ལེགས་བཤད་གཅེས་བཏུས།

ཉེ་བའི་ལོ་ངོ་བཅུ་ཕྲག་ནང། འཛམ་གླིང་གི་ས་ཁུལ་གཞན་ལྟར་ཁུལ་དེ་ཆོས་ལུགས་རིས་མེད་དུ་གྱུར་པ་དང་། ཡུལ་གཞན་ནས་གནས་སྤོས་པའི་རྐྱེན་གྱིས་ད་དུང་རིག་གཞུང་སྣ་ཚོགས་དང་ཆོས་ལུགས་སྣ་ཚོགས་སུ་གྱུར། འགྱུར་པ་དེ་དག་ལ་བསམ་ཞིབ་བྱས་ན། སྲོལ་རྒྱུན་ཆོས་ཕྱོགས་ཀྱི་ཐབས་ལམ་ཐོག་ལ་བློས་འགེལ་ཞེ་དྲག་མ་བྱས་པར། ཞིང་ཆེན་གྱི་དཔོན་རིགས་ཚོས་སློབ་གྲྭ་ཁག་གི་ནང་བཟང་སྤྱོད་སློབ་ཁྲིད་བྱེད་པའི་ཐབས་ལམ་གསར་པ་ཞིག་འཚོལ་སྒྲུབ་བྱེད་བཞིན་ཡོད། སློབ་ཚན་འཆར་གཞི་ཇི་ལྟར་ཡར་རྒྱས་གཏོང་ངམ། ལོ་ཚོད་འདྲ་མིན་ལ་སློབ་ཁྲིད་ཇི་ལྟར་བྱེད་དམ་ཞེས་པའི་དམིགས་བཀར་གྱི་དྲི་བ་དེ་དག་ཤེས་ཡོན་ཁྱབ་ཁོངས་ཁྲོད་ཆེད་ལས་པ་དང་། སེམས་ཁམས་ཡར་རྒྱས། འབྲེལ་ཡོད་ཀྱི་སློབ་གཞི་བཅས་ལ་གནད་འགག་ཡིན་སྟབས་ངོས་ནས་དེའི་ཐོག་བློ་སྐྱེད་ཕྲན་བུ་ཕུལ་ཡོད། འོན་ཀྱང་སྤྱིར་བཏང་གི་ཐབས་ལམ་ཐོག་བཟང་སྤྱོད་ལ་འཇུག་པར་ཆོས་ལུགས་ལ་མ་བརྟེན་པའི་ཐབས་ལམ་ཐད་གཞི་རྩའི་རྩ་འཛིན་དེ་ལྷད་མེད་པའི་ཡོངས་ཁྱབ་ཅིག་དགོས་རྒྱུ་གལ་ཆེན་པོ་ཡིན་སྐོར་ངོས་ཀྱི་མཐོང་ཚུལ་སྤེལ་ཡོད། དེ་བཞིན་ཡིད་ལ་བྱེད་པའི་རྒྱུན་སྲོལ་གྱི་སྦྱོང་བརྡར་དང་ནང་སེམས་ཀྱི་རིན་ཐང་རྒྱུད་སྦྱོང་བྱེད་པས་མི་མང་པོར་ཁེ་ཕན་ཡོད་སྐོར་ངོས་ཀྱི་མཐོང་ཚུལ་ཡང་སྤེལ་ཟིན། བསམ་བློའི་ནང་དེ་ཡོད་པའི་ཐོག་ནས་དཔེ་དེབ་འདིའི་སྡེ་ཚན་གཉིས་པའི་ནང་དེ་དག་ལས་ཁག་ཅིག་ངོས་ནས་རྒྱས་བཤད་བྱས་ཡོད། སློབ་ཁྲིད་ཐབས་ལམ་རིག་པའི་དྲི་བའི་ཐོག་ངོས་ཀྱི་སྔོན་ཆད་དང་ད་ལྟའི་བསམ་འཆར་གཅིག་པུ་དེ་ནི། དྲན་དགོས་པ་ཞིག་ལ། ཡ་རབས་བཟང་སྤྱོད་ཀྱི་གོ་རྟོགས་དང་ནང་སེམས་ཀྱི་རིན་ཐང་ཐོག་སློབ་ཁྲིད་བྱེད་སྐབས། གནས་ཚུལ་འགྲེལ་བརྗོད་བྱེད་པ་ཙམ་གྱིས་རྩ་བ་ནས་མི་ལྡང་བར། དཔེ་དང་སྦྱར་ཏེ་སློབ་རྒྱུ་ནི་གཙོ་གནད་ཆེ་ཤོས་ཤིག་ཡིན། གལ་ཏེ་དགེ་རྒན་གྱིས་བཟང་པོའི་རིན་ཐང་ཐོག་གཏམ་བཤད་བྱེད་ཅིང་། དེའི་ཕན་ཡོན་རྒྱས་སྤྲོས་བྱེད་པ་དང་ཆབས་ཅིག་རང་གིས་གང་བརྗོད་པ་དེ་སོ་སོའི་མྱོང་བའི་ཐོག་ནས་གསལ་ཁ་འདོན་མི་ཐུབ་ན། སློབ་ཕྲུག་རྣམས་ཀྱིས། དགེ་རྒན་གྱིས་གང་གསུངས་པ་རྣམས་དབང་མེད་དུ་བཀོལ་བ་ལྟ་བུར་མཐོང་སྲིད། ཕྱོགས་གཞན་ཞིག་ནས། གལ་སྲིད་དགེ་རྒན་རྣམས་ཀྱིས་སློབ་ཕྲུག་ཚོར་བཅོས་མིན་གྱི་སེམས་ཁུར་ལྡན་པའི་ཐོག་ནས། སེམས་པ་བཟང་པོ་སོ་སོའི་སྤྱོད་ལམ་གྱི་མྱོང་བའི་ཆ་ཤས་སུ་སྒྲིལ་ཐུབ་ན། རང་གིས་གང་གསུངས་པ་རྣམས་གནད་ལ་སྨིན་པ་ཞིག་ཡོང་ཐུབ། 

ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།
 

ཁོང་ཁྲོའང་རྟག་ཏུ་གནོད་འཚེ་ཅན་ཞིག་མིན་ཀྱང་། དཔེར་ན། གནས་སྟངས་འགའ་ཞིག་ཁྲོད་སྙིང་རྗེ་ཤུགས་དྲག་པོས་དྲང་བདེན་མིན་པ་ཞིག་གི་ཐད་ཡིད་མ་རངས་པའི་ཚོར་བ་ཤུགས་ཆེན་པོ་ཞིག་སློང་སྲིད། དེ་ནི་ཁོང་ཁྲོ་ཡིན། མ་ཟད་ཁོང་ཁྲོས་འཕྲལ་དུ་ང་ཚོའི་སེམས་ཀྱི་རིག་པ་སྒྲིམ་ཤུགས་ཆེ་བ་བཟོ་བ་དང་ང་ཚོར་ཐོལ་བྱུང་གི་ནུས་ཤུགས་དང་ཆོད་སེམས་འཕར་མ་ཞིག་སྦྱིན་གྱི་ཡོད། དེ་ལྟའི་ལམ་ནས་གནས་སྟངས་ངེས་ཅན་ཞིག་གི་ཁྲོད། ང་ཚོས་ལས་དོན་གང་ཞིག་མཐར་སྐྱེལ་བ་དང་ཚུལ་བཞིན་དུ་གང་འཚོལ་སྒྲུབ་བྱེད་པ་ལེགས་གྲུབ་ཡོང་བར་ཁོང་ཁྲོས་གཞོགས་འདེགས་བྱེད་ཐུབ། དེ་ལྟ་ནའང་། ཁོང་ཁྲོའི་གནས་སྟངས་དེ་ལས་བརྒལ་བའི་ཚེ། དེས་ང་ཚོར་སྟེར་བའི་ནུས་ཤུགས་མང་ཆེ་བར་ཕན་ཐོགས་ཅི་ཡང་མེད། སྐབས་ཤིག་ལ། ཧ་ལམ་ང་ཚོ་ཚང་མ་མི་གཞན་གྱི་ཁོང་ཁྲོའི་ཡུལ་དུ་གྱུར་མ་མྱོང་བ་མེད་སྟབས། ཚང་མས་དེའི་འབྲས་བུ་ངན་པ་རྣམས་མྱངས་ཡོད། གང་ལྟར་ཡང་སྐབས་འགར་ཁོང་ཁྲོ་ལ་ཕན་ཐོགས་ཆེ་བའི་ཁྱད་ཆོས་ལྡན་ནའང་ཞེ་སྡང་ལ་རྩ་བ་ནས་མེད། ཞེ་སྡང་ནི་དུས་རྟག་ཏུ་གནོད་འཚེ་ཅན་ཞིག་ཡིན། 

ཁོང་ཁྲོ་བཞིན། འཇིགས་སྣང་ཡང་རྣམ་པ་ཀུན་ཏུ་གནོད་འཚེ་ཅན་ཞིག་མ་ཡིན། འཇིགས་སྣང་གིས་ང་ཚོ་བག་ཟོན་ཆེ་བ་བཟོ་བ་དང་ཉེན་ཁ་ལས་སྲུང་སྐྱོབ་བྱེད་ཀྱི་ཡོད། དེ་ནི་ད་དུང་སྟོབས་ཤུགས་ཆེ་བའི་ཀུན་སློང་གི་ཆ་རྐྱེན་ཞིག་ཡིན་ཞིང་། ང་ཚོའི་བདེ་ཐབས་ལ་ཟོན་བྱེད་དགོས་པ་དང་ལྟ་སྐྱོང་བྱེད་པར་ནན་སྐུལ་བྱེད་ཀྱི་ཡོད། འོན་ཀྱང་འཇིགས་སྣང་ཚད་ལས་བརྒལ་སྐབས། དེས་ང་ཚོའི་རྒྱུན་ལྡན་གྱི་བྱ་བར་འགོག་རྐྱེན་བཟོ་ཞིང་གནོད་ཚབས་ཧ་ཅང་ཆེ་བའི་སེམས་ཀྱི་གནས་སྟངས་ཤིག་ཆགས་ཀྱི་ཡོད། དེར་མ་ཟད་ཚད་ལས་བརྒལ་བའི་འཇིགས་སྣང་གིས་ཟློག་དཀའ་བའི་སེམས་སྡུག་གི་གནས་སྟངས་ཤིག་སློང་ཞིང་། དེ་ནི་ང་ཚོའི་འཕྲོད་བསྟེན་ལ་གནོད་ཚབས་ཆེ། དེར་བརྟེན་ངོས་ནས་རྒྱུན་དུ་རྒྱུ་མཚན་ལྡན་པའི་འཇིགས་སྣང་དང་རྒྱུ་མཚན་མི་ལྡན་པའི་འཇིགས་སྣང་དབར་ཁྱད་པར་འབྱེད་ཀྱི་ཡོད།


ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།

གཞན་ལ་ཞབས་འདེགས་སྒྲུབ་པའི་གལ་ཆེའི་ཆ་ཤས་ཤིག་ནི་རྣམ་དཔྱོད་བེད་སྤྱད་དེ་འབྱུང་སྲིད་པའི་ང་ཚོའི་བྱ་སྤྱོད་ཀྱི་འབྲས་བུར་དཔྱད་ཞིབ་བྱེད་རྒྱུ་དེ་ཡིན། དེ་རྗེས་ང་ཚོའི་ཉིན་རེའི་མི་ཚེའི་ནང་བག་ཡོད་དང་། དྲན་པ། ཤེས་བཞིན་བཅས་བསྟེན་ནས། ང་ཚོས་སོ་སོའི་བྱ་སྤྱོད་དང་ངག་ལ་ཚོད་འཛིན་ཐུབ་པ་ཡོང་གི་ཡོད། དེ་ནི་རང་དབང་གི་གཞི་རྟེན་ངོ་མ་ཡིན་ཞིང་། རང་གིས་རང་ལ་ཚོད་འཛིན་བྱེད་པའི་ནུས་པ་ཐོབ་པ་དང་གནས་སྐབས་གང་དུའང་ང་ཚོའི་བྱ་སྤྱོད་འཚེ་བ་མེད་པར་ངེས་བརྟན་བཟོ་ཕྱིར་དེ་བེད་སྤྱོད་བྱས་ཏེ། གཞན་ལ་ཕན་འདོགས་ཆེད་ང་ཚོས་ཧུར་སྐྱེད་ཆེན་པོས་ལས་དོན་སྒྲུབ་འགོ་འཛུགས་ཐུབ།

ཆོས་ལུགས་ཀྱི་མཚམས་ལ་ས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།། 
 

རྒྱ་གར་བྱང་ཕྱོགས་ཀྱི་རི་སྒང་གྲོང་རྡལ་ཞིག་ཏུ་ཆགས་པའི་དྷ་རམ་ས་ལའི་ངོས་ཀྱི་སྡོད་གནས་འདི་ནི་ཕྱི་ལོ་ ༡༩༦༠ ཐམ་པའི་འགོ་སྟོད་ནས་བཟུང་ངའི་ནང་ཆགས་པ་དང་། འཆར་ཅན་ཞོགས་པ་ཆུ་ཚོད་གསུམ་དང་ཕྱེད་ཀ་ཙམ་ལ་ལང་རྒྱུ་ནི་ངའི་ཉིན་རེའི་གོམས་གཤིས་ཡིན། དེ་རྗེས་ཆུ་ཚོད་ཁ་ཤས་རིང་སེམས་ཀྱི་སྦྱོང་བརྡར་དང་སྒོམ་སྒྲུབ་གྲུབ་རྗེས། སྤྱིར་བཏང་ནས་རླུང་འཕྲིན་ཐོག་ནས་འཛམ་གླིང་གི་གསར་འགྱུར་ཉན་ཞིང་། མང་ཆེ་བ་དབྱིན་ཇིའི་རྒྱང་བསྒྲགས་ལས་ཁུངས་ཀྱི་(BBC)གསར་འགྱུར་རྒྱང་བསྲིང་ཁག་ཉན་གྱི་ཡོད། འཛམ་གླིང་ནང་གི་གནས་ཚུལ་ཁག་ལ་རྒྱུས་མངའ་ཡོང་བའི་ལམ་ཞིག་ཏུ། དེ་ནི་ལོ་མང་རིང་ངོས་ནས་ལག་བསྟར་བྱེད་མུས་སུ་ཡོད་པའི་འཆར་ཅན་གྱི་བྱེད་སྒོ་ཞིག་ཡིན། 

དངུལ་དང་དཔལ་འབྱོར། དུས་ཀྱི་གཉན་འཕྲང་། དཀའ་རྙོག དམག་འཁྲུག་སྐོར་གྱི་རྒྱུན་ཆད་མེད་པའི་སྙན་ཐོར་ངོས་ནས་ཉན་འཇོག་བྱེད་སྐབས། འཛམ་གླིང་ནང་ང་ཚོར་འཕྲད་བཞིན་པའི་ལྐོག་ཟ་རུལ་སུངས་དང་། ཁོར་ཡུག ཆབ་སྲིད་སོགས་ཀྱི་རྙོག་འཛིངས་ཆེ་བའི་དཀའ་ངལ་རྣམས་ནི། བཟང་སྤྱོད་དང་ནང་སེམས་ཀྱི་རིན་ཐང་ཉམས་རྒུད་དུ་ཕྱིན་པའི་མཇུག་འབྲས་སུ་ངེས་པའི་བསམ་བློ་ཞིག་ངོས་ལ་ཧ་ལམ་རྒྱུན་དུ་འཁོར་གྱི་འདུག །རིམ་པ་ཚང་མའི་ཐོག་རང་སྒྲིག་རང་སྲུང་གིས་ཕོངས་པ་ང་ཚོས་མཐོང་གི་ཡོད། དཀའ་ངལ་མང་པོ་ཞིག་ནི་རྣམ་དཔྱོད་བེད་སྤྱོད་གཏོང་མི་ཐུབ་པ་དང་། མིག་རྒྱང་ཐུང་ཐུང་ངམ་བློ་རྒྱ་ཆུང་བའི་ཉེར་ལེན་ལ་བརྟེན་ནས་བྱུང་། 

དཀའ་ངལ་བྱེ་བྲག་པའི་རྒྱུ་རྐྱེན་རྣམས་རྙོག་འཛིངས་ཧ་ཅང་ཆེན་པོ་ཡོད་པ་སྨོས་མ་དགོས། དཔེར་ན། མི་རིགས་ཀྱི་དྲག་སྤྱོད་དང་། གྱེན་ལོག དམག་འཁྲུག་བཅས་ཀྱི་རྐྱེན་རྩ་ནི། ཕལ་ཆེར་འགྱུར་བ་མེད་པར་ལོ་ངོ་བཅུ་ཕྲག་གམ་ཐ་ན་དུས་རབས་ཁ་ཤས་སྔོན་ནས་འགོ་ཚུགས་ཡོད། འོན་ཀྱང་ང་ཚོས་འགྲོ་བ་མིའི་དཀའ་རྙོག་དང་། དབུལ་ཕོངས། ཡང་ན་ཁོར་ཡུག་གཏོར་སྐྱོན་བཅས་གང་གི་སྐོར་ཤོད་ཀྱི་ཡོད་ཀྱང་། གལ་ཏེ་ད་དུང་ང་ཚོར་དཀའ་ངལ་དེ་དག་དངོས་གནས་རྩ་འགོག་གཏོང་རྒྱུའི་དོ་དབྱིངས་མཆིས་ཚེ། མཐར་གཏུགས་ན་དེ་དག་བཟང་སྤྱོད་ཀྱི་གནད་དོན་དང་འབྲེལ་ཡོད་པ་ང་ཚོས་ངོས་འཛིན་བྱེད་དགོས།

 ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།

ད་ལྟའི་བར་དུ་ངོས་ནས་གཞན་གྱི་བདེ་དོན་ལ་བཅོས་མིན་གྱི་སེམས་ཁུར་བྱེད་པའི་ཀུན་སློང་ཁྱད་པར་ཅན་སྙིང་རྗེའི་གལ་གནད་ལ་ནན་ཏན་བྱས་ཡོད། དེ་ནི་བཟང་སྤྱོད་དང་ནང་སེམས་ཀྱི་བདེ་ཐབས། ཐ་ན་དྲང་བདེན་གོ་རྟོགས་ཀྱི་གཞི་རྟེན་བཅས་ཀྱི་རྨང་གཞི་ཆགས་ཡོད། ང་ཚོ་འགྲོ་བ་མིའི་ཁྱད་ཆོས་ཐུན་མོང་བ་དང་ལུས་པོའི་གྲུབ་ཆའི་རང་བཞིན་གྱི་ཆ་ནས་ང་ཚོ་རང་གི་བདེ་སྐྱིད་གཞན་ལ་བརྟེན་ནས་ཡོང་དགོས་པའི་སེམས་ཅན་ཞིག་ཡིན་པ་ངོས་འཛིན་བྱེད་པས། ང་ཚོས་ཁ་གསལ་གཏིང་གསལ་བྱེད་རྒྱུ་ཤེས་པ་དང་། དེ་ལྟར་བྱེད་པས་ང་ཚོར་དམིགས་ཡུལ་ལྡན་པའི་ཚོར་སྣང་ཞིག་དང་ང་ཚོའི་ཉེ་འཁོར་གྱི་མི་རྣམས་ལ་མཐུན་ལམ་གྱི་ཚོར་སྣང་ཞིག་ཡོང་གི་ཡོད། ད་དུང་ཡོངས་ཁྱབ་དང་ཕྱོགས་སུ་མ་ལྷུང་བའི་སྙིང་རྗེའི་གཞི་རྩ་དེ་ལས། བཟོད་པ་དང་། སེམས་བཟང་། དགོངས་ཡངས། རང་སྒྲིག་རང་སྲུང་། ཆོག་ཤེས་སོགས་ནང་སེམས་ཀྱི་བཟང་ཕྱོགས་ཀྱི་རིན་ཐང་ཚང་མ་འབྱུང་པར་ངོས་ནས་བསམ་ཚུལ་བཏོན་ཡོད། དེ་ལྟར་སྙིང་རྗེ་རྩ་བར་གྱུར་པའི་ཀུན་སློང་རྣམ་དག་ནི་བཟང་སྤྱོད་དང་སེམས་དོན་རིག་པའི་རྨང་གཞི་ཡིན་ནའང་། གལ་སྲིད་ང་ཚོས་ཆ་སྙོམས་པ་དང་ཁ་ཞེ་གཉིས་སུ་མེད་པའི་བཟང་སྤྱོད་ཀྱི་ཀུན་ཁྱབ་རྣམ་གཞག་ཅིག་སྒྲུབ་དགོས་ཀྱི་ཡོད་ན༑ དེ་ལས་གཞན་པའི་ཆ་རྐྱེན་ཞིག་ཧ་ཅང་གལ་ཆེན་པོ་ཆགས་ཡོད། ང་ཚོའི་ཀུན་སྤྱོད་ཚུལ་དང་མཐུན་པ་ཞིག་ཡོང་རྒྱུར་ཀུན་སློང་ནི་གལ་ཆེ་ཤོས་ཀྱི་ཆ་རྐྱེན་ཡིན་པ་དང་། དུས་མཚུངས་སོ་སོས་གདམ་ག་བྱས་པ་དེ་དོན་དངོས་དང་མཐུན་པ་ཞིག་དང་ང་ཚོའི་ཀུན་སློང་བཟང་པོ་དེ་ཆུད་ཟོས་སུ་མི་འགྲོ་བའི་ཆེད་དུ་ད་དུང་རྣམ་དཔྱོད་དགོས་ཀྱི་ཡོད། དཔེར་ན། གལ་སྲིད་ཆབ་སྲིད་པ་རྣམས་ཀྱིས་འབྱུང་སྲིད་པའི་འབྲས་བུར་བསམ་བློ་ཞིབ་ཚགས་མ་བཏང་བར་རང་གི་ལུང་པ་དམག་ལ་དྲངས་ན། ཐ་ན་སོ་སོའི་ཀུན་སློང་ལྷག་བསམ་ཟོལ་མེད་ཀྱི་སྙིང་རྗེའི་རང་བཞིན་ཞིག་ཡིན་ནའང་གྲུབ་འབྲས་ནི་ཆག་སྒོར་འགྱུར་སྲིད། དེར་བརྟེན་ཀུན་སློང་བཟང་པོའི་སྟེང་དུ་ག་རེ་དགོས་ཤེ་ན། རང་ཅག་གི་གནད་འགག་ཆེ་བའི་ནུས་པ་སྟེ་རྣམ་དཔྱོད་བེད་སྤྱོད་བྱེད་དགོས། རྣམ་དཔྱོད་བེད་སྤྱོད་བྱེད་པས་ང་ཚོས་དངོས་ཡོད་གནས་ཚུལ་དང་མཐུན་པའི་སྒོ་ནས་གནས་སྟངས་ལ་འབྲེལ་བ་བྱེད་ཐུབ་ཅིང་། ང་ཚོའི་ཀུན་སློང་བཟང་པོ་རྣམས་འབྲས་བུ་བཟང་པོར་མངོན་འགྱུར་ཡོང་ཐུབ། ད་དུང་རྣམ་དཔྱོད་ཀྱིས་ང་ཚོ་སྒེར་གྱི་བཟང་སྤྱོད་ཀྱི་གོ་རྟོགས་བསྐྲུན་པའི་ཐད་གལ་ཆེའི་བྱེད་སྒོ་སྒྲུབ་ཀྱི་ཡོད། ང་ཚོས་རྣམ་དཔྱོད་བེད་སྤྱོད་བྱེད་པ་ནི་རང་ཉིད་ཀྱི་གོ་རྟོགས་འཕེལ་བྱེད་ཀྱི་ཐབས་ལམ་ཡིན་པ་དང་། གོ་རྟོགས་ནི་ཤེས་བཞིན་གྱི་རྨང་གཞི་ཡིན། དེར་བརྟེན་རང་གཞན་གཉིས་ཀར་ཕན་ཐོགས་ཆེ་བའི་བཟང་སྤྱོད་ཀྱི་གོ་རྟོགས་ནི་རྫུ་འཕྲུལ་གྱི་ཐོག་ནས་མི་འབྱུང་བར། རྒྱུ་མཚན་ལ་བསམ་ནས་ཡོང་དགོས་པ་ཡིན། འདིའི་ཐད་བཟང་སྤྱོད་ཀྱི་གོ་རྟོགས་སྤེལ་བའི་གནད་དོན་ནི་ཤེས་ཡོན་སློབ་སྦྱོང་གཞན་གང་དང་ཡང་མི་འདྲ་བ་མེད། 

ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།
 

ང་རང་ཚོའི་མི་ཚེའི་ནང་འཕྲད་བཞིན་པའི་གནས་སྟངས་ཚང་མ་ལྷན་ཅིག་བྱེད་རྐྱེན་ཧ་ཅང་མང་པོ་ཞིག་འདུས་ནས་འབྱུང་གི་ཡོད། དེར་བརྟེན་གལ་ཏེ་ང་ཚོའི་རྣམ་འགྱུར་དོན་དངོས་དང་མཐུན་པ་ཞིག་དགོས་ན། གུ་ཡངས་པའི་ལྟ་ཚུལ་ཞིག་འཛིན་རྒྱུ་གལ་ཆེན་པོ་ཡིན། གནས་སྟངས་སམ་དཀའ་ངལ་བྱེ་བྲག་པ་གང་རུང་ཞིག་གི་ཐོག་ལ་ལྟ་ཚུལ་ཕྱོགས་གཅིག་ཁོ་ནས་བལྟ་བ་ནི་འགྲིག་གི་མེད། ང་ཚོས་དེར་ཕྱོགས་འདི་ནས་དང་དེ་ནས་ཞེས་ཕྱོགས་ཚང་མ་ནས་ལྟ་དགོས། ངས་རྒྱུན་དུ་བརྗོད་པ་བཞིན། ང་ཚོས་ངེས་པར་དུ་མདུན་དང་རྒྱབ་སྟེ་ཕྱོགས་གཉིས་དང། གཡས་ཕྱོགས་དང་གཡོན་ཕྱོགས་ཏེ་ཕྱོགས་གཉིས། སྟེང་དང་འོག་བཅས་ཕྱོགས་དྲུག་ནས་བལྟ་དགོས། ང་ཚོས་དེ་ལྟར་བྱེད་པ་དང་། དེ་ལྟའི་རྒྱ་ཆེ་ས་ཞིག་གམ་ཕྱོགས་ཡོངས་ཀྱི་ལྟ་ཚུལ་ཞིག་འཛིན་སྐབས། ང་ཚོའི་རྣམ་འགྱུར་དག་ཏན་ཏན་གནས་ལུགས་ཐད་གོ་རྟོགས་ཆེ་བ་ཡོང་ཐུབ་པ་དང་མཉམ་དུ། ང་ཚོའི་དམིགས་ཡུལ་རྣམས་གྲུབ་སླ་བ་ཡོང་སྲིད། 

ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།
 

བཟང་སྤྱོད་ཀྱི་བསམ་ཚུལ་དངོས་གནས་དེ་ཀུན་སློང་ལ་བསམ་ཞིབ་མ་བྱས་པར་ཡོང་ཐབས་མེད། གལ་སྲིད་ང་ཚོས་སོ་སོའི་མགོ་ཤིང་སྡོང་ཞིག་ལ་བརྡབས་པ་ན། ང་ཚོས་ཤིང་སྡོང་ལ་ཁག་དཀྲི་བྱེད་དམ། དེ་ལྟར་མི་བྱེད་པ་བརྗོད་མི་དགོས། ཀུན་སྤྱོད་ཀྱི་འགན་འཁྲིའི་བསམ་ཚུལ་གྱིས་ནང་གི་ཀུན་སློང་ཁྲོད་གང་གཏོགས་པ་སྔོན་ཚུད་ནས་ཚོད་དཔག་བྱེད་ཀྱི་ཡོད། དེར་བརྟེན་ངའི་ངོར། ཀུན་སློང་གི་རིམ་པར་སྒོ་མ་བསྟུན་པར་བཟང་སྤྱོད་འགྲེལ་བརྗོད་བྱ་རྒྱུ་དེ་ཆ་མ་ཚང་བ་ལྟ་བུར་མངོན། 

མདོར་ན། ནང་གི་ཀུན་སློང་ནི་བཟང་སྤྱོད་ཀྱི་ཁྱད་ཆོས་གལ་ཆེ་ཤོས་ཤིག་ཡིན། ང་ཚོའི་ཀུན་སློང་གཙང་མ་ཡོད་པ་དང་། ལྷག་བསམ་རྣམ་དག་གིས་གཞན་གྱི་ཁེ་ཕན་ལ་བློ་ཁ་ཕྱོགས་སྐབས། རང་བཞིན་གྱིས་ང་ཚོའི་བྱ་སྤྱོད་རྣམས་བཟང་སྤྱོད་ཀྱི་ཆ་ནས་ལྷད་མེད་པ་ཞིག་ཆགས་རྒྱུ་རེད། རྒྱུ་མཚན་དེ་ལ་བརྟེན་ནས། ངོས་ནས་སྙིང་རྗེ་ནི་བཟང་སྤྱོད་ཀྱི་ཐབས་ལམ་ཡོངས་རྫོགས་ཀྱི་རྩ་བ་ཚུགས་སའི་གཞི་རྟེན་གཙོ་བོ་ཞིག་ཏུ་བརྩི་འཇོག་བྱེད་ཀྱི་ཡོད། དེ་ནི་དྲང་བདེན་ཐེ་བའི་ང་ཚོའི་བཟང་སྤྱོད་ཀྱི་རིན་ཐང་ཡོད་དོ་ཅོག་དང་གཞིའི་རྣམ་གཞག་འབྱུང་ས་སྟེ་སྙིང་རྗེ་དང་བཅས་གཞན་གྱི་བདེ་དོན་ལ་སེམས་ཁུར་བྱེད་པ་ཞིག་ལས་ཡོང་གི་ཡོད།།

ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས། 

ལས་དང་བྱེད་པོ་གཉིས་ཀྱི་དབར་དབྱེ་བ་འབྱེད་རྒྱུ་མ་བརྗེད་པ་བྱ་རྒྱུ་གལ་ཆེན་པོ་ཡིན། སྐབས་རེར་དེ་ཁག་པོ་ཡོད་སྲིད། ང་ཚོ་རང་ཉིད་དམ་ཡང་ན་སོ་སོར་འབྲེལ་བ་ཉེ་པོ་ཡོད་པའི་མི་ཞིག་ནག་ཉེས་ཀྱི་གནོད་འཚེ་ཕོག་ཡུལ་དུ་གྱུར་སྐབས། ནག་ཉེས་དེ་དག་གསོག་མཁན་གྱི་ཉེས་ཅན་པ་དེ་ལ་སྡང་སེམས་མི་སྐྱེ་བ་བྱ་རྒྱུ་ཕལ་ཆེར་ཁག་པོ་ཡིན། དེ་ལྟ་ནའང་། གལ་སྲིད་ང་ཚོས་དེའི་སྐོར་ཡུད་ཙམ་བསམ་བློ་བཏང་ན། འཇིགས་སྐྲག་ཆེ་བའི་བྱ་བ་ཞིག་དང་དེ་རྩོམ་མཁན་དབར་དབྱེ་བ་འབྱེད་པ་ནི། དོན་དངོས་སུ་སོ་སོ་རང་ཉིད་ཀྱི་བྱ་བ་དང་ནོར་འཁྲུལ་ཐད་ལ་སླེབས་སྐབས་རྒྱུན་དུ་དེ་ལྟར་དབྱེ་འབྱེད་བྱེད་ཀྱི་ཡོད་པ་ཤེས་རྟོགས་ཐུབ། ཁོང་ཁྲོའམ་སུན་སྣང་མངོན་དུ་གྱུར་སྐབས། སོ་སོའི་སྙིང་དུ་སྡུག་པའི་མི་ལ་རྩུབ་སྤྱོད་བྱེད་པའམ་གཞན་ལ་གདུག་རྩུབ་བྱེད་སྲིད། ཕྱིས་སུ་ང་ཚོར་བློ་ཕམ་མམ་བློ་འགྱོད་ཡོང་གི་ཡོད་ཅིང་། ང་ཚོར་ཐོལ་བྱུང་གི་མྱོང་ཚོར་དྲག་པོ་བྱུང་བར་ཕྱིར་ལྟས་སློག་སྐབས། སོ་སོས་ག་རེ་བྱས་ཡོད་མེད་དང་སོ་སོ་སུ་ཡིན་མིན་ང་ཚོས་དབྱེ་བ་འབྱེད་མི་ཐུབ་པ་ཡོང་གི་མེད། དེར་བརྟེན་ང་ཚོས་རང་ཉིད་ལ་རང་བཞིན་གྱིས་དགོངས་ཡངས་སྤྲོད་པ་དང་། ལས་དེ་བསྐྱར་ཟློས་བྱེད་ཀྱི་མིན་ཞེས་ཐག་གཅོད་བྱེད་ཤས་ཆེ། དེ་འདྲ་སོང་ཙང་ང་ཚོས་རང་ཉིད་ལ་དགོངས་ཡངས་སྤྲོད་རྒྱུ་ལས་སླ་པོ་མཐོང་གི་ཡོད། དེ་ལྟའི་བཟང་སྤྱོད་དེ་ཏན་ཏན་ང་ཚོས་གཞན་ལའང་གཅིག་མཚུངས་རྒྱ་སྐྱེད་གཏོང་ཐུབ། མི་ཚང་མས་རང་ཉིད་ལ་དགོངས་ཡངས་སྤྲོད་མ་ཐུབ་པར། དེ་འགོག་རྐྱེན་ཞིག་ཏུ་འགྱུར་སྲིད། མི་དེ་རིགས་ལ་གཞན་ལ་དམིགས་པའི་སྙིང་རྗེ་སྐྱེ་རྒྱུ་དང་དགོངས་ཡངས་སྤྲོད་པའི་རྨང་གཞི་ལྟ་བུར། གཅིག་བྱས་ན་སོ་སོས་སོ་སོར་སྙིང་རྗེ་བྱེད་རྒྱུ་དང་དགོངས་ཡངས་སྤྲོད་རྒྱུར་སྦྱོང་བརྡར་བྱ་རྒྱུ་གལ་ཆེན་པོ་ཡིན། 

ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།

མི་རྣམས་ཀྱིས་སྲོག་ཐོག་ཉེས་ཆད་དང་ཉེས་ཆད་ཀྱི་དགོས་དོན་སོགས་ཀྱི་གནད་དོན་ལ་མོས་མཐུན་བྱེད་ཀྱི་མེད། འགའ་ཤས་ཀྱིས་ནག་ཉེས་ཁ་ཅིག་ཧ་ཅང་རྫབ་ཆེན་དང་ཧ་ཅང་ཐབས་རྡུགས་ཡིན་པས། ནག་ཉེས་གསོག་མཁན་ལ་སྙིང་རྗེ་རྩ་བ་ནས་བྱེད་མི་དགོས་པ་བསམ་གྱི་ཡོད།  ནག་ཉེས་ཀྱི་ཐོག་ལ་སླེབས་སྐབས། མི་ཚེའི་ནང་ངམ་འབྱུང་འགྱུར་གྱི་མི་ཚེའི་ནང་ལེགས་བཅོས་སམ་ཡང་ན་ཆ་སྙོམས་སླར་གསོ་བྱ་རྒྱུའི་བསམ་ཚུལ་འགའ་ཆོས་ལུགས་ཆེ་ཁག་ཚང་མར་ཡོད། འཇིག་རྟེན་བཀོད་པ་པོ་འདོད་པའི་སྲོལ་རྒྱུན་ཁྲོད། འཇིག་རྟེན་བཀོད་པ་པོའི་ཐག་གཅོད་ལ་བརྟེན་པའི་གོ་རྟོགས་ཤིག་ཡོད། གནའ་རབས་ཀྱི་ནང་པའི་གཞུང་ནང་། ལས་རྒྱུ་འབྲས་ཀྱི་རྣམ་གཞག་གིས་སོ་སོའི་ལས་ཀྱི་འབྲས་བུ་མཐར་སོ་སོས་མྱོང་དགོས་པ་ངེས་པར་བསྟན། ཡིད་ཆེས་དེ་གཉིས་ཀས་འགྲོ་བ་མིའི་ཚེ་འདི་སྣང་གི་ལས་དོན་ཐད་ཡ་ང་སྙིང་རྗེ་དགོས་པ་ཁས་ལེན་བྱེད་ཀྱི་ཡོད། ཆོས་ལུགས་ལ་མ་བརྟེན་པའི་ལྟ་སྟངས་ཤིག་གི་ཐོག་ནས། འཆི་བའི་རྗེས་ཉེས་ཆད་དང་ལེགས་སྐྱེས་ཐད་དེ་ལྟའི་ཡིད་ཆེས་མེད་སྟབས། ཉེས་ཆད་ནི་དོན་དངོས་སུ་གང་གི་ཕྱིར་ཡིན་ནམ་ཞེས་པ་དང་། དེའི་དགོས་པ་ནི་འཁོན་ལན་དང་དགྲ་ཤ་བླངས་ནས་མཐར་ནག་ཉེས་གསོག་མཁན་ལ་སྡུག་བསྔལ་མྱོང་དུ་འཇུག་རྒྱུ་དེ་རང་ཡིན་ནམ། ཡང་ན་དེ་ནོར་འཁྲུལ་འཕར་མ་བྱེད་པ་ལས་ཟློག་ཐབས་ཀྱི་ཆེད་ཡིན་ནམ་ཞེས་ངེས་པར་དུ་ང་ཚོས་སོ་སོ་རང་ཉིད་ལ་སྐད་ཆ་འདྲི་དགོས། ངའི་བསམ་པར། ཉེས་ཆད་ཀྱི་དམིགས་ཡུལ་ནི་མཐར་གཞན་ལ་སྡུག་བསྔལ་སྤྲོད་རྒྱུ་དེ་ཁོ་ན་མ་ཡིན་པར། ཉེས་ཆད་ཀྱིས་མནར་དུ་བཅུག་པའི་སྡུག་བསྔལ་ལ་དེ་ལས་ལྷག་པའི་དམིགས་ཡུལ་ཞིག་ངེས་པར་དུ་དགོས། དཔེར་ན། ནག་ཉེས་གསོག་མཁན་ལ་ནག་ཉེས་བསྐྱར་དུ་གསོག་པ་ལས་སེམས་ཞུམ་དུ་འཇུག་པ་དང་། གཞན་གྱིས་བྱ་སྤྱོད་དེ་ལྟར་སྤེལ་བར་འཇིགས་སྣང་བསྐུལ་ནས་འགོག་ཐབས་བྱེད་པ་ལྟ་བུ། དེས་ན་ཉེས་ཆད་ནི་འཁོན་ལན་སློག་ཕྱིར་མ་ཡིན་པར། འགོག་ཐབས་ཀྱི་ཆེད་དུ་ཡིན།

ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས། 
 

སྲུང་སྐྱོབ་དམ་པོ་ཡོད་པའི་ལྡི་ལིའི་ཏི་ཧར་(Tihar) བཙོན་ཁང་ནང་ཀི་རན་སྦེ་ཌི་ (Kiran Bedi) ལགས་ཀྱིས་དབུ་འཛུགས་ཞུས་པའི་ལས་གཞི་ཞིག་གི་འོག་བཙོན་པ་རྣམས་ལ་དྲན་ཤེས་བསྟེན་པའི་སྒོམ་གྱི་འཛིན་གྲྭ་གསར་འཛུགས་གནང་ཡོད། གཞན་ལ་སེམས་ཁུར་བྱེད་པ་བརྒྱུད་ཐ་ན་འ་ཆད་འུ་ཐུག་པའི་བཙོན་པ་རྣམས་ལ་མི་ཚེའི་ནང་སྙིང་པོ་ཡོད་པའི་ཚོར་སྣང་བྱིན་ཏེ། གཞན་ལ་རོགས་རམ་བྱེད་པར་ལས་གཞི་དེར་ནུས་པ་ཆེན་པོ་ལྡན་སྐོར་རིམ་བཞིན་ར་སྤྲོད་ཐུབ་ངེས་ཡིན་པར་ངོས་རང་ལ་ཡིད་ཆེད་བརྟན་པོ་ཡོད། དེ་ལྟ་བུའི་ལས་གཞི་གཉེར་མཁན་གྱི་མི་སྣ་དང་ཁོང་ཚོའི་བཟང་ཕྱོགས་ཀྱི་ཤུགས་རྐྱེན་མྱོང་མཁན་གྱི་བཙོན་པ་སུ་དང་ཐུག་འཕྲད་བྱུང་ནའང་ངས་རྟག་ཏུ་ཡི་རངས་བསྔགས་བརྗོད་ཞུ་གི་ཡོད། མདོར་བསྡུས་ན། ངས་བཤད་རྒྱུ་ནི་ཐ་ན་ཉེས་ཅན་པ་ཞིག་ཡིན་ཀྱང་ཁྱེད་རང་དང་འདྲ་བར་འགྲོ་བ་མི་ཞིག་ཡིན་པ་དང་འགྱུར་བ་འགྲོ་བའི་ནུས་པ་ལྡན་ཡོད་པ་དེ་དྲན་དགོས། ལས་བྱེད་པོ་དེར་བྱ་བ་ལོག་པ་དེ་དང་ཆ་མཉམ་པའི་ཉེས་ཆད་གཅོད་དགོས། འོན་ཀྱང་འཁོན་ལན་སློག་འདོད་ཀྱི་བག་མེད་པའི་ལས་སུ་འཇུག་མི་ཉན། དེའི་ཚབ་ཏུ་མ་འོངས་པར་བསམ་བློ་བཏང་སྟེ་ནག་ཉེས་བསྐྱར་ཟློས་མི་ཡོང་སླད་ངེས་བརྟན་བཟོ་ཕྱིར་བསམ་བློ་གཏོང་དགོས། 

ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།
 

དྲང་བདེན་ལག་བསྟར་བྱེད་པའི་གཞི་རྟེན་དུ་སྙིང་རྗེའི་རྩ་འཛིན་ཐད་གལ་ཆེ་བའི་གནད་དོན་ཞིག་ནི། ལས་ལ་མཛུབ་མོ་བཙུགས་རྐྱང་མ་བྱས་པར་ལས་བྱེད་པོར་འཛུགས་དགོས་པ་དེ་ཡིན། ང་ཚོས་ལས་ནོར་བ་ལ་ཉེས་འཛུགས་དང་དགོས་ངེས་ཀྱི་ཐབས་ལམ་ཡོད་དོ་ཅོག་བེད་སྤྱད་དེ་ཁ་གཏད་གཅོག་དགོས་པ་དང་། ཆབས་ཅིག་ལས་དེ་དག་གསོག་མཁན་གྱི་ནག་ཉེས་ཅན་ལ་དགོངས་ཡངས་དང་སེམས་པ་བཟང་བའི་ཀུན་སྤྱོད་རྒྱུན་འཛིན་དགོས་པ་སྙིང་རྗེས་སྟོན་གྱི་ཡོད། འཇིག་རྟེན་བཀོད་པ་པོ་འདོད་པའི་རྣམ་གཞག་ནང་། དཀོན་མཆོག་གིས་སྡིག་ལས་འགོག་ཅིང་སྡིག་པ་གསོག་མཁན་ལ་བརྩེ་བ་སྤྲོད་ཀྱི་ཡོད་པ་ལྟར། ང་ཚོས་ཀྱང་ནོར་འཁྲུལ་ལ་སྟོབས་ཤུགས་ཆེན་པོས་འགོག་རྒོལ་བྱེད་པ་དང་མཉམ་དུ་ནོར་འཁྲུལ་བྱེད་མཁན་ལ་སེམས་ཁུར་བྱེད་དགོས། དེ་ལྟར་བྱེད་པ་ནི་ཡང་དག་པ་ཞིག་ཡིན། གང་ཡིན་ཞེ་ན། བསྐྱར་དུ་བརྗོད་རྒྱུར། འགྲོ་བ་མི་ཐམས་ཅད་ལ་འགྱུར་བ་འགྲོ་བའི་ནུས་པ་ཡོད། ངོས་ཀྱི་བསམ་པར། དེ་ནི་ང་ཚོ་རང་གི་ཉམས་མྱོང་ཐོག་ནས་ཚང་མས་ཤེས་ཀྱི་ཡོད། གང་ལྟར་ན་གཞོན་ནས་འགན་ཁུར་ཐུབ་མཁན་ཞིག་ཆགས་པའི་བར་མི་ཚེ་སྣང་མེད་དུ་སྐྱེལ་མཁན་དང་ན་ཚོད་སྨིན་ཞིང་ཉམས་མྱོང་ཐོབ་སྟེ་ལྟ་སྐྱོང་བྱེད་མཁན་གཉིས་ལ་མི་གཅིག་པ་མེད། ལོ་རྒྱུས་ནང་དུའང་། མི་ཚེའི་འགོ་སྟོད་དུ་ཀུན་སྤྱོད་ཀྱི་ཆ་ནས་ཧ་ཅང་སྡུག་ཅག་ཡོད་ཀྱང་ཕྱིས་སུ་གཞན་ལ་ཕན་ཐོགས་རྒྱ་ཆེན་པོ་སྐྲུན་མཁན་གྱི་མི་དེ་འདྲའི་དཔེ་མཚོན་ཧ་ཅང་མང་པོ་ཡོད། དཔེར་ན། ཆོས་རྒྱལ་མྱ་ངན་མེད་དང་སེན་ཊེ་པོལ་ (Saint Paul) ཡང་ན་དེ་མིན་གྱི་དཔེ་མང་པོར་ང་ཚོས་བསམ་བློ་གཏོང་དགོས།

ཆོས་ལུགས་ཀྱི་མཚམས་ལས་འདས་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས། 
 

སྙིང་རྗེས་བྱས་ཉེས་སམ་དྲང་བདེན་མིན་པའི་གནས་སྟངས་དང་ཕྲད་སྐབས་མགོ་སྒུར་དགོས་པའི་དོན་རྩ་བ་ནས་སྟོན་གྱི་མེད། དཔེར་ན། མི་རིགས་དཀར་ནག་དབྱེ་འབྱེད་བྱེད་པའི་སྲིད་ཇུས་ཀྱི་གནད་དོན་ཁྲོད་ལྟར། དྲང་བདེན་མ་ཡིན་པའི་གནས་སྟངས་ཤིག་ལ་ཡ་ལན་ཤུགས་ཆེན་པོ་ཞིག་བྱེད་སྐབས། སྙིང་རྗེས་ང་ཚོར་དྲང་བདེན་མ་ཡིན་པ་ཁས་ལེན་དགོས་སྐོར་མ་བརྗོད་པར། ང་ཚོས་དེར་ཁ་གཏད་གཅོག་དགོས་སྐོར་བརྗོད་པ་དང། དེ་ལྟ་བུའི་རྒོལ་ལན་དེ་ངེས་པར་དུ་འཚེ་མེད་ཞི་བ་ཡིན་དགོས་པ་ཤུགས་ཀྱིས་སྟོན་གྱི་ཡོད། འོན་ཀྱང་འཚེ་མེད་ཞི་བ་ནི་ནུས་སྟོབས་དབེན་པའི་རྟགས་མཚན་ཞིག་མ་ཡིན་པར། རང་གིས་རང་ལ་གདེང་སྤོབས་དང་བློ་སྟོབས་ཡོད་པའི་དན་རྟགས་ཤིག་ཡིན། སྤྱིར་བཏང་མི་རྣམས་རྩོད་གླེང་ཤོར་བའི་སྐབས། རྒྱུ་མཚན་ཟད་པའི་སྐབས་འབའ་ཞིག་གི་ཚེ། ཁོང་ཁྲོ་ལང་བ་དང་། སྐད་ཅོར་རྒྱག་པ། ཐ་ན་དྲག་སྤྱོད་ལ་ཞུགས་པའང་ཡོང་གི་ཡོད། འོན་ཀྱང་ཁ་མཆུ་ཐུག་པའི་ཚོགས་པ་དེར། བདེན་པ་སོ་སོའི་ཕྱོགས་ལ་ཡོད་པའི་གདེང་ཚོད་རྙེད་ན། རྒྱུན་དུ་ཞི་འཇམ་པོར་གནས་ཏེ་སོ་སོའི་གནད་དོན་ཐོག་མུ་མཐུད་རྩོད་པ་རྒྱག་གི་ཡོད། དེར་བརྟེན་དེས་བདེན་པ་དང་དྲང་བདེན་ཡོད་ན། དེ་ལས་གདེང་སྤོབས་ཇི་ལྟར་ཡོང་མིན་ར་སྤྲོད་བྱེད་པ་ཡིན་པས། ཞི་འཇམ་དང་འཚེ་བ་མེད་པའི་བསམ་བློའི་འཁྱེར་སོ་རྒྱུན་སྲིང་བྱེད་པ་ནི་ངོ་ཐོག་ཏུ་སྟོབས་ཤུགས་ཀྱི་མཚོན་དོན་ཞིག་ཡིན། 

ཆོས་ལུགས་ཀྱི་མཚམ་སལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།  

 ཕྱོགས་ལྷུང་གི་ཚོར་བའི་གྲུབ་ཆ་གཙོ་བོ་ཞིག་ནི་ང་ཚོས་ཞེན་ཆགས་རེད་ཅེས་བརྗོད་ན་ཆོག །ཐེངས་གཅིག་ཨར་ཇན་ཊི་ནར་ (Argentina) ཚན་རིག་གི་ཚོགས་འདུ་ཞིག་ཚོགས་པའི་སྐབས། ངོས་ཀྱི་སློབ་སྟོན་པ་དང་གྲོགས་པོ་ཕ་རན་སི་སེ་ཁོ་ ལྦ་རི་ལ་ (Francisco Varela) ལགས་ཀྱིས། ཚན་རིག་པ་ཞིག་ཡིན་པའི་ཆ་ནས། ཁོ་རང་གིས་སོ་སོའི་ཉམས་ཞིབ་བྱ་ཡུལ་གཅིག་པུར་ཧ་ཅང་ཆགས་ནས་སྡོད་ཀྱི་མེད། གང་ཡིན་ཞེ་ན། དེས་བདེན་དཔང་ཇི་མ་ཇི་བཞིན་འཚོལ་ཞིབ་བྱེད་པའི་ཁོ་རང་གི་ནུས་པར་འགོག་རྐྱེན་བྱེད་སྲིད་ཅེས་གསུངས་བྱུང། སྐད་ཆ་དེ་དག་ཐོས་མ་ཐག་ངའི་སེམས་ནང་། ཆོས་ལུགས་ཀྱི་ཁྱབ་ཁོངས་ནང་དུའང་ཁོང་ཚོས་ངེས་པར་དུ་དེ་བཞིན་ལག་བསྟར་བྱེད་དགོས་ཀྱི་འདུག་ཅེས་པའི་བསམ་བློ་འཁོར་བྱུང་། དཔེར་ན། ནང་པ་ཞིག་ཡིན་པའི་ཆ་ནས། ངས་ནང་ཆོས་ལ་ཞེན་ཆགས་ཆེན་པོ་ཡོང་སླད་འབད་བརྩོན་ནམ་ཡང་བསྟེན་རྒྱུ་མེད། དེ་ལྟར་བྱས་ན། ཆོས་ལུགས་གཞན་གྱི་རིན་ཐང་མཐོང་བའི་ངའི་ནུས་པར་འགོག་རྐྱེན་བཟོ་སྲིད། དེར་མ་ཟད་ཞེན་ཆགས་ཀྱི་གྲུབ་ཆ་ཡོད་པའི་སྐབས། ང་ཚོས་གཞན་ལ་བརྩེ་བ་དང་སེམས་ཁུར་བྱ་རྒྱུ་དེ་རྒྱུན་དུ་གཞན་གྱིས་ང་ཚོར་ཚུར་འབྲེལ་བ་བྱེད་སྟངས་ལ་རག་ལས་ཏེ། སུས་ང་ཚོར་ལྟ་སྐྱོང་དང་ཡག་པོ་བྱེད་པ་དེ་ལ་ང་ཚོས་ཕར་སེམས་ཁུར་གྱི་ཚོར་བ་སླེབས་ཀྱི་ཡོད། འོན་ཀྱང་ང་ཚོས་གཞན་སྟེང་དུ་དམིགས་པའི་བརྩེ་བ་དེ་སོ་སོ་རང་ཉིད་ཀྱི་དམིགས་ཡུལ་དང་རེ་བ་འགྲུབ་མིན་ལ་རག་ལས་པའི་དབང་གིས། དེ་རྟག་ཏུ་སྐྱོན་ཅན་ཞིག་ཏུ་འགྱུར་གྱི་རེད། གཞན་གྱིས་ང་ཚོའི་རེ་བ་སྒྲུབ་པ་དེ་སྲིད་དུ། ཚང་མ་བཀྲ་ཤིས་ལོ་ལེགས་ངང་འགྲོ་གི་ཡོད། འོན་ཀྱང་དེ་ལྟར་མ་སྒྲུབ་ཚེ། ང་ཚོའི་བརྩེ་བའི་སེམས་པ་དེ་འཁོན་འཛིན་དང་ཐ་ན་ཞེ་སྡང་དུ་ལས་སླ་པོར་འགྱུར་སྲིད། འོན་ཏེ་རྒྱ་བསྐྱེད་ནས་ཡོད་པའི་ཀུན་ཁྱབ་སྙིང་རྗེ་དེ་རང་གཅེས་འཛིན་གྱི་གྲུབ་ཆ་གང་གིས་ཀྱང་རྩ་བ་བྱས་མེད་ཅིང་། འགྲོ་བ་མི་གཞན་ཚང་མའང་རང་དང་འདྲ་བར་བདེ་བ་འདོད་པ་དང་སྡུག་བསྔལ་མི་འདོད་པ་ཤེས་པའི་ཐོག་ལ་གཞི་རྩ་བྱས་ནས་ཡོད། དེ་ལྟ་བུའི་སྙིང་རྗེའི་ཐོག་ནས། ང་ཚོས་གཞན་ལ་སེམས་ཁུར་བྱེད་པ་དེ་ཕྱོགས་ཡོངས་ནས་བརྟན་པོ་ཞིག་དང་གཞན་གྱིས་ང་ཚོར་རྣམ་འགྱུར་གང་བསྟན་པ་དེས་ཤུགས་རྐྱེན་ཐེབས་ཀྱི་མེད། ཐ་ན་གཞན་གྱིས་ང་ཚོར་སྡིགས་ར་བསྐུལ་བའམ་ཁ་ངན་ཚིག་རྩུབ་སྨྲས་ཀྱང་། ང་ཚོས་ཁོང་ཚོར་བཅངས་པའི་སྙིང་རྗེ་དང་ཁོང་ཚོའི་བདེ་དོན་ཆེད་སེམས་ཁུར་བྱེད་པ་རང་སོར་གནས་རྒྱུ་རེད། དེས་ན། བཅོས་མིན་གྱི་སྙིང་རྗེས་མིའི་སྤྱོད་ལམ་ལ་མ་དམིགས་པར་མི་དེ་ཉིད་ལ་དམིགས་ཀྱི་ཡོད། འཁོན་འཛིན་དང་། ཁོང་ཁྲོ། སྡང་སེམས་ཀྱིས་ང་ཚོར་ཁེ་ཕན་གང་ཡང་སྐྲུན་གྱི་མེད་སྟབས། དེ་ལྟའི་ལྷད་མེད་ཅིང་ཆ་རྐྱེན་མེད་པ་དང་ཕྱོགས་ལྷུང་བྲལ་བའི་སྙིང་རྗེའི་ཐོག་ནས་ང་ཚོས་གཞན་ཀུན་ལ་རོགས་རམ་བྱ་རྒྱུ་ནི་ང་ཚོ་རང་ཉིད་ཀྱི་ཁེ་ཕན་ཡིན་པ་གསལ་པོ་རེད། དེ་ལྟར་བྱེད་པས་ཏན་ཏན་ང་ཚོར་ཁེ་ཕན་ཡོང་རྒྱུ་རེད།

ངོས་ཀྱི་གྲོགས་པོ་རྙིང་པ་སེམས་ཚོར་ཚན་རིག་གསར་གཏོད་བྱེད་པོ་སློབ་དཔོན་པོལ་ཨིག་མན་ (Paul Ekman) ལགས་ཀྱིས་ཐེངས་གཅིག་ང་ལ། ཐ་ན་དེང་དུས་ཀྱི་འཕེལ་འགྱུར་རྣམ་གཞག་སྲོལ་འབྱེད་ཆར་ལི་སི་ཌར་ལྦིན་ (Charles Darwin) ལགས་ཀྱིས་ཀྱང་། འཚོ་བཞིན་པའི་ལུས་ཅན་ཀུན་ལ་བརྩེ་བ་སྤྲོད་པ་ནི་ཆེས་ཁྱད་དུ་འཕགས་པའི་མིའི་ཡོན་ཏན་ཡིན་པར་ཆ་འཇོག་གནང་གི་ཡོད་ཅེས་གསུང་གི་འདུག །ཕྱི་ལོ་ ༢༠༠༤ ཟླ་ ༡༢ ནང་ཨེ་ཤི་ཡའི་ནང་མཚོ་ལོག་བྱུང་བའི་སྐབས་དེར་འཛམ་གླིང་རྒྱ་ཁྱབ་ནས་ཡ་ལན་བྱུང་བ་ངས་གསལ་པོར་དྲན་གྱི་འདུག །བྱུས་ཉེས་དེའི་རྗེས་མི་མང་ལ་སེམས་ཚོར་དྲག་པོ་བྱུང་བ་དེས་ང་ཚོ་འགྲོ་བ་མི་རྣམས་ཁྱིམ་ཚང་གཅིག་པ་ཡིན་པའི་ཆ་ནས་གཅིག་སྒྲིལ་གྱི་དཔེ་མཚོན་སྟོབས་ཆེན་ཞིག་ངའི་བློ་ལ་ཤར་བྱུང་། དེ་ནི་ཁེར་རྐྱང་དུ་ལུས་པའི་གནད་དོན་ཞིག་ཆགས་མེད། དེ་ག་ནང་བཞིན་ཉེ་དུས་ཀྱི་ཡིད་སྐྱོའི་གནས་ཚུལ་དེ་དག་གི་རྗེས་འཛམ་གླིང་ཡོངས་ཁྱབ་ནས་ལྟ་སྐྱོང་དང་སེམས་ཁུར་བྱུང་བ་དང་། སྐབས་ཤིག་རིང་། འཛམ་གླིང་ནང་གསར་འགྱུར་ཧ་ཅང་མགྱོགས་པོ་ཁྱབ་དུས། ང་ཚོ་དང་རྒྱང་རིང་དུ་གནས་པ་རྣམས་ལ་ང་ཚོའི་སྤྱི་ཚོགས་ཀྱི་ཚོར་བ་དང་སེམས་ཁུར་ཤུགས་ཧ་ཅང་ཆེ་རུ་ཕྱིན་ཡོད། དུས་རབས་ཉི་ཤུ་པའི་འགོ་སྟོད་དུ། མི་རིགས་རིང་ལུགས་ཀྱི་ཚོར་བ་ཧ་ཅང་ཤུགས་ཆེན་པོ་ཡོད་པ་དང་ཆབས་ཅིག་འགྲོ་བ་མི་རིགས་ཡོངས་རྫོགས་ཐད་ལ་ང་ཚོའི་གོ་རྟོགས་ཅུང་སྐྱོ་པོ་ཡོད། སྐབས་དེ་དུས་མི་རྣམས་ཀྱིས་ས་ཁུལ་གཞན་དུའམ་གླིང་གཞན་དུ་གནས་ཚུལ་ག་རེ་འབྱུང་གི་ཡོད་མེད་ཕྲན་བུ་ལས་ཤེས་ཀྱི་མེད། འོན་ཀྱང་ད་ཆ་གོ་ལ་ཡོངས་ཀྱི་གསར་འགྱུར་ཁྱབ་སྤེལ་གཏོང་བའི་བརྒྱུད་ལམ་ཁག་གིས་མྱུར་ཚད་དེ་དང་བསྟུན་ནས། ས་ཕྱོགས་གང་སར་མི་རྣམས་ཀྱི་གཅིག་ལ་གཅིག་བརྟེན་གྱི་འབྲེལ་བའི་ཐད་ང་ཚོར་གོ་རྟོགས་གཏིང་ཟབ་རྙེད་ཡོད། འདི་དང་མཉམ་དུ་འགྲོ་བ་མི་རིགས་ཁྱོན་ཡོངས་ལ་མི་རྣམས་ཀྱི་སེམས་ཁུར་དང། གཞི་རྩའི་འགྲོ་བ་མིའི་ཐོབ་ཐང་གི་རིན་ཐང་ཐད་ཁོང་ཚོའི་ངོས་འཛིན་ཡང་གཏིང་ཟབ་ཏུ་ཕྱིན་ཡོད་པར་སྣང་། ངས་འཕེལ་ཕྱོགས་འདི་ནི་མ་འོངས་པར་རེ་བཟང་ཕུགས་བཅོལ་ཆེན་པོ་བྱེད་པའི་འབྱུང་ཁུངས་ཤིག་ཡིན་པར་བསམ་གྱི་ཡོད། 

རང་ཅག་གི་སྤུན་ཟླ་མི་རིགས་རྣམས་ལ་དེ་ལྟ་བུའི་སེམས་ཁུར་ཡོང་བར་ང་ཚོ་དམིགས་བསལ་གྱི་གང་ཟག་གམ་སྐྱེས་བུ་དམ་པ་གང་ཡང་ཡིན་མི་དགོས། ཀུན་ཁྱབ་སྙིང་རྗེ་དེ་ནི་ང་ཚོ་མི་རེ་ངོ་རེའི་ཤེས་ཚད་ཁྲོད་གནས་ཡོད། ན་ཛི་ (Nazi) ཡི་སྲིད་དབང་སྒེར་འཛིན་ལམ་ལུགས་སྐབས་སུ། ཇར་མེ་ནིའི་ཡུལ་མི་ཁ་ཤས་ཀྱིས་རང་གི་ཚེ་སྲོག་འབེན་ལ་བཙུགས་ཏེ་འཇེའུ་ (Jews) མི་རིགས་སྐྱོབ་རྒྱུ་དང་སྲུང་སྐྱོབ་ཆེད་ཧུར་ཐག་འབད་ཐག་བྱས། ཁོང་ཚོར་རྒྱུ་མཚན་ཅིའི་ཕྱིར་དེ་ལྟར་བྱས་སམ་ཞེས་སྐད་ཆ་དྲིས་སྐབས། ཁོང་ཚོ་མང་ཆེ་བས་དབང་མེད་དུ་བྱས་པ་དང་། མི་སུ་འདྲ་ཞིག་ཡིན་རུང་རང་གི་གནས་སྟངས་དེ་འདྲའི་སྐབས་གཅིག་མཚུངས་བྱས་ཡོད་ངེས་རེད་ཅེས་ལན་བཏབ། འོན་ཀྱང་ཁོང་ཚོ་ནི་ཁྱེད་དང་ང་ནང་བཞིན་མི་དཀྱུས་མ་རང་ཡིན། སྙིང་རྗེ་སྟེ། སྤུན་ཟླ་མི་རིགས་རྣམས་ལ་སེམས་ཁུར་ཞིག་དང་མཉམ་དུ་། དེ་དང་ཕྱོགས་མཚུངས་པའི་དཔའ་མཛངས་ལྡན་པའི་བྱ་སྤྱོད་སྤེལ་བར་མི་ཚང་མར་ནུས་པ་ལྡན་ཡོད། 

ད་དུང་ཀློག་པ་པོ་འགའ་ཞིག་གིས་གཅིག་བྱས་ན་ཀུན་ཁྱབ་སྙིང་རྗེའི་བསམ་ཚུལ་འདི་ལ་ཁས་ལེན་བྱེད་འདོད་ཡོད་ཀྱི་མ་རེད། བསམ་ཚུལ་འདི་ཁས་ལེན་བྱེད་པའི་གཞན་གྱི་ལྟ་ཚུལ་ལ་ཁོང་ཚོས་ཡིད་སྨོན་བྱེད་ཀྱང་། ཁོང་ཚོ་རང་ཉིད་ལ་མཚོན་ན༑ དེ་ནི་འཛམ་གླིང་གི་སྡུག་བསྔལ་དང་ལེན་བྱེད་པ་ལྟ་བུ་མཐོང་བ་དང་། སོ་སོ་གཅིག་པུའི་དཀའ་ངལ་ལ་བསམ་ནས་བསྡད་ཡོད་པས་གཞན་གྱི་སྡུག་བསྔལ་ཁས་ལེན་བྱ་ཐབས་མེད་པར་ཚོར་སྲིད། ཚད་གཞི་ངེས་ཅན་ཞིག་གི་ཐོག་ནས་བལྟས་ན༑ གཞན་ལ་སེམས་ཁུར་བྱེད་པའི་ནང་ང་ཚོ་རང་ཉིད་ཀྱི་མ་ཡིན་པའི་དཀའ་སྡུག་མཉམ་སྤྱོད་བྱེད་པ་ཚུད་ཡོད་པ་ནི་བདེན་པ་རེད། དེ་ལྟར་ནའང་གཞན་གྱི་དཀའ་སྡུག་མཉམ་སྤྱོད་བྱས་པ་ལས་བྱུང་བའི་མི་བདེ་བ་རྣམས་ང་ཚོ་རང་གི་སྡུག་བསྔལ་ཐད་ཀར་མྱོང་བ་དང་འདྲ་གི་མེད། སྡུག་བསྔལ་གྱི་ནང་ལྷུང་བའི་མི་ཞིག་གི་མྱོང་ཚོར་ཤེས་རྟོགས་བྱུང་སྐབས། རང་ཉིད་ཀྱི་སེམས་ནང་ཐོག་མར་མི་བདེ་བ་ཚོར་སྲིད།  འོན་ཀྱང་སོ་སོ་རང་ངོས་ནས་དང་དུ་བླངས་ཏེ་དཀའ་ངལ་དེ་དག་ལ་གྲ་སྒྲིག་བྱ་རྒྱུར་བློ་ཐག་བཅད་ན། གཞན་ལ་བློ་སྟོབས་སྤེལ་བ་དང་། བློ་སྟོབས་ལས་གདེང་ཚོད་རྙེད་ཀྱི་ཡོད། དེ་ལས་ལྡོག་སྟེ། དཀའ་སྡུག་དེ་སོ་སོའི་ཡིན་ན། སོ་སོར་དེ་ལྟའི་རང་དབང་ངམ་འདམ་ག་མེད་པས་དེ་དག་གི་ཁྱད་པར་ནི་གསལ་པོ་རེད། 

དེར་མ་ཟད་སྙིང་རྗེ་ནི་གཞན་ཚོར་སོགས་རྟོགས་ཐུབ་པའི་ནུས་པ་ལས་མངོན་དུ་འགྱུར་ནའང་། འདི་གཉིས་གཅིག་པ་མ་ཡིན། གཞན་ཚོར་རྟོགས་པ་ནི་སེམས་ཚོར་ཞིག་གིས་སྐུལ་འདེད་བྱས་པ་སྟེ་གང་ཟག་གཞན་ལ་དུང་སེམས་ཀྱི་ཁྱད་ཆོས་ལྡན་ཡོད། སྙིང་རྗེ་ནི་གཞན་དང་མཉམ་དུ་མྱོང་བ་བརྗེ་ལེན་བྱེད་པ་ཙམ་མིན་པར། དེ་དག་སོ་སོའི་སྡུག་བསྔལ་ལས་ཀྱང་ཐར་འདོད་ཆེ། སྙིང་རྗེ་ཅན་ཞིག་བྱེད་པའི་དོན་ཡང་ཚོར་བའི་རིམ་པ་ཞིག་རང་ལ་ཟེར་གྱི་མེད། དེ་ནི་ངལ་དུབ་ཅན་དུ་འགྱུར་སྲིད། དཔེར་ན། སྙིང་རྗེ་ཅན་གྱི་སྨན་པ་རྣམས་ཀྱིས་རྒྱུན་དུ་སོ་སོའི་ཕ་མའི་སྡུག་བསྔལ་བརྗེ་ལེན་བྱ་རྒྱུར་རྦད་དེ་བློ་གཏད་ནས་བསྡད་ན། ཧ་ཅང་གནད་ལ་སྨིན་པོ་ཡོང་ངེས་མ་ཡིན། སྙིང་རྗེ་ཟེར་དུས་གཞན་གྱི་དཀའ་སྡུག་སེལ་བར་གང་ཡང་རུང་བ་ཞིག་བྱེད་འདོད་པ་ཞིག་དང་། རོགས་རམ་བྱ་རྒྱུའི་འདོད་པ་འདིས། ང་ཚོ་སྡུག་ལ་མི་སྦྱོར་བར།  དོན་དངོས་ཐོག་ང་ཚོར་ནུས་ཤུགས་སྦྱིན་ཞིང་དམིགས་ཡུལ་ལྡན་པ་དང་ཁ་ཕྱོགས་སྟོན་གྱི་ཡོད། ཀུན་སློང་འདིའི་ཐོག་ནས་ང་ཚོས་ལས་དོན་སྒྲུབ་སྐབས། ང་ཚོ་དང་ཉེ་འཁོར་གྱི་མི་རྣམས་ལའང་ཁེ་ཕན་ཆེ་བ་ཡོང་གི་ཡོད། 

ཡིན་ནའང་། ཀུན་ཁྱབ་སྙིང་རྗེའི་ནང་རང་ཉིད་ཀྱི་སེམས་ཁུར་བྱ་ཡུལ་མཐར་འགྲོ་བ་མི་ཚང་མར་མ་བསྙབས་བར་ག་ལེར་རྒྱ་སྐྱེད་གཏོང་དགོས་པར་བརྟེན། རྒྱུན་ཆད་མེད་པར་གོམས་འདྲིས་བསྟེན་དགོས། ང་ཚོའི་རྣམ་དཔྱོད་དང་སྙིང་རྗེའི་དགོས་མཁོ་དང་རིན་ཐང་ལ་ཡིད་ཆེས་ཡོད་པ་བེད་སྤྱད་དེ། ང་ཚོས་རིམ་གྱིས་སོ་སོའི་སེམས་ཁུར་རྒྱ་སྐྱེད་གཏོང་ཐབས་བྱེད་དགོས། དེ་ཡང་དང་པོ་ང་ཚོའི་གཉེན་ཉེ་དུ་དང་། དེ་རྗེས་ང་ཚོ་དང་འབྲེལ་བ་ཡོད་པ་ཀུན་ལ་དང་ལྷག་པར་དུ་ང་ཚོའི་དགྲ་བོ། དེ་ནས་འགྲོ་བ་མི་རིགས་ཚང་མ་དང་ཐ་ན་སེམས་ཅན་ཐམས་ཅད་ལ་སྙོབ་པ་བྱེད་དགོས། 


ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།



སྤྱིར་བཏང་ངོས་ཀྱིས་སྙིང་རྗེ་ལ་རིམ་པ་གཉིས་འབྱེད་ཀྱི་ཡོད། དང་པོ་དེ་ཨ་མ་ཞིག་གིས་རང་གི་ཕྲུ་གུར་བཅངས་པའི་བརྩེ་དུང་དཔེ་ལ་བཀོད་དེ་གོང་དུ་འགྲེལ་བརྗོད་བྱས་པ་བཞིན་ལུས་པོའི་གྲུབ་སྟངས་ཀྱི་ཆ་ནས་ཡོང་བའི་རིམ་པ་གཅིག་དང། གཉིས་པ་དེ་རྒྱ་བསྐྱེད་པའི་རིམ་པ་སྟེ་ཆེད་དུ་མངགས་ནས་སྐྱེད་དགོས་པའི་རིམ་པ་ཞིག་ཡིན། ཨ་མས་རང་གི་བུ་ཕྲུག་ལ་བཅངས་པའི་བརྩེ་དུང་བཞིན། ལུས་པོའི་གྲུབ་སྟངས་ཀྱི་ཆ་ནས་ཡོང་བའི་སྙིང་རྗེ་དེ་ཆ་རྐྱེན་མེད་པ་ཞིག་ཡིན་པ་མ་ཟད་དེ་ནི་ད་དུང་ཕྱོགས་ལྷུང་ཅན་ཞིག་དང་དམིགས་ཡུལ་ཚད་ཅན་ཞིག་ཡིན། དེ་ལྟར་ནའང། དེ་ཧ་ཅང་གལ་འགངས་ཆེན་པོ་ཆགས་ཡོད། གང་ཡིན་ཞེ་ན། དེ་ནི་ཕྱོགས་ལྷུང་བྲལ་བའི་སྙིང་རྗེ་སྐྱེ་ཐུབ་པའི་ས་བོན་ཡིན། ང་ཚོས་སེམས་བཟང་པོ་བྱ་ཕྱིར་སོ་སོའི་ལྷན་སྐྱེས་ཀྱི་ནུས་པ་དེ་བེད་སྤྱོད་གཏོང་ཐུབ་པ་དང་། རང་གི་བློ་གྲོས་དང་ཡིད་ཆེས་བེད་སྤྱད་ནས་དེ་རྒྱ་སྐྱེད་གཏོང་དགོས། སྤྱིར་བཏང་ནས་བཤད་ན། ང་ཚོས་སོ་སོའི་གཉེན་ཉེ་རྣམས་ལ་སེམས་ཁུར་བྱ་རྒྱུའི་འདོད་ཕྱོགས་ཤུགས་ཆེན་པོ་ཞིག་ཟུར་འཇོག་བྱས་ཡོད། དེ་རྗེས་ང་ཚོས་སྤྱི་ཚོགས་གང་རྒྱ་ཆེ་ས་སྟེ། དཔེར་ན། སྐད་ཡིག་དང་། ས་གནས། ཡང་ན་ཆོས་ལུགས་གཅིག་གྱུར་ཡོད་པ་རྣམས་ལ་རྒྱ་སྐྱེད་གཏོང་གི་ཡོད། དེ་ནི་རྦད་དེ་རང་བཞིན་ལྷན་སྐྱེས་དང་སྟོབས་ཤུགས་ཆེན་པོ་ཡིན། གནད་དོན་གཅིག་གི་ཐོག་ལ་དམིགས་པའམ་ཡང་ན་སྡེ་ཚན་བྱེ་བྲག་པ་ཞིག་ལ་ཉེ་བའི་ཚོར་བ་སླེབས་ཏེ་མི་རྣམས་ལ་ཀུན་སློང་ཤུགས་ཆེན་པོ་བྱེད་སྐབས། བྱ་བ་རླབས་ཆེན་བསྒྲུབ་པའི་ནུས་པ་ལྡན་ཡོད། དེ་ལྟ་བུའི་ཚོར་བས་མི་རྣམས་ཀྱི་དབར་མཛའ་མཐུན་སྐྲུན་སྲིད་པ་དང་ཁོང་ཚོར་རང་ཉིད་ཀྱི་གུ་དོག་པའི་རང་ཁེ་དོན་གཉེར་གྱི་ལྟ་བ་ལས་འདའ་བར་རོགས་རམ་བྱེད། གནད་དོན་དེའི་ཐོག་ནས་བལྟས་ན་ཚོར་བ་དེ་དག་ཕན་ཐོགས་ཆེན་པོ་ཡོད། འོན་ཀྱང་སྟབས་མི་ལེགས་པ་ཞིག་ལ་དེ་ལྟའི་མཛའ་འབྲེལ་དེ། ཁྱིམ་ཚང་དང་། སྤྱི་ཚོགས། རྒྱལ་ཁབ། སྐད་ཡིག ཡང་ན་ཆོས་ལུགས་བཅས་གང་ལའང་གཞི་བཞག་ཀྱང་། རྒྱུན་དུ་ང་ཚོ་དང་ཁོང་ཚོ་ཞེས་དབྱེ་འབྱེད་ཀྱི་གནས་སྟངས་ཤུགས་ཆེན་པོ་ཞིག་དང་མཉམ་དུ་གནས། དཀའ་ངལ་ནི་ང་ཚོས་སྡེ་ཚན་འདི་དང་དེ་ཞེས་པ་གཅིག་པུའི་ཐོག་ནས་སོ་སོར་ལྟ་བའི་སྐབས། རྒྱ་ཆེ་ས་ནས་འགྲོ་བ་མི་ཡིན་པའི་ང་ཚོའི་ངོ་བོ་དེ་དྲན་པ་བརྗེད་ཉེན་ཆེ།
 


ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་ལས་བཏུས།