༄༅། །ཕྱི་ལོ་ ༢༠༢༠ ཟླ་ ༡༢ ཚེས་ ༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་ལ་ཕྱི་ལོ་ ༢༠༢༠ ལོའི་ལོ་འཁོར་དུས་སྟོན་ཐོག་ཨ་རིའི་རྒྱལ་ཡོངས་མང་གཙོ་བསྟི་གནས་ཁང་ (National Democratic Institute’s Democracy Award) གིས་མང་གཙོའི་གཟེངས་རྟགས་ཕུལ་བར་ཐུགས་དགྱེས་ཚོར་ངང་བརྙན་འཕྲིན་བརྒྱུད་འཚམས་འདྲིའི་གསུང་འཕྲིན་སྩལ་དོན།
བཀུར་འོས་བློས་ཐུབ་ཀྱི་གྲོགས་པོ་ལྕམ་སྐུ་ནེན་སེ་པི་ལོ་སི་ལགས། ངོས་རང་གིས་དངོས་གནས་དྲང་གནས་སྐུ་ཉིད་ཀྱིས་སེམས་ཤུགས་དང་སྙིང་སྟོབས་ཆེན་པོ་སྒོ་ནས་བོད་མིའི་འཐབ་རྩོད་སླད་རྒྱབ་སྐྱོར་གནང་བཞིན་པར་ཡིད་རངས་ཞུ་རྒྱུ་ཡིན། སྐུ་ཉིད་མཆོག་བོད་ལ་གཟིགས་སྐོར་ཕེབས་མྱོང་ཡོད་པ་མ་ཟད། རྒྱ་གར་རྡ་སར་ཡང་ཕེབས་མྱོང་ཡོད།
དེར་བརྟེན། ངོས་རང་གིས་དངོས་གནས་དྲང་གནས་སྐུ་ཉིད་མཆོག་ལ་རྗེས་སུ་ཡིད་རངས་ཞུ་རྒྱུ་ཡིན། སྐུ་ཉིད་མཆོག་གིས་ཤ་ཚ་དང་གྲོགས་པོའི་འདུ་ཤེས་བསྟན་པ་ཙམ་མ་ཡིན་པར། སྐུ་ཉིད་མཆོག་གིས་ཤ་ཚ་དང་། གྲོགས་པོའི་འདུ་ཤེས། དེ་བཞིན་སྙིང་སྟོབས་བསྐྱེད་ནས་དྲང་བདེན་གྱི་དོན་དུ་ཆོད་སེམས་བརྟན་པོའི་སྒོ་ནས་ལངས་ཡོད། ལྕམ་སྐུ་ནེན་སེ་པི་ལོ་སི་མཆོག་ལ་ཨ་རིའི་རྒྱལ་ཡོངས་མང་གཙོ་བསྟི་གནས་ཁང་གིས་མང་གཙོའི་གཟེངས་རྟགས་ཕུལ་བར་ངོས་རང་གིས་དགའ་ཚོར་ཧ་ཅང་ཆེན་པོ་སྒོ་ནས་འཚམས་འདྲི་ཞུ་འདོད་བྱུང་། སྐུ་ཉིད་མཆོག་གིས་ང་ཚོའི་རིག་གཞུང་གི་ཆེད་དུ་རོགས་གནང་བཞིན་པར་ངོས་རང་གིས་ཧ་ཅང་རྗེས་སུ་ཡི་རངས་ཞུ་རྒྱུ་ཡིན།
བོད་མི་རྣམས་ལ་མཚོན་ན་སྐུ་ཉིད་མཆོག་གི་སྐུ་ཚེ་ཤིན་ཏུ་རྩ་ཆེན་དང་གལ་ཆེན་པོ་ཆགས་ཡོད། དེར་བརྟེན་ངོས་རང་གིས་སྐུ་ཉིད་མཆོག་སྐུ་ཚེ་ཡུན་རིང་བརྟན་པ་དང་སྐུ་གཟུགས་བདེ་ཐང་ཡོང་བའི་ཐུགས་སྨོན་ཞུ་རྒྱུ་ཡིན། ཞེས་བཀའ་སྩལ་ཡོད།