ང་ཚོས་རྒྱ་ནག་གཞུང་ལ་གདོང་ལེན་བྱེད་སྟངས་ལྟ་བུ་ལ་མཚོན་ན། མི་དགེ་བའི་སེམས་ཚོར་རྣམས་ལ་གཡོལ་བའི་འབད་བརྩོན་རྒྱུན་དུ་བྱེད་ཀྱི་ཡོད། ང་ཚོས་རང་ཉིད་ཉོན་མོངས་པའི་བློ་དྲག་པོའི་དབང་དུ་མི་འགྲོ་བར་ཆེད་དུ་འབད་ཀྱི་ཡོད། ཐ་ན། ཁོང་ཁྲོའི་ཚོར་བ་ངེས་ཅན་ཞིག་སྐྱེ་བའི་སྐབས་ལྟ་བུ་ལའང་། ང་ཚོས་རང་ཉིད་ཆེད་དུ་གཅུན་ནས་ཚོར་བ་དེའི་རིགས་ཉམས་པར་བྱེད་པ་བཞིན། རྒྱ་མི་ཚོའི་ཕྱོགས་སུ་སྙིང་རྗེའི་ཚོར་བ་ཞིག་ཆེད་དུ་སྐྱེད་ཀྱི་ཡོད།
ཉེས་ཅན་པ་དང་། གཞན་ལ་གནོད་འཚེ་བྱེད་མཁན་ཚོའི་ཕྱོགས་སུ་སྙིང་རྗེ་བསྐྱེད་དགོས་པའི་རྒྱུ་མཚན་གཅིག་ནི། མི་དེ་ཚོས་མ་འོངས་པར་མྱོང་བར་འགྱུར་བའི་སྡུག་བསྔལ་གྱི་རྒྱུ་སྒྲུབ་ཀྱིན་ཡོད་པས་ཡིན། དེར་བརྟེན། ཕྱོགས་འདི་ནས་བཤད་ན། ང་ཚོས་རང་ཉིད་ལ་གནོད་འཚེ་བྱེད་མཁན་ལ་སྙིང་རྗེ་བསྐྱེད་པའི་རྒྱུ་མཚན་དུ་མ་ཡོད།
བསམ་བློ་གཏོང་སྟངས་འདི་འདྲའི་རིགས་ལ་བརྟེན་ནས་ང་ཚོས་རྒྱ་ནག་ལ་གདོང་ལེན་བྱེད་ཀྱི་ཡོད། འདི་ནི་མི་ཞིག་གིས་ཞེ་སྡང་དང་དྲག་པོའི་རྒོལ་བ་ལ་ཞི་བའི་སྒོ་ནས་གདོང་ལེན་བྱེད་པའི་དཔེ་མཚོན་ཞིག་རེད་ཟེར་ཆོག །དེ་དང་དུས་མཚུངས་སུ། གལ་ཆེ་བའི་ང་ཚོའི་རྩ་དོན་བརྟན་པོར་འཛིན་དགོས་པ་དང་། ངེས་པར་དུ་ཁ་གཏད་གཅོག་དགོས་པའི་དུས་སུ་དེ་ལྟར་བྱེད་དགོས་པའང་བརྗེད་མི་རུང་བ་ཞིག་ཡིན།
(ཁོང་ཁྲོ་བཅོས་ཐབས། ནང་པའི་བཟོད་སྒོམ་གྱི་ནུས་སྟོབས་ཞེས་པ་ལས་བཏུས།)
