ང་ཚོའི་འཚོ་བའི་དགོས་དམིགས་གཙོ་བོ་དེའང་བདེ་བ་འཐོབ་རྒྱུ་དེ་རེད། ང་ཚོར་སེམས་ཀྱི་ཞི་བདེ་ལ་བརྟེན་པའི་བདེ་བ་དེ་སྒྲུབ་པའི་ནུས་པ་གཅིག་མཚུངས་སུ་ཡོད། ང་ཚོ་ལ་དབུལ་ཕྱུག་དང་། ཤེས་ཡོན་ཡོད་མེད། ཤ་མདོག་དཀར་མིན། ཤར་ནུབ་གང་ནས་ཡིན་མིན་སོགས་ཀྱི་ཁྱད་པར་ཡོད་ཀྱང་། ང་ཚོའི་ནུས་པ་དེ་གཅིག་མཚུངས་ཡིན། བསམ་བློ་དང་ཚོར་བ་གང་གི་ངོས་ནས་བཤད་ཀྱང་ང་ཚོ་གཅིག་པ་ཡིན། གཟུགས་པོའི་གྲུབ་སྟངས་ཀྱི་ངོས་ནས་ཁ་ཤས་ཤིག་གི་རྣ་བ་ཆེ་ཞིང་། ཤ་མདོག་ཅུང་ཙམ་མི་འདྲ་བ་ཡོད་ཆོག་ནའང་། རྩ་བའི་ཆ་ནས་ང་ཚོ་ཚང་མ་གཅིག་མཚུངས་ཡིན་ལ། མི་འདྲ་ས་ནི་ཆུང་ཙག་ཙམ་ལས་མེད། ང་ཚོའི་བསམ་བློ་དང་ཚོར་བ་གཅིག་མཚུངས་ཡིན་པ་དེ་གལ་ཆེན་རེད།
ང་ཚོ་ལ་རང་རྒྱུད་མ་ཞི་བར་བྱེད་པའི་སེམས་ཚོར་ཡོད་པར་མ་ཟད། རང་སེམས་སུ་ཞི་བདེ་དང་སྟོབས་ཤུགས་སྦྱིན་པའི་སེམས་ཚོར་ཡང་ཡོད། ང་རང་གི་ལྟ་ཚུལ་ལ། ང་ཚོས་སོ་སོའི་ནུས་པ་ཤེས་ནས་རང་ཉིད་དེ་ལ་སྤོབས་པ་སྐྱེ་རྒྱུ་ནི་གལ་ཆེན་ཞིག་ཡིན། སྐབས་རེར། བྱུང་བ་དག་གི་སྡུག་ཕྱོགས་ལ་བལྟས་ནས་རེ་བ་མེད་པའི་ཚོར་བ་ཞིག་སྐྱེ་བཞིན་ཡོད། ལྟ་སྟངས་འདི་ནི་ནོར་འཁྲུལ་ཅན་ཞིག་ཡིན།
ངོས་ལ་ཁྱོད་ཚོར་དབུལ་རྒྱུའི་རྫུ་འཕྲུལ་གང་ཡང་མེད། མཐུ་དང་ནུས་པ་ལྡན་མཁན་ཞིག་ཡོད་ན། ང་རང་གིས་མི་དེའི་རོགས་རམ་ཐོབ་ཐབས་བྱ་རྒྱུ་ཡིན། དྲང་པོར་བཤད་ན། ངོས་ནི་ཐུན་མོང་མ་ཡིན་པའི་ནུས་པ་ཡོད་པར་སྒྲོག་མཁན་ཚོ་ལ་དོགས་པ་བྱེད་མཁན་ཞིག་ཡིན། འོན་ཀྱང་། རྒྱུན་མཐུད་པའི་འབད་བརྩོན་ལ་བརྟེན་ནས་བློ་སྦྱངས་ན། ང་ཚོས་རང་གི་ཀུན་སློང་དང་བསམ་བློའི་འཁྱེར་སོ་ལ་འགྱུར་བ་གཏོང་ཐུབ། འདི་ཡིས་ང་ཚོའི་འཚོ་བའི་ཁྲོད་དུ་ཁ་ཡོད་ལག་ཡོད་ཀྱི་ཁྱད་པར་ཞིག་བཟོ་ཐུབ།
ང་ཚོར་དགེ་ཕྱོགས་ཀྱི་བསམ་བློའི་འཁྱེར་སོ་ཞིག་ཡོད་ན། ཐ་ན། དྲག་རྒོལ་གྱིས་མཐའ་བསྐོར་བའི་སྐབས་སུའང་། ནང་སེམས་ཀྱི་ཞི་བདེ་དེ་བརླག་རྒྱུ་མ་རེད། ཕྱོགས་གཞན་ནས་བཤད་ན། གལ་སྲིད་ང་ཚོའི་བསམ་བློའི་འཁྱེར་སོ་ལ་འཇིགས་སྣང་དང་། ཐེ་ཚོམ། རེ་ཆད། རང་སྡང་ལྟ་བུའི་སེམས་བྱུང་གི་ཤུགས་རྐྱེན་ཐེབས་པའི་སྡུག་ཕྱོགས་ཀྱི་སེམས་ཚོར་ཤུགས་ཆེ་ན། ཐ་ན། ཕྱིའི་མཐུན་རྐྱེན་འཛོམས་ཤིང་། སྙིང་རྗེ་བའི་ཁོར་ཡུག་ཅིག་གི་ནང་དུ། སོ་སོའི་གྲོགས་པོ་ཡག་ཤོས་རྣམས་ཀྱིས་མཐའ་ནས་བསྐོར་ཡོད་པའི་སྐབས་སུའང་། ང་ཚོས་བདེ་སྐྱིད་ཅིག་མི་རྙེད། དེར་བརྟེན། བསམ་བློའི་འཁྱེར་སོ་ཤིན་ཏུ་གལ་ཆེན་ཆགས་ཡོད་ལ། དེས་ང་ཚོའི་བདེ་སྐྱིད་ཀྱི་གནས་སྟངས་ལ་ཁ་ཡོད་ལག་ཡོད་ཀྱི་ཁྱད་པར་ཞིག་བཟོ་བཞིན་ཡོད།
ང་རང་གི་ལྟ་ཚུལ་ལ། ཕྱིའི་དངོས་པོའི་ལོངས་སྤྱོད་དམ་སྒོར་མོས་ང་ཚོའི་དཀའ་ངལ་སེལ་ཐུབ་པར་རེ་ལྟོས་འཆའ་བ་ནི་ནོར་འཁྲུལ་ཞིག་རེད། དགེ་ཕྱོགས་ཀྱི་བྱ་བ་ཞིག་ཕྱིའི་དངོས་པོ་ཁོ་ན་ལས་སྒྲུབ་ཐུབ་པའི་ཡིད་ཆེས་བྱེད་པ་ནི། དངོས་ཡོད་དང་མི་མཐུན་པ་ཞིག་རེད། ཕྱིའི་དངོས་པོའི་མཐུན་རྐྱེན་ནི། ང་ཚོ་ལ་གལ་ཆེ་ཞིང་ཕན་ཐོགས་ལྡན་པ་ཞིག་ཡིན་པ་སྨྲ་མི་དགོས། འོན་ཀྱང་། ང་ཚོའི་ནང་བསམ་བློའི་འཁྱེར་སོ་ཡང་དེ་ལས་གལ་ཆེན་མིན་ནའང་གལ་ཆུང་ཞིག་ག་ལ་ཡིན། རྒྱས་སྤྲོས་ཀྱི་འཚོ་བ་ནི་ང་ཚོའི་ཉམས་ལེན་ལ་འགོག་རྐྱེན་ཞིག་ཆགས་ཡོད་པས། ང་ཚོས་རང་ཉིད་དེའི་རྗེས་སུ་མི་རྒྱུག་པའི་ཐབས་ལ་སྦྱོང་དགོས།
སྐབས་རེར། ནང་སེམས་ཀྱི་རིན་ཐང་རྣམས་བསྐྱུར་ནས་ཕྱིའི་དངོས་པོའི་ཡར་རྒྱས་གཙོ་བོར་འཛིན་པ་ནི། ང་རང་གིས་སྤྱི་ཚོགས་ཀྱི་དར་སྲོལ་ཞིག་ཏུ་མཐོང་གི་འདུག །དེར་བརྟེན། ཕྱིའི་དངོས་པོ་གཙོ་བོར་འཛིན་པ་འདི་དང་། ནང་སེམས་ཀྱི་བསམ་བློའི་འཕེལ་རྒྱས་གཉིས་སྙོམ་སྒྲིག་བྱེད་ཐབས་ལེགས་པོ་ཞིག་ངེས་པར་དུ་འཚོལ་དགོས། སྤྱི་ཚོགས་ཤིག་ཏུ་འཚོ་བའི་བྱ་སྤྱོད་སྟོན་པ་ནི་ང་ཚོའི་རང་བཞིན་ཞིག་ཡིན་པར་སྙམ། ང་ཚོའི་ལེགས་པའི་ཁྱད་ཆོས་རྣམས་ནི། ང་རང་གིས་འགྲོ་བ་མིའི་རིན་ཐང་ངོ་མ་ཞེས་བརྗོད་པ་དག་ཡིན། ཕན་ཚུན་ལ་དོ་ཁུར་དང་། མཉམ་སྤྱོད་བྱེད་པའི་ལེགས་པའི་ཡོན་ཏན་དག་རྒྱུན་འཛིན་བྱེད་པ་དང་། གོང་འཕེལ་དུ་གཏོང་བར་འབད་དགོས་པར་མ་ཟད། མི་གཞན་གྱི་ཐོབ་ཐང་ལའང་བརྩི་བཀུར་ངེས་པར་དུ་བྱེད་དགོས། དེ་ལྟར་བྱས་ན་ད་གཟོད་ང་ཚོས་སོ་སོའི་འབྱུང་འགྱུར་གྱི་བདེ་སྐྱིད་དང་བདེ་དོན་ནི། སྤྱི་ཚོགས་ཀྱི་མི་གཞན་མང་པོ་ཞིག་ལ་བརྟེན་ཡོད་པ་ཤེས་ཀྱི་རེད།
(གུ་ཡངས་ཀྱི་བསམ་བློ་ཞེས་པ་ལས་བཏུས།)
