༄༅། །ཕྱི་ལོ་ ༢༠༢༡ ཟླ་བ་ ༩ ཚེས་ ༢༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིིའི་མོན་མའོ་ཐི་གཙུག་ལག་སློབ་ཆེན་(Monmouth University)གྱིས་ཇི་ལྟར་གསོལ་བ་བཏབ་པ་ལྟར་དེ་གའི་དགེ་ལས་རྣམས་ལ་དྲ་ལམ་བརྒྱུད་ང་ཚོའི་མ་འོངས་པར་འཕྲོད་བསྟེན་དང་བདེ་སྐྱིད་རྒྱུན་གནས་ཐུབ་ཐབས་ཀྱི་སྐོར་ལ་བཀའ་སློབ་དང་དྲི་བར་བཀའ་ལན་སྩལ་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༩།༠༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་གཟིམ་ཆུང་ནས་བཀའ་སློབ་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་འཁོད་མཚམས་མོན་མའོ་ཐི་གཙུག་ལག་སློབ་ཆེན་གྱི་སློབ་གཙོ་(President,Monmouth University) སྐུ་ཞབས་པེ་ཊི་རིག་ལེ་ཧེ་ (Dr. Patrick Leahy)ལགས་ཀྱིས་དགེ་ལས་སློབ་མ་ཡོངས་ཀྱི་ཚབ་ཞུས་ཏེ་འཚམ་འདྲི་དང་། བཀའ་སློབ་བཀའ་དྲིན་སྩལ་རྒྱུར་ཞལ་བཞེས་གནང་བར་ཐུགས་རྗེ་ཆེ་ཞུས་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
རྣམ་པ་ཚོས་ངོས་ལ་བདེ་སྐྱིད་དང་ཞི་བདེའི་སྐོར་གྲོས་བསྡུར་བྱ་རྒྱུའི་གོ་སྐབས་གནང་བར་ཐུགས་རྗེ་ཆེ་ཞེས་ཞུ་རྒྱུ་ཡིན། འབུ་སྲིན་ཕྲ་མོ་རྣམས་ཚུད་པའི་སེམས་ཅན་ཚང་མས་ཞི་བདེ་འདོད་ཀྱི་ཡོད་པ་དང་། སེམས་ཅན་ཐམས་ཅད་ཀྱིས་བསུན་པོ་འདོད་ཀྱི་མེད་པ་གསལ་པོ་རེད། ཐ་ན་འབུ་སྲིན་ཕྲ་མོ་དང་དུད་འགྲོ་སེམས་ཅན་ཆུང་ཆུང་ཞིག་ཡིན་ཡང་མེ་འབར་བཞིན་པ་མཐོང་ན་བྲོས་འགྲོ་ཡི་ཡོད་པ་ཆོས་ཉིད་རེད། དུད་འགྲོ་སེམས་ཅན་དང་འགྲོ་བ་མིའི་དབར་ཁྱད་པར་ཆེན་པོ་ཞིག་ཡོད་པ་ནི་འགྲོ་བ་མི་ལ་དཀའ་ངལ་ཇི་ལྟར་སེལ་དགོས་མིན་ཐད་ཆོས་རབ་ཏུ་རྣམ་འབྱེད་ཀྱི་ཤེས་རབ་ཡོད། འགྲོ་བ་མི་ཡིས་རྒྱ་ཆེ་སར་བསམ་བློ་གཏོང་ཐུབ་ཀྱི་ཡོད་པ་མ་ཟད། མ་འོངས་པའི་སྐོར་བསམ་བློ་གཏོང་ཐུབ་ཀྱི་ཡོད། དུད་འགྲོ་སེམས་ཅན་དེ་དག་གིས་ཕུགས་རྒྱང་རིང་པོར་བསམ་བློ་གཏོང་ཐུབ་ཀྱི་མེད། འགྲོ་བ་མི་ཡིས་ཕུགས་རྒྱང་རིང་པོར་བསམ་བློ་གཏོང་ཐུབ་ཀྱི་ཡོད་ཀྱང་། འདས་ཟིན་པའི་དུས་རབས་ནང་ང་ཚོ་འགྲོ་བ་མི་ནི་རྙོག་གྲ་ཆེས་མང་ཤོས་བཟོ་མཁན་དེ་ཆགས་ཡོད།དཔེར་ན་ང་ཚོ་འགྲོ་བ་མི་ཡིས་འདས་པའི་ལོ་ངོ་སྟོང་ཕྲག་ལྷག་གི་རིང་གོ་མཚོན་བཟོས་ཡོད། སྐབས་རེར་ང་ཚོས་གོ་མཚོན་དེ་དག་ཞི་བདེའི་ཆེད་དུ་བཟོ་ཡི་ཡོད་པ་རྗོད་ཀྱི་ཡོད། འོན་ཀྱང་། དོན་དངོས་སུ་གོ་མཚོན་གྱི་དམིགས་ཡུལ་ནི་སྲོག་གཅད་རྒྱུ་དེ་རེད།
འདས་པའི་དུས་རབས་ནང་གོ་མཚོན་མེད་པ་ཡིན་ན་ཞི་བདེ་ཆགས་ཐུབ་ཡོད་སྙམ། ང་ཚོས་གོ་མཚོན་བཟོ་སྐྲུན་བྱེད་རྒྱུའི་ཆེད་དུ་ནུས་ཤུགས་དང་དངུལ་གྱི་འགྲོ་གྲོན་ཕོན་ཆེན་པོ་བཏང་ཡོད། དེ་བཞིན་དེང་སང་འཛམ་གླིང་ཞི་བདེ་སྲུང་སྐྱོབ་བྱེད་རྒྱུའི་མིང་ཁྱེར་ནས་གོ་མཚོན་བཟོ་སྐྲུན་བྱེད་རྒྱུའི་ཆེད་དུ་ནུས་ཤུགས་དང་དངུལ་གྱི་འགྲོ་གྲོན་ཕོན་ཆེན་པོ་གཏོང་གི་ཡོད། གོ་མཚོན་གྱིས་ཞི་བདེ་གང་ཡང་བསྐྲུན་མི་ཐུབ། གོང་དུ་ངོས་ཀྱིས་བཤད་པ་ལྟར་རེད། གོ་མཚོན་ནི་འཚེ་བ་བྱེད་རྒྱུའི་ཆེད་དུ་རེད། དེང་སང་འཛམ་བུ་གླིང་ནང་ཚང་མ་གཅིག་ལ་གཅིག་བརྟེན་ནས་འཚོ་བཞིན་ཡོད། དུས་རབས་སྔོན་མ་དང་མི་འདྲ་བར་དེང་སང་འཛམ་གླིང་གི་ཤར་ནུབ་དང་། དེ་བཞིན་གླིང་ཆེན་གཅིག་གིས་གཅིག་ལ་བརྟེན་ནས་འཚོ་བཞིན་ཡོད།གོ་ལའི་ཚ་དྲོད་དང་དཔལ་འབྱོར་ལ་ཆ་བཞག་ནའང་འཛམ་གླིང་གི་རྒྱལ་ཁབ་ཚང་མའི་ཁེ་ཕན་དང་འབྲེལ་བ་ཆགས་ཡོད། གོ་མཚོན་གྱི་ལས་འགན་དེ་རྫོགས་པ་རེད། འཛམ་གླིང་འདིའི་སྒང་ལ་གོ་མཚོན་གྱིས་དཀའ་ངལ་མང་དག་ཅིག་བཟོ་བཞིན་ཡོད་པ་མ་ཟད། མི་གསོད་ཁྲག་སྦྱོར་བྱེད་ཀྱི་ཡོད། ད་ནི་ང་ཚོས་ངེས་པར་འགྲིག་སོང་ཞེས་བརྗོད་དགོས།
ང་ཚོས་འཛམ་གླིང་འདི་ཉིད་གོ་མཚོན་མེད་པའི་དོན་དམ་གྱི་ཞི་བདེ་ངེས་པར་དུ་བསྐྲུན་དགོས། ངོས་རང་ཆུང་ཆུང་ཡིན་པའི་སྐབས་ངོས་ཀྱི་གོ་མཚོན་ནི་ངོས་ཀྱི་སེན་མོ་རེད། ངོས་རང་ངོས་ཀྱི་གཅེན་པོ་བློ་བཟང་བསམ་གཏན་དང་མཉམ་དུ་ལོ་མང་རིང་སྐྱིད་པོའི་ངང་བསྡད་པ་ཡིན། སྐབས་འགར་ང་ཚོའི་དབར་འཁྲུག་རྩོད་ཤོར་གྱི་ཡོད། ངོས་ཀྱི་གོ་མཚོན་ཡག་ཤོས་ངོས་ཀྱི་སེན་མོ་རེད། སྐབས་དེ་དུས་ངོས་ཀྱིས་གཅེན་པོ་བློ་བཟང་བསམ་གཏན་ལགས་ཀྱི་གདོང་པར་སྤར་མོ་བརྒྱབ་སྟེ་རྨ་ཤུལ་མང་པོ་བཟོས་མྱོང་། འཛམ་གླིང་འདིའི་སྒང་གི་མི་ཐེར་འབུམ་བདུན་ཡོད་པ་ཚང་མ་འགྲོ་བ་མི་གཅིག་གྱུར་ཡིན་པའི་འདུ་ཤེས་འཛིན་དགོས། ང་ཚོས་ངེས་པར་དུ་གོ་མཚོན་ཉུང་དུ་གཏང་རྒྱུར་འབད་བརྩོན་གནང་དགོས་པ་མ་ཟད། རིམ་པས་བཟོ་གྲྭ་གང་གིས་ཀྱང་གོ་མཚོན་བཟོ་སྐྲུན་བྱེད་རྒྱུ་མེད་པའི་འབད་བརྩོན་གནང་དགོས། དེ་ནི་ཡོང་སྲིད་པ་ཞིག་རེད།
ཞི་བདེ་ངོ་མ་དེ་སེམས་ནང་ཡོང་དགོས། ཁོང་ཁྲོ་དང་། ཕྲག་དོག སུན་སྣང་བཅས་ནི་འཚེ་བའི་ལས་ཀྱི་འབྱུང་ཁུངས་རེད། ང་ཚོ་སྤྱི་ཚོགས་ལ་བརྟེན་པའི་སྲོག་ཆགས་རེད། ང་ཚོས་ནང་སེམས་ཀྱི་ཞི་བདེའི་ཐད་དོ་སྣང་མང་ཙམ་བྱེད་དགོས། དཔེར་ན་ངོས་རང་སྒེར་གྱི་ཉམས་མྱོང་ལ་ཆ་བཞག་ན་ང་ཚོ་བོད་ནང་ཡོད་པའི་སྐབས་ང་ཚོས་བོད་མི་གཅིག་པུར་བསམ་བློ་གཏོང་གི་ཡོད། ང་ཚོ་རྒྱ་གར་ལ་བཙན་བྱོལ་དུ་འབྱོར་རྗེས་ཕྱི་མི་ལ་ཐུག་འཕྲད་བྱ་རྒྱུའི་གོ་སྐབས་བྱུང་བ་རེད། དེ་རྗེས་ང་ཚོས་བོད་མི་གཅིག་པུར་བསམ་བློ་གཏོང་གི་མེད། ང་ཚོ་ཚང་མ་མཆེད་གྲོགས་ཕོ་མོ་ཡིན་པའི་སྐོར་བསམ་བློ་གཏོང་གི་ཡོད།
དེ་རིང་སྔ་དྲོ་ངོས་ཀྱིས་གསོ་རིག་སྨན་པ་དང་ཕྱི་ལུགས་སྨན་པ་གཉིས་ལ་བསྟེན་པ་ཡིན། སྨན་པ་གཉིས་ཀས་ངོས་ཀྱི་གཟུགས་པོའི་འཕྲོད་བསྟེན་གནས་སྟངས་ཧ་ཅང་ཡག་པོ་འདུག་ཅེས་བརྗོད་བྱུང་། དེ་ལྟར་བྱུང་དགོས་དོན་ནི་སྨན་གཅིག་པུ་མ་ཡིན་པར་ངོས་ཀྱི་བསམ་བློ་གཏོང་སྟངས་དུས་རྟག་ཏུ་ཞི་བདེ་རེད། ནང་སེམས་ལ་ཞི་བདེ་ཡོད་ན་དེས་གཟུགས་པོའི་འཕྲོད་བསྟེན་ལ་ཧ་ཅང་ཕན་གྱི་ཡོད། རྒྱུན་དུ་ཁོང་ཁྲོ་དང་དངངས་སྐྲག་སྐྱེས་ནས་བསྡད་ན་དེས་ང་ཚོའི་འཕྲོད་བསྟེན་ལ་ཧ་ཅང་གནོད་ཀྱི་ཡོད། སྨན་པ་དང་སྨན་ཞབས་པ་རྣམ་པ་ཚོས་ནད་པར་སྨན་བཅོས་བྱེད་སྐབས་འཛུམ་དམུལ་དམུལ་གྱི་ངང་ནས་སྨན་བཅོས་གནང་རོགས། ངོས་རང་སྨན་ཁང་ལ་བསྟེན་གཏུགས་བྱེད་དུ་འགྲོ་སྐབས་སྨན་པ་དང་སྨན་ཞབས་པ་ཚོས་འཛུམ་བསྟན་པ་ཡིན་ན་ངོས་རང་ཧ་ཅང་སྐྱིད་པོ་འདུག་ཅེས་སོགས་ཀྱི་བཀའ་སློབ་སྩལ་རྗེས་བཀའ་འདྲི་ཁག་ལ་བཀའ་ལན་སྩལ་ཡོད་པ་བཅས།། །།