གདེང་ཚོད་ཡོད་པའི་སྒོ་ནས་མི་དེ་ལ་ཡིད་ཆེས་བཅོལ་ཆོག
སྤྱིར་བཏང་གི་འཚོ་བའི་ཁྲོད་ནས་ཀྱང་། མི་ཞིག་ལ་ཡིད་ཆེས་རུང་མིན་དེ། དེར་སྙིང་རྗེ་ཡོད་མེད་ལ་ཐུག་ཡོད། གལ་སྲིད་མི་ཞིག་ལ་སྤྱང་གྲུང་དང་ཚད་མཐོ་བའི་སློབ་སྦྱོང་ཡོད་ནའང་། དེ་སྙིང་རྗེས་དབུལ་ན་ང་ཚོས་ཕལ་ཆེར་ཡིད་ཆེས་མི་བྱེད།
སྙིང་རྗེ་ནི་བློ་སྦྱོང་གི་སྙིང་པོ་དེ་ཡིན།
སྙིང་རྗེ་ནི་བློ་སྦྱོང་གི་སྙིང་པོ་དེ་ཡིན། ང་ཚོས་རྒྱུན་དུ་མྱོང་བཞིན་པའི་འདོད་ཆགས་ལྟ་བུའི་ཉོན་མོངས་ཀྱི་སེམས་ཚོར་དང་། གོམས་གཤིས་ངན་པ་རྣམས་ངོས་བཟུང་ནས། ཡང་བསྐྱར་དེ་དག་གི་གནོད་འཚེ་ལ་བསམ་གཞིག་བྱེད་དགོས་ལ་ཉོན་མོངས་ཀྱི་བློ་དེ་དག་ལ་འོས་འཚམ་གྱི་གཉེན་པོ་བསྟེན་ནས་ དེ་དག་གི་དབང་དུ་མི་འགྲོ་བའི་ཐག་གཅོད་བྱེད་དགོས།
ཡང་དག་པའི་སྙིང་རྗེ་ནི་ཆ་རྐྱེན་ལ་ལྟོས་མེད་ཅིག་ཡིན་དགོས།
ཡང་དག་པའི་སྙིང་རྗེ་ནི་ཆ་རྐྱེན་ལ་ལྟོས་མེད་ཅིག་ཡིན་དགོས་ཤིང་། ཕྱོགས་ལྷུང་དང་ཉེ་རིང་གི་སེམས་ཚོར་ལས་རྒྱལ་ཆེད། ང་ཚོས་ངེས་པར་དུ་བཏང་སྙོམས་ཉམས་སུ་ལེན་དགོས། དེ་ཉམས་ལེན་བྱེད་པའི་ཐབས་ལམ་གཅིག་ནི། མི་ཞིག་ལ་མི་དགའ་བའི་རང་གི་ཚོར་བ་དེ་གཏན་དུ་མི་གནས་པ་ཡང་ང་ཚོའི་ཡིད་ལ་འཆར་ཐུབ་པ་ཞིག་ཡིན། ང་ཚོས་འདི་ལྟར་བསམ་བློ་བཏང་ན། རང་གི་ཉེ་རིང་གི་ཚོར་བ་དྲག་པོ་དེ་ཞན་དུ་འགྲོ་ཞིང་། རང་གི་འདོད་ཆགས་ཀྱི་བློ་དྲག་པོ་དེ་ཡང་ཉམས་རྒྱུ་རེད།
སྒོམ་གྱི་གནས་སྐབས་མ་ཡིན་པའི་དུས་སུ་ཡང་སྙིང་རྗེའི་བློ་དེ་འཛིན་དགོས།
བྱམས་པ་དང་སྙིང་རྗེ་ཆེན་པོས་ཡིད་དྲངས་ཤིང་། གཞན་ཕན་གྱི་བློ་ཡིས་ཀུན་ནས་བསླངས་པའི་ཚེ་ན། ང་ཚོས་སྐྱེ་རྒ་ན་འཆིའི་འཁོར་བའི་བཙོན་མར་གྱུར་པའི་འགྲོ་བ་སེམས་ཅན་ཐམས་ཅད་དེའི་སྡུག་བསྔལ་ལས་གྲོལ་བའི་གཞན་དོན་ལ་བརྩོན་པའི་དམ་བཅའ་ངེས་པར་དུ་འཇོག་དགོས།
རང་ཉིད་ཀྱང་སྙིང་རྗེ་སྐྱེ་སའི་མི་དེ་དག་ལ་བརྟེན་ཡོད་པ་ཤེས་དགོས།
ང་ཚོའི་རྒྱུ་ནོར་ནི་དོན་གྱིས་གཞན་གྱི་ཞབས་འདེགས་དང་མཉམ་ལས་ལ་ཇི་ལྟར་བརྟེན་ཡོད་པ་ཤེས་པར་བྱ་དགོས་ཤིང་། ད་ལྟ་རང་ལ་ཡོད་པའི་བདེ་སྐྱིད་ཀྱི་ཆ་ཤས་རེ་རེ་ནི། གཞན་གྱིས་འབད་བརྩོན་བྱས་པའི་ལས་ཀ་ལ་བརྟེན་ནས་བྱུང་བ་ཡིན། ང་ཚོའི་སྡོད་ཁང་དང་། ལས་ཁུངས། འགྲོ་ལམ། གྱོན་ཆས། ཡང་ན། ཟས་རིགས་བཅས་ལ་ཞིབ་ཏུ་བསམས་ན། དེ་དག་ཡོད་ཚད་མི་གཞན་གྱིས་མཁོ་སྤྲོད་བྱས་ཡོད་པ་ང་ཚོས་ངེས་པར་དུ་ཤེས་དགོས།
སེམས་ཅན་མཐའ་དག་ལ་ཁྱབ་པའི་སྙིང་རྗེ།
འགྲོ་བ་སེམས་ཅན་མཐའ་དག་ལ་ཁྱབ་པའི་སྙིང་རྗེ་ནི། ཁོ་ཚོའི་སྡུག་བསྔལ་ཤེས་པ་ལས་འབྱུང་དགོས་ལ། སྡུག་བསྔལ་སྒོམ་པའི་ཐབས་ལམ་དམིགས་བསལ་བ་གཅིག་ནི། ང་ཚོས་རང་ཉིད་ཀྱི་སྡུག་བསྔལ་བསྒོམས་ན། སྔར་ལས་ལྷག་པའི་ནུས་ཤུགས་དང་གྲུབ་འབྲས་ལྡན་པ་ཞིག་ཏུ་འབྱུང་བ་དང་། དེ་ནས་ང་ཚོས་སྒོམ་འདི་གཞན་གྱི་སྡུག་བསྔལ་གྱི་སྟེང་དུ་རྒྱ་སྐྱེད་བྱ་དགོས།
སྙིང་རྗེའི་བློ་གཏིང་ཇེ་ཟབ་ཏུ་གཏོང་དགོས།
དང་ཐོག་མི་དགེ་བའི་སེམས་དང་སེམས་བྱུང་རྣམས་ཐད་ཀར་དྲུངས་ནས་འབྱིན་མི་ཐུབ་ནའང་། མ་མཐའ་ཡང་རང་ཉིད་བློ་དེ་དག་གི་དབང་དུ་མི་འགྲོ་བ་ཞིག་བྱེད་དགོས། དེ་ནས་ང་ཚོས་སྙིང་རྗེའི་བློ་གཏིང་ཇེ་ཟབ་ཏུ་གཏོང་བ་དང་། རང་རྒྱུད་ཀྱི་ཉོན་མོངས་རྣམས་ལ་ཐད་ཀར་ཁ་གཏད་གཅོག་པར་སྒོམ་གྱི་སྟེང་ལ་འབད་དགོས།
གཞན་སེམས་དང་སྙིང་རྗེའི་བློ་དེ་བསྐྱར་དུ་སྟོབས་ཤུགས་རྒྱས་པར་བྱེད་ཆོག །
ང་ཚོ་སྒོམ་ལ་གོམས་འདྲིས་ཇེ་ཟབ་ཏུ་སོང་བ་དང་། ང་ཚོས་འདོད་པ་ལྟར་དུ་སྒོམ་གྱི་རྣམ་པ་འདི་གཉིས་རེས་མོས་བྱས་ནས་སྒོམ་ཐུབ།
དགྲ་བོར་སྙིང་རྗེ་ཤུགས་དྲག་ཅིག་བསྐྱེད་ཐུབ་ཚེ་ཉམས་ལེན་ལེགས་འགྲུབ་བྱུང་བ་ཡིན།
ང་ཚོས་རང་གི་དགྲ་བོ་དེ་བཟོད་པའི་ཉམས་ལེན་གྱི་རྒྱུ་གལ་ཆེན་དུ་མཐོང་ཐུབ་པར་མ་ཟད། དགྲ་བོའི་ཕྱོགས་ལ་གཞན་ལས་ཀྱང་སྙིང་རྗེ་ཤུགས་དྲག་ཅིག་བསྐྱེད་ཐུབ་ཚེ། དེ་ནི་ང་ཚོའི་ཉམས་ལེན་ལེགས་འགྲུབ་བྱུང་བའི་མཚོན་རྟགས་ཡིན།
ཅི་འདྲའི་སྙིང་རྗེ་དགོས་པ་ཞིག་རེད་ཨང་ཞེས་སྙམ་གྱི་ཡོད།
སྡུག་བསྔལ་གྱི་རང་བཞིན་རྟོགས་པ་དང་། དེའི་དོན་ངོས་འཛིན་བྱེད་པ་ཙམ་གྱིས་མི་ཆོག་པར། སྡུག་བསྔལ་ལས་གྲོལ་བའི་གོ་འཕང་ཞིག་ཡོད་པ་ཤེས་རྒྱུའང་གལ་ཆེན་པོ་ཡིན། འདིར་བདེན་པ་བཞིའི་རྣམ་གཞག་དེ་འབྲེལ་ཡོད་དུ་གྱུར་ཡོད་ལ། འདི་ནི་ནང་པའི་ཐེག་པ་ཆེ་ཆུང་ཀུན་ལ་ཐུན་མོང་བ་ཞིག་ཡིན།
