ད་ནངས་ཕྱི་ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཨ་རིའི་སྲིད་འཛིན་ཇོས་བྷཻ་ཌེན་གྱིས་ཁ་སང་ནས་སྲིད་འཛིན་གྱི་ཐུགས་འགན་བཞེས་པར་དགྱེས་ཚོར་ཆེན་པོས་འཚམས་འདྲི་བཀྲ་ཤིས་བདེ་ལེགས་ཀྱི་བཀའ་ཡིག་སྩལ་ཡོད།
དུས་རྒྱུན་དུ་༸གོང་ས་མཆོག་ཁོར་ཡུག་ལ་ཐུགས་སྣང་ཆེན་པོ་གནང་མཁན་ཞིག་ཡིན་པའི་ཆ་ནས། ད་ལམ་ཨ་རིའི་གཞུང་གིས་ཁོར་ཡུག་སྲུང་སྐྱོབ་གནང་རྒྱུ་འདི་གནད་དོན་གལ་ཆེ་ཤོས་ཤིག་ཏུ་བརྩིས་པ་དང་སྦྲགས། པེ་རཱི་སེ་རྒྱལ་སྤྱིའི་ཁོར་ཡུག་གྲོས་མཐུན་ཚོགས་པའི་ཁོངས་སུ་ཨ་རི་བསྐྱར་དུ་འཛུལ་ཞུགས་གནང་གཏན་འཁེལ་བར་བཀའ་དྲིན་ཆེ་ཞེས་བཀའ་གནང་ཡོད།
དེ་བཞིན་སྲིད་འཛིན་མཆོག་ནས་ཕྱི་ནང་ལས་དོན་གང་ཅིའི་ཐད་ཡར་རྒྱས་ཡོང་ཐབས་ཀྱི་འཆར་གཞི་འདིང་བཞིན་པ་ལའང་བསྔགས་བརྗོད་གནང་ཡོད། ཨ་རི་ནི་འཛམ་གླིང་གིས་རེ་བའི་མིག་ལྟོས་བྱ་ཡུལ་མང་གཙོའི་རྒྱལ་ཁབ་ཚད་ལྡན་ཞིག་ཡིན་ཞིང་། དེང་འཛམ་གླིང་ནང་བཀྲེས་སྐོམ་དང་། ནད་ཡམས། འཚེ་བས་མནར་བཞིན་པའི་དཀའ་ཚེགས་ཆེ་བའི་དུས་སྐབས་འདིར་ཁྱེད་ཀྱི་དབུ་ཁྲིད་འོག་ནས་རོགས་ཕན་གང་ཐུབ་གནང་བའི་རེ་བ་དང་ཡིད་ཆེས་ཡོད།
སྲིད་འཛིན་མཆོག་ནས་དེ་སྔོན་ཡུན་རིང་པོ་ནས་བོད་དོན་ཐོག་རྒྱབ་སྐྱོར་གནང་བར་བསྐྱར་དུ་ཐུགས་རྗེ་ཆེ་ཞུ་རྒྱུ་དང་། ལོ་རྒྱུས་ཡུན་རིང་ལྡན་པའི་འཚེ་བ་མེད་པ་དང་། བྱམས་བརྩེའི་རྩ་བ་ཅན་གྱི་ནང་དོན་རིག་པ་གཙོ་བོར་གྱུར་པའི་བོད་ཀྱི་རིག་གཞུང་འདི་ཉིད་རྒྱུན་འཛིན་ཐུབ་ཐབས་སུ་ཨ་རིའི་གཞུང་མང་གིས་རྒྱབ་སྐྱོར་མུ་མཐུད་གནང་བཞིན་པར་ཐུགས་རྗེ་ཆེ་ཞེས་སོགས་དང་། སྲིད་འཛིན་གང་ཉིད་ཀྱི་ཕྱག་ལས་ལམ་ལྷོངས་ཡོང་བའི་གཏན་དགེའི་སྨོན་ལམ་ཡོད་ཅེས་བཀའ་ཡིག་སྩལ་གནང་མཛད་ཡོད།