ཕྱོགས་གཅིག་ནས་མའོ་ཙེ་ཏུང་དང་ཧེ་ཊི་ལིར་ལ་བསམ་བློ་ཐོངས། ཕྱོགས་གཞན་ཞིག་ནས་རྗེ་བཙུན་མི་ལ་རས་པ་དང་རྗེ་ཙོང་ཁ་པ་ལྟ་བུའི་འུ་ཅག་གི་དམ་པ་གོང་མ་རྣམས་ལ་བསམ་བློ་ཐོངས་དང་། ཁོ་ཚོ་ཚང་མ་ཚེ་སྲོག་དང་རྣམ་དཔྱོད་ལྡན་པའི་འགྲོ་བ་མི་ཡིན་པའི་ཆ་ནས་གཅིག་པ་རེད་དེ། མའོ་ཙེ་ཏུང་དང་ཧེ་ཊི་ལིར་ལྟ་བུའི་མི་ནི་དེང་སྐབས་མཐོང་ཆུང་གི་ཡུལ་དུ་གྱུར་ཡོད་ལ། ཁོ་ཚོའི་གཏོས་ཆེ་བའི་བྱ་སྤྱོད་ངན་པ་རྣམས་ཧ་ལས་པའི་ཡུལ་དུ་གྱུར་ཡོད། འོན་ཀྱང་། མི་ཚོས་བོད་ཀྱི་རྣལ་འབྱོར་པ་ཆེན་པོ་རྗེ་བཙུན་མི་ལ་རས་པ་དང་། རྗེ་ཙོང་ཁ་པའི་སྐོར་ལ་བསམ་བློ་གཏོང་སྐབས། རང་ལ་ཁོང་རྣམ་པས་སྐུལ་ལྕག་ཐེབས་པའི་རེ་བ་བྱེད་པ་དང་། དེ་དག་ལ་དད་མོས་ཀྱིས་སྐྱབས་སུ་འགྲོ། ཁོ་ཚོར་འགྲོ་བ་མིའི་ནུས་སྟོབས་གཅིག་མཚུངས་སུ་ཡོད་ཀྱང་། ཁོ་ཚོའི་བྱ་སྤྱོད་ལ་བརྟེན་ནས་ང་ཚོས་དེ་དག་ལ་ལྟ་སྟངས་མི་འདྲ་བ་འཛིན་གྱི་ཡོད། མའོ་ཙེ་ཏུང་དང་ཧེ་ཊི་ལིར་གཉིས་ཀྱི་གནས་སྟངས་ལ་མཚོན་ན། འགྲོ་བ་མིའི་རྣམ་དཔྱོད་དེ་གཏོར་བཤིག་གི་ཆེད་དུ་བཀོལ་ཞིང་། རྗེ་མི་ལ་རས་པ་དང་རྗེ་ཙོང་ཁ་པ་གཉིས་ཀྱི་གནས་སྟངས་ལ་མཚོན་ན། འགྲོ་བ་མིའི་རྣམ་དཔྱོད་དེ་ཕན་ནུས་ལྡན་པར་བཀོལ་སྤྱོད་གནང་ཡོད།
(འཚོ་བའི་ཁྲོད་ཀྱི་དགའ་སྤྲོ་དང་། འཆི་བའི་སྐབས་ཀྱི་ཞི་བདེ། ༡༩༩༧ ལོར་ཨ་རིའི་གྲོང་ཁྱེར་ཉིག་ཡོག་ཏུ་རྟེན་གཞི་བྱས་པའི་ཧར་ཕེར་ཁོ་ལེན་སི་དཔེ་སྐྲུན་ཁང་གིས་ཐོག་མར་དཔར་སྐྲུན་བྱས་ཤིང་། ༡༩༩༨ ལོར་རྒྱ་གར་ནང་གི་ཧར་ཕེར་ཁོ་ལེན་སི་དཔེ་སྐྲུན་ཁང་ནས་བསྐྱར་དུ་དཔར་སྐྲུན་བྱས་པ་བློ་བཟང་བདེ་ཆེན་གྱིས་བོད་བསྒྱུར་ཞུས་པ་ལས་བཏུས།)
