༄༅། །ཕྱི་ལོ་ ༢༠༢༤ ཟླ་ ༨ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སུད་སིའི་ཛུ་རིག་གྲོང་ཁྱེར་གྱི་ Hallenstadion ཚོགས་ཁང་དུ་དད་ལྡན་སེར་སྐྱ་ཆིག་ཁྲི་ལྔ་སྟོང་བརྒལ་བར་འཇམ་པའི་དབྱངས་ཀྱི་གཟུངས་སྔགས་དང་། སྤྱན་རས་གཟིགས་ཀྱི་གཟུངས་སྔགས། ཐུབ་པའི་མཚན་སྔགས་བཅས་ཀྱི་བཟླས་ལུང་བཀའ་དྲིན་སྩལ་རྗེས། སུད་སི་དང་ལེག་ཏེན་སིཊཡན་བོད་རིགས་མི་མང་གིས་བརྟན་བཞུགས་བསྟར་འབུལ་ཞུས་ཡོད་པ་རེད།
དེ་ཡང་སྔ་དྲོ་ཆུ་ཚོད་དགུ་པ་ཙམ་ལ་སུད་སིའི་ཛུ་རིག་གྲོང་ཁྱེར་གྱི་ Hallenstadion ཚོགས་ཁང་དུ་བཞུགས་ཁྲིར་༸ཞབས་སོར་འཁོད་མཚམས་སུད་སིའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སུད་སུར་༸ཞབས་སོར་འཁོད་ནས་མི་མང་ཆོས་འབྲེལ་དང་། བརྟན་བཞུགས་འདེགས་འབུལ་ཞལ་བཞེས་གནང་བར་ཐུགས་རྗེ་ཆེ་ཞེས་སོགས་ཕེབས་བསུའི་གསུང་བཤད་གནང་བ་དང་། དེ་རྗེས་གཞོན་སྐྱེས་ཕོ་མོ་ཁག་ཅིག་གིས་བསྟོད་གཞས་གཟིགས་འབུལ་ཞུས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་དུ་བརྟན་ཆེད་སྨོན་ལམ་ཆོ་ག་གསུང་འདོན་དང་། མནྜལ་རྟེན་གསུམ་འདེགས་འབུལ་སོགས་ཞུས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
སུད་སུ་དང་ཡུ་རོབ་ཁུལ་གཙོ་བོར་བྱས་ཏེ་དད་པའི་ཀུན་ནས་བསླངས་ནས་འདིར་འཛོམས་པ་རེད། ང་ཚོ་བོད་གངས་ཅན་པ་ཟེར་བ་ནི་སངས་རྒྱས་པའི་ཆོས་ཀྱི་འདུས་ལྟ་བུ་ཞིག་རེད། དེ་ནི་ཧ་ཅང་དམིགས་བསལ་ཞིག་རེད། བོད་གངས་ཅན་ཞིང་གི་མི་རྣམས་སངས་རྒྱས་པའི་ཆོས་ཀྱི་དད་པ་དེ་འགྱུར་བ་མེད་པར་ཧ་ཅང་བརྟན་པོ་འདུག བོད་ནས་ཆོས་རྒྱལ་སྲོང་བཙན་སྒམ་པོའི་སྐབས་ནས་བཟུང་ནང་པ་སངས་རྒྱས་པའི་ཆོས་ལ་དོ་སྣང་དམིགས་བསལ་ཞིག་བྱས་ཡོད་པ་དང་། ཆོས་ལ་དོ་སྣང་ཡོད་པ་ཙམ་དུ་མ་ཟད་རང་གིས་ཉམས་སུ་བླངས་ཏེ་ཆུང་ཆུང་སྐབས་ནས་མ་ཎི་འདོན་པ་ལྟ་བུ་དང་། སྐྱབས་འགྲོ་སེམས་བསྐྱེད་འདོན་པ་ལྟ་བུ་གོམས་གཤིས་ཆགས་ཡོད། ངོས་རང་སྐྱེས་ཡུལ་ལ་མཚོན་ན་སངས་རྒྱས་པའི་ཆོས་ཡོངས་གྲགས་བྱས་ཏེ་རྒྱ་ཆེན་པོ་མེད་ཀྱང་། སངས་རྒྱས་པའི་ཆོས་ལ་དད་པ་ཤིན་ཏུ་ཆེན་པོ་ཡོད་པ་ཞིག་རེད།
དེང་སང་འཛམ་གླིང་འདིར་ཆོས་ཞེས་ཟུར་དུ་དད་པ་བྱེད་པ་ཞིག་ཡོད་རུང་མེད་རུང་། རྒྱལ་ཁབ་སོ་སོ་་ནས་དད་པ་བྱེད་པ་དང་། སེམས་པ་བཟང་པོ་བྱེད་རྒྱུའི་སྐོར་ལ་ང་ཚོ་བོད་རིགས་ཚང་མར་དོ་སྣང་བྱེད་སྡོད་པ་ཞིག་རེད། དེ་ནས་བོད་མི་ཚོར་བར་སྐབས་དཀའ་ངལ་ཆེན་པོ་བྱུང་བ་རེད། དེ་རིང་ཁ་སང་ཡིན་ནའང་། གུང་ཁྲན་རིང་ལུགས་ཀྱི་སྒྲིག་འཛུགས་ཀྱིས་དམ་དྲག་ཆེན་པོ་བྱེད་ཀྱི་ཡོད་ཀྱང་། བོད་མིའི་ཆོས་དད་ཀྱི་སེམས་ཤུག་བརླག་འགྲོ་རྒྱུ་ཁྱོན་ནས་མི་འདུག
ང་ཚོ་བཙན་བྱོལ་བ་ཆགས་ནས་བསྡད་ཡོད་ཀྱང་བོད་པ་བཙན་བྱོལ་བ་སྐྱེས་ཕོ་མོ་སུ་ཡིན་རུང་གང་དུ་ཡོད་པའི་གནས་སུ་ཆོས་ལ་དད་པ་འགྱུར་བ་མེད་པ་ཞིག་རེད། ང་ཚོའི་ཆོས་ཀྱི་དད་པ་དེ་ཡ་རབས་སྤྱོད་བཟང་དང་འདྲེས་ནས་ཡོད་པས་གལ་ཏེ་ཆོས་ལ་དད་པ་མེད་ནའང་། ཡ་རབས་སྤྱོད་བཟང་གི་ཉམས་ལེན་ཡག་པོ་བྱེད་དགོས་ཀྱི་འདུག་ཅེས་ང་ཚོས་བཤད་བཞིན་ཡོད། ཆོས་ཀྱི་སྙིང་པོ་ནི་ཡ་རབས་སྤྱོད་བཟང་རེད། དེ་ནས་ཆོས་ཁས་མ་བླངས་ཀྱང་སོ་སོའི་མི་ཚེ་འདི་ཡ་རབས་སྤྱོད་བཟང་གིས་བསྐྱལ་རྒྱུ་བྱུང་ན་ཆོས་ཀྱི་དགོས་པ་ཚང་ཡོད། ཁ་ནས་ཆོས་མང་པོ་བཤད་ཅིང་། ཆོས་ཕྱོགས་ཀྱི་ཐོག་ནས་གྲུབ་འཐའི་འཐེན་འཁྱེར་བྱེད་བསྡད་ལྟ་བུ་དང་། སེམས་ཞི་ཞིང་དུལ་བ་ཡག་པོ་ཞིག་མེད་ཚེ་དེ་ནི་ཆོས་འབག་ལ་གྱོན་པ་ལྟ་བུ་ཞིག་རེད། ཕན་ཐོགས་གང་ཡང་མེད།
ང་ཚོ་བོད་རྣམས་ཧ་ཅང་ཡག་པོ་རེད། ད་ལྟའི་བར་དུ་ཧུར་ཐག་བྱས་པ་རེད། ད་དུང་ཡིན་ནའང་ཚང་མས་ཧུར་ཐག་བྱོས། སངས་རྒྱས་པའི་ཆོས་ནི་ལྟ་གྲུབ་དང་འབྲེལ་ནས་འགྲོ་བཞིན་ཡོད་པས་སློབ་སྦྱོང་གང་ལ་གང་འཚམ་ཞིག་བྱེད་དགོས་པ་གལ་ཆེན་པོ་རེད། སློབ་སྦྱོང་ཡོད་པའི་ཆོས་དད་དང་སློབ་སྦྱོང་མེད་པའི་ཆོས་དད་ལ་ཁྱད་པར་ཡོད་པ་རེད། འགྲེལ་བཤད་སྐྱོན་དུས་ཀྱང་ཟབ་ཁྱད་ཡོད་པ་རེད་ལ། གཙོ་ཆེ་ཤོས་སེམས་རྒྱུད་འདུལ་བར་ཆོས་ཀྱི་གནད་འགག་ཤེས་པའི་ཐོག་ནས་དད་པ་བྱས་པ་ཡིན་ན་ཁྱད་པར་ཆེན་པོ་ཡོད་པ་རེད། མི་རིགས་ཀྱི་ཆ་ནས་བཤད་པ་ཡིན་ནའང་། ཆོས་དད་ཀྱིས་མི་རིགས་ཀྱི་རྣམ་པ་མཚོན་ཐུབ་པ་ཞིག་དང་། ལུང་པའི་གོམས་གཤིས་དང་རིག་གཞུང་ཟེར་ཡང་ནང་པའི་ཆོས་ཀྱིས་སྒྲོམ་གཞི་བྱས་ཡོད། དེར་བརྟེན། ང་ཚོ་ཚང་མས་བོད་ཀྱི་ཆོས་དང་རིག་གཞུང་ཟེར་བའི་གོམས་གཤིས་བཟང་པོ་འདིར་བདག་པོ་རྒྱག་རྒྱུ་ཧ་ཅང་གལ་ཆེན་པོ་རེད། ཅེས་སོགས་བཀའ་སློབ་སྩལ་རྗེས་འཇམ་པའི་དབྱངས་ཀྱི་གཟུངས་སྔགས་དང་མ་ཎི། ཐུབ་པའི་མཚན་སྔགས་བཅས་ཉིན་རེ་བཞིན་དུ་ག་ཚོད་ཐུབ་ཐུབ་ཀྱིས་བགྲང་ཤོག ཅེེས་བཀའ་སློབ་སྩལ།