༄༅། །ཕྱི་ལོ་ ༢༠༢༤ ཟླ་ ༨ ཚེས་ ༢༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བྱང་ཨ་རིར་གནས་སྡོད་བོད་མི་སྤྱི་དང་། ཨ་རིའི་ཆོ་འཕྲུལ་སྨོན་ལམ་ཚོགས་པས་གཙོས་དགེ་ལུགས་པའི་ཆོས་ཚོགས་ཁག སོག་རིགས། ཧི་མ་ལ་ཡའི་རི་རྒྱུད་ཀྱི་མི་མང་བཅས་ཐུན་མོང་གིས་ཇི་ལྟར་གསོལ་བ་བཏབ་པ་ལྟར་ཨ་རིའི་ནེའུ་ཡོག་གྲོང་ཁྱེར་གྱི་ UBS Arena ཞེས་པའི་ཚོགས་ར་ཆེན་མོ་རུ་སེམས་བསྐྱེད་དང་། ཐུབ་པའི་མཚན་སྔགས། མ་ཎི་ཡིག་དྲུག་སོགས་གཟུངས་སྔགས་འགའ་ཞིག་གི་བཟླས་ལུང་བཀའ་དྲིན་སྩལ་བ་དང་། མགོན་པོ་གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་རེད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་གནས་མགྲོན་ཁང་ནས་UBS Arena ཚོགས་ར་རུ་༸ཞབས་སོར་འཁོད་སྐབས་རྟེན་འབྲེལ་ཕྱེ་མར་ཆང་འཕུད་འདེགས་འབུལ་གྱིས་ཕེབས་བསུ་གཟབ་རྒྱས་ཞུས་གྲུབ་མཚམས་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཕེབས་བསུའི་གསུང་བཤད་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཞབས་པུས་སྨན་བཅོས་ལེགས་གྲུབ་བྱུང་རྗེས་བྱང་ཨ་རིའི་བོད་རིགས་གཙོས་པའི་དད་ལྡན་པ་རྣམས་ལ་བཀའ་ཆོས་བཀའ་དྲིན་སྩལ་རྒྱུའི་བཀའ་བཞེས་བཟང་པོ་གནང་བར་བཀའ་དྲིན་རྗེས་དྲན་ཞུས་པ་དང་འབྲེལ། མགོན་པོ་མཆོག་སྐུ་ཚེ་ཡུན་རིང་བརྟན་ཆེད་མཚོན་དོན་བརྟན་བཞུགས་བསྟར་འབུལ་ཞུ་རྒྱུའི་སྐལ་བཟང་གོ་སྐབས་གནང་བར་ཐུགས་རྗེ་ཆེ་ཞུས། དེ་མ་ཟད་སྐུ་ཚབ་དོན་གཅོད་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྨན་བཅོས་གནང་མཁན་སྨན་པ་རྣམ་པ་དང་། ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ། ཨ་རིའི་ཕྱི་སྲིད་ལས་ཁུངས་ཀྱི་བདེ་འཇགས་ཞབས་ཞུ་གཙོས་པའི་རྒྱབ་སྐྱོར་ཕན་གྲོགས་གནང་མཁན་ཡོངས་དང་། ལྷག་པར་ཐེངས་འདིའི་བཀའ་ཆོས་དང་བརྟན་བཞུགས་གོ་སྒྲིག་གནང་མཁན་ཚོགས་པ་ཁག་ལ་ཐུགས་རྗེ་ཆེ་ཞུས་པ་དང་།
དེ་རྗེས་ནིའུ་ཡོག་དང་ནིའུ་ཇར་སི་ཁུལ་གྱི་བོད་ཕྲུག་གྲངས་ ༤༠༠ ཙམ་ནས་མགོན་པོ་མཆོག་ལ་བསྟོད་དབྱངས་འབུལ་ལམ་ཞུས་གྲུབ་བསྟུན། མགོན་པོ་གང་ཉིད་མཆོག་ནས་དེར་འདུས་སེར་སྐྱ་དད་ལྡན་མང་ཚོགས་ལ་བཀའ་སློབ་ལམ་སྟོན་དང་ཆོས་འབྲེལ་བཀའ་དྲིན་སྩལ་བ་དང་ཆབས་ཅིག བརྟན་བཞུགས་བསྟར་འབུལ་ཞུས་ཡོད། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མང་ཚོགས་ལ་བཀའ་སློབ་སྩལ་དོན།
དེ་རིང་འདིར་བོད་ཀྱི་མདོ་སྟོད་སྨད་དབུས་གཙང་སོགས་བོད་ཀྱི་ས་ཁུལ་ཡོངས་རྫོགས་ཀྱི་མི་སྣ་འཛོམས་ཡོད། འདིར་མི་སྣ་འཛོམས་པ་དེ་རྒྱུ་དངོས་པོའི་ཐོག་ནས་འཛོམས་པ་མ་རེད། ཚང་མས་སེམས་ནང་བོད་རིགས་ཞེས་པའི་བསམ་ཚུལ་གྱི་ཐོག་ནས་ང་ཚོ་ཚང་མ་རྡོག་སྒྲིལ་ནས་ཡོང་གི་ཡོད། ང་ཚོ་བོད་པ་ཙམ་མིན་པར་བོད་ཀྱི་ཆོས་དང་རིག་གཞུང་ལ་ཤེས་ནས་དད་པ་ཐོབ་པའི་གྲོགས་པོ་མང་པོ་ཞིག་འདིར་འདུས་ཡོད། ཚང་མས་བོད་ཀྱི་རིག་གཞུང་འདི་འཛམ་གླིང་སྤྱི་ལ་མཁོ་བའི་རིག་གཞུང་ཞིག་ཆགས་ཡོད། བཅོམ་ལྡན་འདས་མངོན་པར་རྫོགས་པའི་སངས་རྒྱས་པའི་རྗེས་སུ། ཆོས་ཀྱི་འཁོར་ལོ་རིམ་པ་གསུམ་གསུངས་པ་རེད། གང་ལྟར་སངས་རྒྱས་བཅོམ་ལྡན་མྱ་ངན་ལས་འདས་རྗེས་སངས་རྒྱས་བཅོམ་ལྡན་འདས་ཀྱི་ཆོས་ལ་སྤུས་དག་པོའི་ཐོག་ཆ་ཚང་བདག་པོ་རྒྱག་མཁན་གཙོ་བོ་ཧི་མ་ལ་ཡའི་རི་རྒྱུད་ཀྱི་བོད་རིགས་ཚོ་གཙོ་བོ་རེད་འདུག དེང་སྐབས་ང་ཚོས་དངོས་སུ་མཐོང་ཆོས་སུ་ཡོད་པ་དེ་རེད། དངོས་གནས་དྲང་གནས་བོད་གངས་ཅན་ལྗོངས་ཀྱི་སློབ་གཉེར་གཙོ་བོ་ཚིག་གི་འགྲེལ་བཤད་རྒྱག་རྒྱུ་ཡོད་པ་དང་། དོན་དག་ལ་བསམ་བློ་གཏོང་རྒྱུ་ཡོད་པ། སོ་སོ་རང་གི་ཉམས་ལེན་གྱི་ཐོག་ནས་བསམ་བློ་གཏང་ན་བསླབ་པ་གསུམ་གྱི་ཐོག་ལ་ཉམས་ལེན་བྱ་རྒྱུ་ནི་ང་ཚོ་བོད་པར་ལོ་ངོ་སྟོང་ཕྲག་རིང་གོམས་ཏེ་སྤུས་དག་པོ་ཆགས་ཡོད།
ངོས་རང་ལ་ཆ་བཞག་ན་ཆུང་ངུའི་སྐབས་ནས་བོད་གངས་ཅན་ལྗོངས་ཀྱི་མཁས་དབང་ཡོངས་འཛིན་རྣམ་པའི་ཐུགས་རྗེ་བཀའ་དྲིན་ལ་བརྟེན་ནས་དཔེ་ཆ་བལྟས་པ་རེད། ཆུང་དུས་དཔེ་ཆ་བལྟས་པ་དེ་ན་ཚོད་ཏོག་ཙམ་ལོན་པའི་སྐབས་དེ་དག་དངོས་གནས་ཚིག་བཟང་བ་དང་། དོན་རྒྱ་ཆེན་པོ་དེ་འདྲའི་སྤུས་དག་པོ་ཡོད་པ་གཞི་ནས་ངོས་འཛིན་ཡོང་གི་འདུག བོད་གངས་ཅན་ལྗོངས་ཀྱི་དབུས་གཙང་། མདོ་སྟོད་སྨད་ཀྱི་ས་ཁུལ་ཚང་མར་བོད་ཀྱི་སྲོལ་རྒྱུན་ཐོག་སངས་རྒྱས་པའི་ཆོས་སྐོར་ལ་གོམས་གཤིས་དང་སློབ་གཉེར་གནང་གི་ཡོད་པ་རེད། བར་སྐབས་རྐྱེན་ངན་མང་པོ་འཕྲད་ཡོད་ཀྱང་གཙོ་བོ་བོད་རྒྱ་ཆེའི་མི་མང་གི་སྙིང་སྟོབས་དང་ལྷག་བསམ་འགྱུར་བ་མེད་པར་བསྡད་པ་རེད། ངོས་ལ་༸རྒྱལ་བ་བསྟན་འཛིན་རྒྱ་མཚོ་ཞེས་བོད་རྒྱ་ཆེའི་མི་མང་གིས་རེ་བ་བཅོལ་ས་བྱེད་བསྡད་ཡོད། ད་ལྟ་བར་དུ་བོད་རྒྱ་ཆེ་མི་མང་གི་གནས་སྐབས་དང་མཐར་ཐུག་གི་རེ་འདུན་གང་ཡོད་ཀྱང་། ངོས་ཀྱིས་ཁ་ཞེ་གཉིས་མེད་སྟེང་རེ་འདུན་འགྲུབ་ཐུབ་པའི་སྨོན་ལམ་བརྒྱབ་ཡོད་པ་མ་ཟད། ལག་ལེན་གྱི་ཐོག་ནས་ཁ་ཡོད་ལག་ཡོད་ཆགས་ཐུབ་པར་འབད་བརྩོན་བྱས་ཡོད། ངོས་ཀྱིས་ཧུར་ཐག་འབད་ཐག་བྱས་པ་ཡིན། ངོས་ཀྱི་མི་ཚེ་ལོ་བརྒྱ་ལྷག་རིང་སྡོད་ཀྱི་རེད། ངོས་ཀྱིས་བོད་རྒྱ་ཆེ་མི་མང་གི་རེ་འདུན་འགྲུབ་ཐུབ་པ་བྱ་རྒྱུ་ཡིན། ངོས་ཀྱི་རྨི་ལམ་ལ་དཔལ་ལྡན་ལྷ་མོ་ངོས་ཀྱི་མཇིང་པའི་སྟེང་དུ་ཕེབས་ཏེ། ལོ་བརྒྱ་དང་སུམ་ཅུ་སོ་གྲངས་ཤིག་འཚོ་ཡི་རེད་ཅེས་ངོས་ལ་གསུངས་མྱོང་།
ད་ལྟ་བོད་ཆོལ་ཁ་གསུམ་གྱི་གཞིས་ལུས་རྒྱ་ཆེ་མི་མང་གི་སེམས་ཤུགས་ཧ་ལས་པ་རེད། བར་སྐབས་རྐྱེན་མང་པོ་འཕྲད་ཡོད་ཀྱང་། ཆོལ་ཁ་གསུམ་གྱི་བོད་རིགས་ཟེར་བ་བློ་ལ་གཡོ་བ་མེད་པར་དད་པ་རྩེ་གཅིག་ཡིན་པ་མངོན་གསལ་དོད་པོ་རེད། འཛམ་གླིང་དུ་བོད་ཀྱི་གནས་ཚུལ་གསལ་པོ་ཆགས་དུས། ནང་ཆོས་དང་འབྲེལ་བ་མེད་པའི་གྲོགས་པོ་མང་པོ་ཞིག་བོད་ཀྱི་ཆོས་དང་། རིག་གཞུང་། གོམས་གཤིས་སོགས་ལ་དགའ་མོས་བྱེད་ཀྱི་འདུག རྒྱ་མི་གུང་ཁྲན་གྱིས་བོད་པར་མཐོང་ཆུང་ཁྱད་གསོད་བྱེད་ཀྱི་ཡོད་ཀྱང་། རིམ་བཞིན་དུས་ཚོད་ཕྱིན་པའི་སྐབས་སུ་རྒྱ་རིགས་ནང་གི་དཔོན་རིགས་མང་པོ་ཞིག་གིས་ཀྱང་བོད་ཀྱི་གོམས་གཤིས་ལ་དགའ་མོས་བྱེད་ཀྱི་འདུག དེ་ནི་ང་ཚོའི་ལྷག་བསམ་གྱི་སྟོབས་ཤུགས་རེད། ད་ལྟ་བར་དུ་ཚང་མས་ཧུར་ཐག་བྱས་པ་རེད། ད་དུང་ཡང་ཧུར་ཐག་བྱེད་རོགས།
བར་སྐབས་དཀའ་ངལ་ཆེན་པོ་ཞིག་བྱུང་ཀྱང་དེ་ནི་རྐྱེན་ངན་གྲོགས་ལ་ཤར་ཏེ་འཛམ་གླིང་གང་སར་བོད་ཀྱི་ཆོས་དང་རིག་གཞུང་ལ་དོ་སྣང་གསར་པ་སླེབས་པ་ཞིག་དང་། བོད་ཆོལ་ཁ་གསུམ་གྱི་མི་མང་ལ་སྙིང་ཐག་པ་ནས་ཤ་ཚ་རྒྱབ་སྐྱོང་ཡོང་བ་ཞིག་ཆགས་འདུག དེ་རིང་སྐབས་སུ་བབ་པ་ས་ཁུལ་འདིར་བོད་རིགས་མང་པོ་ཞིག་རུབ་རུབ་བྱས་ཡོད་པ་རེད། ངོས་ནས་ད་ལྟའི་བར་དུ་ལྷ་མོའི་ལུང་བསྟན་ནང་བཞིན་ཧུར་ཐག་བྱས་པ་ཡིན། ད་དུང་ཡང་ལོ་བཅུ་ཕྲག་ཁ་ཤས་ལ་མུ་མཐུད་ནས་ཏན་ཏན་འབད་བརྩོན་བྱེད་ཐུབ་ཀྱི་རེད། དེ་ལྟར་ཁྱོད་རང་ཚོས་ཀྱང་སེམས་ལ་སྙིང་སྟོབས་དང་སྤྲོ་བ་བསྐྱེད་ནས་ང་ཚོ་བོད་ཀྱི་ཆོས་དང་རིག་གཞུང་གིས་འཛམ་གླིང་སྤྱི་ལ་ཕན་ཐོགས་བྱེད་ཐུབ་པ་ཞིག་ལ་ཚང་མས་སེམས་ཤུགས་བསྐྱེད་ནས་ཧུར་ཐག་བྱོས། ད་ལྟའི་བར་དུ་ཧུར་ཐག་བྱས་པ་རེད། མདོ་སྨད་པ་ལྷ་མོ་དོན་གྲུབ་ཀྱིས་མགོ་ཁྲིད་ནས་བསྡད་ཡོད་པ་རེད། ཚང་མས་ཧ་ཅང་དགའ་བོ་བྱེད་ཀྱི་འདུག བོད་ཆོལ་ཁ་གསུམ་གྱི་བོད་རིགས་ཡོངས་ནས་སྤྱི་མོས་དགའ་ཞེན་འགྱུར་དུ་མེད་པ་ཧ་ཅང་ཡག་པོ་རེད། བོད་ཀྱི་ཉེ་འདབས་ཀྱི་ལ་དྭགས་སོགས་ནས་༸གོང་ས་ཏཱ་ལའི་བླ་མ་ཟེར་དུས་སྙིང་ཁོང་རུས་པའི་གཏིང་ནས་དགའ་མོས་འགྱུར་བ་མེད་པར་བསྡད་ཡོད་པ་རེད། ཅེས་སོགས་བཀའ་སློབ་སྩལ་རྗེས་སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩལ་བ་དང་། དེ་ནས་ཐུབ་པའི་མཚན་སྔགས་དང་མ་ཎི་ཡིག་དྲུག སྒྲོལ་མའི་གཟུངས་སྔགས་སོགས་གཟུངས་སྔགས་འགའི་བཟླས་ལུང་གནང་ཡོད། བརྟན་བཞུགས་གྲུབ་མཚམས་བྱང་ཨ་རིའི་སྐུ་ཚབ་དོན་ཁང་གི་རྩིས་པ་ནས་ཐེངས་འདིའི་བཀའ་ཆོས་དང་བརྟན་བཞུགས་སྐབས་ཀྱི་རྩིས་ཁྲ་བསྡུས་པ་སྒྲོགས་སྦྱང་ཞུས་པ་དང་། མཐར་སྐུ་ཞབས་སེམ་དང་ཁེ་རོལ་ནེ་པི་སྟངས་དཔྱལ་གཉིས་ཀྱི་གཞིས་ཀ་རུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བདུན་ཕྲག་དྲུག་རིང་སྐུའི་ངལ་གསོ་མཛད་པའི་མཐུན་འགྱུར་གནང་བ་ལ་ཐུགས་རྗེ་ཆེ་ཞུའི་ལག་རྟགས་ཤིག་འབུལ་ལམ་ཞུས་ཡོད། བཀའ་ཆོས་སྐབས་བོད་རིགས་དང་། སོག་རིགས། རྒྱ་རིགས། ཐའེ་ཝན། ཨ་རི་གཙོས་པའི་འཛམ་གླིང་ས་ཁུལ་འདྲ་མིན་ནས་དད་ལྡན་ཆོས་ཞུ་བ་ཆིག་ཁྲི་བདུན་སྟོང་ཙམ་ལྷན་ཞུགས་གནང་ཡོད།