དེ་རིང་ང་ཚོས་སོ་སོའི་དགྲ་བོར་བརྩི་བའི་མི་རྣམས་གཏན་དུ་དེ་ལྟར་གནས་ངེས་མིན་ལ། དེ་ནི་ང་ཚོའི་གཉེན་གྱི་ཕྱོགས་ལའང་གཅིག་མཚུངས་ཡིན། དེར་མ་ཟད། སྐབས་རེར། གཉེན་གྱི་ཕྱོགས་ལ་ང་ཚོའི་ཚོར་སྣང་གིས། དཔེར་ན། ཆགས་ཞེན་ལྟ་བུས་ང་ཚོར་དཀའ་ངལ་བཟོ་སྲིད། ཆབས་ཅིག་སྐབས་རེར། དགྲ་དང་འབྲེལ་གཏུགས་བྱེད་པས། གཅིག་བྱས་ན་ང་ཚོར་སྟོབས་ཤུགས་སྦྱིན་པ་དང་སྤྱང་གྲུང་ལྡན་པར་གྱུར་ཏེ། ཁེ་ཕན་འཐོབ་སྲིད། དེ་ལྟའི་རྙོག་འཛིང་ལ་བསམ་ཞིབ་བྱས་པས། གང་ལྟར་མི་དེ་དག་ཚོ་ཁག་གསུམ་པའམ་དང་པོའི་ཁོངས་མི་གང་ཡིན་ཀྱང་། ཐལ་ཆ་ཆེ་བའི་སྒོ་ནས་གཞན་ལ་འབྲེལ་གཏུགས་བྱེད་པའི་ཕན་མེད་ཀྱི་རང་བཞིན་ཐོག་རང་ལ་བསམ་ཞིབ་ནན་པོ་བྱེད་དུ་འཇུག་གི་ཡོད། ནམ་ཞིག་གཞན་ལ་འབྲེལ་གཏུགས་བྱེད་སྟངས་འདིས་གཞན་ལ་སེམས་ཁུར་བྱ་རྒྱུ་གོང་འཕེལ་གཏོང་བའི་རང་གི་ནུས་པ་ཇེ་ཆུང་དུ་གཏོང་བ་དང་རང་གི་སེམས་ཀྱི་ཞི་བདེར་ཤུགས་རྐྱེན་ངན་པ་ཞིག་ལྡན་པ་རང་གིས་མཐོང་བ་ན། ཐལ་ཆ་ཆེ་བའི་རང་གི་ཚོར་སྣང་ཤུགས་ཆུང་དུ་གཏོང་ཐབས་བྱེད་དགོས། སྐབས་ཤིག་ལ་དམིགས་ཡུལ་ནི། རང་གིས་ཉེ་རིང་གི་སྒོ་ནས་མི་རྣམས་སྡེ་ཚན་དུ་ཕྱེས་པ་བཞིན་དགྲ་དང་གཉེན་གྱི་འདུ་ཤེས་མེད་པར། གཞི་རྩའི་འདྲ་མཉམ་གྱི་ཆ་ནས་སྤུན་ཟླ་མི་རིགས་གཅིག་གྱུར་ཡིན་པ་རང་གིས་ངོས་འཛིན་བྱས་ནས། གཞན་ལ་འབྲེལ་བ་བྱེད་ཐུབ་པ་ཡོང་གི་ཡོད།
(ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།)
