༄༅། །ཕྱི་ལོ་༢༠༢༣ ཟླ་ ༡༡ ཚེས་ ༡༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་ཇོ་རན་ཇི་དགོན་པའི་ (Jorinji Temple) དགེ་འདུན་པ་ཧ་ཡ་ཤི་ཤུ་ཧི་ (Hayashi Shuei) ལགས་ཀྱིས་སྣེ་ཁྲིད་པའི་སོ་ཏོ་ཤུ་ཛེན་ནང་པའི་ཆོས་ཚོགས་ཀྱི་ཚོགས་མི་ཁག་ཅིག་ལ་མཇལ་ཁ་སྩལ་བ་དང་། ཀ་སྤྱི་མཐུན་རྒྱལ་ཁབ་ཀྱི་གནད་ཡོད་མི་སྣ་ཀ་རེལ་ཤ་ཝར་ཛེན་བག་ལགས་ཀྱི་སྐུ་ཟླ་ལ་ཐུགས་གསོའི་གསུང་འཕྲིན་སྩལ་ཡོད་པ་རེད།
དེ་བཞིན་ཅེཀ་སྤྱི་མཐུན་རྒྱལ་ཁབ་ཀྱི་ཞིང་གཤེགས་གནད་ཡོད་ཆབ་སྲིད་པ་དང་ཕྱི་འབྲེལ་མི་སྣ་སྐུ་ཞབས་ཀ་རེལ་ཤ་ཝར་ཛེན་བག་(Karel Schwarzenberg)ལགས་ཀྱི་སྐུ་ཟླ་ཐེ་རེ་སེ་ཤ་ཝར་ཛེན་བག་(Therese Schwarzenberg)ལགས་ལ་ཐུགས་གསོའི་གསུང་འཕྲིན་སྩལ་ཡོད་པ་རེད།
དེ་ཡང་ཐུགས་གསོའི་གསུང་འཕྲིན་ནང་མགོན་པོ་མཆོག་གིས། ཁོང་གིས་སྐུ་ཉིད་ཚོའི་རྒྱལ་ཁབ་ལ་ཞབས་འདེགས་བསྒྲུབས་ནས་མི་ཚེ་དོན་དང་ལྡན་པ་བསྐྱལ་ཡོད། ཁོང་ཉིད་ནས་སྲིད་འཛིན་ཝེ་ཁེ་ལེབ་ཧ་བེལ་(Vaclav Havel)ལས་ཁུངས་ཀྱི་སྤྱི་ཁྱབ་བློན་ཆེན་གྱི་ལས་ཁུར་བཞེས་ཤིང་། དེ་རྗེས་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་གྱི་ལས་ཁུར་བཞེས་པའི་སྐབས་ནས་བཟུང་ངོས་ཀྱིས་ཁོང་ངོ་ཤེས་ཀྱི་ཡོད། ཁོང་གིས་ཕྱི་སྲིད་བློན་ཆེན་གྱི་ལས་ཁུར་བཞེས་པའི་སྐབས་ཤིག་ངོས་རང་པ་རག་ཏུ་བསྐྱོད་སྐབས་ཁོང་གི་མཁའ་གྲུའི་ནང་མཉམ་དུ་བསྐྱོད་རྒྱུའི་གོ་སྐབས་བྱུང་། ངོས་ཀྱིས་ཁོང་གི་གནང་སྟངས་ལ་བསྔགས་བརྗོད་ཞུ། ཁོང་ནི་ངོས་ཀྱི་སེམས་ཉེ་བའི་གྲོགས་པོར་བརྩི་གི་ཡོད་ལ། ཁོང་གི་གྲོགས་འདྲིས་དང་གཡོ་བ་མེད་པའི་རྒྱབ་སྐྱོར་ལ་བཀའ་དྲིན་རྗེས་དྲན་ཞུ་རྒྱུ་ཡིན། ཞེས་བཀའ་སྩལ་ཡོད།