ང་ཚོ་གཞོན་ཞིང་། གཟུགས་པོ་བདེ་ཐང་ཡིན་དུས། རང་ཉིད་ནི་མི་གཞན་སུ་ལ་ཡང་བརྟེན་མི་དགོས་པའི་ཚོར་བ་ཞིག་ཡོད། འོན་ཀྱང་། འདི་ནི་འཁྲུལ་སྣང་ཞིག་ཡིན་ལ། ཐ་ན། རང་ཉིད་དར་མ་ཡིན་པའི་དུས་སུ་ཡང་ང་ཚོར་གྲོགས་པོ་མཁོ་བ་རེད། ལོ་རྒས་དུས་ལྷག་པར་དུ་གྲོགས་པོ་མང་པོ་དགོས་ཤིང་། དཔེར་ན། ང་རང་ལ་མཚོན་ན། ད་ལྟ་ལོ་ལྔ་བཅུའི་ནང་དུ་ཡོད་རུང་རྒ་བཞིན་པའི་རྟགས་མཚན་སྣ་ཚོགས་འབྱུང་མགོ་བརྩམས་ཡོད། ང་རང་གི་མགོ་ལ་སྐྲ་དཀར་པོ་མང་དུ་འགྲོ་ཞིང་། དེ་བཞིན་ང་རང་ཡར་ལང་བ་དང་མར་འདུག་སྐབས། པུས་མོ་གཉིས་ཕྲན་བུ་ན་བའི་དཀའ་ངལ་ཡང་འབྱུང་གི་ཡོད། ང་ཚོ་ལོ་ན་རྒས་པ་དང་། གཞན་གྱི་བྱམས་སྐྱོང་ལ་བརྟེན་པ་ཆེ་རུ་འགྲོ་ཞིང་། འདི་ནི་ང་ཚོ་འགྲོ་བ་མིའི་མི་ཚེའི་བརྒྱུད་རིམ་གྱི་རང་བཞིན་ཞིག་ཡིན། འཚོ་བའི་ནང་དུ་གཉེན་ཉེ་དུ་དང་གྲོགས་པོ་ཡོད་ན། རང་གི་སེམས་ལ་བདེ་སྐྱིད་ཆེ་བས། རང་གི་གཉེན་ཉེ་དུ་སོགས་ལ་འབྲེལ་སེམས་དང་མཛའ་སེམས་ཇི་ལྟར་འཕེལ་རྒྱས་སུ་གཏོང་དགོས་པའི་དྲི་བ་ནི་གནད་འགག་ཆེན་པོ་ཞིག་ཡིན། ཕྱིའི་དངོས་པོ་བརྒྱུད་ནས་གྲོགས་པོ་ཉོ་རྒྱུ་ཡོད་པ་རེད། འོན་ཀྱང་། གྲོགས་པོ་དེའི་རིགས་ནི། རྒྱུ་ནོར་གྱི་གྲོགས་པོ་ལས་གཞན་མིན། རང་ཉིད་ལ་ཇི་སྲིད་རྒྱུ་ནོར་ཡོད་པ་དེ་སྲིད་དུ་ཁོ་ཚོ་རང་གི་གམ་དུ་ཡོང་ནའང་། རྒྱུ་ནོར་མེད་པའི་མཚམས་སུ་ཁོ་ཚོ་མཐོང་ཡུལ་དུ་མེད། ཁོ་ཚོ་རྒྱུ་ནོར་ཡོད་མཁན་ཞིག་འཚོལ་བར་ཕྱིན་ཡོད། ང་ཚོར་དཀའ་ངལ་འཕྲད་པའི་ཚེ་ན་གྲོགས་པོ་དགོས་པ་ལས་སྐབས་གཞན་དུ་གྲོགས་པོ་དེ་ལྟར་མི་མཁོ། དེ་འདྲའི་དུས་སུ་ཡལ་འགྲོ་བའི་གྲོགས་པོ་ནི་གྲོགས་པོ་ངོ་མ་ཞིག་མིན། ང་ཚོ་དཀའ་ངལ་གྱི་གནས་སུ་ལྷུང་བའི་སྐབས་སུ་རང་ཉིད་ལ་རྒྱབ་སྐྱོར་དང་རམ་འདེགས་བྱེད་མཁན་དེ་གྲོགས་པོ་ངོ་མ་ཡིན།
ང་ཚོས་གྲོགས་པོ་བཟང་པོ་ཞིག་ཇི་ལྟར་འཚོལ་དགོས་སམ་ཞེས་པའི་དྲི་བ་འདི་བསྐྱར་དུ་བཀོད་ན། མི་ཚོར་ཞེ་སྡང་ལངས་ནས་འཁྲུག་པ་བརྒྱབ་ན་གྲོགས་པོ་ངོ་མ་ཞིག་ནམ་ཡང་མི་རྙེད་པ་དང་། གྲོགས་པོའི་འདུ་ཤེས་བཅོས་མ་མ་ཡིན་པ་ནི། དྲང་བདེན་དང་ལྷག་བསམ་ལས་བྱུང་བའི་མཉམ་འབྲེལ་དང་མཉམ་སྤྱོད་ཁོ་ནར་བརྟེན་ནས་འབྱུང་གི་ཡོད། དེའི་ཕྱིར། ང་ཚོར་བློ་གུ་ཡངས་དང་སེམས་པ་བཟང་པོ་ཞིག་དགོས་ལ། ང་རང་གིས་བསམས་ན། འདི་ནི་ང་ཚོས་ཉིན་རེའི་འཚོ་བའི་ནང་མི་གཞན་དང་འབྲེལ་འདྲིས་བྱེད་པའི་ཁྲོད་དུ་མངོན་གསལ་ཡིན།
(བོད་བརྒྱུད་ནང་བསྟན་གྱི་ལྟ་བ་དང་ཉམས་ལེན་གྱི་རྣམ་བཤད་ཅེས་པ་ལས་བཏུས།)
