༄༅། །ཉི་ཧོང་གི་ཧི་རོ་ཤི་མར་ཚོགས་པའི་དཔལ་འབྱོར་ཡར་ཐོན་ཅན་གྱི་རྒྱལ་ཁབ་བདུན་ (G7) གྱི་ཚོགས་འདུའི་བསྒྲགས་གཏམ་ནང་རྡུལ་ཕྲན་མཚོན་ཆ་མེད་པའི་འཛམ་གླིང་ཞིག་བསྐྲུན་རྒྱུའི་འབོད་སྐུལ་གནང་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་བསུའི་བསྔགས་བརྗོད་གནང་ཡོད།
དེ་ཡང་ཕྱི་ལོ་ ༢༠༢༣ ཟླ་ ༥ ཚེས་ ༢༣ ཉིན་སྤེལ་བའི་གསུང་འཕྲིན་ནང་མགོན་པོ་མཆོག་གིས་ཟུང་སྦྲེལ་བསྒྲགས་གཏམ་འདིས་འགྲོ་བ་མི་རིགས་ཚང་མ་ཕན་ཚུན་གཅིག་ལ་གཅིག་རྟེན་གྱི་ཚུལ་དུ་གནས་ཡོད་པའི་དངོས་ཡོད་གནས་སྟངས་མཚོན་གྱི་ཡོད་པ་མ་ཟད། དུས་རབས་ཉི་ཤུ་རྩ་གཅིག་པ་དེ་བཞིན་ཞི་བདེ་དང་མཉམ་ལས་ཀྱི་དུས་རབས་ཤིག་ཏུ་བསྒྱུར་རྒྱུའི་གོ་སྐབས་བཟང་པོ་ཞིག་ཡིན་པའང་མཚོན་གྱི་ཡོད་པ་གསུངས་ཡོད།
དེ་བཞིན་མགོན་པོ་མཆོག་གིས་མུ་མཐུད། ངོས་ལ་མཚོན་ན་འཛམ་གླིང་ཁྱོན་ཡོངས་སུ་དམག་འཁྲུག་དང་རྡུལ་ཕྲན་མཚོན་ཆ་མེད་པ་བཟོ་རྒྱུའི་ལས་འགུལ་སྤེལ་མཁན་ཞིག་ཡིན་པའི་ཆ་ནས་ལས་གཞི་འདི་ནི་བཟང་ཕྱོགས་ཀྱི་འགྱུར་བ་ཞིག་ཡིན་པའི་ཡིད་ཆེས་བརྟན་པོ་ཡོད། ཕྱི་ལོ་ ༢༠༢༢ ཟླ་ ༡ ནང་རྡུལ་ཕྲན་མཚོན་ཆ་ཡོད་མཁན་རྒྱལ་ཁབ་ལྔ་ཡིས་རྡུལ་ཕྲན་མཚོན་ཆའི་དམག་ལ་རྒྱལ་ཁ་སུལའང་མེད་པས་དམག་ནམ་ཡང་བཀྱེ་རྒྱུ་མིན་པའི་ཐུན་མོང་གི་དམ་བཅའ་བཞག་པར་ངོས་ཀྱིས་བསྔགས་བརྗོད་ཞུ་རྒྱུ་བྱུང་།
ད་ལྟའི་ཆར་འཛམ་གླིང་ས་གནས་གང་སར་གསར་བརྗེ་གཡོ་འགུལ་ལངས་ཤིང་ངེས་བརྟན་མེད་པའི་དུས་སྐབས་འདིར་ང་ཚོས་གྲོས་མོལ་དང་ཐབས་བྱུས་ལྡན་པའི་ཐོག་དཀའ་རྙོག་ཞི་འགྲིག་ཡོང་བར་ལྷག་བསམ་རྣམ་གིས་འབད་རྩོལ་ཧུར་སྐྱེད་གནང་དགོས། དེ་ལྟ་བས་ན། སྟོབས་ཆེན་རྒྱལ་ཁབ་བདུན་གྱི་དམ་བཅའ་འདི་ལྟ་བུས་ནུས་པ་ལྡན་པའི་བརྡ་ལན་སྤྲད་ཡོད་པ་མ་ཟད། འགྲོ་བ་མིའི་འཚོ་གནས་ལ་ཉེན་ཚབས་ཆེ་བའི་མཚོན་ཆ་དེ་རིགས་བཀག་སྡོམ་དགོས་པའི་ཛ་དྲག་གནས་སྟངས་ལ་ངོས་འཛིན་གནང་བ་མཚོན།
རྡུལ་ཕྲན་མཚོན་ཆ་མེད་པའི་འཛམ་གླིང་ཞིག་བསྐྲུན་རྒྱུ་ནི་དུས་ཀྱི་དགོས་མཁོ་ཡིན་པ་མ་ཟད་དེ་ཉིད་སྒྲུབ་ནུས་པ་ཞིག་ཀྱང་ཡིན། ང་ཚོ་ཕན་ཚུན་རྟེན་འབྲེལ་གྱི་འཛམ་གླིང་ནང་འཚེ་བ་ལ་བརྟེན་ནས་དམག་འཁྲུག་རྒྱག་ཡུལ་ལས་རྒྱང་ཐག་རིང་པོར་གནས་མཁན་ཚོའང་སྡུག་བསྔལ་མྱོང་དགོས་ཐུག་ཀྱི་ཡོད། ངོས་ཀྱི་རེ་བ་ལ་འགྲོ་བ་མི་ཚང་མས་འགྲོ་བ་མི་རིགས་གཅིག་གྱུར་གྱི་འདུ་ཤེས་ཡིད་ལ་བཅངས་ཏེ་གཞན་སུ་རུང་ལ་རྡུལ་ཕྲན་མཚོན་ཆ་ཐེ་བའི་དྲག་པོའི་གནོད་འཚེ་སྐྱེལ་ན། དེ་ཡིས་ང་ཚོ་ཚང་མར་གནོད་ངེས་པ་བསམ་ཤེས་ཐུབ་པའི་རེ་བ་ཡོད། ཅེས་དང་།
མཐར་མགོན་པོ་མཆོག་གིས་དུས་རབས་ཉི་ཤུ་རྩ་གཅིག་པ་དེ་བཞིན་བྱམས་བརྩེ་དང་ཞི་བདེ། འཆམ་མཐུན་ལྡན་པའི་འཛམ་གླིང་དུ་འགྱུར་བའི་ཐུགས་སྨོན་མཛད་ཡོད་པ་བཅས།།