༄༅། །ཕྱི་ལོ་ ༢༠༢༤ ཟླ་ ༦ ཚེས་ ༡༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་བཞུགས་སྒར་ཕོ་བྲང་དུ་ཨ་རིའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ལ་མཇལ་འཕྲད་གནང་ཡོད་པ་རེད།
དེ་ཡང་ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་དང་། སྤྱི་མཐུན་ཚོགས་པའི་འཐུས་མི་སྐུ་ཞབས་མ་ཧི་ཀལ་མེག་ཀོལ་ (Michael McCaul) མཆོག་གིས་དབུ་ཁྲིད་པའི་ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་ལྕམ་སྐུ་ནེན་སི་པེ་ལོ་སི་ (Nancy Pelosi) མཆོག་དང་། གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་མང་གཙོ་ཚོགས་པའི་འགོ་ཁྲིད་སྐུ་ཞབས་གྷེ་རེ་གོ་རི་མིག་ (Gregory Meeks) མཆོག ཨ་རིའི་གྲོས་ཚོགས་འོག་མའི་སྒྲིག་ཁྲིམས་ཚོགས་ཆུང་གི་ཚོགས་གཞོན་སྐུ་ཞབས་ཇིམ་མེག་གྷོ་ཧན་ (Jim McGovern) མཆོག གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ནང་གསེས་རྒྱ་གར་ཞི་བདེ་རྒྱ་མཚོའི་ཚོགས་ཆུང་གིས་ཚོགས་གཞོན་སྐུ་ཞབས་ཨ་མི་བྷེ་ར་ (Ami Bera) མཆོག གྲོས་ཚོགས་འཐུས་མི་ལྕམ་སྐུ་མ་རིཡ་ནེ་ཊི་མི་ལར་མིག་ (Mariannette Miller-Meeks) མཆོག གྲོས་ཚོགས་འཐུས་མི་ལྕམ་སྐུ་ནི་ཀོལ་མ་ལིའོ་ཏ་ཀིས་ (Nicole Malliotakis) མཆོག་སོགས་ཨ་རིའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་གིས་ཕོ་བྲང་དུ་མཇལ་ཁ་ཞུ་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་ཡོད།
དེ་ཡང་༸གོང་ས་མཆོག་གིས་འཚམ་འདྲི་དང་འབྲེལ་བོད་ཀྱི་ནང་ཆོས་ནི་ནཱ་ལེནྡྲའི་ཆོས་བརྒྱུད་ཡིན་པ་དང་། ནང་པའི་ཆོས་དར་སའི་ཡུལ་ལུང་མང་པོ་ཡོད་ཀྱང་ཚང་མ་ནཱ་ལེནྡྲའི་ཆོས་བརྒྱུད་ཆགས་ཀྱི་མེད། བོད་ཀྱི་ནང་བསྟན་ནི་རྒྱུ་མཚན་དང་གཏན་ཚིགས་རིག་པའི་རྣམ་གཞག་ཐོག་ནས་རྒྱུན་འཛིན་བྱེད་ཀྱི་ཡོད། དེང་སང་རིགས་ལམ་དང་འབྲེལ་ནས་རྒྱུན་འཛིན་བྱེད་མཁན་གཞན་པ་དཀོན་པོ་ཆགས་ཡོད། ང་ཚོའི་རྒྱལ་ཁབ་ཤོར་ཀྱང་ནང་ཆོས་མུ་མཐུད་ནས་ཉམས་ལེན་བྱེད་ཀྱི་ཡོད། དེང་སང་རྒྱ་རིགས་ནང་དུའང་བོད་ཀྱི་ནང་བསྟན་ལ་དོ་སྣང་བྱེད་མཁན་མང་པོ་ཡོང་གི་འདུག ཅེས་དང་།
ངོས་རང་དེ་སྔ་མའོ་ཙེ་ཏུང་དང་མཇལ་འཕྲད་སྐབས་སུ་མའོ་ཡིས་ཆོས་དུག་རེད་ཅེས་བརྗོད་བྱུང་། དེ་ནི་ཁོ་རང་རྨོངས་པའི་དབང་གིས་རེད། གལ་སྲིད་ཁོ་ད་ལྟ་གསོན་པོར་ཡོད་པ་དང་། ཆོས་ལ་སློབ་གཉེར་ཅུང་ཙམ་བྱས་ཡོད་ཚེ་ཁོང་ནང་པ་ཆགས་ཀྱི་རེད། ཆབ་སྲིད་ཀྱི་ཆ་ནས་ང་ཚོའི་རྒྱལ་ཁབ་ཤོར་ཡོད་ཀྱང་། ང་ཚོ་བོད་པས་ལོ་སྟོང་ཕྲག་གོང་གི་ཆོས་ལུགས་རྒྱུན་འཛིན་བྱས་ཡོད་ཅིང་། དེའི་བསམ་བློ་གཏོང་སྟངས་ནི་ཚན་རིག་དང་མཐུན་པ་ཞིག་ཆགས་ཀྱི་ཡོད། ཆབ་སྲིད་ཀྱི་ཆ་ནས་ངོས་རང་རྒྱ་གར་ལུང་པར་བསྡད་ཡོད། སངས་རྒྱས་ཀྱང་འདིར་བྱོན་པ་རེད། ངོས་རང་ནང་པའི་མཁས་པ་ཆུང་ཆུང་ཞིག་ཆགས་ཀྱི་ཡོད་ལ། གཞན་ལ་ཕན་སེམས་བྱེད་པའི་གཞན་ཕན་གྱི་བསམ་བློ་ཉམས་ལེན་བྱེད་ཀྱི་ཡོད། ང་ཚོས་ཆོས་ལུགས་གང་ཡིན་ལ་ཁྱད་པར་མེད་པར་འཛམ་བུའི་གླིང་ལ་བདག་གཅེས་དང་སྲུང་སྐྱོབ་བྱེད་དགོས།
ངོས་རང་བཙན་བྱོལ་དུ་སླེབས་ནས་རྒྱ་གར་གྱི་མཁས་པ་མང་པོ་མཇལ་བའི་གོ་སྐབས་བྱུང་། ང་ཚོའི་ཆོས་ནི་རྒྱུ་མཚན་ལ་བསམ་བློ་བཏང་ནས་འགྲོ་བཞིན་ཡོད་པས་ཚན་རིག་པ་དང་ཐུག་འཕྲད་ཀྱི་གོ་སྐབས་མང་པོ་འབྱུང་གི་འདུག དེ་སྔ་ང་ཚོ་ཚན་རིག་ལ་དོ་སྣང་མེད་ཀྱང་། བཙན་བྱོལ་དུ་སླེབས་ཏེ་ཚན་རིག་པ་དང་ཐུག་འཕྲད་དང་། བགྲོ་གླེང་གི་གོ་སྐབས་བྱུང་བ་ཧ་ཅང་སྐལ་པ་བཟང་པོར་ཚོར་གྱི་འདུག གནའ་བོའི་ཚན་རིག་དང་མཐུན་པའི་བསམ་བློ་གཏོང་སྟངས་དང་། དེང་དུས་ཀྱི་ཚན་རིག་གམ། ལྷག་པར་དུ་ཀླད་པའི་རྣམ་གཞག་དང་འབྲེལ་བའི་ཚན་རིག་པ་དང་ལྷན་དུ་བགྲོ་གླེང་གིས་བློ་བསྐྱེད་སྤེལ་རེས་མང་པོ་ཡོང་གི་འདུག བོད་ཀྱི་རིག་གཞུང་ནི་མིའི་བསམ་བློ་ཆ་ཚང་བེད་སྤྱོད་གཏོང་ཐུབ་པར་གོ་སྐབས་ཡོད་པའི་རིག་གཞུང་ཞིག་ཆགས་ཀྱི་ཡོད། ཅེས་སོགས་བཀའ་སློབ་སྩལ་རྗེས་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་དང་སྤྱི་མཐུན་ཚོགས་པའི་འཐུས་མི་སྐུ་ཞབས་མ་ཧི་ཀལ་མེག་ཀོལ་མཆོག་གིས་༸གོང་ས་མཆོག་ལ་མཇལ་འཕྲད་བྱུང་བ་ཧ་ཅང་དགའ་བོ་བྱུང་སྐོར་དང་འབྲེལ། བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་བཞིན་ཁྲིམས་ཡིག་ཏུ་གཏན་འབེབས་གནང་རྒྱུའི་སྐོར་༸སྙན་སེང་ཞུས་པ་དང་། ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་ལྕམ་སྐུ་ནེན་སི་པེ་ལོ་སི་ (Nancy Pelosi) མཆོག་གིས་འཚམ་འདྲི་དང་འབྲེལ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་གཏན་འབེབས་བྱུང་བར་དགའ་སྤྲོ་ཡོད་སྐོར་སོགས་སྙན་སེང་རྗེས། བོད་དོན་རྒྱབ་སྐྱོར་བ་གྲགས་ཅན་ཨ་རིའི་གྲོས་ཚོགས་འོག་མའི་སྒྲིག་ཁྲིམས་ཚོགས་ཆུང་གི་ཚོགས་གཞོན་སྐུ་ཞབས་ཇིམ་མེག་གྷོ་ཧན་ (Jim McGovern) མཆོག་གིས་འཚམ་འདྲི་དང་། མུ་མཐུད་ནས་བོད་དོན་རྒྱབ་སྐྱོར་གནང་རྒྱུ་ཡིན་སྐོར་༸སྙན་སེང་ཞུས་ཡོད།
དེ་རྗེས་༸གོང་ས་མཆོག་གིས། འཛམ་གླིང་ལ་བཟང་ཕྱོགས་ཀྱི་འགྱུར་བ་སོང་ནས་ཞི་བདེའི་སྐོར་ལ་དོ་སྣང་གནང་མཁན་ཇེ་མང་དུ་འགྲོ་བཞིན་པ་དང་། མགོན་པོ་གང་ཉིད་མཆོག་གཞོན་པའི་དུས་ནས་རབ་ཏུ་བྱུང་སྟེ་ད་ལྟའི་བར་གྱི་ཉམས་མྱོང་ལ་སྡོམ་སྐྱོན་པ་ཡིན་ན་འཛམ་གླིང་འདིར་ཆེས་གནད་འགག་ཆེ་ཤོས་ནི་བྱམས་བརྩེ་དང་སྙིང་རྗེ་ཡིན་པ་རེད། བྱམས་བརྩེ་ལག་ལེན་བསྟར་ཐུབ་ཚེ་འཛམ་གླིང་ཞི་བདེ་ཡོང་རྒྱུ་ཡིན་པ་དང་། ཡོན་ཏན་གཞན་དག་ཚང་མ་བྱམས་བརྩེའི་ཡན་ལག་ལྟ་བུ་ཡིན་སྐོར་བཀའ་གནང་ཡོད། ཨ་རིའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ལ་མཇལ་ཁའི་སྐབས་སུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས། ལྡི་ལི་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་དོན་གྲུབ་རྒྱལ་པོ་ལགས། རྒྱལ་སྤྱིའི་བོད་དོན་ལས་འགུལ་ཁང་གི་བསྟན་ཆོས་རྒྱ་མཚོ་ལགས་བཅས་ལྷན་བཅར་ཞུས་ཡོད་པ་རེད།