ལེགས་བཤད་གཅེས་བཏུས།

ང་ཚོ་རེ་རེ་ལའང་བཅོས་མ་མིན་པའི་ཞི་བདེ་ཞིག་གི་ཆ་རྐྱེན་བསྐྲུན་པའི་འོས་འགན་རེ་ཡོད་པ་དང༌། ང་ཚོས་རང་ཉིད་ཀྱི་ཉོན་མོངས་པའི་སེམས་བྱུང་ལ་གདོང་ལེན་བྱས་ནས་དགེ་བའི་ཡོན་ཏན་རྣམས་གོང་འཕེལ་དུ་གཏོང་བཞིན། རང་རྒྱུད་ཀྱི་དགྲ་བོའི་དཔུང་ཚོགས་འཇོམས་ཐབས་བྱས་ན། ང་ཚོས་རང་བཞིན་གྱིས་ཕྱིའི་གོ་མཚོན་བཀག་སྡོམ་གྱི་གྲོགས་སུ་འགྲོ་བའི་རྐྱེན་སྒྲུབ་ཀྱི་ཡོད། འཛམ་གླིང་ལ་ཞི་བདེ་ལྷད་མེད་ཅིག་ཡོད་དགོས་ན། དེ་ནི་ང་ཚོ་རེ་རེ་ནས་རང་ཉིད་ཀྱི་སེམས་འདུལ་སྦྱོང་བྱེད་པ་ཁོ་ནར་བརྟེན་ནས་ཡོང་དགོས་པ་ཞིག་ཡིན་ཏེ། ཉོན་མོངས་པའི་མྱོང་ཚོར་ནི་རྩོད་རྙོག་གི་སྲོག་རླུང་ལྟ་བུ་ཡིན། ང་ཚོས་གཞན་གྱི་བདེ་སྡུག་ཤེས་པར་བྱས་ནས་གཞན་དག་གི་བདེ་སྐྱིད་ཀྱི་ཐོབ་ཐང་རང་གི་ཐོབ་ཐང་དང་འདྲ་མཉམ་ཡིན་པ་ངོས་འཛིན་བྱེད་བཞིན། གཞན་ལ་སྡུག་བསྔལ་གྱི་རྒྱུ་རུ་འགྲོ་བའི་ལས་ཅི་ཡང་མི་བསྒྲུབ་པ་ནི་གལ་ཆེན་ནང་གི་དོན་ཆེན་ཞིག་ཡིན། 

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

རྒྱ་ནག་གི་མགོ་ཁྲིད་མའོ་ཙེ་ཏུང་གིས་མེ་མདའི་ཁ་ལས་སྲིད་དབང་ཐོན་ཞེས་བརྗོད་ཡོད་པ་ལྟར། དྲག་སྤྱོད་ཀྱིས་འཕྲལ་གྱི་དམིགས་འདུན་ངེས་ཅན་ཞིག་སྒྲུབ་ཐུབ་ནའང༌། ཡུན་དུ་བརྟན་པའི་འབྲས་བུ་ཞིག་སྐྲུན་མི་ཐུབ་པ་གསལ་པོ་ཡིན། འགྲོ་བ་མིའི་ལོ་རྒྱུས་ལ་བལྟས་ཚེ། ཞི་བདེ་དང༌། དྲང་བདེན། རང་དབང་སོགས་ལ་ཕྱོགས་པའི་དུང་སེམས་ནི། བཙན་གནོན་དང་གདུག་རྩུབ་ལས་མཐའ་མར་རྟག་ཏུ་རྒྱལ་ཡོད་པ་མཐོང་ཐུབ། རྒྱུ་མཚན་དེའི་ཕྱིར་ངོས་ནི་འཚེ་མེད་ཞི་བ་ལ་ཡིད་ཆེས་བརྟན་པོ་བྱེད་མཁན་ཞིག་ཡིན་ཞིང༌། དྲག་སྤྱོད་ཀྱིས་དྲག་སྤྱོད་སྐྱེད་པ་དང༌། དྲག་སྤྱོད་ནི་སྡུག་བསྔལ་ཁོ་ནའི་འབྱུང་ཁུངས་ཡིན། བརྟག་པ་མཐར་བཟུང་གིས་བརྗོད་ན། གཞི་རྒྱ་ཆེ་བའི་འཁྲུག་རྩོད་ཅིག་འགོག་པར་ཐོག་མའི་སྐབས་སུ་དམག་དཔུང་དང་གོ་མཚོན་ཁོ་ནར་བརྟེན་ནས་བར་འདུམ་བྱེད་དགོས་པའི་གནས་སྟངས་ཤིག་ཡོད་སྲིད་ཀྱང༌། བསམ་གཞིག་བྱེད་སྟངས་འདི་ལ་དཀའ་རྙོག་ཅིག་ཡོད་དེ། ང་ཚོས་དྲག་སྤྱོད་ཀྱི་མཇུག་འབྲས་ལ་སྔོན་དཔག་བྱེད་ཐུབ་སྲིད་ཀྱང༌། དེ་ལྟར་བྱེད་པར་ཧ་ཅང་ཁག་པོ་ཡིན་པར་མ་ཟད། ཐོག་མའི་སྐབས་སུ་སྔོན་དཔག་དེ་བདེན་པ་ཞིག་ཏུ་འགྱུར་མིན་ཡང་གསལ་པོར་རྟོགས་མི་ཐུབ། ངེས་ཤེས་དེ་ནི་ང་ཚོས་ཕྱི་མིག་གིས་ལྟ་སྐབས་འབྱུང་བ་དང༌། ང་ཚོས་ཁག་ཐག་བྱེད་ཐུབ་པ་ཁོ་ན་ནི། དྲག་སྤྱོད་ཡོད་སར་བཟློག་ཏུ་མེད་པའི་སྡུག་བསྔལ་རྟག་ཏུ་འབྱུང་བ་འདི་ཡིན།

    མི་ཁག་ཅིག་གིས་ཏཱ་ལའི་བླ་མས་འཚེ་མེད་ཞི་བར་བཟུང་བའི་ཡིད་ཆེས་ནི་བསྔགས་པའི་ཡུལ་ཞིག་ཡིན་ཡང༌། དེ་ནི་དོན་དངོས་སུ་ཁ་ཡོད་ལག་ཡོད་ཀྱི་རང་བཞིན་ཞིག་མ་རེད་ཅེས་བརྗོད་སྲིད། འོན་ཀྱང༌། དོན་དངོས་སུ་བརྗོད་ན། འཁྲུག་རྩོད་ཀྱིས་ནམ་ཡང་དྲག་སྤྱོད་ལ་འབྱུང་རྐྱེན་བྱེད་པའི་འགྲོ་བ་མིའི་དཀའ་རྙོག་རྣམས་སེལ་ཐུབ་པར་བསམས་ན་བྱབ་ཆུང་ཡིན། 

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

ང་ཚོས་དྲག་སྤྱོད་མ་ཡིན་པའི་ཐབས་ལམ་གཞན་ཞིག་གི་སྒོ་ནས་འགལ་བ་རྣམས་སེལ་དགོས་པ་ཁ་ཚ་དགོས་གཏུགས་ཡིན། དེའི་ཕྱིར་བགྲོ་གླེང་ནི་བར་འདུམ་དང་འགྲིག་མཐུན་གྱི་བླ་སྲོག་ལ་དགོས་ངེས་ཡིན་ཞིང༌། འདི་ནི་ངོས་རང་གཅིག་པུས་བཟུང་བའི་སྟོང་བསམ་གྱི་རེ་བ་ཞིག་མིན། ཡོ་རོབ་མནའ་འབྲེལ་མཐུན་ཚོགས་ལྟར་རྒྱལ་སྤྱིའི་སྲིད་དོན་གྱི་ཚོགས་ཁག་ཅན་དུ་འགྱུར་བའི་འཕེལ་ཕྱོགས་ཡོངས་ཁྱབ་ཅིག་ཡོད་པས། རྒྱལ་ཁབ་སོ་སོའི་དམག་དཔུང་གི་སྒྲིག་འཛུགས་ནི་དཔལ་འབྱོར་ལ་མི་ཕན་པ་མ་ཟད། དགོས་ངེས་ཤིག་ཀྱང་མིན་པའི་དུས་ཤིག་ང་ཚོའི་བསམ་བློའི་ནང་དུ་འཁོར་ཐུབ་ཀྱི་ཡོད། སོ་སོའི་ས་མཚམས་གཅིག་པུར་སྲུང་སྐྱོབ་བྱེད་པར་བསམ་པ་ལས་ས་ཁོངས་གཅིག་གི་བདེ་འཇགས་ལ་བསམ་བློ་གཏོང་བ་ནི་རྒྱུ་མཚན་དང་ལྡན་པར་མཐོང་རྒྱུ་རེད།

 སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

ད་དུང་འཛམ་གླིང་གི་དཔལ་འབྱོར་ཅི་ཙམ་འཕེལ་རྒྱས་བྱུང་ན། དེ་ཙམ་གྱིས་རྒྱལ་སྤྱིའི་དཔལ་འབྱོར་ལམ་ལུགས་ནི་མངོན་གསལ་དོད་པོས་གཅིག་ལ་གཅིག་རྟེན་དུ་འགྱུར་བའི་བདེན་པ་འདི་ཡང་ངོས་ཀྱིས་རེ་བའི་ཡུལ་ཞིག་ཏུ་བཟུང་ཡོད། འཕེལ་རྒྱས་དེའི་རྐྱེན་གྱིས་རྒྱལ་ཁབ་ཚང་མ་ཕན་ཚུན་ལ་བརྟེན་དགོས་པ་དང༌། དེང་དུས་ཀྱི་དཔལ་འབྱོར་ལའང་རང་བྱུང་གི་ཁོར་ཡུག་དང་འདྲ་བར་ས་མཚམས་མེད་པར་གྱུར་ཡོད། ཐ་ན་ཕན་ཚུན་ལ་འཁོན་སེམས་མངོན་གསལ་དུ་བཟུང་ཡོད་པའི་རྒྱལ་ཁབ་ཚོས་ཀྱང་འཛམ་གླིང་གི་ཐོན་ཁུངས་རྣམས་བེད་སྤྱོད་བྱེད་པར་མཉམ་འབྲེལ་བྱེད་དགོས་ཤིང༌། དཔེར་ན། མཚམས་རེར་རྒྱལ་ཁབ་དེའི་རིགས་ཀྱིས་ཆུ་བོ་གཅིག་ལ་བརྟེན་དགོས་པའང་ཡོད། དཔལ་འབྱོར་གྱི་རྟེན་འབྲེལ་དེ་ཅི་ཙམ་ཇེ་ཟབ་ཏུ་སོང་ན། སྲིད་དོན་གྱི་རྟེན་འབྲེལ་དེའང་ཇེ་ཟབ་ཏུ་འགྲོ་ངེས་ཡིན།  

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

སོ་སོའི་ཉིན་རེའི་འཚོ་བའི་ནང་དུ་རང་གི་བྱ་སྤྱོད་ལ་སྙིང་རྗེ་ཡོད་པར་བརྩོན་པ་དང༌། གཞན་སེམས་ཀྱི་སྒོ་ནས་སོ་སོས་གང་བྱེད་ཐུབ་པ་དེ་གཞན་གྱི་ཆེད་དུ་སྒྲུབ་པ་ལྟ་བུ་ཡིན། ཆུ་འཛག་བཞིན་པའི་སྦུག་མཆུ་ཞིག་མཐོང་ན་འགྲོ་མཚམས་བཞག་ནས་དེའི་ཁ་རྒྱག་པ་དང༌། གློག་སྒྲོན་ཞིག་དགོས་མེད་དུ་སྦར་ཡོད་པ་མཐོང་ན་གསོད་པ། ཆོས་ལུགས་ལ་དད་པ་ཡོད་མཁན་ཞིག་ཡིན་ན། སང་ཉིན་ཆོས་ལུགས་གཞན་ཞིག་གི་རྗེས་འབྲང་བ་ཞིག་ལ་ཐུག་ན། ཁོ་ལའང་རང་གིས་འདོད་པའི་བརྩི་བཀུར་གཅིག་མཚུངས་ཤིག་སྟོན་པ། ཚན་རིག་པ་ཞིག་ཡིན་ན། རང་གིས་སྒྲུབ་བཞིན་པའི་ཞིབ་འཇུག་གིས་གཞན་ལ་གནོད་སྲིད་པར་མཐོང་ཚེ། གཞན་སེམས་ཀྱི་ངང་ནས་ཞིབ་འཇུག་དེ་རྒྱུན་འཁྱོངས་མི་བྱེད་པ། མདོར་ན་སོ་སོ་རང་ཉིད་ཀྱི་ནུས་པ་དང༌། གནས་སྟངས་ཀྱི་ཚད་བཀག་དང་བསྟུན་ནས་རང་གིས་གང་ཐུབ་པ་དེ་བསྒྲུབ་པ་འདི་ཡིན་ཞིང༌། འདི་ལས་ལྷག་པའི་ཆོད་སེམས་ཤིག་དགོས་ཚུལ་ངོས་ཀྱིས་གླེང་གི་མེད།

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

ཁྱིམ་ཚང་གི་ཁོར་ཡུག་ནི། ཕྲུ་གུ་ཞིག་གི་འཚར་ལོངས་ཀྱི་གྲུབ་ཆ་གཙོ་བོ་ཞིག་རེད། ཁྱིམ་ཚང་གི་ཁོར་ཡུག་ཏུ་བྱམས་པ་དང་སྙིང་རྗེ་མེད་པ་དང༌། ཡང་ན་ཕ་མས་ཕྲུ་གུ་སྣང་མེད་བྱེད་སྐབས། མཇུག་འབྲས་ངན་པ་འབྱུང་བ་ནི་ལས་སླ་བོར་ངོས་འཛིན་བྱེད་ཐུབ། ཁོར་ཡུག་འདི་འདྲའི་ནང་དུ་འཚར་ལོངས་བྱས་པའི་ཕྲུ་གུ་ལ་བདེ་འཇགས་མེད་ཅིང་རེ་བ་ཟད་པའི་ཚོར་བ་ཆེ་ཞིང༌། ཁོ་ཚོའི་བློ་ནི་ཞི་དུལ་དུ་གནས་ཐུབ་ཀྱི་མེད། དེ་ལས་ལྡོག་སྟེ། ཕྲུ་གུ་ལ་རྒྱུན་ལྡན་གྱི་ལྟ་རྟོག་དང་བྱམས་སྐྱོང་ཐོབ་ན། ཁོ་ཚོར་བདེ་བ་ཆེ་བར་མ་ཟད། སོ་སོའི་ནུས་པ་ལ་གདེང་ཚོད་ཆེན་པོ་ཡང་སྟོན་ཐུབ་ཀྱི་ཡོད། ད་དུང་ཁོ་ཚོའི་ལུས་པོའི་འཕྲོད་བསྟེན་ཡང་ལེགས་པ་དང༌། ཁོ་ཚོས་རང་ཉིད་གཅིག་པུར་སེམས་ཁྲལ་མི་བྱེད་པར་གཞན་དག་གི་ཕྱོགས་སུའང་སེམས་ཁུར་བྱེད་ཐུབ་ཀྱི་ཡོད། ཁྱིམ་ཚང་གི་ཁོར་ཡུག་གལ་ཆེན་ཡིན་པའི་རྒྱུ་མཚན་གཞན་ཞིག་ནི། ཕྲུ་གུ་ཚོས་ཕ་མ་ལ་བལྟས་ནས་སྤྱོད་པ་ངན་པར་གོམས་འདྲིས་བྱེད་པས་ཡིན། དཔེར་ན། གལ་སྲིད་ཕ་ཡིས་རང་གི་ཉེ་འཁོར་དུ་ཡོད་པ་རྣམས་ལ་རྒྱུན་དུ་འཁྲུག་པ་རྒྱག་གི་ཡོད་པ་དང༌། ཡང་ན་ཕ་མ་གཉིས་ཀས་རྟག་ཏུ་ཁ་རྩོད་རྒྱག་གི་ཡོད་ན། ཐོག་མར་ཕྲུ་གུས་སྤྱོད་པ་འདིའི་རིགས་མི་འདོད་ཀྱང༌། ཕ་མའི་སྤྱོད་ངན་དེ་ནི་རིམ་གྱིས་རྒྱུན་ལྡན་ཞིག་ཏུ་མཐོང་གི་རེད། དེ་ནས་ཕྲུ་གུས་བག་ཆགས་འདི་ནི་རང་གི་ཁྱིམ་ནས་ཕྱིའི་སྤྱི་ཚོགས་ནང་ལ་ཁྱེར་རྒྱུ་རེད། 

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

སྤྱི་སེམས་ཞེས་པ་འདི་ནི། སྤྱི་ཚོགས་ཀྱི་དངོས་ཡོད་དང་གཏན་ནས་མི་མཐུན་པར་མཐོང་སྲིད་ཀྱང༌། འདི་ནི་ངོས་རང་ནུབ་ཕྱོགས་སུ་ཕྱི་ལོ་ ༡༩༧༣ ལོར་ཐོག་མར་སོང་བ་ནས་བཟུང་མང་ཚོགས་ལ་བརྗོད་པའི་བདག་གི་བསམ་བློ་ཞིག་ཡིན་ཞིང༌། སྐབས་དེ་དུས་མི་མང་པོས་སྤྱི་སེམས་འདི་ལྟ་བུ་ལ་དོགས་ཟོན་བྱས་པ་དང༌། དེ་མཚུངས་འཛམ་གླིང་གི་ཞི་བདེ་ལ་དང་བ་བྱེད་མཁན་ཡང་དཀོན་པོ་རེད། ཡིན་ནའང༌། ད་ལྟ་བསམ་བློ་འདི་དག་ལ་ཡ་ལན་ལེགས་པར་སྤྲོད་མཁན་ཇེ་མང་དུ་འགྲོ་བཞིན་པ་དང༌། འདི་ནི་ངོས་རང་ལ་མཚོན་ན་གདེང་སྤོབས་འབྱུང་སའི་གཞི་ཞིག་ཡིན།

དོན་དངོས་སུ་བརྗོད་ན། དུས་རབས་ཉི་ཤུ་པའི་ནང་དུ་མིའི་རིགས་ཀྱིས་རང་གི་བསམ་ཡུལ་ལས་འདས་པའི་བྱུང་བ་མང་པོ་མྱངས་པའི་རྒྱུ་མཚན་གྱིས་ང་ཚོ་ནི་ཅུང་ཙམ་བསམ་ཤེས་ཅན་དུ་གྱུར་ཡོད་པར་སྙམ། ལོ་རབས་ལྔ་བཅུ་དང་དྲུག་ཅུའི་ནང་དང༌། ས་ཆ་ཁག་ཅིག་ཏུ་ཉེ་བའི་ཆ་ལའང་རྩོད་རྙོག་ནི་མཐར་གཏུགས་ན་དམག་འཐབ་ཀྱི་ལམ་ནས་བསལ་དགོས་པར་བསམ་ཡོད་ནའང༌། ད་ལྟ་ལྟ་ཚུལ་འདི་འཛིན་མཁན་ནི་མི་ཉུང་ཤོས་ཤིག་ལས་མེད། དུས་རབས་ཉི་ཤུ་པའི་མགོ་སྟོད་དུ་མི་མང་པོར་སྤྱི་ཚོགས་ཤིག་གི་འཕེལ་རྒྱས་དང་མདུན་སྐྱོད་ནི། སྒྲིག་ཁྲིམས་བཀོད་འདོམས་བཙན་པོའི་འོག་ཏུ་འཚོལ་སྒྲུབ་བྱེད་དགོས་པའི་ཡིད་ཆེས་ཡོད་ཀྱང༌། སྲིད་དབང་གཅིག་སྡུད་རིང་ལུགས་ཀྱི་ཕམ་ཉེས་དང༌། དེའི་རྗེས་ལྕགས་ཀྱི་ཡོལ་བ་ཞེས་པ་སྟེ། ཡོ་རོབ་ཀྱི་ནུབ་ཕྱོགས་དང་དམར་པོའི་རིང་ལུགས་ཀྱི་རྒྱལ་ཁབ་ཁག་གི་ས་མཚམས་དམ་པོ་དེ་མེད་པར་གྱུར་པ་སོགས་ལ་བརྟེན་ནས་ཡིད་ཆེས་དེའང་སྟོང་ཟད་དུ་སོང་ཡོད། དབང་ཤུགས་དྲག་པོས་བཙན་བཀོད་བྱས་པའི་སྤྱི་ཚོགས་དང་རྒྱལ་ཁབ་ཀྱི་སྒྲིག་འཛུགས་ནི། ཡུན་རིང་པོར་མི་བརྟན་པ་འགྲོ་བ་མིའི་རིགས་ཀྱི་ལོ་རྒྱུས་སུ་གསལ་པོ་ཆགས་ཡོད།

ད་དུང་ཚན་རིག་དང་ཆོས་གཉིས་ནི་མཐུན་ཐབས་མེད་པའི་ལྟ་ཚུལ་དེའང་སྔར་བཞིན་མཁྲེགས་པོར་གནས་མེད་པ་དང༌། ལྟ་ཚུལ་འདི་ནི་ནང་པ་མང་པོས་ཀྱང་གཅིག་མཚུངས་སུ་བཟུང་ཡོད། ད་ལྟ་དངོས་ཡོད་གནས་ལུགས་དང་འབྲེལ་བའི་ཚན་རིག་གི་ཤེས་རྟོགས་ཇེ་ཟབ་ཏུ་སོང་བ་དང་ཆབས་ཅིག ཚན་རིག་དང་ཆོས་གཉིས་མཐུན་ཐབས་མེད་པའི་ལྟ་ཚུལ་དེ་ལའང་འགྱུར་བ་འགྲོ་བཞིན་ཡོད། 

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

མི་ཕལ་ཆེ་བས་སོ་སོའི་རིགས་ཀྱི་ནང་ཁོངས་སུ་གཅིག་སྒྲིལ་དང༌། ཕན་ཚུན་གྱི་བདེ་སྡུག་ལ་ཐུགས་ཁུར་དགོས་པར་ཁས་ལེན་བྱེད་འདོད་ཡོད་རུང༌། འགྲོ་བ་མིའི་རིགས་གཞན་དག་སྣང་མེད་དུ་བསྐྱུར་བའི་རང་གཤིས་ཤིག་ཡོད་པར་སྣང༌། འདི་ལྟར་བྱེད་པའི་རྐྱེན་གྱིས་ང་ཚོས་རྒྱལ་སྤྱིའི་དངོས་ཡོད་གནས་ལུགས་ཀྱི་ངོ་བོ་ཙམ་དུ་མ་ཟད། སོ་སོའི་གནས་སྟངས་ཀྱི་དངོས་ཡོད་གནས་ལུགས་ཀྱང་སྣང་མེད་དུ་གཏོང་གི་ཡོད། གལ་སྲིད་ཚོགས་པ་གཅིག་དང༌། མི་རིགས་གཅིག ཡང་ན་རྒྱལ་ཁབ་གཅིག་ལ་མཚོན་ན། སོ་སོའི་ས་མཚམས་ཀྱི་ནང་ཁོངས་སུ་གཞན་ལ་བརྟེན་མ་དགོས་པར་མཐུན་རྐྱེན་ཡོད་ཚད་ཚང་ཞིང༌། མང་ཚོགས་ཀྱི་ཡིད་ཚིམ་པ་དང་རེ་འདོད་ཐམས་ཅད་འགྲུབ་ཀྱི་ཡོད་ན། ཕྱིའི་ཕྱོགས་ཀྱི་མི་རྣམས་ལོགས་སུ་འབྱེད་པ་ནི་རྒྱུ་མཚན་དང་མཐུན་པ་ཞིག་ཡིན་པར་ཕལ་ཆེར་རྩོད་སྒྲུབ་བྱེད་ཆོག་ཀྱང༌། དེ་ལྟར་ཡོང་ཐབས་མེད་པ་དང༌། དེང་དུས་ཀྱི་འཛམ་གླིང་ནི་ཚོགས་སྡེ་བྱེ་བྲག་པ་ཞིག་གི་ཁེ་ཕན་དེ་སོ་སོའི་མངའ་ཁོངས་ལས་བརྒལ་མེད་པར་སེམས་མི་ཐུབ་པའི་དུས་སྐབས་ཤིག་ལ་སླེབས་ཡོད། 

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

དེ་ལྟ་བས་ན་ང་ཚོས་སྤྱི་སེམས་གོང་འཕེལ་གཏོང་དགོས་པར་མ་ཟད། རང་ཉིད་ནི་ད་དུང་འགན་ཁུར་པའི་མི་ཞིག་ཀྱང་བྱེད་དགོས། ང་ཚོས་རང་གི་ལྟ་བ་རྣམས་ལག་ལེན་དུ་མ་བཏབ་ན། དེ་རྣམས་ནི་བསམ་བློ་ཙམ་གྱི་ངོས་ནས་ལྷག་ཡོད། དེ་བས་ན་ཆབ་སྲིད་པ་ཞིག་ལ་མཚོན་ན། རང་ཚུགས་དང་དྲང་བདེན་ཡོད་པའི་སྒོ་ནས་རང་གི་ལས་དོན་ལ་བརྩོན་པ་ནི་འོས་འགན་ཞིག་ཡིན་ཞིང༌། ཚོང་ལས་གཉེར་མཁན་ཞིག་ལ་མཚོན་ན། ལས་གཞི་གང་གི་ནང་དུའང་གཞན་གྱི་དགོས་མཁོ་ལ་བསམ་བློ་གཏོང་དགོས་པ་འོས་འགན་ཞིག་ཡིན། ཁྲིམས་རྩོད་པ་ཞིག་ལ་མཚོན་ན། དྲང་བདེན་གྱི་ཆེད་དུ་སོ་སོའི་ནུས་པ་ཡོད་ཚད་བཀོལ་བ་ནི་འོས་འགན་ཞིག་ཡིན།
 
སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།
 

འཛམ་གླིང་གི་ཆོས་ལུགས་ཆེན་པོ་རྣམས་ཀྱིས་བསྟན་པའི་རྩ་བའི་བླང་དོར་གྱི་གདམས་ངག་དེ་དག་ལས་ལྷག་ཅིག་ང་ཚོས་རྙེད་དཀའ་རྒྱུ་རེད། ཡིན་ལུགས་ངོ་ཐོག་གི་ལྟ་ཚུལ་མི་མཐུན་པ་ཡོད་ཀྱང༌། སྲོལ་རྒྱུན་དེ་རྣམས་ཀྱི་བར་ལ་མོས་མཐུན་མངོན་གསལ་ཞིག་ཡོད་པར་སྣང་སྟེ། སྲོག་གཅོད་པ་དང༌། མ་བྱིན་པར་ལེན་པ། རྫུན་སྨྲ་བ། མི་ཚངས་པར་སྤྱོད་པ་ལ་སོགས་པ་ནི་མི་དགེ་བ་ཡིན་པ་ཚང་མས་མོས་མཐུན་གནང་ཞིང༌། ད་དུང་ཀུན་སློང་གི་ཆ་ནས་བརྗོད་ན། སྲོལ་རྒྱུན་ཚང་མས་ཞེ་སྡང་དང༌། ང་རྒྱལ། ཞེན་ཆགས། ཕྲག་དོག རྔམ་སེམས། ཆགས་སྲེད། མི་རིགས་དབྱེ་འབྱེད་རིང་ལུགས་ལྟ་བུའི་འཚེ་བའི་ལྟ་བ་སོགས་སྤང་དགོས་པའི་མོས་མཐུན་ཡང་གནང་གི་ཡོད།

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

སྟབས་བདེ་ཞིང་ནུས་པ་ཆེ་བའི་སྦྲུམ་འགོག་ཡོད་པའི་ད་ལྟའི་དུས་འདིར་ཡང་ལོག་གཡེམ་སྡོམ་པའི་བསླབ་བྱ་འདི་ད་དུང་དགོས་ངེས་ཡིན་ནམ་སྙམ་མཁན་ཡོད་སྲིད། འགྲོ་བ་མི་ཡིན་པའི་ཆ་ནས་ང་ཚོའི་ཡིད་ནི་རང་བཞིན་གྱིས་སྒྲ་དང་གཟུགས་སོགས་ཀྱི་ཡུལ་ལ་འཆོར་བ་དང༌། ཡུལ་དེ་དག་རེ་རེ་ལའང་ང་ཚོར་དཀའ་སྡུག་མྱོང་བར་བྱེད་པའི་ནུས་པ་ཡོད་ལ། ལྷག་ཏུ་འཁྲིག་སྦྱོར་གྱི་འགུགས་ཤུགས་ནང་དབང་པོ་ལྔ་པོ་འདུས་ཡོད་པས། འདོད་སེམས་ཤུགས་ཆེན་པོ་ཞིག་འཁྲིག་སྦྱོར་གྱི་འགུག་ཤུགས་དང་ལྷན་དུ་འབྱུང་སྐབས། ང་ཚོར་རྙོག་དྲ་ཆེན་པོ་འབྱུང་བར་བྱེད་པའི་རྒྱུ་རྐྱེན་ཚང་གི་ཡོད། བདེན་པ་འདི་ནི་ཆོས་ལུགས་ཆེན་པོ་ཁག་གིས་སྤེལ་བའི་ཚངས་སྤྱོད་སྲུང་བའི་བསླབ་བྱའི་ནང་དུ་ངོས་འཛིན་གནང་ཡོད་པར་སྙམ་ཞིང༌། མ་མཐའ་ཡང་ནང་པའི་སྲོལ་རྒྱུན་དུ་བསླབ་ཁྲིམས་དེ་ཚོས་ཆགས་སྲེད་ཀྱིས་རང་སེམས་ཡོངས་སུ་ཟིལ་གྱིས་གནོན་པའི་དྲན་སྐུལ་གཏོང་བ་དང༌། དེ་འདྲའི་ཆགས་སྲེད་ཆེ་རུ་སོང་ན་མཐར་དགེ་བའི་བྱ་བ་སྒྲུབ་པའི་ནུས་པའང་ཆུང་དུ་འགྲོ་ངེས་ཡིན། འབྲེལ་ཡོད་ཀྱི་དཔེ་མཚོན་ཞིག་སྟེ། རང་གི་བཟའ་ཟླ་ལས་གཞན་པའི་མི་ཞིག་ལ་ལུས་འབྲེལ་བྱེད་པའི་གནས་སྟངས་ལ་མཚོན་ན། སོ་སོའི་བྱ་སྤྱོད་ཀྱིས་རང་ཉིད་གཅིག་པུ་མ་ཡིན་པར་གཞན་ལའང་ཤུགས་རྐྱེན་ཐེབས་ཀྱི་ཡོད་སྟབས། གང་ཟག་གསུམ་པའི་ཚོར་བ་ལ་བསམ་བློ་གཏོང་དགོས་པ་དང༌། སྤྱིར་བཟའ་ཚང་གི་འབྲེལ་བ་ལ་ཡིད་ཆེས་བློ་གཏད་ཡོད་དགོས་པའི་རྒྱུ་མཚན་གྱིས་མི་གཞན་ཞིག་ལ་ལུས་འབྲེལ་བྱེད་པའི་བྱ་སྤྱོད་དེ་ནི། སོ་སོའི་བཟའ་ཟླར་འཚེ་བ་ཅན་དུ་འགྱུར་བར་མ་ཟད། དེའི་རྐྱེན་གྱིས་བཟའ་ཚང་བར་ལ་འགལ་བ་བྱུང་བས་ཕྲུ་གུ་ཚོར་ཡང་བག་ཆགས་ངན་པ་འཇོག་གི་ཡོད། བཟའ་ཟླའི་འབྲེལ་བ་ལེགས་པོ་མེད་པ་དང༌། ཡང་ན་བཟའ་ཚང་འཐོར་བ་གཉིས་ཀའི་ཕམ་ཉེས་ཁུར་མཁན་གཙོ་བོ་ནི། ཁྱིམ་ཚང་དེའི་ཕྲུ་གུ་ཚོ་ཡིན་པ་ད་ལྟ་ཡོངས་ཁྱབ་ཏུ་ངོས་འཛིན་བྱེད་ཀྱི་ཡོད། ལོག་གཡེམ་བྱེད་མཁན་རང་ལ་མཚོན་ནའང༌། མི་དགེ་བའི་སྤྱོད་པ་དེ་ལས་སོ་སོའི་རང་མཐོང་རིམ་གྱིས་ཉམས་པར་བྱེད་པའི་ཤུགས་རྐྱེན་འབྱུང་བ་དང༌། ད་དུང་བཟའ་ཟླར་དྲང་པོ་མ་བྱས་པར་བརྟེན་ནས་མི་དགེ་བ་ཚབས་ཆེན་ཡིན་པའི་བྱ་སྤྱོད་སྣ་ཚོགས་འབྱུང་སྲིད་ཅིང༌། དེ་ཚོའི་ནང་ནས་རྫུན་བཤད་པ་དང་མགོ་སྐོར་གཏོང་བ་ནི་ཡང་ཤོས་ཀྱི་རིགས་ཡིན། མི་འདོད་བཞིན་དུ་མངལ་ཆགས་པ་ཡིན་ན། བྱ་ཐབས་བྲལ་བའི་ཕ་མ་ཚོས་མངལ་འབྱིན་གྱི་ལས་ལ་བརྩོན་རྒྱུ་རེད།

ང་ཚོས་འདི་ལྟར་བསམ་གཞིག་བྱེད་སྐབས། ལོག་གཡེམ་ལས་བྱུང་བའི་གནས་སྐབས་ཀྱི་བདེ་བ་ནི། བྱ་སྤྱོད་དེའི་རིགས་ཀྱིས་རང་གཞན་གཉིས་ཀར་ཤུགས་རྐྱེན་ངན་པ་ཐེབས་པའི་མཇུག་འབྲས་དང་བསྡུར་ན་རིན་ཐང་ཅི་ཡང་མེད་པ་མངོན་གསལ་ཡིན། དེར་བརྟེན་ལོག་གཡེམ་སྡོམ་པའི་བསླབ་ཁྲིམས་ཀྱིས་རང་ཉིད་ཀྱི་རང་དབང་ལ་ཚད་བཀག་བྱེད་པར་མཐོང་བ་ལས། བསླབ་ཁྲིམས་དེ་ནི་སྤྱོད་པ་འདིའི་རིགས་ཀྱིས་རང་གཞན་གཉིས་ཀའི་བདེ་བ་ལ་ཐད་ཀར་ཤུགས་རྐྱེན་ཐེབས་པའི་རྒྱུན་འཇགས་གོ་ཤེས་ཀྱི་དྲན་སྐུལ་ཞིག་ཏུ་མཐོང་ན་ལེགས། 


སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།
 

ཉིན་རེའི་འཚོ་བའི་ནང་དུ་གྲོགས་པོ་དང་ངོ་ཤེས་ཀྱི་རེ་འདོད་བཞིན་ང་ཚོས་གང་ལ་གང་འཚམ་གྱིས་བསྟུན་ཞིང༌། དེ་ལྟར་བསྟུན་ཐུབ་པའི་ནུས་པ་ནི་ཡོན་ཏན་ཞིག་ཏུ་མཐོང་གི་ཡོད་རུང༌། སོ་སོའི་ཁེ་ཕན་སྲུང་ཞིང་གཞན་གྱི་བདེ་སྡུག་སྣང་མེད་དུ་བསྐྱུར་བ་སོགས་མི་དགེ་བའི་ལས་བྱེད་མཁན་ཚོ་དང་འགྲོགས་ན། ང་ཚོ་ནི་སེམས་ཀྱི་གཏད་སོ་བོར་བའི་ཉེན་ཁ་ལ་འཕྲད་རྒྱུ་རེད། གཏད་སོ་བརླགས་པའི་རྐྱེན་གྱིས་གཞན་ལ་གྲོགས་བྱེད་པའི་ང་ཚོའི་ནུས་པའང་ཉམ་དམས་སུ་འགྲོ་ངེས་རེད། ང་ཚོ་བོད་པ་ཚོར་གཏམ་དཔེ་འདི་ལྟ་བུ་ཞིག་ཡོད་དེ། ང་ཚོ་གསེར་གྱི་རི་བོའི་སྟེང་དུ་བསྡད་ན། ང་ཚོའི་སྟེང་དུ་གསེར་འགོས་པ་དང༌། ཐལ་བའི་ནང་དུ་བསྡད་ན་ང་ཚོར་ཐལ་བ་འགོས་རྒྱུ་རེད། མི་དེའི་རིགས་དང་ཐག་རིང་དུ་གནས་ན་བཟང་ཡང་འབྲེལ་བ་གཏན་དུ་གཅོད་མི་རུང༌། དོན་དངོས་སུ་བརྗོད་ན། ཁོ་ཚོས་བྱ་སྤྱོད་དེའི་རིགས་སྟོན་པར་བཀག་འགོག་བྱེད་པའི་གོ་སྐབས་འོས་འཚམ་ཡང་ང་ཚོར་མཚམས་རེར་ཡོད་པ་དང༌། དེ་ལྟར་བྱེད་སྐབས་རང་གི་ཀུན་སློང་གཙང་ཞིང་བྱེད་ཐབས་འཚེ་བ་མེད་པ་ཞིག་ཡིན་དགོས་ཤིང༌། འདིར་ཡང་སྙིང་རྗེ་དང་ཤེས་རབ་ནི་རྩ་འཛིན་གཙོ་བོ་ཞིག་ཡིན།
 
སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།

སྙིང་རྗེ་ནི་སོ་སོའི་ཆེད་ལས་ཀྱི་འཚོ་བ་ལ་འགོག་རྐྱེན་ཞིག་མ་ཡིན་རུང༌། འབྲེལ་མེད་ཅིག་ཡིན་པར་བསམ་པའི་ལྟ་ཚུལ་མི་མང་པོར་ཡོད་པར་སྣང་བ་དང༌། ངོས་རང་གི་ལྟ་ཚུལ་ལ། སྙིང་རྗེ་ནི་འབྲེལ་ཡོད་ཅིག་ཡིན་པར་མ་ཟད། བློའི་ཡོན་ཏན་འདི་དང་བྲལ་ན་ང་ཚོའི་བྱ་སྤྱོད་ནི་གཏོར་བརླག་གི་རང་བཞིན་དུ་འགྱུར་བའི་ཉེན་ཁའང་ཆེན་པོ་ཞིག་ཡོད། འདི་ལྟར་ཡིན་པའི་རྒྱུ་མཚན་ནི། གཞན་གྱི་བདེ་སྡུག་སྣང་མེད་དུ་བཏང་ན་མཐར་གཞན་ལ་འཚེ་བའི་མཇུག་འབྲས་འབྱུང་ངེས་ཤིང༌། ང་ཚོས་དགེ་བ་འཚོལ་སྒྲུབ་དང༌། མི་དགེ་བ་བཀག་སྡོམ་བྱེད་པ་གཉིས་ཀར་དགོས་ངེས་ཡིན་པའི་རྟེན་གཞི་དང་ཀུན་སློང་སྙིང་རྗེ་དོན་གཉེར་གྱི་བློ་ལ་བརྟེན་ནས་རྙེད་ཀྱི་ཡོད་པས་ཡིན། ང་ཚོས་ཁ་ཡོད་ལག་ཡོད་ཀྱི་ཐོག་ནས་སྙིང་རྗེའི་རིན་ཐང་ལ་ཡི་རང་དང་གདེང་འཇོག་བྱེད་པ་འགོ་འཛུགས་སྐབས། གཞན་ལ་བཟུང་བའི་རང་གི་ལྟ་སྟངས་རང་བཞིན་གྱིས་ཇེ་ལེགས་སུ་འགྲོ་ཞིང༌། འདི་གཅིག་པུས་ཀྱང་ང་ཚོའི་འཚོ་བའི་སྤྱོད་ལམ་ཐོག་ལ་ཤུགས་རྐྱེན་ཆེན་པོ་ཞིག་ཐེབས་ཐུབ་སྟེ། དཔེར་ན། མགོ་སྐོར་གཏོང་བའི་བསམ་བློ་ཞིག་འཁོར་བའི་ཚེ་ན་གཞན་ལ་བཟུང་བའི་ང་ཚོའི་སྙིང་རྗེས་རང་གི་བསམ་བློ་དེ་རྒྱུན་འཁྱོངས་བྱེད་པར་བཀག་འགོག་བྱེད་པ་དང༌། ད་དུང་སོ་སོའི་ལས་ཀའི་འབྲས་བུ་གཞན་ལ་གནོད་འཚེ་བསྐྱེད་པའི་ཕྱོགས་སུ་བཀོལ་བའི་ཉེན་ཁ་ཡོད་པར་མཐོང་ན། སྙིང་རྗེས་ང་ཚོར་ལས་ཀ་དེ་སྤོང་དུ་འཇུག་རྒྱུ་རེད། 

སྟོང་ལོ་གསར་བའི་ཀུན་སྤྱོད་ཅེས་པ་ལས་བཏུས། 

སྤྱི་སེམས་ཀྱི་གོ་དོན་ནི། ཉེས་སྐྱོན་ངོས་ལེན་གྱི་འདུ་ཤེས་ཤིག་ལས། སོ་སོའི་བློ་རང་གཅེས་འཛིན་གྱི་དབང་དུ་འགྲོ་རུ་མ་བཅུག་པར་གཞན་གྱི་བདེ་སྡུག་གི་ཕྱོགས་སུ་བསྐོར་རྒྱུ་འདི་ཡིན། སྡུག་བསྔལ་མི་འདོད་པ་དང་བདེ་བ་འདོད་པ་རང་ཉིད་དང་གཅིག་མཚུངས་ཡིན་ཞིང༌། རང་ཉིད་ཀྱི་བྱ་སྤྱོད་ཐམས་ཅད་ལ་ཀུན་ཁྱབ་ཀྱི་ཆ་ཞིག་ཡོད་པར་མཐོང་བ་སོགས་ལས་གྲུབ་པའི་སྤྱི་སེམས་ཤིག་གོང་འཕེལ་དུ་གཏོང་བ་ནི། གཞན་ལ་ཕན་འདོགས་པའི་གོ་སྐབས་ཤིག་མཐོང་ན། རང་གཅེས་འཛིན་གྱི་ཁེ་ཕན་ཆུང་ངུ་དོར་ནས་གཞན་དོན་དང་དུ་ལེན་པའི་འདུ་ཤེས་ཤིག་སྐྱེད་སྲིང་བྱེད་པའི་བསམ་བློའི་འཁྱེར་སོ་ཞིག་ཡིན། ང་ཚོས་རང་གི་ནུས་པའི་ཁྱབ་ཁོངས་ཀྱི་ཕ་རོལ་ཏུ་ཅི་ཞིག་འབྱུང་བཞིན་པར་སེམས་ཁུར་བྱེད་ཀྱི་ཡོད་ནའང༌། ང་ཚོས་དེ་ནི་རང་བྱུང་ཁམས་ཀྱི་ཆ་ཤས་ཤིག་ཏུ་བརྩིས་ནས་རང་ཉིད་ཀྱིས་གང་ནུས་པ་དེར་དམིགས་པ་གཏོད་ཀྱི་ཡོད།

སྤྱི་སེམས་འདི་ལྟ་བུ་ཞིག་བསྐྱེད་པའི་ཕན་ཡོན་གལ་ཆེ་ཤོས་ནི། རང་གི་ཉེ་འབྲེལ་གཅིག་པུ་མ་ཡིན་པར་སེམས་ཅན་གཞན་ཐམས་ཅད་ཀྱི་བདེ་སྡུག་ཀྱང་ང་ཚོས་ཚོར་ཐུབ་པ་དེ་ཡིན་ལ། སྡུག་བསྔལ་ཆེ་ཤོས་མྱོང་གི་ཡོད་པའི་འགྲོ་བ་མིའི་ཁྱིམ་གཞི་ཆེན་པོའི་ནང་མི་རྣམས་ལ་ལྷག་ཏུ་སེམས་ཁུར་བྱེད་དགོས་པ་མཐོང་བ་དང༌། འགྲོ་བ་མིའི་རིགས་ཀྱི་སྤུན་ཟླའི་བར་ལ་འགལ་རྐྱེན་སློང་བའི་རྒྱུ་རྐྱེན་བཟློག་དགོས་པ་ངོས་འཛིན་བྱེད་ཐུབ་ཅིང༌། ང་ཚོས་ད་དུང་ཆོག་ཤེས་ཀྱི་གལ་ཆེའི་རང་བཞིན་དེའང་རྟོགས་ཐུབ་ཀྱི་རེད།

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།
 

སེམས་ཀྱི་སྟོབས་ཤུགས་དང་ཤེས་རབ་གོང་འཕེལ་འགྲོ་བའི་དུས་ནི། རྒྱུན་དུ་དཀའ་སྡུག་ཆེ་ཤོས་ཀྱི་སྐབས་སུ་འབྱུང་གི་ཡོད་པ་རང་ཉིད་ལ་དྲན་གསོ་བྱས་ནའང་རིན་ཐང་ཆེ་ཞིང༌། འདིར་ཡང་ང་ཚོས་ལེགས་ཕྱོགས་ཀྱི་བསམ་བློའི་འཁྱེར་སོའམ་འདུ་ཤེས་འཛིན་སྟངས་ཤིག་གོང་དུ་སྤེལ་དགོས་པའི་གལ་ཆེའི་རང་བཞིན་དེ་མཐོང་ཐུབ་པ་དང༌། འཛིན་སྟངས་ཆ་འགྲིག་པོ་ཞིག་བྱུང་ན། ང་ཚོས་སྡུག་བསྔལ་གྱི་མྱོང་བར་བརྟེན་ནས་དངོས་ཡོད་གནས་ལུགས་ལ་སོ་སོའི་མིག་རྒྱ་སྐྱེད་ཐུབ་ཀྱི་རེད། དཔེར་ན། སྐྱབས་བཅོལ་བ་ཞིག་གི་ཚུལ་དུ་འཚོ་བའི་ངོས་རང་གི་ཉམས་མྱོང་ལ་བརྟེན་ནས་ངོས་ཀྱིས་སྔོན་བོད་དུ་རང་གི་འཚོ་བའི་ཆ་ཤས་གལ་ཆེན་ཞིག་ཡིན་པའི་ལམ་སྲོལ་སྣ་ཚོགས་དགོས་ངེས་མིན་པ་རྟོགས་བྱུང༌། 

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།