ལྷག་ཕྱིན་པ་རེད།
སྟོན་པའི་རྗེས་འཇུག་པ་རྣམས་ལ་རང་རང་སོ་སོའི་གནས་ཡུལ་དུ་བསྟན་པ་འཕེལ་གྲིབ་སྣ་ཚོགས་ཤིག་བྱུང་ཡོད་ཅིང༌། ད་ལྟ་འབྲེལ་བའི་སྐབས་སུའང་བོད་གངས་ཅན་གྱི་ལྗོངས་སུ་ཆ་བཞག་ན། སངས་རྒྱས་ཀྱི་བསྟན་པ་ཧ་ཅང་ཉག་ཕྲའི་སྐབས་སུ་བསྡད་ཡོད། ཡིན་ནའང་བོད་གངས་ཅན་ལྗོངས་དང་ཆོས་བརྒྱུད་གཅིག་གྱུར་ཡིན་པའི་ནུབ་ལ་དྭགས་ནས་ཤར་མོན་བར་ཧི་མ་ལ་ཡའི་རི་རྒྱུད་ཀྱི་ས་ཁུལ་དེ་དག་ལའང་འདས་པའི་ལོ་བཞི་བཅུ་ཞེ་གྲངས་དེའི་རིང་ལ་ཉམས་པ་སོར་ཆུད་དང༌། མི་ཉམས་གོང་འཕེལ་གྱིས་འགྱུར་བ་ཆེན་པོ་ཕྱིན་ཡོད།
ང་རང་ཚོས་སངས་རྒྱས་བཅོམ་ལྡན་འདས་ནི་རང་གི་སྟོན་པ་བླ་ན་མེད་པ་ཞིག་ལ་ངོས་འཛིན་བྱས་ཏེ་དད་པ་བྱེད་ཀྱི་ཡོད་ལ། ད་ལན་གནས་མཆོག་མཚོ་པདྨར་སྟོན་པ་བཅོམ་ལྡན་འདས་ཀྱི་བསྟན་པ་འདིར་མཐུ་དང་རྫུ་འཕྲུལ་གྱི་ཐོག་ནས་དམིགས་བསལ་གྱི་མཛད་རྗེས་ཆེན་པོ་ཡོད་པ། སློབ་དཔོན་རིན་པོ་ཆེའི་གནས་ཁྱད་པར་ཅན་ཞིག་ཡིན་པས་དེ་འདྲའི་ཐོག་ནས་ང་རང་ཚོ་དད་པས་ཀུན་ནས་བསླངས་ཏེ་གནས་འདིར་འདུས་པ་རེད། དེར་བརྟེན་ང་རང་ཚོ་ཚང་མས་སངས་རྒྱས་བཅོམ་ལྡན་འདས་ལ་དད་པ་བྱེད་ཀྱི་ཡོད་ལ། ང་ཚོའི་ཁ་ནས་ཀྱང་སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་བརྗོད་ཀྱི་ཡོད། འོན་ཀྱང་སངས་རྒྱས་དང་ཆོས་ཞེས་པ་དེ་ཇི་འདྲ་ཞིག་ལ་བརྗོད་ཀྱི་ཡོད་པ་དང༌། དགེ་འདུན་ཞེས་པ་དེ་ཡང་གང་འདྲ་ཞིག་ལ་བརྗོད་ཀྱི་ཡོད་པ། དེ་དག་རྒྱུ་རྐྱེན་གང་ལ་བརྟེན་ནས་བྱུང་བ་དང༌། དེའི་ངོ་བོ་གང་ཞིག་ཡིན་པ། དེ་དག་གི་ཡོན་ཏན་ནམ་བྱེད་ལས་གང་དང་གང་ཡོད་པ་དེ་དག་ལ་དོ་སྣང་མ་བྱས་པར་ལུས་མཁན་ཧ་ཅང་མང་པོ་ཡོད།
དེར་བརྟེན་འཛམ་གླིང་འདིའི་སྟེང་ཆོས་ལུགས་འདྲ་མིན་མང་པོ་ཡོད་ཅིང༌། ངས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད་ལ། ས་གནས་གང་དུ་ཕྱིན་ཀྱང་ས་གནས་དེའི་ཧིན་དྷུའི་ལྷ་ཁང་དང༌། ཡེ་ཤུའི་ལྷ་ཁང༌། ཁ་ཆེའི་ལྷ་ཁང༌། གུ་རུ་དྷེ་ཝའི་ལྷ་ཁང་སོགས་སུ་ནམ་ཡིན་ཡང་གོ་སྐབས་ཡོད་ན་གུས་ཞབས་བྱས་ཏེ་འགྲོ་ཡི་ཡོད། ཆོས་ལུགས་དེ་དག་ཚང་མས་འཛམ་གླིང་འདིའི་སྟེང་དུ་མི་འབུམ་ཕྲག ས་ཡ༑ བྱེ་བ་མང་པོར་ལོ་བརྒྱ་ཕྲག་སྟོང་ཕྲག་མང་པོའི་རིང་ཕན་ཐོགས་བྱུང་ཡོད་ལ། ད་ལྟ་ཡིན་ཡང་ཕན་ཐོགས་ཡོང་བཞིན་པ་རེད། མ་འོངས་པར་ཡང་ཕན་པར་འགྱུར་བ་རེད། དེས་ན་གུས་ཞབས་བྱེད་འོས་ལ་རྒྱུ་མཚན་ཡོད་ཅིང༌། གུས་ཞབས་མཚོན་བྱེད་དུ་ངས་ནམ་རྒྱུན་འགྲོ་ཡི་ཡོད།
ཆོས་ལུགས་འདྲ་མིན་མང་དུ་ཡོད་ཀྱང༌། དེ་དག་ཚང་མས་བྱམས་པ་དང༌། སྙིང་རྗེ། བཟོད་པ། ཆོག་ཤེས། དེ་བཞིན་རང་ཁྲིམས་ཀྱི་བསླབ་པ་སྲུང་རྒྱུ་བཅས་ནི་ཚང་མའི་ཉམས་ལེན་བྱེད་རྒྱུའི་ནང་དུ་ཡོད་ཅིང༌། མི་འདྲ་བའི་ཁྱད་པར་ནི། འཇིག་རྟེན་བཀོད་པ་པོ་འདོད་དང་མི་འདོད། ཕུང་པོ་ལས་དོན་གཞན་པའི་བདག་འདོད་དང་མི་འདོད་དེ་ལྟ་བུའི་ཐོག་ནས་ཁྱད་པར་ཡོང་གི་ཡོད། དད་པ་བྱེད་པ་དང༌། སྙིང་རྗེ་བྱེད་པ། བྱམས་པ་སྒོམ་པ་བཅས་རྒྱ་ཆེ་ཆུང་ལ་མ་བལྟོས་པར་དེ་དག་ཐུན་མོང་བ་རེད།
དཔེར་ན། རང་གི་དཀོན་མཆོག་ལ་དད་པ་བྱེད་རྒྱུ་ལྟ་བུར་ཆ་བཞག་ན། ངས་ངོ་ཤེས་པའི་ཡེ་ཤུའི་ཆོས་པ་དེ་འདྲ་རང་ལུགས་ཀྱི་དཀོན་མཆོག་གི་བསྟོད་པ་རོལ་མོ་དང་བཅས་ཏེ་འདོན་སྐབས་མིག་ཆུ་ཁྲུལ་ཁྲུལ་ཏུ་བཏང་སྟེ་དད་པ་ཧ་ལས་པ་བྱེད་མཁན་དེ་འདྲ་ཡོད་ལ། དེ་དག་ཧ་ཅང་གི་ཡག་པོ་རེད། རང་གི་སྟོན་པར་དད་པ་ལ་ཆ་བཞག་ན་ཡེ་ཤུའི་ཆོས་པ་དང༌། ཁ་ཆེའི་ཆོས་པ། ཧིན་དྷུའི་ཆོས་པ་གང་ཞིག་ཡིན་ནའང༌། ཆོས་ལུགས་སོ་སོའི་རང་གི་སྟོན་པར་རྩེ་གཅིག་པའི་དད་པ་ཧ་ཅང་ཤུགས་ཆེན་པོ་ཡོད་པ་དེ་འདྲ་ཡོང་གི་ཡོད།
དེ་བཞིན་བྱམས་པ་དང༌། སྙིང་རྗེའི་ཉམས་ལེན་གྱི་ཐོག་ནས་སྐབས་རེ་ང་ཚོ་བོད་པའི་ཆོས་པ་ལས་ལྷག་པ། རང་ཉིད་ཀྱི་མི་ཚེའི་བདེ་སྐྱིད་བློས་བཏང་གིས་ཉམ་ཐག་སྐྱབས་མེད་མགོན་མེད་དང༌། ནད་པ་སོགས་ལ་ཞབས་འདེགས་སྒྲུབ་མཁན་ངོ་མཚར་ཆེན་པོ་དེ་འདྲ་ཡོང་གི་འདུག དཔེར་ན། ཀ་ལི་ཀ་ཏར་མ་ཏར་ཀྲེ་རེ་སི་ཁོང་ལ་ཆ་བཞག་ན༑ དངོས་གནས་རང་ཉིད་ཀྱིས་ཡིད་ཆེས་བྱེད་སའི་ཆོས་ལུགས་དེའི་ནང་དུ་བྱམས་པ་དང༌། སྙིང་རྗེ། གཞན་དོན་བསྒྲུབ་རྒྱུ་གསུངས་པ་དེ་དག་དངོས་སུ་ལག་ལེན་དུ་བསྟར་བ་སྟེ། དེ་ཡང་དགོན་པ་ཞིག་གི་ནང་དུ་བསྡད་དེ་སྨོན་ལམ་བརྒྱབ་པ་གཅིག་པུ་མིན་པར། དངོས་སུ་ཉམ་ཐག་སྐྱབས་མེད་མགོན་མེད་ཁྲི་འབུམ་མང་པོར་ལོ་མང་པོའི་རིང་ལ་གཞན་ཕན་བསྒྲུབས་ཏེ་ཧ་ལས་པའི་བྱས་རྗེས་ཅན་ངོ་མཚར་སྐྱེ་བའི་གནས་རེད་ལ། བྱམས་དང་སྙིང་རྗེ་ལ་སོགས་པའི་ཉམས་ལེན་བྱེད་རྒྱུ་དེ་དག་ཆོས་བརྒྱུད་ཚང་མའི་ཐུན་མོང་བ་རེད།
ཁྱད་པར་གཙོ་བོ་ནི། ཆོས་ལུགས་མང་པོ་ཞིག་གིས་འཇིག་རྟེན་བཀོད་པ་པོ་འདོད་ཅིང༌། རྟག་པ་རང་བྱུང་གི་སྐྱེས་བུ་ཞེས་པ་ཞིག་འདོད་ཀྱི་ཡོད། རྟག་པ་རང་བྱུང་གི་སྐྱེས་བུས་འཇིག་རྟེན་གྱི་སྣོད་བཅུད་ཚང་མ་བཀོད་ཡོང་གི་ཡོད་ལ། རྟག་པ་རང་བྱུང་གི་སྐྱེས་བུ་དེར་དད་པ་བྱས་ཏེ་དེའི་རྗེས་སུ་བསླབ་ན་མཐར་བདེ་སྐྱིད་ཐོབ་ཐུབ་པ་དེ་འདྲའི་ཐོག་ནས་ཡིད་ཆེས་ཀྱིས་འགྲོ་བ་ཞིག་ཡོད། དེ་བཞིན་མུ་སྟེགས་གྲངས་ཅན་པའི་ནང་གྲངས་ཅན་ལྷ་བཅས་པ་དང༌། གྲངས་ཅན་ལྷ་མེད་པ་ཞེས་པ་གཉིས་ཡོད་ཅིང༌། གྲངས་ཅན་ལྷ་མེད་པས་སྤྱི་གཙོ་བོ་ཞེས་རྟག་པ། གཅིག་པུ། ཀུན་ཁྱབ་དེ་གནས་ལུགས་ལྟ་བུ་ཞིག་ཡིན་ས་རེད། དེའི་དབང་ལས་ཤར་བ། དེའི་རོལ་པ་ལྟ་བུ་ཞིག་བཤད་པ་ལས་འཇིག་རྟེན་བཀོད་པ་པོ་མི་འདོད་པ་རེད།
དེ་བཞིན་གཅེར་བུ་པས་འཇིག་རྟེན་བཀོད་པ་པོ་ཕལ་ཆེར་མི་འདོད་ཅིང༌། དེ་ལྟ་བུའི་འཇིག་རྟེན་བཀོད་པ་པོ་མི་འདོད་པར་རང་རང་གི་ལས་ཀྱི་དབང་གིས་བྱུང་བ་རེད་ཅེས་འདོད་པའི་ཆོས་ལུགས་གྲུབ་མཐའ་གཅིག་ཡོད་པ་རེད། དེའི་ནང་གསེས་སངས་རྒྱས་པའི་ཆོས་ལ། འཇིག་རྟེན་བཀོད་པ་པོ་མི་འདོད་མཁན་གྱི་སྡེ་ཚན་དེའི་ནང་མི་འདྲ་བ་ཞིག་ལ། སངས་རྒྱས་བཅོམ་ལྡན་འདས་ཀྱི་ཆོས་ཀྱི་ཕུང་པོ་ལས་དོན་གཞན་པའི་བདག་མི་འདོད་ཅིང༌། གྲངས་ཅན་པར་ཆ་བཞག་ནའང༌། བདག་ཤེས་རིག་གི་སྐྱེས་བུ་ཞེས་པ་ཞིག་འདོད་ཀྱི་ཡོད། དེ་དག་གིས་མཚོན་ཆོས་ལུགས་ཚང་མས་ཕུང་པོ་ལ་དབང་སྒྱུར་མཁན་གྱི་བདག་རང་རྐྱ་བ་ཕུང་པོ་ལ་ལྟོས་པ་མེད་པ། ཕུང་པོ་ལས་དོན་གཞན་པའི་བདག་རྟག་གཅིག་རང་དབང་བ་དེ་འདྲ་ཞིག་ཐམས་ཅད་ཀྱིས་འདོད་ཀྱི་ཡོད།
སངས་རྒྱས་པའི་ཆོས་ལུགས་ཀྱི་ཐོག་ནས་དེ་ལྟ་བུའི་ཕུང་པོ་ལས་དོན་གཞན་པའི་བདག་མེད་ཅེས་གསུངས་པ་རེད། སངས་རྒྱས་པའི་ཆོས་དང༌། སངས་རྒྱས་པའི་ཆོས་ལས་གཞན་དུ་གྱུར་པའི་ཆོས་དེ་གཉིས་ཀྱི་དབྱེ་མཚམས་ནི། ཕུང་པོ་ལས་དོན་གཞན་པའི་བདག་འདོད་མཁན་དེ་དག ཆོས་འདི་ལས་ཕྱི་རོལ་དུ་གྱུར་པའི་ཆོས་དང༌། ཕུང་པོ་ལས་དོན་གཞན་པའི་བདག་མི་འདོད་པའི་ཆོས་ལ། སངས་རྒྱས་པའི་ཆོས་ཞེས་ཕལ་ཆེར་བརྗོད་ཆོག་པ་ཡིན། ཕུང་པོ་ལས་དོན་གཞན་པའི་བདག་མེད་ཅེས་ཕུང་པོར་དབང་སྒྱུར་མཁན་གྱི་བདག་རྗེ་བོ་ལྟ་བུ། རང་བཙན་པ། རང་རྐྱ་བ་ཞིག་མེད་ཅེས་འདོད་དོ།།
ཀ༽ ཕྱག་རྒྱ་དང་པོ། འདུས་བྱས་ཐམས་ཅད་མི་རྟག་པ།
བཅོམ་ལྡན་འདས་ཀྱི་ཆོས་ལ་ལྟ་བ་བཀའ་བཏགས་ཀྱི་ཕྱག་རྒྱ་བཞི་གསུངས་ཤིང༌། དེ་ཡང༌། འདུས་བྱས་ཐམས་ཅད་མི་རྟག་པ། ཟག་བཅས་ཐམས་ཅད་སྡུག་བསྔལ་བ། ཆོས་ཐམས་ཅད་སྟོང་ཞིང་བདག་མེད་པ། མྱ་ངན་ལས་འདས་པ་ཞི་བ་བཅས་ལ། ལྟ་བ་བཀའ་བཏགས་ཀྱི་ཕྱག་རྒྱ་བཞི་ཞེས་གསུངས་སོ། །ཕྱག་རྒྱ་ཞེས་པ་ནི་དམ་ཕྲུག་དང་འདྲ་བར་འདའ་མི་རུང་བར་སངས་རྒྱས་པའི་ཆོས་ཀྱི་ལྟ་གྲུབ་ཀྱི་རྩ་བ་བཞི་པོ་དེ་ཡིན།
དེ་ཡང༌། འདུས་བྱས་ཐམས་ཅད་མི་རྟག་པ་ཞེས་པའི་དོན་གང་ཡིན་ཞེ་ན། འདུས་བྱས་ནི་འདུས་ཤིང་བྱས་པ་ལ་བྱ་ཞིང༌། རྒྱུ་རྐྱེན་འདུས་པའི་ཐོག་ནས་བྱས་པའམ་སྒྲུབ་པ་སྟེ། དོན་དེ་ཉིད་སྒྲུབ་རྒྱུ་རྒྱུ་དང་རྐྱེན་ཙམ་ལ་བརྟེན་ནས་གྲུབ་ཅིང༌། རྒྱུ་མེད་ལས་བྱུང་བ་མིན་ལ། མི་མཐུན་པའི་རྒྱུ་ལས་བྱུང་བ་མིན། མི་མཐུན་པའི་རྒྱུ་རྟག་པ་ལས་ཀྱང་བྱུང་བ་མིན། མཐུན་པའི་རྒྱུ་ལས་བྱུང་ཞིང༌། མཐུན་པའི་རྒྱུ་རྐྱེན་ཙམ་ལ་བརྟེན་ནས་འབྲས་བུ་སྣ་ཚོགས་པ་འདི་བྱུང་བ་ལས་གཞན་བཀོད་པ་པོ་གང་ཡང་མེད། ནང་པའི་ཆོས་ནང་རྟེན་ཅིང་འབྲེལ་བར་འབྱུང་བ་ཞེས་པ་ཞིག་གསུངས་ཀྱི་ཡོད། རྟེན་ཅིང་འབྲེལ་བར་འབྱུང་ཞེས་པ་དེ། ནང་པའི་ཆོས་ཁོ་ན་ལས་ཆོས་ལུགས་གཞན་སུས་ཀྱང་བརྗོད་ཀྱི་མེད། དཔལ་མགོན་འཕགས་པ་ཀླུ་སྒྲུབ་ཀྱི་གསུང་དང༌། མདོ་སྡེ་མང་པོའི་ནང་དུ་རྟེན་ཅིང་འབྲེལ་བར་འབྱུང་བ་ཞེས་པའི་ཚིག་དེ་ཐོན་གྱི་འདུག་ཅིང༌། དེས་སངས་རྒྱས་པའི་ཆོས་ཚུལ་འདི་དམིགས་བསལ་ཞིག་ཐོན་ཡོང་གི་ཡོད།
སངས་རྒྱས་པའི་ཆོས་ཀྱི་སྙིང་པོ་ཚུར་བསྡུས་ན། ལྟ་བ་རྟེན་འབྱུང་དང༌། སྤྱོད་པ་འཚེ་བ་མེད་པ་གཉིས་ལས། སྤྱོད་པ་འཚེ་བ་མེད་པ་ཞེས་པ་དེ་ཡང༌། འཚེ་བ་མེད་ཙམ་ལ་བརྗོད་པ་མ་ཡིན་པར་སྙིང་རྗེས་རྩ་བ་བྱས་ཏེ་ཀུན་ལ་ཕན་བདེ་བསྒྲུབ་རྒྱུ་དང༌། ཐ་མ་ཕན་བདེ་སྒྲུབ་མ་ཐུབ་རུང་གནོད་པ་མི་བྱེད་པ་ནི་འཚེ་བ་མེད་པ་ཞེས་པ་དེ་རེད། སྙིང་རྗེ་རྩ་བར་གྱུར་པའི་འཚེ་བ་མེད་པའི་སྤྱོད་པ་ཞིག་བྱེད་དགོས་པའི་རྒྱུ་མཚན་ནི། སྙིང་རྗེ་བྱེད་དགོས་པ་དང༌། འཚེ་བ་མི་བྱེད་པ་ཞེས་པ་དེ་སྟོན་པའི་བཀའ་རེད་ཅེས་བརྗོད་པ་ཙམ་མིན་པར། དེ་ཉིད་རྒྱུ་མཚན་ཞིག་གི་ཐོག་ནས་སྙིང་རྗེ་གལ་ཆེན་པོ་ཡིན་པ་དང༌། དེའི་ཐོག་ནས་འཚེ་བ་མི་བྱེད་པ་ཞེས་པའི་སྤྱོད་པ་དེ་ཐོན་ཡོང་གི་ཡོད། སྤྱོད་པ་འཚེ་བ་མི་བྱེད་པའི་རྒྱབ་བརྟེན་དེ་ལྟ་གྲུབ་ཅིག་གི་ཐོག་ནས་འཚེ་བ་མེད་པ་བྱེད་དགོས་པ་དེ་སྒྲུབ་དགོས་ཀྱི་ཡོད། དེ་ལྟའི་ལྟ་གྲུབ་དེ་གང་ཞེ་ན། རྟེན་ཅིང་འབྲེལ་བར་འབྱུང་བ་ཞེས་པའི་ལྟ་བ་དེ་ཡིན། སངས་རྒྱས་པའི་ཆོས་ནང་རྟེན་ཅིང་འབྲེལ་བར་འབྱུང་བའི་ལྟ་བའི་ཐོག་ནས་འཚེ་བ་མི་བྱེད་པའི་སྤྱོད་པ་དེ་ཐོན་ཡོང་གི་ཡོད། རྟེན་ཅིང་འབྲེལ་བར་འབྱུང་བ་ཞེས་པའི་དོན་དེ་བཀྲལ་སྐབས་གྲུབ་མཐའ་གོང་འོག་གི་གཏིང་ཟབ་ཚད་ཀྱི་ཁྱད་པར་ཡོང་གི་ཡོད།
ནང་པའི་གྲུབ་མཐའ་ཚང་མས་བཞེད་པའི་རྟེན་འབྱུང་ནི་རྒྱུ་འབྲས་ཀྱི་རྟེན་འབྱུང་ཡིན་ལ། ཆོས་ཐམས་ཅད་སྟོང་ཞིང་བདག་མེད་པ་ཞེས་པའི་འགྲེལ་བཤད་དེ་ཉིད་ཟབ་ཏུ་ཕྱིན་པའི་སྐབས་བརྟེན་ནས་བཏགས་པའི་རྟེན་འབྱུང་ཞེས་པ་ཞིག་གསུངས་ཀྱི་ཡོད། དེ་ནི་རྒྱུ་འབྲས་ཀྱི་རྟེན་འབྱུང་སྟེ། བརྟེན་ནས་འབྱུང་བའི་རྟེན་འབྱུང་ཙམ་མ་ཡིན་པར་བརྟེན་ནས་བཏགས་པའི་རྟེན་འབྱུང་ཞེས་པ་ཞིག་གསུངས་པ་དང༌། བརྟེན་ནས་བཏགས་པའི་རྟེན་འབྱུང་ལ། རང་གི་ཆ་ཤས་ལ་ལྟོས་ནས་གྲུབ་པའི་རྟེན་འབྱུང་ཞེས་པ་དེ་དང༌། དེ་ཡང་ཟབ་ཏུ་ཕྱིན་པའི་སྐབས་རྟོག་པས་བཏགས་པ་ལ་བརྟེན་ནས་འབྱུང་བའི་རྟེན་འབྱུང་ངམ། ཡང་ན་གདགས་གཞི་ལ་བརྟེན་ནས་བཏགས་པའི་རྟེན་འབྱུང་བཅས། བརྟེན་ནས་བཏགས་པའི་རྟེན་འབྱུང་ལ་གཉིས་བཤད་ཀྱི་ཡོད།
སྤྱིར་རྟེན་འབྱུང་ལ་རྒྱུ་འབྲས་རྟེན་འབྱུང་ཞེས་པའི་བརྟེན་ནས་འབྱུང་བའི་རྟེན་འབྱུང་དང༌། བརྟེན་ནས་བཏགས་པའི་རྟེན་འབྱུང་གཉིས་བཤད་ཅིང༌། བརྟེན་ནས་བཏགས་པའི་རྟེན་འབྱུང་ལ། རང་གི་ཆ་ཤས་ལ་ལྟོས་ནས་གྲུབ་པའི་བརྟེན་ནས་བཏགས་པའི་རྟེན་འབྱུང་གཅིག་དང༌། རང་གི་གདགས་གཞི་ལ་བརྟེན་ནས་བཏགས་པའི་རྟེན་འབྱུང་གཅིག་བཅས་མི་འདྲ་བ་ཁ་ཤས་ཡོད། དེ་དག་ནི་ནང་པའི་རྟེན་འབྱུང་ཞེས་སངས་རྒྱས་པའི་ཆོས་ཀྱི་ཐུན་མོང་མ་ཡིན་པའི་ཁྱད་ཆོས་ཤིག་ཆགས་ཡོད། རྟེན་ཅིང་འབྲེལ་བར་འབྱུང་བའི་ལྟ་བ་དེ། ཆོས་ཁས་མི་ལེན་པའི་མི་ཞིག་ཡིན་ཡང་རྟེན་ཅིང་འབྲེལ་བར་འབྱུང་བ་ཞེས་པའི་བསམ་བློ་འཁོར་ན༑ མི་ཚེ་གཅིག་གི་ལས་ཀ་མང་པོ་ཞིག་ལ་རང་བཞིན་གྱི་རྣམ་དཔྱོད་ཡངས་པོ་ཆགས་པར་ཕན་ཐོགས་ངེས་པར་དུ་ཡོང་ས་རེད། དཔེར་ན་རང་ཉིད་ཀྱི་ཉམས་མྱོང་དང༌། མི་གཞན་གྱི་གནས་ཚུལ་གྱི་ཐོག་ལ་བལྟས་ཀྱང་ཕལ་ཆེར་གསལ་པོ་རེད། དེ་ཡང་དཀའ་ངལ་མང་པོ་ཞིག་ཡོང་བའི་གནད་འགག་ཅིག་ནི། དེའི་སྐབས་སུ་ང་རང་ཚོའི་འདོད་པའི་བདེ་སྐྱིད་དང༌། མི་འདོད་པའི་སྡུག་བསྔལ་དེ་འདོད་བྱ་ཚང་མ་ཐུན་མོང་བ་ཡིན་ནའང༌། དེའི་སྒྲུབ་སྟངས་དེ་རང་ཉིད་ཀྱི་སྣང་ངོར་ཐབས་ཤེས་འདི་བྱས་ན་ལེགས་ཤོས་རེད་བསམ་པའི་ཐབས་ཤེས་ཤིག་གི་ཐོག་ནས་འགྲོ་ཡི་ཡོད། ཐབས་ཤེས་བསྟན་སྟངས་དེ་ཡང་འདོད་པའི་བདེ་སྐྱིད་དང༌། མི་འདོད་པའི་སྡུག་བསྔལ་གང་ཞིག་ཡིན་ནའང༌། དེ་རྐྱེན་དུ་མ་ལ་ལྟོས་ནས་གྲུབ་པ་དེ་མ་མཐོང་བར། རང་གི་བློ་ངོར་འཆར་བའི་རྐྱེན་ཚུགས་ཐུབ་པ་ཞིག་བལྟས་ནས། དེ་གཞིར་བཞག་གི་ཐོག་ནས་བདེ་སྐྱིད་བསྒྲུབ་རྒྱུ་དང་སྡུག་བསྔལ་སེལ་རྒྱུའི་ཐབས་ཤེས་བྱེད་ཀྱི་ཡོད།
དངོས་ཡོད་གནས་ཚུལ་ལ་བདེ་བ་དང་སྡུག་བསྔལ་གྱིས་མཚོན་པའི་དོན་གང་ཞིག་ཡིན་ཡང༌། རྒྱུ་རྐྱེན་དུ་མ་ཚོགས་པའི་སྟེང་ནས་གྲུབ་པ་ལས། རྒྱུ་རྐྱེན་གཅིག་གི་ཐོག་ནས་ཡོང་བ་གཅིག་ཀྱང་མེད། དེར་བརྟེན་དངོས་ཡོད་གནས་ཚུལ་ལ་རྒྱུ་རྐྱེན་དུ་མ་ཚོགས་པའི་སྟེང་ནས་ཡོད་པ་ཞིག་ལ། རང་གི་བློ་ངོར་རྒྱུ་རྐྱེན་གཅིག་གིས་བྱས་པ་ལྟ་བུ་ཞིག་མཐོང་སྐབས། དེ་གཞིར་བཞག་གིས་བདེ་བ་བསྒྲུབ་རྒྱུ་དང༌། སྡུག་བསྔལ་སེལ་རྒྱུའི་ཐབས་ཤེས་ཨུ་ཚུགས་རྒྱབ་སྟེ་བྱེད་ཀྱི་ཡོད་ཀྱང༌། དེ་དོན་དངོས་ཀྱི་གནས་ཚུལ་དང་རན་ཞིང་འཚམས་པོ་མེད་པ་གསལ་པོ་རེད།
དཔེར་ན། ང་རང་ཚོ་འཛམ་གླིང་འདིའི་སྟེང་གི་དཔལ་འབྱོར་ལོངས་སྤྱོད་ཀྱི་སྲིད་བྱུས་དང༌། དེ་བཞིན་ཁོར་ཡུག་གི་གནས་ཚུལ། གཞན་ཡང་སྲིད་དོན་གྱི་གནས་ཚུལ་དང༌། རྒྱལ་སྤྱིའི་འབྲེལ་བའི་གནས་ཚུལ་གང་ཞིག་ཡིན་ནའང༌། མང་པོ་ཞིག་རྟེན་ཅིང་འབྲེལ་བར་འབྱུང་བ་ཞེས་པའི་ལྟ་ཚུལ་ཞིག་ཁྱེར་ནས་བསམ་བློ་བཏང་ན་ཏན་ཏན་རན་པ་ཡོད། རྟེན་འབྱུང་གི་ལྟ་བ་འདི་མེད་པར། སྐབས་འཕྲལ་ངོ་གདོང་གང་གི་སྣང་ཚོད་དེ་གཞིར་བཞག་གི་ཐོག་ནས་ཕྱིན་ན། མང་པོ་ཞིག་དངོས་ཡོད་གནས་ཚུལ་དང་མ་རན་པ་ཆགས་ཀྱི་ཡོད་པ་གསལ་པོ་འདུག རྟེན་ཅིང་འབྲེལ་བར་འབྱུང་བ་ཞེས་པ་འདི་གཞན་དང་མི་འདྲ་བ་སྟེ། དངོས་ཡོད་གནས་ཚུལ་འགྲེལ་བཤད་རྒྱབ་མཁན་ཞིག་ཆགས་ཀྱི་ཡོད། ད་ལྟ་ཞུས་པ་དེ་རྒྱུ་འབྲས་ཀྱི་རྟེན་འབྱུང་ཞེས་པ་དེ་རེད། རྒྱུ་འབྲས་ཀྱི་རྟེན་འབྱུང་ཞེས་པ་དེས། དངོས་པོའི་ཆོས་གང་དང་གང་ཡིན་ནའང༌། དེ་རྒྱུ་རྐྱེན་དུ་མའི་ཐོག་ནས་འགྱུར་བ་སྣ་ཚོགས་དེ་དག་ཡོང་གི་ཡོད། དེར་བརྟེན་འདུས་བྱས་ཞེས་པ་འདི། རྒྱུ་རྐྱེན་དུ་མ་ཚོགས་པའམ་འདུས་པའི་ཐོག་ནས་བྱས་ཤིང་གྲུབ་པ་ཞིག་ལ་འདུས་བྱས་ཞེས་བརྗོད་ཀྱི་ཡོད།
དེ་ལྟ་བུའི་འདུས་བྱས་ཀྱི་ཆོས་ཐམས་ཅད་མི་རྟག་པ་རེད་ཅེས་གསུངས་པའི་མི་རྟག་པ་ཞེས་པ་ནི། རྟག་པ་ལ་དགག་སྒྲ་སྦྱར་ནས་དུས་རྒྱུན་དུ་རྟག་པ་བརྟན་པ་འགྱུར་བ་མེད་པར་བསྡད་མཁན་ཞིག་ལ་རྟག་པ་ཞེས་བརྗོད་ཀྱི་ཡོད། དེར་དགག་སྒྲ་སྦྱར་ནས་མི་རྟག་པ་ཞེས་བརྗོད་སྐབས། རྟག་པ་མ་ཡིན་པར་མི་རྟག་པ་དང༌། དེ་ཡང་རྟག་པ་མིན་ཙམ་མ་ཡིན་པར་རྟག་པ་ཞེས་བརྗོད་སྐབས་རྟག་པའི་ལྡོག་ཟླར་རྩིས་ནས་མི་རྟག་པ་ཞེས་རྟག་ཏུ་མི་བརྟན་པ། རྟག་ཏུ་མི་སྡོད་པ་སྟེ་རྟག་ཏུ་འགྱུར་གྱི་ཡོད། རྟག་ཏུ་འགྱུར་རྒྱུ་དེ་གང་ཞིག་རེད་དམ་ཞེ་ན། འགྱུར་བ་འགྲོ་རྒྱུའི་རྐྱེན་གསར་པ་ཞིག་འཕྲད་པའི་ཐོག་ནས་འགྲོ་ཡི་ཡོད་དམ། དེ་མིན་གཞན་ཞིག་གི་ཐོག་ནས་འགྱུར་བ་འགྲོ་ཡི་ཡོད་དེར་བསམ་བློ་གཏོང་དགོས། འགྱུར་བ་འགྲོ་བ་དེ་འགྱུར་བ་འགྲོ་རྒྱུའི་རྐྱེན་གསར་པ་ཞིག་འཕྲད་པའི་ཐོག་ནས་འགྱུར་བ་འགྲོ་ཡི་ཡོད་ན། གལ་ཏེ་རྐྱེན་དེ་མ་འཕྲད་ན་འགྱུར་བ་མི་འགྲོ་བར་བསྡད་པ་ཞིག་ཡོང་སྲིད་པ་རེད།
འོན་ཀྱང་ད་ལྟ་ང་ཚོས་མི་རྟག་པ་ཞེས་པ་འདི་དཔེར་ན་དུས་བཞིའི་འགྱུར་བར་ཆ་བཞག་ན། ད་ལྟ་ང་ཚོ་དགུན་ཁའི་དུས་ཚོད་རྫོགས་ཏེ༑ དཔྱིད་ཀྱི་དུས་ཚོད་ཤར་སྐབས་ཤིང་གི་མདོག་དང༌། རིའི་སྟེང་གི་གངས་སོགས་མངོན་གསལ་དོད་པོའི་འགྱུར་བ་འགྲོ་རྒྱུ་ཡོད་ཅིང༌། དེ་ཡང་མི་རྟག་པ་རེད། མངོན་གསལ་དོད་པོས་ང་ཚོས་མཐོང་ཐུབ་པའི་འགྱུར་བ་འགྲོ་བ་འདི། སྐད་ཅིག་སྐད་ཅིག་གིས་འགྱུར་བ་ཞིག་མེད་ན། མངོན་གསལ་དོད་པོའི་འགྱུར་བ་འདི་དག་འགྲོ་ཐུབ་ཐབས་མེད།
དཔེར་ན། ཆུའི་ནང་གི་འདམ་རྩྭ་དེ་དག་ད་ལྟ་སེར་ཤུར་ཤུར་ཞིག་ཆགས་འདུག་ཅིང༌། སེར་ཤུར་ཤུར་ཆགས་པ་དེ་ཁ་སང་ཕན་ཆད་ལྗང་ཐིང་ངེར་བསྡད་ཅིང༌། དེ་རིང་གློ་བུར་དུ་སེར་ཤུར་ཤུར་ཆགས་པ་རེད་དམ་ཞེ་ན། དེ་ལྟར་མིན་པར་དེ་རིང་གི་སེར་ཤུར་ཤུར་དེ་ཁ་སང་ཁ་ཉིན་དང༌། བདུན་ཕྲག་སྔོན་མ། ཟླ་བ་སྔོན་མ་ནས་ག་ལེར་འགྱུར་བ་འགྲོ་བ་ཞིག་ལས། གློ་བུར་དུ་འགྱུར་བ་འགྲོ་བ་ཞིག་མིན། དཔེར་ན༑ ཤིང་གི་ལོ་མ་ཁ་མདོག་འགྱུར་འགྲོ་མཁན་ཞིག་ལ་པར་ཆས་བཙུགས་ཏེ་ཉིན་རེར་འདྲ་པར་རེ་དང༌། ཡང་ན་བདུན་ཕྲག་རེ་རེའི་ནང་པར་རེ་བརྒྱབ་ཏེ་རྗེས་སུ་ཞིབ་བལྟས་བྱས་ན། ཡུར་གྱི་འགྱུར་བ་འགྲོ་བ་ཞིག་ང་ཚོས་མཐོང་ཐུབ་པ་ཡིན། མདོར་ན། མངོན་གསལ་དོད་པོས་མཐོང་ཐུབ་པའི་འགྱུར་བ་དེ། འགྱུར་བ་འགྲོ་རྒྱུའི་གཞིའམ་རྩ་བའི་རང་བཞིན་ཞིག་ཡོད། འགྱུར་བ་འགྲོ་རྒྱུའི་རྩ་བའི་རང་བཞིན་དེ་གང་ཞེ་ན། སྐད་ཅིག་དང་ཆུ་ཚོད་སྐར་ཆ་གཅིག་ཀྱང་མི་སྡོད་པར་འགྱུར་བ་འགྲོ་བ་དེ་ཡིན། དེ་ཡོང་བ་དངོས་པོའི་ཆོས་གང་ཞིག་ཡིན་ནའང༌། དེ་རྡུལ་ཕྲ་རབ་ཚོགས་པའི་སྟེང་ནས་ཡོང་བ་ཞིག་དང༌། ཕྱིའི་དངོས་པོར་ཆ་བཞག་ན། རྡུལ་ཕྲ་རབ་ཚོགས་པའི་སྟེང་ནས་གྲུབ་པ་ཞིག་ཡིན་སྟབས། རྡུལ་ཕྲ་རབ་རེ་རེ་དེ་ནམ་དུའང་གཡོ་ཞིང་འགྱུར་བའི་རང་བཞིན་ཅན་ཞིག་རེད། དེ་ལ་བརྟེན་ནས་གྲུབ་པའི་དངོས་པོ་ཞིག་ཡིན་ཕྱིན་ཆད། དེ་དུས་ནམ་དུ་ཡང་འགྱུར་ཞིང་འགྲོ་བའི་མི་རྟག་པ་ཞེས་པ་དེ་རེད།
ཡང་གཟུགས་ཅན་གྱི་ཆོས་མ་ཡིན་པར། ནང་མྱོང་བའི་བདག་ཉིད་དང༌། ནང་གི་ཤེས་པར་ཆ་བཞག་ན། དུས་སྐད་ཅིག་ཅིག་སྟེ་རྒྱུན་གྱི་ཆ་ནས་འགྱུར་འགྲོ་ཡི་ཡོད། ཤེས་པར་ཆ་བཞག་ཀྱང་ཆ་བསགས་ནས་ཡོང་བ་དང༌། ཕྱིའི་གཟུགས་ཅན་ལ་ཆ་བཞག་ཀྱང་ཕྱོགས་ཀྱི་ཆ་བསགས་ནས་ཡོང་བ་བཅས། ཐམས་ཅད་ཀྱང་ཆ་བཅས་ཀྱི་དངོས་པོ་ལས་ཆ་མེད་ཅིག་ཀྱང་མེད། དེ་དག་ཚང་མ་རྒྱུ་དང་རྐྱེན་གྱི་དབང་གིས་འགྱུར་བ་འགྲོ་བ་ཞིག་དང༌། འགྱུར་བ་འགྲོ་བ་དེ་ཡང༌། དངོས་པོ་རང་གྲུབ་ཙམ་ཉིད་ནས་སྐད་ཅིག་ཙམ་ཡང་མི་སྡོད་པར་འགྱུར་བའི་རང་བཞིན་ཅན་དུ་གྲུབ་པ་དང༌། དེ་རྒྱུ་རྐྱེན་གྱིས་འདུས་བྱས་པའི་དངོས་པོའི་གཤིས་ལུགས་སམ་དངོས་པོའི་རང་བཞིན་རེད།
དེར་བརྟེན་རྒྱུ་རྐྱེན་གྱིས་འདུས་བྱས་པའི་དངོས་པོ་སྐད་ཅིག་སྐད་ཅིག་གིས་འགྱུར་བ་འགྲོ་བ་འདི། སྐྱེད་བྱེད་ཀྱི་རྒྱུ་དེ་ཉིད་དེ་འདྲའི་རང་བཞིན་དུ་སྐྱེས་ཤིང་རང་བཞིན་ཅན་དུ་གྲུབ་པ་རེད། འཇིག་པ་ཕྱིས་འབྱུང་གི་རྒྱུ་ལ་ལྟོས་པ་མ་ཡིན་པར། རང་སྐྱེད་བྱེད་ཀྱི་རྒྱུ་དེ་ཉིད་རང་ཉིད་གྲུབ་ཙམ་ནས་འཇིག་པའི་བདག་ཉིད་དུ་གྲུབ་པ་དང༌། རང་སྐྱེས་ཙམ་ཉིད་ནས་འགྱུར་བ་འགྲོ་བའི་རང་བཞིན་དུ་ཡོད་པ་ནི་རྒྱུ་དེ་ཉིད་ཀྱིས་བྱས་པ་རེད། དེས་ན་འདུས་བྱས་ཐམས་ཅད་མི་རྟག་པ་ཞེས་པ་དེ་རེད།
ཁ༽ ཕྱག་རྒྱ་གཉིས་པ། ཟག་བཅས་ཐམས་ཅད་སྡུག་བསྔལ་བ།
ཟག་བཅས་ཐམས་ཅད་སྡུག་བསྔལ་བ་ཞེས་པ་འདིས་གང་གསུངས་ཀྱི་ཡོད་དམ་ཞེ་ན། ཟག་པ་དང་བཅས་པ་ཞེས་པའི་ཟག་པ་འདིར་སྤྱིར་གོ་ས་འདྲ་མིན་མང་དུ་ཡོད་ཀྱང༌། གཙོ་བོའི་དབང་དུ་བྱས་ན་ཉོན་མོངས་ཀྱི་ཟག་པར་བཞག་ན་ལེགས་སྙམ། དེ་ཡང་ཟག་པ་དང་བཅས་པ་ཞེས་པ་ནི་ཉོན་མོངས་དང་བཅས་པ་སྟེ། ཟག་པ་ཉོན་མོངས་དང་བཅས་པའི་དོན་དེ་གང་ཞིག་རེད་དམ་ཞེ་ན། ཟག་བཅས་དངོས་པོ་དེ་དང་དེ་གྲུབ་བྱེད་ཀྱི་རྒྱུ་མཐར་གཏུགས་ན་ཟག་པའམ་ཉོན་མོངས་ཀྱི་དབང་གིས་གྲུབ་པ་ཞིག་དང༌། རང་གྲུབ་བྱེད་ཀྱི་ཉེར་ལེན་གྱི་རྒྱུ་དེ༑ ཉོན་མོངས་ཡིན་མིན་ཇི་ལྟར་ཡང་རང་ཉིད་གྲུབ་རྒྱུའི་ལྷན་ཅིག་བྱེད་རྐྱེན་ནང་ཉོན་མོངས་ཀྱིས་བསླད་པ་ཞིག་ཕལ་ཆེར་རེད།
དཔེར་ན། ཕྱིའི་རྡུལ་ཕྲན་ལྟ་བུར་ཆ་བཞག་ན། རྡུལ་ཕྲ་མོ་ཞིག་རྡུལ་ཕྲན་ནམ་དུ་ཡང་ཡོད་པ་ཞིག་སྟེ། དབུ་མ་བཞི་བརྒྱ་པ་ལས། འདུས་བྱས་ཀྱི་ཆོས་གང་དང་གང་ཡིན་ཡང༌། རྒྱུན་གྱི་མཐའ་མ་ཡོད། རྒྱུན་གྱི་ཐོག་མ་མེད་ཅེས་གསུངས་པ་བཞིན་རྡུལ་ཕྲན་གྱི་རྒྱུན་དངོས་པོའི་རིགས་རྒྱུན་ལ་ཐོག་མ་ཡོད་ཀྱང༌། དངོས་པོའི་རྫས་རྒྱུན་ལ་ཐོག་མ་བཞག་ཐུབ་རྒྱུ་ཁག་པོ་རེད། དེར་བརྟེན་རྫས་རྒྱུན་ཡར་དེད་ན་ཐོག་མ་ཕལ་ཆེར་བཞག་ཐུབ་རྒྱུ་མེད། ཉེར་ལེན་གྱི་རྒྱུ་བཤད་ཀྱང་དངོས་པོའི་རིགས་འདྲའི་རྒྱུན་ཐོག་མ་མེད་པ་ཞིག་དང༌། འགྱུར་བ་སྣ་ཚོགས་ཤིག་ཡོང་བའི་ནང་ལས་ཀྱི་རྐྱེན་ཏན་ཏན་ཡོད། ལས་ཀྱི་རྐྱེན་ཡོད་པས་ལས་ཞེས་པ་དེ། ཉོན་མོངས་ཀྱི་ཀུན་ནས་བསླངས་པ་ཞིག་ཆགས་ཀྱི་ཡོད་པས་ཉོན་མོངས་དང་འབྲེལ་བ་ཞིག་སླེབས་ཀྱི་ཡོད། ཉོན་མོངས་དང་དེའི་བག་ཆགས་ཀྱིས་བསླད་པ་ཅན་དེ་ལྟ་བུའི་རྐྱེན་ཅན་ཞིག་ལ་ཟག་བཅས་ཞེས་བྱའོ། །ཟག་བཅས་ཐམས་ཅད་སྡུག་བསྔལ་བ་གསུངས་པ་ནི། ཟག་པ་དང་བཅས་པའི་ཆོས་ཤིག་ཡིན་ཕྱིན་ཆད་མཐར་གཏུགས་ན༑ སྡུག་བསྔལ་བའི་རང་བཞིན་རེད་ཅེས་དང༌། སྡུག་བསྔལ་སྐྱེ་བའི་རྐྱེན་དུ་འགྲོ་མཁན་ཤ་སྟག་ཆགས་ཀྱི་ཡོད་པས་ན། ཟག་བཅས་ཐམས་ཅད་སྡུག་བསྔལ་བ་ཞེས་གསུངས་སོ། །ཟག་བཅས་ཐམས་ཅད་སྡུག་བསྔལ་བ་ཡིན་པའི་རྒྱུ་མཚན་ནི།
དེ་ཕྱིར་མི་རྟག་ལས་སྡུག་བསྔལ། །
སྡུག་བསྔལ་ལས་ནི་བདག་མེད་གསུངས། །
ཞེས་པ་ལྟར་སྐད་ཅིག་སྐད་ཅིག་གིས་འཇིག་པ་དེ། རང་སྐྱེད་བྱེད་ཀྱི་རྒྱུས་བྱས་པ་རེད། དེར་བརྟེན་རྒྱུ་ཡི་གཞན་དབང་ཅན་རེད། སྐབས་འདིར་འབྲས་བུ་བྱེ་བྲག་པ་ཉེ་བར་ལེན་པའི་ཕུང་པོ་འདི། རྒྱུ་ཡི་གཞན་དབང་ཅན་ཡིན་ན། རྒྱུ་གང་གི་གཞན་དབང་ཅན་རེད་དམ་ཞེ་ན། རྒྱུ་མ་རིག་པའི་གཞན་དབང་ཅན་རེད། རྒྱུ་མ་རིག་པའི་གཞན་དབང་ཅན་ཡིན་པས་ན། རྒྱུ་མ་རིག་པ་ཞེས་པ་འདིས་སྡུག་བསྔལ་གྱི་རྩ་བ་བྱེད་ཀྱི་ཡོད་སྟབས་སྡུག་བསྔལ་གྱི་རྩ་བར་གྱུར་པའི་རྐྱེན་ཞིག་གི་གཞན་དབང་དུ་ཡོད་ན། སྡུག་བསྔལ་བའི་རང་བཞིན་ཡིན་པ་དེ་ཤེས་ཐུབ་པ་ཞིག་རེད།
དེས་ན་ཟག་བཅས་ཐམས་ཅད་སྡུག་བསྔལ་བ་ཞེས་གསུངས་ཤིང༌། ཟག་བཅས་ཐམས་ཅད་སྡུག་བསྔལ་བ་ཞིག་ཡིན་ན་ཕུག་བཙན་པ་ཞིག་དང༌། ཕུག་བཟང་བ་ཞིག་གཏན་ནས་མེད་པ་ཐག་ཆོད་ཅིང༌། ཕུག་ནས་མི་བཟང་བ་ཞིག་ཡིན་ན། འདི་བཅོས་སུ་ཡོད་དམ་མེད། བཅོས་སུ་མེད་ན་སྡུག་བསྔལ་དེ་དྲན་གྱིན་བསྡད་ན་རྙོག་དྲ་ཚ་རོགས་རེད། དེ་ལས་བཞག་ན་ལེགས་ཤིང༌། བཅོས་རྒྱུ་ཡོད་པ་ཞིག་ཡིན་ན་དེ་དྲན་ན་ཡག་པོ་ཡོད། དྲན་ན་བསམ་བློའི་ནང་གོ་སྐབས་གསར་པ་ཞིག་བཙལ་གྱི་རེད། སྡུག་བསྔལ་དེ་མ་དྲན་ན་འདི་ལྟར་ལུས་ཀྱི་རེད། སྡུག་བསྔལ་སྡུག་བསྔལ་དུ་ཤེས་ན་སྡུག་བསྔལ་ལས་ཐར་འདོད་ཀྱི་ཐབས་ཤིག་བཙལ་བ་དང༌། སྡུག་བསྔལ་ལས་ཐར་འདོད་ཀྱི་ཐབས་ལ་སློབ་པ་ཞིག་བྱུང་ན། སྡུག་བསྔལ་ལས་ཐར་བ་ཞིག་ཡོང་ཐུབ་པས་ན་སྡུག་བསྔལ་དྲན་ན་ཡག་པོ་ཡོད།
ག༽ ཕྱག་རྒྱ་གསུམ་པ། ཆོས་ཐམས་ཅད་སྟོང་ཞིང་བདག་མེད་པ།
དེ་ཡང༌། ཆོས་ཐམས་ཅད་སྟོང་ཞིང་བདག་མེད་པ་ཞེས་གསུངས་པའི་དགོས་པ་ནི། སྡུག་བསྔལ་གྱི་རྩ་བ་ཉོན་མོངས་ཡིན་ཞིང༌། ཉོན་མོངས་རྩ་བ་ནས་མེད་པ་ཞིག་བཟོ་ཐུབ་པར་ཆོས་ཐམས་ཅད་སྟོང་ཞིང་བདག་མེད་པ་ཞེས་པ་འདི་གསུངས་ཡོད། འདི་ཇི་འདྲ་རེད་དམ་ཞེ་ན། ཉོན་མོངས་ཆགས་སྡང་གིས་མཚོན་པའི་ཉོན་མོངས་དེ་དག་ནང་ཆོས་གཅིག་པུ་མིན་པར་ཧིན་དྷུ་དང༌། མུ་སྟེགས་པའི་ཆོས་ནང་འདོད་པའི་ཉོན་མོངས་དང༌། གཟུགས་ཀྱི་ཉོན་མོངས། གཟུགས་མེད་ཅི་ཡང་མེད་མན་ཆད་ཀྱི་ཉོན་མོངས་ལ་ཉེས་དམིགས་སུ་བལྟས་ནས་རང་སའི་ཉོན་མོངས་ལས་ཐར་ཐབས་བྱེད་པ་དང༌། རང་སའི་ཉོན་མོངས་ལས་གྲོལ་བའི་སྲིད་རྩེའི་ཏིང་ངེ་འཛིན་མངོན་དུ་བྱེད་པ་དེ་འདྲ་ཡོང་གི་ཡོད། དེར་བརྟེན་ཅི་ཡང་མེད་མན་ཆད་ཀྱི་ཉོན་མོངས་ལ་ཉེས་དམིགས་སུ་བལྟས་ནས་དེ་ལས་རྒྱལ་བར་འདོད་པའི་བསམ་བློས་སྲིད་རྩེའི་སེམས་མངོན་དུ་བྱེད་པ་དེ་འདྲ་ཡོང་གི་ཡོད།
མུ་སྟེགས་པའི་གཞུང་གི་ནང་དུའང་ཉོན་མོངས་ལ་སྐྱོན་དུ་བལྟས་ནས། དེའི་གཉེན་པོ་བསྟེན་ཐབས་བཤད་ཀྱི་ཡོད། ཞི་རགས་ཀྱི་རྣམ་པ་ཅན་གྱི་འཇིག་རྟེན་པའི་ལྷག་མཐོང་དེ་དག་ཡོང་གི་ཡོད། དེ་བཞིན་ཡེ་ཤུའི་ཆོས་ནང་ཆ་བཞག་ཀྱང༌། ཀ་ཀྲ་ནལ་སིན་ཞེས་སྡིག་པ་བདུན་ཙམ་ཞིག་བཤད་ཀྱི་ཡོད་ཅིང༌། དེ་དག་གི་ནང་དུ་གནོད་སེམས་དང༌། ཕྲག་དོག་སོགས་ཡོད་ས་རེད། དེས་ན་ཆོས་ལུགས་མང་པོ་ཞིག་གིས་སེམས་མ་དུལ་བར་བྱེད་མཁན་གྱི་བློའི་སྐྱོན་མང་པོ་ཞིག་ལ་སྐྱོན་དུ་བལྟས་ནས་དེ་སྤོང་ཐབས་བྱེད་ཀྱི་ཡོད།
མདོར་ན། ང་རང་ཚོ་རང་རྒྱུད་ལྡན་གྱི་གང་ཟག་མ་སྐྱིད་པ་བཟོ་མཁན་གྱི་བློའི་སྐྱོན་ལ་སྐྱོན་དུ་ལྟ་མཁན་ནང་པ་གཅིག་པུ་མིན་པར་ཆོས་ལུགས་མང་པོའི་ནང་བཤད་ཀྱི་ཡོད། འོན་ཀྱང་གོང་དུ་ཞུས་པ་ལྟར། བདག་ཏུ་ལྟ་བ་ཞེས་པ་འདིས་ཉོན་མོངས་ཀྱི་རྩ་བ་བྱེད་པ་དང༌། ཉོན་མོངས་སྤོང་བར་བདག་ཏུ་ལྟ་བ་དེ་སྤོང་དགོས་པར་ཤོད་མཁན་དེ་ནང་པའི་ཆོས་ཁོ་ན་ལས་གཞན་མེད། སངས་རྒྱས་པའི་ཆོས་ཀྱི་ནང་བདག་མེད་ཀྱི་ལྟ་བ་གསུངས་དགོས་པ་དེ། ཉོན་མོངས་ཆགས་སྡང་ལ་སོགས་པ་དེ་ཐམས་ཅད་ཀྱི་རྩ་བ་བདག་ཏུ་ཞེན་པའི་བདག་འཛིན་ནམ། ངར་འཛིན་ཞེས་པ་དེར་ཐུག་གི་ཡོད་པ་སངས་རྒྱས་ཀྱི་གཞུང་ནས་གསུངས་ཡོད།
ངར་འཛིན་པའི་བློ་དེ་བློ་དོན་མཐུན་ཡིན་ནམ་མིན། བློ་དོན་མཐུན་ཡིན་ན། རང་གིས་ཇི་ལྟར་ཞེན་པ་ལྟར་དོན་ལ་གནས་པ་ཞིག་ཡིན་ཚེ་དེར་འགལ་ཟླའི་བློ་དོན་མཐུན་ཞིག་མེད། བློ་དེས་བློ་གང་ཡང་རུང་བ་ཞིག་གི་དེའི་ཞེན་སྟངས་དེ་ཕྱིན་ཅི་ལོག་ཡིན་ན། དེའི་ལྡོག་ཟླའམ་འགལ་ཟླ་ཞིག་ཡོང་གི་ཡོད། བློ་འཁྲུལ་བ་ཞིག་ཡིན་ན་དེར་འགལ་ཟླ་ཡོང་གི་རེད། གང་ལགས་ཤེ་ན། དེ་འཁྲུལ་བ་ཡིན་སྟབས་འཁྲུལ་བ་འཁྲུལ་བ་ཡིན་པ་ཤེས་ནས། མ་འཁྲུལ་བའི་བློ་ཞིག་ཡོང་རྒྱུ་ཡོད་སྟབས། མ་འཁྲུལ་བའི་བློ་དེས་འཁྲུལ་བའི་བློ་དེར་འགལ་ཟླ་ཆགས་ཡོང་གི་ཡོད། དེས་འཛིན་སྟངས་འགལ་བའི་སྒོ་ནས་གནོད་ཡོང་གི་ཡོད། གནོད་བྱ་གནོད་བྱེད་དུ་འགྲོ་ཡི་ཡོད།
བདག་ཏུ་འཛིན་པའི་བློའི་ཞེན་ཚུལ་ལམ་འཛིན་ཚུལ་དེ་དོན་ལ་གནས་པ་ཞིག་དང༌། ཚད་མ་དང་བཅས་པ་ཞིག་ཡིན་ན། དེ་དང་འགལ་བའི་དེའི་ལྡོག་ཕྱོགས་ཀྱི་བློ་ཡོང་རྒྱུ་མེད། འོན་ཀྱང་ངར་གྲུབ་ཡོད་དམ་མེད་ཅེས་པ་ནི། ངར་འཛིན་པའི་བློས་ཇི་ལྟར་བཟུང་བ་ལྟར་ང་དེ་འདྲ་ཞིག་གྲུབ་ཡོད་མེད་ལ་བསམ་བློ་བཏང་ན། ངར་འཛིན་གྱི་བློས་ཇི་ལྟར་བཟུང་བ་ལྟར་ང་དེ་གྲུབ་མེད་པ་ཞིག་སྟེ། དཔེར་ན། གང་ཟག་གི་བདག་མེད་རགས་པ་སྒྲུབ་པའི་སྒྲུབ་བྱེད་དེ་དག་གིས་ཤེས་ཐུབ་པ་ཞིག་རེད། དེ་བཞིན་གང་ཟག་གི་བདག་མེད་ཕྲ་མོ་བསྒྲུབ་རྒྱུའི་རིགས་པ་དེ་དག་གིས། གང་ཟག་གི་བདག་ཏུ་གྲུབ་པའི་བློ་དེ་འཁྲུལ་བ་ཡིན་པ་དེ་སྒྲུབ་ཐུབ་པ་ཞིག་རེད།
དེར་བརྟེན་ངར་འཛིན་པའི་བློ་འཁྲུལ་བ་ཡིན་པ་དང༌། འཁྲུལ་བ་ཙམ་དུ་མ་ཟད་ཕྱིན་ཅི་ལོག་གི་བློ་ཞིག་དང༌། བློ་དེར་འགལ་ཟླ་སྟོབས་ལྡན་ཡོད་པ་ཞིག་རེད། འགལ་ཟླ་སྟོབས་ལྡན་ཞེས་པ་ནི། རྒྱབ་རྟེན་གྱི་ཚད་མ་ཡོད་ན་འགལ་ཟླ་སྟོབས་ལྡན་ཡིན་ལ། རྒྱབ་རྟེན་གྱི་ཚད་མ་མེད་ན་དེ་འགལ་བ་ཡིན་ཀྱང་སྟོབས་དང་ལྡན་པ་ཆགས་ཀྱི་མེད།
དཔེར་ན། བདག་མེད་རྟོགས་པའི་འགལ་ཟླ་བདེན་འཛིན་ཆགས་ཀྱི་ཡོད། བདེན་འཛིན་ལ་འཛིན་པ་ལྟར་གྲུབ་པའི་སྒྲུབ་བྱེད་མེད་ཅིང༌། དེ་བདག་མེད་རྟོགས་པའི་བློའི་འགལ་ཟླ་ཡིན་ཀྱང་དེ་སྟོབས་ལྡན་མིན། བདེན་འཛིན་གྱི་ལྡོག་ཟླའམ་འགལ་ཟླ་དེ་བདག་མེད་རྟོགས་པའི་ཤེས་རབ་དེ་ཡིན་ཞིང༌། བདག་མེད་པར་རྟོགས་པའི་བློ་དེ་སྟོབས་དང་ལྡན་པ་རེད། གང་ལགས་ཤེ་ན། རྒྱུ་མཚན་ཡོད་ཅིང༌། རྒྱུ་མཚན་ཡོད་སྟབས་ཇི་ཙམ་གྱིས་དཔྱད་ཅིང་སྒོམ་པ་དེའི་ཚོད་ཀྱིས་བློ་དེ་ཤུགས་ཆེ་རུ་འགྲོ་རྒྱུ་ཡོད། རྒྱབ་རྟེན་མེད་པ་དེར་གོམས་འདྲིས་བསྟེན་པ་ཙམ་གྱིས་དང༌། གོམས་ཆའི་ཆ་ནས་ནུས་པ་ཡོད་པ་ཙམ་ལས་དེར་རྣམ་དཔྱོད་ཀྱིས་དཔྱད་ནས་བསམ་བློ་བཏང་ན་དེ་མི་ཚུགས་པ་ཡིན།
ང་རང་ཚོའི་བློའི་ནང་བློ་གཅིག་གི་དེའི་འཛིན་ཚུལ་དེ་དོན་ལ་གནས་པ་དང༌། ཚད་མའི་རྒྱབ་སྐྱོར་དང་སྒྲུབ་བྱེད་ཡོད་པ། གནོད་བྱེད་མེད་པ། བློ་ཅིག་ཤོས་དེའི་འཛིན་སྟངས་དེ་དོན་ལ་མི་གནས་ཤིང༌། དེས་ཇི་ལྟར་བཟུང་བ་ལྟར་མེད་པ་ཞིག་ཡིན་ན། བློ་གཉིས་ལས་གཅིག་དེ་བདེན་པའི་དོན་ཅན་དང༌། ཅིག་ཤོས་དེ་རྫུན་པའི་དོན་ཅན་ཞིག་རེད། དེར་བརྟེན་བློ་དེ་གཉིས་ཡུན་བསྲིངས་ནས་ཕྱིན་ན། ཚ་གྲང་གི་རེག་པ་གཉིས་ཡུན་བསྲིངས་ནས་མཉམ་དུ་བསྡད་མི་ཐུབ་པ་ལྟར་ག་ལེར་བློ་ལ་འགྱུར་ཐེབས་པ་ཞིག་ཏན་ཏན་རེད། དེར་བརྟེན་ཆོས་ཀྱི་སྡོམ་བཞི་གསུངས་སྐབས། གསུམ་པར་ཆོས་ཐམས་ཅད་སྟོང་ཞིང་བདག་མེད་པ་ཞེས་གསུངས། ཆོས་ཐམས་ཅད་སྟོང་ཞིང་བདག་མེད་པ་ཞེས་པ་འདི་ལ་ཕྲ་རགས་ནང་པའི་གྲུབ་མཐའ་སོ་སོའི་ལུགས་ཀྱི་འགྲེལ་བཤད་རྒྱབ་ལུགས་མི་འདྲ་བ་ཡོད་ཀྱང༌། དབུ་མ་པའི་གཞུང་དུ་ཆོས་ཐམས་ཅད་བདེན་པར་མ་གྲུབ་ཅིང༌། ཆོས་ཐམས་ཅད་དོན་དམ་པར་མ་གྲུབ་པ་རེད་ཅེས་གསུངས་ཀྱི་ཡོད།
མདོར་ན་བདེན་པར་མེད་པ་དང༌། ཆོས་ཐམས་ཅད་སྟོང་ཞིང་བདག་མེད་པ། དེ་ལྟར་ཟག་བཅས་ཐམས་ཅད་སྡུག་བསྔལ་བ་ཞེས་པའི་ཟག་པའི་རྩ་བ་བདེན་འཛིན་ཞེས་པ་འདི་ཕྱིན་ཅི་ལོག་གི་བློ་ཡིན་པ་དང༌། དེའི་ཞེན་ཡུལ་ཐ་སྙད་དུ་ཡང་མེད་པ་ངེས་ནས་བློ་ཡུན་རིང་དུ་གོམས་ན༑ བདེན་འཛིན་ཞེས་པ་འདི་རྩ་བ་ནས་མེད་པར་བཟོ་ཐུབ་པ་ཞིག་རེད། དེ་ཡིན་པའི་རྒྱུ་མཚན་ནི། སེམས་རང་བཞིན་གྱི་འོད་གསལ་བ་རེད། རྒྱལ་བ་བྱམས་པ་མགོན་པོའི་རྒྱུད་བླ་མ་དང༌། དེ་བཞིན་དཔལ་མགོན་འཕགས་པ་ཀླུ་སྒྲུབ་ཀྱི་ཆོས་དབྱིངས་བསྟོད་པ་དེ་དག་ནང༌། སེམས་ཀུན་རྫོབ་པའི་བློའི་རང་བཞིན་དེ་འོད་གསལ་བ་ཞིག་རེད་ཅེས། དྲི་མ་དེ་གཉེན་པོ་སྟོབས་ལྡན་ཡོད་པའི་ཆ་ནས་བྲལ་རུང་གི་ཚུལ་དུ་ཡོད་པ་ལས་བློའི་རང་བཞིན་ལ་ཞུགས་པ་ཞིག་མ་རེད་ཅེས་དཔེ་དང་སྒྲུབ་བྱེད་མང་པོའི་ཐོག་ནས་གསུངས་ཡོད། དེ་ཡང་ཆོས་དབྱིངས་བསྟོད་པ་ལས།
ཇི་ལྟར་མེ་ཡིས་དག་པའི་གོས། །
སྣ་ཚོགས་དྲི་མས་དྲི་མ་ཅན། །
ཇི་ལྟར་མེ་ཡིས་ནང་བཅུག་ན། །
དྲི་མ་འཚིག་འགྱུར་གོས་མིན་ལྟར། །
དེ་བཞིན་འོད་གསལ་བ་ཡི་སེམས། །
འདོད་ཆགས་ལ་སོགས་དྲི་མ་ཅན། །
ཡེ་ཤེས་མེ་ཡིས་ཉོན་མོངས་བསྲེག །
དེ་ཉིད་འོད་གསལ་མ་ཡིན་ནོ། །
ཞེས་པ་འདིས་རྡོ་རྒྱུས་ཀྱི་གོས་དྲི་མ་ཅན་དུ་ཡོད་པ་འདི་མེར་སྲེག་ན༑ རྡོ་རྒྱུས་ཀྱི་གོས་ཀྱི་སྟེང་དུ་བགོས་པའི་དྲི་མ་དེ་མེས་འཚིག་པ་ལས། རྡོ་རྒྱུས་དེ་ཉིད་མི་འཚིག་པའི་དཔེ་ལྟར། ང་རང་ཚོའི་སེམས་ཆགས་སོགས་ཉོན་མོངས་ཀྱི་དྲི་མ་དང་བཅས་པ་འདི། སེམས་ཀྱི་གནས་ལུགས་ཤེས་པའི་ཡེ་ཤེས་ཀྱི་མེ་དང་འཕྲད་ཚེ། ཡེ་ཤེས་ཀྱི་མེས་སེམས་དྲི་མ་ཅན་དུ་བྱེད་པའི་འདོད་ཆགས་དང༌། བདེན་འཛིན་ལ་སོགས་པ་བསྲེགས་ནས་མེད་པར་བཟོ་བ་ལས། རང་བཞིན་གྱི་འོད་གསལ་བའི་སེམས་མེད་པར་བཟོ་ཡི་མེད་ཅེས་གསུངས་ཤིང༌། དེས་ན་སེམས་རང་བཞིན་གྱི་འོད་གསལ་བ་ཞེས་པ་དེ་རེད།
ཤེར་ཕྱིན་གྱི་མདོའི་ནང༌། སེམས་ལ་སེམས་མ་མཆིས་ཏེ། སེམས་རང་བཞིན་གྱིས་འོད་གསལ་བའོ། །ཞེས་སེམས་རང་བཞིན་གྱིས་འོད་གསལ་བ་ཡིན་པས་རྒྱུ་མཚན་དེའི་ཆ་ནས་ཀྱང༌། ཆགས་སོགས་ཀྱི་ཉོན་མོངས་ཟག་པ་ཞེས་པ་དེ་དག་ཚང་མ་གློ་བུར་སྟོབས་ཆེན་ཡོད་ཀྱང་དེའི་ཕུག་མི་བརྟན་ཞིང་གཞི་རྩ་མེད་པ་ཞིག་ཡིན། ཆོས་ཐམས་ཅད་སྟོང་ཞིང་བདག་མེད་པ་ཡིན། དེས་ན་ཟག་པས་སྐྱེས་པའི་ཆོས་དེ་དག་སྐྱེད་བྱེད་ཀྱི་རྩ་བ་བྱེད་མཁན་ཟག་པ་དེ་འགག་པའི་སྐབས། དེའི་དབང་གིས་བྱུང་བའི་ཟག་བཅས་ཀྱི་ཆོས་སྡུག་བསྔལ་བ་དེ་དག་མེད་པ་ཆགས་ཐུབ་ཀྱི་རེད། དེ་དག་མེད་པ་ཆགས་སྐབས་མྱང་ངན་ལས་འདས་པ་ཞི་བ་ཞེས་པ་དེ་རེད།
ང༽ ཕྱག་རྒྱ་བཞི་པ། མྱ་ངན་ལས་འདས་པ་ཞི་བ།
དེ་ཡང༌། མྱང་ངན་ཞེས་པ་འདིར་འགྲེལ་ཚུལ་མང་དུ་ཡོད་ཀྱང༌། འགྲེལ་ཚུལ་གཅིག་ལ་བདེན་འཛིན་དང༌། དགག་བྱའི་སྤྲོས་པ་བདེན་གྲུབ། དེར་འཛིན་པའི་བདེན་འཛིན་གྱི་སྤྲོས་པ་དེ་དག་སྡུག་བསྔལ་གྱི་རྩ་བ་ཡིན་པས་དེ་མྱང་ངན་ལ་བཞག་སྟེ་དེ་ལས་ཡོངས་སུ་འདས་པ་ཞེས་པ་གཅིག་དང༌། དེ་ཉེ་བར་ཞི་བའི་སྒོ་ནས་དེ་ལས་ཡོངས་སུ་འདས་པས་ན་མྱང་ངན་ལས་འདས་པ་ཞེས་སོ།།
དེར་བརྟེན་མྱང་ངན་ལས་འདས་པ་ཞི་བ་ཞེས་པ་འདི་ང་ཚོ་ཚང་མས་ཤེས་དགོས་ཤིང༌། སངས་རྒྱས་པའི་ཆོས་ཀྱི་སྙིང་པོ་ནི། ལྟ་བ་རྟེན་འབྱུང་དང༌། སྤྱོད་པ་འཚེ་བ་མེད་པ་ཞེས་པ་དེ་ཁྱེད་རང་ཚོ་མང་པོས་གོ་ཡོད། རྟེན་འབྱུང་གི་ལྟ་བ་ཞེས་པ་འདི་ཅུང་ཙམ་གསལ་དུ་དང་ཟབ་ཏུ་བཏང་ན། འདུས་བྱས་ཐམས་ཅད་མི་རྟག་པ། ཟག་བཅས་ཐམས་ཅད་སྡུག་བསྔལ་བ། ཆོས་ཐམས་ཅད་སྟོང་ཞིང་བདག་མེད་པ། མྱང་ངན་ལས་འདས་པ་ཞི་བ་ཞེས་ལྟ་བ་བཀའ་བཏགས་ཀྱི་ཕྱག་རྒྱ་བཞི་ཞེས་པ་འདིར་ང་ཚོས་བསམ་བློ་གཏོང་དགོས་པ་ཡིན།། །།
