༄༅། །བོད་གངས་ཅན་པ་རྣམས་ཀྱིས་གཙོས་འཛམ་གླིང་ཡུལ་གྲུ་གང་སར་བཞུགས་པའི་སེར་སྐྱ་དད་ལྡན་ཡོངས་ལ་གསོལ་རྒྱུ། འདི་ལོ་༸གོང་ས་༸སྐྱབས་མགོན་ཆེན་པོ་མཆོག་གྱ་ལྔའི་དགུང་ཀེག་ལ་ཕེབས་པར་བརྟེན། བྱིན་རླབས་ཀྱི་ཚན་ཁ་ཆེ་བའི་གསོལ་འདེབས་༸རྒྱལ་བའི་ཞལ་གསུང་མ་སྟེ། སྟོང་ཉིད་སྙིང་རྗེ་ཟུང་དུ་འཇུག་པའི་ལམ། །ཆེས་ཆེར་གསལ་མཛད་གངས་ཅན་བསྟན་འགྲོའི་མགོན། །ཕྱག་ན་པདྨོ་བསྟན་འཛིན་རྒྱ་མཚོ་ལ། །གསོལ་བ་འདེབས་སོ་བཞེད་དོན་ལྷུན་འགྲུབ་ཤོག །ཅེས་པ་རྒྱུན་འདོན་དང། ༸རྒྱལ་བའི་མཚན་སྔགས། ཨོཾ་ཨཿ གུ་རུ་བཛྲ་དྷ་ར་བྷ་ཊྚཱརཀ་མཉྫུ་ཤྲཱི་ཝཱགིནྡྲ་སུ་མ་ཏི་ཛྙཱན་ཤ་ས་ན་དྷ་ར་ས་མུ་དྲ་ཤྲཱི་བྷ་དྲ་སརྦ་སིདྡྷི་ཧཱུཾ་ཧཱུཾ།།ཞེས་པ་ཉིན་རེ་གང་མང་གྲངས་གསོག་གནང་ཐུབ་ན། སྤྱི་མཐུན་བསོད་ནམས་གསོག་སྒྲུབ་དང་། ༸རྒྱལ་བའི་སྐུ་ཕྱྭའི་ཞབས་རིམ་ལ་སྨན་པའི་དགེ་ཕན་ཅི་ཆེ་ཡོང་རྒྱུ་དགོངས་འཇགས་འཚལ། དགའ་ལྡན་ཕོ་བྲང་ཡིག་ཚང་ནས། ཕྱི་ལོ་ ༢༠༡༩ ཟླ་ ༥ ཚེས་ ༡༠ ལ།