༄༅། །ཕྱི་ལོ་ ༢༠༢༣ ཟླ་ ༥ ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་བཞུགས་སྒར་ཕོ་བྲང་དུ་རྒྱ་གར་གྱི་ཡུལ་ལུང་འདྲ་མིན་དང་། བོད་བཅས་ནས་ཕེབས་པའི་དད་ལྡན་མཇལ་བཅར་བ་བརྒྱ་ཕྲག་ཙམ་ལ་མཇལ་ཁའི་སྐབས་བཀའ་སློབ་སྩལ་དོན།
རྒྱལ་བ་རིན་པོ་ཆེས་མགོ་ཁྲིད་དེ་གཞིས་ལུས་རྒྱ་ཆེའི་མི་མང་གི་སེམས་ཤུགས་ངོས་ཀྱིས་བཟུང་བསྡད་ཡོད་པ་རེད། ཚུར་བཙན་བྱོལ་ལ་ཡོང་མཁན་ཚོའི་སེམས་ཤུགས་ཀྱང་ངོས་ཀྱིས་བཟུང་བསྡད་ཡོད། ངོས་རང་ལོ་བརྒྱ་ལྷག་ཅིག་བསྡད་ཀྱི་རེད། ཤེས་སོང་ངམ། ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང༌།། ཚེ་རིང་ནད་མེད་བདེ་སྐྱིད་ཕུན་སུམ་ཚོགས།། ཐེག་པ་མཆོག་ལ་ངེས་པར་འབྱུང་བ་སྟེ།། བཀྲ་ཤིས་དེས་ཀྱང་དེང་འདིར་བདེ་ལེགས་ཤོག། བློ་བདེ་པོ་དང་སེམས་སྐྱིད་པོ་བྱས་ཏེ་སྡོད། ཅེས་དང་།
ང་ཚོ་བོད་གངས་ཅན་པའི་ལྷ་སྐལ་འཕགས་པ་སྤྱན་རས་གཟིགས་ཡིན་པས། སྤྱི་ཡོངས་ཀྱིས་བཤད་ན་བོད་ཀྱི་བྱིས་པ་ཆུང་ཆུང་ཚོས་ཀྱང་འབུ་མ་གསོད་ཟེར་བའི་གོམས་སྲོལ་ཞིག་ཡོད། ཕྱི་རྒྱལ་གྱི་བྱིས་པ་ཚོ་འབུ་གསོད་པར་སྣང་མེད་རེད་འདུག བོད་པ་ཚོ་ཆུང་ཆུང་སྐབས་ནས་འབུ་མ་གསོད་ཅེས་བཤད་ཀྱི་ཡོད། ང་ཚོ་འཕགས་པ་སྤྱན་རས་གཟིགས་ཀྱི་རྒྱུན་འཛིན་གྱི་མི་རིགས་ཤིག་ཆགས་ཡོད་པ་རེད། ངོས་རང་འཕགས་པ་སྤྱན་རས་གཟིགས་ཀྱི་མགྲོན་གཉེར་ལྟ་བུ་ཆགས་ཡོད། ངོས་ཀྱིས་འཕགས་པ་སྤྱན་རས་གཟིགས་ལ་མགྲོན་གཉེར་བྱས་ཏེ་བོད་པ་ཚོའི་ཚབ་བྱས་ནས་ཞུ་བརྒྱུད་བྱེད། ཤེས་སོང་ངམ། ཞེས་སོགས་བཀའ་སློབ་སྩལ་ཡོད།