༄༅། །ཕྱི་ལོ་ ༢༠༢༠ ཟླ་ ༡༠ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐའེ་ཝན་གྱི་དད་ལྡན་མི་མང་གིས་ཇི་ལྟར་གསོལ་བ་བཏབ་པ་ལྟར་ཉིན་གྲངས་གསུམ་རིང་རྗེ་ཙོང་ཁ་པ་ཆེན་པོས་མཛད་པའི་དྲང་ངེས་ལེགས་བཤད་སྙིང་པོ་དང་སློབ་དཔོན་ཟླ་བ་གྲགས་པས་མཛད་པའི་དབུ་མ་ལ་འཇུག་པ་གཉིས་ཀྱི་གསུང་ཆོས། དེ་བཞིན་སེམས་བསྐྱེད་ཀྱི་སྡོམ་པ་འབོག་ཆོག་བཅས་ཀྱི་ཆོས་འབྲེལ་གནང་སྒོ་ལེགས་པར་གྲུབ་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༩།༠༠ མ་ཟིན་ཙམ་ལ་གཟིམ་ཆུང་ནས་གསུང་ཆོས་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་༸ཞབས་སོར་འཁོད་མཚམས་ཐའེ་ཝན་ནས་དྲ་ལམ་བརྒྱུད་རྒྱ་སྐད་ཐོག་སྔོན་འགྲོའི་ཞལ་འདོན་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། དེ་རིང་ཆོས་གྲོགས་ཚང་མར་འཚམ་འདྲི་ཞུ་བཞིན་ཡོད། ང་རང་ཚོའི་སྨོན་ལམ་ཚིགས་བཅད་ཀྱི་རྗེས་སུ་རྒྱལ་སྲས་སྤྱོད་ལ་འཇུག་པར་ཤོག་ཅེས་པ་འཇུག་པར་ཤོག་ཅེས་སྨོན་ལམ་གྱི་ཚིག་མིན་པར་རྒྱལ་སྲས་སྤྱོད་ལ་འཇུག་པར་བགྱིའོ་ཞེས་ད་ལྟ་རང་ནས་རྒྱལ་སྲས་ཀྱི་སྤྱོད་པ་ལ་སློབ་དགོས། རྒྱལ་སྲས་སྤྱོད་ལ་སློབ་པར་བགྱིད་ཅེས་པ་ནི་སེམས་བསྐྱེད་བཟུང་བ་ཞིག་ཀྱང་ཆགས་ཀྱི་ཡོད། དཔེར་ན། ང་ཚོས་སངས་རྒྱས་ཀྱི་གོ་འཕང་ཐོབ་པར་ཤིག་ཟེར་བ་དང་། སངས་རྒྱས་ཀྱི་གོ་འཕང་ཐོབ་པར་བྱའོ་ཞེས་པ་གཉིས་ལ་ཁྱད་ཡོད། དེར་བརྟེན། རྒྱས་སྲས་སྤྱོད་ལ་སློབ་པར་བགྱིད་དོ་ཅེས་པ་ཞིག་བྱེད། ཅེས་སོགས་རྣམ་མཁྱེན་རྒྱལ་བའི་གོ་འཕང་ཐོབ་པ་ལ་སྙིང་རྗེ་ཆེན་པོས་ཟིན་པའི་ཐོག་ནས་སྟོང་ཉིད་ཀྱི་ལྟ་བས་ཉོན་མོངས་པའི་གཉེན་པོ་བྱས་པ་ནས་ཐོབ་ཀྱི་ཡོད་པ་སོགས་ཆོས་བཀའ་ཁྲིད་མཛད་རྗེས་ཆོས་ཞུ་བའི་དྲི་བར་བཀའ་ལན་སྩལ་བ་དང་།
མཐར་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། དེ་རིང་ཐེངས་འདིའི་ཆོས་འབྲེལ་ལ་ལེགས་བཤད་སྙིང་པོའི་ཐོག་མཐའ་བར་གསུམ་སྙིང་བསྡུས་བཤད་པ་དེ་ལྟར་རེད། ནད་ཡམས་འདི་ལོ་རྗེས་མ་ཕལ་ཆེར་དྲག་མི་ཡོང་ངམ། ག་ལེར་ནད་ཡམས་དྲག་ན་ངོས་ཀྱིས་གཙུག་ལག་ཁང་དང་རྡོ་རྗེ་གདན་ནས་ཆོས་འབྲེལ་བྱེད་པ་སོགས་ནམ་རྒྱུན་འཆར་ཅན་ལྟར་བྱེད་ཐུབ་ཀྱི་རེད་ལ་ངོས་རང་ལ་དེ་ལྟར་བྱེད་པའི་སེམས་ཤུགས་སྒྲིམ་ནས་ཡོད། མཁྱེན་སོང་ངམ། སྔོན་ལ་ནད་ཡམས་འདིས་ཏོག་ཙམ་ཟོན་བྱེད་དགོས་པ་ཞིག་འདུག ལོ་སར་ནས་ནད་ཡམས་དྲག་ཏུ་ཕྱིན་ཚེ་ནམ་རྒྱུན་འཆར་ཅན་ལྟར་རྒྱ་མིའི་ཆོས་གྲོགས་ཚོ་དང་ཐའེ་ཝན་གྱི་ཆོས་གྲོགས་ཚོ་རེད། ཕྱི་རྒྱལ་གྱི་མི་མང་པོ་ཡོང་གི་ཡོད་པ་རེད། ཁྱོད་རང་ཚོར་ཆོས་འབྲེལ་བྱ་རྒྱུ་ངོས་ལ་ཨང་གསར་ཡིན། ཞེས་དང་།
གཞན་ཡང་། བཅོམ་ལྡན་འདས་ཀྱིས། བདག་ཉིད་བདག་གི་མགོན་ཞེས་གསུངས་ཡོད། གང་ལྟར་སོ་སོའི་བདེ་སྡུག་ཅི་འདྲ་ཡོང་མིན་ནི་ང་ཚོ་ནང་པ་ཞིག་ཡིན་པའི་ངོས་ནས་བཤད་ན་ས་ལམ་གྱི་རྟོགས་པ་གྲོལ་ནས་རྣམ་མཁྱེན་རྒྱལ་བའི་གོ་འཕང་ཐོབ་དང་མི་ཐོབ་ཚང་མ་སོ་སོར་ཐུག་བསྡད་ཡོད། སྐྱབས་འཇུག་ཞུས་ནས་ཕྲན་བུ་ཕན་ཐོགས་ཡོད་ཀྱང་། གཙོ་བོ་སོ་སོས་ཉམས་ལེན་བྱེད་པ་ལ་ཐུག་ཡོད། དེར་བརྟེན། ངོས་རང་ལ་ཆ་བཞག་ནའང་ཉིན་རེ་བཞིན་དུ་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་སྒོམ་པ། དེའི་ཐོག་སྔགས་ཀྱི་ལྷ་ཡི་རྣལ་འབྱོར་མང་པོ་ཞིག་བླ་མའི་མདུན་ནས་དབང་ཞུས་ཏེ་ཁས་ལེན་ཡོད་པ་ལྟར་འདོན་བཞིན་ཡོད། གཙོ་བོ་སེམས་ལ་འགུལ་བསྐྱོད་ཐེབས་བྱེད་ནི་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་རེད། དེའི་ཆ་རྐྱེན་ལྟ་བུར་སྤྱོད་འཇུག་དང་འཇུག་པ་རང་འགྲེལ། རྩ་བ་ཤེས་རབ་སོགས་དུས་དང་དུས་ལ་ངོས་ཀྱིས་ཀློག་བཞིན་ཡོད། ངོས་ལ་ཆ་བཞག་ནའང་ད་ལོ་དང་ལོ་སྔོན་མ་བསྡུར་བ་ཡིན་ན་ཕལ་ཆེར་སེམས་ཀྱི་ཉམས་མྱོང་ཕྲན་བུ་ཆེ་རུ་འགྲོ་བཞིན་ཡོད། ཁྱོད་རང་ཚོས་ཀྱང་དེ་དེ་བཞིན་བྱས་ནས་ད་ལྟའི་བསམ་བློའི་འགྲོ་སྟངས་དང་ལོ་སྔོན་མའི་བསམ་བློ་གཉིས་བསྡུར་བ་ཡིན་ན་ཏོག་ཙམ་ཡར་རྒྱས་ལ་འགྲོ་འདུག་བསམ་པ་ཡོང་རྒྱུ་ཧ་ཅང་གལ་ཆེན་པོ་རེད། ལོ་མང་པོ་ཕྱིན་ཀྱང་སེམས་ཡར་རྒྱས་ལ་མ་སོང་། ཆོས་ཀྱི་སློབ་སྦྱོང་གང་འཚམ་ཡོད་ནའང་སེམས་ཡར་རྒྱས་འགྲོ་རྒྱུ་མེད་པར་བསྡད་པ་ཡིན་ན་མ་འགྲིག་པ་རེད། སོ་སོས་སོ་སོར་སེམས་ཀྱི་ཞུ་དག་བཏང་ནས་རྩད་གཅོད་བྱེད་སྐབས་སྔོན་མ་ལོ་བཅུའི་གོང་གི་བསམ་བློ་གཏོང་སྟངས་ལ་འགྱུར་བ་ཕྱིན་འདུག་བསམ་པ་ལྟ་བུ་དང་། ལོ་རེ་རེའི་ནང་དུ་འགྱུར་བ་ཕྱིན་འདུག་བསམ་པ་ལྟ་བུ་གང་ལྟར་ཞུ་དག་གཏོང་དུས་བཟང་ཕྱོགས་ཀྱི་འགྱུར་བ་འགྲོ་བཞིན་ཡོད་པ་ཞིག་ཧ་ཅང་གལ་ཆེན་པོ་རེད།
སངས་རྒྱས་པའི་ཆོས་ཀྱི་འགྲོ་སྟངས་ནི་སོ་སོས་ཉམས་ལེན་བྱས་ནས་འགྲོ་དགོས་པ་རེད། ཉམས་ལེན་བྱེད་རྒྱུ་མེད་པར་སྐྱབས་འཇུག་ཞུས་ནས་བསྡད་པ་ཡིན་ན། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང༌།། འགྲོ་བའི་སྡུག་བསྔལ་ཕྱག་གིས་མི་སེལ་ལ།། ཉིད་ཀྱི་རྟོགས་པ་གཞན་ལ་སྤོ་མིན་ཏེ།། ཆོས་ཉིད་བདེན་པ་བསྟན་པས་གྲོལ་བར་འགྱུར།། ཅེས་བཅོམ་ལྡན་འདས་ཀྱི་ལས་འགན་ལྟ་བུ་ནི་ང་ཚོར་གནས་ལུགས་བཤད་པ་དེ་རེད། གནས་ལུགས་གསུངས་ཡོད་པ་ལ་ང་ཚོས་ཐོག་མར་སློབ་སྦྱོང་བྱས། དེ་ནས་ཡང་ཡང་བསམ་བློ་བཏང་། དེ་ནས་ཆུ་ཚོད་གཅིག་གཉིས་རིང་དཔྱད་སྒོམ་དང་འཇོག་སྒོམ་ཟུང་འབྲེལ་གྱིས་སྒོམ་པ་དང་། དེ་ལྟར་བློ་ལ་འགྱུར་བ་ཐེབས་པ་ཞིག་དགོས། དེར་བརྟེན། ཆོས་གྲོགས་ཚང་མས་ལོ་རེ་ནས་ལོ་རེར་སེམས་ལ་འགྱུར་བ་ཐེབས་ཡོད་པ་ཞིག་གནང་ཤོག ངོས་ཀྱིས་ཀྱང་ལོ་རེ་ནས་ལོ་རེར་སེམས་ལ་འགྱུར་བ་ཐེབས་པ་ཞིག་བྱེད་བཞིན་ཡོད་ལ་ཡོང་གི་ཡང་འདུག ཁྱོད་རང་ཚོ་ཚང་མས་ཉམས་བཞེས་གནང་རྒྱུ་གལ་ཆེན་པོ་རེད། ཐོས་བསམ་སྒོམ་པ་ཕྱོགས་སུ་མ་ལྷུང་བ་ཞིག་གནང་ཤོག བཀྲ་ཤིས་བདེ་ལེགས། ཐུགས་རྗེ་ཆེ། ཞེས་བཀའ་སྩལ་རྗེས་ཐེངས་འདིའི་ཐའེ་ཝན་གྱི་དད་ལྡན་མང་ཚོགས་གཙོས་འཛམ་གླིང་ས་ཕྱོགས་གང་སར་བཞུགས་པའི་ཆོས་ཞུ་བ་རྣམས་ལ་དྲ་ལམ་བརྒྱུད་གསུང་ཆོས་གནང་སྒོ་རེ་ཞིག་ལེགས་པར་གྲུབ་ཡོད་པ་བཅས།།