སོ་སོའི་ཀུན་སློང་ལ་གང་ནུས་ཀྱིས་ཡང་ནས་ཡང་དུ་བརྟག་དཔྱད་བྱོས། ཐ་ན། ཞོགས་པ་མལ་ལས་མ་ལངས་གོང་དུའང་འཚེ་བ་མེད་པ་དང་། ཚིག་རྩུབ་མེད་པའི་ཉིན་མོ་ཞིག་འབྱུང་བའི་རེ་བ་འཛིན་དགོས། དགོང་མོ་ཉལ་ཁར་ཉིན་གཅིག་གི་རིང་བྱ་བ་གང་བྱས་པ་རྣམས་ལ་ཕྱིར་དྲན་གྱིས་བརྟག་དཔྱད་བྱ་དགོས།
ང་ཚོའི་མི་ཚེ་ནང་སྡུག་བསྔལ་ཅི་ལྟ་བུ་ཡོད་མེད་ལ་དོ་སྣང་བྱོས། ང་ཚོར་ན་བ་དང་། རྒ་བ། འཆི་བའི་ལུས་སེམས་ཀྱི་སྡུག་བསྔལ་ཡོད་ལ། དེ་དག་ང་ཚོས་རང་བཞིན་གྱིས་སྤོང་བར་འདོད་ཀྱི་ཡོད།
ཡང་། ཟས་ཞིམ་པོ་ཟ་བ་ལྟ་བུའི་མྱོང་བ་ལས་ཐོབ་ཅིང་། རང་ངོས་ནས་བདེ་བའི་ངོ་བོར་གྲུབ་པ་ལྟ་བུ་ཞིག་ཡོད་ཀྱང་། བདེ་བ་དེའི་རིགས་ལ་མུ་མཐུད་ནས་ལོངས་སུ་སྤྱད་ན། དེ་དག་སྡུག་བསྔལ་གྱི་ངོ་བོར་འགྱུར་གྱི་ཡོད། འདི་རྣམས་འགྱུར་བའི་སྡུག་བསྔལ་ཡིན། བདེ་བའི་ངོ་བོ་ནས་སྡུག་བསྔལ་གྱི་ངོ་བོར་འགྱུར་བའི་ཚེ། ཐོག་མའི་བདེ་བ་དེའི་རང་བཞིན་ངོ་མ་དེ་ཕྱི་ལ་མངོན་པ་ཡིན་ལ། དེ་ལ་ང་ཚོས་ཞིབ་ཏུ་བསམ་བློ་གཏོང་དགོས། དེ་ལྟ་བུའི་ཕྱི་ཚུལ་གྱི་བདེ་བ་ལ་ཆགས་པ་ནི། དོན་ལ་སྡུག་བསྔལ་ཇེ་མང་དང་ཇེ་ཆེར་གཏོང་བ་ཙམ་ཞིག་ཡིན། དེ་བཞིན་ང་ཚོ་ལས་ཉོན་གྱི་གཞན་དབང་དུ་ཡོད་ཚུལ་ལ་བསམ་བློ་གཏོང་དགོས། དེ་ཁྱབ་པ་འདུ་བྱེད་ཀྱི་སྡུག་བསྔལ་སྒོམ་ཚུལ་ཡིན།
སོ་སོའི་མི་ཚེ་སྐྱེལ་སྟངས་ལ་གཟབ་ནན་གྱིས་རྟོག་ཞིབ་བྱ་དགོས། དེ་ལྟར་བྱས་ན་རང་ཉིད་འཕྲུལ་ཆས་ལྟར་འགྱུར་དུ་མི་འཇུག་པ་དང་། དངུལ་འཚོལ་སྒྲུབ་ཙམ་གྱིས་རང་གི་མི་ཚེ་སྟོང་ཟད་དུ་མི་འགྲོ་བ་སོགས་ལ་ཕན་ངེས།
དཀའ་ངལ་འཕྲད་སྐབས། བསམ་བློའི་འཁྱེར་སོ་བཟང་པོ་ཞིག་ཡོང་བར་འབད་བརྩོན་བྱ་དགོས། དཀའ་ངལ་དང་དུ་བླངས་ན་དཀའ་ངལ་དེ་ཆེ་རུ་མི་འགྲོ་ཞིང་། དཀའ་ངལ་དེའི་མཇུག་འབྲས་ངན་པ་ཅི་ཡོད་འགོག་གི་ཡོད། དེ་ལྟ་མིན་ན་མ་འོངས་པར་དཀའ་ངལ་དེ་བས་ཆེ་བ་མྱོང་ངེས། དེ་བཞིན་སེམས་ཅན་གཞན་གྱི་སྡུག་བསྔལ་གྱི་ཁུར་པོ་དེ་དག་རང་ཐོག་ཏུ་ལེན་པའི་ཉམས་ལེན་ལ་འབད་དགོས།
རྒྱུན་དུ་འདོད་ཆགས་དང་། ཁོང་ཁྲོ། ཕྲག་དོག །འཁོན་འཛིན་ལྟ་བུའི་ཉོན་མོངས་རྣམས་ལ་ཕན་གནོད་གང་དག་ཡོད་མེད་བརྟག་དཔྱད་བྱེད་དགོས། དེ་དག་གི་འབྲས་བུ་གནོད་འཚེ་ཅན་ཞིག་ཡིན་པར་སྣང་ན། མུ་མཐུད་དེ་དཔྱད་པ་གྱིས་དང་། རིམ་པས་ངེས་པ་བརྟན་པོ་ཞིག་རྙེད་ངེས། དཔེར་ན། ཁོང་ཁྲོའི་ཉེས་སྐྱོན་ཡང་ཡང་བསམས་ན། ཁོང་ཁྲོ་ནི་དགོས་མེད་ཅིག་ཡིན་པའི་ངེས་པ་བརྟན་པོ་རྙེད་ཅིང་། དེའི་སྟོབས་ཀྱིས་སོ་སོའི་རྒྱུད་ལ་ཡོད་པའི་ཁོང་ཁྲོ་དེ་རིམ་གྱིས་ཉམས་འགྲོ་བ་རེད།
སྡུག་བསྔལ་གྱི་དབྱེ་བ་ངོས་བཟུང་རྗེས་དེ་དག་གི་རྒྱུ་ལ་རྟོག་ཞིབ་བྱ་དགོས། སྡུག་བསྔལ་གྱི་རྩ་བ་ནི་མ་རིག་པ་སྟེ། ཆོས་དང་གང་ཟག་གི་གནས་ལུགས་ལ་རྨོངས་པའི་མ་རིག་པ་ཡིན་ལ། དེའི་འབྲས་བུ་ལ་འདོད་ཆགས་དང་། ཞེ་སྡང་སོགས་ཡོང་གི་ཡོད། སྡུག་བསྔལ་སྤོང་ནུས་པར་མ་ཟད། དེའི་རྩ་བ་ཡང་སྤོང་ནུས་པ་ཞིག་ཡིན་པ་དང་། འགོག་བདེན་འཐོབ་སྲིད་པ་ཞིག་ཡིན་ཞིང་། དེ་ཡང་། ལམ་བདེན་གྱིས་བསྡུས་པའི་ཚུལ་ཁྲིམས་དང་། ཏིང་ངེ་འཛིན། ཤེས་རབ་བཅས་ཀྱི་ཉམས་ལེན་བརྒྱུད་ནས་འཐོབ་དགོས་པ་སོགས་དྲན་པར་བྱ་དགོས།
སོ་སོའི་རྒྱུད་ལ་ཟས་དང་གོས་དང་གནས་ཁང་སོགས་ལ་ཆགས་པའི་བློ་གང་ཡོད་མེད་ངོས་འཛིན་བྱ་དགོས། ཁྱིམ་པའི་འཚོ་བ་ལ་རབ་བྱུང་གི་ཆོག་ཤེས་དེ་ལྟ་བུ་ཉམས་སུ་ལེན་དགོས། ཟས་གོས་གནས་མལ་འགྲིག་ཙམ་གྱིས་ཚིམ་པར་བྱས་ཏེ་དུས་ཚོད་ལྷག་འཕྲོ་རྣམས་སྒོམ་གྱི་ཐོག་ལ་གཏོང་དགོས། དེ་ལ་བརྟེན་ནས་ཁྱེད་ཀྱིས་དཀའ་ངལ་མང་པོ་ཞིག་ལ་གདོང་ལེན་བྱེད་ཐུབ། གཞན་གྱིས་རང་ཉིད་ཁ་སྐྱེངས་པོ་བཟོ་བ་དང་། དམའ་འབེབས་བྱེད་པ། ཁ་རྡུང་གཏོང་བ། འབུད་རྒྱག་གཏོང་བ། རྡུང་རྡེག་སོགས་གང་བྱས་ཀྱང་། ལུས་ངག་གང་རུང་གིས་འཚེ་བའི་ཡ་ལན་མི་བྱེད་པའི་ཚོར་ཤུགས་དྲག་པོ་ཞིག་བསྐྱེད་དགོས།
རང་གི་ཕུང་པོའི་ཆ་ཤས་ཡིན་པའི་པགས་པ་དང་། ཤ་ཁྲག །རུས་པ་སོགས་བློ་ངོར་བཞག་པའི་ཐོག་ནས་དེ་དག་ལ་དོན་དངོས་དང་མཐུན་པའི་ལྟ་ཚུལ་ཞིག་འཛིན་དགོས།
(འཚོ་བའི་དོན་སྙིང་འཚོལ་བ་ཞེས་པ་ལས་བཏུས།)
