གཞན་གྱི་བཀའ་དྲིན་དྲན་པའི་ཐབས་ལམ་དམིགས་བསལ་གཅིག་ནི། འགྲོ་བ་རྣམས་ང་ཚོའི་གཉེན་ཉེར་གྱུར་མྱོང་བའི་རྒྱུ་མཚན་ཙམ་མིན་པར། དེ་དག་ཐད་ཀ་དང་ཐད་ཀར་མ་ཡིན་པའི་ཕྱོགས་མང་པོ་ཞིག་ནས་ང་ཚོ་ལ་བཀའ་དྲིན་ཅན་དུ་བསམ་ཞིབ་བྱ་རྒྱུ་དེ་རེད། འགྲོ་བ་མིའི་འཚོ་གནས་འདི་ལ་བསམ་བློ་བཏང་ན། ང་ཚོ་ཚང་མ་ཕན་ཚུན་དམ་པོར་འབྲེལ་ཡོད་ལ། ང་ཚོས་ཅི་ཞིག་ལོངས་སུ་སྤྱོད་པ་རྣམས་ནི་མི་གཞན་པའི་ངལ་རྩོལ་གྱི་འབྲས་བུ་རེད། ཐོན་སྐྱེད་བྱས་པའི་དངོས་རྫས་རྣམས་བཟོ་གྲྭའི་ནང་གི་ལས་མི་ཚོས་བཟོས་ཤིང་། ཁོ་ཚོའི་ཐོན་རྫས་ཀྱི་ཁྲོད་དུ་བཀོལ་སྤྱོད་བྱས་པའི་ལས་སྣོན་མ་བྱས་པའི་རྒྱུ་ཆ་རྣམས་ནི་མི་གཞན་པས་ས་འོག་ནས་བསྔོགས་པ་རེད། ང་ཚོས་གཞུང་འདི་ལ་ཉན་པ་དང་ཡང་ན། གཞུང་འདི་ཀློག་པའི་སྐབས་ལ་ལོངས་སུ་སྤྱད་བྱའི་མཐུན་རྐྱེན་ཚང་མ་ང་ཚོའི་མཛའ་གྲོགས་སུ་གྱུར་པའི་འགྲོ་བ་གྲངས་མེད་ཀྱིས་བསྐྲུན་པ་ཡིན་ལ། ཁོ་ཚོའི་ངལ་རྩོལ་ལ་བརྟེན་ནས་ང་ཚོ་སྐྱིད་པོར་སྡོད་ཐུབ། དེ་བཞིན་དུ་ལམ་སྟོན་ཅི་ཡང་མེད་ནའང་། སྐྱབས་མེད་མགོན་མེད་ཀྱི་འགྲོ་བ་གྲངས་མེད་ཅིག་ཡོད་པ་དེ་ཙམ་ལ་བརྟེན་ནས། ང་ཚོས་བླ་ན་མེད་པའི་བྱང་ཆུབ་ཀྱི་སེམས་བསྐྱེད་ཐུབ་ཅིང་། ང་ཚོས་སེམས་བསྐྱེད་ཉམས་སུ་ལེན་ཐུབ་པ་ནི། མཛའ་གྲོགས་འགྲོ་བ་གཞན་རྣམས་ཀྱི་བཀའ་དྲིན་ཡིན་ལ། ཐ་ན། མཐར་ཐུག་སངས་རྒྱས་ཀྱི་གོ་འཕང་ཐོབ་ཐུབ་པ་ཡང་ཁོ་ཚོའི་བཀའ་དྲིན་ཉག་གཅིག་ཡིན། ང་ཚོ་དང་འགྲོ་བ་གཞན་རྣམས་གཅིག་མཚུངས་ཡིན་པ་ཙམ་མ་ཡིན་པར། དེ་དག་ང་ཚོ་ལ་བཀའ་དྲིན་ཤིན་ཏུ་ཆེ། དེའི་ཕྱིར། དེ་དག་གི་བཀའ་དྲིན་དྲན་པ་ལ་བརྟེན་ནས་ཁོ་ཚོ་རང་ལ་སྙིང་ཉེ་བ་དང་ཡིད་དུ་འོང་བར་མཐོང་ཐུབ་ལ། འགྲོ་བ་དེ་དག་ཐོག་མཐའ་བར་གསུམ་དུ་ང་ཚོ་ལ་བཀའ་དྲིན་ཇི་ལྟར་ཆེ་བ་རྟོགས་ཐུབ།
(འཚོ་བའི་ཁྲོད་ཀྱི་དགའ་སྤྲོ་དང་། འཆི་བའི་སྐབས་ཀྱི་ཞི་བདེ་ཞེས་པ་ལས་བཏུས།)
