༄༅། །ལོ་ལྟར་ཆོ་འཕྲུལ་ཟླ་བའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུད་གྲྭ་སྨད་སྟོད་ཀྱིས་གཙོས་ཕྱོགས་མཐའ་ཁག་གི་དོན་གཉེར་ཅན་རྣམས་ལ་དགེ་ཚུལ་སློང་གི་བསླབ་སྡོམ་འབོགས་སྩོལ་གནང་བཞིན་པ་ལྟར། ཕྱི་ལོ་ ༢༠༢༤ ཟླ་ ༢ ཚེས་ ༡༧ ནས་དབུ་འཛུགས་ཀྱིས་ཚེས་ ༢༩ ཉིན་ཆོ་འཕྲུལ་ཟླ་བར་བསླབ་སྡོམ་འབོགས་སྩོལ་གྱི་གནང་སྒོ་ལེགས་པར་གྲུབ་ཡོད་པ་རེད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་བཞུགས་སྒར་ཕོ་བྲང་དུ་ཧི་མ་ལ་ཡའི་རི་རྒྱུད་བལ་ཡུལ་དང་། འབྲུག མོན། ལ་དྭགས། འབྲས་ལྗོངས། ཁུ་ནུ། སྤྱི་ཏི། གར་ཞ་སོགས་དང་། གཞན་ཡང་། སོག་ཡུལ་དང་། ཨུ་རུ་སུ། འཇར་མན། ཨ་རི། ཝེ་དི་ནམ། ནེའུ་ཛི་ལེནྜ། མེཀ་སི་ཁོ། ནེ་དར་ལེནྜ། དབྱིན་ཡུལ། ལྷོ་ཀོ་རི་ཡ་སོགས་ཡུལ་གྲུ་འདྲ་མིན་ནས་ཕེབས་པའི་དགེ་ཚུལ་བསྒྲུབ་བྱ་ ༡༥༣ དང་། བསྙེན་རྫོགས་བསྒྲུབ་བྱ་ ༣༠༠ ཐམ་པ་ལ་ད་ཆོག་ཉེས་མེད་ཕུན་ཚོགས་ཀྱི་སྒོ་ནས་ཚིགས་སྔ་ཕྱིའི་བསླབ་སྡོམ་རྣམ་པར་དག་པ་སྩལ་ཡོད་པ་རེད།