ལེགས་བཤད་གཅེས་བཏུས།

ཉིན་རེའི་འཚོ་བའི་ནང་དུ་གྲོགས་པོ་དང་ངོ་ཤེས་ཀྱི་རེ་འདོད་བཞིན་ང་ཚོས་གང་ལ་གང་འཚམ་གྱིས་བསྟུན་ཞིང༌། དེ་ལྟར་བསྟུན་ཐུབ་པའི་ནུས་པ་ནི་ཡོན་ཏན་ཞིག་ཏུ་མཐོང་གི་ཡོད་རུང༌། སོ་སོའི་ཁེ་ཕན་སྲུང་ཞིང་གཞན་གྱི་བདེ་སྡུག་སྣང་མེད་དུ་བསྐྱུར་བ་སོགས་མི་དགེ་བའི་ལས་བྱེད་མཁན་ཚོ་དང་འགྲོགས་ན། ང་ཚོ་ནི་སེམས་ཀྱི་གཏད་སོ་བོར་བའི་ཉེན་ཁ་ལ་འཕྲད་རྒྱུ་རེད། གཏད་སོ་བརླགས་པའི་རྐྱེན་གྱིས་གཞན་ལ་གྲོགས་བྱེད་པའི་ང་ཚོའི་ནུས་པའང་ཉམ་དམས་སུ་འགྲོ་ངེས་རེད། ང་ཚོ་བོད་པ་ཚོར་གཏམ་དཔེ་འདི་ལྟ་བུ་ཞིག་ཡོད་དེ། ང་ཚོ་གསེར་གྱི་རི་བོའི་སྟེང་དུ་བསྡད་ན། ང་ཚོའི་སྟེང་དུ་གསེར་འགོས་པ་དང༌། ཐལ་བའི་ནང་དུ་བསྡད་ན་ང་ཚོར་ཐལ་བ་འགོས་རྒྱུ་རེད། མི་དེའི་རིགས་དང་ཐག་རིང་དུ་གནས་ན་བཟང་ཡང་འབྲེལ་བ་གཏན་དུ་གཅོད་མི་རུང༌། དོན་དངོས་སུ་བརྗོད་ན། ཁོ་ཚོས་བྱ་སྤྱོད་དེའི་རིགས་སྟོན་པར་བཀག་འགོག་བྱེད་པའི་གོ་སྐབས་འོས་འཚམ་ཡང་ང་ཚོར་མཚམས་རེར་ཡོད་པ་དང༌། དེ་ལྟར་བྱེད་སྐབས་རང་གི་ཀུན་སློང་གཙང་ཞིང་བྱེད་ཐབས་འཚེ་བ་མེད་པ་ཞིག་ཡིན་དགོས་ཤིང༌། འདིར་ཡང་སྙིང་རྗེ་དང་ཤེས་རབ་ནི་རྩ་འཛིན་གཙོ་བོ་ཞིག་ཡིན།
 
སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

སྙིང་རྗེ་ནི་སོ་སོའི་ཆེད་ལས་ཀྱི་འཚོ་བ་ལ་འགོག་རྐྱེན་ཞིག་མ་ཡིན་རུང༌། འབྲེལ་མེད་ཅིག་ཡིན་པར་བསམ་པའི་ལྟ་ཚུལ་མི་མང་པོར་ཡོད་པར་སྣང་བ་དང༌། ངོས་རང་གི་ལྟ་ཚུལ་ལ། སྙིང་རྗེ་ནི་འབྲེལ་ཡོད་ཅིག་ཡིན་པར་མ་ཟད། བློའི་ཡོན་ཏན་འདི་དང་བྲལ་ན་ང་ཚོའི་བྱ་སྤྱོད་ནི་གཏོར་བརླག་གི་རང་བཞིན་དུ་འགྱུར་བའི་ཉེན་ཁའང་ཆེན་པོ་ཞིག་ཡོད། འདི་ལྟར་ཡིན་པའི་རྒྱུ་མཚན་ནི། གཞན་གྱི་བདེ་སྡུག་སྣང་མེད་དུ་བཏང་ན་མཐར་གཞན་ལ་འཚེ་བའི་མཇུག་འབྲས་འབྱུང་ངེས་ཤིང༌། ང་ཚོས་དགེ་བ་འཚོལ་སྒྲུབ་དང༌། མི་དགེ་བ་བཀག་སྡོམ་བྱེད་པ་གཉིས་ཀར་དགོས་ངེས་ཡིན་པའི་རྟེན་གཞི་དང་ཀུན་སློང་སྙིང་རྗེ་དོན་གཉེར་གྱི་བློ་ལ་བརྟེན་ནས་རྙེད་ཀྱི་ཡོད་པས་ཡིན། ང་ཚོས་ཁ་ཡོད་ལག་ཡོད་ཀྱི་ཐོག་ནས་སྙིང་རྗེའི་རིན་ཐང་ལ་ཡི་རང་དང་གདེང་འཇོག་བྱེད་པ་འགོ་འཛུགས་སྐབས། གཞན་ལ་བཟུང་བའི་རང་གི་ལྟ་སྟངས་རང་བཞིན་གྱིས་ཇེ་ལེགས་སུ་འགྲོ་ཞིང༌། འདི་གཅིག་པུས་ཀྱང་ང་ཚོའི་འཚོ་བའི་སྤྱོད་ལམ་ཐོག་ལ་ཤུགས་རྐྱེན་ཆེན་པོ་ཞིག་ཐེབས་ཐུབ་སྟེ། དཔེར་ན། མགོ་སྐོར་གཏོང་བའི་བསམ་བློ་ཞིག་འཁོར་བའི་ཚེ་ན་གཞན་ལ་བཟུང་བའི་ང་ཚོའི་སྙིང་རྗེས་རང་གི་བསམ་བློ་དེ་རྒྱུན་འཁྱོངས་བྱེད་པར་བཀག་འགོག་བྱེད་པ་དང༌། ད་དུང་སོ་སོའི་ལས་ཀའི་འབྲས་བུ་གཞན་ལ་གནོད་འཚེ་བསྐྱེད་པའི་ཕྱོགས་སུ་བཀོལ་བའི་ཉེན་ཁ་ཡོད་པར་མཐོང་ན། སྙིང་རྗེས་ང་ཚོར་ལས་ཀ་དེ་སྤོང་དུ་འཇུག་རྒྱུ་རེད། 

སྟོང་ལོ་གསར་བའི་ཀུན་སྤྱོད་ཅེས་པ་ལས་བཏུས། 

སྤྱི་སེམས་ཀྱི་གོ་དོན་ནི། ཉེས་སྐྱོན་ངོས་ལེན་གྱི་འདུ་ཤེས་ཤིག་ལས། སོ་སོའི་བློ་རང་གཅེས་འཛིན་གྱི་དབང་དུ་འགྲོ་རུ་མ་བཅུག་པར་གཞན་གྱི་བདེ་སྡུག་གི་ཕྱོགས་སུ་བསྐོར་རྒྱུ་འདི་ཡིན། སྡུག་བསྔལ་མི་འདོད་པ་དང་བདེ་བ་འདོད་པ་རང་ཉིད་དང་གཅིག་མཚུངས་ཡིན་ཞིང༌། རང་ཉིད་ཀྱི་བྱ་སྤྱོད་ཐམས་ཅད་ལ་ཀུན་ཁྱབ་ཀྱི་ཆ་ཞིག་ཡོད་པར་མཐོང་བ་སོགས་ལས་གྲུབ་པའི་སྤྱི་སེམས་ཤིག་གོང་འཕེལ་དུ་གཏོང་བ་ནི། གཞན་ལ་ཕན་འདོགས་པའི་གོ་སྐབས་ཤིག་མཐོང་ན། རང་གཅེས་འཛིན་གྱི་ཁེ་ཕན་ཆུང་ངུ་དོར་ནས་གཞན་དོན་དང་དུ་ལེན་པའི་འདུ་ཤེས་ཤིག་སྐྱེད་སྲིང་བྱེད་པའི་བསམ་བློའི་འཁྱེར་སོ་ཞིག་ཡིན། ང་ཚོས་རང་གི་ནུས་པའི་ཁྱབ་ཁོངས་ཀྱི་ཕ་རོལ་ཏུ་ཅི་ཞིག་འབྱུང་བཞིན་པར་སེམས་ཁུར་བྱེད་ཀྱི་ཡོད་ནའང༌། ང་ཚོས་དེ་ནི་རང་བྱུང་ཁམས་ཀྱི་ཆ་ཤས་ཤིག་ཏུ་བརྩིས་ནས་རང་ཉིད་ཀྱིས་གང་ནུས་པ་དེར་དམིགས་པ་གཏོད་ཀྱི་ཡོད།

སྤྱི་སེམས་འདི་ལྟ་བུ་ཞིག་བསྐྱེད་པའི་ཕན་ཡོན་གལ་ཆེ་ཤོས་ནི། རང་གི་ཉེ་འབྲེལ་གཅིག་པུ་མ་ཡིན་པར་སེམས་ཅན་གཞན་ཐམས་ཅད་ཀྱི་བདེ་སྡུག་ཀྱང་ང་ཚོས་ཚོར་ཐུབ་པ་དེ་ཡིན་ལ། སྡུག་བསྔལ་ཆེ་ཤོས་མྱོང་གི་ཡོད་པའི་འགྲོ་བ་མིའི་ཁྱིམ་གཞི་ཆེན་པོའི་ནང་མི་རྣམས་ལ་ལྷག་ཏུ་སེམས་ཁུར་བྱེད་དགོས་པ་མཐོང་བ་དང༌། འགྲོ་བ་མིའི་རིགས་ཀྱི་སྤུན་ཟླའི་བར་ལ་འགལ་རྐྱེན་སློང་བའི་རྒྱུ་རྐྱེན་བཟློག་དགོས་པ་ངོས་འཛིན་བྱེད་ཐུབ་ཅིང༌། ང་ཚོས་ད་དུང་ཆོག་ཤེས་ཀྱི་གལ་ཆེའི་རང་བཞིན་དེའང་རྟོགས་ཐུབ་ཀྱི་རེད།

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།
 

སེམས་ཀྱི་སྟོབས་ཤུགས་དང་ཤེས་རབ་གོང་འཕེལ་འགྲོ་བའི་དུས་ནི། རྒྱུན་དུ་དཀའ་སྡུག་ཆེ་ཤོས་ཀྱི་སྐབས་སུ་འབྱུང་གི་ཡོད་པ་རང་ཉིད་ལ་དྲན་གསོ་བྱས་ནའང་རིན་ཐང་ཆེ་ཞིང༌། འདིར་ཡང་ང་ཚོས་ལེགས་ཕྱོགས་ཀྱི་བསམ་བློའི་འཁྱེར་སོའམ་འདུ་ཤེས་འཛིན་སྟངས་ཤིག་གོང་དུ་སྤེལ་དགོས་པའི་གལ་ཆེའི་རང་བཞིན་དེ་མཐོང་ཐུབ་པ་དང༌། འཛིན་སྟངས་ཆ་འགྲིག་པོ་ཞིག་བྱུང་ན། ང་ཚོས་སྡུག་བསྔལ་གྱི་མྱོང་བར་བརྟེན་ནས་དངོས་ཡོད་གནས་ལུགས་ལ་སོ་སོའི་མིག་རྒྱ་སྐྱེད་ཐུབ་ཀྱི་རེད། དཔེར་ན། སྐྱབས་བཅོལ་བ་ཞིག་གི་ཚུལ་དུ་འཚོ་བའི་ངོས་རང་གི་ཉམས་མྱོང་ལ་བརྟེན་ནས་ངོས་ཀྱིས་སྔོན་བོད་དུ་རང་གི་འཚོ་བའི་ཆ་ཤས་གལ་ཆེན་ཞིག་ཡིན་པའི་ལམ་སྲོལ་སྣ་ཚོགས་དགོས་ངེས་མིན་པ་རྟོགས་བྱུང༌། 

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།
 

རྙོག་འཛིང་ཆེ་བའི་བླང་དོར་གྱི་གདམ་ཀ་ཞིག་ལ་མཚོན་ན། ང་ཚོས་དེའི་གནས་སྟངས་ཀྱི་ཆ་ཐམས་ཅད་ལ་བསམ་གཞིག་བྱེད་དགོས་པ་དང༌། བསམ་གཞིག་བྱེད་སྟངས་འདི་ལ་ནང་པའི་གཞུང་དུ་གསུངས་པའི་ཐབས་ཤེས་ཟུང་འབྲེལ་ལྡན་དགོས། དེ་ཡང་ཐབས་ཞེས་པ་ནི་ང་ཚོས་རང་གི་བྱ་སྤྱོད་ཐམས་ཅད་སྙིང་རྗེས་ཀུན་ནས་སློང་དུ་འཇུག་པར་བྱེད་པ་དང༌། ཤེས་ནི་ཤེས་རབ་སྟེ། ང་ཚོས་འཚེ་བ་མེད་པའི་རྩ་འཛིན་དེ་མིག་སྔར་ཡོད་པའི་གནས་སྟངས་ལ་བསྟུན་ཐབས་བྱེད་བཞིན། འབྲེལ་ཡོད་ཀྱི་རྒྱུ་རྐྱེན་ཐམས་ཅད་ལ་ཡ་ལན་སྟེར་བའི་ང་ཚོའི་རྣམ་དཔྱོད་ཡིན། ཤེས་རབ་ནི་ལེགས་ཉེས་ལེགས་པར་འབྱེད་པའི་རྣམ་དཔྱོད་བློ་གྲོས་དང་ལྡན་པ་ཞིག་ཏུ་ངོས་འཛིན་བྱེད་ཆོག །

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

བླང་དོར་གྱི་སྒྲིག་ཁྲིམས་ནི་བཀག་སྡོམ་ཙམ་གྱི་ངོ་བོ་ནས་གྲུབ་པ་ཞིག་མིན་པ་སླར་ཡང་བརྗོད་ན་ཕན་རླབས་ཆེ་ཞིང༌། དགེ་བ་འཚོལ་སྒྲུབ་ཀྱང་སྒྲིག་ཁྲིམས་དེའི་གྲུབ་ཆ་ཞིག་ཡིན། བྱམས་པ་དང༌། སྙིང་རྗེ། བཟོད་པ། བཟོད་བསྲན། དགོངས་ཡངས་བཅས་ནི་མེད་དུ་མི་རུང་བའི་བློའི་ཡོན་ཏན་ཁག་ཅིག་ཡིན་ཞིང༌། ཡོན་ཏན་འདི་དག་ང་ཚོའི་འཚོ་བའི་ནང་དུ་ཡོད་སྐབས། ང་ཚོའི་བྱ་བྱེད་ཐམས་ཅད་འགྲོ་བ་མིའི་རིགས་ཀྱི་ཁྱིམ་གཞི་ཧྲིལ་པོར་ཕན་པའི་ལས་ཤིག་ཏུ་འགྱུར་བ་དང༌། ཐ་ན་ང་ཚོའི་ཉིན་རེའི་ལས་ཀ་སྟེ། ཁྱིམ་དུ་ཕྲུ་གུར་ལྟ་སྐྱོང་དང༌། བཟོ་གྲྭ་ཞིག་ཏུ་ལས་ཀ་བྱེད་པ། ཡང་ན་དགེ་རྒན་དང༌། ཚོང་པ། ཁྲིམས་རྩོད་པ། སྨན་པ་སོགས་ཆེད་ལས་གང་རུང་ཞིག་གི་སྒོ་ནས་སྤྱི་ཚོགས་ལ་ཞབས་ཞུ་སྒྲུབ་པ་གང་ཞིག་ཡིན་རུང༌། ང་ཚོའི་བྱ་སྤྱོད་ཀྱིས་ཐུན་མོང་གི་བདེ་སྐྱིད་ལ་མཐུན་རྐྱེན་སྐྲུན་གྱི་ཡོད། ང་ཚོའི་འཚོ་གནས་ལ་དོན་སྙིང་དང་རིན་ཐང་སྦྱིན་པའི་ཡོན་ཏན་དེ་དག་ནི་བླང་དོར་གྱི་སྒྲིག་ཁྲིམས་ལ་བརྟེན་ནས་འབྱུང་གི་ཡོད་སྟབས། ང་ཚོས་བརྩོན་འགྲུས་དང་སྤྲོ་སེམས་ཀྱི་ངང་ནས་བླང་དོར་གྱི་སྒྲིག་ཁྲིམས་དེ་དང་དུ་ལེན་དགོས་པ་ཞིག་ཡིན།
 
སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

ཐ་ན་སོ་སོའི་གྲོགས་པོ་ཉེ་བོ་ཞིག་ཡིན་ཡང༌། རང་ཉིད་ཀྱིས་གཅེས་པའི་རེ་འདོད་འགྲུབ་པར་འགོག་རྐྱེན་བྱས་ན། གྲོགས་པོ་དེར་སྤྱོད་པ་ངན་པ་སྟོན་པའི་གོམས་གཤིས་ཤིག་ང་ཚོར་ཡོད། འོན་ཀྱང༌། སྙིང་རྗེ་དང༌། ཕན་ཚུན་བརྩི་བཀུར་གྱིས་རང་ཉིད་གཞན་དག་དང་འབྲེལ་སྟངས་ལ་རྟེན་གཞི་བརྟན་པོ་ཞིག་མཁོ་འདོན་བྱེད་ཀྱི་ཡོད། གལ་ཏེ་རང་གི་བརྩེ་དུང་ནི་མཛེས་སྡུག་ལྟ་བུའི་ཕྱི་ཚུལ་གྱི་རྣམ་པ་ལ་གཙོ་བོར་བརྟེན་ནས་བྱུང་ན། ཕ་རོལ་པོར་བཅངས་པའི་རང་གི་དུང་སེམས་དེ་རིམ་གྱིས་ཉམས་འགྲོ་བ་སྟེ། རང་གི་མཐོང་སྣང་ལ་མཛེས་པའི་ཕ་རོལ་པོའི་ཡོན་ཏན་གྱི་ཉམས་ཤོར་བ་དང༌། ཡང་ན་དེས་སོ་སོའི་འདོད་པ་ཚིམ་པར་བྱེད་མ་ཐུབ་ན། རང་གི་ཟླ་བོ་མི་གཅིག་ཡིན་རུང་ཕན་ཚུན་གྱི་འབྲེལ་བའི་ངོ་བོ་ལ་ཁྱད་པར་ཆེན་པོ་འབྱུང་གི་ཡོད། དེའི་ཕྱིར་ཕྱི་ཚུལ་གྱི་འགུག་ཤུགས་ཙམ་ལས་བྱུང་བའི་མཛའ་འབྲེལ་ནི་ཕལ་ཆེར་རྒྱུན་དུ་བརྟན་པོ་མིན། འོན་ཀྱང༌། ང་ཚོས་རང་གི་སྙིང་རྗེ་གོང་འཕེལ་དུ་གཏོང་འགོ་ཚུགས་ན། གཞན་གྱི་ཕྱིའི་རྣམ་པ་དང་སྤྱོད་པ་གཉིས་ཀས་རང་གི་རྩ་བའི་བསམ་བློའི་འཁྱེར་སོ་ལ་ཤུགས་རྐྱེན་ཐེབས་ཁག་པོ་ཡིན།

སྟོང་ལོ་གསར་བའི་རྣམ་གཞག་ཅེས་པ་ལས་བཏུས།

ང་ཚོའི་དམིགས་འདུན་ལ་རང་གཅེས་འཛིན་དང༌། ཞེ་སྡང༌། བསླུ་སེམས་སོགས་ཀྱི་ལྷད་ཞུགས་ན། ང་ཚོའི་སྤྱོད་པ་ལ་ཕན་བདེ་བསྐྲུན་པའི་ཕྱི་ཚུལ་གྱི་རྣམ་པ་ཇི་ལྟར་ཆེ་ཡང༌། སྤྱོད་པ་དེ་ཚོའི་མཐར་གཏུགས་ཀྱི་ཤུགས་རྐྱེན་ནི་རང་གཞན་གཉིས་ཀར་ལེགས་པའི་ཆ་དང་ལྡན་པ་ཞིག་མིན།

དེ་ལྟ་ནའང༌། བླང་དོར་གྱི་གདམ་ཀ་རྙོག་འཛིང་ཅན་ཞིག་ལ་འཕྲད་སྐབས། ང་ཚོས་འཚེ་བ་མེད་པའི་རྩ་འཛིན་འདི་ཇི་ལྟར་བཀོལ་སྤྱོད་བྱེད་དགོས་སམ། དེ་འདྲའི་སྐབས་སུ་ང་ཚོས་རང་གི་རྣམ་དཔྱོད་དང་འཆར་སྣང་གི་ནུས་པ་བཀོལ་དགོས་ཤིང༌། ནུས་པ་འདི་ནི་འགྲོ་བ་མིའི་རིགས་ཀྱི་ཐོན་ཁུངས་རིན་ཐང་འཇལ་ཐབས་མེད་པ་ཞིག་ཡིན་པར་མ་ཟད། འགྲོ་བ་མི་དུད་འགྲོ་དང་ཐ་དད་པ་ཡིན་པར་སྟོན་བྱེད་ཀྱི་ཁྱད་ཆོས་གཙོ་བོ་ཞིག་ཀྱང་ཡིན་པ་ངོས་ཀྱིས་བརྗོད་ཡོད། 

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

ད་དུང་ཉོན་མོངས་པའི་རྟོག་པ་དང་མྱོང་ཚོར་ནི།  རང་གི་སྡུག་བསྔལ་གྱི་འབྱུང་ཁུངས་ཏེ། ཞེ་སུན་དང་མགོ་རྙོག །སེམས་ཁྲལ་དང་དངངས་སྐྲག །རང་གི་སྤོབས་པ་འཇོམས་པའི་རང་མཐོང་ཉམས་པ་སོགས་ཀྱི་གཞི་ཡིན། དེ་བས་ན་ང་ཚོས་ཉོན་མོངས་པའི་སེམས་བྱུང་བཀག་སྡོམ་བྱེད་མ་ཐུབ་ན། ང་ཚོ་ནི་རྟག་ཏུ་སེམས་དང་ཡིད་མ་བདེ་བའི་གནས་སྟངས་ནང་ལྷག་རྒྱུ་ཡིན་ཞིང༌། སེམས་ལ་ཞི་བདེ་ཞིག་ཡོང་ཐབས་མེད་པ་དང༌། བདེ་བའི་ཚབ་ཏུ་སེམས་ཁྲལ་ཡོང་ལ། དངངས་སྐྲག་དང་སྐྱོ་ཞུམ་ནི་གྲིབ་མ་བཞིན་རང་གི་ཉེ་གམ་དུ་གནས་རྒྱུ་རེད།

སྟོང་ལོ་གསར་བའི་རྣམ་གཞག་ཅེས་པ་ལས་བཏུས།

ཟང་ཟིང་གི་རྟོག་པ་དང་མྱོང་ཚོར་ནི།  རང་གཞན་གང་ལའང་ཕན་ཐོགས་པའི་སྐབས་ཤིག་མེད་པ་དང༌། ང་ཚོ་ཁོང་ཁྲོ་ཅི་ཙམ་ཆེ་ན་དེ་ཙམ་གྱིས་མི་མང་པོ་ང་ཚོ་ལ་གཡོལ་ཞིང༌། ང་ཚོར་དོགས་ཟོན་ཅི་ཙམ་ཆེ་ན། དེ་ཙམ་གྱིས་ང་ཚོ་མི་གཞན་དང་འབྲེལ་ཐག་རིང་དུ་སོང་ནས་ཁེར་རྐྱང་དུ་ལྷག་ཅིང༌། ང་ཚོ་ཆགས་ཞེན་ཅི་ཙམ་ཆེ་ན། དེ་ཙམ་གྱིས་ང་ཚོས་གཞན་དང་འབྲེལ་བ་ལེགས་པོ་ཞིག་འཛུགས་མི་ཐུབ་པར་རང་ཉིད་ཁེར་རྐྱང་དུ་ལྷག་གི་ཡོད། འདོད་ཆགས་དང་ཞེན་ལོག །རྔམ་སེམས་དང་ང་རྒྱལ་གྱི་ཧམ་སེམས་ལྟ་བུའི་ཉོན་མོངས་རགས་པས་གཙོ་བོར་ཁ་ལོ་བསྒྱུར་པའི་མི་ཚོའི་བྱ་སྤྱོད་ལ་སོམས་དང༌། མི་འདི་ལྟ་བུ་ཞིག་སྟོབས་འབྱོར་མངའ་ཐང་དར་ནས་ལོ་རྒྱུས་ཀྱི་ནང་དུ་འགོད་སྲིད་ཀྱང༌། ཤི་བའི་རྗེས་སུ་སྟོབས་འབྱོར་མངའ་ཐང་དེ་ཡང་ཚིག་སྟོང་ཞིག་ལས་ཅི་ཡང་མིན་ཏེ། མི་འདིའི་རིགས་ཀྱིས་མཛད་རྗེས་ཅི་ཞིག་བཞག་ཡོད་དམ། 

སྟོང་ལོ་གསར་བའུ་བླང་དོར་གྱི་རྣམ་གཞག་ཅེས་པ་ལས་བཏུས།

ཁོང་ཁྲོ་ལང་བ་ནི་རང་གི་གཏན་འཇགས་ཀྱི་གོམས་གཤིས་ཤིག་ཏུ་གྱུར་ན། ཤེས་བྱ་ཡོན་ཏན་དང༌། སྟོབས་འབྱོར་མངའ་ཐང་ཇི་ལྟར་ཆེ་རུང༌། མི་གཞན་ཚོས་ང་ཚོར་གཡོལ་གཟུར་བྱེད་ཀྱི་ཡོད། མི་ཚོས་ཁོ་ནི་ཧ་ཅང་གྲུང་པོ་ཞིག་རེད་མོད། ཁྱེད་ཀྱིས་ཤེས་གསལ་ལྟར། ཁོ་ནི་ཁོང་ཁྲོ་ལང་ཆོག་ཆོག་རེད་ཅེས་བརྗོད་ནས་རང་གི་ཉེ་གམ་དུ་མི་འོང་བ་དང༌། ཡང་ན། ཁོ་མོ་ལ་འཇོན་ཐང་ཧ་ལས་པའི་ཆེན་པོ་ཞིག་ཡོད་ཀྱང༌། མོ་ནི་རླུང་ལང་ཆོག་ཆོག་ཅིག་ཡིན་ཕྱིར། ང་ཚོས་དོགས་ཟོན་བྱས་ན་ལེགས་ཞེས་བརྗོད་ཀྱི་རེད། ང་ཚོས་ཁོང་ཁྲོ་ཆེ་བའི་མི་ལ་དོགས་ཟོན་དང་གཟབ་ནན་བྱེད་པ་ནི། རྒྱུན་དུ་གདོང་ལ་ཁྲོ་གཉེར་གོན་ཞིང་ཁ་ནས་མཆེ་བ་གཙིགས་པའི་ཁྱི་ལ་ཇི་ལྟར་བྱེད་པ་དང་གཅིག་མཚུངས་ཤིག་ཡིན་ཞིང༌། མི་འདིའི་རིགས་ཀྱི་ཁོང་ཁྲོའི་སྡིགས་མོ་ཁུར་བ་ལས་ང་ཚོས་ཁོ་ཚོ་རང་གི་གྲོགས་གྲས་ནས་ཕུད་ཀྱི་ཡོད།

འཇིགས་སྣང་ལྟ་བུའི་ཚོར་བ་སྐྱེ་སྐབས། རྣམ་རྟོག་བརྒྱུད་ནས་ཤུགས་ཚད་ཆེ་རུ་སོང་བའི་མྱོང་ཚོར་དང་ཐ་དད་པའི་ཚོར་ཤུགས་དྲག་པོ་ཞིག་གི་ངོ་བོ་ནས་མྱོང་ཞིང༌། རྗེན་པ་ཡིན་པའི་ཁོང་ཁྲོའི་རིགས་ཤིག་ཡོད་པ་ངོས་ཀྱིས་ཁས་ལེན་གྱི་ཡོད། ཁོང་ཁྲོའི་རིགས་འདི་ལ་དགེ་མཚན་ཆེ་བའི་མཇུག་འབྲས་ཡོད་ཆོག་པ་ང་ཚོའི་བློ་ངོར་འཆར་ཐུབ་པ་དང༌། གང་ཞིག་དྲང་བདེན་མིན་པ་མཐོང་བས་ཁོང་ཁྲོ་ལངས་ནས་གཞན་སེམས་ཀྱི་སྤྱོད་པ་སྟོན་སྲིད་དེ། སྲང་ལམ་དུ་མི་ཞིག་ལ་གཞན་གྱིས་རྡུང་རྡེག་བྱས་ན། དེའི་རོགས་སྐྱོར་དུ་འགྲོ་བར་སྐུལ་སློང་བྱེད་པའི་ཁོང་ཁྲོ་ནི་དགེ་བ་ཞིག་ཏུ་བསམ་ཆོག འོན་ཀྱང༌། ཁོང་ཁྲོ་འདི་ནི་དྲང་བདེན་མིན་པ་དྲང་བདེན་དུ་བསྒྱུར་པའི་ཚད་ལས་འགོངས་པ་དང༌། ཡང་ན་སྒེར་དོན་ཞིག་ཏུ་བསྒྱུར་ནས་བརྣབ་སེམས་དང་འཁོན་འཛིན་གྱི་ངོ་བོར་འགྱུར་བའི་ཉེན་ཁ་ཆེ། ང་ཚོས་མི་དགེ་བའི་ལས་ཤིག་བྱེད་སྐབས། དགེ་བ་མིན་པའི་ལས་དེ་དང༌། རང་ཉིད་ཀྱི་བར་ལ་ཁྱད་པར་འབྱེད་པའི་ནུས་པ་ང་ཚོར་ཡོད་རུང༌། གཞན་གྱིས་བྱས་པའི་ལས་ཤིག་ཡིན་ན། ང་ཚོས་བྱ་བ་དང་བྱེད་པ་པོ་གཉིས་ཀྱི་བར་ལ་ཁྱད་པར་རྒྱུན་དུ་འབྱེད་མི་ཐུབ། འདིས་ཐ་ན་རྒྱུ་མཚན་ཡོད་པ་མངོན་གསལ་ཡིན་པའི་ཁོང་ཁྲོ་ལའང་ང་ཚོས་ཡིད་རྟོན་བྱེད་མི་རུང་བ་སྟོན་གྱི་ཡོད། 

སྟོང་ལོ་གསར་བའི་བླང་དོར་གྱི་རྣམ་གཞག་ཅེས་པ་ལས་བཏུས།
 

དཔེར་ན། རང་ལ་ཤིན་ཏུ་ཉེ་ཞིང༌། རང་གི་ཞན་ཆ་ཚང་མ་ཤེས་པའི་མི་ཞིག་གིས་རང་ལ་སྤྱོད་པ་ངན་པ་སྟོན་སྐབས། རང་ཉིད་ཀྱི་འགོག་སྲུང་གི་ནུས་པ་ཡོད་ཚད་ཁོང་ཁྲོས་ཟིལ་གྱིས་མནན་ཏེ། མི་དགེ་བའི་ཡ་ལན་ལ་ཁ་ལོ་བསྒྱུར་མི་ཐུབ་པའི་དུས་སུ་ང་ཚོས་ཅི་ཞིག་བྱེད་དགོས་སམ། གནས་སྟངས་འདི་འདྲའི་ནང་དུ་གཞན་ལ་བཟུང་བའི་སྙིང་རྗེར་རྒྱུན་འཁྱོངས་བྱེད་པ་དཀའ་ཚེགས་ཆེ་ནའང༌། མ་མཐའ་ཡང་ང་ཚོས་རྒོལ་འཛིང་དང་དྲག་སྤྱོད་ཀྱི་སྒོ་ནས་ཡ་ལན་སྟོན་མི་དགོས་ལ། ཁང་པའི་ཕྱི་རུ་བུད་ནས་འཆམ་འཆམ་དུ་འགྲོ་བ་དང༌། ཡང་ན།  རང་གི་དབུགས་ཀྱི་རྒྱུ་བ་ཐེངས་ཉི་ཤུ་ལ་རྩི་བ་སོགས་བྱས་ཏེ། རང་བློ་མར་ཞི་ཐབས་ཤིག་ང་ཚོས་འཚོལ་དགོས། ང་ཚོས་རྒྱུ་མཚན་འདི་ལྟ་བུ་གཞིར་བཞག་ནས་རང་གི་ཉིན་རེའི་འཚོ་བའི་ནང་བཟོད་པ་གཙོ་གནད་དུ་བཟུང་ནས་ཉམས་ལེན་བྱེད་དགོས་ཤིང༌། ང་ཚོས་བཟོད་པ་ལ་གོམས་འདྲིས་ཟབ་མོ་བྱས་ན། ང་ཚོ་དཀའ་ཁག་གི་གནས་སྟངས་ནང་ལྷུང་སྐབས། འབད་པ་ལྷག་མ་ཞིག་བྱེད་དགོས་སྲིད་ཀྱང༌། ང་ཚོས་དཀའ་ཁག་གི་གནས་སྟངས་དེའི་ཕྱོགས་ཡོངས་ལ་ལྟ་ཐུབ་ཀྱི་ཡོད། དེ་ལས་ལྡོག་སྟེ། དཀའ་སྡུག་ཅིག་རང་མགོར་འབབ་རག་བར་དུ་བཟོད་པའི་ཉམས་ལེན་སྣང་མེད་དུ་བསྐྱུར་ན། དཀའ་སྡུག་དེའི་རྒྱུ་རྐྱེན་ལ་ཞི་བའི་ལམ་ནས་གདོང་ལེན་བྱེད་པར་ལམ་ལྷོང་འབྱུང་མི་སྲིད།

བཟོད་པའི་ཉམས་ལེན་ལ་ཐོག་མར་གོམས་འདྲིས་བྱེད་ཐབས་ལེགས་ཤོས་ནི། ང་ཚོས་དུས་ཚོད་བླངས་ནས་དེའི་ཕན་ཡོན་གྱི་སྐོར་ལ་གོ་རིམ་དང་ལྡན་པའི་སྒོ་ནས་བསམ་གཞིག་བྱེད་པ་འདི་ཡིན། 

སྟོང་ལོ་གསར་བའི་བླང་དོར་གྱི་རྣམ་གཞག་ཅེས་པ་ལས་བཏུས།

ངོས་རང་གི་ལྟ་ཚུལ་ལ། བརྩེ་བ་དང་བྱམས་སྐྱོང་ལ་ཡི་རང་བྱེད་པ་འདི་ནི། ང་ཚོ་མ་སྐྱེས་གོང་དུ་གྲུབ་ཡོད་པ་ཞིག་ཡིན་ཞིང༌། ངོས་ཀྱི་གྲོགས་པོ་ཚན་རིག་པ་འགས་བརྗོད་དོན་ལྟར་ན། ཨ་མའི་སེམས་ཀྱི་བདེ་ཐང་གིས་མངལ་གྱི་ཕྲུ་གུའི་བདེ་ཐང་ལ་ཤུགས་རྐྱེན་ཐེབས་པ་དང༌། གལ་ཏེ་ཨ་མའི་སེམས་ཞི་ལྷོད་བག་ཕེབས་སུ་གནས་ན། བཙའ་རྒྱུ་ཡིན་པའི་ཕྲུ་གུ་ལ་ཕན་པ་ཆེ་བ་སོགས་སྟོན་པའི་ཚན་རིག་གི་བདེན་དཔང་ཁུངས་བཙན་པོ་ཡོད་ཅིང༌། སྤྲོ་སྣང་ཆེ་བའི་ཨ་མ་ཞིག་གིས་སྤྲོ་སྣང་ཆེ་བའི་ཕྲུ་གུ་ཞིག་བཙའ་རྒྱུ་རེད། འོན་ཀྱང༌། ཞེ་སུན་དང་ཁོང་ཁྲོས་མངལ་གྱི་ཕྲུ་གུའི་དར་རྒྱས་ལ་གནོད་ཀྱི་ཡོད། དེ་མཚུངས་སྐྱེས་པའི་བདུན་ཕྲག་འགའི་རིང་ལའང་བརྩེ་བ་དང་བྱམས་སྐྱོང་གིས་མུ་མཐུད་ནས་ཕྲུ་གུའི་ལུས་པོའི་དར་རྒྱས་ལ་ནུས་པ་ཆེན་པོ་ཞིག་འདོན་པ་དང༌། མཚམས་འདིར་ཀླད་པ་ནི་མགྱོགས་པོར་འཚར་ལོངས་འབྱུང་ཞིང༌། སྨན་པ་ཚོའི་འདོད་ཚུལ་ལ། ཕ་མས་རྒྱུན་དུ་ཕྲུ་གུར་རེག་པ་དེས་ཀླད་པའི་འཕེལ་རྒྱས་ལ་རམ་འདེགས་བྱེད་ཀྱི་ཡོད། འདིས་བསྟན་དོན་ནི། ཕྲུ་གུར་མཚོན་ན། སུ་ཞིག་ཡིན་མིན་ཤེས་མི་སྲིད་པ་དང༌། ཡང་ན་སུ་ཞིག་གིས་རང་ལ་རེག་གི་ཡོད་མེད་ལ་ཁྱད་པར་མེད་ཀྱང༌། ཕྲུ་གུ་ལ་རང་གི་ལུས་པོའི་ཆ་ནས་བརྩེ་བ་དང་བྱམས་སྐྱོང་དགོས་པ་གསལ་པོ་ཡིན་པ་འདི་རེད། 

གཅིག་བྱས་ན། འདིས་ད་དུང་རྒྱུ་མཚན་ཅིའི་ཕྱིར་སྤྲོ་ཐུང་ཞིང་དོགས་ཟོན་ཆེ་ལ། དངངས་སྐྲག་གིས་ཡོངས་སུ་མནར་བའི་མི་ཚོས་ཀྱང་གཞན་གྱི་ལྟ་སྐྱོང་དང་བྱམས་སེམས་ལ་ཡ་ལན་ལེགས་པོ་སྤྲོད་པ་ལའང་གསལ་བཤད་བྱེད་ཐུབ་པ་དང༌། ཁོ་ཚོ་ཡང་བྱིས་པ་ཡིན་དུས་གཞན་གྱི་ལྟ་སྐྱོང་འོག་འཚར་ལོངས་བྱུང་ཡོད། གཉན་འཕྲང་གི་སྐབས་དེར་ཕྲུ་གུ་ཞིག་སྣང་མེད་དུ་བསྐྱུར་ན་གསོན་མི་ཐུབ་པ་གསལ་པོ་ཡིན།    སྟབས་ལེགས་ནས་འདི་ནི་ཧ་ལམ་ནམ་ཡང་འབྱུང་གི་མེད་ལ། ཨ་མའི་བྱ་འགུལ་ཐོག་མ་ནི། བཙས་མ་ཐག་པའི་ཕྲུ་གུ་ལ་འཚོ་བཅུད་ལྡན་པའི་རང་གི་འོ་མ་སྤྲོད་པ་དེ་ཡིན་ཞིང༌། འདིས་ངོས་ཀྱི་བསམ་པར་ཆ་རྐྱེན་ལ་ལྟོས་མེད་ཀྱི་བརྩེ་བ་དྭངས་མ་ཞིག་མཚོན་འདུག །སྐབས་འདིར་ཨ་མའི་བརྩེ་བ་ནི་བཅོས་མིན་ལྷད་མེད་ཅིག་ཡིན་པ་དང༌། ཚུར་རང་ལ་གང་ཞིག་ཐོབ་པའི་རེ་བ་ཅི་ཡང་ཁོ་མོར་མེད། ཕྱོགས་གཞན་ནས་ཕྲུ་གུ་དེ་ནི་རང་བཞིན་གྱིས་ཨ་མའི་ནུ་མའི་ཕྱོགས་སུ་འགུལ་གྱི་ཡོད། འདི་ནི་རྒྱུ་མཚན་ཅིའི་ཕྱིར་ཡིན་ནམ། དྲི་བ་འདིའི་ལན་དུ་ང་ཚོས་གསོན་འདོད་པའི་ལྷན་སྐྱེས་ཀྱི་བག་ཆགས་གླེང་ཆོག་པར་མ་ཟད། ད་དུང་ཕྲུ་གུའི་ཕྱོགས་ན་རང་གི་ཨ་མར་བཅངས་པའི་བརྩེ་བ་ངེས་ཅན་ཞིག་ཡོད་པར་བསམ་པ་ལའང་རྒྱུ་མཚན་ཞིག་ལྡན་པར་སྙམ། གལ་ཏེ་ཕྲུ་གུ་ལ་ཞེ་ལོག་གི་ཚོར་བ་ཞིག་ཡོད་ན། ཨ་མའི་ནུ་མ་ནུ་རྒྱུ་ཡིན་ནམ། གལ་ཏེ་ཨ་མར་ཚོར་བ་དེ་འདྲ་ཞིག་ཡོད་ན། ཨ་མའི་ནུ་མ་ལས་འོ་མ་རང་ཤུགས་ཀྱིས་ཡོང་རྒྱུ་ཡིན་ནམ། ཕྱོགས་གཉིས་ཀར་ཡོད་པའི་རང་བྱུང་གི་བརྩེ་བ་དང་བྱམས་སྐྱོང་ནི། མ་བུའི་བར་གྱི་འབྲེལ་བའི་རྟེན་གཞི་ཞིག་ཡིན་ཞིང༌། འབྲེལ་སེམས་དེ་ནི་གཞན་ལ་བལྟས་ནས་སྦྱོང་བ་བྱས་པ་ཞིག་མ་ཡིན་པ་དང༌། ཆོས་ལུགས་ཀྱི་བཀོད་འདོམས་འོག་ཏུའང་བྱུང་མེད། དེ་མཚུངས་ཁྲིམས་ལུགས་གང་གིས་ཀྱང་བཙན་འགེལ་བྱེད་མི་དགོས་པ་དང༌། སློབ་གྲྭའི་ནང་དུའང་སློབ་ཀྱི་མེད་ལ། མ་བུའི་བར་གྱི་དུངས་སེམས་འདི་ནི་རང་བཞིན་གྱིས་འབྱུང་གི་ཡོད།

    རང་གི་ཕྲུ་གུ་ལ་དུངས་པའི་བྱམས་སྐྱོང་ནི། དུད་འགྲོའི་རིགས་མང་པོར་ཐུན་མོང་དུ་ཡོད་པར་སྣང་བ་དང༌། འདི་ནི་གནད་འགག་ཅིག་ཡིན་ཏེ། ཕྲུ་གུ་ལ་རང་གི་གསོན་གནས་ཀྱི་ཆ་ནས་བྱམས་སྐྱོང་དགོས་པར་མ་ཟད། ཨ་མའི་ཕྱོགས་ནའང་བརྩེ་བའི་བྱམས་སྐྱོང་དེ་མཁོ་སྤྲོད་བྱེད་ཐུབ་པའི་ལྷན་སྐྱེས་ཀྱི་ནུས་པ་ཞིག་ཡོད། མ་བུའི་བར་གྱི་བརྩེ་བ་འདི་ནི་ཆེས་ཟབ་པས། ཕལ་ཆེར་འབྱུང་བཞིའི་གྲུབ་ཆ་ལས་བྱུང་བའི་རྩོལ་ནུས་ཀྱི་ངོས་ནས་བརྩེ་བ་དེ་འབྱུང་གི་ཡོད་པར་སྙམ་སྲིད་ཀྱི་རེད། འདི་ལྟར་ཕན་ཚུན་ལ་བཅངས་པའི་བརྩེ་བ་འདི་ནི། གསོན་གནས་ཀྱི་རྩོལ་ནུས་ཤིག་ལས་ཅི་ཡང་མིན་པའི་རྩོད་གླེང་ཡང་བྱེད་ཆོག་པ་དང༌། གཅིག་བྱས་ན་དེ་ལྟར་ཡིན་སྲིད་ཀྱང༌། འདི་ནི་བརྩེ་བ་དེ་གྲུབ་མེད་པའི་དགག་བཞག་ཅིག་མིན་པར་མ་ཟད། འདིས་ཕྲུ་གུར་བྱམས་སྐྱོང་དགོས་ཤིང༌། ཨ་མར་བྱམས་བརྩེ་མཁོ་འདོན་གྱི་ནུས་པ་ཡོད་སྟབས། ང་ཚོ་འགྲོ་བ་མིའི་རང་བཞིན་བྱམས་བརྩེ་ཅན་ཡིན་པའི་ངོས་ཀྱི་ཡིད་ཆེས་ལ་གནོད་པའང་བྱེད་ཀྱི་མེད།

སྟོང་ལོ་གསར་བའི་བླང་དོར་གྱི་རྣམ་གཞག་ཅེས་པ་ལས་བཏུས། 
 

རང་གི་འཚོ་བ་ཧྲིལ་པོ་ལ་ཡིད་མ་ཚིམ་པ་དང༌། ཡང་ན་སྡུག་བསྔལ་གྱིས་རང་ཉིད་ཡོངས་སུ་ཟིལ་གྱིས་གནོན་པའི་སྐབས་སུ་ང་ཚོས་ཅི་ཞིག་བྱེད་དགོས་སམ། འདི་ལྟ་བུའི་ཚོར་བ་ནི་ཡང་ནས་ཡང་དུ་ང་ཚོའི་འཚོ་བའི་ནང་དུ་ཚད་གཞི་འདྲ་མིན་ལ་འབྱུང་གི་ཡོད། ཚོར་བ་དེ་སྐྱེ་སྐབས་ང་ཚོས་གང་ཐུབ་ཀྱིས་རང་གི་བློ་ཡར་འདེགས་བྱེད་ཅིག་བཙལ་དགོས་པ་གལ་ཆེ་ཞིང༌། ང་ཚོས་རང་གི་འཚོ་བའི་ནང་དུ་ཡོད་པའི་ལེགས་པའི་ཆ་རྣམས་དྲན་དགོས་ཏེ། དཔེར་ན། ང་ཚོར་མི་ཞིག་གིས་བརྩེ་སེམས་བཅངས་ཡོད་པ་དང༌། ང་ཚོར་འཇོན་ཐང་ཁག་ཅིག་ལྡན་པ། སློབ་སྦྱོང་ཡག་པོ་ཐོབ་ཡོད་པ། འཚོ་བའི་རྩ་བའི་དགོས་མཁོ་ལྟོ་གོས་གནས་མལ་ཚང་ཡོད་པ། ད་དུང་འདས་པའི་ནང་དུ་སོ་སོས་བྱ་བ་བཟང་པོ་ག་གེ་མོ་ཞིག་བྱས་ཡོད་སྲིད་པ་སོགས་ཡིན། དངུལ་ཁང་དོ་དམ་པ་ཞིག་གིས་སྒོར་མོ་ཕྱི་ལ་གཡར་བའི་གྲངས་འབོར་ཆུང་ངུ་ཞིག་ལའང་སྐྱེད་ཀ་ལེན་པ་ཇི་བཞིན། ང་ཚོས་སོ་སོའི་འཚོ་བའི་ནང་གི་ལེགས་པའི་ཆ་ཕྲ་མོ་ཞིག་ཡིན་རུང་རང་གི་བསམ་གཞིག་གི་ནང་དུ་བསྡུ་དགོས་ཤིང༌། ང་ཚོས་འདི་ལྟར་རང་གི་བློ་ཡར་འདེགས་བྱེད་ཅིག་མ་བཙལ་ན། རེ་བ་ཟད་པའི་ཚོར་ཤུགས་དེ་ཇེ་ཆེར་འགྲོ་བའི་ཉེན་ཁ་ཚབས་ཆེན་ཞིག་ཡོད་པ་དང༌། ཚོར་ཤུགས་དེར་བརྟེན་ནས་རང་གིས་བྱ་བ་ལེགས་པོ་ཅི་ཡང་སྒྲུབ་མི་ཐུབ་པའི་འདུ་ཤེས་ཤིག་འབྱུང་ཞིང༌། མཚམས་འདིར་སླེབས་དུས་རང་སྲོག་གཅོད་པ་ནི་གདམ་ཀ་ཁོ་ན་དེ་ཡིན་པར་སྣང་གི་རེད།

སྐྱོ་ཞུམ་དང་རེ་བ་ཟད་པའི་གནས་སྟངས་ཕལ་ཆེ་བའི་ནང༌། གང་ཟག་རང་གི་སེམས་པའི་འཛིན་སྟངས་ཀྱི་ཆ་ནས་ཚོར་བ་དེའི་རིགས་ཡོང་གི་ཡོད་པ་ལས། སོ་སོའི་ཡུལ་གྱི་གནས་སྟངས་དངོས་ནི་སྡུག་བསྔལ་དེ་འབྱུང་སའི་གཞི་ཞིག་མིན། གཞན་གྱི་མཉམ་འབྲེལ་ལ་མ་བརྟེན་པར་སོ་སོའི་སེམས་ཀྱི་དཀའ་སྡུག་དེ་སེལ་མི་ཐུབ་པ་ཞིག་ཡིན་ན། གཞན་ལ་རེ་བ་ཞུ་བའི་གནད་དོན་ཞིག་རེད།

སྟོང་ལོ་གསར་བའི་བླང་དོར་གྱི་རྣམ་གཞག་ཅེས་པ་ལས་བཏུས།

བདེ་བའི་འཚོལ་སྙེག་ནི་གསོན་གནས་དང༌། ལུས་ཕུང་གི་བཀྲེས་སྐོམ་བསལ་བ་ཙམ་ལས་མ་འདས་པའི་དུད་འགྲོ་དང་མ་འདྲ་བར། ང་ཚོ་འགྲོ་བ་མི་ལ་གནས་རིམ་ཟབ་མོ་ཞིག་ནས་བདེ་བ་མྱོང་བའི་ནུས་པ་ཡོད་ལ། དེ་ལྟ་བུའི་བདེ་བ་ཞིག་རྙེད་ན། བདེ་བ་དེར་མི་འདོད་པའི་མྱོང་བ་གཞན་ཟིལ་གྱིས་གནོན་པའི་ནུས་པའང་ལྡན་ཞིང༌། གཡུལ་འགྱེད་ལ་ཞུགས་པའི་དམག་མི་ཞིག་ལ་མཚོན་ན། རང་ཉིད་རྨས་ཡོད་རུང་རང་ཕྱོགས་རྒྱལ་ཡོད་ཚེ། རྒྱལ་ཁ་དེར་བརྟེན་ནས་བྱུང་བའི་ཡིད་ཚིམ་གྱི་བདེ་བས་གཡུལ་འགྱེད་ཤོར་བའི་ཕྱོགས་སུ་གཏོགས་ཤིང༌། རྨས་གཅིག་མཚུངས་ཤིག་ཕོག་ཡོད་པའི་དམག་མི་ཞིག་གི་ན་ཟུག་ལས་ལྡབ་མང་པོར་རང་གི་ན་ཟུག་ཉུང་དུ་གཏོང་ཐུབ།   གནས་རིམ་ཟབ་མོ་ཞིག་ནས་བདེ་བ་མྱོང་ཐུབ་པའི་འགྲོ་བ་མིའི་ནུས་པ་འདི་ནི། ད་དུང་རོལ་དབྱངས་དང་སྒྱུ་རྩལ་སོགས་ཀྱིས་ཕྱི་དངོས་པོའི་ལོངས་སྤྱོད་ཀྱི་བདེ་བ་ལས་ལྷག་པའི་ཚད་མཐོའི་བདེ་ཚོར་ཞིག་ང་ཚོར་སྤྲོད་ཐུབ་པའི་རྒྱུ་མཚན་ཡང་ཡིན། 

སྟོང་ལོ་གསར་བའི་བླང་དོར་གྱི་རྣམ་གཞག་ཅེས་པ་ལས་བཏུས།