༄༅། །ཕྱི་ལོ་༢༠༢༡ ཟླ་ ༣ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་ནས་ཀང་ར་རྫོང་གི་ཛོ་ནོལ་སྨན་ཁང་དུ་ཆིབས་བསྒྱུར་གྱིས་ཀོ་ཝིཌ་༡༩ སྔོན་འགོག་སྨན་ཁབ་སྐྱོན་ཡོད་པ་རེད།
དེ་ཡང་ཞོགས་པའི་ཆུ་ཚོད་བདུན་པ་ཙམ་ལ་རྡ་སར་གནས་འཁོད་རང་རིགས་སེར་སྐྱ་མང་པོས་ཕེབས་ལམ་གཡས་གཡོན་དུ་མཇལ་དར་བཟུང་ནས་མཇལ་ཁ་ཞུ་བཞིན་ཀང་ར་རྫོང་སྨན་ཁང་དུ་ཆིབས་བསྒྱུར་གྱིས་སྨན་ཁང་དེ་གའི་ཀོ་ཝིཌ་སྔོན་འགོག་སྨན་ཁབ་ལྟེ་གནས་ཁང་དུ་སྔོན་འགོག་སྨན་ཁབ་བཞེས་ཡོད་པ་དང་། སྐབས་དེར་༸མགོན་པོ་གང་ཉིད་མཆོག་གིས་བཀའ་སློབ་སྩལ་དོན།
ངའི་ཡིད་རྟོན་འཕེར་བའི་གྲོགས་པོ་དང་སྨན་པ་ཁག་གཅིག་གིས་ངོས་ལ་སྔོན་འགོག་གི་སྨན་ཁབ་འདི་རྒྱག་དགོས་པའི་བསམ་འཆར་བྱུང་ཞིང་། ཛ་དྲག་གི་གནས་ཚུལ་རིགས་མི་འབྱུང་བའི་སྔོན་འགོག་ཆེད་སྨན་ཁབ་འདི་རྒྱག་རྒྱུ་ནི་ཕན་ཐོགས་ཧ་ཅང་ཆེན་པོ་ཡོད་པ་ཞིག་རེད་ལ། ཞེ་དྲག་ཡག་པོ་རེད། དེར་བརྟེན་མི་གཞན་ཚོས་ཀྱང་སྤྱི་ཚོགས་ཁྱོན་ཡོངས་ལ་ཕན་པའི་སླད་སྨན་ཁབ་འདི་རྒྱག་རྒྱུ་ནི་ཧ་ཅང་གལ་ཆེན་པོ་རེད། ངོས་ནས་ཀྱང་སྨན་ཁབ་འདི་བརྒྱབ་པ་ཡིན་ལ། དེ་བཞིན་མི་གཞན་མང་པོས་སེམས་ཤུགས་བསྐྱེད་དེ་སྨན་ཁབ་འདི་ངེས་པར་རྒྱག་རྒྱུར་སྐུལ་མ་བྱ་རྒྱུ་ཡིན། ཞེས་བཀའ་སློབ་སྩལ་རྗེས་བཞུགས་སྒར་ཕོ་བྲང་དུ་ཆིབས་བསྒྱུར་བསྐྱངས་ཡོད་པ་བཅས།།