བདེ་བའི་འཚོལ་སྙེག་ནི་གསོན་གནས་དང༌། ལུས་ཕུང་གི་བཀྲེས་སྐོམ་བསལ་བ་ཙམ་ལས་མ་འདས་པའི་དུད་འགྲོ་དང་མ་འདྲ་བར། ང་ཚོ་འགྲོ་བ་མི་ལ་གནས་རིམ་ཟབ་མོ་ཞིག་ནས་བདེ་བ་མྱོང་བའི་ནུས་པ་ཡོད་ལ། དེ་ལྟ་བུའི་བདེ་བ་ཞིག་རྙེད་ན། བདེ་བ་དེར་མི་འདོད་པའི་མྱོང་བ་གཞན་ཟིལ་གྱིས་གནོན་པའི་ནུས་པའང་ལྡན་ཞིང༌། གཡུལ་འགྱེད་ལ་ཞུགས་པའི་དམག་མི་ཞིག་ལ་མཚོན་ན། རང་ཉིད་རྨས་ཡོད་རུང་རང་ཕྱོགས་རྒྱལ་ཡོད་ཚེ། རྒྱལ་ཁ་དེར་བརྟེན་ནས་བྱུང་བའི་ཡིད་ཚིམ་གྱི་བདེ་བས་གཡུལ་འགྱེད་ཤོར་བའི་ཕྱོགས་སུ་གཏོགས་ཤིང༌། རྨས་གཅིག་མཚུངས་ཤིག་ཕོག་ཡོད་པའི་དམག་མི་ཞིག་གི་ན་ཟུག་ལས་ལྡབ་མང་པོར་རང་གི་ན་ཟུག་ཉུང་དུ་གཏོང་ཐུབ། གནས་རིམ་ཟབ་མོ་ཞིག་ནས་བདེ་བ་མྱོང་ཐུབ་པའི་འགྲོ་བ་མིའི་ནུས་པ་འདི་ནི། ད་དུང་རོལ་དབྱངས་དང་སྒྱུ་རྩལ་སོགས་ཀྱིས་ཕྱི་དངོས་པོའི་ལོངས་སྤྱོད་ཀྱི་བདེ་བ་ལས་ལྷག་པའི་ཚད་མཐོའི་བདེ་ཚོར་ཞིག་ང་ཚོར་སྤྲོད་ཐུབ་པའི་རྒྱུ་མཚན་ཡང་ཡིན།
(སྟོང་ལོ་གསར་བའི་བླང་དོར་གྱི་རྣམ་གཞག་ཅེས་པ་ལས་བཏུས།)
