༄༅། །ཕྱི་ལོ་ ༢༠༢༣ ཟླ་ ༡༢ ཚེས་ ༡༦ ཉིན་གྱི་ཞོགས་པ་ཆུ་ཚོད་ ༨།༠༠ ཙམ་ལྷ་དང་བཅས་པའི་འགྲོ་བ་ཡོངས་ཀྱི་མགོན་སྐྱབས་སྤྱི་ནོར་༸གོང་ས་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་རྒྱ་གར་བྷི་ཧར་མངའ་སྡེའི་གྷ་ཡ་རྫོང་དུ་ཡོད་པའི་སྟོན་པ་བཅོམ་ལྡན་འདས་རྒྱལ་བ་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་པའི་གནས་མཆོག་རྡོ་རྗེ་གདན་གྱི་མཆོད་རྟེན་ཆེན་མོར་སྟོན་པའི་སྐུ་བརྙན་ལ་མཆོད་མཇལ་དང་སྨོན་ལམ་གསུང་འདོན་གནང་ཡོད་པ་རེད།
དེ་ཡང་ཞོགས་པར་ཆུ་ཚོད་ ༨།༠༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགའ་ལྡན་འཕེལ་རྒྱས་གླིང་ནས་ཀོར་ཧྥུ་རླངས་འཁོར་(Golf cart)ལ་བཞུགས་སྟེ་མཆོད་རྟེན་ཆེན་མོ་མཆོད་མཇལ་ཆེད་ཆིབས་བསྒྱུར་བསྐྱངས་པ་དང་། སྐབས་དེར་གྷ་ཡ་རྫོང་དཔོན་ཆེད་ཕེབས་ཀྱིས་བྷི་ཧར་མངའ་སྡེའི་བདེ་སྲུང་མི་སྣས་བཞུགས་སྒར་ནས་ཕེབས་ལམ་སྲུང་སྐྱོབ་ཚགས་ཚུད་དང་བཅས་ཆིབས་བསྒྱུར་སྐབས་ཕེབས་ལམ་གཡས་གཡོན་དུ་རྒྱལ་ཁབ་དང་མི་རིགས་འདྲ་མིན་གྱི་དད་ལྡན་དང་། ཡུལ་སྐོར་བ་སོགས་སྟོང་ཕྲག་བརྒལ་བས་མཇལ་དར་དང་། མེ་ཏོག་ཐོགས་ནས་ཕེབས་བསུ་ཞུས་པ་དང་། མཆོད་རྟེན་ཆེན་མོའི་མདུན་སྒོ་རུ་མཆོད་རྟེན་འཛིན་སྐྱོང་འགན་འཛིན་སོགས་ཀྱིས་ཕེབས་བསུའི་མཇལ་ཁ་ཞུས་མཚམས། རྟེན་གཙོ་སྟོན་པའི་སྐུ་བརྙན་རིན་པོ་ཆེའི་མདུན་དུ་༸ཞབས་སོར་འཁོད་དེ། ཐོག་མར་སྣང་གསལ་མཆོད་མེ་ཞལ་འབྱེད་གནང་རྗེས། མགོན་པོ་མཆོག་གིས་དབུས་རྣམ་གྲྭའི་གམ་བཅར་བ་རྣམས་དང་། སྐུ་འཁོར་ལྷན་རྒྱས་ནས་རྒྱན་ཆགས་གསུམ་པ་དང་། ཤེས་རབ་སྙིང་པོ། པཎ་གྲུབ་བཅུ་བདུན་གྱི་གསོལ་འདེབས། རྟེན་འབྲེལ་བསྟོད་པ། ཡན་ལག་བདུན་པ། རབ་གནས་བསྡུས་པ་དང་། བདེན་ཚིག་སྨོན་ལམ་སོགས་གསུང་འདོན་དང་། མཁའ་ཁྱབ་འགྲོ་བ་མཐའ་དག་གི་ཆེད་དུ་ཐུགས་སྨོན་སྐྱབས་འཇུག་གནང་ཡོད།
བྱང་ཆུབ་མཆོད་རྟེན་ཆེན་མོའི་རྟེན་གཙོར་མཆོད་མཇལ་དང་། སྨོན་ལམ་གསུང་འདོན་གྲུབ་རྗེས་མཆོད་རྟེན་མདུན་དུ་ཕྱི་ནང་གི་གསར་འགོད་པས་བཀའ་འདྲི་ཞུས་དོན་ལྟར་བཀའ་ལན་བཀའ་དྲིན་སྩལ་སྐབས། མཆོད་རྟེན་ཆེན་མོའི་རྟེན་གཙོ་ཐུབ་དབང་སྐུ་བརྙན་མདུན་དུ་སྨོན་ལམ་རྒྱག་རྒྱུ་བྱུང་བ་ཧ་ཅང་དགའ་བོ་བྱུང་། དེང་སང་འཛམ་གླིང་འདིར་འབྱུང་བའི་གནོད་འཚེ་མང་པོ་ཞིག་ཡོང་དང་ཡོང་བཞིན་པ་བློ་ཕམ་ཆེན་པོ་རེད། དེར་བརྟེན། ངོས་ཀྱིས་འགྲོ་བ་རིགས་དྲུག་སེམས་ཅན་ཐམས་ཅད་ཀྱི་ཆེད་དུ་སྨོན་ལམ་བརྒྱབ་པ་ཡིན། ཧ་ཅང་དགའ་བོ་བྱུང་། ཞེས་བཀའ་ལན་སྩལ་རྗེས་ཀོར་ཧྥུ་རླངས་འཁོར་(Golf cart)ལ་བཞུགས་སྟེ་དགའ་ལྡན་འཕེལ་རྒྱས་གླིང་དུ་ཆིབས་བསྒྱུར་བསྐྱངས་ཡོད་པ་བཅས།།