༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༡༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་ཞི་བདེའི་བསྟི་གནས་སློབ་གཉེར་ཁང་(USIP)གིས་ཇི་ལྟར་གསོལ་འདེབས་ཞུས་དོན་ལྟར་འཛམ་གླིང་སྟེང་རྩོད་རྙོག་གི་དཀའ་ངལ་ཅན་གྱི་ཡུལ་ལུང་འདྲ་མིན་གྱི་གཞོན་སྐྱེས་འགོ་ཁྲིད་ཁག་ཅིག་དང་ལྷན་དུ་བྱམས་བརྩེ་དང་ཤེས་ཡོན། འདྲ་མཉམ་བཅས་ཀྱི་བརྗོད་གཞིའི་ཐོག་དྲ་ལམ་བརྒྱུད་བཀའ་སློབ་དང་དྲི་བར་བཀའ་ལན་སྩལ་བ་བཅས་ཉིན་གཉིས་རིང་གི་མཛད་རིམ་ལེགས་པར་གྲུབ་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་དགུ་པ་མ་ཟིན་ཙམ་ལ་སྔར་ཉིན་བཞིན་མཛད་རིམ་དབུ་འཛུགས་ཀྱིས་ཨ་རིའི་ཞི་བདེའི་བསྟི་གནས་སློབ་གཉེར་ཁང་གི་ཚོགས་གཙོ་དང་སྤྱི་ཁྱབ་འགན་འཛིན་(CEO)ལྕམ་ལི་སེ་གྷརན་ཌེ་(Lise Grande) ལགས་ཀྱིས་ཉིན་གཉིས་པའི་བགྲོ་གླེང་དབུ་འཛུགས་ཀྱི་གསུང་བཤད་དང་། བགྲོ་གླེང་སྔོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༼བསམ་བློའི་སློབ་སྦྱོང་དང་ཀླད་པའི་ཡར་རྒྱས་༽ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུའི་གསོལ་འདེབས་ཞུས་པར་༸གོང་ས་མཆོག་གིས་བཀའ་སློབ་སྩལ་དོན། མང་པོ་ཞིག་གིས་མཁྱེན་གསལ་ལྟར། འདས་པའི་མི་ལོ་བརྒྱ་ཕྲག་གོང་ཕན་ཚུན་གསོད་རེས་བྱེད་པའི་གནས་ཚུལ་ནི་འཆར་ཅན་ལྟ་བུ་ཆགས་ཡོད། དཔེར་ན། ངོས་རང་གི་མི་ཚེ་འདིའི་ནང་ལ་ཆ་བཞག་ནའང་དམག་ཆེན་དང་པོ་དང་དམག་ཆེན་གཉིས་པ་བྱུང་བའི་སྐབས་སུ་མི་ཕལ་མོ་ཆེའི་ངོར་རྒྱལ་ཁབ་ཀྱི་རྩ་དོན་ཆེད་གཞན་གྱི་སྲོག་གཅོད་པ་ཕལ་ཆེར་རུང་བ་ལྟ་བུ་ཆགས་ཡོད། དེར་བརྟེན། གོ་མཚོན་བཟོ་བའི་ཆེད་དུ་དཔུང་དང་དཔལ་འབྱོར་གྱི་ནུས་ཧ་ཅང་མང་པོ་བཏང་བ་རེད། ད་ལྟ་དེ་ལྟ་བུའི་བསམ་བློའི་རིམ་པ་དེ་འགྱུར་བ་འགྲོ་བཞིན་འདུག འཛམ་གླིང་སྤྱི་ཡོངས་ཀྱི་ཞི་བདེའི་ཆེད་དུ་དགོངས་པ་བཞེས་མཁན་མང་དུ་སོང་ཡོད། ལྷག་པར་དུ་རྒྱལ་ཁབ་སོ་སོའི་ཁེ་ཕན་དེ་རྒྱལ་སྤྱིའི་དཔལ་འབྱོར་སོགས་དང་འབྲེལ་བ་ཡོད་པ་ཤེས་ཡོང་གི་ཡོད། འདས་པའི་དུས་རབས་སྔོན་མའི་སྐབས་སུ་སོ་སོའི་རྒྱལ་ཁབ་ཀྱི་དོན་དག་གཅིག་པུ་སྒྲུབ་པའི་ཆེད་དུ་དྲག་རྩུབ་ཀྱི་ལས་ཀ་བྱེད་མཁན་བྱུང་ཡོད། དེང་སང་དཔལ་འབྱོར་སོགས་གང་ཡིན་ཀྱང་ཕན་ཚུན་ལྟོས་གྲུབ་ཆེན་པོ་ཆགས་ཡོད་པས་དམག་རྒྱག་པ་སོགས་ཕན་ཐོགས་མེད་པ་དང་། མི་མཐུན་པའི་གནས་ཚུལ་བྱུང་ཡོད་ཚེ་མི་མཐུན་པ་དེ་སེལ་བའི་ཆེད་དུ་ཕན་ཚུན་གྲོས་མོལ་གྱིས་སེལ་དགོས་པ་ཞིག་རེད།
ངོས་ཀྱི་མི་ཚེ་འདིའི་རིང་འཛམ་གླིང་མི་མང་སྤྱིའི་བསམ་བློ་གཏོང་སྟངས་ལ་འགྱུར་བ་ཆེན་པོ་ཕྱིན་པར་མཐོང་གི་འདུག ང་ཚོས་མི་རབས་རྗེས་མ་ལ་དོ་སྣང་གིས་ཁོ་ཚོར་སློབ་སྦྱོང་ཚད་ལྡན་ཞིག་སྤྲོད་དགོས་པ་ཧ་ཅང་གལ་ཆེན་པོ་རེད། འཛམ་གླིང་འགྱུར་བ་འགྲོ་བཞིན་ཡོད་པས་དངོས་ཡོད་གནས་ཚུལ་དང་མཐུན་པའི་རྒྱལ་སྤྱིའི་རང་བཞིན་ཅན་གྱི་བསམ་བློ་སྤེལ་རྒྱུ་ཧ་ཅང་གལ་ཆེན་པོ་ཆགས་ཡོད། སོ་སོའི་རྒྱལ་ཁབ་དང་སོ་སོའི་མི་རིགས། ས་གནས་བཅས་ཁེར་སྡོད་བྱེད་པ་ནི་དངོས་ཡོད་གནས་ཚུལ་དང་མི་མཐུན་པ་ཆགས་ཡོད། དེར་བརྟེན། མི་རབས་གསར་པ་ཚོས་འདས་པའི་དམག་དང་གོ་མཚོན་སོགས་འགལ་རྐྱེན་ཅན་གྱི་སློབ་སྦྱོང་གི་རིགས་བྱེད་མི་དགོས་པར། འཛམ་གླིང་ལ་ཞི་བདེ་ཚད་ལྡན་ཡོང་ཆེད་ཅི་ཞིག་བྱེད་དགོས་པའི་ཆེད་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་རེད། རྒྱལ་ཁབ་ཁག་གིས་སོ་སོའི་ཁེ་ཕན་རྐྱང་རྐྱང་སྒྲུབ་པའི་ཆེད་དུ་ཐབས་ཤེས་གང་ཡོད་བྱེད་པ་ནི་རྗེས་ལུས་ཅན་གྱི་བསམ་བློ་ཞིག་ཆགས་ཡོད་པས་མི་རབས་གསར་པ་ཚོས་འགྲོ་བ་མི་སྤྱིའི་བདེ་སྡུག་སྐོར་ལ་བསམ་བློ་གཏོང་དགོས། ཕྱོགས་གཅིག་ནས་ང་ཚོའི་འཛམ་གླིང་གི་ཚ་དྲོད་ཆེ་རུ་འགྲོ་བཞིན་པ་འདི་དཀའ་ངལ་ཞིག་ཆགས་ཡོད། མི་རབས་གསར་པ་ཚོས་དུས་རབས་སྔོན་མའི་བསམ་བློ་བསྐྱར་ཟློས་ཡང་ཟློས་བྱས་པ་མ་ཡིན་པར་རྒྱ་ཆེ་ས་ནས་དགོངས་པ་བཞེས་དགོས་པ་ཧ་ཅང་གལ་ཆེན་པོ་ཡིན།
ངོས་ཀྱི་ལོ་ནི་གང་འཚམ་ཆེན་པོ་ཆགས་ཡོད། དམག་ཆེན་དང་པོ་དང་གཉིས་པ་གཉིས་ཀ་ངོས་རང་གི་མི་ཚེ་ནང་མཐོང་ཡོད། འདི་ལྟ་བུའི་ཉམས་མྱོང་ལ་བརྟེན་ནས་འཛམ་གླིང་སྤྱིའི་བདེ་རྩར་བསམ་བློ་གཏོང་རྒྱུ་ལས་སོ་སོའི་རྒྱལ་ཁབ་གཅིག་པུར་བསམ་བློ་གཏོང་བ་ནི་འགྲིག་མི་འདུག་བསམ་པ་དྲན་བཞིན་འདུག དེར་བརྟེན། འཛམ་གླིང་སྤྱི་ལ་ཁྱབ་པའི་སེམས་ཁུར་ཡོད་པའི་ཐོག་གོ་ལ་གཅིག་གྱུར་གྱི་འདུ་ཤེས་ཤིག་བཅིངས་བཞིན་ཡོད། དེ་ལྟ་བུའི་བསམ་བློ་ཞིག་ཡོད་པས་སོ་སོའི་ལུང་པར་བྲལ་ནས་རྒྱ་གར་དུ་འབྱོར་བ་ཡིན་ནའང་ཁེར་རྐྱང་ལ་ལུས་པའི་བློ་ཞུམ་པའི་གནས་སྟངས་སླེབས་མ་སོང་། རྒྱ་གར་ལ་སླེབས་ནས་བཟུང་མི་མང་པོར་ཐུག་འཕྲད་ཀྱི་གོ་སྐབས་བྱུང་བ་དང་། དེ་དང་མཉམ་དུ་བསམ་བློའི་ནང་དུ་གོ་ལ་གཅིག་གྱུར་གྱི་འདུ་ཤེས་ཡོད་པས་མི་སུ་འདྲ་ཞིག་དང་ཐུག་ཀྱང་དབྱེ་འབྱེད་ཀྱི་བསམ་བློ་འཁོར་གྱི་མི་འདུག མི་སུ་ཡིན་ཡང་ཁེར་རྐྱང་གིས་རྒྱུན་རིང་སྡོད་སྐབས་ཉེ་འཁོར་ནས་མི་གཞན་པ་ཞིག་མཐོང་ཚེ་དེ་ནི་རྒྱལ་ཁབ་གང་གི་ཡིན་པ་དང་མི་རིགས་གང་ཡིན་པ། ཆོས་ལུགས་གང་ཡིན་པའི་བསམ་བློ་མི་འཁོར་བར་ལམ་སེང་འཚམ་འདྲི་ཞུ་ངེས་རེད། གནས་སྐབས་དེ་ལྟ་བུར་རྒྱལ་ཁབ་དང་མི་རིགས་གང་ཡིན་གྱི་བསམ་བློ་དེ་འཁོར་གྱི་མེད། དེང་འཛམ་གླིང་འདིར་སྡོད་པའི་འགྲོ་བ་མི་ཡོངས་རྫོགས་ལ་དེ་ལྟ་བུའི་གཅིག་གྱུར་གྱི་འདུ་ཤེས་ཤིག་ངེས་པར་དགོས་པ་ཡིན། གོང་དུ་ཞུས་པ་ལྟར་ཚ་དྲོད་ཀྱི་དཀའ་ངལ་འདི་ཧ་ཅང་ཚབས་ཆེན་པོ་ཡིན་པས་སོ་སོའི་རྒྱལ་ཁབ་དང་མི་རིགས་ཀྱི་བསམ་བློ་རྐྱང་བཏང་བ་ཡིན་ན་སྦུ་སུག་དོག་དྲག་པ་རེད། ཅེས་སོགས་བཀའ་སློབ་སྩལ་རྗེས་དྲི་བར་བཀའ་ལན་སྩལ་ཏེ་འཛམ་གླིང་སྟེང་རྩོད་རྙོག་གི་དཀའ་ངལ་ཅན་གྱི་ཡུལ་ལུང་འདྲ་མིན་གྱི་གཞོན་སྐྱེས་འགོ་ཁྲིད་ཁག་ཅིག་དང་ལྷན་དུ་ཉིན་གཉིས་རིང་གི་བགྲོ་གླེང་ལེགས་པར་གྲུབ་ཡོད་པ་བཅས།