ང་ཚོས་དགྲ་བོའི་ཕྱོགས་སུ་བཟོད་པ་སྒོམ་པའི་སྐབས་སུ། དེའི་འབྲས་བུ་དེ་དགྲ་བོ་ལ་བསྔོ་བ་བྱ་དགོས། རྒྱུ་མཚན་གང་ཡིན་ཞེ་ན། དགྲ་བོ་ནི་དགེ་བའི་འབྲས་བུ་དེའི་རྒྱུ་རུ་གྱུར་ཡོད་པས་ཡིན། ང་ཚོས་ཁོ་ཚོའི་བཀའ་དྲིན་ཤེས་པར་བྱ་དགོས། ཁོ་ཚོར་ང་ཚོའི་བཟོད་པའི་ཉམས་ལེན་ལ་སྐུལ་བར་བྱེད་པའི་ཀུན་སློང་མེད་བཞིན་དུ། ང་ཚོས་ཁོ་ཚོར་བསྔོ་བ་ཅི་ལྟར་བྱ་དགོས་པ་ཡིན་ནམ་སྙམ་སྲིད། ཡིན་ན་ཡང་། ང་ཚོས་དངོས་པོ་ཞིག་ལ་བརྩི་མཐོང་བྱ་དགོས་ན། དེ་ལ་ཀུན་སློང་ཞིག་ཡོད་དགོས་སམ། དཔེར་ན། དམ་པའི་ཆོས་ཀྱིས་འགོག་བདེན་དང་ལམ་བདེན་སྟོན་གྱི་ཡོད་ནའང་། དེ་ལ་ང་ཚོར་ཕན་འདོགས་པའི་ཀུན་སློང་ཞིག་མེད། དེ་ལྟར་ན་ཡང་། ང་ཚོས་དེ་ལ་བརྩི་བཀུར་བྱ་དགོས་ངེས་རེད།
ང་ཚོས་ད་དུང་དགྲ་བོས་ཚུར་བསམ་བཞིན་དུ་གནོད་པ་བྱས་པས་ཁོ་ཚོ་ལ་བསྔོ་བ་བྱེད་མི་འོས་པར་བསམ་སྲིད། འོན་ཀྱང་། མི་རྣམས་ནི་སྨན་པ་ལྟར་བྱམས་དང་སྙིང་རྗེ་ཅན་ཞིག་ཡིན་ན། ང་ཚོས་བཟོད་པ་ཇི་ལྟར་ཉམས་སུ་ལེན་ནམ། སྨན་པ་ཞིག་གིས་ང་ཚོར་སྨན་བཅོས་བྱེད་པའི་འདུན་པ་བཅངས་ནས་ཁབ་གཙགས་དང་གཤག་བཅོས་བྱས་པ། ཡང་ན། རྐང་ལག་བཅད་ནས་རྨས་སྐྱོན་གཏོང་སྐབས། ང་ཚོས་ཁོང་ནི་དགྲ་བོ་ལྟ་བུར་བསམ་གྱི་མེད་ལ། དེ་ལ་བརྟེན་ནས་ཁོང་ཁྲོ་ཡང་ལང་གི་མེད། དེར་བརྟེན། ང་ཚོས་ཁོང་ལ་བརྟེན་ནས་བཟོད་པ་ཉམས་སུ་ལེན་མི་ཐུབ། འོན་ཀྱང་། དགྲ་བོ་ཚོས་ང་ཚོར་འཚེ་བ་བྱེད་པའི་ཀུན་སློང་ཡོད་པའི་རྒྱུ་མཚན་གྱིས་ང་ཚོས་ཁོ་ཚོར་བརྟེན་ནས་བཟོད་པ་ཉམས་སུ་ལེན་ཐུབ་ཀྱི་ཡོད།
(སྤྱོད་འཇུག་གི་བཀའ་ཁྲིད་སྨག་རུམ་གློག་འགྱུ་ཞེས་པ་ལས་བཏུས།)
