དེ་རིང་ཕྱི་ཟླ་ ༡ ཚེས་ ༤ ཉིན་༸གོང་ས་༸སྐྱབས་མགོན་ཆེན་པོ་མཆོག་ནས་ཨ་རིའི་གྲོས་ཚོགས་ཀྱི་ཚོགས་གཙོ་ལྕམ་སྐུ་ནེན་སཱི་པེ་ལོ་སཱི་(Nancy Pelosi)གྲོས་ཚོགས་འོག་མའི་ཚོགས་གཙོར་ཐེངས་བཞི་པར་འོས་འདེམས་བྱུང་བར་འཚམས་འཕྲིན་གྱི་བཀའ་ཡིག་གནང་བ་དང་སྦྲགས་ཕྱི་ལོ་གསར་ཚེས་ལ་བཀྲ་ཤིས་བདེ་ལེགས་ཡོད་ཅེས་བཀའ་གནང་།
ཨ་རིའི་མི་མང་གི་རེ་འདུན་དང་འདོད་དོན་བསྒྲུབ་རྒྱུར་ཚོགས་གཙོ་མཆོག་གིས་སྔར་ལྟར་ཐུགས་འགན་ཆེན་པོ་བཞེས་པའི་ཐོག། འཛམ་གླིང་ནང་ཞི་བདེ་དང་ལྷིང་འཇགས་ཡོང་རྒྱུའི་ཐད་གང་ཅིའི་འབད་བརྩོན་མུ་མཐུད་གནང་རྒྱུར་ཡིད་ཆེས་ཡོད། ཅེས་དང་།
ཕྱོགས་མཚུངས་ཁོང་གིས་བོད་དོན་ཐོག་ལོ་མང་རྒྱབ་སྐྱོར་གནང་བ་དང་། ༸གོང་ས་མཆོག་ལ་གུས་བརྩེ་ཆེན་པོ་གནང་བར་ཐུགས་རྗེ་ཆེ་ཞེས་བཀའ་ཡིག་གནང་།