སྲོག་གཅོད་པའི་སྦྱོར་བ་གཅིག་ལ་མཚོན་ནའང་། རྒྱུ་རྐྱེན་ཐམས་ཅད་ཚང་ཡོད་མེད་ཀྱི་དབང་གིས་ལས་དེ་བྱེད་མཁན་ལ་སྡིག་པ་ཆེ་ཆུང་སྣ་ཚོགས་ཡོད། དཔེར་ན། མི་ཞིག་གིས་གཞན་གྱི་སྲོག་གཅོད་པ་ལྟ་བུར་མཚོན་ན། སྲོག་གཅོད་པའི་ཀུན་སློང་དྲག་པོ་ཞིག་ཡོད་པ་དང་། ཐ་ན། གཞན་དེ་གསོད་པའི་ཐབས་ལམ་ཡང་ཧ་ཅང་གདུག་རྩུབ་ཅན་ཡིན་པ་ལྟ་བུ་ཡོད། གལ་སྲིད་སྲོག་གཅོད་པ་ནི་ཞེ་སྡང་གིས་ཀུན་ནས་བསླངས་ཡོད་ན། སྲོག་གཅོད་པའི་ཐབས་དེ་ནི་ཧ་ཅང་གདུག་རྩུབ་ཅན་ཞིག་ཡིན་པ་སྨོས་མ་དགོས། སྲོག་བཅད་པའི་མཐའ་མར། གསོད་མཁན་ལ་སྲོག་གཅོད་པའི་བྱ་བ་ཡོངས་སུ་གྲུབ་ནས་ཡིད་ཚིམས་པའི་སྣང་བ་ཞིག་ཀྱང་འབྱུང་སྲིད། ལས་འདི་ལྟ་བུ་ལ་སྡིག་པ་ཆེ་ཤོས་དེ་ཡོད། དེ་ལྟར་ཡང་། གསོད་པའི་ཐབས་ལམ་ལ་གདུག་རྩུབ་ཆུང་བ་དང་། གསོད་འདོད་ཀྱི་ཀུན་སློང་སྐྱེ་བའི་སྐབས་སུ་ཚོར་བ་ཤུགས་ཆེན་པོ་མེད་པ། སྲོག་བཅད་ཚར་བའི་རྗེས་སུ་དེ་ལ་བློ་འགྱོད་ཡོད་པ་སོགས་ཡིན་ན། སྡིག་པ་བསགས་པ་དེ་གོང་དང་བསྡུར་ན་ཅུང་ཆུང་བ་ཡོད།
དེར་མ་ཟད། ཞེ་སྡང་གིས་ཀུན་ནས་བསླངས་ནས་སྲོག་བཅད་པའི་ལས་ཀྱི་ནང་དུའང་ཞེ་སྡང་ལ་ཕྲ་རགས་ཀྱི་རིམ་པ་མང་པོ་ཞིག་དབྱེ་རྒྱུ་ཡོད། ད་དུང་སྲོག་གཅོད་པའི་ལས་དེ་ལོ་མང་པོར་འཆར་གཞི་འཐེན་པ་ཞིག་ཡིན་ན། སྦྱོར་བ་དང་རང་གི་སྐབས་སུ་ཁོང་ཁྲོ་མངོན་གྱུར་མེད་ནའང་། ང་ཚོས་དེ་ལ་ཁོང་ཁྲོ་ཡང་མེད་པ་ཡིན་པར་བརྗོད་མི་ཐུབ་ཅིང་། ལས་དེ་བྱེད་མཁན་གྱི་སེམས་པའི་གཏིང་ན་ཞེ་སྡང་ཡོད། ཡིན་ན་ཡང་། ལས་དེ་བྱེད་ཀྱིན་པའི་སྐད་ཅིག་དེར་སེམས་ཚོར་དྲག་པོ་མེད།
བོད་པའི་བཤད་སྲོལ་ཞིག་ལ། མི་ཞིག་ལ་བློ་རིག་ཇི་ལྟར་ཆེ་བ་ཡོད་པ་དེའི་ཚོད་ཀྱིས་རང་གི་ཞེ་སྡང་སྐུང་བར་མཁས་པ་ཡིན་པས། མི་ཞིག་ལ་ཁོང་ཁྲོའམ་ཞེ་སྡང་ཇི་ཙམ་གྱིས་ཆེ་བ་ཡོད་པ་དེའི་ཚོད་ཀྱིས་མི་དེས་ཞི་དུལ་གྱི་རྣམ་འགྱུར་སྟོན་པ་རེད། ང་རང་གིས་དངོས་གནས་དེ་འདྲ་ཡིན་མིན་མི་ཤེས།
(ཁོང་ཁྲོ་བཅོས་ཐབས། ནང་པའི་བཟོད་སྒོམ་གྱི་ནུས་སྟོབས་ཞེས་པ་ལས་བཏུས།)
