ཁྱོད་ཀྱི་ཁྱིམ་མཚེས་ལ་སེམས་ཁྲལ་སློང་གི་ཡོད།
གལ་སྲིད་ཁོ་རང་དྲང་བདེན་མེད་བཞིན་དུ། རང་ཉིད་ཞི་ལྷོད་དང་སྐྱིད་པོ། ད་དུང་ཞི་བདེ་ཡོད་པའི་ཐོག་ལ། ལུས་ཕུང་ཡང་བདེ་ཐང་ཡིན་ན། རང་ཉིད་ལ་མུ་མཐུད་ནས་དགའ་སྤྲོ་ཡོད་པར་མ་ཟད། གྲོགས་པོ་མང་པོ་ཞིག་ཀྱང་ཐུག་འཕྲད་དུ་ཡོང་གི་རེད།
བྱམས་བརྩེ་དངོས་གནས་དེ་གཙོ་བོ་གཞན་ལ་སེམས་ཁུར་བྱེད་པའི་བསམ་པ་ཞིག་ཡིན།
ང་ཚོས་སེམས་ཅན་ངེས་ཅན་ཞིག་སེམས་ཐག་ཉེ་བའི་གྲོགས་པོ་དང་གཉེན་ཉེར་བརྩི་ནའང་། གཞན་རྣམས་ཁོ་ཚོས་ང་ཚོ་དང་ང་ཚོའི་གྲོགས་པོ། ང་ཚོའི་གཉེན་ཉེ་དང་ང་ཚོའི་རྒྱུ་དངོས་ལ་སྔར་གནོད་འཚེ་བཏང་ཞིང་། ད་ལྟ་གཏོང་བ་དང་། མ་འོངས་པར་ཡང་གཅིག་མཚུངས་སུ་གཏོང་ངེས་རེད་་སྙམ་པའི་བློ་ཡིས་རྒྱང་རིང་དུ་འཇོག་གི་ཡོད། འདི་ལྟ་བུའི་བསམ་བློ་ལ་བརྟེན་ནས་ང་ཚོ་སེམས་ཅན་འདིའི་རིགས་ཀྱི་ཕྱོགས་སུ་སྡང་སེམས་སྐྱེ།
བྱམས་བརྩེའི་ནུས་སྟོབས་ཇེ་ཆེར་འགྲོ་བ་རེད།
ང་ཚོས་སྡུག་བསྔལ་གྱིས་མནར་བའི་སེམས་ཅན་ཞིག་ལ་བསམ་བློ་གཏོང་སྐབས། སེམས་ཅན་དེས་སྡུག་བསྔལ་མི་འདོད་པ་ནི་ང་ཚོ་དང་གཅིག་མཚུངས་སུ་ཤེས་དགོས། སྡུག་བསྔལ་དེ་ལས་དགྲོལ་ནུས་ན་ཅི་མ་རུང་། སྡུག་བསྔལ་དེ་ལས་གྲོལ་བར་ཤོག་སྙམ་པའི་སྨོན་འདུན་གྱི་བསམ་བློ་ཞིག་ཉམས་སུ་ལེན་པ་དང་། ད་དུང་སྡུག་བསྔལ་ལས་འགྲོལ་བྱེད་ཀྱི་ཐབས་ལམ་རྟོགས་ཤིང་། ཤེས་རྟོགས་དེ་ལ་བརྟེན་ནས་གཞན་གྱི་སྡུག་བསྔལ་མཐོང་ཚེ། ང་ཚོའི་རྒྱུད་ཀྱི་བྱམས་བརྩེའི་ནུས་སྟོབས་ཇེ་ཆེར་འགྲོ་བ་རེད།
གཞན་གྱི་ཕྱོགས་ལ་སེམས་བཟང་པོ་ཞིག་གི་ལྟ་སྟངས་ཡོད་པ་དེ་ཡིན།
བྱམས་བརྩེ་ཅན་གྱི་སེམས་བཟང་པོ་འདི་ནི། ཐ་ན། ཚེ་འདི་ལའང་དགོས་མཁོ་ཡོད་པར་མ་ཟད། མ་འོངས་པར་སྐྱེ་བ་རྒྱུན་མི་འཆད་པར་ལེན་པའི་སྐབས་སུ་ལྷ་དང་མི་ལྟ་བུའི་སྐྱེ་བ་ལེགས་པོ་ཞིག་ལེན་འདོད་མཁན་ལའང་དགོས་མཁོ་ཡོད།
ནག་ཉེས་གསོག་མཁན་ལ་སྙིང་རྗེ་བྱེད་སྟངས།
མི་རྣམས་ཀྱིས་སྲོག་ཐོག་ཉེས་ཆད་དང་ཉེས་ཆད་ཀྱི་དགོས་དོན་སོགས་ཀྱི་གནད་དོན་ལ་མོས་མཐུན་བྱེད་ཀྱི་མེད། འགའ་ཤས་ཀྱིས་ནག་ཉེས་ཁ་ཅིག་ཧ་ཅང་རྫབ་ཆེན་དང་ཧ་ཅང་ཐབས་རྡུགས་ཡིན་པས། ནག་ཉེས་གསོག་མཁན་ལ་སྙིང་རྗེ་རྩ་བ་ནས་བྱེད་མི་དགོས་པ་བསམ་གྱི་ཡོད།
དགེ་རྒན་དང་ཕ་མ་ཚོས་ཕྲུ་གུར་འགྲོ་བ་མིའི་བཟང་སྤྱོད་རྣམས་འཇགས་པར་བྱ་དགོས།
སྲོག་ཆགས་གྲོག་མར་མཚོན་ན། དེ་དག་གིས་སྒེར་དོན་བསྐྱུར་ནས་སྤྱི་དོན་གཉེར་བས། འདི་དང་བསྡུར་ན་ང་ཚོ་བདེ་འགྲོར་སྐྱེས་ཡོད་པའི་ཁུལ་ཡིན་ཀྱང་། སྐབས་རེར། ང་ཚོར་སྤྱི་སེམས་དེ་འདྲ་ཞིག་མེད། དེས་ན། ང་ཚོས་ངེས་པར་དུ་འགྲོ་བ་མི་དང་མཐུན་པའི་བྱ་བ་ཞིག་གཉེར་དགོས།
བྱམས་བརྩེའི་བསམ་བློ་ནི་ཡ་ལན་མེད་པའི་སྙིང་རྗེའི་ཚོར་བ་ཙམ་ཞིག་ལ་བཤད་ཀྱི་མེད།
གལ་སྲིད་མི་སྒེར་བ་ཞིག་གིས་བྱམས་བརྩེའི་སྟེང་ནས་གཞན་ལ་འབྲེལ་བ་བྱས་ཚེ། ཕུགས་ལ་མི་དེ་ཏན་ཏན་སྐྱིད་པོ་ཡོང་གི་རེད། མི་དགེ་བའི་བྱ་གཞག་ལ་བརྟེན་ནས་འཕྲལ་གྱི་ཁེ་ཕན་འབྱུང་སྲིད་ཀྱང་། སེམས་ཀྱི་གཏིང་ལ་མི་བདེ་བའི་ཚོར་བ་ཞིག་རྟག་ཏུ་འབྱུང་གི་རེད།
གྲོགས་པོའི་འབྲེལ་བ་ངོ་མ་ནི་ཕན་ཚུན་གྱི་བརྩེ་སེམས་ལ་ཐུག་ཡོད།
གྲོགས་པོའི་འབྲེལ་བ་གླེང་སྐབས་ང་ཚོས་དེ་ལ་རིགས་གཉིས་ཕྱེ་ཆོག འབྱོར་བ་དང་། དབང་ཆ། སྟོབས་ཤུགས་སོགས་རྨང་གཞིར་བྱས་པའི་གྲོགས་པོའི་འབྲེལ་བ་ནི་ལྷག་བསམ་རྣམ་དག་ཅན་ཞིག་མིན། འབྲེལ་བ་འདི་ལྟ་བུར་མཚོན་ན། འབྱོར་བ་དང་དབང་ཆ་སྟོབས་ཤུགས་སོགས་ཇི་སྲིད་ཡོད་པ་དེ་སྲིད་དུ་གྲོགས་པོའི་འབྲེལ་བ་དེའང་གནས་སྲིད་ཀྱང་། ཉིན་ཞིག་འབྲེལ་བ་དེའི་རྨང་གཞི་འདི་དག་ཉམས་ན། གྲོགས་པོའི་འབྲེལ་བ་དེ་ཡང་རང་བཞིན་གྱིས་ཉམས་འགྲོ་བ་རེད།
མ་བུའི་བར་གྱི་དུངས་སེམས་འདི་ནི་རང་བཞིན་གྱིས་འབྱུང་གི་ཡོད།
རང་གི་ཕྲུ་གུ་ལ་དུངས་པའི་བྱམས་སྐྱོང་ནི། དུད་འགྲོའི་རིགས་མང་པོར་ཐུན་མོང་དུ་ཡོད་པར་སྣང་བ་དང༌། འདི་ནི་གནད་འགག་ཅིག་ཡིན་ཏེ། ཕྲུ་གུ་ལ་རང་གི་གསོན་གནས་ཀྱི་ཆ་ནས་བྱམས་སྐྱོང་དགོས་པར་མ་ཟད། ཨ་མའི་ཕྱོགས་ནའང་བརྩེ་བའི་བྱམས་སྐྱོང་དེ་མཁོ་སྤྲོད་བྱེད་ཐུབ་པའི་ལྷན་སྐྱེས་ཀྱི་ནུས་པ་ཞིག་ཡོད།
རྡོ་དེ་ཕར་བསལ་མ་ཐག་ཏུ་ཆུ་དེ་གློ་བུར་དུ་བཞུར་མགོ་རྩོམ།
དགྲ་ཕྱོགས་ལ་བྱམས་སྙིང་རྗེ་སྒོམ་པ་ནི། ཡུར་བའི་ནང་གི་རྒྱུག་ཆུ་འགོག་བྱེད་ཀྱི་རྡོ་ཆེན་ཞིག་ཕར་བསལ་བ་དང་འདྲ། རྡོ་དེ་ཕར་བསལ་མ་ཐག་ཏུ་ཆུ་དེ་གློ་བུར་དུ་བཞུར་མགོ་རྩོམ། དཔེ་དེ་བཞིན་དུ། ང་ཚོས་དགྲ་བོའི་ཕྱོགས་ལ་བྱམས་སྙིང་རྗེ་སྒོམ་ནུས་མ་ཐག་ཏུ། བློ་དེ་འགྲོ་བ་སེམས་ཅན་ཐམས་ཅད་ཀྱི་ཕྱོགས་ལའང་ལས་སླ་པོར་སྒོམ་ཐུབ།
