ཆོས་རྣམས་ཕྱི་རོལ་གྱི་བྱེད་པོ་ཞིག་གིས་གསར་སྐྲུན་བྱས་པའམ། ཡང་ན། དེའི་བློའི་གཡོ་བ་སྔོན་དུ་བཏང་ནས་བསྐྲུན་པར་ཡིད་ཆེས་མི་བྱེད་ལ། རྟག་བརྟན་གྱི་རྒྱུ་ཞིག་ལས་འབྱུང་བར་ཡང་ཡིད་ཆེས་མི་བྱེད། ནང་པ་ཚོས་བདེ་སྡུག་གི་མྱོང་བ་དང་། དེ་དག་གི་རྒྱུ་རྐྱེན་རྣམས་ང་ཚོ་རང་ཉིད་ཀྱི་བྱ་སྤྱོད་ལ་ལྟོས་པར་འདོད་ཅིང་། ང་ཚོའི་བྱ་སྤྱོད་ཀྱི་རང་བཞིན་ནི་སེམས་དུལ་མ་དུལ་ལ་ཐུག་ཡོད། དེ་དག་གི་རྒྱུ་རྐྱེན་རྣམས་ང་ཚོ་རང་ཉིད་ཀྱི་བྱ་སྤྱོད་ལ་ལྟོས་པར་འདོད་ཅིང་། ང་ཚོའི་བྱ་སྤྱོད་ཀྱི་རང་བཞིན་ནི་སེམས་དུལ་མ་དུལ་ལ་ཐུག་ཡོད། རང་སེམས་མ་དུལ་བའི་རྒྱུ་མཚན་གྱིས་དཀའ་ངལ་དང་སྡུག་བསྔལ་འབྱུང་གི་ཡོད་པས། དོན་དངོས་ཐོག །རང་གི་བདེ་སྐྱིད་ནི་རང་ཉིད་ཀྱི་ལག་ཏུ་ཡོད། མི་གཞན་གྱིས་ང་ཚོར་བདེ་སྐྱིད་སྤྲོད་པའི་རེ་བ་བྱ་རྒྱུ་མེད་པར། དེའི་འགན་འཁྲི་རང་ཉིད་ཀྱི་ཕྲག་ཏུ་བབས་ཡོད། བདེ་སྐྱིད་འཐོབ་པའི་ཐབས་ལམ་ནི། བདེ་སྐྱིད་ཀྱི་རྒྱུ་ངོས་བཟུང་ནས་རྒྱུ་དེ་སྒྲུབ་པ་དང་། སྡུག་བསྔལ་གྱི་རྒྱུ་ངོས་བཟུང་ནས་རྒྱུ་དེ་སྤོང་བ་དེ་རེད། ང་ཚོས་ཅི་ཞིག་ཉམས་སུ་བླང་བྱ་དང་། གང་ཞིག་སྤང་བྱ་ཡིན་པ་རྟོགས་ཚེ། བདེ་སྐྱིད་རང་བཞིན་གྱིས་ཡོང་གི་རེད།
སྡུག་བསྔལ་གྱི་རྩ་བ་རྨོངས་པ་ཡིན་ཞིང་། འདིར་བཤད་པའི་རྨོངས་པ་ནི། བདག་འཛིན་མ་རིག་པ་ཡིན། ང་ཚོས་མྱོང་བའི་སྡུག་བསྔལ་མཐའ་ཡས་པ་ནི། མ་རིག་པའི་བློ་སྟེ། བློ་ཕྱིན་ཅི་ལོག་འདི་ལ་བརྟེན་ནས་འབྱུང་གི་ཡོད། དེའི་ཕྱིར། སྟོན་པ་སངས་རྒྱས་ཀྱིས་སྙིང་རྗེའི་དབང་གིས་ཕྱིན་ཅི་ལོག་གི་བློ་ཐམས་ཅད་སྤངས་པར་གསུངས་ཡོད་ལ། ཁོང་ལ་འགྲོ་བ་སེམས་ཅན་ཐམས་ཅད་ལ་ཕན་པ་སྒྲུབ་འདོད་ཀྱི་སྙིང་རྗེ་མངའ་ཞེས་པའི་དོན་ཡང་འདི་རེད།
(འཚོ་བའི་ཁྲོད་ཀྱི་དགའ་སྤྲོ་དང་། འཆི་བའི་སྐབས་ཀྱི་ཞི་བདེ་ཞེས་པ་ལས་བཏུས།)
