༄༅། །ཕྱི་ལོ་ ༢༠༢༢ ཟླ་ ༡༠ ཚེས་ ༡༢ ཉིན་རྡ་རམ་ས་ལའི་བཞུགས་སྒར་ཕོ་བྲང་གི་མཇལ་འཕྲད་ཁང་དུ་སེམས་དང་སྲོག་གི་ཚོགས་པ་དང་། ཡུ་རོབ་སེམས་དང་སྲོག་གི་ཚོགས་པ། ཏཱ་ལའི་བླ་མའི་དགེ་རྩ་བཅས་ཐུན་མོང་གིས་གོ་སྒྲིག་ཞུས་པ་ལྟར། རྟེན་འབྲེལ་ལྟོས་གྲུབ་དང་། མི་ཆོས་དང་སྤྱི་ཚོགས་ཀྱི་འབྲེལ་བ་ཞེས་པའི་བརྗོད་གཞིའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་སེམས་དང་སྲོག་གི་བགྲོ་གླེང་ལྷན་ཚོགས་ཐེངས་ ༣༧ པ་གནང་ཡོད་པ་རེད།
དེ་ཡང་སྔ་དྲོ་ཆུ་ཚོད་དགུ་བ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གཟིམ་ཆུང་ནས་མཇལ་འཕྲད་ཁང་དུ་ཆིབས་བསྒྱུར་གྱིས་ཞབས་སྟེགས་སུ་འཁོད་མཚམས་སེམས་དང་སྲོག་གི་ཚོགས་པའི་ཚོགས་གཙོ་ལྕམ་སྐུ་སུ་སན་བྷོ་ཝར་ཝུ་(Susan Bauer-wu )ལགས་ཀྱིས་ལོ་གསུམ་གྱི་རྗེས་སུ་ཚོགས་འདུ་འདི་ཚོགས་ཐུབ་པ་ནི་ཧ་ཅང་དགའ་པོ་དང་། ཧ་ཅང་དམིགས་བསལ་ཞིག་ཡིན་ཞེས་སོགས་ཕེབས་བསུའི་གསུང་བཤད་གྲུབ་མཚམས་བཀའ་སློབ་སྩལ་དོན།
སེམས་དང་སྲོག་གི་ཚོགས་འདུ་ང་ཚོ་ཐེངས་ཁ་ཤས་འཚོགས་པ་རེད། འདི་ཧ་ཅང་གལ་ཆེན་པོ་རེད། འཛམ་བུ་གླིང་འདིར་ཕྱིའི་དངོས་པོར་ཧ་ཅང་དོ་སྣང་ཆེན་པོ་ཡོད་ཀྱང་། སེམས་ཀྱི་རྣམ་གཞག་དེ་ཙམ་ཤེས་ཀྱི་མི་འདུག ཡིན་ནའང་། བདེ་སྡུག་ནི་ཤེས་པའི་སྟེང་ན་ཡོང་གི་ཡོད། དེར་བརྟེན། ཤེས་པ་ཞི་བདེ་བག་ཕེབས་ཤིག་མེད་ན་དངོས་པོ་ཡར་རྒྱས་ཅི་ཙམ་ཡོད་ཀྱང་གནད་དེ་ཙམ་མི་ཡོང་བ་ལྟ་བུ་འདུག འཛམ་གླིང་འདིར་དམག་འཁྲུག་གིས་མཚོན་པའི་དཀའ་ངལ་མང་པོ་ཞིག་དངོས་པོ་ཡར་རྒྱས་ཁོ་ནར་དམིགས་ཏེ་བྱུང་གི་ཡོད། ཚ་དྲོད་རྐྱེན་གྱིས་འཛམ་གླིང་འདི་ལོ་ག་ཚོད་སྡོད་ཀྱི་ཡོད་མེད་མི་ཤེས་ཀྱང་། ང་ཚོས་འབྱུང་འགྱུར་དེ་འདས་པའི་ཉམས་མྱོང་ལ་བལྟ་དགོས། དངོས་གནས་བདེ་སྐྱིད་ཡོང་བའི་རྩ་བ་ནི་སེམས་ཀྱི་ཞི་བདེ་དང་། སེམས་ཀྱི་ཞི་བདེའི་རྩ་བ་ནི་བྱམས་བརྩེ་རེད། ཅེས་སོགས་བྱམས་བརྩེའི་གལ་གནད་སྐོར་དང་། ཆོས་ལུགས་མཐུན་འབྲེལ། འགྲོ་བ་མིའི་རིགས་ལ་གཅིག་མཚུངས་ཀྱི་འདུ་ཤེས་འཛིན་ཐུབ་པ་ཞིག་དགོས་སྐོར་ལ་མགོན་པོ་གང་ཉིད་མཆོག་གིས་ཤུགས་སྐྱོན་གནང་གི་ཡོད་པའི་སོགས་བཀའ་ཕེབས་པ་དང་།
བཀའ་སློབ་གྲུབ་མཚམས་བགྲོ་གླེང་གི་སྐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་རང་བཞིན་ལྷན་སྐྱེས་བྱམས་བརྩེ་ཅན་ཞིག་ཡིན་ཡང་། ནར་སོན་རིམ་བཞིན་ཕྱིའི་དངོས་པོ་ཡར་རྒྱས་ཁོ་ན་ལས་ཤེས་ཡོན་ལམ་ལུགས་ནང་དུ་སྤྱོད་བཟང་གི་སྐོར་མེད་པར་དབྱེ་འབྱེད་ཀྱི་བསམ་བློ་མང་དུ་འཕེལ་གྱི་ཡོད་པ་དང་། དེའི་ཁྲོད་ནས་ང་ང་ཞེས་རང་ཉིད་གཅིག་པུ་གཅེས་འཛིན་གྱི་འདུ་ཤེས་སླེབས་པས་དམག་འཁྲུག་སོགས་རྙོག་དྲ་མང་པོ་བཟོ་བཞིན་ཡོད་པ་སྐོར་། དེང་རབས་ཤེས་ཡོན་ལམ་ལུགས་ནང་དུ་ཆོས་ལུགས་དང་མ་འབྲེལ་བའི་སྤྱོད་བཟང་གི་སློབ་སྦྱོང་སྤྲོད་ཐུབ་པ་ཡིན་ན་འཇིག་རྟེན་ཞི་བདེ་དང་། མི་སྒེར་ལ་སེམས་ཀྱི་ཞི་བདེ་ཡོང་བར་ཧ་ཅང་ཕན་ཐོགས་ཡོད་པའི་སྐོར་སོགས་བཀའ་སློབ་བཀའ་དྲིན་སྩལ། མཐར་ཚོགས་འདུ་གཙོ་སྐྱོང་བ་ལྕམ་སྐུ་རའོ་ཞི་ཇོའན་ཧེ་ལི་ཧྥེ་ཁུ་སུ་(roshi joan halifax) ལགས་ཀྱིས་མགོན་པོ་གང་ཉིད་མཆོག་གིས་བཀའ་སློབ་སྩལ་བ་ལ་བརྟེན་ནས་ང་ཚོས་མ་འོངས་པར་ཁ་ཕྱོགས་གང་དུ་ལས་ཀ་དང་འཆར་གཞི་ཅི་ཞིག་བཟོ་དགོས་པ་གསལ་བོ་བཟོས་སོང་བས་ཐུགས་རྗེ་ཆེ་ཞེས་ཞུས་ཏེ་ཉིན་དང་པོའི་ཚོགས་འདུ་ལེགས་པར་གྲོལ་བ་དང་།
ཐེངས་འདིའི་ཚོགས་འདུར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་སེམས་དང་སྲོག་གི་ཚོགས་ལྕམ་སྐུ་སུ་སན་བྷོ་ཝར་ཝུ་(SUSAN BAUER-WU President. Mind & Life Institute ) ལགས་དང་། མའེ་ཌི་སོན་ཝེ་སི་ཀང་སན་གཙུག་ལག་སློབ་གྲྭ་ཆེན་མོའི་སློབ་དཔོན་རི་ཆར་ཌི་ཌེ་ཝ་ཌ་སན་(RICHARD DAVIDSON University of Wisconsin-Madison) ཨ་རིའི་ཨུ་པ་ཡཱ་ཛན་ལྟེ་གནས་ཀྱི་ལྕམ་སྐུ་རའོ་ཞི་ཇོའན་ཧེ་ལི་ཧྥེ་ཁུ་སུ་(ROSHI JOAN HALIFAX Upaya Institute and Zen Center )ལགས། ཧ་ཝར་ཌི་གཙུག་ལག་སློབ་གྲྭ་ཆེན་མོའི་སློབ་དཔོན་ཇོ་སེབ་ཧན་རིག་ (JOSEPH HENRICH Harvard University )ལགས། པིར་སིན་ཌན་གཙུག་ལག་སློབ་གྲྭ་ཆེན་མོའི་མའོ་ལི་ཁུ་རོ་ཁེ་ཊི་(MOLLY CROCKETT Princeton University)ལགས། མའེ་ཌི་སོན་ཝེ་སི་ཀང་སན་གཙུག་ལག་སློབ་གྲྭ་ཆེན་མོའི་ཇོན་ཌན་(JOHN DUNNE University of Wisconsin-Madison RICHARD DAVIDSON )ལགས། སྐུའི་གསུང་བསྒྱུར་དགེ་བཤེས་ཐུབ་བསྟན་སྦྱིན་པ་ལགས་སོགས་ཀྱིས་གཙོས་ཚན་རིག་པ་སོགས་མི་གྲངས་ ༡༧༦ མཉམ་ཞུགས་གནང་ཡོད་པ་དང་། སང་ཉིན་ཚེས་ ༡༣ ཉིན་མུ་མཐུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་བྷ་སི་ཁུ་གཙུག་ལག་མཐོ་སློབ་ཀྱི་སློབ་དཔོན་ལྕམ་ཧན་དྷེ་ཇ་གེར་(HANNE DE JAEGHER University of Basque Country )ལགས་དང་། ཌོ་ལིན་གཙུག་ལག་མཐོ་སློབ་ཀྱི་ཨ་བྷེ་བྷ་བྷེར་ཧན་(ABEBA BIRHANE University College Dublin)ལགས་གཉིས་ཀྱིས་གསུང་བཤད་གནང་རྒྱུ་ཡིན་པ་དང་། སེམས་དང་སྲོག་གི་ཚོགས་པ་བཙུགས་ནས་ཕྱི་ལོ་ ༢༠༢༢ ལོར་ལོ་ཧྲིལ་པོ་ ༣༥ འཁོར་ཡོད་པ་རེད།