དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་ཆིབས་བསྒྱུར་སྐབས་ཞོ་སྟོན་འཁྲབ་སྟོན་པ་རྣམས་དང་། བོད་ཀྱི་བུད་མེད་ཚོགས་པའི་ཚོགས་ཆེན་ལ་ཚོགས་བཅར་འཐུས་མི་རྣམས་ཀྱིས་རང་ལུགས་ཕེབས་བསུ་གཟབ་རྒྱས་དང་བཅས་མགོན་པོ་མཆོག་༸ཞབས་སྟེགས་སུ་འཁོད་རྗེས་བོད་ཀྱི་ཟློས་གར་ཚོགས་པའི་འགན་འཛིན་ལགས་ནས་མཎྜལ་རྟེན་གསུམ་འདེགས་འབུལ་དང་། རྒྱ་བལ་གྱི་ས་གནས་ཁག་ནས་ཕེབས་པའི་འཁྲབ་སྟོན་པ་ཁག་གཅིག་གིས་ལྷ་མོའི་སྒྱུ་རྩལ་གྱི་གསུང་གདངས་གཟིགས་འབུལ་དང་།  བོད་ཀྱི་བུད་མེད་ཚོགས་པས་མཎྜལ་རྟེན་གསུམ་དང་། བཀའ་དྲིན་རྗེས་དྲན་གྱི་གཟེངས་རྟགས་འབུལ་ལམ་ཞུས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།

ཆོས་གྲོགས་ཚོར་ཞུ་རྒྱུར། ལྷ་སར་ཞོ་སྟོན་གྱི་སྐབས་ནི་ངོས་ལ་གུང་སེང་རག་པའི་དུས་ཚོད་ཡག་ཤོས་དེ་རེད། ཞོ་སྟོན་རན་གྱི་འདུག་ཟེར་དུས་ངོས་རང་ཧེབ་ལྟ་བུ་ལངས་ནས་སྡོད་ཀྱི་ཡོད། ཞོ་སྟོན་ལ་རྒྱལ་མཁར། གཅུང་པ། ཤངས་པ། སྐྱོར་མོ་ལུང་པ་བཅས་ཀྱིས་ཉིན་བཞི་ལ་ལྷ་མོ་འཁྲབ་ཀྱི་ཡོད། ཁོང་ཚོས་རྣམ་ཐར་བཏང་བ་ལ་ཉན་སྐབས་ཚོར་བ་སྐྱིད་སྣང་ཞིག་ཡོང་གི་ཡོད། དེ་རིང་འདིར་ཞོ་སྟོན་རྗེས་འབྲེལ་གྱི་གླུ་གར་འཁྲབ་པ་རེད། ཐུགས་རྗེ་ཆེ་ཞུ་རྒྱུ་ཡིན། ད་ལྟ་བཤད་མ་ཐག་པ་བཞིན་ངོས་རང་ཆུང་ཆུང་སྐབས་ནས་ལྷ་མོའི་རྣམ་ཐར་མང་པོ་གོ་ཡོད། རྒྱལ་མཁར་བའི་རྣམ་ཐར་དང་། གཅུང་པ་བའི་རྣམ་ཐར། རྒྱལ་མཁར་བའི་རྣམ་ཐར་དེ་གཟི་བརྗིད་ཆེན་པོ་ཞིག་ཡོད། ངོས་ནས་རྣམ་ཐར་བཏང་ན་འགྲིག་གི་མ་རེད། ཡིན་ནའང་། རྣམ་ཐར་གཏོང་སྐབས་རྣ་བས་ཉན་ནས་མགོ་བོ་ལྕོག་ལྕོག་བྱེད་ཀྱི་ཡོད། དེ་རིང་འདིར་ཁྱོད་ཚོས་ཞོ་སྟོན་རྗེས་འབྲེལ་གྱི་རྣམ་ཐར་རྣམས་བཏང་ནས་ངོས་རང་དགའ་བོ་བྱུང་།

ང་ཚོ་བཙན་བྱོལ་བ་ཆགས་ནས་སྐྱབས་བཅོལ་དུ་སླེབས་པའི་རིང་། བོད་ཀྱི་ཆོས་དང་རིག་གཞུང་། གོམས་གཤིས་བཅས་རྒྱུན་འཛིན་ཐུབ་པ་བྱེད་བཞིན་ཡོད། བོད་དུ་རྒྱ་ཆེའི་མི་མང་གི་ལྷག་བསམ་དང་སྙིང་སྟོབས་ནི་འགྲན་ཟླ་བྲལ་བ་རེད། ང་ཚོ་བཙན་བྱོལ་བ་བྱས་ཏེ་རང་དབང་རེད། རང་དབང་ལུང་པའི་ནང་དུ་བཙན་བྱོལ་བ་བོད་པ་ཉུང་ཤས་ཤིག་རེད། ཡིན་ནའང་། ལོ་སྟོང་ཕྲག་རིང་ཡོད་པའི་བོད་མིའི་གོམས་གཤིས་བཟུང་ཡོད། ཧ་ཅང་དགའ་བོ་བྱུང་། གཙོ་ཆེ་ཤོས་བོད་ནང་གི་གཞིས་ལུས་རྒྱ་ཆེའི་མི་མང་རྣམས་དངོས་གནས་ལྷག་བསམ་དང་སྙིང་སྟོབས་ལ་ཞུམ་པ་མེད་པར་བསྡད་ཡོད། དེར་བརྟེན། ཚང་མར་ཞུ་རྒྱུར། ང་ཚོའི་བོད་ཀྱི་བདེན་པའི་མཐའ་ཏན་ཏན་གསལ་གྱི་རེད། རྒྱ་ནག་ནང་ལ་འགྱུར་བ་མང་པོ་ཞིག་འགྲོ་བཞིན་འདུག ཧི་མ་ལ་ཡའི་རི་རྒྱུད་དུ་ཡོད་པའི་མི་རིགས་ཚོས་ཀྱང་བོད་ཀྱི་ཆོས་དང་རིག་གཞུང་ལ་དམིགས་བསལ་དོ་སྣང་བྱས་ཏེ། གཞས་ཞབས་བྲོ་འཁྲབ་པ་སོགས་བྱེད་ཀྱི་ཡོད་པ་རེད། དེ་དག་ཚང་མར་ཐུགས་རྗེ་ཆེ་ཞུ་རྒྱུ་ཡིན། སྐབས་སུ་བབ་པ་རྡ་རམ་ས་ལར་ཞོ་སྟོན་གྱི་མཛད་སྒོར་ཚོགས་པ་ཁག་འཚོགས་ནས་ཧ་ཅང་དགའ་བོ་བྱུང་། ཐུགས་རྗེ་ཆེ།

ད་ལྟ་ངོས་རང་ལོ་དགུ་བཅུའི་ནང་དུ་སླེབས་ཀྱི་ཡོད་ཀྱང་། བསམ་བློའི་ནང་ཕལ་ཆེར་ལོ་བརྒྱ་ལྷག་ཙམ་སྡོད་རྒྱུར་ཚོད་ཐིག་པོ་ཞིག་འདུག་པས།  ལོ་བརྒྱ་ཐོབ་ཅིང་སྟོན་བརྒྱ་མཐོང་བ་དང་།། ཚེ་རིང་ནད་མེད་བདེ་སྐྱིད་ཕུན་སུམ་ཚོགས།། ཐེག་པ་མཆོག་ལ་ངེས་པར་འབྱུང་བ་ཡི།། བཀྲ་ཤིས་དེས་ཀྱང་དེང་འདིར་བདེ་ལེགས་ཤོག། ཅེས་གསུངས་པ་ལྟར། ངོས་རང་ལོ་བརྒྱ་དང་བཅུ་གྲངས་ཤིག་ལ་ཕལ་ཆེར་སྡོད་ཀྱི་རེད། དེའི་རིང་འཛམ་བུ་གླིང་འདིར་འགྱུར་བ་མུ་མཐུད་ནས་མང་པོ་ཞིག་ཡོང་གི་རེད། ཡིན་ནའང་། ང་ཚོ་བོད་རྒྱ་ཆེའི་མི་མང་གིས་སོ་སོའི་རིག་གཞུང་དང་། དེ་དང་འབྲེལ་བའི་ལྷག་བསམ་སྙིང་སྟོབས་ལ་འགྱུར་བ་ཁྱོན་ནས་འགྲོ་གི་མ་རེད། གཞིས་ལུས་རྒྱ་ཆེའི་མི་མང་དང་། བཙན་བྱོལ་ལ་ཡོད་པ་རྣམས། དེ་བཞིན་ཧི་མ་ལ་ཡའི་རི་རྒྱུད་ཀྱི་མི་རིགས་ཚོ་ཡིན་ནའང་རེད། ཚང་མས་ངོས་ལ་དགའ་མོས་བྱེད་ཀྱི་ཡོད། རྒྱ་ཆེའི་མི་མང་གིས་ངོས་ལ་འདི་ལྟ་བུའི་དགའ་མོས་ཤུགས་ཆེན་པོ་བྱེད་ཀྱི་ཡོད་པས་ངོས་རང་ལོ་བརྒྱ་དང་བཅུ་གྲངས་ཤིག་སྡོད་ཐུབ་པར་བསམ་བློའི་ནང་ཚོད་ཐིག་གི་འདུག

དེ་རིང་འདིར་ཁྱོད་ཚོ་བོད་མི་བཙན་བྱོལ་བ་ཚོ་ཁག་གཅིག་སླེབས་ནས་གཞས་ཞབས་བྲོ་འཁྲབ་པ་རེད། ཐུགས་རྗེ་ཆེ་ཞུ་རྒྱུ་ཡིན། ང་ཚོ་བོད་མི་བཙན་བྱོལ་བ་དང་། གཞིས་ལུས་རྒྱ་ཆེའི་མི་མང་ཡིན་ནའང་རེད། རྒྱ་གར་གྱིས་མཚོན་པའི་བོད་མི་ཡོད་ས་ཚང་མར་བོད་པའི་ཞེན་ཁོག་དང་། ལྷག་བསམ། སྙིང་སྟོབས་ཞུམ་པ་མེད་པར་བསྡད་ཡོད། བོད་རྒྱ་ཆེའི་མི་མང་གིས་སྙིང་སྟོབས་དང་འབད་བརྩོན་ཞུམ་པ་མེད་པར་བྱེད་སྐབས་ངོས་རང་ནས་རྒྱ་ཆེའི་མི་མང་གི་ལྷག་བསམ་དང་སྙིང་སྟོབས་ལ་རྗེས་སུ་ཡི་རངས་དང་འབྲེལ་བའི་ཐོག་ནས་དེ་དག་ལ་མགོ་ཁྲིད་ཟེར་ན་རེད། གང་ལྟར་དངོས་ཤུགས་བརྒྱུད་གསུམ་ནས་ཞབས་འདེགས་ཅི་ཞིག་སྒྲུབ་རྒྱུ་ཡོད་པ་དང་། ཕན་ཐོགས་གང་ཡོད་བྱ་རྒྱུ་ངོས་ཀྱི་ལས་འགན་རེད། དེ་ངོས་ཀྱིས་བྱེད་ཀྱི་རེད། མཁྱེན་སོང་ངམ། ཅེས་དང་།

གཞན་ཡང་། འཛམ་བུ་གླིང་འདིར་སྐབས་རེར་བུད་མེད་ལ་མཐོང་ཆུང་ལྟ་བུ་བྱེད་ཀྱི་ཡོད་པ་རེད། སོ་སོའི་ལུང་པའི་རིག་གཞུང་གོམས་གཤིས་ལ་བདག་པོ་རྒྱག་མཁན་གཙོ་བོ་ལྟ་བུ་ནི་བུད་མེད་ཚོ་ཆགས་འདུག ང་ཚོ་བོད་པར་ཆ་བཞག་ནའང་བཙན་བྱོལ་བ་ཉུང་ཤས་རིག་མ་གཏོགས་མེད་ཀྱང་། བུད་མེད་རྣམས་ཧ་ཅང་སེམས་ཤུགས་ཆེན་པོ་དང་། ཧུར་ཐག་འབད་ཐག་བྱེད་མཁན་ཧ་ཅང་ཡག་པོ་འདུག དེང་སང་འཛམ་གླིང་འདིར་བོད་ཀྱི་ཆོས་དང་རིག་གཞུང་ཟེར་སྐབས་གང་ས་གང་དུ་དོ་སྣང་གསར་པ་སླེབས་པ་ཞིག་དང་། དམིགས་བསལ་གྱིས་འདི་བོད་ཀྱི་རིག་གཞུང་རེད་ཅེས་འཛུབ་མོ་འཛུགས་རྒྱུ་ཡོད་པ་ཞིག་ཆགས་འདུག དེ་རྒྱ་མི་གུང་བྲན་གྱིས་ནག་གསུབ་གཏོང་རྒྱུའི་འབད་བརྩོད་བྱེད་ཀྱི་ཡོད་ཀྱང་། ནག་གསུབ་གཏོང་ཐུབ་ཡོད་པ་མ་རེད། ང་ཚོའི་བོད་ཀྱི་རིག་གཞུང་གོམས་གཤིས་འདི་ལོ་སྟོང་ཕྲག་རིང་ཡོད་པ་ཞིག་རེད། ང་ཚོ་བཙན་བྱོལ་བ་ཉུང་ཤས་ཤིག་ཡིན་ཀྱང་། བོད་ཀྱི་ཆོས་དང་རིག་གཞུང་། སྐབས་སུ་བབ་པ་གླུ་གཞས་སོགས་ལ་བདག་པོ་བརྒྱབ་ཡོད། ཧ་ཅང་ཡག་པོ་རེད། ཁྱོད་ཚོ་ཚང་མར་བཀའ་དྲིན་ཆེ་ཞུ་རྒྱུ་ཡིན།

རྒྱ་ནག་ལ་འགྱུར་བ་མང་པོ་འགྲོ་གི་འདུག་ལ། རིམ་པར་འགྱུར་བ་ཏན་ཏན་ཡོང་གི་རེད། ང་ཚོ་བོད་མིའི་ལྷག་བསམ་དང་སྙིང་སྟོབས་ལ་འགྱུར་བ་འགྲོ་བ་ཁྱོད་ནས་ཡོད་པ་མ་རེད། ཤེས་སོང་ངམ། ངོས་ནས་བོད་རྒྱ་ཆེའི་མི་མང་གི་ལྷག་བསམ་དང་སྙིང་སྟོབས་མཚོན་པའི་ལས་གང་བྱ་རྒྱུ་ཡོད་པ་རྣམས་ད་ལྟའི་བར་དུ་བྱས་པ་ཡིན་ལ། མ་འོངས་པར་ད་དུང་ལོ་བརྒྱ་ལྷག་གི་རིང་ལ་སེམས་འཁུར་བླངས་ནས་ཧུར་ཐག་བྱེད་ཀྱི་ཡིན། ཁྱོད་ཚོ་ཚང་མ་བློ་བདེ་བོ་བྱོས། ཧུར་ཐག་གནང་ཤོག བཀྲ་ཤིས་བདེ་ལེགས། ཞེས་བཀའ་སློབ་སྩལ།

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་གྱིས་བཞུགས་ཁྲིར་འཁོད་མཚམས་སོག་པོའི་གཞོན་སྐྱེས་ཕོ་མོ་ཁག་ཅིག་གིས་གཙོས་སོག་རིགས་ཡོངས་ནས་རང་སྐད་ཐོག་ཤེས་རབ་སྙིང་པོ་གསུང་འདོན་གནང་རྗེས་བཀའ་སློབ་སྩལ་དོན།

དེ་རིང་འདིར་བོད་མི་གཙོ་བོར་གྱུར་པའི་ཧི་མ་ལ་ཡའི་རྒྱུད་ཀྱི་མི་རིགས་དང་། སོག་རིགས་སོགས་སྟོན་པ་བཅོམ་ལྡན་འདས་ཀྱི་རྗེས་འབྲང་། ཟབ་པ་དང་རྒྱ་ཆེ་བའི་སངས་རྒྱས་ཀྱི་ཆོས་ཚུལ་ལ་དོ་སྣང་ཡོད་མཁན་མང་པོ་ཡོང་གི་ཡོད་པ་རེད། སངས་རྒྱས་པའི་ཆོས་ཚུལ་འདི་ལ་དེ་སྔ་ཞིབ་ཚགས་པོའི་དོ་སྣང་ཡོད་པ་མ་རེད། བར་སྐབས་ནས་སློབ་སྦྱོང་བྱེད་པའི་གོ་སྐབས་བྱུང་བ་དང་། སངས་རྒྱས་པའི་ཆོས་འདི་དམིགས་བསལ་རྒྱུ་མཚན་གྱི་ཐོག་ནས་བསམ་བློ་གཏོང་རྒྱུ་ཡོད་པ་ཞིག་ཡིན་པས་ཆོས་ཁས་མི་ལེན་མཁན་ཞིག་ཡིན་ནའང་། བསླབ་བྱས་སེམས་རྒྱུད་འདུལ་བ་དང་། སྤྱི་ཚོགས་ནང་དང་འཛམ་གླིང་ལ་ཞི་བདེ་ཡོང་བར་ཐུན་མོང་མ་ཡིན་པའི་ནུས་པ་ཡོད་པ་ཞིག་རེད། དེ་ལ་དེང་སང་དོ་སྣང་གསར་པ་ཞིག་ཡོང་གི་འདུག

དེ་རིང་འདིར་ང་ཚོས་སངས་རྒྱས་པའི་ཆོས་ཀྱི་ཆོས་འབྲེལ་བྱེད་བཞིན་པ་རེད། ངོས་རང་ལ་མཚོན་ན་ཆུང་ཆུང་སྐབས་ནས་སེམས་བསྐྱེད་དང་སྟོང་ཉིད་ཀྱི་ལྟ་བར་བསམ་བློ་གཏོང་གི་ཡོད། མི་ཚེ་ཡར་ལོངས་ཡོང་དུས་ཆུང་ཆུང་སྐབས་ནས་བསམ་བློ་བཏང་བའི་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བས་ཁ་ཡོད་ལག་ཡོད་དུ་ཕན་ཐོགས་ཆེན་པོ་ཡོད་པ་ཉམས་མྱོང་ལ་ཡོང་གི་འདུག དེ་དང་འབྲེལ་ནས་ངོས་ཀྱིས་ངོ་ཤེས་རོགས་པ་ཚོར་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་བཤད་པས་དོ་སྣང་གསར་པ་སླེབས་ཡོད་པ་ཞིག་དང་། དགའ་མོས་ཤུགས་ཆེན་པོ་བྱེད་ཀྱི་འདུག

ངོས་རང་ལ་ཆ་བཞག་ན་བཙན་བྱོལ་བ་བྱས་ཏེ་བསྡད་ཡོད་པ་རེད། རང་གི་ལུང་པར་བྲལ་ནས་འདིར་སླེབས་ཡོད་པ་རེད། གང་ལྟར་ས་གནས་ལ་ཁྱད་པར་མི་འདུག མཁན་ཆེན་ཞི་བ་འཚོས་ངོ་སྤྲོད་གནང་བའི་ལོ་སྟོང་ཕྲག་རིང་གི་བོད་ཀྱི་ལེནྡྲའི་ཆོས་བརྒྱུད་ཀྱི་བསམ་བློ་གཏོང་སྟངས་ལ་བོད་དང་ཧི་མ་ལ་ཡའི་རི་རྒྱུད་དུ་རྒྱ་ཁྱབ་དོ་སྣང་ཡོད་པ་ཞིིག་རེད། མཁན་ཆེན་ཞི་བ་འཚོའི་ཐུགས་རྗེ་བཀའ་དྲིན་རེད། དཔེར་ན། བོད་ལ་ཆ་བཞག་ན་དངོས་གནས་ཕྱི་ནང་གི་འགལ་རྐྱེན་མང་པོ་ཞིག་གིས་བཟུང་ཡོད་ཀྱང་། ལོ་སྟོང་ཕྲག་གི་རིང་ལ་རང་བཞིན་གྱིས་གོམས་གཤིས་ཡོད་པའི་སེམས་པ་བཟང་པོ་བྱེད་པ་དང་། གཞན་ལ་ཕན་སེམས་བྱེད་པ་དེ་ཧ་ཅང་ཡག་པོ་རེད། བོད་ཀྱི་རིག་གཞུང་ངམ། གོམས་གཤིས་ཀྱི་མིག་ལྟོས་བཟང་པོ་ཞིག་ཡོད་པ་འདི་ལ་ཕྱི་ནང་གི་རྐྱེན་ག་རེ་བྱུང་བ་ཡིན་ནའང་། དེ་དག་ལྟོས་པ་མེད་པར་མུ་མཐུད་ནས་ང་ཚོས་བདག་པོ་རྒྱག་རྒྱུ་གལ་ཆེན་པོ་རེད།

གཙོ་ཆེ་ཤོས་བོད་ནང་དུ་ཡོད་པའི་གཞིས་ལུས་རྒྱ་ཆེའི་མི་མང་རྣམས་ཀྱིས་མཁན་ཆེན་ཞི་བ་འཚོ་ནས་བརྒྱུད་པའི་ཆོས་བརྒྱུད་ཐོག་ལ་ལྷག་བསམ་གཡོ་བ་མེད་པར་དད་འདུན་རྩེ་གཅིག་ཏུ་བྱེད་པ་དང་། དེའི་ཞོར་ལ་ངོས་ལའང་དགའ་མོས་དང་། ཡིད་ཆེས་རྩེ་གཅིག་རེད། བོད་ཙམ་དུ་མ་ཟད་རྒྱ་ནག་ཏུའང་སངས་རྒྱས་པའི་ཆོས་ལ་དོ་སྣང་ཡོད་མཁན་ཚོས་བོད་ལ་ཡོད་པའི་ཆོས་ཀྱི་གོམས་གཤིས་བཟང་པོ་དེའི་ཐོག་ལ་དོ་སྣང་གསར་པ་ཞིག་བྱེད་བཞིན་འདུག བོད་ལ་དཀའ་ངལ་མང་པོ་འཕྲད་ཀྱང་། འཛམ་གླིང་སྤྱི་ལ་བོད་ཀྱི་རྒྱ་ཆེ་ཞིང་གཏིང་ཟབ་པའི་རིག་གཞུང་འདིས་ཕན་ཐོགས་གང་འཚམ་བྱེད་ཐུབ་པ་མཐོང་གི་འདུག དེ་ང་ཚོ་སྤོབས་པ་སྐྱེ་དགོས་པ་རེད།

གཉིས་ནས་བོད་ཀྱི་སངས་རྒྱས་པའི་ཆོས་ནི་སེམས་ཁམས་རིག་པ་དང་འབྲེལ་ནས་ཡོང་གི་ཡོད། དེའི་ཆ་ནས་བཤད་དུས་ཚན་རིག་པ་ཚོས་ཀྱང་དོ་སྣང་གསར་བ་བྱེད་ཀྱི་འདུག ཆོས་དད་མེད་མཁན་ཚོས་ཀྱང་སེམས་ཀྱི་ཞི་བདེ་ཡོང་བར་བོད་ཀྱི་ཆོས་ཀྱི་བསམ་བློ་ལས། སྐྱེ་བ་སྔ་ཕྱིའི་སྐད་ཆ་མེད་པར་འཕྲལ་དུ་སེམས་ཀྱི་ཞི་བདེ་ཡོང་བ་དང་། དེ་ལ་བརྟེན་ནས་ལུས་ཀྱི་འཕྲོད་བསྟེན་ཡོང་བའི་ཐོག་ལ་དོ་སྣང་གསར་པ་བྱེད་ཀྱི་འདུག ངོས་ལ་ཆ་བཞག་ན་ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་ཤུགས་ཆེན་པོ་གཏོང་གི་ཡོད་པས་ལུས་ཀྱི་འབྱུང་བ་སྙོམས་སྡོད་པ་དང་། སེམས་ལ་འཁྲུགས་ཐེབ་རྒྱུ་གང་ཡང་མེད་པར་གཉིད་སྐྱིད་པོ་ཁུགས་ཐུབ་པ། སེམས་ལྷོད་ལྷོད་ཡོང་གི་འདུག དངོས་གནས་ཞི་བདེ་ཡོང་བའི་བསམ་བློ་གཏོང་སྟངས་གཙོ་བོ་གཅིག་དེ་རེད། སངས་རྒྱས་པའི་ལྟ་གྲུབ་དང་འབྲེལ་བའི་ཆོས་བརྒྱུད་འདི་ལ་ང་ཚོ་ཚང་མས་དོ་སྣང་བྱེད་ཀྱི་ཡོད་ལ། ངོས་རང་ནས་ཉམས་པ་སོར་ཆུད་དང་མི་ཉམས་གོང་འཕེལ་གཏོང་བར་ག་ཚོད་ཐུབ་ཐུབ་ཀྱིས་འབད་བརྩོན་བྱེད་ཀྱི་ཡོད། དེ་རིང་འདིར་ཆོས་གྲོགས་ཚོར་ཐུག་ནས་ཧ་ཅང་དགའ་བོ་བྱུང་། ཐུགས་རྗེ་ཆེ། ཞེས་བཀའ་སློབ་སྩལ་བ་དང་།

མུ་མཐུད་དུ་བཀའ་སློབ་སྩལ་དོན། དེ་རིང་འདིར་སོག་རིགས་ཚོ་གཙོ་བོ་རེད། བོད་དང་སོག་པོ་གཉིས་ལོ་སྟོང་ཕྲག་རིང་ནས་དམིགས་བསལ་གྱིས་འབྲེལ་བ་ཡོད་པ་ཞིག་དང་། བོད་ནས་སོག་པོའི་མཁས་པ་མང་པོ་བྱུང་བ་རེད། བོད་དང་སོག་པོ་གཉིས་ཆོས་དང་རིག་གཞུང་གི་ཐོག་ནས་དམིགས་བསལ་གྱིས་འབྲེལ་བ་ཡོད་པ་ཞིག་ཆགས་ཡོད། ངོས་རང་ལ་འབྲེལ་བ་ཡོད་པ་རྒན་དངོས་གྲུབ་ཚོགས་གཉིས་སོག་པོ་རེད། ངོས་ལ་གཞུང་ཆེན་ཁྲིད་མཁན་གཙོ་བོ་དེ་དངོས་གྲུབ་ཚོགས་གཉིས་ཡིན། ཁོང་སོག་པོ་རེད། ཧ་ཅང་བཀའ་དྲིན་ཆེན་པོ་ཡིན། ངོས་ཀྱི་ཡོངས་འཛིན་དམ་པ་གཉིས་བཀའ་དྲིན་ཆེན་པོ་རེད་དེ། གཞུང་ཆེན་རྣམས་རྟགས་གསལ་གྱི་ལམ་ནས་ཁྲིད་མཁན་རྒན་དངོས་གྲུབ་ཚོགས་གཉིས་ཀྱིས་གཙོ་བོ་གནང་བ་རེད། དངོས་གནས་བཀའ་དྲིན་ཆེན་པོ་ཡིན། ངོས་རང་སྒེར་ལ་ཆ་མཚོན་ན་བཀའ་དྲིན་རྗེས་ཀྱིས་དྲིན་གསོ་བ་ནི་མི་མང་སྤྱི་དང་། ལྷག་པར་དུ་སོག་རིགས་ཚོར་ངོས་ཀྱིས་ཕན་ཐོགས་སམ་སྐུལ་མ་ཏོག་ཙམ་བྱེད་ཐུབ་པའི་གོ་སྐབས་འདུག་ལ། དེ་རྒན་དངོས་གྲུབ་ཚོགས་གཉིས་ཀྱི་བཀའ་དྲིན་རྗེས་སུ་དྲན་པའི་ཐོག་ནས་ཞུ་བཞིན་ཡོད།

ཆོས་ཟེར་བ་ནི་ཚིག་ཙམ་གྱི་སྐད་ཆ་མ་རེད། སོ་སོའི་སྒོ་གསུམ་གྱི་སྤྱོད་པའི་ཐོག་ནས་ཆོས་ཕྱོགས་ཀྱི་ལམ་སྟོན་གནང་བ་ཉམས་ལེན་བྱེད་དགོས། གང་ལྟར་སོ་སོའི་ལུས་བདེ་བ་དང་སེམས་སྐྱིད་པ། ངག་འཇམ་པ་ཡོང་བར་ཆ་རྐྱེན་ཡོད་པ་རེད་ལ། ང་ཚོས་ལག་ལེན་བསྐྱལ་ནས་ཆ་ཚང་བ་ཞིག་བྱེད་ཐུབ་དགོས། སྤྱིར་སྟོན་པ་བཀའ་དྲིན་ཅན་དང་། ཡང་སྒོས་བོད་གངས་ཅན་ལྗོངས་ཀྱི་མཁས་པའི་དབང་པོ་རྣམས་རེད། ཁོང་ཚོ་བཀའ་དྲིན་བསམ་གྱིས་མི་ཁྱབ་པ་རེད། དེ་རིང་འདིར་སོག་རིགས་ཚོ་གཙོ་བོ་བྱས་ཏེ་ཆོས་འབྲེལ་བྱས་པ་ནི་ངོས་རང་ལ་ཆ་བཞག་ན་བཀའ་དྲིན་རྗེས་དྲན་གྱིས་སེམས་ལ་དམིགས་བསལ་སྤྲོ་བ་ཞིག་ཡོང་གི་འདུག ཚང་མར་ཐུགས་རྗེ་ཆེ་ཞུ་རྒྱུ་ཡིན།

ང་ཚོའི་སངས་རྒྱས་པའི་ཆོས་ནི་དད་པ་གཅིག་པུ་མ་ཡིན་པར་ལྟ་གྲུབ་ཀྱི་ཐོག་ནས་གཏིང་ཟབ་མོ་དང་རྒྱ་ཆེན་པོའི་ཐོག་འགྲོ་རྒྱུ་ཡོད་པ་རེད།  དེ་ལ་སློབ་སྦྱོང་ཧ་ཅང་གལ་ཆེན་པོ་རེད། གོས་ངུར་སྨྲིག་གྱོན་པ་ཙམ་གྱིས་མི་ཆོག་པར་བསམ་བློ་གཏོང་རྒྱུ་ཡོད་པ་ཞིག་དགོས། བསམ་བློ་གཏོང་རྒྱུ་ཡོད་པ་ལ་སློབ་སྦྱོང་བྱེད་དགོས་པ་རེད་མ་གཏོགས། དད་པ་གཅིག་པུས་ཡོང་ཐབས་མི་འདུག ངོས་རང་ལ་མཚོན་ན་ཞོགས་པ་གཉིད་སད་པ་དང་། བྱང་ཆུབ་ཀྱི་སེམས་ལ་ག་ཚོད་ཐུབ་ཐུབ་ཀྱིས་བསམ་བློ་གཏོང་གི་ཡོད། དེ་བཞིན་དུ་སྟོང་ཉིད་ཀྱི་ལྟ་བ་ལའང་ག་ཚོད་ཐུབ་ཐུབ་ཀྱིས་བསམ་བློ་གཏོང་གི་ཡོད། དེས་ང་རང་ལ་ཁ་ཡོད་ལག་ཡོད་ཀྱིས་ཕན་ཐོགས་ཤུགས་ཆེན་པོ་ཡོང་བ་ཉམས་མྱོང་ཐོག་ནས་ཤེས་ཀྱི་འདུག ང་ཚོ་ཆོས་གྲོགས་རེད། བོད་ཀྱི་སྔོན་མཁས་གྲུབ་གཉིས་ལྡན་གྱི་སྐྱེས་བུ་དམ་པ་རྣམས་ཀྱི་ཐུགས་རྗེ་བཀའ་དྲིན་གྱིས་ང་ཚོར་ཆོས་དང་རིག་གཞུང་གི་སྲོལ་བརྟན་པོ་ཞིག་བཙུགས་ཡོད་པ་འདི་ལ་རྒྱ་མི་གུང་བྲན་གྱིས་ནུས་མེད་གཏོང་ཐབས་མང་པོ་བྱེད་ཀྱི་ཡོད་ཀྱང་། དེང་སང་རྒྱ་རིགས་མང་པོས་དོ་སྣང་གསར་པ་ཞིག་སླེབས་ཀྱི་འདུག དེར་བརྟེན། བོད་ལ་ཟབ་པ་དང་རྒྱ་ཆེ་བའི་ལམ་གྱི་བསམ་བློ་གཏོང་སྟངས་རྒྱ་ཆེན་པོ་ཞིག་ཡོད་པ་དེ་ལ་ང་ཚོས་བདག་པོ་བརྒྱབ་ནས་ཧ་ཅང་ཡག་པོ་རེད། རྒྱ་ནག་ཏུའང་འདི་ཏན་ཏན་ཤུགས་ཆེན་པོ་སླེབས་ཐུབ་པ་ཞིག་དང་། འཛམ་གླིང་གང་སར་དོ་སྣང་གསར་པ་སླེབས་ཐུབ་པ་ཞིག་རེད། གོང་དུ་ཞུས་པ་ལྟར་རེད། ཚན་རིག་པ་ཚོའི་མཉམ་དུ་གོ་བསྡུར་ཞུ་རྒྱུ་ཞིག་ཡོང་གི་ཡོད་པ་དེ་ལ་ངོས་ཀྱིས་རྐང་བྱེད་ཀྱི་ཡོད། ངོས་རང་ཚན་རིག་ལ་དོ་སྣང་ཆེན་པོ་ཡོད། སངས་རྒྱས་པའི་ཆོས་ལ་སློབ་སྦྱོང་བྱས་ཏེ་ཉམས་ལེན་བྱེད་ཀྱི་ཡོད། དེ་དང་ཆབས་ཅིག་ཚན་རིག་གི་བསམ་བློ་གཏོང་སྟངས་སྦྲེལ་ནས་ཡོང་དུས་ཚན་རིག་པ་མང་པོས་དོ་སྣང་གསར་པ་བྱེད་པ་ཞིག་ཡོང་གི་འདུག ངོས་ནས་འདི་ལྟར་གང་ཡོང་ཅི་ཡོང་བྱེད་ཀྱི་ཡོད། ཅེས་བཀའ་སློབ་སྩལ་རྗེས་དད་ལྡན་ཚོས་ཞུ་བ་ཡོངས་ལ་སེམས་བསྐྱེད་ཀྱི་ཆོས་འབྲེལ་སྩལ་རྒྱུའི་བཀའ་སྩལ་དོན།

སེམས་བསྐྱེད་ཅིག་བྱ་རྒྱུ་ཡིན། སེམས་བསྐྱེད་ནི་ཧ་ཅང་རྩ་ཆེན་པོ་རེད། སེམས་བསྐྱེད་ཀྱི་བསམ་བློ་གཏོང་དུས་སེམས་ལ་རང་བཞིན་གྱིས་ཞི་བདེ་ཡོང་བ་ཞིག་རེད། གང་ལྟར་གཞན་ཕན་སྒྲུབ་པའི་ནུས་པའང་ཆེ་རུ་ཆེ་རུ་འགྲོ་ཐུབ་པ་ཞིག་ཡིན་པས་ང་ཚོས་སེམས་བསྐྱེད་ལ་བསམ་བློ་གཏོང་དགོས། སེམས་བསྐྱེད་ལ་རྒྱུ་འབྲས་མན་ངག་བདུན་མའི་སྒོ་ནས་བློ་སྦྱོང་བའང་ཡོད། བདག་གཞན་མཉམ་བརྗེའི་སྒོ་ནས་བསམ་བློ་གཏོང་བ་ནི་ཤུགས་ཆེ་བ་རེད། དེ་ལ་རང་གཅེས་འཛིན་གྱི་སྐྱོན། གཞན་གཅེས་འཛིན་གྱི་ཡོན་ཏན་ལ་བསམ་བློ་བཏང་ཡོང་དུས། གཞན་གཅེས་པར་འཛིན་པའི་གཅེས་འཛིན་དེ་གཞན་དང་མི་འདྲ་བར་ཕན་ཐོགས་ཆེན་པོ་ཡོད་པ་ཞིག་དང་། གཞན་གཅེས་འཛིན་གྱི་བསམ་བློ་ཤུགས་ཆེན་པོ་བྱུང་ན་རང་དོན་ཞོར་ལ་འགྲུབ་ཡོང་བ་ཞིག་རེད། ངོས་ལ་མཚོན་ན་དེ་ནི་ཚོད་ཐིག་པ་ཞིག་འདུག ཅི་ཙམ་གྱིས་གཞན་གཅེས་འཛིན་གྱི་བློ་ཡོད་པ་དེའི་ཚོད་ཀྱིས་སེམས་ལ་སྤོབས་པ་སླེབས་པ་དང་། སེམས་ལ་ཞི་བདེ་སླེབས་པར་ཕན་ཐོགས་ཆེན་པོ་འདུག བདག་གཞན་མཉམ་བརྗེའི་བསམ་བློ་ནི་ཧ་ཅང་ནུས་པ་ཆེན་པོ་རེད། ཅེས་སོགས་བཀའ་སློབ་སྩལ་རྗེས་སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩལ་བ་དང་།

དེ་རིང་འདིར་སོག་རིགས་མང་པོ་ཞིག་ཡོད་པ་རེད། འདིར་དངོས་སུ་མེད་པ་ཚོས་རླུང་འཕྲིན་སོགས་ནས་གོ་སྡོད་ཀྱི་རེད། གཞན་གཅེས་པར་འཛིན་པའི་གཅེས་འཛིན་གྱི་བློ་དེ་ཧ་ཅང་རྩ་ཆེན་པོ་རེད། དངོས་ཡོད་གནས་ཚུལ་ལ་མཚོན་ན་འཛམ་གླིང་ལ་མི་གྲངས་དུང་ཕྱུར་བརྒྱད་ཅུ་ཙམ་ཡོད་པ་ཚང་མ་སྡུག་བསྔལ་མི་འདོད་པ་དང་། བདེ་བ་འདོད་པ་གཅིག་མཚུངས་ཡིན་བསམ་པ་ཞིག་གིས་ཀུན་ལ་བརྩེ་བ་བྱས་ཏེ། རང་གཅིག་པུར་བསམ་བློ་བཏང་བ་མིན་པར་ཚང་མ་བདེ་ཞིང་སྐྱིད་པ་བྱུང་ན་བསམ་པའི་བསམ་བློ་གཏོང་རྒྱུ་གལ་ཆེན་པོ་རེད། སྔོན་ལ་འཛམ་གླིང་འདི་སོ་སོའི་ཁྱིམ་ཚང་གི་མི་ཚོས་མཚོན་པའི་སོ་སོའི་ལུང་པ་དང་། རིམ་པར་འཛམ་གླིང་གི་མི་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་གཅིག་མཚུངས་རེད། འདི་དག་ཚང་མ་བདེ་བ་དང་ལྡན་པ་ཞིག་བྱུང་ན་བསམ་པའི་སེམས་བཟང་པོ་ཞིག་བསྐྱེད་ཤོག

འཛམ་གླིང་འདིའི་མི་དུང་ཕྱུར་བརྒྱད་ཅུ་ཙམ་ཡོད་པ་ཚང་མ་སྡུག་བསྔལ་མི་འདོད་པ་དང་། བདེ་བ་འདོད་པ་ཤ་སྟག་རེད། དེར་བརྟེན། བདེ་བ་ནི་ཕྱི་ལོགས་ནས་ཚུར་ཡོང་བ་མ་ཡིན་པར་སེམས་མ་སྐྱིད་པ་བཟོ་མཁན་དེ་ཉུང་དུ་གཏོང་བ་དང་། སེམས་ཀྱི་ཞི་བདེ་ཡོང་བ་ལ་དོ་སྣང་བྱས་པ་ཡིན་ན་སོ་སོའི་སེམས་ཀྱི་ཞི་བདེ་ཡོང་ཐུབ་པ་ཞིག་རེད། སོག་རིགས་ཀྱི་ཆོས་གྲོགས་ཚོས་མཚོན་པའི་ཆོས་གྲོགས་ཚང་མས་བདེ་སྐྱིད་དགོས་ཀྱི་ཡོད་ཟེར་གྱི་ཡོད་པ་རེད། བདེ་སྐྱིད་ཀྱི་རྩ་བ་སེམས་ཀྱི་ཞི་བདེ་རེད། སེམས་ཀྱི་ཞི་བདེ་ནི་བསམ་བློ་གཏོང་སྟངས་ཀྱི་ཐོག་ནས། རང་ཉིད་གཅེས་འཛིན་རྒུད་པ་ཀུན་གྱི་སྒོ།། གསུངས་པ་ལྟར། རང་གཅེས་འཛིན་ཤུགས་ཆུང་དུ་གཏོང་བ་དང་། ག་ཚོད་ཐུབ་ཐུབ་ཀྱིས་གཞན་ཕན་གྱི་བློ་ཤུགས་ཆེ་རུ་གཏོང་ཐུབ་ན། མ་རྣམས་གཅེས་འཛིན་ཡོན་ཏན་ཀུན་གྱི་གཞི།། དེ་བཞིན་བདག་གཞན་བརྗེ་བའི་བློ་སྦྱོང་གི་བསམ་བློ་འདི་ནི་ཧ་ཅང་ཡག་པོ་རེད།

ངོས་རང་སྒེར་གྱི་ངོས་ནས་ཆ་བཞག་ན་རང་གཅེས་འཛིན་ག་ཚོད་ཐུབ་ཐུབ་ཀྱིས་ཤུགས་ཆུང་དུ་གཏོང་བ་དང་། གཞན་གཅེས་འཛིན་ག་ཚོད་ཐུབ་ཐུབ་ཀྱིས་ཤུགས་ཆེ་རུ་གཏོང་བར་འབད་བརྩོན་བྱེད་བཞིན་ཡོད། དེ་བྱས་པའི་འབྲས་བུར་སོ་སོར་སེམས་ཀྱི་ཞེ་བདེ་ཡོང་གི་འདུག སེམས་ཀྱི་ཞི་བདེ་བརྒྱུད་ནས་བསམ་བློ་ལྷོད་ལྷོད་ཆགས་ཀྱི་འདུག དེ་ངོས་ཀྱི་ཉམས་མྱོང་ཐོག་ནས་ཡིན། ཆོས་གྲོགས་ཚོས་དེ་བཞིན་དགོངས་པ་བཞེས་ཤོག སེམས་པ་བཟང་པོ་བྱེད་པ་ནི་ཆོས་ཀྱི་སྙིང་པོ་ཆགས་ཡོད། ཆོ་ག་ཕྱག་ལེན་དང་ཡི་དམ་སོགས་མང་པོ་ཡོད་ཀྱང་། གཙོ་བོ་སེམས་བཟང་པོ་བྱ་རྒྱུ་དེ་རེད། འཛམ་གླིང་འདིར་ཡོད་པའི་མི་གཙོ་བོར་གྱུར་པའི་སྲོག་ཆགས་ཚང་མ་སྡུག་བསྔལ་མི་འདོད་པ་དང་། བདེ་བ་འདོད་པ་ཤ་སྟག་རེད། ཚང་མ་བདེ་བ་དང་ལྡན་པ་བྱུང་ན་བསམ་པ་ཞིག་དགོས། དུད་འགྲོ་ཡིན་ནའང་མས་བུ་ལ་བརྩེ་བ་ཞིག་རང་བཞིན་གྱིས་ཡོང་གི་ཡོད། ང་ཚོ་མིས་བསམ་བློ་ཏོག་ཙམ་ཤུགས་ཆེ་རུ་བཏང་ན་འཛམ་གླིང་འདིར་རང་ཉིད་འཚོ་བའི་རྒྱུ་རྐྱེན་གཙོ་བོ་གཞན་ལ་བརྟེན་ནས་ཡོང་དགོས་པས་གཞན་གཅེས་འཛིན་གྱི་བློ་ཡག་པོ་ཞིག་གསལ་བཏབ་ནས་སེམས་ཅན་ཐམས་ཅད་དང་། ལྷག་པར་དུ་འཛམ་གླིང་འདིའི་མི་གཙོ་བོར་གྱུར་པའི་སེམས་ཅན་ཚང་མ། ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་སེམས་པ་བཟང་པ་དང་འབྲེལ་ནས་མ་སྐྱེ་བ་སྐྱེས་པ་དང་། སྐྱེས་པ་གོང་ནས་གོང་དུ་འཕེལ་བ་ཞིག་བྱ་རྒྱུ་ཡིན་བསམ་པ་དགོས། མི་གཞན་ཀྱིས་རེ་འདུན་བྱས་པའི་སྔོན་ལ་སོ་སོ་རང་ཉིད་ཀྱིས་རང་གཅེས་འཛིན་གྱི་སྐྱོན་ལ་བལྟས་ནས་གཞན་གཅེས་འཛིན་གྱི་ཡོན་ཏན་བསྟེན་ནས་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པ་བྱུང་ན་ཅི་མ་རུང་སྙམ་དུ་ཚང་མས་སེམས་བཟང་པོ་ཞིག་སྒོམས། ཞེས་དང་།

ངོས་ལ་ཁྱོད་རང་ཚོས་དད་པ་བྱེད་ཀྱི་ཡོད་པ་རེད། ང་ལ་ཁྱོད་ཚོས་སྒྲུབ་པའི་མཆོད་པ་ཕུལ་བ་ཡག་ཤོས་ནི་གཞན་ཕན་གྱི་བློ་ཡག་པོ་ཞིག་བསམ་བློ་ཐོངས་དང་། དེ་ནི་སྒྲུབ་པའི་མཆོད་པ་ཡག་ཤོས་རེད། མཁྱེན་སོང་ངམ། ཞེས་སོགས་བཀའ་སློབ་སྩལ་རྗེས་སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩལ་བ་དང་། མཐར་མ་ཎིའི་ལྗགས་ལུང་དང་། ཚེ་དཔག་མེད་ཀྱི་གཟུངས་སྔགས་ཀྱི་ལྗགས་ལུང་། སྒྲོལ་མའི་གཟུངས་སྔགས། རྣམ་རྒྱལ་མའི་གཟུངས་སྔགས་བཅས་ཀྱི་ལྗགས་ལུང་བཀའ་དྲིན་སྩལ་བ་དང་། མཐར་བླ་མའི་དགེ་རྒན་རིན་པོ་ཆེ་མཆོག་གིས་བཀའ་དྲིན་གཏང་རག་གི་མཎྜལ་རྟེན་གསུམ་འདེགས་འབུལ་དང་།  བླ་མའི་དགེ་རྒན་བླ་བྲང་དང་འབྲེལ་ཡོད་དད་ལྡན་སོག་ཡུལ་མི་མང་གི་ཚབ་བྱས་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་རབས་ཐམས་ཅད་དུ་གུས་ཅག་༸སྐྱབས་འོག་ཏུ་གཏོགས་པ་རྣམས་སྤྲུལ་བའི་ཟློས་གར་ཟམ་མ་ཆད་པས་ཐུགས་རྗེ་ལྕགས་ཀྱུས་ནམ་ཡང་མི་གཏོང་བ་ནི་གུས་ཅག་གི་རིང་ནས་ནམ་ཡང་སྙིང་ལ་བརྣགས་པའི་གསོལ་འདེབས་ཉག་གཅིག་ཡིན། ཞེས་དང་། གུས་ཅག་༸སྐྱབས་འོག་པ་རྣམས་ཀྱིས་ཀྱང་༸མགོན་པོ་གང་ཉིད་དང་དགའ་ལྡན་ཕོ་བྲང་གི་བླ་ན་མེད་པའི་ལམ་སྟོན་འོག་གཡོ་བ་མེད་པའི་དམ་ཚིག་གཟོང་ཁ་ཆིག་སྒྲིལ་དང་བླ་མའི་བཀའ་གསུང་ཅི་སྒྲུབ་ཀྱིས་ཐུགས་མཉེས་པའི་མཆོད་སྤྲིན་དུ་ནུས་རྒུ་རྩལ་སྤྲུགས་ཀྱི་གཡར་དམ་གཙང་མ་སྔར་ཡོད་ཕྱིས་ཀྱང་འགྱུར་བ་མེད་པ་ལགས་ན། སླད་མར་ཡང་སྐྱེ་དགུའི་བསོད་ནམས་ཀྱི་དཔལ་དུ་བཞད་པའི་མཐོང་གྲོལ་མཚན་དཔེའི་ལང་ཚོ་གཞོམ་གཤིག་ཡོངས་བྲལ་རྡོ་རྗེའི་ཁམས་སུ་བརྟན་ཅིང་། རྨད་དུ་བྱུང་བའི་གསང་གསུམ་འཕྲིན་ལས་ཀྱི་འཇུག་པ་འཛམ་གླིང་སྤྱི་དང་བཀའ་འབངས་རྣམས་ཀྱི་ཉེར་འཚོའི་གཞི་རུ་འགྱུར་བའི་སྨོན་ལམ་ཤུགས་དྲག་དང་བཅས། ཞེས་གསོལ་འདེབས་ཞུས་པ་བཅས་སོག་པོའི་དད་ལྡན་ཆོས་ཞུ་བ་གཙོས་སེར་སྐྱ་མི་མང་ལ་ཉིན་གཉིས་རིང་གི་ཆོས་འབྲེལ་གནང་སྒོ་ལེགས་པར་གྲུབ་ཡོད།

དེ་ཡང་སྔ་དྲོའི་ཆུ་ཚོད་བརྒྱད་པ་ཡོལ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་གཟིམ་ཆུང་ནས་ཆིབས་བསྒྱུར་བསྐྱངས་སྐབས་སོག་པོའི་བླ་མའི་དགེ་རྒན་རིན་པོ་ཆེ་དང་། དཔལ་ལྡན་འབྲས་སྤུངས་སྒོ་མང་མཁན་རིན་པོ་ཆེ་རྣམ་གཉིས་ཀྱིས་སྤོས་སྣེས་མདུན་བསུ་དང་བཅས་ཐེག་ཆེན་ཆོས་གླིང་གཙུག་ལག་ཁང་དུ་གདན་ཞུ་ཞུས་པ་དང་། བཞུགས་ཁྲིར་༸ཞབས་སོར་འཁོད་མཚམས་སོག་པོའི་དད་ལྡན་ཆོས་པ་རྣམས་ཀྱིས་རང་སྐད་ཐོག་ཤེས་རབ་སྙིང་པོ་གསུང་འདོན་གནང་བ་དང་། གསུང་ཆོས་སྦྱིན་བདག་གཙོ་གྲས་ཁག་ཅིག་གིས་མཇལ་ཁ་ཞུས་ཤིང་། བླ་མའི་དགེ་རྒན་རིན་པོ་ཆེས་མཎྜལ་རྟེན་གསུམ་འདེགས་འབུལ་ཞུས་རྗེས་༸གོང་ས་མཆོག་གིས་བཀའ་སློབ་སྩལ་དོན།

ང་ཚོ་རྒྱ་གར་འཕགས་པའི་ཡུལ་དུ་བཙན་བྱོལ་བ་བྱས་ཏེ་བསྡད་ཡོད་པའི་སྐབས། དེ་རིང་འདིར་ཆོས་འབྲེལ་བྱེད་པའི་གོ་སྐབས་བྱུང་བ་རེད། རྗེ་རིན་པོ་ཆེ་དང་ངེད་གཉིས་ཕ་ཡུལ་གཅིག་པ་རེད། རྗེ་རིན་པོ་ཆེ་འཁྲུངས་ས་དང་ངོས་རང་སྐྱེས་ས་ཐག་ཉེ་བོ་རེད། ཆོས་རྗེ་བློ་བཟང་གྲགས་པ་ཞེས་གསུངས་པ་ནང་བཞིན་ངོས་ལའང་བློ་བཟང་གྲགས་པ་ཞེས་ཕལ་ཆེར་ལབ་ཆོག་གི་རེད།  ངོས་ཀྱི་མི་ཚེ་འདི་ལ་ཕྱི་མིག་བལྟས་པ་ཡིན་ན་བསྟན་པའི་བྱ་བ་སྤྱི་དང་། བྱེ་བྲག་ཏུ་བོད་གངས་ཅན་ལྗོངས་ཀྱི་བསྟན་པ་དང་། འགྲོ་བའི་དོན་དུ་ཞབས་འདེགས་གང་འཚམ་བསྒྲུབས་ཡོད། འཛམ་གླིང་སྤྱི་ཡོངས་ལ་མཚོན་ནའང་། ཁོར་ཡུག་སྲུང་སྐྱོབ་བྱེད་པ་དང་།  འཛམ་གླིང་ཞི་བདེ་ཡོང་བ།  དེ་བཞིིན་ཁ་ཡོད་ལག་ཡོད་ཀྱི་གནས་ཚུལ་གཅིག་ལ་ཆོས་ལུགས་ཚང་མ་མཐུན་འབྲེལ་བྱེད་པ་ལ་ངོས་ཀྱིས་བྱས་རྗེས་གང་འཚམ་བཞག་ཡོད། འཛམ་གླིང་འདིར་རྗེ་རིན་པོ་ཆེ་དང་ཕ་ཡུལ་གཅིག་པའི་ཨ་མདོ་བ་ཞིག་གིས་དུས་ཚོད་གཉན་འཕྲེང་འདིའི་སྐབས་སུ་རྗེ་རིན་པོ་ཆེའི་དགོངས་པ་དང་མཐུན་པའི་ཞབས་འདེགས་གང་ལ་གང་འཚམ་སྒྲུབ་ཡོད། ང་རང་གི་ངོས་ནས་ཆ་བཞག་ནའང་རྗེས་སུ་ཡི་རངས་ཞུ་བཞིན་ཡོད། ཁྱོད་རང་ཚོ་ཆོས་གྲོགས་ཚོར་འདི་ཞུ་འདོད་བྱུང་། ང་ཚོ་ཚང་མ་སྤྱི་ཡོངས་ཀྱི་ཆ་ནས་སྟོན་པ་བཅོམ་ལྡན་འདས་ཀྱི་རྗེས་འབྲང་ཆགས་ཡོད། གཉིས་ནས་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་ཆགས་ཡོད། བྱེ་བྲག་ཏུ་བོད་གངས་ཅན་གྱི་ལྗོངས་སུ་ཡོད་པའི་སངས་རྒྱས་པའི་ཆོས་ཟབ་པ་དང་རྒྱ་ཆེ་བའི་གནས་མཐའ་དག་ཚང་བའི་ཆོས་ཚུལ་འདིའི་རྗེས་འབྲང་ཆགས་ཡོད།

ད་ལྟ་ཕན་ཆད་དུ་ཧི་མ་ལ་ཡའི་རི་རྒྱུད་ཀྱི་བོད་མི་ཚང་མ་གཙོ་བོ་ཆོས་རྒྱལ་སྲོང་བཙན་སྒམ་པོ་དང་། བྱེ་བྲག་ཏུ་ཁྲི་སྲོང་ལྡེ་བཙན་གྱིས་ལམ་སྟོན་གནང་བ་དེར་ཏག་ཏག་འགྲོ་མཁན་ཆགས་ཡོད། འཛམ་གླིང་འདིར་ཁྲི་སྲོང་ལྡེ་བཙན་གྱི་ཆོས་རྒྱུན་འཛིན་མཁན་ང་ཚོ་བོད་པ་ཡིན། རྨི་ལམ་སོགས་ལ་བལྟས་ཡོང་སྐབས་ངོས་རང་ཁྲི་སྲོང་ལྡེ་བཙན་གྱི་སྐྱེ་བ་ཡིན་པ་ཧ་ཅང་གསལ་བོ་ཞིག་ཐོན་ཡོང་གི་འདུག དེར་མ་ཟད་ངོས་ནས་ག་ཚོད་ཐུབ་ཐུབ་ཀྱིས་ཁྲི་སྲོང་ལྡེ་བཙན་གྱི་ལམ་སྟོན་དང་། དགོངས་བཞེད་ཉམས་པ་སོར་ཆུད་དང་། མི་ཉམས་གོང་འཕེལ་ཡོང་བ་ལ་འབད་བརྩོད་གང་ཐུབ་ཅི་ཐུབ་བྱེད་བཞིན་ཡོད། ཁྱོད་ཚོ་མི་མང་ལ་ཆ་བཞག་ནའང་ང་ལ་ཡིད་ཆེས་བྱས་ཏེ། ངོས་ཀྱི་རེ་འདུན་དང་བསམ་ཚུལ་བཏོན་པ་རྣམས་ལ་ཡིད་ཆེས་བློས་འགེལ་བྱས་ནས་འགྲོ་བཞིན་ཡོད་པ་རེད། ཐུགས་རྗེ་ཆེ་ཞུ་རྒྱུ་ཡིན།

ང་ཚོ་བོད་གངས་ཅན་གྱི་ཆོས་ཚུལ་མཁན་ཆེན་ཞི་བ་འཚོ་ནས་བརྒྱུད་པ་རེད། དེ་ཡང་གཙོ་བོ་མགོན་པོ་ཀླུ་སྒྲུབ་དང་། ཐོགས་མེད་སོགས་ནས་མར་བརྒྱུད་ནས་ཡོང་བ་རེད། བསམ་བློའི་འགྲོ་སྟངས་ཐོག་ནས་བཤད་དུས་ཚན་རིག་དང་མཐུན་པ། བསམ་བློ་རྒྱ་ཆེན་པོ་དང་གུ་ཡངས་པོ། འཛམ་གླིང་གི་དངོས་ཡོད་དཀའ་ངལ་སེལ་བ་ལ་ཁ་ཡོད་ལག་ཡོད་ཀྱིས་ཕན་ཐོགས་ཡོད་པ་ཞིག་ཆགས་ཡོད།  ངོས་རང་མཁན་ཆེན་ཞི་བ་འཚོའི་རྗེས་འབྲང་དང་། ཆོས་རྒྱལ་ཁྲི་སྲོང་ལྡེ་བཙན་གྱི་སྐྱེ་བ་ཡིན་པ་གསལ་བོ་རེད།   ད་ལྟ་ཕན་ཆད་དུ་ཧུར་ཐག་བྱས་པ་ཡིན་ལ་ད་དུང་ཡང་ལོ་བརྒྱ་ལྷག་རིང་མཁན་ཆེན་ཞི་བ་འཚོ་དང་། ཆོས་རྒྱལ་ཁྲི་སྲོང་ལྡེ་བཙན་གྱི་དགོངས་པ་དང་མཐུན་པ་ཞིག་ལ་ཧུར་ཐག་བྱེད་བསམ་ཡོད། ཁྱོད་ཚོས་དེ་ལུགས་ཐུགས་སྨོན་ཡག་པོ་ཞིག་གནང་ཤོག ཅེས་བཀའ་སློབ་སྩལ་བ་དང་།

སླར་ཡང་བཀའ་སློབ་སྩལ་དོན། ངོས་རང་ཁྲི་སྲོང་ལྡེ་བཙན་གྱི་སྐྱེ་བ་ཡིན་པ་ཧ་ཅང་གསལ་བོ་དྲན་ཡོང་གི་འདུག སྔར་ཆོས་རྒྱལ་ཁྲི་སྲོང་ལྡེ་བཙན་གྱི་སྐབས་སུ་བོད་བསྟན་སྲིད་ཀྱི་ཆེད་དུ་མཛད་རྗེས་ཆེན་པོ་བཞག་པ་རེད། ད་ལྟའི་དུས་ཚོད་འདི་ལ་སྐྱེས་ས་ཕ་ཡུལ་མདོ་སྨད་ཕྱོགས་ནས་ཡིན་པ་དང་། ཤེས་པའི་རྒྱུད་དེ་ཁྲི་སྲོང་ལྡེ་བཙན་གྱི་ཤེས་རྒྱུད་ཡིན་པ་རྨི་ལམ་ལ་ཤིན་ཏུ་གསལ་བོ་ཡོང་གི་འདུག  ཁྱོད་ཚོས་ཀྱང་བསམ་བློའི་ནང་དུ་ཆོས་རྒྱལ་ཁྲི་སྲོང་ལྡེ་བཙན་གྱི་འཁྲིས་སུ་ཡོད་བསམ་ནས་ཧུར་ཐག་བྱོས། ཚང་མ་བློ་བདེ་བར་བཞུགས།  དངོས་ཡོད་གནས་ཚུལ་ལ་བལྟས་པ་ཡིན་ན། ཆོས་རྒྱལ་ཁྲི་སྲོང་ལྡེ་བཙན་གྱི་སྐྱེ་བ་འདི་ཡི་ཐོག་ནས་འཛམ་གླིང་འདིར་དཔལ་ནཱ་ལེནྡྲ་ནས་བརྒྱུད་པའི་ཆོས་ཚུལ་འདིས་ཁ་ཡོད་ལག་ཡོད་ཀྱིས་ཕན་ཐོགས་ཡོང་ཐུབ་པའི་གོ་སྐབས་ཡོད་པ་ལྟ་བུ་འདུག དེར་བརྟེན། ཧུར་ཐག་བྱས་ཏེ་ད་ལྟ་དགུ་བཅུའི་མཚམས་ལ་སླེབས་ཀྱི་ཡོད། ལོ་བརྒྱ་དང་བཅུ་གྲངས་སྡོད་ཐུབ་པའི་བཟོ་ལྟ་འདུག ངོས་ཀྱིས་ད་ལྟའི་བར་དུ་ཧུར་ཐག་བྱས་པ་ཡིན་ལ་ཁྱོད་ཚོས་ཀྱང་ཧུར་ཐག་གནང་ཤོག ཅེས་སོགས་བཀའ་སློབ་གྲུབ་མཚམས་དགའ་ལྡན་ལྷ་བརྒྱ་མའི་ཆོས་འབྲེལ་དངོས་གཞི་དབུ་འཛུགས་ཀྱིས་བཀའ་སློབ་སྩལ་དོན།

ཆོས་འབྲེལ་དགའ་ལྡན་ལྷ་བརྒྱ་མའི་ཁྲིད་རེད། ང་ཚོ་བོད་གངས་ཅན་གྱི་ལྗོངས་ལ་ཡོད་པའི་ཆོས་བརྒྱུད་དམ། ནཱ་ལེནྡྲ་ནས་བརྒྱུད་པའི་ཆོས་བརྒྱུད་ལ་བླ་མའི་རྣལ་འབྱོར་འདི་གལ་ཆེན་པོ་ཆགས་ཀྱི་ཡོད། ང་ཚོ་རྒྱ་གར་ལ་ཡོད་པའི་ནང་པ་ཚོས་སོ་སོའི་ཆོས་བརྒྱུད་ཀྱི་བླ་བརྒྱུད་དེ་གལ་ཆེན་པོར་བརྩི་བཞིན་ཡོད། དེ་ནང་པ་གཅིག་པུ་མ་རེད། མུ་སྟེགས་པ་ཚོས་ཀྱང་རང་རང་གི་ཆོས་བརྒྱུད་ཀྱི་བླ་མ་རྣམས་གལ་ཆེན་པོར་བརྩི་བཞིན་ཡོད། ཕལ་ཆེར་ཡི་ཤེ་ཆོས་པ་ཚོས་ཀྱང་སོ་སོའི་བླ་མ་ཚོ་གལ་ཆེན་པོར་བརྩི་བཞིན་ཡོད་པ་རེད། དེར་བརྟེན། འཇམ་མགོན་བླ་མ་ཙོང་ཁ་པ་ཆེན་པོའི་རྗེས་འབྲང་ཚོས་ཁོང་གི་གསུང་རྣམས་གཙོ་བོ་བྱེད་ཀྱི་ཡོད། ཅེས་བཀའ་སྩལ་རྗེས་འདུལ་ནག་པ་དཔལ་ལྡན་བཟང་པོས་མཛད་པའི་དགའ་ལྡན་ལྷ་བརྒྱ་མའི་བཤད་ལུང་སྩལ་སྐབས་ལུང་ཁྲིད་གནང་དོན།

ན་མོ་གུ་རུ་མཉྫུ་གྷོ་ཥཱ་ཡ། དགའ་ལྡན་ལྷ་བརྒྱའི་མགོན་གྱི་ཐུགས་ཀ་ནས།། རབ་དཀར་ཞོ་གསར་སྤུངས་འདྲའི་ཆུ་འཛིན་རྩེར།། ཆོས་ཀྱི་རྒྱལ་པོ་ཀུན་མཁྱེན་བློ་བཟང་གྲཊ།། སྲས་དང་བཅས་པ་གནས་འདིར་གཤེགས་སུ་གསོལ།། མདུན་གྱི་ནམ་མཁར་སེང་ཁྲི་པད་ཟླའི་སྟེང་།། རྗེ་བཙུན་བླ་མ་དགྱེས་པའི་འཛུམ་དཀར་ཅན།། བདག་བློ་དད་པའི་བསོད་ནམས་ཞིང་མཆོག་ཏུ།། བསྟན་པ་རྒྱས་ཕྱིར་བསྐལ་བརྒྱར་བཞུགས་སུ་གསོལ།། ཤེས་བྱའི་ཁྱོན་ཀུན་འཇལ་བའི་བློ་གྲོས་ཐུགས།། སྐལ་བཟང་རྣ་བའི་རྒྱན་གྱུར་ལེགས་བཤད་གསུང་།། གྲཊ་པའི་དཔལ་གྱིས་ལྷམ་མེར་མཛེས་པའི་སྐུ།། མཐོང་ཐོས་དྲན་པས་དོན་ལྡན་ལ་ཕྱག་འཚལ།། ཡིད་འོང་མཆོད་ཡོན་སྣ་ཚོགས་མེ་ཏོག་དང་།། དྲི་ཞིམ་བདུག་སྤོས་སྣང་གསལ་དྲི་ཆབ་སོགས།། དངོས་བཤམས་ཡིད་སྤྲུལ་མཆོད་སྤྲིན་རྒྱ་མཚོ་འདི།། བསོད་ནམས་ཞིང་མཆོག་ཁྱེད་ལ་མཆོད་པར་འབུལ།། གང་ཞིག་ཐོག་མེད་དུས་ནས་བསགས་པ་ཡི།། ལུས་ངག་ཡིད་ཀྱིས་མི་དགེ་ཅི་བགྱིས་དང་།། ཁྱད་པར་སྡོམ་པ་གསུམ་གྱི་མི་མཐུན་ཕྱོགས།། སྙིང་ནས་འགྱོད་པ་དྲག་པོས་སོ་སོར་བཤགས།།  ཅེས་ལུང་གནང་མཚམས།  

སྙིགས་མའི་དུས་འདིར་མང་ཐོས་སྒྲུབ་ལ་བརྩོན།། ཞེས་པའི་སྙིང་པོ་འདི་ཧ་ཅང་གལ་ཆེན་པོ་རེད།  གཞུང་ལུགས་ཐོས་བསམ་མ་བྱས་ན་ཉམས་ལེན་བྱེད་ཤེས་ཀྱི་མ་རེད། དེར་བརྟེན། མང་དུ་ཐོས་པ་དང་། མང་དུ་ཐོས་པའི་དོན་ཡང་ཉམས་ལེན་མ་བྱས་ན་ཚིག་གི་ལོ་མ་རྐྱང་ལས་མི་འདུག་པས་མང་ཐོས་སྒྲུབ་ལ་བརྩོན་ཞེས་པ་ནི་གཞུང་མང་པོ་ལ་བལྟས་ནས་ཐོས་པ་རྒྱ་ཆེན་པོ་བཙལ་བ་དང་། ཐོས་དོན་སྒྲུབ་ལ་གཞོལ་ནས་ཉིན་ཞག་ཕྲུགས་གཅིག་གི་ནང་དུ་གཞུང་ལུགས་ཀྱི་དོན་དག་དང་། མདོར་ན། བསླབ་པ་གསུམ་ལ་བསྡུས་ཏེ་སྔགས་དང་སྦྲེལ་ནས་ཕྱིན་པ་ཡིན་ན། མདོ་སྔགས་སྤྱི་དང་། ལྷག་པར་དུ་གསང་བ་འདུས་པའི་སྐོར་དང་། བདེ་མཆོག དུས་འཁོར། བསྐྱེད་རྫོགས་ཚང་མའི་དོན་དག་ལག་ལེན་ཐོག་བསྐྱལ་ནས་འགྲོ་དུས་མང་ཐོས་སྒྲུབ་ལ་བརྩོན། ཞེས་དང་།

ཆོས་བརྒྱད་སྤངས་པས་དལ་འབྱོར་དོན་ཡོད་བྱས།། ཞེས་འཇིག་རྟེན་ཆོས་བརྒྱད་ཀྱི་གཞན་དབང་དུ་མི་གཏོང་བ་དང་། རྒྱབ་མདུན་ངོ་ལྐོག་མེད་པར་བསམ་པ་རྣམ་དག་གི་ཐོག་ནས་འཇམ་མགོན་བླ་མ་ཙོང་ཁ་པ་ཆེན་པོའི་དགོངས་བཞེས་གང་ཡོད་པ་ཚུལ་བཞིན་དུ་སྒྲུབ་བསམ་པའི་ཐོག་ནས་འགྲོ་དུས། མགོན་པོ་ཁྱོད་ཀྱི་རླབས་ཆེན་མཛད་པ་ལ།། བདག་ཅག་བསམ་པ་ཐག་པས་ཡི་རང་ངོ་།། རྗེ་བཙུན་བླ་མ་དམ་པ་ཁྱེད་རྣམས་ཀྱི།། ཆོས་སྐུའི་མཁའ་ལ་མཁྱེན་བརྩེའི་ཆུ་འཛིན་འཁྲིགས།། ཇི་ལྟར་འཚམ་པའི་གདུལ་བྱའི་འཛིན་མ་ལ།། ཟབ་རྒྱས་ཆོས་ཀྱི་ཆར་བ་དབབ་ཏུ་གསོལ།། ཞེས་གསུངས་པ་འདི་ཆགས་སྡང་གི་སྐད་ཆ་མ་རེད། རྗེ་རིན་པོ་ཆེའི་བསྟན་པ་འདི་ཟབ་རྒྱས་ཀྱི་གནད་ཆ་ཚང་ཡོད་པའི་ཧ་ཅང་སྤུས་དག་པོ་ཞིག་འདུག

ངོས་རང་རིས་མེད་ཀྱི་བླ་མ་མང་པོ་ས་ནས་ཆོས་མང་པོ་ཞུས་ཡོད་པ་རེད། དཔལ་ས་སྐྱ་བ་དང་འབྲི་གུང་། རྙིང་མ་སོགས་ཚང་མར་སོ་སོའི་ཟབ་ཁྱད་ཡོད་པ་ཧ་ཅང་ཡག་པོ་རེད། ཡིན་ནའང་། གཞུང་ལུགས་ཁ་གསལ་བོ་དང་དོན་དག་འདུས་ཆེན་པོ་བྱས་ཏེ་ཡོད་པ་ནི་རྗེ་རིན་པོ་ཆེའི་གསུང་འདི་ཏོག་ཙམ་ཟབ་པ་ཞིག་རེད་འདུག  ཚིག་གི་སྤྲོས་བཤད་སྒང་དུ་ཕྱིན་པ་ཡིན་ན་རྒྱ་ཆེན་པོ་ཡོད་པ་དང་། དེ་དག་བསྡུས་ཚེ་ལམ་བསླབ་པ་གསུམ་གྱི་ཉམས་ལེན་ཐོག་ཏུ་ཏག་ཏག་འདུས་ཡོད་པ་ཧ་ཅང་ཡག་པོ་ཞིག་རེད།  བདག་གིས་ཇི་སྙེད་བསགས་པའི་དགེ་བ་འདིས།། བསྟན་དང་འགྲོ་བ་ཀུན་ལ་གང་ཕན་དང་།། ཁྱད་པར་རྗེ་བཙུན་བློ་བཟང་གྲཊ་པ་ཡི།། བསྟན་པའི་སྙིང་པོ་རིང་དུ་གསལ་བྱེད་ཤོག།     ཅེས་དང་།

གསོལ་འདེབས་ནི། དམིགས་མེད་བརྩེ་བའི་གཏེར་ཆེན་སྤྱན་རས་གཟིགས།། དྲི་མེད་མཁྱེན་པའི་དབང་པོ་འཇམ་པའི་དབྱངས།། བདུད་དཔུང་མ་ལུས་འཇོམས་མཛད་གསང་བའི་བདག། གངས་ཅན་མཁས་པའི་གཙུག་རྒྱན་ཙོང་ཁ་པ།། བློ་བཟང་གྲགས་པའི་ཞབས་ལ་གསོལ་བ་འདེབས།།  ངོས་རང་སྐྱེ་ས་ཟི་ལིང་རེད། སྐབས་དེར་ས་གནས་ཀྱི་དཔོན་པོ་ཟི་ལིང་མ་ཀྲུའུ་ཞི་ཟེར་བ་དེ་རེད། ཁོང་ང་ལ་ཐུག་སྐབས་རྗེ་རིན་པོ་ཆེ་ལ་བསྟོད་བསྔགས་ཞུས་སོང་།  བློ་གཟུ་བོར་གནས་པའི་རྟགས་རེད།  ཁོ་རང་ཁ་ཆེ་ཡིན་ནའང་། རྗེ་རིན་པོ་ཆེའི་མཛད་པ་རྣམ་ཐར་ལ་ཡི་རངས་བྱས་པ་དང་། དེ་དང་ཆབས་ཅིག་ངོས་ལའང་ཧ་ཅང་དགའ་བོ་བྱེད་ཀྱི་འདུག

ཚེ་རབས་ཀུན་ཏུ་རྒྱལ་བ་ཙོང་ཁ་པས།། ཐེག་མཆོག་བཤེས་གཉེན་དངོས་སུ་མཛད་པའི་མཐུས།། རྒྱལ་བས་བསྔགས་པའི་ལམ་བཟང་དེ་ཉིད་ལས།། སྐད་ཅིག་ཙམ་ཡང་ལྡོག་པར་མ་གྱུར་ཅིག། ཅེས་གསོལ་བ་འདེབས་པ་དང་། ད་ལྟ་ཕན་ཆད་དུ་སྤྱིར་སངས་རྒྱས་ཀྱི་བསྟན་པ། ཡང་སྒོས་འཇམ་མགོན་བླ་མའི་བསྟན་པ། ཟབ་པ་དང་རྒྱ་ཆེ་བའི་གནད་ཡག་པོ་རྩད་གཅོད་བྱས་ཏེ་སྙིང་ཐག་པ་ནས་གོ་བ་ཆགས་པ་དང་། ལག་ལེན་བསྐྱལ་ཚེ་ཡིད་ཆེས་རྙེད་པས་བསྟན་པ་འདི་ལ་བཤད་སྒྲུབ་ལས་གསུམ་གྱི་ཐོག་ནས་ད་ལྟའི་བར་དུ་ཧུར་ཐག་བྱས་པ་ཡིན། འཇམ་མགོན་བླ་མའི་བསྟན་པའི་སྲུང་མའི་གཙོ་བོ་དམ་ཅན་ཆོས་རྒྱལ་རེད། དམ་ཅན་ཆོས་རྒྱལ་གྱིས་ངོས་ལ་དངོས་ཤུགས་བརྒྱུད་གསུམ་ནས་དགྱེས་པའི་མཚན་མ་མང་པོ་ཡོང་གི་འདུག དེ་རིང་འདིར་ང་ཚོ་བཙན་བྱོལ་བ་བྱས་ཏེ་བསྡད་ཡོད་ཀྱང་། འཇམ་མགོན་བླ་མའི་བསྟན་པ་བཤད་སྒྲུབ་ལས་གསུམ་གྱི་ཐོག་ནས་འཛིན་སྐྱོང་སྤེལ་གསུམ་བྱེད་བཞིན་ཡོད། དེ་སྔ་སངས་རྒྱས་པའི་ཆོས་གོ་ཐོས་མེད་པའི་ལུང་པ་ཚོའི་ནང་དུ་བོད་ཀྱི་སངས་རྒྱས་པའི་ཆོས་ལ་དོ་སྣང་གསར་པ་སླེབས་པ་ཞིག་དང་། ཡི་ཤེ་ཆོས་པ་མང་པོ་ཞིག་གིས་ང་ཚོར་ཧ་ཅང་དགའ་བོ་བྱེད་ཀྱི་ཡོད།

ཆོས་ཀྱི་དད་པ་ཙམ་མ་ཡིན་པར་སེམས་ཁམས་རིག་པའི་སྐོར་ལ་བོད་ཀྱི་ནང་པའི་གཞུང་ཚན་རིག་དང་མཐུན་པར་ཧ་ཅང་བསམ་བློ་གཏོང་རྒྱུ་དང་། འགྲེལ་བཤད་རྒྱག་རྒྱུ་ཡོད་པ་ལ་ཤིན་ཏུ་དགའ་བོ་བྱེད་ཀྱི་འདུག  ཚན་རིག་པ་ལ་ཐུག་སྐབས་ངོས་རང་ཚན་རིག་པ་ཆགས་ཀྱི་ཡོད།  གང་ལྟར་སངས་རྒྱས་པའི་ཆོས་ག་ལེར་ཞིབ་ཚགས་སུ་བཏང་ཚེ་སེམས་ཁམས་རིག་པའི་སྐོར་བཤད་ཀྱི་ཡོད། དེར་བརྟེན། འཇམ་མགོན་བླ་མའི་བསྟན་པ་ལ་སློབ་གཉེར་བྱས་པའི་གྲུབ་འབྲས་ལ་ཚན་རིག་པ་ཚོ་དང་མཐུན་པོ་བྱས་ཏེ། སེམས་ཁམས་རིག་པའི་སྐོར་ང་ཚོར་འགྲེལ་བཤད་རྒྱག་རྒྱུ་ཡོད་པ་ཞིག་ཆགས་ཡོད། ད་ལྟའི་བར་བསྟན་པའི་ཞབས་འདེགས་དེ་ལྟར་བསྒྲུབ་པ་དང་། ད་དུང་ལོ་བརྒྱ་དང་བཅུ་གྲངས་བར་བསྟན་པའི་ཞབས་འདེགས་སྒྲུབ་བསམ་པ་ཞིག་ཡོད། ཅེས་དང་།

དུས་ཚོད་གཉན་འཕྲེང་ཅན་ང་ཚོ་ལུང་པ་དང་བྲལ་ནས་བཙན་བྱོལ་བ་ཆགས་ཡོད་པའི་སྐབས་འདིར་སྔོན་གྱི་ངོས་ཀྱི་གྲོགས་པོ་ཚོས་ངོས་ལ་བསྟོད་བསྔགས་བྱས་པར་ད་ལྟའི་བར་དུ་ཧུར་ཐག་བྱས་པ་ཡིན་ལ། དོན་དང་ལྡན་པ་ཞིག་བྱུང་བ་རེད། ལྷག་པར་དུ་ནུབ་ཕྱོགས་རྒྱལ་ཁབ་ནང་དུ་ངོས་ཀྱིས་སེམས་ཁམས་རིག་པ་དང་འབྲེལ་བའི་ནང་ཆོས་འགྲེལ་བཤད་བརྒྱབ་པ་ལ་ཚན་རིག་པ་མང་པོ་ཞིག་གིས་ཧ་ཅང་དགའ་བོ་བྱེད་ཀྱི་འདུག དེ་ཚང་མ་བསྟན་པའི་ཞབས་འདེགས་ཡིན། ངོས་རང་ལ་ཆ་བཞག་ན་འདི་ཕྱི་དོན་ལྡན་ཡོང་བར་ཚོགས་གསོག་སྒྲུབ་སྦྱོང་བྱེད་པ་ལ་མཆོག་ཏུ་གྱུར་པ་ཆགས་ཡོད། གཞན་ཞུ་རྒྱུ་མེད། ཚང་མས་ཧུར་ཐག་གནང་ཤོག བཀྲ་ཤིས་བདེ་ལེགས། ཐུགས་རྗེ་ཆེ། ཞེས་བཀའ་སློབ་སྩལ་ཏེ་ཆོས་འབྲེལ་གྲུབ་མཚམས་བཀའ་དྲིན་གཏང་རག་གི་མཎྜལ་ཕུལ་ཏེ་ཉིན་དང་པོའི་ཆོས་འབྲེལ་གནང་སྒོ་ལེགས་པར་གྲུབ་ཡོད་པ་བཅས།།

དེ་ཡང་སྔ་དྲོའི་ཆུ་ཚོད་༨།༣༠ཙམ་ཕོ་བྲང་གཟིམ་ཆུང་ནས་མཇལ་འཕྲད་ཁང་དུ་ཆིབས་བསྒྱུར་གྱིས་༸ཞབས་སྟེགས་སུ་འཁོད་མཚམས་བགྲོ་གླེང་གཙོ་སྐྱོང་བ་སྐུ་ཞབས་ཨོ་ཐུར་(Arthur C.Brooks) ལགས་ཀྱིས་ཕེབས་བསུའི་གསུང་བཤད་གནང་རྗེས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།

ངོས་ཀྱི་འབད་བརྩོན་གཙོ་བོ་ནི། ང་ཚོ་སྐྱེས་པའི་སྐབས་ནས་མ་ཡི་བརྩེ་བའི་བསྐྱངས་པ་དང་། ཨ་མའི་ནུ་ཞོ་འཐུང་བའི་ཉམས་མྱོང་ཚང་མར་ཡོད། ཆུང་ཆུང་སྐབས་བསམ་བློ་གཏོང་སྟངས་ལ་ཤུགས་རྐྱེན་མ་ཐེབས་གོང་མ་ཡི་བརྩེ་བས་བསྐྱངས་པའི་ཉམས་མྱོང་ནི་གཏིང་ཟབ་ཤོས་ཤིག་རེད། དེ་མི་གཅིག་པུ་མ་ཡིན་པར་དུད་འགྲོ་ཡིན་ནའང་ཧ་ཅང་རྩ་ཆེན་པོ་རེད། འབུ་ཆུང་ཆུང་ལ་མ་ཡི་བརྩེ་བ་དང་འབྲེལ་བ་གང་འདྲ་ཡོད་མེད་མི་ཤེས། དེ་མིན་སྲོག་ཆགས་ཚོར་མ་ཡི་བརྩེ་བ་ཧ་ཅང་རྩ་ཆེན་པོ་རེད། མ་ཡི་བརྩེ་བ་ཤུགས་ཆེན་པོའི་ཉམས་མྱོང་ཡོད་ཡོད་པ་རྣམས་རང་བཞིན་གྱིས་སེམས་བཟང་པོ་དང་དུལ་བ་ཞིག་ཡོང་གི་འདུག ཆུང་ཆུང་སྐབས་ནས་མ་དང་ཁ་བྲལ་བ་ཡིན་ན་གྲོགས་མེད་གཅིག་པུའི་འདུ་ཤེས་འཁུར་སྡོད་པ་ཞིག་རེད།

ངོས་རང་སྒེར་ལ་ཆ་བཞག་ན་ཨ་མ་ལགས་ཀྱིས་ཧ་ཅང་འཆམ་པོ་གནང་བ་རེད། འཛམ་གླིང་འདིར་ཕ་མ་དང་ཁ་བྲལ་ནས་འགྲོ་བ་ནི་ཏོག་ཙམ་སྐྱོན་ཡོང་གི་འདུག དཔེར་ན་དུད་འགྲོ་ཁྱི་སོགས་ལ་མཚོན་ནའང་མ་ཡི་བརྩེ་བ་ནི་ཧ་ཅང་གལ་ཆེན་པོ་ཡིན་པ་མཐོང་གི་འདུག སོ་སོའི་ཨ་མ་དང་མཉམ་དུ་ཡོད་ཚེ་རང་བཞིན་གྱིས་ཞི་བདེ་ཡོད་པ་ཞིག་དང་། མ་དང་ཁ་བྲལ་ན་གྲོགས་མེད་གཅིག་པུའི་འདུ་ཤེས་སླེབས་སྡོད་པ་ཞིག་རེད། ངོས་ལ་ཆ་བཞག་ན་ཨ་མ་ལགས་ཀྱིས་ཧ་ཅང་འཆམ་པོ་གནང་ཡོད། ཆུང་ཆུང་སྐབས་སུ་ཨ་མ་ལགས་དང་ཁ་བྲལ་བ་ཡིན་ན་སེམས་ལ་ཏོག་ཙམ་མ་ལྡེང་བ་ཞིག་ཕལ་ཆེར་ཡོད་པ་རེད། ང་ཚོས་ནམ་རྒྱུན་ཆོས་བཤད་པའི་སྐབས་སུ་མར་ཤེས་ཞེས་པ་རྩ་ཆེན་པོར་བརྩི་བཞིན་འདུག བློ་སྦྱང་ཡོང་སྐབས་སེམས་ཅན་ཐམས་ཅད་མར་ཤེས་པ་ཞིག་བཤད་ཀྱི་ཡོད། ཅེས་བཀའ་སློབ་སྩལ།

གཙོ་སྐྱོང་བ་གཙོས་མཉམ་ཞུགས་པ་རྣམས་པས་བཀའ་འདྲི་ཕུལ་བར་བཀའ་ལན་སྩལ་སྐབས། མ་ཡི་བརྩེ་བ་རག་པས་སོ་སོར་བདེ་སྐྱིད་ཡོང་གི་ཡོད་པ་དང་། ཅི་ཐུབ་ཀྱིས་གཞན་ལ་བརྩེ་བ་བྱས་ན་སྐྱིད་པོ་ཡོང་གི་ཡོད་ཀྱང་། མི་ཚང་མས་གཞན་ལ་དེ་ཙམ་བརྩེ་བ་མི་བྱེད་པའི་དཀའ་ངལ་གང་ལ་ཐུག་ཡོད་མེད་བཀའ་འདྲི་ཞུས་པར་བཀའ་ལན་དུ། ལྷན་སྐྱེས་ཀྱི་གནས་སྟངས་ནི་་མ་ཡི་བརྩེ་བ་དེ་མི་ཚེ་འདིའི་ནང་གལ་ཆེ་ཤོས་ཆགས་ཡོད། བརྩེ་བ་དེའི་ཉམས་མྱོང་ཏོག་ཙམ་ཡོད་མཁན་གྱིས་གཞན་ལ་བརྩེ་བ་བྱེད་རྒྱུའང་རང་བཞིན་གྱིས་ཡོང་བ་ཞིག་ཕལ་ཆེར་རེད། བརྩེ་བས་རང་ཉིད་ཀྱི་སེམས་ལ་ཞི་བདེ་ཡོང་བར་དོ་སྣང་མེད་པར་སྤྱི་ཚོགས་ནང་ཆགས་སྡང་བྱས་ཚེ་ཕན་གནོད་ཏོག་ཙམ་ཡོད་པར་བརྟེན། བརྩེ་བ་ལ་སྣང་ཆུང་བྱས་པ་ལྟ་བུ་འདུག ཅེས་སོགས་བརྩེ་བ་ཧ་ཅང་གལ་ཆེན་ཡིན་པའི་སྐོར་བཀའ་སློབ་གཟབ་ནན་གནང་ཞིང་། འཛམ་གླིང་གི་རྙོག་དྲ་ཚང་མ་བརྩེ་བའི་མ་ལྡེང་བ་ལ་བརྟེན་ནས་བྱུང་སྐོར་བཀའ་སློབ་སྩལ་ཡོད་པ་དང་། སང་ཉིན་སླར་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སེམས་ཀྱི་སྐོར་ལ་ Spiritual Consciousness ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་པ་བཅས།

དེ་ཡང་གནས་མཆོག་རྡ་རམ་ས་ལའི་ཁོར་ཡུག་ཀུན་ཏུ་དཔྱིད་ཀྱི་དཔལ་མོའི་མཛེས་སྡུག་གི་ལང་ཚོ་མངོན་པར་བཞད་ཅིང་། སྟོད་ཀྱི་གངས་རི་དཀར་པོའི་རང་ཞལ་ཤིན་ཏུ་གསལ་ལ། གཡའ་དྭངས་པའི་ནམ་མཁར་སྤྲིན་དཀར་ཚོམ་བུར་རྒྱུ་བའི་འོག་ཏུ། གངས་འདབས་ལྗོན་པའི་ཚོགས་རྡུལ་བྲལ་གྱི་གཡུ་ལོ་ཤིན་ཏུ་མཛེས་ཤིང་། ལྗོངས་ཆེན་པོར་ཁྲི་གདུགས་ཉི་མའི་ཟེར་བརྒྱའི་གཟི་བྱིན་འཕྲོས་ཏེ་རང་བྱུང་ཁམས་ཆེན་མོའི་དཔལ་ཡོན་ལྟ་བས་ཆོག་མི་ཤེས་པ་དང་། དད་ལྡན་སེར་སྐྱ་མི་མང་གི་ནང་སེམས་སུ་རང་བཞིན་ལྷུན་གྱིས་གྲུབ་པའི་དགའ་སྣང་གིས་ཡོངས་སུ་ཁེངས་པ་དང་བཅས་ཤྲཱི་ལངྐའི་རཱ་ཇཱ་གུ་རུ་ཤྲཱི་སུ་བྷུ་ཏི་མཧཱ་བི་ཧཱ་ར་ཡའི་དགོན་པའི་གནས་བརྟན་ཝ་ས་ཀུ་བེ་མ་ཧིནྡྷ་བཾ་ས་ན་ཡ་ཀ་ཐེ་རོ་(Waskaduwe Mahindawamsa Nayaka Thero)ལགས་ཀྱིས་ཆེད་དུ་གདན་འདྲེན་ཞུས་པའི་སངས་རྒྱས་ཀྱི་རིང་བསྲེལ་རིན་པོ་ཆེ་ལྡི་ལི་ནས་མཁའ་ལམ་བརྒྱུད་གྷ་གྷལ་གནམ་ཐང་དུ་ཕེབས་པ་དང་། གནམ་ཐང་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། གླིང་མཆོག་སྤྲུལ་རིན་པོ་ཆེ་སོགས་ཀྱིས་གནས་བརྟན་ཝ་ས་ཀུ་བེ་མ་ཧིནྡྷ་བཾ་ས་ན་ཡ་ཀ་ཐེ་རོ་ལགས་དང་ལྷན་དུ་རིང་བསྲེལ་བཞུགས་སྒར་རྡ་རམ་ས་ལར་གདན་ཞུ་སྐབས། ཕེབས་ལམ་དུ་ནང་པའི་རྗེས་འཇུག་གི་སེར་སྐྱ་མི་མིང་གིས་རང་ལུགས་མནབ་བཟའ་ཡི་རྒྱན་གྱིས་སྤྲས་ཤིང་། ལག་ཏུ་བདུག་སྤོས་དང་མེ་ཏོག་ཐོགས་ཏེ་རིང་བསྲེལ་རིན་པོ་ཆེ་གདན་ཞུ་ཟབ་རྒྱས་ཞུས་པ་དང་།  ཐེག་ཆེན་ཆོས་གླིང་གཙུག་ལག་ཁང་གི་སྒོ་ཆེན་མདུན་དུ་རླངས་འཁོར་ཁ་བཀག་སྟེ། རྣམ་གྲྭ་ཕན་བདེ་ལེགས་བཤད་གླིང་པའི་དགེ་འདུན་པ་རྣམས་ཀྱིས་སེར་སྦྲེང་དང་མེ་ཏོག་གི་མཆོད་པ་ཕུལ་ཞིང་། གནས་བརྟན་མཆོག་དང་གླིང་རིན་པོ་ཆེའི་ཡང་སྲིད། དཔལ་ལྡན་སྲིད་སྐྱོང་བཅས་ཀྱིས་ཕོ་བྲང་དུ་གདན་ཞུ་ཞུས་ཡོད།

སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྔོན་ཚུད་ནས་ཕོ་བྲང་རྒྱལ་སྒོ་རུ་ཕེབས་སྒུག་ཞུས་ཡོད་པ་དང་། རིང་བསྲེལ་རིན་པོ་ཆེ་གདན་ཞུས་ཀྱིས་ཕོ་བྲང་རྒྱལ་སྒོར་འབྱོར་མཚམས་མགོན་པོ་གང་ཉིད་མཆོག་གིས་མཇལ་ཁ་ཞུས་ཤིང་། མགོན་པོ་མཆོག་གིས་གཙོས་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དང་། ཀིརྟི་སྐྱབས་མགོན་རིན་པོ་ཆེ་མཆོག གླིང་རིན་པོ་ཆེ་མཆོག དཔལ་ལྡན་སྲིད་སྐྱོང་མཆོག བཀའ་བློན་རྣམ་པ་དང་། སྤྱི་འཐུས་ཚོགས་གཙོ་གཞོན། དགའ་ལྡན་ཕོ་བྲང་ཡིག་ཚང་གི་དྲུང་ཆེ་རྣམ་པ་བཅས་ནས་ཕུན་སུམ་ཚོགས་པ་མངའ་བ་སོགས་ཀྱི་བཀྲ་ཤིས་གསུང་འདོན་གནང་སྟེ་རིང་བསྲེལ་རིན་པོ་ཆེ་ཕོ་བྲང་དུ་གདན་ཞུ་ཞུས་ཡོད།

དེ་ཡང་བདག་ཅག་གི་སྟོན་པ་དཔལ་རྒྱལ་བ་ཤཱཀྱ་ཐུབ་པའི་རིང་བསྲེལ་འདི་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དམ་རྟེན་དུ་འབུལ་ལམ་ཞུས་པའི་ངོ་སྤྲོད་ཀྱི་ནང་དུ། སངས་རྒྱས་བཅོམ་ལྡན་འདས་ཀྱི་བསྟན་པ་ལ་༸གོང་ས་མཆོག་ལས་མཛད་རྗེས་ཆེ་བ་སུ་ཡང་བྱུང་མྱོང་མེད་པ་དང་། བྱང་ཆུབ་སེམས་དཔའ་སྐུ་ཤ་རློན་པ་ཡིན་པའི་ངོས་འཛིན་དང་འབྲེལ། ཤྲཱི་ལངྐའི་དགེ་འདུན་པ་ཡོངས་རྫོགས་ཀྱི་ཚབ་ཞུས་ཏེ་ཕྱི་ལོ་ ༢༠༡༧ ལོར་༸གོང་ས་མཆོག་ལ་འབུལ་ལམ་ཞུ་རྒྱུ་ཐག་གཅོད་བྱུང་ཡོད་པ་ཞིག་ཡིན་འདུག་པ་དང་། རིང་བསྲེལ་འདི་ནི་རྒྱ་གར་དབྱིན་ཇིའི་འོག་ཏུ་ཡོད་སྐབས་ཝིལ་ཡམ་པེ་པེ་(William C Peppé)ཞེས་པའི་དབྱིན་ཇི་བ་ཞིག་གིས་སངས་རྒྱས་བཅོམ་ལྡན་འདས་སྐུ་བལྟམས་སའི་གནས་མཆོག་སེར་སྐྱའི་གྲོང་ནས་རྙེད་སོན་བྱུང་འདུག་པ་དང་། ཕྱི་ལོ་ ༡༨༩༨ ལོར་ཤྲཱི་ལངྐའི་གནས་བརྟན་སུ་བྷུ་ཏི་མཧཱ་ནཱ་ཡ་ཀེ་ཐེ་རོ་(Subhuthi Mahanayake Thero)lgs ལ་གནང་སྟེ། ད་ལྟའི་བར་དུ་རཱ་ཇཱ་གུ་རུ་ཤྲཱི་སུ་བྷུ་ཏི་མཧཱ་བི་ཧཱ་ར་ཡའི་དགོན་པའི་རྟེན་གཙོར་བཞུགས་སུ་གསོལ་བ་ཞིག་ཡིན་པ་བཅས།

• གསར་འགོད་གསལ་བསྒྲགས།

སིངྒ་ལའི་ཌོག་ཊར་ཝ་སི་ཌོ་ཝེ་མ་ཧིནྡྷ་ཝན་ས་མཧཱ་ན་ཡ་ཀེ་ཐེ་རོ་(Ven. Dr. Waskaduwe Mahindawansa Mahanayake Thero)མཆོག་གིས། ལོ་ཤས་རིང་ང་ཚོས་འཛམ་གླིང་འདིར་ཞི་བདེ་དང་། བྱམས་བརྩེ། སྙིང་རྗེ་བཅས་ཀྱི་མཚོན་བྱེད་དུ་གྱུར་པའི་བོད་ཀྱི་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་ལ་སངས་རྒྱས་ཀྱི་རིང་བསྲེལ་རྩ་ཆེན་ཞིག་འབུལ་རྒྱུའི་འདུན་པ་ཤུགས་ཆེན་བཅངས་ཡོད། ༸གོང་ས་མཆོག་གིས་ལོ་རྒྱུས་ཀྱི་ནང་དུ་ནང་པའི་ཆེད་དུ་བསྒྲུབས་པའི་མཛད་རྗེས་ནི་སུ་ལས་ཀྱང་མང་བ་རེད། ༸གོང་ས་མཆོག་ནི་བྱང་ཆུབ་སེམས་དཔའ་གསོན་པོ་ཞིག་དང་། འཛམ་གླིང་གི་ནང་པའི་སྤྱི་ཚོགས་ཁྲོད་དུ་གཅེས་པར་འོས་པའི་ཆོས་ཀྱི་དབུ་ཁྲིད་ཅིག་ཡིན་པའི་ངོས་འཛིན་བྱེད་པ་དང་འབྲེལ། རྒྱ་གར་དུ་དབྱིན་ཇིའི་དབང་སྒྱུར་སྐབས་སུ་པི་ར་ཧ་ས་ཁུལ་ས་འོག་ནས་བཏོན་པའི་སྐུ་གདུང་དེ་གུས་བཀུར་དང་ཆེ་མཐོང་ཆེན་པོས་༸གོང་ས་མཆོག་ལ་འབུལ་རྒྱུ་ཡིན།

༸གོང་ས་མཆོག་གིས་སྙིང་རྗེ་དང་། ཤེས་རབ། ཞི་བདེ་ལྟ་བུའི་ནང་པའི་བསླབ་བྱ་གཙོ་བོ་རྣམས་དངོས་སུ་བསྟན་ཡོད་པས། ཁོང་ནི་མཆོད་པ་དམ་པ་འདི་འབུལ་ཡུལ་ཡག་ཤོས་དེ་ཡིན། ༸གོང་ས་མཆོག་ནི་སངས་རྒྱས་ཀྱི་བསྟན་པ་དང་དེའི་བསྟན་འཛིན་སྐྱེས་ཆེན་རྣམས་ཀྱི་རྣམ་ཐར་མཚོན་བྱེད་ཀྱི་སྐྱེས་བུ་དམ་པ་ཞིག་ཡིན་པས་ང་ཚོས་༸གོང་ས་མཆོག་ལ་བཀའ་དྲིན་འཁོར་ཐབས་ཤིག་ཞུ་དགོས་སྙམ་པའི་རེ་འདུན་དྲག་པོས་རིང་བསྲེལ་འདི་འབུལ་བཞེས་ཞུ་རྒྱུ་བྱུང་བ་ཡིན།

ངས་སིངྒ་ལའི་དགེ་འདུན་པའི་སྤྱི་ཚོགས་ཧྲིལ་པོའི་ཚབ་བྱས་ཏེ་རྩ་ཆེའི་རིང་བསྲེལ་འདི་༸གོང་ས་མཆོག་ལ་འབུལ་བཞིན་ཡོད། སིངྒ་ལའི་བོད་པ་ནང་པའི་མཆེད་གྲོགས་ཚོགས་པ་གསར་འཛུགས་བྱེད་མཁན་གྱི་ཚོགས་གཙོ་ཌོག་ཊར་ཌ་མན་ཌ་པོ་རཱ་ཇེ་ཡིས་ཕྱི་ལོ ༢༠༡༧ ལོར་ང་ལ་༸གོང་ས་མཆོག་ལ་སེར་སྐྱའི་རིང་བསྲེལ་ཞིག་འབུལ་བའི་དགོངས་འཆར་བཏོན་སོང་། ལོ་ངོ་དྲུག་གི་འཆར་འགོད་དང་གྲ་སྒྲིག་གི་རྗེས་སུ། ང་ཚོས་མཐའ་མར་རེ་འདུན་དེ་སྒྲུབ་ཐུབ་སོང་། སྐྱབས་རྗེ་གླིང་རིན་པོ་ཆེ་མཆོག་ ༢༠༢༢ ལོར་སིངྒ་ལར་ཆིབས་བསྒྱུར་ཐོག་མར་བསྐྱངས་སྐབས་ཕྲན་ནས་༸གོང་ས་མཆོག་གི་ལས་ཁུངས་དང་འབྲེལ་ལམ་ཇི་ལྟར་བྱེད་དགོས་སྐོར་བཀའ་སློབ་ཞུས་པར་ཁོང་ནས་ཐུགས་བརྩེ་བ་ཆེན་པོས་ཞལ་བཞེས་གནང་ཞིང་ཕྱག་རོགས་གནང་རྒྱུའི་ཐུགས་ཐག་བཅད་གནང་།

རྒྱ་གར་ལ་དབྱིན་ཇིས་དབང་སྒྱུར་བྱེད་སྐབས་པི་ར་ཧྭའི་ས་དོང་ནང་ནས་རྙེད་པའི་རྩ་ཆེའི་རིང་བསྲེལ་འདི་དག་ལ་འཛམ་གླིང་གི་ནང་པ་ས་ཡ་མང་པོར་དོན་སྙིང་ཆེན་པོ་ཞིག་ཡིན། དབྱིན་ཇིའི་དཔོན་རིགས་ཝེ་ལེམ་ཕེ་པེས་ཀྱིས ༡༨༩༨ ལོར་རྩ་ཆེའི་རིང་བསྲེལ་ངོ་མ་འདི་དག་སིངྒ་ལའི་མཁས་པ་ཝ་ས་ཌུ་བེ་ཤི་རི་སུ་བྷུ་ཐི་མ་ཧཱ་ན་ཡ་ཀེ་ཐེ་རོ་ལ་ཕུལ་བ་རེད། སངས་རྒྱས་ཀྱི་རིང་བསྲེལ་འདི་དག་ནི་སེར་སྐྱའི་གྲོང་ཁྱེར་དུ་བཞུགས་པའི་སངས་རྒྱས་ཀྱི་གཉེན་ཉེ་ཤཱཀྱ་པ་རྣམས་ཀྱིས་པི་ར་ཧྭའི་ས་དོང་ནང་ལ་སྦས་པ་ཞིག་རེད།

དགའ་སྤྲོ་དང་ཡིད་ཚིམས་པའི་ཚོར་སྣང་ཆེན་པོ་ཞིག་གི་ངང་ནས་ངས་ཡུན་རིང་ནས་རེ་སྒུག་བྱས་པའི་ཆེས་གཅེས་པའི་གོ་སྐབས་དེ་དེ་རིང་གསལ་བསྒྲགས་བྱེད་ཀྱི་ཡོད། ང་ཚོས་ལོ་མང་པོའི་རིང་ལ་གཡོ་བ་མེད་པའི་འབད་བརྩོན་དང་འདོད་པ་དྲག་པོ་ཞིག་གི་སྒོ་ནས་སངས་རྒྱས་ཤཱཀྱ་ཐུབ་པའི་རིང་བསྲེལ་རིན་པོ་ཆེ་འདི་༸གོང་ས་སྐུ་ཕྲེང་བཅུ་བཞི་པ་ཆེན་པོར་ཕུལ་བའི་རེ་འདུན་དེ་མཐར་མངོན་འགྱུར་བྱུང་ཡོད། ༸གོང་ས་མཆོག་གིས་སངས་རྒྱས་ཀྱི་བསྟན་པ་དང་། འགྲོ་བ་སེམས་ཅན་ཐམས་ཅད་ལ་ཞབས་འདེགས་བླ་ན་མེད་པ་ཞུས་པ་ལ་ཐུགས་རྗེ་ཆེ་ཞུ་རྒྱུའི་གོ་སྐབས་འདི་བདག་གིས་དམན་ས་བཟུང་ནས་དགའ་སྤྲོའི་ངང་ནས་ཞུ་རྒྱུ་ཡིན།

ཚིག་གིས་བརྗོད་མི་ནུས་པའི་༸ཏཱ་ལའི་བླ་མའི་ཁྱད་དུ་འཕགས་པའི་ཡོན་ཏན་ནི། ཉི་མའི་འོད་ཟེར་གྱིས་ཕྱོགས་ཐམས་ཅད་དུ་ཕྱོགས་རིས་མེད་པར་འོད་དང་དྲོད་དང་སྲོག་སྟེར་བ་དང་མཚུངས། རྗེ་ཉིད་ཀྱིས་གཙོས་བདག་ཅག་རྣམས་ལ་རང་དོན་ཡལ་བར་དོར་ནས་བྱིན་གྱིས་བརླབས་པའི་གྲོགས་མཛད་པ་དེ་དག་ཐམས་ཅད་ཀྱི་བསོད་ནམས་ཀྱི་ཚོགས་ཐོབ་པར་གྱུར་ཅིག། སིངྒ་ལའི་ཨ་མ་ར་པུར་མ་ཧཱ་ནི་ཀ་ཡའི་ཤྲི་སམ་བུདྷ་ས་ས་ནོ་དྷ་ཡ་སངྒ་ས་བྷ་མ་ཧཱ་ན་ཡ་ཀེ་ཐེ་རོའི་བླ་མ་མཁས་དབང་ཝ་སི་ཀ་དྷུ་ཝེ་མ་ཧིན་དྷ་ཝན་ས་ཨ་ཧ་ན་ཡ་ཀེ་ཐེ་རོ་ལགས་
'Sabbe satta bhavantu sukhitatta' Most Ven. Dr. Waskaduwe Mahindawansa ahanayake Thero Mahanayake Thero of Sri Sambuddha Sasanodaya Sangha Sabha of Sri Lanka Amarapura Maha Nikaya སོགས་ཀྱི་ལམ་སྟོན་དང་རྒྱབ་སྐྱོར་རིན་ཐང་མེད་པ་དེས་མཆོད་པ་འདི་དངོས་སུ་གྲུབ་པར་བྱས་ཡོད།

དེ་ཡང་སྔ་དྲོ་ཆུ་ཚོད་༧།༤༠ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་གཟིམ་ཆུང་ནས་ཀོར་ཧྥུ་རླངས་འཁོར་(Golf cart)ལ་བཞུགས་སྟེ་ཕོ་བྲང་རྒྱལ་སྒོ་ཕེབས་མཚམས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཕེབས་བསུའི་མཇལ་ཁ་ཞུས་པ་དང་། རྣམ་གྲྭའི་སྤྱན་རྒྱ་སྤོས་འཛིན་དང་། སྦྱིན་བདག་ཁག་གཉིས་ཀྱིས་འཐུས་མི་དྲུག་ནས་སྤོས་སྣེ། དད་ལྡན་སེར་སྐྱ་མི་མང་ནས་རང་ལུགས་གཟབ་འཕྱོར་སྤྲས་ཏེ་ཕེབས་བསུ་དང་བཅས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་གྱིས་བཞུགས་ཁྲིར་༸ཞབས་སོར་འཁོད་མཚམས་གླིང་མཆོག་སྤྲུལ་རིན་པོ་ཆེས་མཇལ་དར་རྐྱང་འབུལ་དང་། ཚོགས་མང་ནས་༸རྒྱལ་བའི་འཁྲུངས་རབས་གསོལ་འདེབས་གསུང་མུར་གསོལ་འབྲས་རིམ་པར་ཕེབས་རྗེས་བརྟན་བཞུགས་དངོས་གཞིར་བླ་མ་ལྷར་བསྐྱེད། མཆོད་བསྟོད་ཚེ་འགུགས་བཟླས་པ་ཡན་སོང་མཚམས་ཙ་རུའི་ཚོགས་འཁོར་འབུལ་བཞེས་གནང་བ་སོགས་བརྟན་བཞུགས་ཀྱི་ཆོ་ག་རིམ་པར་བསྐྱངས་ཤིང་། དབུ་བཞུགས་རྡོ་རྗེ་སློབ་དཔོན་ནས་མཇལ་ཞུ་གྲུབ་པ་དང་གླུ་དབྱངས་མཆོད་འབུལ་དང་། འཁྲུལ་ཞིག་རིན་པོ་ཆེའི་ཡང་སྤྲུལ་རྣམ་གཉིས་གཙོས་བརྟན་བཞུགས་སྦྱིན་བདག་འཐུས་མི་ ༡༥ ཙམ་ནས་མཇལ་ཁ་ཞུས།

མཐར་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་གཉིས་ནས་གཏང་རག་མཎྜལ་ཚོམ་བུ་དང་། རྟེན་གསུམ་འདེགས་འབུལ་གྱིས་ཉི་གཞོན་འཆར་ཀ་མ་དང་རིས་མེད་བསྟན་རྒྱས་སྨོན་ལམ་སོགས་གསུངས་གྲུབ་མཚམས་བཀའ་སློབ་སྩལ་དོན། བརྟན་བཞུགས་བསམ་པ་རྣམ་དག་དང་། སྦྱོར་དངོས་རྗེས་གཙང་ཧ་ཅང་ཡག་པོ་བྱུང་སོང་། ངོས་རང་ལ་ཆ་བཞག་ན་ལོ་བརྒྱ་ཕྲག་ལ་སྡོད་ཐུབ་པའི་སྨོན་ལམ་རྒྱག་གི་ཡོད་ལ། སེམས་ཤུགས་ཀྱང་བསྐྱེད་ཀྱི་ཡོད། གང་ལྟར་འཛམ་གླིང་འདིར་སངས་རྒྱས་ཀྱི་བསྟན་པ་ཏོག་ཙམ་རྒུད་འགྲོ་བའི་དུས་ཚོད་ལ་ངོས་ཀྱིས་བསྟན་པའི་ཞབས་འདེགས་ཕྲན་བུ་སྒྲུབ་ཐུབ་པའི་ཕྱི་ནང་གི་རྐྱེན་མང་པོ་ཞིག་འདུག དེ་སྔ་ནང་པའི་ཆོས་དམིགས་བསལ་དར་ཁྱབ་མེད་པའི་ས་ཁུལ་དུའང་། དེང་སང་དོ་སྣང་གསར་པ་ཞིག་སླེབས་ཡོད། ལྷག་པར་དུ་ཚན་རིག་པ་ཆོས་ཁས་མི་ལེན་མཁན་མང་པོ་ཞིག་གིས་ཧ་ཅང་དགའ་བོ་བྱེད་ཀྱི་འདུག ཆོས་ཁས་ལེན་མཁན་དང་། ཆོས་ཁས་མི་ལེན་མཁན་ཚང་མས་སེམས་ཀྱི་ཞི་བདེ་རྒྱུད་དེ་འཛམ་གླིང་ཞི་བདེ་ཡོང་བར་དམིགས་བསལ་དོ་སྣང་ཞིག་བྱེད་བཞིན་ཡོད། དེར་དོ་སྣང་བྱེད་པའི་ཚན་རིག་པ་མང་པོ་ཞིག་ངོས་ཀྱི་གྲོགས་པོ་ཆགས་ཡོད། མང་པོ་ཞིག་གིས་དམིགས་བསལ་གྱིས་དོ་སྣང་དང་དགའ་བོའང་བྱེད་ཀྱི་འདུག

བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག། ཅེས་སྨོན་ལམ་འདི་རྒྱག་བཞིན་ཡོད། ངོས་ཀྱི་མི་ཚེར་ཆ་བཞག་ན་ཉེ་ཆར་རང་ཨེམ་ཆི་ལ་བསྟན་པ་ཡིན། གཟུགས་པོ་ཧ་ཅང་ཡག་པོ་འདུག་ཟེར། ལོ་བཅོ་ལྔ་ཉི་ཤུར་ངོས་རང་ཕལ་ཆེར་སྡོད་ཀྱི་རེད། འཛམ་གླིང་འདིའི་སྟེང་ངོས་ཀྱིས་སྤྱིར་ཡ་རབས་ཀྱི་སྤྱོད་བཟང་དང་། བྱེ་བྲག་ཏུ་སངས་རྒྱས་པའི་ཆོས་ལས་སེམས་ཁམས་རིག་པ་དང་འབྲེལ་བའི་ཐོག་ནས་འཛམ་གླིང་ཞི་བདེ་ཡོང་བར་ཞབས་འདེགས་གང་འཚམ་སྒྲུབ་ཐུབ་པ་ལྟ་བུ་འདུག

ཆོས་སྐྱོང་ཚོ་གཙོ་བོར་གྱུར་པའི་བསྟན་པའི་ཁུར་བཞེས་མཁན་ཚང་མས་ངོས་ཀྱིས་བསྟན་པའི་ཞབས་འདེགས་སྒྲུབ་པ་ལ་ཆ་རྐྱེན་ཡོད་པར་གཟིགས་ཡོད་པས་ཚང་མས་ངོས་ལ་ཕྱར་བ་གྲུ་འདེགས་ཏན་ཏན་གནང་གི་རེད། དེར་བརྟེན། ངོས་ལ་ཆ་བཞག་ན་བསམ་པ་རྣམ་དག་གིས་བྱེད་བཞིན་ཡོད། དེ་ལྟར་ཡིན། ཚང་མར་བཀྲ་ཤིས་བདེ་ལེགས། ཞེས་བཀའ་སློབ་སྩལ་རྗེས་བརྟན་བཞུགས་ཀྱི་མཛད་རིམ་ལེགས་པར་གྲུབ་སྟེ་བཞུགས་སྒར་ཕོ་བྲང་དུ་ཆིབས་བསྒྱུར་བསྐྱངས་ཡོད། བརྟན་བཞུགས་མཛད་སྒོར་འདིར་རྡོ་རྗེ་སློབ་དཔོན་གླིང་རིན་པོ་ཆེའི་ཡང་སྲིད་དང་། འཁྲུལ་ཞིག་རིན་པོ་ཆེའི་ཡང་སྲིད་རྣམ་གཉིས། བོ་དོང་པཎ་ཆེན་གྱི་ཡང་སྤྲུལ། ཇོ་ནང་རྒྱལ་ཚབ་རིན་པོ་ཆེ། ཀུན་བདེ་གླིང་རིན་པོ་ཆེ། བློ་གླིང་མཁན་རིན་པོ་ཆེ། སེར་སྨད་མཁན་རིན་པོ་ཆེ། བྱ་དོ་རིན་པོ་ཆེ། ཆུ་བཟང་རིན་པོ་ཆེ་སོགས་མཁན་བླ་སྤྲུལ་དང་། དགེ་འདུན་པ་དང་བཙུན་མ། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་གིས་གཙོས་ཤེས་རིག་བཀའ་བློན་དང་། ཕྱི་དྲིལ་བཀའ་བློན། སྤྱི་འཐུས་ཚོགས་གཙོ་གཞོན། སྤྱི་འཐུས་རྒྱུན་ལས་རྣམ་པ། བོད་མིའི་སྒྲིག་འཛུགས་ཀྱི་དྲུང་ཆེ་ཆུང་གིས་གཙོས་སྲི་ཞུའི་ལས་བྱེད་སོགས་གཞུང་ཞབས་རྣམ་པའི་གཙོས་སེར་སྐྱ་སྟོང་ཕྲག་བརྒལ་བ་ཕེབས་ཡོད་པ་བཅས།།

དེ་ཡང་གསུང་འཕྲིན་ནང་མགོན་པོ་མཆོག་གིས། ངོས་ཀྱིས་འདས་པོ་དམ་པ་ཁོང་གི་ཆེད་བསྔོ་སྨོན་དང་། རཱ་མ་ཀྲྀཥྞ་ཚོགས་པའི་འབྲེལ་ཡོད་རྣམ་པ་གཙོས་པའི་ཁོང་གིས་རྗེས་འཇུག་གདུལ་བྱ་རྣམས་ལ་ཐུགས་གསོ་ཞུ་རྒྱུ་ཡིན།

དམ་པ་ཁོང་གིས་གཞན་ཕན་གྱི་ཞབས་ཞུ་བསྒྲུབས་ཏེ་སྐུ་ཚེ་དོན་དང་ལྡན་པ་སྐྱེལ་བ་ནི་ངོ་མཚར་སྐྱེ་འོས་པ་ཞིག་རེད། ངོས་ཀྱིས་དམ་པ་ཁོང་གི་རྗེས་འཇུག་རྣམས་དང་ལྷན་དུ་ཁོང་ལ་བསྔོ་སྨོན་ཞུ་རྒྱུ་ཡིན། ཞེས་བཀའ་སྩལ་ཡོད།

དེ་ཡང་སྔ་དྲོ་ཆུ་ཚོད་ ༨།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གཟིམ་ཆུང་ནས་མཇལ་འཕྲད་ཚོགས་ཁང་དུ་ཆིབས་བསྒྱུར་གྱིས་༸ཞབས་སྟེགས་སུ་འཁོད་མཚམས་འབུམ་རམས་པ་Philip P.Distefano ལགས་ཀྱིས་ཕེབས་བསུའི་གསུང་བཤད་གནང་བ་དང་། བགྲོ་གླེང་མདོ་འཛིན་པ་འབུམ་རམས་པ་sona Dimidjian ལགས་ཀྱིས་བགྲོ་གླེང་དབུ་འཛུགས་ཀྱི་གསུང་བཤད་གནང་མཚམས་༸གོང་ས་མཆོག་གིས་འགྲོ་བ་མིའི་རིགས་ནི་གཞི་རྩའི་ཆ་ནས་གཅིག་མཚུངས་ཡིན་པ་དང་། མའི་མངལ་ལས་སྐྱེས་རྗེས་ཨ་མའི་བྱམས་བརྩེ་ལ་བརྟེན་ནས་འཚར་ལོངས་བྱུང་ཡོད་པ་དང་། ཆུང་བྱིས་པའི་དུས་སུ་ཆོས་ལུགས་དང་མི་རིགས། རྒྱལ་ཁབ་སོགས་ཀྱི་དབྱེ་འབྱེད་མེད་པར་སེམས་ཧ་ཅང་གཙང་མ་ཡིན་པ་མ་ཟད། ཆོས་ལུགས་དང་རིགས་རྒྱུད་མི་གཅིག་པའི་ཕྲུ་གུ་ཚོ་མཉམ་དུ་རྩེད་མོ་རྩེས་ནས་ཧ་ཅང་ལྷད་མེད་དང་བྱམས་བརྩེ་ལྡན་པ་ཡིན་པའི་སྐོར་བཀའ་གནང་བ་དང་།

གཞན་ཡང་། མི་རྣམས་འཚར་ལོངས་ཀྱི་རིམ་པའི་ནང་དུ་མི་རིགས་དང་ཆོས་ལུགས་ཀྱི་དབྱེ་འབྱེད་ཀྱི་ཚོར་བ་སླེབས་པ་ནས་དཀའ་རྙོག་མང་པོ་ཞིག་དང་འཕྲད་བཞིན་ཡོད་སྐོར་སོགས་འགྲོ་བ་མིར་གཅིག་མཚུངས་ཀྱི་འདུ་ཤེས་འཛིན་རྒྱུ་ཧ་ཅང་གལ་ཆེན་པོ་ཡིན་པའི་སྐོར་ལ་བཀའ་སློབ་སྩལ་བ་དང་། དྲི་བ་དྲིས་ལན་གྱི་སྐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ན་ཕྲ་མོའི་སྐབས་བོད་ལ་དཀའ་ངལ་ཧ་ཅང་ཆེན་པོ་འཕྲད་སྐབས་བྱམས་བརྩེའི་ཉམས་ལེན་རྒྱུན་སྐྱོང་ཇི་ལྟར་མཛད་པའི་སྐོར་སོགས་དྲི་བ་ཁག་ལ་བཀའ་ལན་སྩལ་རྗེས་ཉིན་དང་པོའི་བགྲོ་གླེང་གནང་སྒོ་ལེགས་པར་གྲུབ་ཡོད། ཚེས་ ༢༡ ཉིན་སྤྱི་ཚོགས་ཀྱི་སྣེ་ཁྲིད་འགན་ཁུར་ལེན་མཁན་ལ་བྱམས་བརྩེས་ཕན་ནུས་གང་ཡོད་ཀྱི་སྐོར་སོགས་ལ་བཀའ་སློབ་དང་དྲི་བར་བཀའ་ལན་སྩལ་རྒྱུ་ཡིན་པ་རེད།

ཏཱ་ལའི་བླ་མ་ཧྥུ་ལོ་ཞེས་པའི་ལས་གཞི་འདི་ནི་ཕྱི་ལོ་ ༢༠༡༠ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱབ་སྐྱོར་མཛད་ནས་གསར་གཏོད་བྱས་པ་ཞིག་ཡིན་པ་དང་། ལས་གཞི་འདིར་རྒྱལ་ཁབ་ ༥༦ ནས་སློབ་ཕྲུག་ ༢༠༠ ཙམ་གྱིས་མཉམ་ཞུགས་གནང་སྟེ། རྒྱལ་སྤྱིའི་སྟེང་སྣེ་ཁྲིད་ཀྱི་ནུས་པ་ལྡན་པའི་མི་སྣ་བསྡུ་རུབ་དང་། འབྲེལ་བ་དམ་ཟབ་དང་སྤྱོད་བཟང་གོང་སྤེལ་གྱི་ཐད་འབད་བརྩོན་ཞུ་བཞིན་པ་ཞིག་ཡིན་པ་རེད།

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་བཞུགས་སྒར་ཕོ་བྲང་དུ་ཧི་མ་ལ་ཡའི་རི་རྒྱུད་བལ་ཡུལ་དང་། འབྲུག མོན། ལ་དྭགས། འབྲས་ལྗོངས། ཁུ་ནུ། སྤྱི་ཏི། གར་ཞ་སོགས་དང་། གཞན་ཡང་། སོག་ཡུལ་དང་། ཨུ་རུ་སུ། འཇར་མན། ཨ་རི། ཝེ་དི་ནམ། ནེའུ་ཛི་ལེནྜ། མེཀ་སི་ཁོ། ནེ་དར་ལེནྜ། དབྱིན་ཡུལ། ལྷོ་ཀོ་རི་ཡ་སོགས་ཡུལ་གྲུ་འདྲ་མིན་ནས་ཕེབས་པའི་དགེ་ཚུལ་བསྒྲུབ་བྱ་ ༡༥༣ དང་། བསྙེན་རྫོགས་བསྒྲུབ་བྱ་ ༣༠༠ ཐམ་པ་ལ་ད་ཆོག་ཉེས་མེད་ཕུན་ཚོགས་ཀྱི་སྒོ་ནས་ཚིགས་སྔ་ཕྱིའི་བསླབ་སྡོམ་རྣམ་པར་དག་པ་སྩལ་ཡོད་པ་རེད།

དེ་ཡང་ཞོགས་པའི་ཆུ་ཚོད་ ༧།༣༥ ཙམ་ལ་རྡ་རམ་ས་ལའི་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་གྱིས་གསུང་ཆོས་ར་བའི་བཞུགས་ཁྲིར་༸ཞབས་སོར་འཁོད་མཚམས་ཤེས་རབ་སྙིང་པོ་སོགས་ཞལ་འདོད་ཁག་གསུང་འདོན་དང་འབྲེལ། བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ཐར་ལམ་སྒྲོལ་མ་མཆོག་གིས་མནྜལ་རྟེན་གསུམ་འདེགས་འབུལ་ཞུས་ཤིང་། རྒྱུད་སྟོད་མཁན་རིན་པོ་ཆེ་དང་། བློ་གླིང་མཁན་རིན་པོ་ཆེ། རྣམ་གྲྭ་མཁན་རིན་པོ་ཆེ། སྨོན་ལམ་ཆེན་མོའི་བྱིངས་འདྲེན་སོགས་ནས་མཇལ་ཁ་ཞུས་རྗེས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སངས་རྒྱས་ཆོས་ཚོགས་མ་ཚར་གསུམ་གསུང་འདོན་རྗེས་བཀའ་སློབ་སྩལ་དོན།

དེ་རིང་འདིར་འཆར་ཅན་ལྟར་གསུང་ཆོས་ར་བར་གསུང་ཆོས་བྱེད་པ་ཞིག་རེད། གང་ལྟར་འཛམ་གླིང་འདིར་རིམ་བཞིན་ཆོས་ལ་དོ་སྣང་ཆེ་རུ་འགྲོ་བཞིན་འདུག དངོས་པོ་ཡར་རྒྱས་རྐྱང་པར་དམིགས་མཁན་ཚོས་ཀྱང་གཞི་ནས་སེམས་ལ་ཞི་བདེ་དགོས་པ་གལ་ཆེན་པོར་བརྩི་བཞིན་ཡོད། ཆོས་ལུགས་ཚང་མའི་ནང་དུ་དཀོན་མཆོག་ལ་དད་པ་བྱེད་པ་གསུངས་ཡོད་ཅིང་། དེས་སེམས་ལ་ཞི་བདེ་ཡོང་བར་ཕན་ཐོགས་ཡོད་པ་རེད། ཡིན་ནའང་། སེམས་ཁམས་རིག་པ་དང་འབྲེལ་ནས་སེམས་ཀྱི་ཞི་བདེ་བཟོ་བ་ལ་ཕལ་ཆེར་ནང་པའི་ཆོས་ཟབ་ཤོས་ཆགས་ཡོད། ངོས་ཀྱིས་ངོ་ཤེས་པ་ཚན་རིག་པ་མང་པོའི་ནང་སེམས་ཁམས་རིག་པ་དང་འབྲེལ་སེམས་ཀྱི་ཞི་བདེའི་ཐོག་ལ་དོ་སྣང་བྱེད་མཁན་ཇེ་མང་ཇེ་མང་ལ་འགྲོ་བཞིན་པ་ཞིག་རེད། ང་ཚོའི་སངས་རྒྱས་པའི་ཆོས་ནི་སེམས་ཁམས་རིག་པ་དང་འབྲེལ་བའི་ཐོག་ནས་སེམས་ཀྱི་ཞི་བདེ་སྒྲུབ་ཀྱི་ཡོད། དངོས་པོ་ཡར་རྒྱས་ཕྱིན་ནས་འགྱུར་བ་འགྲོ་གི་ཡོད་ཀྱང་། སེམས་ཁམས་རིག་པ་དང་འབྲེལ་བའི་ཐོག་ནས་སེམས་ཀྱི་ཞི་བདེ་སྒྲུབ་རྒྱུ་ནི་ཕལ་ཆེར་དངོས་ཡོད་གནས་ཚུལ་ཞིག་དང་། ཚན་རིག་དང་མཐུན་པ་ཞིག་ཡིན།

ང་ཚོ་བོད་གངས་ཅན་གྱི་ལྗོངས་ལ་ཡོད་པའི་སངས་རྒྱས་པའི་ཆོས་འདི་ནི་སེམས་ཁམས་རིག་པ་དང་འབྲེལ་བའི་ཐོག་ནས་སེམས་ཀྱི་ཞི་བདེ་སྒྲུབ་པ་ལ་མ་འདྲ་བ་ཞིག་རེད། ངོས་ཀྱི་ངོ་ཤེས་པའི་ནང་ཆོས་དད་ཆེན་པོ་ཡོད་མཁན་མང་པོ་ཡོད། ཡིན་ནའང་། སེམས་ཀྱི་ཞི་བདེ་ཇི་ལྟར་སྒྲུབ་དགོས་པའི་ཐོག་ལ་དཀོན་མཆོག་ལ་སྨོན་ལམ་བརྒྱབ་སྡོད་པ་ཙམ་མ་གཏོགས་སེམས་ཁམས་རིག་པ་དང་འབྲེལ་བའི་ཐོག་ནས་སྒྲུབ་པ་ནི་ནང་པ་སངས་རྒྱས་པའི་ཆོས་ལུགས་དང་། དེའི་ནང་ཚན་ནས་དཔལ་ནཱ་ལེནྡྲའི་ཆོས་བརྒྱུད་ཟབ་ཤོས་ཆགས་འདུག དེང་སང་ཚན་རིག་པའི་ནང་ཆོས་དད་མེད་ནའང་སེམས་ཀྱི་ཞི་བདེ་སྒྲུབ་པ་ལ་ཐུགས་འདོད་གསར་པ་ཞིག་ཡོང་གི་ཡོད། སེམས་རྒྱུད་ཀྱི་ཞི་བདེ་དཀྲུགས་མཁན་ཆགས་སྡང་གཉིས་པོ་ཆགས་ཡོད་པས། ཆགས་སྡང་ཤུགས་ཆུང་དུ་གཏོང་དགོས།

གཙོ་བོ་སྙིང་རྗེའི་བློ་རེད།  དབུ་མ་འཇུག་པ་ལས། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདིའི།། ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ།། ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་པ།། དེ་ཕྱིར་བདག་གིས་ཐོག་མར་སྙིང་རྗེ་བསྟོད་པར་བགྱི།། ཞེས་དཔལ་ལྡན་ཟླ་བ་གྲགས་པས་དབུ་མ་འཇུག་པའི་མཆོད་བརྗོད་དུ་སྙིང་རྗེ་ལ་བསྟོད་པ་གནང་ཡོད། སློབ་དཔོན་དབྱིག་གཉེན་ལ་སོགས་པ་སྔོན་གྱི་མཁས་པ་ཚོས་གཞུང་མཛད་པའི་ནང་དུ། རྟོག་པའི་དྲ་བ་རྣམ་བསལ་ཅིང་།། ཞེས་སོགས་ཀྱི་མཆོད་བརྗོད་མཛད་ཡོད་ཀྱང་། སྙིང་རྗེ་ཆེན་པོ་ལ་དམིགས་བསལ་གྱིས་མཆོད་བརྗོད་མཛད་མཁན་ནི་ཟླ་བ་གྲགས་པའི་གཞུང་འདི་རེད། སྙིང་རྗེ་ནི་ཧ་ཅང་གལ་ཆེན་པོ་རེད། དེ་ཡིས་ཆོས་དད་མེད་མཁན་དང་། དུད་འགྲོ་ཚུན་ཆད་ནས་ཕན་ཚུན་ལ་བརྩེ་བ་བྱེད་པ་དང་། རོགས་བྱེད་པ། གནོད་པ་མི་བྱེད་པ་ཞིག་ཡོང་གི་ཡོད་པས་སྙིང་རྗེ་ནི་ཧ་ཅང་གལ་ཆེན་པོ་རེད། དེང་གི་འཛམ་གླིང་འདིར་འཚེ་བ་ཆོས་སུ་སྨྲ་བ་ལྟ་བུ་ཆགས་ཡོད་པས་སྙིང་རྗེའི་བློ་ནི་ཧ་ཅང་གལ་ཆེན་པོ་རེད།

ངོས་རང་ལ་མཚོན་ན་ཞོགས་པ་ཡར་ལངས་པ་དང་སྙིང་རྗེའི་བློ་ལ་བསམ་བློ་གཏོང་གི་ཡོད། ནང་པ་སངས་རྒྱས་པའི་ཐུན་མོང་མ་ཡིན་པའི་འགྲོ་སྟངས་ནི་སྟོང་ཉིད་ཀྱི་ལྟ་བ་རེད། སྙིང་རྗེའི་བློ་དང་གཉིས་སུ་མེད་བློ། ཅེས་པ་ལྟར་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་ངོས་ཀྱིས་ཉིན་ལྟར་བསམ་བློ་གཏོང་གི་ཡོད། དེས་སེམས་ལ་ཧ་ཅང་ཕན་གྱི་འདུག དངོས་གནས་སེམས་ལ་ཞི་བདེ་དེའི་ཐོག་ནས་ཡོང་གི་འདུག ངོས་ཀྱིས་འཆར་ཅན་ཞུ་བཞིན་པ་ལྟར། ཚེ་སྒྲུབ་ཀྱི་མཆོག་ཀྱང་རེད། སེམས་ལ་ཞི་བདེ་ཡོད་ན་སེམས་འཁྲུག་གི་མེད། སེམས་མ་འཁྲུག་ན་ལུས་ཀྱི་འབྱུང་བ་སྙོམས་ཤིང་། དེའི་ཐོག་ནས་མི་ཚེ་རིང་པོར་སྡོད་ཐུབ་པ་ཞིག་རེད། སེམས་ཀྱི་ཞི་བདེ་མེད་པར་འབྱུང་བ་འཁྲུག་ནས་ལུས་མ་བདེ་བ་ཆགས་ཡོང་སྐབས་ཟུར་དུ་ཚེ་སྒྲུབ་དང་ཚེ་རིལ་ཟ་བ་སོགས་ཡོང་གི་ཡོད་ཀྱང་། དེ་ཙམ་ནུས་པ་ཆེན་པོ་ཁག་པོ་རེད། སེམས་ཀྱི་ཞི་བདེ་ནི་ཚེ་སྒྲུབ་ཀྱི་མཆོག་རེད། ཅེས་སོགས་བོད་ཀྱི་ནང་པ་སངས་རྒྱས་པའི་ཆོས་ནི་རིགས་པ་དང་ལྡན་པ་ཡིན་པའི་སྐོར་བཀའ་སྩལ་བ་དང་།

གཞན་ཡང་། ནཱ་ལེནྡྲའི་ཆོས་བརྒྱུད་རྒྱུ་མཚན་གྱི་ཐོག་ནས་བསམ་བློ་གཏོང་རྒྱུ་ཡོད་པའི་ཆོས་ཚུལ་འདི་ང་ཚོ་བོད་ཀྱི་རིག་གཞུང་ཐུན་མོང་མ་ཡིན་པ་ཞིག་ཆགས་ཡོད། ད་ལྟའི་བར་དུ་ང་ཚོས་བདག་པོ་བརྒྱབ་སྟེ། ཐོག་མར་སློབ་གཉེར། དེ་ནས་ཡང་ནས་ཡང་དུ་བསམ། མཐར་སྒོམ་པའི་ཐོག་ནས་བདག་པོ་རྒྱག་སྟངས་འདི་ནི་ཁ་ནས་བཤད་པ་ཙམ་མིན། དཔྱད་འཇོག་ཟུང་འབྲེལ་གྱི་ཐོག་ནས་སེམས་པ་ཡག་པོ་བཟོ་བའི་བསླབ་བྱ་བཟང་པོ་ཞིག་ཡོད་པ་འདི་ཕལ་ཆེར་འཛམ་གླིང་གི་སྤྱི་ནོར་རེད་ཅེས་བརྗོད་ཐུབ་ཀྱི་འདུག ང་ཚོས་ད་ལྟའི་བར་དུ་བདག་པོ་བརྒྱབ་པ་རེད། ད་དུང་ཡང་བདག་པོ་རྒྱག་རྒྱུ་གལ་ཆེན་པོ་རེད། ཆོས་ལ་བདག་པོ་བརྒྱབ་ཟེར་བ་ནི་ལྷ་ཁང་བཞེངས་པ་དང་། དངུལ་སྒོར་གསོག་པ་ལྟ་བུ་མ་རེད། བསམ་བློ་གཏོང་སྟངས་ཀྱི་ཐོག་ནས་སྙིང་རྗེ་གཙོ་བོར་བཞག་ནས་སེམས་ཀྱི་ཞི་བདེ་བཟོ་བ་ཞིག་ཡིན། དེ་ང་ཚོ་བོད་ཀྱི་རིག་གཞུང་གཙོ་བོ་ཞིག་རེད། ད་ལྟའི་བར་དུ་ཧ་ཅང་བདག་པོ་ཡག་པོ་བརྒྱབ་ཡོད། འཛམ་གླིང་འཁྲུག་ཆ་དོད་པོ་འདིར་སེམས་ཀྱི་ཞི་བདེ་གལ་ཆེན་པོ་ཡིན་པས་ཁོང་ཁྲོ་དང་ང་རྒྱལ་གྱིས་སེམས་ཀྱི་ཞི་བདེ་དཀྲུགས་ཀྱི་ཡོད། གཞན་ཕན་གྱི་བློ་ཡག་པོ་བྱུང་ན་སེམས་ཀྱི་ཞི་བདེ་ཡོང་བ་དང་། ལུས་ཀྱང་བདེ་བ་ཡོང་གི་ཡོད། ཅེས་དང་།

བྱམས་པ་དང་བརྩེ་བའི་ཐོག་ནས་ཕན་ཚུན་ལ་རོགས་བྱེད་པ་ནི་ཕལ་ཆེར་བོད་ཆོལ་ཁ་གསུམ་གྱི་ས་ཁུལ་དུ་ལྟོས་ས་ལྟོས་འཇོག་གིས་མིག་ལྟོས་ཡག་པོ་ཡོད་པ་ལྟ་བུ་འདུག རྒྱ་ཧོར་ཡུལ་སོགས་སུ་འཁྲུག་པ་རྒྱག་པ་དང་། གཅིག་གིས་གཅིག་ལ་བསམ་ནག་བྱེད་པ་ལྟ་བུ་ཡོང་གི་ཡོད། བོད་དུ་དབུས་གཙང་ཁུལ་དང་། ཁམས་ཁུལ། མདོ་སྨད་ཁུལ་བཅས་སུ་ཆོས་ཀྱི་བསླབ་བྱས་མི་སེམས་ལྷོད་ལྷོད་བཟོ་བ་ལ་ཏན་ཏན་ཕན་ཐོགས་ཡོང་ཡོད་པ་ལྟ་བུ་འདུག ང་ཚོ་ཚང་མས་བོད་ཀྱི་རིག་གཞུང་ལ་ད་ལྟའི་བར་དུ་བདག་པོ་བརྒྱབ་ནས་སྤྱི་ཡོངས་ཀྱི་མིག་ལྟོས་ཡག་པོ་ཡོད། བོད་པ་ཚོ་སེམས་བཟང་པོ་དང་གཤིས་ཀ་ཡག་པོ་ཡོད་པ་ལ་རྒྱ་མིའི་གྲོགས་པོ་ཚོས་ཀྱང་དགའ་བོ་བྱེད་ཀྱི་འདུག བོད་པའི་སེམས་རྒྱུད་བཟང་པོ་བྱེད་པའི་གཤིས་ཀ་འདི་ཧ་ཅང་གལ་ཆེན་པོ་རེད། ད་ལྟའི་བར་དུ་བདག་པོ་བརྒྱབ་པ་བཞིན་གལ་ཆེན་པོར་བརྩི་རྒྱུ་གལ་ཆེན་པོ་རེད། དེ་ཚང་མས་སེམས་ལ་ཞོག དུས་ཚོད་འགྱུར་བ་འགྲོ་བཞིན་ཡོད་ཀྱང་། སེམས་ཀྱི་ཞི་བདེ་ལ་འགྱུར་བ་འགྲོ་རྒྱུ་མེད། ཅེས་སོགས་མི་བཟང་པོ་ཞིག་བྱེད་པ་ཚང་མས་འགན་ཡིན་པ་སོགས་བཀའ་སློབ་ཟབ་རྒྱས་སྩལ་རྗེས་ཐམས་ཅད་རྣལ་འབྱོར་གྱི་སེམས་བསྐྱེད་ཀྱི་ཆོས་འབྲེལ་དང་། མ་ཎི་བཤད་ལུང་བཀའ་དྲིན་སྩལ་ཞིང་། མཐར་མཐར་སྐྱེས་རབས་ཀྱི་ཆོས་འབྲེལ་བཀའ་དྲིན་སྩལ་རྗེས། གཏིང་རག་གི་མཎྜལ་ཕུལ་ཏེ་ཆོ་འཕྲུལ་དུས་ཆེན་ཉིན་གྱི་ཆོས་འབྲེལ་གནང་སྒོ་ལེགས་པར་གྲུབ་ཡོད།

དེ་ཡང་བརྟན་བཞུགས་ཀྱི་ཆོ་ག་རིམ་པར་བསྐྱངས་རྗེས་བཀའ་སློབ་སྩལ་དོན། དེ་རིང་བརྟན་བཞུགས་གནང་བར་ཐུགས་རྗེ་ཆེ་ཞུ་རྒྱུ་ཡིན། ངོས་ནས་རྒྱུན་དུ་ཉམས་ལེན་བྱེད་རྒྱུ་གཙོ་བོ་ནི། ཇི་སྲིད་ནམ་མཁའ་གནས་པ་དང་།། འགྲོ་བ་ཇི་སྲིད་གནས་གྱུར་པ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག། ཅེས་སྨོན་ལམ་རྒྱག་བཞིན་ཡོད། ད་ལྟ་ངོས་རང་བོད་གངས་ཅན་གྱི་ཞིང་དུ་སྐྱེས། བོད་ཀྱི་ཆོས་དང་རིག་གཞུང་ལ་འབྲེལ་བ་ཡོད་མཁན་ཚང་མས་ངོས་ལ་དད་པ་དང་། མོས་པ་རྩེ་གཅིག་ཡོད་པས་ཁ་ཡོད་ལག་ཡོད་ཀྱིས་མི་ལ་ཕན་ཐོགས་ཡོང་སྡོད་པ་ཞིག་འདུག ཧ་ཅང་གསལ་པོ་དྲན་པ་ལ། ངོས་རང་ལྷ་སར་ཡོད་དུས་ཁ་ཆེ་གྲོགས་པོ་མང་པོ་ཡོད། ཆོས་ལུགས་མི་གཅིག་ཀྱང་ཚང་མས་ངོས་ལ་ཧ་ཅང་དགའ་པོ་བྱེད་ཀྱི་རེད། དེ་བཞིན་དུ་རྒྱ་ནག་ལ་ཆ་བཞག སྔ་མོར་ཏཱ་ལའི་ལོག་སྤྱོད་པ་ཞེས་མང་པོ་ཞིག་བཤད་སྡོད་པ་དང་། དེང་སང་འགྱུར་བ་ཕྱིན་ནས་ཏཱ་ལའི་བླ་མ་ཞེས་དགའ་མོས་བྱེད་མཁན་རྒྱ་ནག་དུའང་མང་པོ་འདུག འཛམ་གླིང་ལྷོ་བྱང་ཤར་ནུབ་གང་སར་ཏཱ་ལའི་བླ་མར་དགའ་པོ་བྱེད་མཁན་ཇེ་མང་ཇེ་མང་དུ་འགྲོ་བཞིན་འདུག  དེ་དག་ལ་ག་ཚོད་ཐུབ་ཐུབ་ཀྱིས་ཕན་ཐོགས་བྱེད་ཐུབ་པ་ཞིག་དང་། མདོར་ན། ངོས་རང་ས་ཁུལ་འདིར་སྐྱེས་ནས་གཙོ་བོ་བོད་གངས་ཅན་ལྗོངས་ཀྱི་སྐྱེ་འགྲོ་སེམས་ཅན་སྤྱི་དང་། ཆོས་མ་དར་སའི་ལུང་པའི་ན་དུའང་ཏཱ་ལའི་བླ་མ་ཟེར་སྐབས་དགའ་པོ་བྱེད་མཁན་མང་དུ་འགྲོ་གི་འདུག་པས། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་བའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག། ཅེས་གསུངས་པ་ལྟར་ལྷག་བསམ་བསྐྱེད་དེ་སྡོད་ཀྱི་ཡོད།

ངོས་ལ་ཞི་བདེའི་གཟེངས་རྟགས་ཐོབ་ཡོད་པ་རེད་ལ། འཛམ་གླིང་ཤར་ནུབ་ལྷོ་བྱང་གང་སར་ཏཱ་ལའི་བླ་མར་དགའ་མོས་བྱེད་མཁན་ཇེ་མང་དུ་འགྲོ་བཞིན་འདུག ཚང་མས་ངོས་ལ་དགའ་མོས་བྱེད་བཞིན་ཡོད་པས་ངོས་ནས་ཀྱང་ག་ཚོད་ཐུབ་ཐུབ་ཀྱིས་རྨི་ལམ་ལ་ཡོད་པ་བཞིན་ལོ་བརྒྱ་དང་བཅུའི་རིང་སྡོད་ཐུབ་པར་སྨོན་ལམ་རྒྱག་གི་ཡོད། ཏཱ་ལའི་བླ་མར་དགའ་མོས་བྱེད་མཁན་ཚང་མས་ཏཱ་ལའི་བླ་མ་ཟེར་དུས་སེམས་ཐག་ཉེ་བོ་དང་། དགའ་མོས་བྱས་པ་དེའི་བག་ཆགས་ཚེ་རབས་ནས་ཚེ་རབས་སུ་ཡོད་པ་ཧ་ཅང་གསལ་པོ་རེད།  འཛམ་གླིང་གང་སར་གྲོགས་པོའི་འདུ་ཤེས་དང་། མིའི་བརྩེ་བ་བཅས་ཀྱི་ཐོག་ནས་དགའ་མོས་བྱེད་མཁན་ཧ་ཅང་མང་པོ་ཡོད། དེ་དག་ཚང་མར་ཕན་ཐོགས་ཡོང་ཐུབ་པའི་བག་ཆགས་བཟང་པོ་ཞིག་བཞག་ན་ཚེ་རབས་ནས་ཚེ་རབས་སུ་ང་ཚོར་ལས་ཀྱི་འབྲེལ་བ་ཡོད་པ་དང་། ངོས་རང་འཕགས་པ་སྤྱན་རས་གཟིགས་ཀྱི་བྱིན་རླབས་ཡོད་པའི་མི་ཞིག་ཆགས་ཡོད་པས། དངོས་སུ་ངོས་དང་འབྲེལ་བ་ཡོད་པ་རྣམས་དོན་གྱིས་འཕགས་པ་སྤྱན་རས་གཟིགས་ལ་འབྲེལ་བ་ཡོད་པ་ཞིག་ཆགས་ཡོད། དེར་བརྟེན། ངོས་དང་འབྲེལ་བ་ཡོད་པ་རྣམས་ཚེ་རབས་ནས་ཚེ་རབས་སུ་འཕགས་པ་སྤྱན་རས་གཟིགས་ཀྱིས་རྗེས་སུ་བཟུང་ནས་སྐྱེ་བ་ནས་སྐྱེ་བར་བསྐལ་བ་བཟང་དུ་འགྲོ་བ་ཞིག་དང་། བདེ་སྐྱིད་ལྡན་པ་ཡོང་ཐུབ་པ་ཞིག སྐབས་སུ་བབས་པའམ་གཙོ་ཆེ་ཤོས། བོད་གངས་ཅན་ལྗོངས་ཀྱི་བོད་མི་ཚོ་ཧ་ལས་པའི་དད་པ་དང་། མོས་པ་རྩེ་གཅིག་ཡོད་པ་རེད། དེ་བཞིན་ལ་དྭགས་སོགས་ཧི་མ་ལ་ཡའི་རི་རྒྱུད་ཀྱི་མི་རྣམས་ཀྱིས་ངོས་ལ་དགའ་མོས་རྩེ་གཅིག་ཏུ་ཡོད་པས་མི་ཚེ་འདི་ལ་བག་ཆགས་བཟང་པོ་ཞིག་བཞག་ནས་ཚེ་རབས་ནས་ཚེ་རབས་སུ་བག་ཆགས་དེའི་འབྲས་བུ་སྨིན་ཡོང་དུས་རིམ་པར་སངས་རྒྱས་ཀྱི་སར་སླེབས་ཐུབ་པ་ཞིག་ལ་ངོས་ཀྱིས་སྨོན་ལམ་རྒྱག་གི་ཡིན་ལ། ཁྱོད་ཚོ་ཚང་མས་སྨོན་ལམ་རྒྱག་རོགས།

དེ་རིང་འདིར་གྲྭ་ཚང་གི་སྐུ་ཞོགས་ཚོ་རྐང་བྱེད་མཁན་རེད། ཚང་མ་ཧུར་ཐག་རེད། གྲྭ་ཚང་ལ་གསང་བདེ་འཇིགས་གསུམ་དུས་འཁོར་དང་བཅས་པ་དམིགས་བསལ་ཞིག་ཡོད་པ་རེད། དེ་ཚིག་ཙམ་མ་ཡིན་པར་དོན་ལ་སློབ་སྦྱོང་བྱས་ཏེ་སངས་རྒྱས་ཀྱི་བསྟན་པ་སྤྱི་དང་། གསང་བདེ་འཇིགས་གསུམ་དུས་འཁོར་དང་བཅས་པའི་བསྟན་པ་འཛིན་སྐྱོང་སྤེལ་གསུམ་བྱེད་རྒྱུའི་ལམ་སྲོལ་ད་ལྟ་ཡག་པོ་ཡོད་པ་རེད་ལ། ད་དུང་ཡག་པོ་ཡོང་བར་ཧུར་ཐག་གནང་ཤོག  གཞན་ཞུ་རྒྱུ་མེད། བཀྲ་ཤིས་བདེ་ལེགས། ཐུགས་རྗེ་ཆེ་ཞེས་བཀའ་སློབ་སྩལ་རྗེས་༸རྒྱལ་བའི་ཞབས་བརྟན་གསོལ་འདེབས་སོགས་བརྟན་བཞུགས་ཀྱི་ཆོ་ག་རིམ་པར་གནང་ཡོད་པ་བཅས།། །།

༄༅།། བོད་ལོའི་ལོ་གསར་ལ་གཞིས་བྱེས་བོད་མི་ཚང་མར་འཚམས་འདྲི་དང་བཀྲ་ཤིས་བདེ་ལེགས་ཞུ་བཞིན་ཡོད། ང་ཚོ་བོད་པ་བཙན་བྱོལ་བ་ཆགས་ཏེ་དཀའ་ངལ་ཆེན་པོ་རྒྱ་གུང་བྲན་སྟོབས་ཤུགས་ལྡན་པ་ཞིག་གི་འོག་བསྡད་ཀྱང་། བོད་རྒྱ་ཆེའི་མི་མང་གི་དད་མོས་ཀྱི་སེམས་ཤུགས་ལ་ནམ་ཡང་འགྱུར་བ་མེད་པར་བསྡད་པ་རེད། ངོས་ནས་འདིར་འགོ་ཁྲིད་དེ་བསྡད་པ་རེད། དེ་སྔ་བོད་བཅིངས་འགྲོལ་ཟེར་བ་བཏང་ནས་རྒྱ་གུང་བྲན་གྱིས་བོད་དབང་བསྒྱུར་བྱེད་སྐབས། བོད་ཀྱི་ཆོས་དད་སོགས་ལ་འགྱུར་བ་འགྲོ་རྒྱུ་རེད་བསམ་ནས་རེ་བ་བརྒྱབ་ཡོད། འོན་ཀྱང་། ང་ཚོ་བོད་མིའི་ཆོས་དང་རིག་གཞུང་གི་དད་མོས་ཇེ་བརྟན་ཇེ་བརྟན་དུ་ཕྱིན་ཏེ་ཧ་ཅང་ཡག་པོ་རེད།

བོད་ཙམ་མ་ཟད་དེང་སང་རྒྱ་ནག་རང་གི་ནང་དུའང་ནང་ཆོས་ལ་དོ་སྣང་གསར་པ་ཞིག་སླེབས་མཁན་དང་། འཛམ་གླིང་ས་ཁུལ་མང་པོའི་ནང་དུ་བོད་ཀྱི་ཆོས་དང་རིག་གཞུང་ཟེར་དུས་དངོས་གནས་རྒྱུ་མཚན་ལྡན་པ། རིགས་པ་དང་ལྡན་པ། བསམ་བློ་བཏང་བ་ཡིན་ན་སེམས་ཀྱི་ཞི་བདེ་ཡོང་བ། སེམས་བཟང་དུ་འགྲོ་བ་སོགས་ལ་ཁ་ཡོད་ལག་ཡོད་ཀྱིས་ཕན་ཐོགས་ཡོད་པ་ཞིག་མངོན་ཡོད་པས་འཛམ་གླིང་ནུབ་ཕྱོགས་ནས་བོད་ཀྱི་ཆོས་དང་རིག་གཞུང་གི་ཐོག་ལ་དམིགས་བསལ་དོ་སྣང་བྱེད་མཁན་ཇེ་མང་ཇེ་མང་ལ་འགྲོ་བཞིན་འདུག ཚན་རིག་པའི་ནང་ནས་ཆོས་ལ་དད་པ་མེད་ནའང་སེམས་པ་བཟང་པོ་བྱེད་དགོས་པའི་ང་ཚོའི་བོད་ཀྱི་རིག་གཞུང་ལ་དམིགས་བསལ་གྱིས་དོ་སྣང་བྱས་ཏེ་དགའ་མོས་བྱེད་མཁན་ཇེ་མང་ཇེ་མང་འགྲོ་བཞིན་འདུག ང་ཚོ་བོད་ཀྱི་ཁ་ཡོད་ལག་ཡོད་ཀྱིས་ཕན་ཐོགས་ཡོད་པའི་ཆོས་དང་རིག་གཞུང་འདི་རྒྱ་གུང་བྲན་གྱིས་ནག་བསུབ་གཏོང་རྒྱུའི་ཐབས་ཤེས་རིམ་པར་བྱས་ཀྱང་། ནག་བསུབ་འགྲོ་རྒྱུའི་ཚབ་ཏུ་འཛམ་གླིང་སྟེང་དོ་སྣང་གསར་པ་སླེབས་པ་ཞིག་ཆགས་པ་ཧ་ཅང་གསལ་པོ་རེད།

དེ་སྔ་བོད་ཀྱི་ནང་ཆོས་ལ་དོ་སྣང་མེད་མཁན་དང་། མ་ཤེས་མཁན་ཚོས་ད་ལྟ་བོད་པའི་སེམས་པ་བཟང་པོ་བྱེད་པ་དང་། ཡ་རབས་བྱེད་པའི་ཐོག་ལ་འཛམ་གླིང་ཤར་ནུབ་ལྷོ་བྱང་གང་ས་ནས་དོ་སྣང་གསར་བ་བྱེད་བཞིན་འདུག དེར་བརྟེན། སླད་ཀྱང་ང་ཚོ་བོད་ལ་ཕ་མེས་ནས་སེམས་པ་བཟང་པོ་བྱེད་པ་དང་། ཐ་ན་འབུ་སྲིན་ཚུན་ཆད་ལ་བརྩེ་བ་བྱེད་པའི་གོམས་གཤིས་བཟང་པོ་ཡོད་པ་འདི་ལ་ཚང་མས་འཛམ་བུ་གླིང་གི་གཅེས་ནོར་ཞིག་ཡིན་བསམ་པ་བཟུང་ནས་བདག་པོ་རྒྱག་རྒྱུ་གལ་ཆེན་པོ་རེད།

ངོས་རང་ཟི་ལིང་ནས་སྐྱེས་ཤིང་། ཆུང་ཆུང་སྐབས་ནས་ལྷ་སར་ཡར་སླེབས་པ་རེད། བོད་ཀྱིས་སེམས་པ་བཟང་པོ་བྱེད་པ་དང་། ཆོས་ཕྱོགས་ནས་བཤད་ན་ནང་ཆོས་སྤུས་དག་ཤོས་དེ་ལ་ང་ཚོས་བདག་པོ་བརྒྱབ་ཡོད། ཐའེ་ལན་དང་འབར་མ་སོགས་ནང་པའི་ཡུལ་གྲུ་རེད། ཧ་ཅང་ཡག་པོ་ཡོད་པ་རེད། ཡིན་ནའང་། སློབ་སྦྱོང་གཏིང་ཟབ་པོ་བྱས་ཏེ་འགྲོ་མཁན་ནི་བོད་དང་སོག་པོ་ཡིན་ཡང་། ད་ལྟ་སོག་པོར་ཉམས་ཆག་ཆེན་པོ་ཕྱིན་ཟིན་པ་རེད། ང་ཚོ་བོད་ཀྱི་གོམས་གཤིས་བཟང་པོ་ཡོད་པ་འདི་འཛམ་བུ་གླིང་གི་སྤྱི་ནོར་ཆགས་ཡོད། དེ་ལ་ཚང་མས་དོ་སྣང་བྱོས། འཛམ་གླིང་གང་སར་བོད་ཀྱི་ཆོས་དང་རིག་གཞུང་ལ་དོ་སྣང་བྱེད་མཁན་མང་དུ་འགྲོ་བཞིན་ཡོད་པས་ང་ཚོས་འདིར་ཞབས་རིམ་དང་། ཕྱག་མཆོད་འབུལ་བྱེད་པ་ལྟ་བུ་ཙམ་མ་ཡིན་པར་བསམ་བློ་གཏོང་སྟངས་ཀྱི་ཐོག་ནས་བྱམས་སྙིང་རྗེ་གོང་མཐོར་གཏོང་བའི་གོམས་གཤིས་ཤིག་ཡོད་པ་དེ་ལ་མུ་མཐུད་ནས་དོ་སྣང་ཡོང་བའི་ཆེད་དུ་སོ་སོས་ཉམས་ལེན་བྱེད་དགོས། དེ་ཧ་ཅང་གལ་ཆེན་པོ་རེད།  བོད་པ་ནི་སེམས་པ་བཟང་པོ་ཡོད་པ་ཞིག་ལ་འཛམ་གླིང་གང་ས་ནས་ངོས་འཛིན་བྱེད་བཞིན་འདུག

ང་ཚོ་སྐྱེས་པའི་སྐབས་ནས་མི་འདྲ་བ་གང་ཡང་མེད་པར་མི་གཅིག་མཚུངས་རེད། ཡིན་ནའང་། ང་ཚོར་སེམས་པ་བཟང་པོ་བྱེད་པ་དང་། ཐ་ན་འབུ་སྲིན་ཚུན་ཆད་ལ་སྲོད་གཅོད་མ་བྱེད་ཅེས་པའི་གོམས་གཤིས་བཟང་པོ་ཡོད། དེ་མུ་མཐུད་ནས་རྒྱུན་འཛིན་ཐུབ་པ་ཞིག་དང་། ཆོས་དད་ཡོད་ན་རེད། མེད་ནའང་རེད། འཛམ་གླིང་ཤར་ནུབ་ལྷོ་བྱང་གང་སར་སེམས་པ་བཟང་པོ་བྱེད་པའི་གོམས་གཤིས་རྒྱ་བསྐྱེད་པ་ཞིག་ཚང་མས་སེམས་ལ་ཞོག ཧུར་ཐག་བྱེད་རོགས།

བོད་ཀྱི་སེམས་ཁམས་རིག་པའི་སྐོར་དེ་ནང་པའི་ཡུལ་གྲུ་ཚོའི་ནང་ནས་ཟབ་ཤོས་རེད། བསམ་བློའི་འགྲོ་སྟངས་ཅི་ལྟར་ཡིན་པ་ལ་དེ་སྔ་བོད་དུ་སེ་འབྲས་ཚོ་གཙོ་བོར་གྱུར་པའི་དགོན་པ་ཁག་ནས་གཞུང་ཆེན་སློབ་གཉེར་བྱེད་ཀྱི་ཡོད། དེ་ནི་དངོས་གནས་འཛམ་གླིང་གི་གཅེས་ནོར་དང་། ཁ་ཡོད་ལག་ཡོད་ཀྱིས་ཕན་ཐོགས་ཡོད་པ་ཧ་ཅང་ཡག་པོ་ཞིག་རེད། ང་ཚོ་བོད་པས་ཁ་ནས་བཤད་པ་ཙམ་མིན་པར་ལག་ལེན་བསྐྱལ་བ་དང་། ཆོས་སྐད་བྱས་ན་བཤད་སྒྲུབ་ཟུང་འབྲེལ་བྱས་ཏེ་བདག་པོ་རྒྱབ་པ་རེད། བཤད་སྒྲུབ་ཟུང་འབྲེལ་གྱི་ཐོག་ན་སེམས་པ་བཟང་པོ་བྱེད་པའི་བསླབ་བྱ་ལ་ད་ལྟའི་བར་དུ་བདག་པོ་བརྒྱབ་པ་འདི་ལ་འཛམ་གླིང་འདིར་དོ་སྣང་གསར་པ་སླེབས་པ་ཞིག་དང་། ཁྱབ་ཐུབ་པའི་གནས་ཚུལ་ཞིག་སླེབས་ཀྱི་ཡོད། དེར་བརྟེན། ང་ཚོ་བོད་པ་ཚོས་སེམས་ཤུགས་དང་སྙིང་སྟོབས་བསྐྱེད་དེ་ཧུར་ཐག་བྱེད་རོགས།

ལྷག་པར་བོད་ནང་དུ་བཞུགས་པའི་གཞིས་བཞུགས་རྒྱ་ཆེའི་མི་མང་དད་པ་དང་། དམ་ཚིག་འགྱུར་བ་མེད་པར་ཧ་ཅང་ཡག་པོ་རེད། ད་དུང་བོད་ལ་ལོ་སྟོང་ཕྲག་རིང་གི་གོམས་གཤིས་བཟང་པོ་རྣམས་ལ་རྒྱུ་མཚན་གང་འདྲ་ཡིན་པར་གཏིང་རིིང་པོའི་བསམ་བློ་གཏོང་རྒྱུ་དང་། མི་རབས་གསར་པ་ཚོས་དོ་སྣང་གསར་པ་བྱེད་དགོས་པ་ཞིག་ཆགས་འདུག ང་ཚོའི་གོམས་གཤིས་ཡིན་ཟེར་བ་གཅིག་པུ་མིན་པར་རྒྱུ་མཚན་གང་ཡིན་པ་དང་། དངོས་ཡོད་གནས་ཚུལ་ལ་དེང་ཚན་རིག་པ་ཚོས་ཀྱང་དགའ་བོ་བྱེད་པ་དང་། ནུབ་ཕྱོགས་རྒྱལ་ཁབ་ཀྱི་ཆོས་ལ་འབྲེལ་བ་མེད་མཁན་ཚོས་ཀྱང་དམིགས་བསལ་གྱིས་དོ་སྣང་བྱེད་པ་དེ་དག་གི་རྒྱུ་མཚན་གང་ཡིན་པ་ལ་དོ་སྣང་བྱེད་དགོས། ང་ཚོ་བོད་པར་ལོ་སྟོང་ཕྲག་རིང་གི་གཅེས་ནོར་ཞིག་ཡོད་པ་འདི་ལ་ཚང་མས་ངོས་འཛིན་ཐུབ་པའི་ཐོག་ནས་བདག་པོ་རྒྱག་རྒྱུ་གལ་ཆེན་པོ་རེད། ང་ཚོ་ཚང་མས་ཁ་ནས་ཞི་བདེ་དང་ཞི་བདེ་ཟེར་གྱི་ཡོད། ཞི་བདེ་ཟེར་བ་དེ་སེམས་ནས་བཟོ་དགོས་པ་མ་གཏོགས་གོ་མཚོན་མེད་པ་གཅིག་པུའི་སྐད་ཆ་མིན། དེར་བརྟེན། བོད་ཀྱི་རིག་གཞུང་གོམས་གཤིས་ཡོད་པ་དེ་དངོས་གནས་སེམས་ཀྱི་ཞི་བདེ་བཟོ་བའི་རྒྱུ་ཆ་ཡག་ཤོས་རེད། དེ་ང་ཚོ་ཚང་མས་ཤེས་པར་བྱས་ཏེ་བདག་པོ་ཡག་པོ་རྒྱོབ། དེ་ལྟར་ཡིན་ཚང་མར་བཀྲ་ཤིས་བདེ་ལེགས་ཞུ།

དེ་ཡང་ཞོགས་པ་ཆུ་ཚོད་ ༧།༤༠ ཙམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་འཁོར་ལྷན་རྒྱས་དང་བཅས་རྡོར་གདན་བྱང་ཆུབ་མཆོད་རྟེན་ཆེན་མོར་ཆེད་ཕེབས་སྐབས་མཆོད་རྟེན་ཆེན་མོའི་ལྷོ་ཕྱོགས་ནས་སྔ་འགྱུར་རྙིང་མའི་བླ་ཆེན་ཁག་དང་སྤྱན་རྒྱ་སྤོས་སྣེས་ཕེབས་བསུ་ཞུས་པ་དང་། བཞུགས་ཁྲིར་༸ཞབས་སོར་འཁོད་མཚམས་སྔ་འགྱུར་སྨོན་ལམ་ཆེན་མོའི་ཚོགས་གཙོ་༸སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག་གིས་མཎྜལ་རྟེན་གསུམ་སྐྱབས་ཐོ་འདེགས་འབུལ་དང་། གསོལ་ཇ་འབྲས་སིལ་རིམ་པར་ཕེབས་མཚམས་སྐར་མ་བཅོ་ལྔའི་རིང་དཀོན་མཆོག་རྗེས་དྲན་གྱི་མདོ་དང་། བཟང་པོ་སྤྱོད་པའི་སྨོན་ལམ་སོགས་གསུང་འདོན་གནང་རྗེས་བཀའ་སློབ་སྩལ་དོན། 

ཆོས་གྲོགས་རྣམ་པ་ལྷན་རྒྱས་ལ་ཞུ་རྒྱུར། དེ་རིང་སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་མཛད་པ་མཛད་སའི་གནས་ཁྱད་པར་ཅན་འདིར་ང་ཚོ་རུབ་རུབ་བྱས་ཏེ་སྨོན་ལམ་རྒྱག་པའི་བསྐལ་བ་བཟང་པོ་བྱུང་བ་རེད། ང་ཚོའི་མི་ཚེ་གཅིག་ལ་འདི་ལྟ་བུའི་གོ་སྐབས་བཟང་པོ་ཞིག་བྱུང་ནས་བསོད་ནམས་བསགས་པས་ཚེ་རབས་ནས་ཚེ་རབས་སུ་ལས་བཟང་པོའི་འབྲས་བུ་སྨིན་པ་བརྒྱ་ཆ་བརྒྱ་ཐམ་པ་ཐག་གིས་ཆོད་པ་རེད། དེང་སང་སངས་རྒྱས་པའི་ཆོས་འདི། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག། ཅེས་གསུངས་པ་ལྟར། དེ་སྔ་སངས་རྒྱས་པའི་ཆོས་མ་དར་བའི་ས་ལའང་དོ་སྣང་གསར་པ་བྱེད་བཞིན་ཡོད་པ་རེད། ང་ཚོ་ཕ་མེས་ནས་སངས་རྒྱས་བཅོམ་ལྡན་འདས་ཀྱི་རྗེས་འབྲངས་རེད། 

ངོས་ནས་ཚེ་རབས་ནས་ཚེ་རབས་སུ་སངས་རྒྱས་བཅོམ་ལྡན་འདས་ཀྱི་རྗེས་འབྲངས་རྣལ་མ་ཞིག་ཡོང་ཐུབ་པའི་སྨོན་ལམ་རྒྱག་གི་ཡོད་ལ། ཆོས་གྲོགས་ཚོ་ཡང་དེ་ལྟ་བུ་ཞིག་ཏན་ཏན་ཡོང་གི་རེད། ཚང་མས་ཐུགས་སྨོན་ཡག་པོ་གནང་ཤོག དུས་དང་དུས་སུ་སྨོན་ལམ་རྒྱག་རྒྱུ་གལ་ཆེན་པོ་རེད། ཡིན་ནའང་། གཙོ་བོ་ཉིན་ཞག་ཕྲུགས་གཅིག་གི་རིང་ལ་སོ་སོའི་སེམས་དེ་བཅོམ་ལྡན་འདས་ཀྱི་དགོངས་པ་དང་མི་འགལ་བ་ཞིག་དང་། བསམ་པ་རྣམ་དག་གི་ཆོས་པ་ཞིག་བྱེད་དགོས་པ་རེད། དེ་ཚང་མས་ཐུགས་ལ་ཆོངས། གཞན་ཞུ་རྒྱུ་མི་འདུག ངོས་རང་ཧ་ཅང་བསྐལ་བ་བཟང་པོ་བྱུང་། ཚེ་རབས་ནས་ཚེ་རབས་སུ་སྟོན་པ་བཅོམ་ལྡན་འདས་ཀྱི་བསྟན་པ་ཉམས་པ་སོར་ཆུད་དང་། མི་ཉམས་གོང་འཕེལ་ཡོང་བར་སྨོན་ལམ་བརྒྱབ་ནས་སེམས་ཤུགས་བསྐྱེད་བཞིན་ཡོད། ཇི་སྲིད་ནམ་མཁའ་གནས་པ་དང་།། འགྲོ་བ་ཇི་སྲིད་གནས་གྱུར་པ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག། ཅེས་སྙིང་ཁུང་རུས་པའི་གཏིང་ནས་སེམས་ཤུགས་བསྐྱེད་དེ་སྨོན་ལམ་རྒྱག་གི་ཡོད། ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་བཞིན་ཡོད། དེ་ལྟར་ཟབ་པ་དང་རྒྱ་ཆེ་བའི་བསྟན་པ་འདི་ཇི་སྲིད་ནམ་མཁའ་མ་ཟད་ཀྱི་བར་དུ་ཉམས་པ་སླར་གསོ་དང་། མ་ཉམས་གོང་འཕེལ་ཡག་པོ་ཡོང་ཐུབ་པར་ཞབས་འདེགས་ག་རེ་སྒྲུབ་རྒྱུ་ཡོད་པ་དེ་སྒྲུབ་ཐུབ་པའི་སྨོན་ལམ་རྒྱག་གི་ཡོད། ཅེས་དང་། 

ཆོས་ནི་ཕྱི་ལོགས་ཀྱི་རྣམ་འགྱུར་གྱི་སྐད་ཆ་མིན་པར་ཆོས་ཀྱི་སྙིང་པོ་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བ་བསམ་བློའི་ནང་ཉིན་ཞགས་ཕྲུགས་གཅིག་གི་རིང་མ་བརྗེད་པར་འཛིན་རྒྱུ་གལ་ཆེན་པོ་རེད། ངོས་རང་ལ་མཚོན་ན་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་འབྲེལ་ནས་སྟོང་ཉིད་ཀྱི་ལྟ་བ་སྒོམ་བཞིན་ཚེ་རབས་ནས་ཚེ་རབས་སུ་སྟོན་པའི་རྗེས་འབྲངས་རྣལ་མ་ཞིག་གི་ཐོག་ནས་ཇི་སྲིད་ནམ་མཁའ་མ་ཟད་ཀྱི་བར་དུ་འགྲོ་བ་མི་གཙོ་བོར་གྱུར་པའི་མཐའ་ཡས་པའི་སེམས་ཅན་མཐའ་དག་གི་དོན་བྱེད་ཐུབ་པའི་སྨོན་ལམ་རྒྱག་གི་ཡོད་། གནས་ཁྱད་པར་ཅན་འདི་འདྲ་ལ་སྨོན་ལམ་འདི་བརྒྱབ་པས་སྨོན་ལམ་འགྲུབ་པར་ཏན་ཏན་རྐྱེན་ཞིག་ཡོད་པ་རེད། ཚང་མར་ཐུགས་རྗེ་ཆེ། བཀྲ་ཤིས་བདེ་ལེགས། ཞེས་བཀའ་སློབ་སྩལ་གྲུབ་མཚམས་བླ་ཆེན་ཁག་དང་སྤྱན་རྒྱ་སྤོས་སྣེས་མདུན་བསུས་ཏེ་མཆོད་རྟེན་ཆེན་མོའི་རྟེན་གཙོ་སྟོན་པའི་སྐུ་བརྙན་རིན་པོ་ཆེའི་མདུན་དུ་བསྟན་འབར་མ་དང་བདེན་ཚིག་སྨོན་ལམ་གསུང་འདོན་སོགས་ཐུགས་སྨོན་གནང་རྗེས་དགའ་ལྡན་འཕེལ་རྒྱས་གླིང་དུ་ཆིབས་བསྒྱུར་བསྐྱངས་ཡོད། 

ཐེངས་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་རྒྱལ་སྤྱིའི་དགེ་འདུན་པའི་གླེང་སྟེགས་དབུ་འབྱེད་མཛད་སྒོ་དང་། འཛམ་གླིང་ཞི་བདེའི་སྨོན་ལམ་ལ་དབུ་བཞུགས་ཀྱི་བཀའ་སློབ་བཀའ་དྲིན་སྩལ་བ་མ་ཟད། ཉིན་གསུམ་རིང་འཛམ་གླིང་ས་ཕྱོགས་གང་ས་ནས་ཆེད་ཕེབས་གནང་བའི་དད་ལྡན་ཁྲི་ཕྲག་མང་པོར་ཆོས་དབྱིངས་བསྟོད་པའི་གསུང་ཆོས།  རྗེ་བཙུན་འཇམ་པའི་དབྱངས་ཀྱི་རྗེས་གནང་གི་ཆོས་འབྲེལ་བཀའ་དྲིན་སྩལ་བ་དང་། ཝཱ་རཱ་ཎ་སཱི་དབུས་བོད་ཀྱི་གཙུག་ལག་སློབ་གཉེར་ཁང་དང་ཝཱ་རཱ་ཎ་སཱི་སློབ་ཟུར་ཐུན་མོང་། སྤོན་ཊ་ཆོལ་གསུམ་བོད་མིའི་གཞིས་ཆགས་དང་དཔལ་ཞ་ལུ་དགོན་པ། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དང་དགེ་ལྡན་སྤྱི་ལས་ཁང་བཅས་ནས་ཚེའི་ལྷ་མཆོག་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་དང་། གཞན་ཡང་། གདན་ས་གསུམ་དང་བཀྲ་ཤིས་ལྷུན་པོ། ར་སྟོད་གྲྭ་ཚང་བཅས་ཀྱི་དགེ་བཤེས་ལྷ་རམས་པའི་བསླབ་པ་མཐར་སོན་གྱི་ཕྱག་འཁྱེར་གནང་བའི་མཛད་སྒོར་དབུ་བཞུགས་ཀྱིས་བཀའ་སློབ་བཀའ་དྲིན་སྩལ་བཅས་ཀྱིས་མཛད་རིམ་ལེགས་པར་གྲུབ་སྟེ། ཚེས་ ༡༩ ཉིན་གནས་མཆོག་རྡོ་རྗེ་གདན་ནས་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱང་རྒྱུ་ཡིན་པ་བཅས།། 

དེ་ཡང་དགེ་ལྡན་ལུགས་བཟང་གཙུག་ལག་སློབ་གཉེར་ཁང་ཆེན་པོའི་དགེ་ལུགས་རྒྱུགས་སྤྲོད་ཀྱི་བསླབ་པ་མཐར་ཕྱིན་ཏེ་ཕྱི་ལོ་ ༢༠༢༠ དང་། ཕྱི་ལོ་ ༢༠༢༡  ཕྱི་ལོ་ ༢༠༢༢ ཕྱི་ལོ་ ༢༠༢༣ བཅས་སུ་ལྷ་ལྡན་ཆོ་འཕྲུལ་སྨོན་ལམ་ཆེན་མོར་དགེ་བཤེས་ལྷ་རམས་པའི་དམ་བཅའ་བཞག་པའི་དགེ་འདུན་པ་ ༤༡༣ ལ་དགེ་བཤེས་ལྷ་རམས་པའི་ཕྱག་འཁྱེར་གནང་བའི་མཛད་སྒོར་ཇི་ལྟར་གསོལ་བ་བཏབ་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྔ་དྲོ་ཆུ་ཚོད་བརྒྱད་པ་ཙམ་ལ་རྡོར་གདན་དགའ་ལྡན་འཕེལ་རྒྱས་གླིང་ནས་དུས་དབང་གསུང་ཆོས་ར་བར་ཆིབས་བསྒྱུར་བསྐྱངས་པ་དང་། སྐབས་དེར་དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་འབྲེལ་ཡོད་རྣམ་པས་སྤོས་སྣེས་མདུན་བསུ་དང་བཅས་སྡིངས་ཆའི་༸ཞབས་སྟེགས་སུ་འཁོད་མཚམས། དགེ་ལྡན་ལུགས་བཟང་གཙུག་ལག་སློབ་གཉེར་ཁང་ཆེན་པོའི་རྒྱུགས་སྤྲོད་དོ་དམ་པ་དགེ་བཤེས་ལྷ་རམས་པ་སྤྲུལ་སྐུ་བསྟན་འཛིན་ཤེས་རབ་ལགས་ཀྱིས་དགེ་ལུགས་རྒྱུགས་སྤྲོད་དང་འབྲེལ་བའི་བྱུང་རིམ་ངོ་སྤྲོད་གནང་བ་དང་། དེ་རྗེས་ཞྭ་སེར་བསྟན་པའི་མངའ་བདག་༸སྐྱབས་རྗེ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས་འཚམ་འདྲི་དང་སྦྲགགས་བཀའ་སློབ་སྩལ་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། 

ང་ཚོ་ཚང་མ་བཅོམ་ལྡན་འདས་ཀྱི་རྗེས་འབྲངས་ཆགས་ཀྱི་ཡོད། སངས་རྒྱས་བཅོམ་ལྡན་འདས་ཀྱི་ཆོས་ཚུལ་ནི་ཞབས་བརྟན་བྱེད་པ་ལྟ་བུ་མ་ཡིན་པར་གཙོ་བོ་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བར་བསམ་བློ་གཏོང་རྒྱུ་ཧ་ཅང་གལ་ཆེན་པོ་རེད། ངོས་རང་བཅོམ་ལྡན་འདས་ཀྱི་རྗེས་འབྲངས་དགེ་སློང་ཞིག་རེད། ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་ཡག་པོ་བཏང་ནས་ཉི་མ་དེའི་རིང་ལ་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བས་ཟིན་པ་བྱས་ཏེ་མི་ཚེ་བསྐྱལ་གྱི་ཡོད། ཧ་ཅང་ཕན་ཐོགས་ཆེན་པོ་འདུག རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི།། ཞེས་གསུངས་པ་ལྟར། རང་དོན་སྒྲུབ་པ་ལ་བྱང་ཆུབ་ཀྱི་སེམས་ཀྱིས་ཧ་ཅང་ཕན་པོ་ཞིག་འདུག གཞན་ཕན་སྒྲུབ་པ་ལའང་བྱང་ཆུབ་ཀྱི་སེམས་ཀྱིས་ཡོང་གི་ཡོད། བྱང་ཆུབ་མཆོག་གི་སེམས་ནི་བསྐྱེད་བགྱིས་ནས།། སེམས་ཅན་ཐམས་ཅད་བདག་གི་མགྲོན་དུ་གཉེར།། ཞེས་གསུངས་ཡོད། དེར་བརྟེན། རང་གཞན་ཀུན་ལ་ཕན་བདེ་འབའ་ཞིག་སྟེར་བར་བྱེད་པའི་བྱང་ཆུབ་སེམས་དཔའི་སྤྱོད་པ་ཉིན་རེ་བཞིན་དུ་ལག་ལེན་ལ་བསྐྱལ་དགོས། ཚུལ་དེ་ལྟ་བུའི་སྒོ་ནས་ཚེ་རབས་ནས་ཚེ་རབས་སུ་སེམས་དང་སྤྱོད་པ་མ་འཁྲུལ་བར་འགྲོ་བ་ནི་རྣམ་མཁྱེན་རྒྱལ་བའི་གོ་འཕང་ཐོབ་པའི་རེ་བ་ཁ་ཡོད་ལག་ཡོད་ཐོག་འགྲོ་གི་ཡོད། ཅེས་དང་། 

སངས་རྒྱས་པའི་ཆོས་ནི་སྨོན་ལམ་བརྒྱབ་སྡོད་པ་གཅིག་པུའི་སྐད་ཆ་མིན་པར་བསམ་བློ་རྒྱ་ཆེན་པོ་བཏང་ནས་ཡོང་བ་ཞིག་ཡིན་པས། དང་པོར་རྒྱ་ཆེན་ཐོས་པ་མང་དུ་བཙལ།། བར་དུ་གཞུང་ལུགས་ཐམས་ཅད་གདམས་པར་ཤར།། ཐ་མར་ཉིན་མཚན་ཀུན་ཏུ་ཉམས་སུ་བླངས།། ཀུན་ཀྱང་བསྟན་པ་རྒྱས་པའི་ཆེད་དུ་བསྔོས།། ཚུལ་འདི་བསམས་ཤིིང་མདུན་མ་ལེགས་ནས་གདའ།། བཀའ་དྲིན་ཆེའོ་རྗེ་བཙུན་མཁྱེན་པའི་གཏེར།། ཞེས་རྗེ་རིན་པོ་ཆེས་གསུངས་པ་ལྟར། སངས་རྒྱས་པའི་ཟབ་པ་དང་རྒྱ་ཆེ་བའི་ཆོས་ལ་བསམ་བློ་ག་ཚོད་བཏང་བ་ཡིན་ན། བསམ་བློ་རྒྱ་ཆེ་རུ་ཆེ་རུ་ཕྱིན་ནས་རྫོགས་རྒྱུ་མེད་པ་ཆགས་ཀྱི་ཡོད། རང་གཙེས་འཛིན་དང་བདེན་འཛིན་ཤུགས་ཆེན་པོ་རེད་དེ། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་རྒྱུ་མཚན་མཐའ་ཡས་པ་ཞིག་ཡོད་པས་སེམས་སྟེང་གི་ཉོན་མོངས་པ་རྣམས་ལ་བསམ་བློ་ཡག་པོ་བཏང་ན་རང་བཞིན་གྱིས་ནུས་པ་མེད་པ་ཆགས་ཀྱི་ཡོད། འཛམ་གླིང་འདིར་མི་རྣམས་ཀྱིས་དངོས་པོ་ཡར་རྒྱས་འགྲོ་བའི་ཐོག་ལ་གཅིག་གིས་གཅིག་ལ་འགྲན་བསྡུར་བྱས་ཏེ་འགྲོ་གི་ཡོད་ཀྱང་། སེམས་ཀྱི་ཉོན་མོངས་དང་བྱང་ཆུབ་ཀྱི་སེམས་འགྲན་བསྡུར་བྱེད་པ་ལ་འབད་བརྩོན་བྱས་པ་ཡིན་ན། མི་ཕན་ཚུན་འགྲན་བསྡུར་བྱེད་པ་ནི་རང་གཅིག་པུའི་ལག་ཏུ་མེད་པར་གཞན་ལ་བརྟེན་ཡོད། སེམས་ཀྱི་བདེན་འཛིན་དང་རང་གཅེས་འཛིན་གྱི་ལྡོག་ཕྱོགས་བདག་མེད་རྟོགས་པའི་ཤེས་རབ་དང་། བྱང་ཆུབ་ཀྱི་སེམས་ནི་གཞན་ལ་བརྟེན་མི་དགོས་པར་སོ་སོས་བསམ་བློ་ཡག་པོ་བཏང་ན་ཉིན་རེ་བཞིན་དུ་སེམས་ལ་འགུལ་བསྐྱོད་ཐེབས་ནས་གཞན་གཅེས་འཛིན་ཤུགས་ཆེ་རུ་ཆེ་རུ་འགྲོ་བ་ཞིག་དང་། གཏི་མུག་བདེན་འཛིན་ལ་གཞི་རྩ་མེད་པ་ཞིག་བློ་ལ་སླེབས་ཡོང་སྐབས་སངས་རྒྱས་པའི་ཆོས་ནི་རྒྱུ་མཚན་ཡང་དག་པ་ཞིག་རེད། གོམས་ན་སླ་བ་མ་ཡིན་པའི།། དངོས་དེ་གང་ཡང་ཡོད་མ་ཡིན།། གསུངས་པ་ལྟར་བསམ་བློ་ཡག་པོ་བཏང་ནས་གོམས་འདྲིས་ཆེ་རུ་ཕྱིན་པའི་ཚོད་རང་གཅེས་འཛིན་ཤུགས་ཆུང་དུ་འགྲོ་བ་དང་། བདེན་འཛིན་གྱི་རྣམ་རྟོག་ཤུགས་ཆུང་དུ་འགྲོ་བ་ཆོས་ཉིད་རེད། ཅེས་དང་། 

དེ་རིང་འདིར་ལྷ་རམས་པའི་ཕྱག་འཁྱེར་འབུལ་རྒྱུ་རེད། ང་ཚོ་བོད་གངས་ཅན་གྱི་བསླབ་པ་སློབ་གཉེར་བྱེད་སྟངས་ནི་ཧ་ལས་པ་ཞིག་རེད། ཐའེ་ལན་དང་འབར་མ། ཝའེ་ནམ་སོགས་སུ་ངོས་ལ་ནང་པ་ངོ་ཤེས་པ་མང་པོ་ཡོད། ཡིན་ནའང་། ལོ་མང་པོར་དཔེ་ཆར་བལྟ་མཁན་ཧ་ཅང་ཉུང་ཉུང་རེད། རེ་ཟུང་ཡོད་ཤས་ཆེ་མ་གཏོགས་མང་ཆེ་བ་དཔེ་ཆ་བལྟ་བར་དོ་སྣང་མེད་པར་སྒོམ་བརྒྱབ་ནས་སྡོད་པ་ལ་དོ་སྣང་ཆེ་བ་ལྟ་བུ་འདུག ང་ཚོ་བོད་ལ་དཔེ་ཆར་བལྟ་བར་དང་དོད་ཧ་ཅང་ཤུགས་ཆེན་པོ་ཡོད་པ་རེད། ངོས་རང་ལ་མཚོན་ན་ཆུང་ཆུང་སྐབས་ནས་དཔེ་ཆ་བལྟ་བ་དང་། དཔེ་ཆར་བལྟ་དུས་ཚིག་གི་འབྲུ་རྙེད་པ་ཙམ་དུ་མ་ཟད། དེ་ལ་དཔྱད་པ་བྱེད་ཀྱི་ཡོད། ང་ཚོའི་རྟགས་གསལ་གྱི་འགྲོ་སྟངས་ནི་ཧ་ཅང་ཡག་པོ་ཞིག་རེད། བརྡར་ཤ་བཅད་ནས་འགྲོ་བ་ནི་ཧ་ཅང་གལ་ཆེན་པོ་རེད། ཁྱོད་ཚོ་ཚང་མར་དེ་ཞུ་འདོད་བྱུང་། ཞེས་སོགས་བཀའ་སློབ་སྩལ་རྗེས་དགའ་ལྡན་ཁྲི་པ་བརྒྱ་དང་བཞི་པ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས་ཕྱི་ལོ་ ༢༠༢༠ དང་། ༢༠༢༡།  ༢༠༢༢།  ༢༠༢༣  བཅས་སུ་ལྷ་ལྡན་ཆོ་འཕྲུལ་སྨོན་ལམ་ཆེན་མོར་དགེ་བཤེས་ལྷ་རམས་པའི་དམ་བཅའ་བཞག་པའི་དགེ་བཤེས་རྣམ་པར་ལྷ་རམས་པའི་ཕྱག་འཁྱེར་རིམ་པར་སྩལ་ཅིང་། ལྷ་རམས་པ་རྣམས་༸གོང་ས་མཆོག་དང་བླ་ཆེན་རྣམ་པའི་མཉམ་དུ་སྐུ་པར་ལྷན་སྒྲོན་མཛད་རྗེས་དགེ་འདུན་བྱིངས་ནས་སྨོན་ལམ་དང་བཀྲ་ཤིས་པའི་ཚིགས་བཅད་གསུང་འདོན་གྲུབ་མཚམས་མགོན་པོ་མཆོག་གིས་སླར་ཡང་བཀའ་སློབ་སྩལ་དོན།

འདིར་སློབ་གཉེར་གནང་མཁན་ཁྱོད་ཚོ་ཚང་མར་བཀྲ་ཤིས་བདེ་ལེགས་ཞུ་རྒྱུ་དང་། ཚང་མས་སློབ་གཉེར་གནང་ནས་ཧུར་ཐག་བྱས་པ་རེད། སློབ་གཉེར་གནང་ནས་གོ་རྟོགས་ཡོད་པ་དེ་ལག་ལེན་དུ་བསྐྱལ་ནས། ཐོག་མར་ཐོས་བྱུང་གི་ཤེས་རབ་དང་། དེ་ནས་བསམ་བྱུང་གི་ཤེས་རབ། མཐའ་མར་སྒོམ་བྱུང་གི་ཤེས་རབ་རྒྱུད་དུ་སྐྱེས་ཏེ་ས་ལམ་བགྲོད་ཐུབ་པ་ཞིག་ཁ་ཉིན་ཡང་ཞུས་ཡོད། ངོས་རང་ལ་མཚོན་ན་བྱང་ཆུབ་ཀྱི་སེམས་གང་ལ་གང་འཚམ་ཡོད་པ་རེད། སྟོང་ཉིད་ཀྱི་ལྟ་བར་བསམ་བློ་བཏང་ཡོང་དུས་སྦྱོར་ལམ་ནས་ཡར་འགྲོ་བའི་ཚོད་དཔག་བྱེད་ཀྱི་ཡོད་ལ། རེ་བ་རྒྱག་གི་ཡོད། ཚེ་འདི་ལ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ། ཞེས་གསུངས་པ་ལྟར།  ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ་སོགས་མངོན་དུ་བྱེད་ཐུབ་པ་ལ་རེ་བ་རྒྱག་གི་ཡོད་ལ། གང་ལ་གང་འཚམ་ཚོད་དཔག་བྱེད་ཐུབ་པ་ཆགས་ཀྱི་ཡོད། དེར་བརྟེན། ཁྱོད་ཚོ་ཚང་མས་ཐོས་པའི་དོན་ལ་ཡང་ནས་ཡང་དུ་བསམ་ནས་སེམས་ཀྱི་གཏིང་ནས་ངེས་པ་ཐོབ་པ་ཞིག་དང་། ངེས་པ་ཐོབ་པའི་རྗེས་འབྲེལ་དུ་ལག་ལེན་བསྐྱལ་ནས་རྒྱལ་བའི་དགོངས་པ་དང་མཐུན་པར་ཡག་པོ་ཡོང་ཐབས་དང་། འཛམ་གླིང་གི་མི་སྤྱི་དང་སངས་རྒྱས་པའི་ཆོས་ལ་དོ་སྣང་ཡོད་མཁན་ཚོར་མིག་དཔེ་མཚོན་ཐུབ་པ་ཞིག་གི་ཐོག་ནས་སངས་རྒྱས་པའི་ཆོས་པ་ཞིག་གིས་ཆོས་ལ་བསམ་བློ་བཏང་། དཔྱད་པ་བྱས་ཏེ་མི་འདྲ་བ་ཞིག་འདུག་བསམ་ཏེ་མི་ཚོས་དོ་སྣང་སླེབས་པར་ཚང་མས་ཧུར་ཐག་བྱེད་དགོས། བསྟན་པའི་ཞབས་འདེགས་སྒྲུབ་ཟེར་བ་ནི་དེ་འདྲ་ཞིག་རེད། ཚང་མས་འཆར་ཅན་ཡིན་བསམ་པ་མིན་པར་ཉིན་རེ་བཞིན་དུ་ཐོས་བསམ་སྒོམ་གསུམ་གྱི་ཐོག་ནས་བློ་ལ་ཡར་རྒྱས་ཡོད་པ་ཞིག་དང་། གྲོགས་པོ་ཚོར་འགྲེལ་བཤད་དང་། སྟོན་ཐུབ་པ་ཞིག་བྱུང་ན་བསྟན་པའི་ཞབས་འདེགས་སྒྲུབ་ཀྱི་ཡོད།  ཚང་མས་ཧུར་ཐག་གནང་རོགས། ཞེས་བཀའ་སློབ་སྩལ་རྗེས་ཉི་ཧོང་ནང་ས་ཡོམ་གྱི་གོད་ཆག་བྱུང་བ་དང་འབྲེལ་ནས་བཀའ་སློབ་སྩལ་དོན། 

དེ་རིང་འདིར་དམིགས་བསལ་ཞུ་རྒྱུ་ཞིག་ལ། ཉེ་ཆར་ཉི་ཧོང་ལ་ས་ཡོམ་ཧ་ཅང་སྡུག་ཆགས་ཤིག་བརྒྱབ་འདུག མི་མང་པོ་ཞིག་འདས་གྲོངས་ཕྱིན་འདུག་ལ་ཡུལ་སྤྱི་ལ་ས་ཡོམ་གྱིས་ཡོ་འཁྱོམ་ཆེན་པོ་བྱས་ཏེ་མི་མང་པོའི་སེམས་ལ་དངངས་སྐྲག་དང་མ་སྐྱིད་པ་བྱུང་འདུག ཉི་ཧོང་ལ་མཚོན་ན་སྤྱི་ཡོངས་ཀྱི་ཆ་ནས་ནང་པའི་ལུང་པ་ཆགས་ཡོད་པ་རེད། ཤེས་རབ་སྙིང་པོ་ཚང་མས་འདོན་གྱི་ཡོད། དེ་ལྟ་བུའི་ཡུལ་གྲུ་ལ་རྐྱེན་ངན་འཕྲད་སྐབས་ང་ཚོའི་སེམས་ལ་རང་བཞིན་གྱིས་ཤ་ཚ་སླེབས་པ་ཞིག་ཡིན་པས་ད་རེས་ང་ཚོ་ཚང་མས་ཉི་ཧོང་གི་ཆོས་གྲོགས་ཚོའི་ཆེད་དུ་དམིགས་ནས་ཤེས་རབ་སྙིང་པོ་ཚར་གཅིག་གསུངས། ཞེས་ཤེས་རབ་སྙིང་པོ་གསུང་འདོན་གནང་སྟེ། མཛད་སྒོ་ལེགས་པར་གྲུབ་ཡོད་པ་དང་། མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། དགའ་ལྡན་ཁྲི་པ་བརྒྱ་དང་བཞི་པ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག མཚུངས་མེད་བྱང་རྩེ་ཆོས་རྗེ། གདན་ས་གསུམ་དང་བཀྲ་ཤིས་ལྷུན་པོ། རྒྱུད་གྲྭ་སྟོད་སྨད་བཅས་ཀྱི་མཁན་པོ་དང་མཁན་ཟུར་རྣམ་པས་གཙོས་ཕྱག་འཁྱེར་བཞེས་མཁན་དགེ་བཤེས་རྣམ་པ་དང་། མི་མང་སོགས་བརྒྱ་ཕྲག་ཁ་ཤས་ཕེབས་ཡོད། 

དེ་ཡང་རྡོ་རྗེ་སློབ་དཔོན་ཞྭ་སེར་བསྟན་པའི་མངའ་བདག་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་དང་། བྱང་རྩེ་ཆོས་རྗེ་མཆོག་གཉིས་དབུ་བཞུགས་ཀྱིས་གདན་ས་ཆེན་པོ་གསུམ་དང་། དཔལ་ལྡན་རྒྱུད་གྲྭ་སྨད་སྟོད། གམ་བཅར་རྣམ་རྒྱལ་གྲྭ་ཚང་བཅས་ཀྱི་ཆོག་གྲྭ་བ་དགེ་འདུན་ཞལ་གྲངས་ ༢༣༡ སྐོར་ནས་སྐུ་ཚེ་ཚེ་སྒྲུབ་སྔོན་དུ་བཏང་ནས་བོད་ཟླ་ ༡༡ ཚེས་ ༢༠ གཟའ་སྐར་འཕྲོད་སྦྱོར་དགེ་བའི་ཉིན་མགོན་པོ་མཆོག་ལ་བརྟན་བཞུགས་བསྟར་འབུལ་ཆེད།  སྔ་དྲོ་ཆུ་ཚོད་༨།༠༠ ཐོག་རྡོར་གདན་དགའ་ལྡན་འཕེལ་རྒྱས་གླིང་ནས་གདན་ཞུས་ཀྱིས་གསུང་ཆོས་ར་བར་ཆིབས་བསྒྱུར་སྐབས་ཕེབས་ལམ་གཡས་གཡོན་དུ་དགེ་འདུན་པ་དང་ཝཱ་རཱ་ཎ་སཱའི་སློབ་ཟུར། འབྲུག་དང་ལ་དྭགས། ལ་ཧོ་ལི། འབྲས་ལྗོངས་པ། ཁལ་མུག་པ། མོན་པ་སོགས་ཀྱི་མི་འཐུས་རུ་སྒྲིག་དང་། བརྟན་བཞུགས་གོ་སྒྲིག་ཞུ་མཁན་ཚོགས་པ་ཁག་བཞིའི་འཐུས་ཚབ་ནས་སྤོས་སྣེ། སྤྱན་རྒྱ། སྤོས་འཛིན་དང་བཅས་གསུང་ཆོས་ར་བར་གདན་འདྲེན་ཞུས་ཏེ་བཞུགས་ཁྲི་རིན་པོ་ཆེར་༸ཞབས་སོར་འཁོད་མཚམས་བརྟན་བཞུགས་ཀྱི་དབུ་བཞུགས་ཁྲི་རིན་པོ་ཆེ་མཆོག་གིས་མཇལ་དར་རྐྱང་འབུལ་ཞུས་པ་དང་། དེ་རྗེས་ཞལ་འདོན་རྒྱུན་ཆགས་གསུམ་པ། ༸རྒྱལ་བའི་འཁྲུངས་རབས་གསོལ་བཅས་གསུང་མུར་གསོལ་ཇ་འབྲས་སིལ་རིམ་པར་ཕེབས། བརྟན་བཞུགས་དངོས་གཞིར་བླ་མ་ལྷར་བསྐྱེད་ནས་བཟླས་པའི་བར་ཆོག་གཞུང་ལྟར་ཕེབས་རྗེས་ཙ་རུའི་ཚོགས་འཁོར་འབུལ་བཞེས་གནང་ཞིང་། གསོལ་འདེབས་མཎྜལ་སྐབས་དབུ་བཞུགས་ཁྲི་རིན་པོ་ཆེ་མཆོག་གིས་མཎྜལ་ཚོམ་བུ་འདེགས་འབུལ་དང་། ཞལ་འདོན་ཚིག་བསྟུན་གྱིས་སྐུ་དང་། གསུང་། ཐུགས། བུམ་པ། རིགས་ལྔའི་མཚན་མ། ཚེ་ཆང་། ཚེ་རིལ། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད་དང་རྫས་བརྒྱད་བཅས་རིམ་པར་ཕུལ་ཞིང་། བྱང་རྩེ་ཆོས་རྗེས་མཇལ་ཁ་ཞུས་པ་དང་། དཔལ་ས་སྐྱ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས་མཎྜལ་འདེགས་འབུལ། དེ་བཞིན་བརྟན་བཞུགས་གོ་སྒྲིག་ཚོགས་ཆུང་གི་འཐུས་མི་བཅོ་ལྔ་ནས་མཇལ་ཁ་ཞུས་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་སྩལ་དོན། 

དེ་རིང་ཆོས་གྲོགས་རྣམ་པ་ཚོར་ཞུ་རྒྱུར། གནས་ཁྱད་པར་ཅན་རྡོ་རྗེ་གདན་དུ་བོད་རིགས་སེར་སྐྱ་གཙོ་བོར་གྱུར་པའི་སྤྱིར་སངས་རྒྱས་པའི་ཆོས་ལ་དོ་སྣང་ཡོད་པ་དང་། ཡང་སྒོས་ངོས་རང་སྒེར་ལ་དགའ་མོས་བྱེད་མཁན་འཛམ་གླིང་འདིར་མི་ཧ་ཅང་མང་པོ་ཞིག་ཡོད་པ་རེད། དེ་དག་ཚང་མས་སེམས་ཤུགས་འཁྱེར་ནས་དེ་རིང་བརྟན་བཞུགས་གནང་བ་རེད། ངོས་རང་ལ་ཆ་བཞག་ན་གང་ལྟར་ད་ལྟའི་བར་དུ་འཛམ་གླིང་འདིར་ཕན་ཐོགས་བྱས་པ་ལ་བསམ་བློ་གཏོང་དུས་རྗེས་སུ་ཡི་རངས་ཐོབ་སྡོད་པ་ཞིག་དང་། ཕྱིན་ཆད་ཡིན་ནའང་ད་དུང་ལོ་བརྒྱ་ཕྲག་གི་རིང་ལ་འཛམ་གླིང་འདིར་ཕན་ཐོགས་བྱེད་ཐུབ་པ་ཞིག་ཡོང་རྒྱུ་གསལ་བོ་རེད། 

ལྷག་དོན་འཛམ་གླིང་འདིར་རང་ཕྱོགས་དང་གཞན་ཕྱོགས་ཟེར་བའི་ཐོག་ནས། འཛམ་གླིང་སྤྱི་ཡོངས་ཀྱི་ཆ་ནས་འཛམ་གླིང་ཤར་ནུབ་དང་ལྷོ་བྱང་གི་ཐོག་ནས་ང་ཚོ་དང་ཁྱོད་ཚོ་ཟེར་བའི་བསམ་བློ་ཤུགས་ཆེན་པོ་ཡོད་པ་གསར་འགྱུར་ནང་མཐོང་སྡོད་པ་དེ་རེད། འཛམ་གླིང་གང་སར་མི་གཅིག་གྱུར་གྱི་འདུ་ཤེས་དེ་ཙམ་མེད་པར་ལྟ་གྲུབ་འདྲ་མིན་དང་། ཆོས་ལུགས་འདྲ་མིན། ས་བབ་ཀྱི་གནས་སྟངས་འདྲ་མིན་ཐོག་ནས་ང་ཚོ་དང་ཁྱོད་ཚོ་ཞེས་ཕྱོགས་དང་ཕྱོགས་འཛིན་བྱེད་པ་དགའ་རབ་ཤུགས་ཆེན་པོ་རེད། འཛམ་གླིང་འདིར་མི་དུང་ཕྱུར་བདུན་ཅུ་ལྷག་ཡོད་པ་མི་གཅིག་གྱུར་ཆགས་ཡོད་པས་དེའི་འདུ་ཤེས་ཐོག་ནས་རིམ་བཞིན་ཚང་མ་མཐུན་པོ་ཞིག་དང་། གཅིག་གིས་གཅིག་ལ་རོགས་བྱེད་པའི་འཛམ་གླིང་ཞིག་ཡོང་ཐུབ་པ་ཞིག་ལ་ངོས་ཀྱིས་རེ་བརྒྱབ་བསྡད་ཡོད་ལ། ག་ཚོད་ཐུབ་ཐུབ་ཀྱིས་མི་གཅིག་གྱུར་ཡིན་པ་བཤད་སྡོད་ཀྱི་ཡོད། འཛམ་གླིང་འདིའི་སྟེང་གི་མི་ཚང་མ་སྐྱེས་པའི་སྐབས་སུ་མའི་ནུ་ཞོས་གསོས་པ་གཅིག་པ་ཡིན་པས་མི་ཚེ་འདིའི་རིང་ལ་མི་གཅིག་གྱུར་གྱི་འདུ་ཤེས་ཐོག་ནས་ཕན་ཚུན་ལ་རོགས་རམ་དང་ཕན་ཐོགས་བྱེད་པ་མ་གཏོགས་ང་ཚོ་དང་ཁྱོད་ཚོ་ཞེས་པའི་སྐད་ཆ་དེ་མི་དགོས་པ་རེད།  

ངོས་ཀྱིས་འཛམ་གླིང་གང་སར་མི་གཅིག་གྱུར་ཞེས་པ་བཤད་ཀྱི་ཡོད། དེ་རིང་འདིར་ཡང་ཆོས་ལུགས་འདྲ་མིན་དང་། ལུང་པ་འདྲ་མིན། འཛམ་བུ་གླིང་གི་མི་རིགས་ཀྱི་ཁ་དོག་ཐོག་ནས་བཤད་ནའང་སྣ་ཚོགས་པ་ཡོད་ཀྱང་། ང་ཚོ་ཚང་མ་འདིར་མི་གཅིག་གྱུར་གྱི་གནས་སྟངས་ཐོག་ནས་སྤྲོ་སེམས་འཁོར་བའི་ངང་རུབ་རུབ་བྱས་པ་རེད། ཚང་མ་ལྷག་བསམ་རྩེ་གཅིག་བྱས་ཏེ་འདིར་འཁོད་པ་དེ་ལ་ཐུགས་རྗེ་ཆེ་ཞུས་ཞུ་རྒྱུ་ཡིན། ཞེས་སོགས་མི་རིགས་དང་ཆོས་ལུགས། རྒྱལ་ཁབ་སོགས་ཀྱི་དབྱེ་འབྱེད་སོགས་ག་ལེར་ཇེ་ཉུང་དུ་གཏང་ཐུབ་པ་དང་། གཏོང་དགོས་པའི་སྐོར་ལ་བཀའ་སློབ་སྩལ་བ་དང་། 

གཞན་ཡང་། ངོས་རང་ལ་མཚོན་ན་མདོ་སྨད་ཙོང་ཁའི་ཡུལ་ནས་ཡོང་བ་རེད། དབུས་གཙང་ཁུལ་དུ་བསྡད་པ་དང་། དེ་ནས་བཙན་བྱོལ་བ་ཆགས་པ་རེད། ངོས་ཀྱི་བསམ་བློའི་ནང་དུ་ང་ཚོ་མདོ་སྨད་པ་ཡིན་བསམ་པ་ལྟ་བུའི་བསམ་བློའི་དབྱེ་བ་གཏན་ནས་མེད། མི་གཅིག་གྱུར་གྱི་འདུ་ཤེས་ཐོག་ནས་ཚང་མར་ག་ཚོད་ཐུབ་ཐུབ་ཀྱིས་དངོས་དང་ཤུགས་ནས་ཕན་ཐོགས་བྱེད་ཐུབ་པའི་སེམས་ཤུགས་འཁྱེར་གྱི་ཡོད། ཆོས་གྲོགས་ཚང་མས་མི་གཅིག་གྱུར་གྱི་འདུ་ཤེས་ཐོག་ནས་གཅིག་གིས་གཅིག་ལ་ཕན་འདོགས་པ་དང་། འཛམ་གླིང་ལ་དོན་དམ་གྱི་ཞི་བདེ་ཡག་པོ་ཞིག་ཡོང་ཐུབ་རྒྱུ་དགོངས་པར་ཆོངས།  དེ་རིང་བརྟན་བཞུགས་ཕུལ་མཁན་ཁྱོད་ཚོ་དང་། ༸བདག་ཁྲི་རིན་པོ་ཆེས་མཚོན་པའི་འདིར་བཞུགས་རྣམས་དད་པ་དམ་ཚིག་གཡེལ་བ་མེད་པའི་ཐོག་ནས་བརྟན་བཞུགས་གསུང་པ་རེད། ཐུགས་རྗེ་ཆེ་ཞུ་རྒྱུ་ཡིན། 

དེ་རིང་སྤྱི་ལོའི་ལོ་གསར་ལ་འཁེལ་ཡོད། ལོ་གསར་པ་འདིའི་རིང་ལ་འཛམ་གླིང་འདིར་ང་ཚོ་དང་ཁྱོད་ཚོ་ཟེར་བའི་འཐེན་འཁྱེར་ལོ་རྙིང་པའི་ནང་རྫོགས་པར་ཆ་བཞག་སྟེ། ལོ་གསར་པའི་ནང་དུ་མི་གཅིག་གྱུར་གྱི་འདུ་ཤེས་ཐོག་ནས་གཅིག་གིས་གཅིག་ལ་རོགས་བྱེད་པ་མ་གཏོགས་འཐེན་འཁྱེར་གྱི་སྐད་ཆ་མེད་པ་བྱོས། འཛམ་གླིང་འདི་ནི་མི་དུང་ཕྱུར་བདུན་ཅུ་ལྷག་ཡོད་པ་ཚང་མའི་སྤྱི་བའི་འཛམ་གླིང་ཆགས་ཡོད། དེའི་ནང་ང་ཚོ་དང་ཁྱོད་ཚོ་ཞེས་རྩོད་རྒྱག་པ་དང་ཕྱོགས་དང་ཕྱོགས་འཐེན་བྱེད་པའི་གཞི་རྩ་ཁོ་རང་མི་འདུག ང་ཚོ་སངས་རྒྱས་པའི་ཆོས་པ་ཚོས་སེམས་ཅན་ཐམས་ཅད་ཟེར་གྱི་ཡོད། སྔོན་ལ་སྲིད་པ་གསུམ་གྱིས་མཚོན་པའི་སེམས་ཅན་ཐམས་ཅད་བསམ་མ་ཐུབ་ནའང་། འཛམ་གླིང་འདི་ཡི་མི་དུང་ཕྱུར་བདུན་ཅུ་ལྷག་ཡོད་པ་ལ་གཅིག་གྱུར་གྱི་འདུ་ཤེས་ཐོག་ནས་ཕན་ཚུན་ལ་འཆམ་པོ་དང་རོགས་བྱེད་དགོས། དེ་རིང་སྤྱི་ལོའི་ལོ་གསར་ཆགས་ཡོད་པས་ཚང་མར་བཀྲ་ཤིས་བདེ་ལེགས་ཞུ་རྒྱུ་ཡིན། ཞེས་དང་། 

འཛམ་གླིང་འདིར་ཧ་ཅང་ཚ་བ་རྒྱས་པ་དང་། ཡང་ས་ཆ་ཁ་ཤས་ལ་ས་འགུལ་བརྒྱབ་པའི་འབྱུང་བའི་གནོད་པའི་གནས་ཚུལ་ཡོང་གི་ཡོད། དེ་དག་ཚང་མའི་ཆེད་དུ་སྨོན་ལམ་རྒྱག་པ་དང་། ག་ཚོད་ཐུབ་ཐུབ་ཀྱིས་རོགས་བྱེད་དགོས། རྒྱ་ནག་ལ་ཆ་བཞག་ན་ས་ཆ་ཁ་ཤས་ལ་ཆར་བ་ཧ་ཅང་དཀོན་པོ་དང་། ས་ཆ་ཁ་ཤས་ལ་གངས་ཆར་ཤུགས་ཆེན་བབ་ནས་དཀའ་ངལ་འཕྲད་ཀྱི་འདུག དཀའ་ངལ་དེ་དག་རིམ་བཞིན་ཇེ་ཉུང་དུ་འགྲོ་བར་ང་ཚོ་ཚང་མས་སྨོན་ལམ་རྒྱག་རྒྱུ་ཧ་ཅང་གལ་ཆེན་པོ་རེད། ང་ཚོ་ཆོས་པ་རེད། འཛམ་གླིང་འདིར་འགྲོ་བ་མིའི་རིགས་ལ་དཀའ་ངལ་འཕྲད་པ་སེལ་བའི་ཆེད་དུ་སྐབས་སུ་བབ་པ་འཕགས་པ་སྤྱན་རས་གཟིགས་ལ་གསོལ་བ་བཏབ་སྟེ་མ་ཎི་ཕྲེང་སྐོར་གཅིག་བསག་ཤོག ཅེས་མ་ཎི་ཕྲེང་སྐོར་རེ་བསགས་པ་དང་།  དེ་རྗེས་སེམས་པ་བཟང་པོ་བློ་གྲོས་ཀྱི་རྣམ་དཔྱོད་དང་ཟུང་དུ་འབྲེལ་ན་ཡག་པོ་འདུག དེ་མིན་སེམས་པ་བཟང་པོ་གཅིག་པུས་དེ་ཙམ་གྱིས་ནུས་པ་ཐོན་ཐུབ་པ་ཁག་པོ་འདུག ཤེས་རབ་ཧ་ཅང་གལ་ཆེན་པོ་རེད། དེར་བརྟེན། ཨ་ར་པ་ཙ་ཏོག་ཙམ་གསོག་ཅེས་བཀའ་སློབ་དང་འབྲེལ་ཨ་ར་པ་ཙ་བགྲང་གསོང་མཛད། 

མུ་མཐུད་དུ་བཀའ་སློབ་སྩལ་དོན། སེམས་པ་བཟང་པོ་བྱེད་པ་དང་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་འཕྲལ་ཕུགས་རྒྱང་གསུམ་གྱི་གནས་ཚུལ་ལ་ཞིབ་འཇུག་བྱས་ཏེ། རང་གཞན་ཚང་མ་ཕུང་ལ་སྦྱོར་བའི་བརྣབ་སེམས་གནོད་སེམས་སོགས་ཇེ་ཉུང་ལ་བཏང་། ཀུན་ལ་ཕན་ཐོགས་བྱེད་པའི་གཞན་ཕན་གྱི་བློ་གོང་ནས་གོང་དུ་སྤེལ་དགོས། དེ་ཡང་གླེན་པ་གཏི་མཐུག་གི་སྐད་ཆ་མིན་པར་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱི་གྲོགས་དང་བཅས་པའི་ཐོག་ནས་གཞན་ཕན་སྒྲུབ་རྒྱུ་ང་ཚོ་ཚང་མར་སྐབས་སུ་བབ་པའི་ལས་འགན་རེད་ལ། མི་ལུས་ཐོབ་པའི་གོ་ཆོད་པ་ཞིག་བྱེད་དགོས་པ་རེད། ཅེས་བཀའ་སློབ་སྩལ་བ་དང་། 

མཐར་གཏང་རག་མཎྜལ་སྐབས་དགེ་ལྡན་སྨོན་ལམ་ཚོགས་པའི་འཐུས་ཚབ་ནས་མཎྜལ་རྟེན་གསུམ་འདེགས་འབུལ་དང་། འཐུས་ཚབ་ཁག་ནས་མཇལ་ཞུས་མཚམས་ཉི་གཞོན་འཆར་ཀ་མ་དང་། རིས་མེད་བསྟན་རྒྱས་སྨོན་ལམ། བདེན་ཚིག་སྨོན་བཅས་གསངས་རེ་བརྟན་བཞུགས་བསྟར་འབུལ་ལེགས་པར་གྲུབ་སྟེ། ཕོ་བྲང་དུ་གདན་ཞུའི་ཕེབས་ལམ་དུ་སྔར་བཞིན་སྤོས་སྣེ་དང་བཅས་ཆིབས་བསྒྱུར་བསྐྱངས་ཡོད་པ་དང་། ཕྱི་ལོ་གསར་ཚེས་ཀྱི་ཉིན་དང་པོར་མགོན་པོ་གང་ཉིད་མཆོག་ལ་ཕུལ་བའི་བརྟན་བཞུགས་བསྟར་འབུལ་འདིར། དཔལ་ས་སྐྱ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། དགའ་ལྡན་ཁྲི་པ་བརྒྱ་དང་བཞི་པ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག དཔལ་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག ས་སྐྱ་ཁྲི་འཛིན་མཆོག ཇོ་ནང་རྒྱལ་ཚབ་རིན་པོ་ཆེ། བྱང་རྩེ་ཆོས་རྗེ། ཀུན་བདེ་གླིང་རིན་པོ་ཆེ། གླིང་རིན་པོ་ཆེ། ཀིརྟི་སྐྱབས་མགོན་རིན་པོ་ཆེ། རྣམ་གྲྭ་མཁན་རིན་པོ་ཆེ། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་སོགས་ཀྱིས་གཙོས་སེར་སྐྱ་སྟོང་ཕྲག་མང་པོ་ཆེད་བཅར་གནང་ཡོད་པ་རེད།