ང་ཚོས་སོ་སོའི་ནམ་རྒྱུན་གྱི་བསམ་བློའི་འཁྱེར་སོ་ལ་བརྟག་དཔྱད་བྱས་པ་ཡིན་ན། སེམས་ཅན་རྣམས་རིགས་གསུམ་དུ་དབྱེ་བ་རྟོགས་ཐུབ་ཅིང་། སེམས་ཐག་ཉེ་པོ་བྱ་སའི་རིགས་དང་། སྡང་སེམས་སྐྱེ་སའི་རིགས། སེམས་ཚོར་ཅི་ཡང་མེད་སའི་རིགས་བཅས་ཡིན། ང་ཚོས་སེམས་ཅན་ངེས་ཅན་ཞིག་སེམས་ཐག་ཉེ་བའི་གྲོགས་པོ་དང་གཉེན་ཉེར་བརྩི་ནའང་། གཞན་རྣམས་ ཁོ་ཚོས་ང་ཚོ་དང་ང་ཚོའི་གྲོགས་པོ། ང་ཚོའི་གཉེན་ཉེ་དང་ང་ཚོའི་རྒྱུ་དངོས་ལ་སྔར་གནོད་འཚེ་བཏང་ཞིང་། ད་ལྟ་གཏོང་བ་དང་། མ་འོངས་པར་ཡང་གཅིག་མཚུངས་སུ་གཏོང་ངེས་རེད་་སྙམ་པའི་བློ་ཡིས་རྒྱང་རིང་དུ་འཇོག་གི་ཡོད། འདི་ལྟ་བུའི་བསམ་བློ་ལ་བརྟེན་ནས་ང་ཚོ་སེམས་ཅན་འདིའི་རིགས་ཀྱི་ཕྱོགས་སུ་སྡང་སེམས་སྐྱེ། འདི་ལྟ་བུའི་གནས་སྟངས་འོག་ཏུ་ལྷུང་དུས། ང་ཚོས་སེམས་ཅན་ཐམས་ཅད་ལ་བྱམས་བརྩེ་སྒོམ་དགོས་ཚུལ་བཤད་རུང་། དོན་དངོས་ཐོག་སོ་སོའི་དགོས་མཁོའི་དབང་གིས་ང་ཚོའི་བྱམས་བརྩེ་དེ་ཕྱོགས་རིས་ཅན་དང་ཕྱི་ཚུལ་ཙམ་ཡིན། དེར་བརྟེན། སེམས་ཅན་ཐམས་ཅད་ཀྱི་ཆེད་དུ་བྱམས་བརྩེ་ངོ་མ་ཞིག་བསྐྱེད་པ་ལ། ང་ཚོས་ཐོག་མར་སེམས་ཅན་ཐམས་ཅད་འདྲ་མཉམ་དུ་ལྟ་བའི་བསམ་བློ་ཕྱོགས་རིས་བྲལ་བ་སྟེ་བཏང་སྙོམས་གོང་མཐོར་གཏོང་དགོས།
ད་རུང་གྲོགས་པོ་དང་གཉེན་ཉེ་ལ་སེམས་ཐག་ཉེ་བའི་ཚོར་སྣང་སྐྱེ་ཞིང་། རྒྱུན་པར་ཁོ་ཚོར་བརྩེ་བ་བྱེད་རུང་། བརྩེ་བ་ཕྱོགས་རིས་པ་འདི་བདག་འཛིན་དང་འདོད་ཆགས་ལས་འབྱུང་བཞིན་པ་རྟོགས་རྒྱུ་གལ་ཆེ། ང་ཚོའི་མངོན་གསལ་དོད་པོའི་བརྩེ་བ་འདིའི་རྒྱབ་ཏུ་རང་གཅེས་འཛིན་གྱི་ཀུན་སློང་ཞིག་ཡོད། ང་ཚོས་མི་འདིས་ང་ལ་ཕན་འདི་ལྟར་བཏགས་སོང་དང་། ཡང་ན། མི་དེ་ང་ལ་དེ་ལྟར་འབྲེལ་བ་ཡོད་པར་སྙམ་ནས་ཕྱོགས་རིས་བྱེད། དེ་བས་ན། ང་ཚོས་ཉིན་རེའི་འཚོ་བའི་ཁྲོད་ཀྱི་ཚིག་བརྩེ་བ་ཞེས་པ་འདི་བཀོལ་སྤྱོད་བྱེད་སྐབས། དོན་དངོས་ཐོག་དེ་ལ་ཆགས་པ་ཞེས་བཏགས་ན་འགྲིག །
བྱམས་བརྩེ་དངོས་གནས་དེ་ཅི་འདྲ་ཞིག་ཡིན་ཞེ་ན། དེ་ནི་གཙོ་བོ་གཞན་གྱི་བདེ་སྡུག་གི་གནས་སྟངས་ལ་སེམས་ཁུར་བྱེད་པའི་བསམ་པ་ཞིག་ཡིན། རང་དང་འདྲ་བར་གཞན་གྱིས་ཀྱང་སྡུག་བསྔལ་དང་བྲལ་ན་འདོད་ཀྱི་ཡོད། དེར་བརྟེན། གཞན་དག་སྡུག་བསྔལ་གྱིས་གཟིར་དུས་བྱམས་བརྩེ་ལྡན་པའི་མི་ལ་སེམས་ཁུར་སྐྱེས་ནས་ཁོ་ཚོ་དེ་ལས་སྒྲོལ་བའི་དམིགས་ཡུལ་བཟང་པོ་སྐྱེད་ཀྱི་ཡོད། ང་ཚོ་མི་དཀྱུས་མ་རྣམས་ལ་མཚོན་ན། གྲོགས་པོ་དང་གཉེན་ཉེ་ལ་སེམས་ཐག་ཉེ་བའི་ཚོར་བ་དེ་འདོད་ཆགས་ཀྱི་རྣམ་པ་ཙམ་ཞིག་ཡིན། དེ་གཉོམ་དུ་གཏོང་དགོས་པ་ལས་གོང་མཐོར་གཏོང་མི་རུང། བྱམས་བརྩེ་དང་ཆགས་པ་གཉིས་མ་འཁྲུལ་བར་བྱ་རྒྱུ་གལ་ཆེ་ཞིང་། དཔེ་ཆ་འགའ་རེའི་ནང་དུ་བྱམས་བརྩེ་སྟོན་ཆེད། ཆགས་པ་ཞེས་པའི་ཚིག་འདི་བཀོལ་ཡོད། ཆགས་པ་ལ་བྱམས་བརྩེ་དང་འདྲ་བའི་ཆ་ཕྲན་བུ་ཡོད་རུང་། དེ་ནི་བདེན་འཛིན་ལ་བརྟེན་ནས་བྱུང་བ་ཞིག་ཡིན། བྱམས་བརྩེ་ནི་དེ་ལས་ལྡོག་སྟེ་བདེན་འཛིན་ལ་བརྟེན་དགོས་པའི་ངེས་པ་མ་མཆིས། བྱམས་བརྩེའི་བློ་འདི་སེམས་ཅན་རྣམས་སྡུག་བསྔལ་ལས་སྒྲོལ་བར་གྲོགས་བྱེད་འདོད་ཀྱི་ཀུན་སློང་ལས་འབྱུང་གི་ཡོད།
རྒྱ་ཆེ་ས་ནས་བཤད་ན། བཏང་སྙོམས་གོང་འཕེལ་དུ་གཏོང་བའི་ཐབས་ལམ་གཙོ་བོ་གཉིས་ཡོད་དེ། དང་པོ་གཞིར་བཞག་ན། ང་ཚོས་ངེས་གཏན་མེད་པའི་མཛའ་འབྲེལ་གྱི་རང་བཞིན་དང་། མི་རྟག་པ། སྡུག་བསྔལ་བཅས་ཀྱི་ཐད་ལ་བསམ་བློ་བཏང་ན། མི་འགའ་ལ་ཆགས་ཤིང་གཞན་ལ་སྡང་བ་དེ་སྙིང་པོ་མེད་པར་མཐོང་ངེས། ཐབས་ལམ་གཉིས་པ་གཞིར་བཞག་ན། སེམས་ཅན་ཐམས་ཅད་བདེ་བ་འདོད་ཅིང་སྡུག་བསྔལ་ལས་བྲལ་ན་སྙམ་པའི་བློ་ཞིག་ཡོད་པའི་ཆ་ནས་གཅིག་མཚུངས་ཡིན་པར་རྟོགས་ནས། སེམས་ཅན་ཐམས་ཅད་ལ་ཕྱོགས་རིས་མེད་པའི་བློ་ཞིག་སྐྱེད་ཐབས་བྱ་རྒྱུ་དེ་ཡིན།
(སྒོམ་རིམ་བར་པའི་དགོངས་འགྲེལ་ཞེས་པ་ལས་བཏུས།)
