ལེགས་བཤད་གཅེས་བཏུས།

བོད་ཡུལ་དེ་ནང་པ་སངས་རྒྱས་པའི་ཆོས་ས་དར་རྡོ་དར་དུ་སོང་བའི་ཡུལ་ཡིན་པ་དང་། ཆོས་ཁས་བླངས། ཆོས་ལ་ཡིད་ཆེས་བྱེད་བཞིན་དུ་ཆོས་ཁྱད་དུ་གསོད་མཁན་མང་པོ་ཡོད་པས་ཆོས་ལ་བརྟེན་ནས་སྡིག་པ་མང་པོ་བསགས་ཡོད་པ་དེ་འདྲའི་ཐོག་ནས་ལས་ངན་གྱི་འབྲས་བུ་ཏན་ཏན་འོང་། ཡང་རྐྱེན་གཞན་ནི་ང་ཚོས་སྤྱི་བའི་ལས་དོན་རྣམས་ཚགས་ཚུད་པོ་མ་བྱུང་བ་དང་།  ལྷག་པར་སྐུ་མདུན་སྐུ་གོང་མའི་སྐུ་ཚེའི་སྨད་ཙམ་ནས་ཐོག་མའི་འཆར་གཞི་དང་དམིགས་ཡུལ་ཇི་བཞིན་འགྲོ་མ་ཐུབ་པར་འཐུས་ཤོར་ནས་རྐྱེན་ངན་བྱུང་བ་དང་།  དེའི་དབང་གིས་ད་ལྟ་ང་ཚོ་ཐབས་སྐྱོ་པོར་གྱུར་པ་དེ་གསལ་པོ་རེད། དེ་ལྟ་ནའང་ང་ཚོས་སྤྱི་པའི་དོན་དུ་རྒྱ་མིར་ཁོང་ཁྲོ་དང་མི་དགའ་བ་བྱས་ན་ཡག་པོ་མེད།  དངོས་གནས་ས་གནས་ས་ཐོག་གི་བོད་པར་སྡུག་སྦྱོང་གཏོང་མཁན་གྱི་རྒྱ་དཔོན་བྱེ་བྲག་པ་ཞིག་ལ་མཚོན་ནའང་སྙིང་ཁོང་རུས་པའི་གཏིང་ནས་དེར་ཕན་སེམས་བྱེད་པ་ལས་གནོད་པའི་བསམ་པ་གཞར་ཡང་མི་སྐྱེ་བ་བྱེད་རྒྱུ་གལ་ཆེ། ཡང་ཕན་སེམས་བྱེད་དགོས་ཞེས་པ་གང་ཟག་དེས་ང་ཚོར་མ་བབ་པ་དང་མ་འོས་པ་བྱས་པ་རྣམས་ལ་དག་པ་སྟེར་བ་ལྟ་བུ་གཏན་ནས་མ་རེད། བྱང་ཆུབ་སེམས་དཔའ་རྣམས་ཀྱིས་གཞན་དོན་སྒྲུབ་པར་ལས་རབ་འབྱམས་ཞེས་མང་པོ་ཡོད་པ་དེ་དག་ཡོང་མི་ཤེས། དེས་ན་བཟོད་པ་བསྒོམ་ཞེས་པ་གཙོ་བོ་རང་ཉིད་ཁོང་ཁྲོའི་གཞན་དབང་དུ་མི་གཏོང་བ་ལ་ཟེར་བ་ལས་སྡུག་སྒོམ་རྒྱག་པ་གཅིག་པུ་ལ་ཟེར་བ་མིན། དངོས་ཡོད་རྒྱུ་མཚན་གྱི་ཐོག་ནས་བདེན་པ་བདེན་སར་འཁྱོལ་བར་བྱས་པ་དེ་བཟོད་པ་མ་བསྒོམས་པ་གཏན་ནས་མིན། རང་ཉིད་ཀྱི་གཤིས་རྒྱུད་གནག་སེམས་དང་གནོད་སེམས་སོགས་ཁྲོ་བ་དང་ཞེ་སྡང་གི་གཞན་དབང་དུ་མི་གཏོང་བར་ལྷག་ཏུ་སྙིང་རྗེ་བསྒོམས་པ་དེ་ལ་བཟོད་པ་བསྒོམས་པ་ཟེར། ལག་ལེན་གྱི་ཐོག་ནས་ཕ་རོལ་པོས་མ་འོས་པ་དང་མ་འཚམ་པའི་བྱ་བ་ངན་པ་བྱས་པ་རྣམས་བྱུང་རྒྱལ་དུ་བཞག་ན། ད་དུང་ཕ་རོལ་པོས་སྡིག་པ་མུ་མཐུད་ནས་གསོག་པའི་རྐྱེན་དུ་འགྱུར་བས་རྒྱུ་མཚན་འདི་འདྲ་ལ་བརྟེན་ནས་ཕ་རོལ་པོར་བརྩེ་བའི་སྒོ་ནས་ཕ་རོལ་པོའི་བྱ་བ་ངན་པ་བཟློག་དགོས།


དེས་ན་ང་ཚོས་གཞུང་ནས་གསུངས་པའི་བསླབ་བྱ་རྣམས་དངོས་ཡོད་གནས་ཚུལ་དང་རན་པ་ཡིན། མི་ཕལ་པ་དང་ཆོས་ཁས་མི་ལེན་པ་རྣམས་ཀྱིས་བལྟས་ཀྱང་དེ་རླབས་ཆེན་པོར་མཐོང་བ་ཡིན།  དོན་མེད་པར་ཕ་རོལ་པོས་རང་ལ་གནོད་པ་བྱས་ཏེ་སྡུག་བསྔལ་གྱི་ནང་དུ་ཚུད་ནའང་རང་གི་སེམས་ཀྱི་ཞི་བདེ་མ་བརླགས་པའི་ཐོག་ནས་སྐབས་དང་འཚམས་པར་ཕ་རོལ་པོར་ལན་སློག་པ་དེ་རླབས་ཆེན་ཡིན། སྤྱིར་བཏང་གི་མི་ཞིག་ལ་མཚོན་ནའང་དེ་ལྟར་བྱེད་མཁན་གྱི་མི་དེ་གྲུང་བོ་རེད། སེམས་ལ་མི་དགའ་བ་དང་། ཁོང་ཁྲོ་སྐྱེས་ཏེ་གཉིད་མ་ཁུག་པ་དང་། ལྟོ་ཆས་ལ་བྲོ་བ་མེད་པ་སོགས་མེད་པར་རང་ཉིད་ཞི་དུལ་གྱི་ངང་དུ་བསྡད། ཟས་ཞིམ་པོ་ཟོས། གཉིད་སྐྱིད་པོ་ཁུག །ལག་ལེན་གྱི་ཐོག་ནས་ཕ་རོལ་པོར་ཁ་གཏད་ཤུགས་ཆེན་པོ་བཅགས་ན་དེ་རླབས་ཆེན་རེད་མི་འདུག་གམ། ཁ་གཏད་གཅོག་པ་སོགས་གང་ཡང་མེད་པར་ཁོང་ཁྲོ་ལངས་ཏེ་རོ་སྟོད་ན་ནས་བསྡད་ན་གླེན་པ་རེད། 

དེ་ལྟ་ན་ཐེག་པ་ཆེན་པོའི་གཞུང་ནས་གསུངས་པ་རྣམས་བྱབ་ཆུང་གི་བསམ་བློ་གཏན་ནས་མིན། ཡང་འགའ་ཞིག་གིས་བྱང་ཆུབ་སེམས་དཔའ་ཟེར་བ་བྱབ་ཆུང་བ་ཞིག་ཏུ་མཐོང་སྲིད་ཀྱང་ངས་ནི་དེ་དག་གྲུང་བོ་ཞིག་ཏུ་བརྩི་བཞིན་ཡོད། དུས་རྒྱུན་དུ་ལག་ལེན་ངོ་མའི་ཐོག་ནས་བསླབ་བྱ་གང་གནང་ཡོད་པ་ལྟར་བསྒྲུབ་དགོས། བསྟན་པའི་སྤྱི་དགྲ་དང་བླ་མའི་སྒོས་དགྲ་ལྟ་བུ་ལ་ཁྲོ་སེམས་བྱེད་མི་ཉན་པར་མ་ཟད་ལྷག་ཏུ་སྙིང་བརྩེ་དགོས་ན་མི་སྒེར་ལ་གནོད་པ་ཕྲན་བུ་བྱེད་མཁན་ལ་ལྟ་ཅི་སྨོས། ང་ཚོ་ཁ་ཤས་ཆེ་ས་སྤྱི་པའི་དོན་བརྗེད། ཆུང་ཙག་ཅིག་ལ་ཨམ་གཙིགས་བསྡམས་སྡོད་མཁན་དེ་འདྲ་འདུག་པ་རྣམས་ནི་དེ་ལས་ཀྱང་བྱབ་ཆུང་རེད།
(༡༩༩༧/༡༢ /༢༨ ནས་༡༩༩༨/༡ /༤ བར་སེར་བྱེས་འདུ་ཁང་གསར་བཞེངས་ཟིན་པའི་རྟེན་འབྲེལ་མཛད་སྒོར་སྟོང་ཐུན་གྱི་བཀའ་ཁྲིད་ལས་བཏུས།

འཇར་མིན་གྱི་སོའི་སྨན་པ་ཨ་ཅག་ལགས་དང་ཁྱོ་ག་ཅིག་འདུག ཁྱོ་ག་དེ་ངས་ངོ་ཤེས་ཀྱི་ཡོད། སོའི་སྨན་ཁང་ཞིག་འདིར་ཡོད་ཀྱང་བར་སྐབས་གཙང་མ་དེ་ཙམ་མི་འདུག་པས། སོའི་ལས་ཀ་བྱེད་མཁན་གྱིས་གཙང་སྦྲ་ཡག་པོ་མ་བྱས་ན་ཉེན་ཁ་ཡོད་ཅེས་བཤད་སོང་། ངོས་ཀྱིས་རྒྱུན་དུ་འཆད་བཞིན་པ་ལྟར་དགེ་འདུན་པ་རྣམ་པས་ཞག་རྩི་ཅན་གྱི་ཟས་བསྟེན་པ་ཅུང་མང་དྲགས་ཀྱི་འདུག་ཅེས་བཤད་བྱུང་། ངས་རྩེད་མོ་དང་བཅས་བོད་ཇ་སླ་པོ་བཟོས་ན་ཡག་པོ་ཡོད་ཅེས་སྔོན་ནས་མང་པོ་བཤད་མྱོང་མོད་བོད་ཇ་ཞག་མང་པོ་ཡོད་པ་དེ་ཕལ་ཆེར་སངས་རྒྱས་ཀྱི་བསྟན་པའི་ཆ་ཤས་ཤིག་ལ་བརྩིས་ནས་བསྟན་པ་གང་དུ་འཛིན་སྐྱོང་སྤེལ་གསུམ་བྱེད་ས་དེར་ངེས་པར་དུ་ཇ་གར་པོ་ཡོད་དགོས་པ་ལྟ་བུ་བརྩི་ཡི་འདུག །བོད་ཇ་བཞེས་མྱོང་མེད་པའི་སྟོན་པ་བཅོམ་ལྡན་འདས་ཀྱི་ཆོས་ཚུལ་འཛིན་མཁན་ཚང་མས་བཞེས་དགོས་པ་འདྲ་པོ་འདུག། །སྔོན་ངས་གྲྭ་ཚང་ལ་ཞག་རྩི་ཡོད་པ་དེ་ཧ་ཅང་འཐུང་དྲགས་ན་ཁྲག་དང་མཁྲིས་པ་ལ་གནོད་པས་ཡག་པོ་མེད། དེ་ལས་ཆུ་ཁོལ་འཐུང་ན་ཡག་པོ་ཡོད་ཅེས་བཤད་ཀྱང་། རྗེས་སུ་གྲྭ་ཚང་སྐུ་ཞབས་ཤིག་གིས་ཚོགས་སུ་ཆུ་ཁོལ་འཐུང་བ་ལ་རྣམ་རྟོག་ཟ་ཡི་འདུག་ཅེས་བཤད་འདུག །གཟུགས་པོར་གནོད་ན་ཡང་ཇ་ལ་ཕུ་རྒྱག་བཞིན་འཐུང་བ་ལས་ཆུ་ཁོལ་གྱིས་ཡིད་ཚིམ་གྱི་མེད་པ་འདྲ། གང་ལྟར་དགེ་འདུན་པའི་ནང་དུ་ཕོ་བའི་སྐྲན་ནད་སོགས་བྱུང་བ་ནི་ཟས་ཟ་སྟངས་མ་འགྲིག་པའི་རྐྱེན་ཡིན་པས་དེ་འགྲིག་གི་མི་འདུག་ཅེས་བཤད་མཁན་འདུག་ལ། ངས་ཀྱང་སྔོན་ནས་དེ་ལྟར་བཤད་ཡོད་པས་ཕན་ཐོགས་ཡོད་མེད་མི་ཤེས་ཀྱང་འབྲེལ་ཡོད་ཚོར་ཞུས་ན་ཡག་པོ་འདུག་ཅེས་ཁ་སང་བཤད་པ་ཡིན། དེས་ན་ཟས་ལ་གཟབ་གཟབ་བྱེད་དགོས་པ་གལ་ཆེ། ཕོ་སྐྲན་རིགས་མང་ཙམ་འབྱུང་བཞིན་པ་ནི་ཚ་བའི་ནང་དུ་ཆུ་གྲང་མོ་འཐུང་བའི་རྐྱེན་དང་། ཡང་སྐབས་རེར་ཟས་ཟ་སྟངས་ཀྱིས་གྲོད་ཁོག་བཤལ་བའང་ཡོད་ཚོད་འདུག །སྤྱིར་བོད་པའི་ནང་སྐྲན་ནད་ཀྱི་རིགས་མང་ཙམ་འདུག་པས་གཟབ་གཟབ་བྱེད་དགོས། ཕན་གྱི་ཡོད་མེད་མི་ཤེས་ཏེ་ཁྲལ་ལྟ་བུ་བྱས་ནས་མ་ཞུས་ན་འགྲིག་མ་སོང་སྙམ། བཞད་མོ་བཞད།

(༡༩༩༧/༡༢ /༢༨ ནས་༡༩༩༨/༡ /༤ བར་སེར་བྱེས་འདུ་ཁང་གསར་བཞེངས་ཟིན་པའི་རྟེན་འབྲེལ་མཛད་སྒོར་སྟོང་ཐུན་གྱི་བཀའ་ཁྲིད་ལས་བཏུས།

རྗེ་རིན་པོ་ཆེའི་གསུང་པོ་ཏི་བཅོ་བརྒྱད་དུ་མདོ་སྔགས་ཀྱི་གནད་འགག་ཐམས་ཅད་སྒྲིལ་ནས་ཧ་ལས་པ་ཞིག་གསུངས་ཡོད། བློ་གཟུ་བོར་གནས་པ་སུས་བལྟས་ཀྱང་ངོ་མཚར་སྐྱེ་བ་དང་དད་པའི་སྤུ་ལོང་རང་དབང་མེད་པར་གཡོ་བའི་ལེགས་བཤད་ཤ་སྟག་ཡིན། གསུང་དེ་དག་མཆོད་གཤོམ་དུ་པོ་ཏིའི་རྣམ་པར་ལུས་པ་ཙམ་མ་ཡིན་པར་ཡང་ཡང་མཇལ་དགོས་པ་དང་། མ་མཐར་ཡང་དཔེ་ཆ་དེ་དག་བཀླགས་རྗེས་དེའི་ནང་དུ་གསུངས་པ་རྣམས་ནམ་ཞིག་ན་རང་རྒྱུད་ལ་སྐྱེ་ཐུབ་པ་ཞིག་བྱུང་ན་སྙམ་པ་དང་སྐྱེ་བར་ཤོག་ཅེས་སྨོན་ལམ་ཞིག་ལས་མ་བྱུང་ཡང་འདེབས་རྒྱུ་ཧ་ཅང་གལ་ཆེན་པོ་རེད། གདན་ས་ཁག་ཏུ་མ་གཞི་རང་རང་གི་ཡིག་ཆའི་ཁས་ལེན་འཛིན་མཚམས་གཙོ་བོར་བྱེད་དགོས་ངེས་རེད། འོན་ཀྱང་ཡིག་ཆ་བརྩམས་པའི་དགོས་དོན་རྗེའི་གསུང་མདོ་སྔགས་ཀྱི་ལེགས་བཤད་པོ་ཏི་བཅོ་བརྒྱད་ཀྱི་དགོངས་དོན་རྟོགས་པའི་དོན་དུ་བརྩམས་པའི་འགྲེལ་པ་ཡིན་པ་ལས་རྗེའི་གསུང་དེ་དག་མི་དགོས་པ་བྱས་ནས་རྗེས་འཇུག་གི་ཡིག་ཆ་གཅིག་པུས་ཆོག་པའི་དོན་ག་ལ་ཡིན། ཐམས་ཅད་མཁྱེན་པ་དགེ་འདུན་གྲུབ་པར་དད་ལྡན་གྱི་སློབ་མ་འགས་དབུ་ཕར་གྱི་གཞུང་རྩོམ་རོགས་ཞུ་སྐབས། ཕ་བློ་བཟང་གྲགས་པས་མཛད་ཡོད་པས་ངས་བྲིས་པ་ཡིན་ན་ཁོང་གི་ལེགས་བཤད་དེ་དག་གལ་ཆུང་བྱེད་ཉེན་ཡོད་པས་བརྩམས་དགོས་པ་མི་འདུག་གསུངས་པ་རེད། ཡང་རྗེའི་གསུང་དུ་ཟིན་བྲིས་རེ་གཉིས་ལས་ཆེད་དུ་བརྩམས་པ་མེད་པའི་རྣམ་འགྲེལ་འདུལ་མཛོད་བཅས་ཀྱི་སྐོར་ལ་དགེ་འདུན་གྲུབ་པས་པོ་ཏི་ལོངས་པའི་ལེགས་བཤད་བརྩམས་གནང་ཡོད། གཞན་རྗེ་རང་གིས་ལེགས་བཤད་གསེར་ཕྲེང་། རྩ་འཇུག་གི་རྣམ་བཤད་གཉིས། དྲང་ངེས་ལེགས་བཤད་སྙིང་པོ་སོགས་མཛད་ཡོད་པས་དགེ་འདུན་གྲུབ་པས་དེའི་སྐོར་གང་ཡང་མཛད་མེད་པ་དཔེ་དེ་བཞིན་རེད།  མདོར་ན། འཇམ་མགོན་བླ་མ་ཙོང་ཁ་པ་ཆེན་པོའི་གསུང་པོ་ཏི་བཅོ་བརྒྱད་ཀྱི་དགོངས་དོན་རྟོགས་པའི་དོན་དུ་རྗེས་འཇུག་གི་མཁས་པ་དག་གིས་ལེགས་བཤད་བརྩམས་པ་ཡིན་པས། གྲྭ་ཚང་སོོ་སོའི་ཡིག་ཆ་དེ་དག་ལ་བརྟེན་ནས་རྗེ་རིན་པོ་ཆེའི་གསུང་པོ་ཏི་བཅོ་བརྒྱད་ཀྱི་དོན་ཁོང་དུ་ཆུད་པ་བྱེད་རྒྱུ་གལ་ཆེན་པོ་རེད། དེས་ན་ཁྱེད་རྣམ་པས་རང་གི་ཡིག་ཆ་ནས་བཤད་པའི་མཚན་ཉིད་དང་། ངོ་བོ། དབྱེ་བ་དང་། ས་མཚམས་སོགས་འདོན་རྒྱུ་ཡོད་པ་ཙམ་གྱིས་མི་ཆོག་པར་གཙོ་བོ་རྗེ་རིན་པོ་ཆེའི་གསུང་ལ་འདྲིས་ཤེས་པར་བྱེད་དགོས་པ་གལ་ཆེ་བས་སློབ་གཉེར་ཧུར་ཐག་གནང་རྒྱུ་དང་། དེ་ལས་གལ་ཆེན་ཞིག་ལ་སློབ་གཉེར་བྱས་པའི་ལག་རྗེས་ལ་ཐོས་རྟགས་ཞི་ཞིང་དུལ་བ། སྒོམ་རྟགས་ཉོན་མོངས་ཆུང་བ་ཞེས་གསུངས་པ་བཞིན་དགོས། ཆོས་དང་ཆོས་མིན་གྱི་ཚངས་ཐིག་དང་། འདུལ་བའི་གཞུང་ཤེས་པ་ལ་བརྟེན་ནས་རྒྱུན་དུ་འགྲོ་སྟངས་དང་། སྡོད་སྟངས།  མདོར་ན། སྐྲ་འཇོག་སྟངས་གོས་གོན་སྟངས་ཚུན་ཆད་གཞུང་ནས་གསུངས་པ་རྣམས་ལ་སློབ་སྦྱོང་བྱས་ཡོད་པ་དག་གཞིར་བཟུང་ནས་དེ་དང་མཐུན་པའི་འཇམ་མགོན་བླ་མ་ཙོང་ཁ་པའི་རྗེས་འཇུག་ཚད་ལྡན་ཞིག་བྱེད་རྒྱུ་ཧ་ཅང་གལ་ཆེ། ངས་རྒྱུན་དུ་མཁན་ལས་ཟུར་རྣམ་པར་འདུས་མང་ལ་ཁྲིམས་ལྕི་ཙམ་དང་སྒྲིག་ལམ་ཀུན་སྤྱོད་སོགས་ལ་དོ་དམ་པོ་བྱུང་ན་ཡག་པོ་འདུག་ཅེས་རྟག་པར་འཆད་བཞིན་ཡོད། ཚང་མས་ཐུགས་ཁུར་བསྐྱེད་པ་ཧ་ཅང་ཡག་པོ་རེད། དཔེར་ན། སྔོན་རྒྱ་གར་བྱང་ཕྱོགས་སྦག་སར་གནས་པའི་སྐབས་དང་། དེ་ནས་གཞིས་ཆགས་སོ་སོར་གནས་སྤོ་བྱེད་པའི་སྐབས་གང་འདྲ་འབྱུང་ངམ་སྙམ་དུ་སེམས་ལ་གཡང་ཟ་དགོས་བྱུང་བ་དེ། ད་ཆ་ཕལ་ཆེར་ཡལ་ནས་གང་འཚམ་ཚོད་ཐིག་པའི་སྐབས་ལ་བསླེབས་ཡོད། དེ་དག་ནི་ཚང་མས་དཀའ་ལས་བརྒྱབ་པའི་འབྲས་བུ་རེད་ལ། ད་དུང་ཡིན་ཀྱང་ཚང་མས་ཧུར་ཐག་གནང་རོགས་ཞེས་ཞུ་རྒྱུ་ཡིན། དེ་ལྟ་བུའི་སྒོ་ནས་བསྟན་པའི་སྙིང་པོ་རང་གཞན་གྱི་རྒྱུད་ལ་གསལ་བར་བྱེད་པ་ལ་ཐོག་མར་སྒྲུབ་པ་ཉམས་ལེན་བྱེད་དགོས་པ་དང་། དེ་ལ་ཡང་ཉམས་སུ་ལེན་ཚུལ་ཤེས་དགོས་པ་དང་། ཤེས་པ་ལ་ཡང་ཐོས་དགོས། ཐོས་པ་ལ་ཡང་ཐོས་པའི་དོན་ཚང་ཞིང་མ་ནོར་བ་ཞིག་དགོས།

(༡༩༩༧/༡༢ /༢༨ ནས་༡༩༩༨/༡ /༤ བར་སེར་བྱེས་འདུ་ཁང་གསར་བཞེངས་ཟིན་པའི་རྟེན་འབྲེལ་མཛད་སྒོར་སྟོང་ཐུན་གྱི་བཀའ་ཁྲིད་ལས་བཏུས། 

དེས་ན་གདན་ས་ཁག་ཏུ་པོ་ཏི་ལྔ་ལ་སྦྱང་བཞིན་པ་ནི་ཧ་ཅང་གལ་ཆེན་པོ་རེད། འོན་ཀྱང་མངོན་པ་མཛོད་དང་གསང་འདུས་སོགས་ནས་གསུངས་པའི་རི་རབ་ཀྱི་རྣམ་གཞག་དེ་དག་རང་ཅག་གི་གཞུང་ནས་གསུངས་པ་ལ་ཨུ་ཚུགས་ཀྱིས་འདི་ཁོ་ན་བདེན་གྱི་དེང་གི་ཚན་རིག་པ་དག་གིས་བཤད་པ་ནི་བདེན་པ་མ་རེད་ཅེས་གླེན་པའི་ཨུ་ཚུགས་གཏན་ནས་བྱེད་མི་རུང་། ངའི་ངོས་ནས་ཚན་རིག་པ་དེ་དག་གིས་ཚད་དང་རྩིས་བརྒྱབ། ཆེ་ཤེལ་གྱིས་ཞིབ་འཇུག་བྱས་ཏེ་དངོས་སུ་མཐོང་བ་མྱོང་གྲུབ་དང་། དེ་ཡང་མི་རེ་གཉིས་ཙམ་མ་ཡིན་པར་འཛམ་གླིང་འདིར་མི་དུང་ཕྱུར་ལྔ་བཅུ་ལྷག་གིས་མཐུན་སྣང་དུ་གྲུབ་པ་ཞིག་ང་ཚོས་མ་རེད་ཅེས་བཤད་དགོས་བྱུང་ན་བཞད་གད་ཀྱི་ཡུལ་ཙམ་ལས་མེད་པར་མཐོང་། དངོས་ཡོད་གནས་ཚུལ་གང་མཐོང་བ་དེ་ཁས་ལེན་དགོས་པ་ནི་ནང་པ་སྤྱིའི་འགྲོ་སྟངས་ཀྱང་ཡིན་ཏེ། དྲང་ངེས་ལེགས་བཤད་སྙིང་པོ་ལས། རིགས་པ་དང་འགལ་བའི་གྲུབ་མཐའ་ཁས་ལེན་ན་སྨྲ་བ་པོ་ཚད་མའི་སྐྱེས་བུར་མི་རུང་བའི་ཕྱིར་དང་། ཞེས་གསུངས་པ་ལྟར། རིགས་པ་དང་འགལ་བའམ་མངོན་སུམ་ལ་བསྙོན་དགོས་པའི་རྣམ་གཞག་ཅིག་ཁས་ལེན་ན་སྨྲ་བ་པོ་ཚད་མའི་སྐྱེས་བུར་ཡོང་སྟངས་མེད་ཅིང་། དེས་ན་རྟོན་བཞིའི་རྣམ་གཞག་གསུངས་པ་བཞིན་བསམ་བློ་གུ་ཡངས་པོ་གཏོང་དགོས་པའང་གནད་འགག་ཅིག་ཡིན། མདོར་ན། བདེན་བཞིའི་ཚུལ་ལས་བརྩམས་པའི་གསུང་དག་ལ་ནི་ཕྱི་ནང་སུས་བལྟས་ན་ཡང་། རིགས་པའི་གནོད་པ་མེད་ཅིང་ཉམས་མྱོང་གི་ཐོག་ནས་བསམ་བློ་བཏང་ན་བྲོ་བ་ཁ་རྒྱུ་ཡོད་པ་དང་སེམས་ལ་ཕན་པ་ཞིག་ཏུ་ཡོད་པས། ཚུལ་དེར་དང་པོར་སློབ་གཉེར་ལེགས་པོ་བྱས། དེ་ཡང་སེམས་འདུལ་ཐབས་ཁོ་ནའི་ཆེད་དུ་དམིགས་པ་ཞིག་ངེས་པར་དུ་དགོངས་པ་བཞེས་དགོས། དེང་སང་སྐབས་རེར་ཁྱད་མཚར་ཞིག་ལ་དགེ་བཤེས་མགྱོགས་པོ་བཏང་ནས་སྒྲུབ་པ་ཉམས་ལེན་བྱེད་པའི་དམིགས་ཡུལ་ཡོད་ན་ལེགས་ཀྱང་། དེ་ལས་ལྡོག་སྟེ་ཕྱི་རྒྱལ་ལ་ཨ་སྒོར་གྱི་དོན་དུ་འགྲོ་བ་ནི་དངོས་གནས་ངོ་ཚ་དགོས་པ་ཞིག་རེད། ཡང་འགའ་རེ་བསྟན་དོན་ལ་དམིགས་པ་དེ་འདྲ་ཡོང་ངེས་རེད། དེ་མ་གཏོགས་དཔེ་ཆ་བལྟས་ནས་ཅུང་ཟད་ཤེས་པ་དེ་མི་ཚེ་འཁྱོལ་ཐབས་ཙམ་གྱི་ཆེད་དུ་ཁྲ་ཁྲ་ཟང་ཟིང་ཡོད་སར་ཕྱིན། སྔར་མི་རེ་གཉིས་ཀྱིས། ཉིན་མཚན་ཀུན་ཏུ་ཨ་སྒོར་དོན་གཉེར་བློ། །ཞེས་བཤད་མཁན་བྱུང་ཡོད་པ་བཞིན། དེ་འདྲ་བྱས་ན་ངོ་ཚ་དགོས་པ་དང་ཐབས་སྐྱོ་པོ་རེད། རང་ཅག་གིས་དཔེ་ཆ་ཡུན་བསྲིངས་ནས་བལྟས་པའི་དགོས་དོན་རབ་ལ་བྱ་བྲལ་ལ་སོང་ནས་སྒྲུབ་པའི་རྒྱལ་མཚན་འཛིན་པ་ཞིག་དང་། གཉིས་པ་གདན་ས་ཁག་ཏུ་བསྡད་ནས་དཔེ་ཁྲིད་ཀྱི་འགན་ཁུར་ཐུབ་པ། གསུམ་པ་ཕྱོགས་དང་མཚམས་སུ་ཕྱིན་ནས་ནང་པའི་ཆོས་ལ་དོ་སྣང་གསར་པ་ཡོད་མཁན་དག་ལ་གང་ཕན་ཅི་ཕན་བྱེད་རྒྱུ་འདི་དག་ཧ་ཅང་གལ་ཆེན་པོ་རེད། གང་ལྟར་སྤྱི་ཚོགས་ནང་ནང་ཆོས་ལ་གོ་རྟོགས་ཡོད་པའི་དད་པ་བརྟན་པོ་ཞིག་བཟོ་མ་ཐུབ་ན་ག་ལེར་ང་ཚོའི་དགེ་འདུན་གྱི་འདུས་སྡེ་རྣམས་ལྟག་ཆུ་ཆད་པའི་རྫིང་བུ་བཞིན་དུ་འགྱུར་ངེས་ལས་མེད། སྤྱི་ཚོགས་ཀྱི་དད་པ་བརྟན་པོ་དང་ཡག་པོ་ཞེས་པ་དེ་ཡང་ལམ་དང་ལུགས་སྲོལ་གྱི་དད་པ་དེ་མ་ཡིན་པར། ད་ལྟའི་སྤྱི་ཚོགས་ནང་གི་དད་པ་དེ་ནི་ལམ་དང་ལུགས་སྲོལ་གྱི་དད་པ་ཞིག་ལས་ཆོས་ཀྱི་གནས་ཚུལ་ཤེས་པའི་དད་པ་ཞིག་མིན་པས་ཧ་ཅང་སྐྱོ་པོ་རེད། དེས་ན་སངས་རྒྱས་ཀྱི་ཆོས་ངོ་འཕྲོད་དེ་སངས་རྒྱས་ཀྱི་ཆོས་ཀྱི་ཁྱད་ཆོས་མཐོང་བའི་དད་པ་ཅན་གྱི་སྤྱི་ཚོགས་ཤིག་ཆགས་ཐུབ་ན། ཆོས་ལ་ཤེས་ནས་དད་པ་ཐོབ་པའི་ཕ་མ་དེས་རང་གི་ཕྲུ་གུ་ལ་ཆུང་དུས་ནས་ཆོས་ཀྱི་གནས་ལུགས་འགྲེལ་བཤད་བྱས་ཏེ་ཤེས་ཐུབ་པ་ཞིག་བཟོ་ཐུབ། ངས་བསམ་ན་བླ་མ་ངོ་མ་དེ་ཨ་མ་དེས་བྱེད་དགོས་ཀྱི་འདུག་དྲན་གྱི་ཡོད། ཕྲུ་གུ་ཆུང་དུས་ནས་ཨ་མས་བྱམས་བརྩེས་སྐྱོང་ཞོར་ནང་ཆོས་ངོ་སྤྲོད་བྱེད་ཐུབ་ལ། ཕྲུ་གུ་དེས་ནང་ཆོས་རྒྱ་ཆེན་པོ་དང་གཏིང་ཟབ་པོ་ཞིག་ཤེས་པའི་དོན་དུ་གདན་ས་ལ་དགའ་བཞིན་སྤྲོ་བཞིན་དུ་འཇུག་འདོད་འབྱུང་ངེས། དེ་མ་གཏོགས་ང་ཚོའི་སྤྱི་ཚོགས་ནང་ཕ་མ་ཅུང་ཙམ་འབྱོར་ལྡན་ཡིན་ན་རང་གི་ཕྲུ་གུ་དེ་ཕྱི་རྒྱལ་གྱི་སློབ་གྲྭ་ཞིག་ལ་གཏོང་ཐུབ་ན་རབ། དེ་མ་བྱུང་ན་རྒྱ་གར་དུ་ཨིན་ཇིའི་སློབ་གྲྭ་ཡག་པོ་ཞིག་ལ་གཏོང་བཞིན་ཡོད། བོད་གཞུང་གི་སློབ་གྲྭར་འགྲོ་མཁན་ཚོ་གཞན་ཞིག་ལ་འཕུར་ས་དང་བསྙེག་ས་མ་བྱུང་ནས་ལྷག་པའི་བཟོ་ལྟ་བུ་མཐོང་སྲིད། བོད་ནས་གསར་འབྱོར་མ་བསླེབས་གོང་གྲྭ་ཚང་སོ་སོ་བུ་གསོ་ཁང་ལྟ་བུ་བྱས་ནས་སྡོད་དགོས་བྱུང་ཡོད། གདན་སའི་ནང་སློབ་གཉེར་དུ་བཏང་བ་རྣམས་ནི་ཉམ་ཆུང་མགོ་མ་ཚོས་པ་ལྟ་བུ་དང་། དེ་དག་ཀྱང་གང་འཚམ་ནས་གཤོག་སྒྲོ་ལྟ་བུ་སྐྱེས་ཏེ་གནས་གཞན་ཞིག་ཏུ་འཕུར་ནས་གདན་སར་གཏན་དུ་སྡོད་དཀའ། དེས་ན་ཕྱོགས་གཅིག་ནས་རང་ཅག་རབ་ཏུ་བྱུང་བ་རྣམས་བསམ་རྒྱུ་དངུལ་དང་མི་ཚེ་འདི་སྐྱེལ་རྒྱུ་ཙམ་ལས་མེད་ན་སྐྱོ་པོ་རེད། ལོ་བཅོ་ལྔ་ཉི་ཤུར་ནང་ཆོས་སློབ་སྦྱོང་བྱས་པའི་དགོས་དོན་སེམས་འདུལ་བའི་དོན་དུ་ཡིན་པས་རང་དགར་མི་ཚེ་སྐྱེལ་བའི་དོན་དུ་སློབ་སྦྱོང་བྱེད་ཀྱི་མེད་པ་ཤེས་དགོས་པ་ཧ་ཅང་གལ་ཆེན་པོ་རེད། ཆོས་ཁས་བླངས། རབ་ཏུ་བྱུང་བའི་རྟགས་ཆ་ལུགས་ཤིག་འཆང་། དེའི་ཐོག་ལ་ཆོས་གང་འཚམ་ཤེས་མཁན་ཞིག་གིས་ཞབས་འདྲེན་ཞུས་པ་ཡིན་ན། ཆོས་མི་ཤེས་མཁན་བརྒྱ་སྟོང་གིས་ཞབས་འདྲེན་ཞུས་པ་ལས་ཀྱང་སྡུག །རྒྱ་དམར་གུང་ཁྲན་གྱིས་ཆོས་ལ་ངོ་རྒོལ་བྱེད་པར་ཡ་མཚར་རྒྱུ་ཅི་ཡང་མེད་དེ། རྗེ་རིན་པོ་ཆེས་མུ་སྟེགས་པས་རྟེན་འབྱུང་ཁས་མི་ལེན་པས་རང་བཞིན་མེད་པ་བློར་མ་ཆུད་པར་ཡ་མཚར་བ་གང་ཡང་མིན་མོད། རྟེན་འབྱུང་ཁས་བླངས་ནས་རང་བཞིན་མེད་པ་བློར་མ་ཆུད་པ་ནི་ཡ་མཚར་རེད་ཅེས་གསུངས་པ་བཞིན། ཆོས་གཏན་ནས་ཁས་མི་ལེན་མཁན་དག་གིས་ཆོས་ལ་སྐྱོན་བརྗོད་བྱས་པར་ཧ་ལས་དགོས་དོན་མེད། རང་ཅག་གིས་ཆོས་ཁས་བླངས། སྟོན་པ་བཀའ་དྲིན་ཅན་གྱི་རྗེས་སུ་འབྲངས་ནས་ཉིན་ལྟར་ཞོགས་པར་སྟོན་པའི་སྐུ་དྲུང་དུ་ཕྱག་འཚལ་བ་དང་སྨོན་ལམ་བཏབ་པ་དེ། ཉིན་ཞག་ཕྲུགས་གཅིག་གི་བསམ་བློ་གཏོང་ཕྱོགས་ཐད་དེའི་རྩི་མ་ཡལ་བ་ཞིག་དགོས་པ་ཧ་ཅང་གལ་ཆེན་པོ་རེད། དེ་ཡང་ཁྱེད་ཚོར་ཞུས་པ་ཙམ་མ་ཡིན་པར་བདག་གིས་ཀྱང་འདི་སྐོར་བསམ་བློ་གང་ཐུབ་ཐུབ་གཏོང་ཁུལ་ཡིན། རྨི་ལམ་ཚུན་ལའང་ང་དགེ་སློང་ཞིག་ཡིན་བསམ་པ་རྟག་པར་དྲན་གྱི་ཡོད། རྨི་ལམ་དུའང་ང་༸རྒྱལ་བ་རིན་པོ་ཆེ་ཡིན་བསམ་པ་གཏན་ནས་དྲན་གྱི་མེད། གཉིད་སད་པའི་སྐབས་མཚམས་རེར་ང་༸རྒྱལ་བ་རིན་པོ་ཆེ་ཡིན་བསམ་པའི་སྤོབས་པ་བྱས་ཏེ་ཀྲོག་ཀྲོག་ཅུང་ཙམ་བྱེད་ཀྱི་ཡོད། ངོ་ཐོག་སེམས་ཀྱི་གཏིང་ནས་དངངས་སྐྲག་སྐྱེས་པ་ལྟ་བུ་དང་། ཡང་ན་ཆགས་སྡང་སྐྱེ་བའི་རྐྱེན་དང་ཕྲད་དུས་ང་དགེ་སློང་ཡིན་བསམ་པ་རྟག་པར་དྲན་གྱི་ཡོད། དེས་ན་རང་ཅག་ཚང་མས་འབད་བརྩོན་བྱེད་དགོས།

(༡༩༩༧/༡༢ /༢༨ ནས་༡༩༩༨/༡ /༤ བར་སེར་བྱེས་འདུ་ཁང་གསར་བཞེངས་ཟིན་པའི་རྟེན་འབྲེལ་མཛད་སྒོར་སྟོང་ཐུན་གྱི་བཀའ་ཁྲིད་ལས་བཏུས།

འཛམ་གླིང་འདིའི་སྒང་ལ་མིས་བཟོས་པའི་རྙོག་གྲ་ཤིན་ཏུ་མང་པོ་ཞིག་ཡོང་བཞིན་པ་དེ་དག་གི་རྩ་བ་གཞན་གཅེས་འཛིན་གྱི་བསམ་བློ་མེད་པར་རང་གཅེས་འཛིན་གྱི་བློ་ལ་བརྟེན་ནས་ཡོང་བཞིན་པ་གསལ་པོ་རེད། འཛམ་གླིང་འཁྲུག་པའི་མཐའ་མར་སོ་སོ་རང་ཉིད་ཀྱང་མི་སྐྱིད་པའི་ངང་སྡོད་དགོས་པ་ལས་སྐྱིད་པ་ཡོང་རྒྱུ་གང་ཡང་མེད། 

 བདག་ཉིད་ཆེན་པོ་གྷནྡི་དང་མར་ཊིན་ལུ་ཐར་ཀིང་། དེ་བཞིན་དུ་ནེལ་སན་མནྜེ་ལ་ལྟ་བུ་གཞན་ལ་ཕན་བདེ་སྒྲུབ་མཁན་གྱི་རིགས་རྣམས་སོ་སོ་རང་ཉིད་ཀྱང་སེམས་སྐྱིད་ལ་བག་ཕེབས་པའི་སྟེང་། ལོ་རྒྱུས་ཀྱི་ནང་དུ་ཡང་འཁོད་ཐུབ་པ། མི་ཀུན་གྱིས་མོས་པ་བྱེད་ཡུལ་དུ་གྱུར་ཡོད།  བདག་ཉིད་ཆེན་པོ་གྷནྡི་ཞེས་རྗོད་སྐབས་མི་ཀུན་གྱིས་དགའ་མོས་བྱེད་ཡུལ་ཞིག་ཡིན། དེ་ལྟར་ཆོས་ཀྱི་སྐད་ཆ་ཙམ་མིན་པར་སྤྱིར་བཏང་འཛམ་གླིང་གི་གནས་ཚུལ་ལ་བལྟས་ཀྱང་ཇི་ཙམ་གཞན་ཕན་གྱི་བློ་ཡོད་པ་དེའི་ཚོད་ཀྱིས་རང་དོན་ལེགས་པ་འགྲུབ་བཞིན་ཡོད་ལ། གཅིག་སྡུད་དབང་འཛིན་པ་དེ་དག་ལྟར་རང་གཅིག་པུའི་དོན་བསམས་ཏེ་འཚོ་མཁན་རྣམས་མི་གཞན་གྱིས་འཕྱ་སྨོད་བྱེད་ཡུལ་དུ་འགྱུར་བཞིན་ཡོད། 

མདོ་དོན་སྙིང་པོ་རང་རེ་ཀུན་གྱིས་སེམས་བཟང་པོ་བྱས་ཏེ་སྡོད་དང་། དེས་གསོན་པའི་རིང་གྲོགས་པོ་མང་པོ་ཡོང་བ་ཙམ་དུ་མ་ཟད་འཆི་བའི་ཉིན་མོར་ཡང་ངོ་ཤེས་པ་དང་ཁྱིམ་མཚེས་ཀུན་གྱིས། ཨ་ཙི། མི་བཟང་པོ་དེ་གྲོངས་སོང་། ཕངས་པ་ལ་ཞེས་སྨོན་ལམ་འདེབས་པ་ཡོང་ངེས། དེ་ལས་ལྡོག་སྟེ་གསོན་པའི་རིང་རང་གཅིག་པུའི་དོན་བསམས་ཏེ་གཞན་ལ་མགོ་སྐོར་གཏོང་བ་དང་།  ཐུབ་ཚོད་ཤོད་པ་སོགས་ཀྱི་སྒོ་ནས་མི་ཚེ་ཕྱིན་ཚེ་ཚེ་ཕྱི་མར་སྡུག་བསྔལ་མྱང་དགོས་སྨོས་ཅི། ཚེ་འདིར་ཡང་གཞན་སུ་ལ་ཡང་ཡིད་མི་ཆེས་པར་སྡོད་དགོས།  དཔེར་ན། གཞན་ལ་ཕར་མགོ་སྐོར་བཏང་བས་གཞན་གྱིས་ཀྱང་ཚུར་དེ་ལྟར་མགོ་སྐོར་གཏོང་གི་མེད་དམ་སྙམ་དུ་ཞེད་སྣང་སྐྱེ་དགོས་པ་ཡོང་གི་ཡོད། བསམ་པ་རྣམ་དག་གི་སྒོ་ནས་མི་ཚེ་བསྐྱལ་ན་ཞེད་སྣང་ཏན་ཏན་ཉུང་བ་ཡོད། གལ་ཏེ་བསམ་པ་རྣམ་དག་གི་སྒོ་ནས་གནས་པའི་སྐབས་གཞན་གྱི་མགོ་སྐོར་བཏང་བ་ར་འཕྲོད་པ་བྱུང་ཚེ་དེ་ལ་ཅུང་ཟད་གྱོང་པོ་བྱེད་དགོས་ཀྱང་བྱེད་ཆོག་པ་ཡིན། (གསུངས་ཏེ་བཞད།) 
མདོར་ན། ཇི་ཙམ་གྱིས་རང་ལ་གཅེས་པར་བཟུང་བ་དེའི་ཚོད་ཀྱིས་བཀྲ་མི་ཤིས་པ་ཤ་སྟག་ཡོང་བ་ཤིན་ཏུ་གསལ་པོ་ཡིན།

(ཕྱི་ལོ་ ༢༠༡༧ ཟླ་ ༡༠ ཚེས་ ༣ ནས་ ༦ བར་གཙུག་ལག་ཁང་དུ་ཐའེ་ཝན་གྱི་ཆོས་ཞུ་བར་སྩལ་བའི་དབུ་མ་འཇུག་པའི་བཀའ་ཁྲིད་ལས་བཏུས།) 

 ངོས་ཀྱི་ངོ་ཤེས་པ་ཨ་མི་རི་ཀའི་ཚན་རིག་པ་ Aaron Beck ཟེར་བ་(མཆན། ཕྱི་ལོ་ ༢༠༡༤ ཟླ་ ༡༠ ཚེས་ ༢༨ ཉིན་ཨ་རིའི་ས་གནས་ Philadelphia མཇལ་འཕྲད་ཐེངས་གཉིས་པ་གནང་། ) ཞིག་ཡོད་པ་ཁོང་གིས་ཀྱང་དེ་ལྟར་རྗོད་ཀྱི་འདུག །ཁོང་ཕལ་ཆེར་ལོ་བརྒྱ་ཙམ་ལ་སླེབས་ཡོད། གཤེགས་ཟིན་ཡོད་མེད་མི་ཤེས། སྔོན་ཁོང་ལོ་བརྒྱད་ཅུ་གྱ་བཞི་ལོན་པའི་སྐབས་ངོས་དང་ཐུག་འཕྲད་བྱུང་། ཁོང་གིས་ཉམས་མྱོང་གི་ཐོག་ནས་གསུངས་པ་དེར་ངོས་རང་ཧ་ཅང་ཡིད་འཕྲོག་པོ་བྱུང་སྟེ་ཕྱིས་སུ་ཁོང་གི་སར་ཐེངས་ཤིག་ཆེད་མངགས་ཕྱིན་པ་ཡིན། སྐབས་དེ་དུས་ཁོང་ལོ་དགུ་བཅུ་གོ་བཞི་ལ་སླེབས་འདུག །ཁོང་ནང་པ་མིན་པ་སྨོས་མེད་ཆོས་པ་ཡང་ཕལ་ཆེར་མིན། འོན་ཀྱང་ཁོང་ལོ་ངོ་བཅུ་ཕྲག་འགའ་ཤས་རིང་ཞེ་སྡང་གི་དབང་གིས་སེམས་འཁྲུག་པའི་མིའི་རིགས་ལ་ཁོང་ཁྲོ་ཞི་ཐབས་ཀྱི་རོགས་རམ་དང་བཅོས་ཐབས། སྨན་བཅོས་བྱེད་མཁན་ཞིག་ཡིན། ཁོང་གིས་ཉམས་མྱོང་གི་ཐོག་ནས་ཞེ་སྡང་སྐྱེ་བའི་སྐབས་སུ། ཞེ་སྡང་སྐྱེ་ཡུལ་དེ་ཉིད་ཤིན་ཏུ་མི་སྡུག་པ་ཞིག་ཏུ་མཐོང་གི་ཡོད་ཀྱང་། གང་མཐོང་བའི་མི་སྡུག་པའི་ཆ་བརྒྱ་ཆའི་དགུ་བཅུ་ཐམ་པ་ཞེ་སྡང་རྒྱུད་ལྡན་གང་ཟག་རང་ཉིད་ཀྱི་རྣམ་རྟོག་གིས་བཅོས་པ་ཡིན་ཞེས་རྗོད་ཀྱི་འདུག །ཁོང་ཚན་རིག་པ་ཡིན་པས་དངོས་ཡོད་གནས་ཚུལ་གང་མཐོང་རྗོད་ཀྱི་རེད། ཁོང་ནུབ་ཕྱོགས་པའི་ཚན་རིག་པ་ཡིན་པའི་ཆ་ནས་འདོད་ཆགས་ཇི་ལྟར་སྐྱེ་བཞིན་ཡོད་དམ་ཞེས་དྲིས་པར། འདོད་ཆགས་ལ་སྐྱོན་མེད་ཅེས་བརྗོད་སོང་། (གསུངས་ཏེ་བཞད།) སངས་རྒྱས་པའི་ཆོས་དང་འབྲེལ་ནས་བཤད་ན་ཁོང་ཁྲོ་དེ་འདོད་ཆགས་དང་འབྲེལ་ནས་སྐྱེ་བཞིན་ཡོད། ཇི་ཙམ་གྱིས་འདོད་ཆགས་ཤུགས་ཆེ་བ་ཡོད་པ་དེའི་ཚོད་ཀྱིས་ཅུང་ཟད་མ་འགྲིག་པ་བྱུང་བ་དང་དེ་མ་ཐག་ཞེ་སྡང་སྐྱེ་བཞིན་ཡོད། དེ་ཡང་ཞེ་སྡང་གི་རྒྱུ་འདོད་ཆགས་ཀྱིས་བྱེད་པ་དང་། འདོད་ཆགས་ཀྱི་རྩ་བ་མ་རིག་པར་ཐུག་པའི་ཚུལ་ཞིབ་ཚགས་པོའི་སྒོ་ནས་འགྲེལ་བཤད་མཛད་ཡོད། 

ཁོང་གིས་བཤད་པའི་དོན་དང་དབུ་མ་རྩ་བ་ཤེས་རབ་ཀྱི་ནང་། ལས་དང་ཉོན་མོངས་རྣམ་རྟོག་ལས། །ཞེས་གསུངས་ཏེ། འཁོར་བར་འཕེན་བྱེད་ཀྱི་ལས་ཉོན་མོངས་ལ་བརྟེན་ནས་བྱུང་བ་དང་། ཉོན་མོངས་དེ་ཚུལ་མིན་ཡིད་བྱེད་ཀྱི་རྣམ་རྟོག་ལས་བྱུང་བ། ཚུལ་མིན་ཡིད་བྱེད་ཀྱི་རྣམ་རྟོག་གིས་ཡུལ་སྟེང་གི་བཟང་ངན་གྱི་ཆ་དེ་རྣམ་རྟོག་གིས་སྒྲོ་བཏགས་ཏེ་བཟང་པོའི་ཆ་དེ་ཆེས་ཤིན་ཏུ་བཟང་པོ་ཡིན་པར་བལྟས་ཏེ་ཡུལ་ལ་འདོད་པའམ་ཆགས་པའི་བློ་སྐྱེ་བ་དང་། ངན་པའི་ཆ་དེ་ཆེས་ཤིན་ཏུ་ངན་པའི་ངོ་བོར་བལྟས་ཏེ།  དེ་ལ་རྒྱབ་ཀྱིས་ཕྱོགས་པའམ་ཞེ་སྡང་སྐྱེ་བར་གསུངས་པ་གཉིས་གཅིག་གྱུར་ཡིན། དེ་དག་སྤྲོས་ལས། ཞེས་གསུངས་ཏེ་ཚུལ་མིན་ཡིད་བྱེད་ཀྱི་རྣམ་རྟོག་དེ་བདེན་འཛིན་གྱི་སྤྲོས་པ་ལ་བརྟེན་ནས་འབྱུང་བར་གསུངས། དེ་ལྟར་ཚུལ་མིན་ཡིད་བྱེད་ཀྱི་རྣམ་རྟོག་ལ་བརྟེན་ནས་ཆགས་སྡང་སྐྱེ་བར་གསུངས་པ་དེ་གོང་དུ་ཚན་རིག་པ་དེས་བཤད་པ་དེ་དང་ཏག་ཏག་འགྲོ་བཞིན་ཡོད། 

རང་རེ་ཚང་མའི་རྒྱུད་ལ་ཆགས་སྡང་སྐྱེ་མ་མྱོང་བ་མེད་པར་ཆགས་སྡང་གི་ཉམས་མྱོང་མཐར་ཕྱིན་པ་ཤ་སྟག་ཡིན་པས་ཚང་མས་ཤེས་ཀྱི་ཡོད། དཔེར་ན། ཁོང་ཁྲོ་སྐྱེ་ཡུལ་དེར་ཚུལ་མིན་ཡིད་བྱེད་ཀྱི་རྣམ་རྟོག་གིས་སྒྲོ་བཏགས་པ་ཙམ་མིན་པར་དོན་ལ་མི་སྡུག་པར་གྲུབ་པ་ཞིག་ཡིན་ན་དེ་རིང་དེ་ལ་དམིགས་ཏེ་ཁོང་ཁྲོ་སྐྱེ་བ་ལྟར་ལོ་རྗེས་མ་དང་།  ལོ་བཅུ་ཕྲག་ཕྱིན་པའི་རྗེས་སུ་ཡང་ཡུལ་དེ་མཐོང་རེས་བཞིན་ཁོང་ཁྲོ་སྐྱེ་དགོས། འོན་ཀྱང་དེ་འདྲ་མིན་པར་གནས་སྐབས་ཤིག་ལ་དེ་ལ་དམིགས་ཏེ་ཆེས་མི་སྡུག་པར་མཐོང་བ་ཡོད་ཀྱང་། ཟླ་བ་འགའ་ཞིག་ཕྱིན་ཚེ་དེ་ལ་དམིགས་ནས་སྔར་ལྟར་ཆེས་མི་སྡུག་པར་མི་མཐོང་བར་བློའི་མཐོང་ཚུལ་ལ་འགྱུར་བ་འགྲོ་བཞིན་ཡོད། ཚུལ་མིན་ཡིད་བྱེད་ཀྱི་རྣམ་རྟོག་གིས་སྒྲོ་བཏགས་ཏེ་བརྒྱ་ཆའི་བརྒྱ་ཐམ་པ་མི་སྡུག་པར་མཐོང་བ་ལྟར་དོན་ལ་ཡང་དེ་ལྟར་གྲུབ་པ་ཞིག་ཡིན་ན་དེ་ལྟ་བུའི་འགྱུར་བ་ཡོང་མི་ནུས། འོན་ཀྱང་དེ་རིང་མི་སྡུག་པར་མཐོང་བའི་ཡུལ་ཞིག་བདུན་ཕྲག་འགའ་ཞིག་ཕྱིན་མཚམས་ཡིད་དུ་འོང་བར་མཐོང་སྟེ་དགའ་བ་སྐྱེ་ཡུལ་དུ་འགྱུར་བ་དང་། ཡང་དེ་རིང་དགའ་ཉེར་གྱུར་ཏེ་ཆེས་ཡིད་དུ་འོང་བར་མཐོང་བའི་ཡུལ་ཞིག་ཕན་ཚུན་མི་འགྲིག་པའི་རྐྱེན་བྱུང་བ་ལ་བརྟེན་ནས་ཡིད་དུ་མི་འོང་བར་བལྟས་ཏེ།  འཁྲུག་རྩོད་བྱེད་པ་ལྟ་བུའི་འགྱུར་བ་འགྲོ་བཞིན་ཡོད་སྟབས་ཡུལ་ཆེས་སྡུག་པ་དང་ཆེས་མི་སྡུག་པའི་རྣམ་པར་མཐོང་བ་དེ་ཚུལ་མིན་ཡིད་བྱེད་ཀྱི་རྣམ་རྟོག་གིས་སྒྲོ་བཏགས་པ་ལ་བརྟེན་ནས་འབྱུང་བ་ཤིན་ཏུ་གསལ་པོ་ཡིན། ཚན་རིག་པ་ཁོང་གིས་ཀྱང་དེ་ལྟར་རྗོད་བཞིན་ཡོད། 


(ཕྱི་ལོ་ ༢༠༡༧ ཟླ་ ༡༠ ཚེས་ ༣ ནས་ ༦ བར་གཙུག་ལག་ཁང་དུ་ཐའེ་ཝན་གྱི་ཆོས་ཞུ་བར་སྩལ་བའི་དབུ་མ་འཇུག་པའི་བཀའ་ཁྲིད་ལས་བཏུས།) 

ངོས་ཀྱི་མཐོང་ཚུལ་ལྟར་ན། དབང་པོ་རྣོན་པོའི་དབང་དུ་བྱས་ཚེ་རང་ཉིད་ནང་པར་མ་གྱུར་སྔོན་ནས་སྟོང་ཉིད་ཀྱི་ལྟ་བར་བསམ་བློ་གཏོང་དགོས་པར་མཐོང་གི་འདུག །ཚད་རྡུལ་དངོས་ཁམས་རིག་པ་དང་འབྲེལ་ནས་བཤད་ན་ནང་པའི་སྟོང་ཉིད་ཀྱི་ལྟ་བའི་སྐོར་དེ་ཡར་རྒྱས་ཧ་ཅང་ཆེན་པོ་ཕྱིན་པ་ཞིག་ཡིན་ཅིང་། ནུབ་ཕྱོགས་པའི་ཚད་རྡུལ་དངོས་ཁམས་རིག་པ་དེ་གཞི་ནས་གསར་དུ་འགོ་ཚུགས་པ་ཙམ་ཞིག་ཡིན། ངོས་ཀྱི་ངོ་ཤེས་རྒྱ་གར་བའི་རྡུལ་ཕྲན་ཚན་རིག་པ་རཱ་ཇཱ་ར་མ་ནྣཱས། ནུབ་ཕྱོགས་པའི་སྤྱི་ཚོགས་ནང་ཚད་རྡུལ་དངོས་ཁམས་རིག་པ་དེ་ལྟ་ཚུལ་གསར་པ་ཞིག་ཡིན་ཀྱང་། རྒྱ་གར་ནང་ཚད་རྡུལ་དངོས་ཁམས་རིག་པའི་ལྟ་གྲུབ་ཀྱི་སྙིང་དོན་དར་འཕེལ་བྱུང་ནས་ལོ་ངོ་ལོ་སྟོང་ཕྲག་གཉིས་ཕྱིན་ཟིན་ཞེས་བརྗོད་བྱུང་།

 (ཕྱི་ལོ་ ༢༠༡༧ ཟླ་ ༡༠ ཚེས་ ༣ ནས་ ༦ བར་གཙུག་ལག་ཁང་དུ་ཐའེ་ཝན་གྱི་ཆོས་ཞུ་བར་སྩལ་བའི་དབུ་མ་འཇུག་པའི་བཀའ་ཁྲིད་ལས་བཏུས།) 

གཞན་ལ་འཚེ་བ་མེད་པ་ཞིག་དགོས་པ་ཧ་ཅང་གལ་ཆེ། ཁོང་ཁྲོ་ཟ་བར་ཐོག་མར་ཁོང་ཁྲོ་སྐྱེ་སའི་ཡུལ་ཞིག་ཡོད་དགོས་པ་ལ།  དེ་ཡང་རང་དང་ཉེ་བ་དག་ལས་འཇིག་རྟེན་གྱི་ཁམས་གཞན་གྱི་སྲོག་ཆགས་ལ་ཁྲོ་སེམས་སྐྱེ་བ་མེད་པར་རང་ཉིད་ཀྱི་ཉེ་གམ་ན་ཡོད་པ་རྣམས་ལ་ཁྲོ་བ་ཡིན། དཔེར་ན། རང་ལ་ཁྱིམ་མཚེས་ཡག་པོ་ཞིག་ཡོད་ནའང་ད་དུང་དེའི་སྐྱོན་མཐོང་བ་ལྟ་བུ་དང་། གྲྭ་ས་གྲྭ་ཚང་གི་ནང་དུ་ཡོད་པ་རྣམས་ལའང་རྣ་བ་ཀྲོང་ནས་ཉན་ན་མ་འགྲིག་མ་འཐུས་པ་མང་པོ་གོ་རྒྱུ་ཡོད། འདི་དག་མིའི་ཆོས་ཉིད་རེད། སྤྱིར་དེ་ལྟར་ཡིན་ནའང་ཚང་མས་གཟབ་དགོས་པ་གལ་ཆེ། ཉེས་པ་ཧ་ཅང་འབྱུང་ཉེ་བ་དང་། དེ་བྱུང་ན་ཉེན་ཁ་ཆེ་བ། བསྟན་པ་སྤྱི་ལ་གནོད་པ་དང་། རང་ཉིད་སྒེར་ལའང་ཚེ་འདི་དང་ཕྱི་མ་རྣམས་སུ་མ་སྐྱིད་པ། ཕྱི་མ་བཀྲ་མ་ཤིས་པ། ནང་དོན་མ་འགྲུབ་པ་སོགས་འོང་བས་ཁོང་ཁྲོ་ལ་ཉེས་དམིགས་ཆེན་པོར་བལྟས་ཏེ།  བག་ཟོན་བྱ་དགོས་པ་ལས་ཁོང་ཁྲོ་དང་དུ་ལེན་ཐུབ་ན་དཔའ་དང་བློ་ཁོག་ཡོད་པའི་ཁུལ་དུ་བརྩིས་ནས་དང་དོད་བྱེད་མི་ཉན། ང་ཚོས་ཞེ་ཐག་པ་ནས་ཁོང་ཁྲོ་ཞེས་པ་མ་རུང་བ་ཞིག་ཡིན་སྙམ་པའི་ངོས་འཛིན་གསལ་པོ་བྱུང་བའི་དུས་དེ་ནས་ཁོང་ཁྲོ་ལ་བག་ཟོན་བྱེད་པ་དང་། དེ་དང་དུ་ལེན་མི་འོས་སྙམ་པའི་བློ་ཞིག་ཤུགས་མ་ཐུབ་ཀྱིས་ཡོང་བས་རིམ་གྱིས་ཁོང་ཁྲོ་ཇེ་ཆུང་དུ་གཏོང་ཐུབ་པ་འོང་། 

ཕྱི་ལོ་༡༩༩༤ ཟླ་༡༠ ཚེས་༣༡ ནས་སེ་རར་གནང་བའི་དབུ་མ་དགོངས་པ་རབ་གསལ་གྱི་བཀའ་ཁྲིད་ལས་བཏུས།

དེ་ལྟ་ནའང་ང་ཚོས་སྤྱི་པའི་དོན་དུ་རྒྱ་མིར་ཁོང་ཁྲོ་དང་མི་དགའ་བ་བྱས་ན་ཡག་པོ་མེད།  དངོས་གནས་ས་གནས་ས་ཐོག་གི་བོད་པར་སྡུག་སྦྱོང་གཏོང་མཁན་གྱི་རྒྱ་དཔོན་བྱེ་བྲག་པ་ཞིག་ལ་མཚོན་ནའང་སྙིང་ཁོང་རུས་པའི་གཏིང་ནས་དེར་ཕན་སེམས་བྱེད་པ་ལས་གནོད་པའི་བསམ་པ་གཞར་ཡང་མི་སྐྱེ་བ་བྱེད་རྒྱུ་གལ་ཆེ། ཡང་ཕན་སེམས་བྱེད་དགོས་ཞེས་པ་གང་ཟག་དེས་ང་ཚོར་མ་བབ་པ་དང་མ་འོས་པ་བྱས་པ་རྣམས་ལ་དག་པ་སྟེར་བ་ལྟ་བུ་གཏན་ནས་མ་རེད། བྱང་ཆུབ་སེམས་དཔའ་རྣམས་ཀྱིས་གཞན་དོན་སྒྲུབ་པར་ལས་རབ་འབྱམས་ཞེས་མང་པོ་ཡོད་པ་དེ་དག་ཡོང་མི་ཤེས། དེས་ན་བཟོད་པ་བསྒོམ་ཞེས་པ་གཙོ་བོ་རང་ཉིད་ཁོང་ཁྲོའི་གཞན་དབང་དུ་མི་གཏོང་བ་ལ་ཟེར་བ་ལས་སྡུག་སྒོམ་རྒྱག་པ་གཅིག་པུ་ལ་ཟེར་བ་མིན། དངོས་ཡོད་རྒྱུ་མཚན་གྱི་ཐོག་ནས་བདེན་པ་བདེན་སར་འཁྱོལ་བར་བྱས་པ་དེ་བཟོད་པ་མ་བསྒོམས་པ་གཏན་ནས་མིན། རང་ཉིད་ཀྱི་གཤིས་རྒྱུད་གནག་སེམས་དང་གནོད་སེམས་སོགས་ཁྲོ་བ་དང་ཞེ་སྡང་གི་གཞན་དབང་དུ་མི་གཏོང་བར་ལྷག་ཏུ་སྙིང་རྗེ་བསྒོམས་པ་དེ་ལ་བཟོད་པ་བསྒོམས་པ་ཟེར། ལག་ལེན་གྱི་ཐོག་ནས་ཕ་རོལ་པོས་མ་འོས་པ་དང་མ་འཚམ་པའི་བྱ་བ་ངན་པ་བྱས་པ་རྣམས་བྱུང་རྒྱལ་དུ་བཞག་ན། ད་དུང་ཕ་རོལ་པོས་སྡིག་པ་མུ་མཐུད་ནས་གསོག་པའི་རྐྱེན་དུ་འགྱུར་བས་རྒྱུ་མཚན་འདི་འདྲ་ལ་བརྟེན་ནས་ཕ་རོལ་པོར་བརྩེ་བའི་སྒོ་ནས་ཕ་རོལ་པོའི་བྱ་བ་ངན་པ་བཟློག་དགོས།

དེས་ན་ང་ཚོས་གཞུང་ནས་གསུངས་པའི་བསླབ་བྱ་རྣམས་དངོས་ཡོད་གནས་ཚུལ་དང་རན་པ་ཡིན། མི་ཕལ་པ་དང་ཆོས་ཁས་མི་ལེན་པ་རྣམས་ཀྱིས་བལྟས་ཀྱང་དེ་རླབས་ཆེན་པོར་མཐོང་བ་ཡིན།  དོན་མེད་པར་ཕ་རོལ་པོས་རང་ལ་གནོད་པ་བྱས་ཏེ་སྡུག་བསྔལ་གྱི་ནང་དུ་ཚུད་ནའང་རང་གི་སེམས་ཀྱི་ཞི་བདེ་མ་བརླགས་པའི་ཐོག་ནས་སྐབས་དང་འཚམས་པར་ཕ་རོལ་པོར་ལན་སློག་པ་དེ་རླབས་ཆེན་ཡིན། སྤྱིར་བཏང་གི་མི་ཞིག་ལ་མཚོན་ནའང་དེ་ལྟར་བྱེད་མཁན་གྱི་མི་དེ་གྲུང་བོ་རེད། སེམས་ལ་མི་དགའ་བ་དང་། ཁོང་ཁྲོ་སྐྱེས་ཏེ་གཉིད་མ་ཁུག་པ་དང་། ལྟོ་ཆས་ལ་བྲོ་བ་མེད་པ་སོགས་མེད་པར་རང་ཉིད་ཞི་དུལ་གྱི་ངང་དུ་བསྡད། ཟས་ཞིམ་པོ་ཟོས། གཉིད་སྐྱིད་པོ་ཁུག །ལག་ལེན་གྱི་ཐོག་ནས་ཕ་རོལ་པོར་ཁ་གཏད་ཤུགས་ཆེན་པོ་བཅགས་ན་དེ་རླབས་ཆེན་རེད་མི་འདུག་གམ། ཁ་གཏད་གཅོག་པ་སོགས་གང་ཡང་མེད་པར་ཁོང་ཁྲོ་ལངས་ཏེ་རོ་སྟོད་ན་ནས་བསྡད་ན་གླེན་པ་རེད། 

དེ་ལྟ་ན་ཐེག་པ་ཆེན་པོའི་གཞུང་ནས་གསུངས་པ་རྣམས་བྱབ་ཆུང་གི་བསམ་བློ་གཏན་ནས་མིན། ཡང་འགའ་ཞིག་གིས་བྱང་ཆུབ་སེམས་དཔའ་ཟེར་བ་བྱབ་ཆུང་བ་ཞིག་ཏུ་མཐོང་སྲིད་ཀྱང་ངས་ནི་དེ་དག་གྲུང་བོ་ཞིག་ཏུ་བརྩི་བཞིན་ཡོད། དུས་རྒྱུན་དུ་ལག་ལེན་ངོ་མའི་ཐོག་ནས་བསླབ་བྱ་གང་གནང་ཡོད་པ་ལྟར་བསྒྲུབ་དགོས། བསྟན་པའི་སྤྱི་དགྲ་དང་བླ་མའི་སྒོས་དགྲ་ལྟ་བུ་ལ་ཁྲོ་སེམས་བྱེད་མི་ཉན་པར་མ་ཟད་ལྷག་ཏུ་སྙིང་བརྩེ་དགོས་ན་མི་སྒེར་ལ་གནོད་པ་ཕྲན་བུ་བྱེད་མཁན་ལ་ལྟ་ཅི་སྨོས། ང་ཚོ་ཁ་ཤས་ཆེ་ས་སྤྱི་པའི་དོན་བརྗེད། ཆུང་ཙག་ཅིག་ལ་ཨམ་གཙིགས་བསྡམས་མཁན་དེ་འདྲ་འདུག་པ་རྣམས་ནི་དེ་ལས་ཀྱང་བྱབ་ཆུང་བ་རེད།

(ཕྱི་ལོ་༡༩༩༤ ཟླ་༡༠ ཚེས་༣༡ ཉིན་ནས་སེ་ར་ཐེག་ཆེན་གླིང་དུ། དབུ་མ་དགོངས་པ་རབ་གསལ་གྱི་བཀའ་ཁྲིད་ལས་བཏུས།)

ཡང་མི་དང་མི་མིན་གྱི་གནོད་བྱེད་ཀྱི་རིགས་ལ་སྙིང་རྗེ་བསྒོམ་རྒྱུ་དེ་ཤིན་ཏུ་གལ་ཆེན་པོ་ཡིན། གནོད་བྱེད་ལ་ཆེད་དུ་དམིགས་ཏེ་སྙིང་རྗེ་བསྒོམས་པས་གནོད་པ་རང་བཞིན་གྱིས་བཟློག་པར་འགྱུར་བས་སྙིང་རྗེ་སྒོམ་པ་གནོད་པ་ཟློག་པའི་ཐབས་ལེགས་ཤོས་དེ་ཡིན། སྔར་འབྲུག་པ་ཀུན་ལེགས་ཀྱིས་རྒྱལ་དབང་ཆོས་རྗེ་ཡིན་ནམ་གཅིག་གི་སྐུ་རིམ་བསྒྲུབས་ཏེ།  གཏོར་མ་འཕེན་པའི་སྐབས་གཏོར་མ་ཕྱི་རོལ་དུ་མ་འཕངས་པར་གང་གི་ཆེད་དུ་སྐུ་རིམ་བསྒྲུབ་སའི་བླ་མའི་པང་ཁར་འཕངས་ཏེ། ཁྱེད་རང་ལ་བཀྲ་མི་ཤིས་པ་འབྱུང་བའི་རྐྱེན་གཙོ་བོ་ཁྱེད་རང་གི་རྒྱུད་ཀྱི་བདག་འཛིན་ལ་ཐུག་འདུག །ངས་གཏོར་མ་ཁྱེད་རང་གི་བདག་འཛིན་གྱི་མགོ་ལ་འཕེན་གྱི་ཡོད་ཅེས་གསུངས་པའི་ལོ་རྒྱུས་ཡོད། གསུངས་ཏེ་བཞད། འདི་དངོས་ཡོད་གནས་ཚུལ་དང་མཐུན་པ་ཡིན། 

ཕྱི་ལོ་ ༢༠༠༨ ཟླ་ ༡ ཚེས་ ༩ ནས་ཚེས་ ༡༣ བར་ཉིན་གྲངས་ལྔའི་རིང་མོན་གྷོ་འབྲས་སྤུངས་བློ་གསལ་གླིང་གི་འདུ་ཁང་གསར་པར་འཇིགས་བྱེད་ལྷ་བཅུ་གསུམ་མའི་བཀའ་དབང་གནང་སྐབས་ཀྱི་བཀའ་ཁྲིད་ལས་བཏུས།

འཇིག་རྟེན་གྱི་མཐོང་ཆོས་སུ་ཡང་ཇི་ཙམ་གྱིས་སྤྱི་སེམས་བཅངས་ཏེ།  གཞན་ལ་ཕན་པ་བསྒྲུབས་ན་དེའི་ཚོད་ཀྱིས་རང་དོན་ཞར་ལ་འགྲུབ་ནུས་པ་ཞིག་ཡོང་ལ། མི་གཞན་ཀུན་གྱིས་ཀྱང་རང་ལ་ཡིད་ཆེས་བློས་འགེལ་བྱས་ཏེ་སེམས་ཐག་ཉེ་པོ་དང་གྲོགས་པོར་འགྱུར་ནུས། དེ་འདྲ་ཞིག་བྱུང་ན་གཡས་ལ་བལྟས་ཀྱང་གྲོགས་པོ། གཡོན་ལ་བལྟས་ཀྱང་གྲོགས་པོ། མདུན་ལ་བལྟས་ཀྱང་གྲོགས་པོས་ཁེངས་པ་ཞིག་ཡོང་ནུས་པས་ཤིན་ཏུ་ལེགས་པ་ཡིན། མིའི་སྤྱི་ཚོགས་འདི་ཕན་ཚུན་འདུས་པའི་རང་བཞིན་གྱི་སྤྱི་ཚོགས་ཤིག་ཡིན་པས་གཡས་གཡོན་ཀུན་ནས་ཡིད་བརྟན་འཕེར་བའི་གྲོགས་པོ་གྲོགས་མཆེད་ཀྱིས་བསྐོར་ཏེ་གནས་ཐུབ་པ་ཞིག་བྱུང་ན་སེམས་སྐྱིད་པོ་ཡོང་ལ། དཀའ་ངལ་འཕྲད་པའི་དུས་སུ་ཡང་དཀའ་ངལ་བཤད་ས་ཡོད་པ། བཀྲ་ཤིས་པ་བྱུང་ཡང་བཀྲ་ཤིས་པའི་བདེ་སྐྱིད་དེ་བགོ་བཤའ་བརྒྱག་རྒྱུ་ཡོད་པ་ཧ་ཅང་སྐྱིད། དེ་ལྟ་མིན་པར་ང་དང་ང་ཞེས་རང་གཅིག་པུའི་དོན་བསམས་ཏེ་གཞན་བདེ་ཁྱད་དུ་གསོད་པའི་རང་གཅེས་འཛིན་ངན་པ་ཞིག་གི་གཞན་དབང་དུ་སོང་ནས་བསྡད་ན་མཐར་གྲོགས་མེད་གཅིག་པུར་ལྷག་སྟེ་གནས་དགོས་པ་ཡོང་།  

དེ་ཡང་། གཞན་ལ་བརྩེ་བ་མེད་པར་མགོ་སྐོར་གཏོང་བ་དང་ལག་རྩེད་ལྟ་བུ་རྩེས་ན་ཁྱི་དང་ཞི་མི་ལ་སོགས་པ་དུད་འགྲོས་ཀྱང་ཤེས་ཏེ་མི་དགའ་བ་བྱེད་ན་མིས་དེ་བས་ཀྱང་ཤེས་ངེས། ཕྱིའི་རྣམ་འགྱུར་འདྲ་ཆགས་པོ་ཇི་འདྲ་ཞིག་བསྟན་ཡང་ནང་སེམས་ཀྱི་ཐོག་ནས་གཞན་ལ་བསམ་བློ་དེ་ཙམ་མི་གཏོང་མཁན་ཞིག་ཡིན་ན་མི་གཞན་གྱིས་ཀྱང་དེ་ལ་དཔག་པའི་རྣམ་འགྱུར་ཞིག་སྟོན་པ་ལས་ཆ་འཇོག་བྱེད་པ་མི་འོང་། དེའི་འབྲས་བུར་གཡས་གཡོན་མདུན་རྒྱབ་གང་ལ་བལྟས་ཀྱང་དོགས་པ་དང་ཟོན་བྱེད་དགོས་པ་ཡོང་ལ། དེ་ལྟར་བྱུང་ཚེ་མཐར་ཐུག་གྲོགས་མེད་གཅིག་པུར་ལྷག་སྟེ་གནས་དགོས་པ་འབྱུང་ཞིང་། དེ་ལ་བརྟེན་ནས་སེམས་གཅོང་གི་ནད་ Depression ཀྱིས་མནར་དགོས་པ་ཡོང་བ་ཡིན། 

བསམ་པ་རྣམ་དག་དང་དྲང་པོ་དྲང་གཞག་བྱས་ཚེ་ཀུན་ལ་མཛའ་ཞིང་ཀུན་དང་འཆམ་པ། ཀུན་གྱི་གྲོགས་སུ་གྱུར་པ་ཞིག་ཡོང་ལ། དེ་ལྟར་བྱུང་ཚེ་གཞན་ལ་དོགས་ཟོན་བྱེད་དགོས་པ་གང་ཡང་མེད་པས་སེམས་ཞི་ཞིང་ལྷོད་པ་སྐྱིད་པོའི་ངང་གནས་ཐུབ་པ་ཞིག་ཡོང་བ་ཡིན། ཁ་བཤད་ལག་ལེན་མི་མཚུངས་པ་ཞིག་བྱས་ཚེ་སྐྱིད་པོ་གང་ཡང་མེད། དེས་ན། གཞན་ལ་ཕན་པ་སྒྲུབ་པའི་བསམ་པ་བཅངས་ཏེ་མི་ཚེ་བཟང་པོ་སྐྱེལ་ནུས་པ་ཞིག་བྱུང་ན་རང་གི་བདེ་སྐྱིད་ཞར་ལ་འགྲུབ་ནུས་པ་དང་ཚེ་རབས་ཕྱི་མ་རྣམས་སུ་ཡང་ཕན་བདེ་འབྱུང་ངེས་པ་ཡིན། རང་གཅིག་པུའི་དོན་བསམས་ཏེ་གནས་པས་ཚེ་འདི་ལ་མི་སྐྱིད་པ་ཙམ་དུ་མ་ཟད་ཚེ་རབས་ཕྱི་མ་རྣམས་སུ་ཡང་ཕན་རྒྱུ་ཤིན་ཏུ་དཀའ། 

(ཕྱི་ལོ་ ༢༠༠༨ ཟླ་ ༡ ཚེས་ ༩ ནས་ཚེས་ ༡༣ བར་ཉིན་གྲངས་ལྔའི་རིང་མོན་གྷོ་འབྲས་སྤུངས་བློ་གསལ་གླིང་གི་འདུ་ཁང་གསར་པར་འཇིགས་བྱེད་ལྷ་བཅུ་གསུམ་མའི་བཀའ་དབང་གནང་སྐབས་ཀྱི་བཀའ་ཁྲིད་ལས་བཏུས།)

དུས་དེ་རིང་ནས་བཟུང་སྟེ། འགྲོ་འཆག་ཉལ་འདུག་དང་། རྐྱེན་བཟང་ངན། ཡུལ་མཐའ་དབུས་སོགས་གང་གི་སྐབས་སུ་ཡང་སེམས་བཟང་པོ་དང་མི་འབྲལ་བར་བྱེད་དགོས་པ་ཡིན། ཡུད་ཙམ་ཡུད་ཙམ་རླུང་ལང་བ་དང་རྒྱག་རེས་རྒྱག་པའི་སྐབས་ཡོང་ཡང་བསམ་ངན་བཅངས་ཏེ།  གཞན་ལ་ལྟད་མོ་ལྟོས་ཨ་སྙམ་པ་ལྟ་བུའི་སྒོ་ནས་གཞན་ལ་བརྩེ་བ་བོར་བ་གཏན་ནས་མི་འགྲིག །ཐ་ན་ཞིང་བཅུ་ཚང་བའི་དགྲ་བོར་མཚོན་ནའང་ཞེ་ཐག་པ་ནས་བརྩེ་བ་བོར་བ་ནམ་ཡང་མི་རུང་བ་ཡིན། གཞན་ལ་ཞེ་ཐག་པ་ནས་སེམས་ངན་འཆང་བ་དེས་རང་མི་སྐྱིད་པར་བྱེད་པ་ལས་གཞན་གྱི་ཕན་ཡོན་གང་ཡང་མེད། 

ལས་ངན་གསོག་མཁན་དང་དེའི་བྱ་བ་གཉིས་ལ་དབྱེ་བ་ཕྱེས་ཏེ།  ལས་ངན་དང་ནོར་འཁྲུལ་ལ་མཐའ་གཅིག་ཏུ་ངོ་རྒོལ་བྱས་ཏེ་དགག་པ་བརྒྱག་དགོས་ཀྱང་། ལས་ངན་གསོག་མཁན་གྱི་གང་ཟག་ལ་སྙིང་རྗེ་བསྒོམ་དགོས། དཔེར་ན། ཞིང་བཅུ་ཚང་བའི་དགྲ་བོ་ལྟ་བུར་མཚོན་ནའང་བསྟན་པ་ལ་གནོད་པ་ལ་སོགས་པའི་ལས་ངན་ལ་ངོ་རྒོལ་བྱས་ཏེ་དགག་པ་བརྒྱག་དགོས་ཀྱང་། བྱེད་པ་པོ་གང་ཟག་དེ་ཉིད་སྙིང་རྗེའི་ཡུལ་ལས་ནམ་ཡང་མི་འདོར་བར་བརྩེ་བའི་བསམ་པ་བཅང་དགོས་པ་ཤིན་ཏུ་གལ་ཆེན་པོ་ཡིན། 

ཡེ་ཤུའི་ཆོས་ནས་ཀྱང་སྡིག་པ་ Sin དང་སྡིག་པ་གསོག་མཁན་ Sinner གཉིས་ལ་དབྱེ་འབྱེད་བྱེད་ཀྱི་ཡོད། འདི་གོང་དུ་བཤད་པ་དང་གཅིག་མཚུངས་ཡིན། ནོར་འཁྲུལ་བྱེད་མཁན་གྱི་གང་ཟག་ལ་སྡང་བའི་སེམས་དང་གནོད་པའི་སེམས། མི་དགའ་བའི་བསམ་པ་འཆང་མི་རུང་བར་གང་ཟག་དེས།  ལས་ངན་དེ་རྨོངས་པའི་གཞན་དབང་དུ་སོང་བའི་སྒོ་ནས་ནོར་འཁྲུལ་གྱི་བྱ་བ་བསྒྲུབས་པར་སྙིང་རྗེ་དང་བརྩེ་བ་བཅངས་ཏེ་སྨོན་ལམ་བརྒྱག་དགོས། འོན་ཀྱང་ནོར་འཁྲུལ་གྱི་བྱ་བ་དེར་དགག་པ་བརྒྱག་དགོས་པ་ཡིན། 

(ཕྱི་ལོ་ ༢༠༠༨ ཟླ་ ༡ ཚེས་ ༩ ནས་ཚེས་ ༡༣ བར་ཉིན་གྲངས་ལྔའི་རིང་མོན་གྷོ་འབྲས་སྤུངས་བློ་གསལ་གླིང་གི་འདུ་ཁང་གསར་པར་འཇིགས་བྱེད་ལྷ་བཅུ་གསུམ་མའི་བཀའ་དབང་གནང་སྐབས་ཀྱི་བཀའ་ཁྲིད་ལས་བཏུས།)

སངས་རྒྱས་པའི་ཆོས་ཚུལ་གྱི་བསླབ་བྱའི་སྙིང་པོ་འཚེ་བ་མེད་པ་དེ་རེད། འཚེ་བ་མེད་པ་ཞེས་པ་འཚེ་བ་མི་བྱེད་པ་ཙམ་དང་། འཚེ་བ་མེད་པ་ཙམ་ལ་འཚེ་བ་མེད་པ་ཟེར་བ་མིན་སྙམ། འཚེ་བ་བྱས་ན་མི་རུང་བ་དང་། བརྩེ་བར་རིགས་པ་དང་། སྡང་བ་བྱེད་མི་རིགས་པ་སོགས་ཀྱི་རྒྱུ་མཚན་མཐོང་བ་དང་། རྒྱུ་མཚན་དེའི་ཐོག་ནས་ཀུན་སློང་གི་ཁྱད་པར་དང་འབྲེལ་ནས་ཤེས་བཞིན་དུ་འཚེ་བ་མི་བྱེད་པ་ལ་འཚེ་བ་མེད་པ་ཞེས་བརྗོད་པ་རེད། དེས་ན་འཚེ་བ་མེད་པའི་སྤྱོད་པ་ཞེས་པ་ནི་རྩ་བ་བྱམས་བརྩེ་དང་འབྲེལ་བ་ཞིག་ཡིན་པ་ཧ་ཅང་གསལ་པོ་རེད། དེ་ལྟ་བུའི་ཆོས་ཀྱི་བསླབ་བྱ་དེ་འཛམ་གླིང་འདིའི་ནང་གི་ཆོས་ཁས་ལེན་མིན་ལ་མ་ལྟོས་པར་འགྲོ་བ་མི་སྨོས་ཅི། སྲོག་ཆགས་དུད་འགྲོ་ཚུན་ཆད་ལ་ཕན་ཐོགས་ཡོད་པ་ཞིག་ཏུ་གྱུར་ཡོད། མདོར་ན། སྤྱོད་པ་འཚེ་བ་མེད་པ་དེ་འཛམ་བུའི་གླིང་འདིའི་དངོས་ཡོད་གནས་ཚུལ་ལ་དགོས་མཁོ་ཡོད་པ་ཞིག་ཡིན། སྤྱོད་པ་འཚེ་བ་མེད་པ་བྱེད་དགོས་པ་དེ་ལྟ་བ་རྟེན་འབྱུང་ལ་ཐུག་ཡོད། རང་གི་བདེ་སྡུག་རང་ཁོ་ནའི་སྟེང་ནས་སྒྲུབ་ཐུབ་པ་ཞིག་དང་རང་དབང་གི་སྒོ་ནས་སྒྲུབ་ཐུབ་པ་ཞིག་ཡིན་ན་གཞན་ལ་ལྟོས་དགོས་པ་མེད་ཀྱང་དེ་ལྟར་མིན། འཛམ་གླིང་སྟེང་གི་ཡུལ་ཚོ་ཡིན་ན་སྨོས་ཅི་དགོས་ཏེ། སྒེར་སོ་སོ་ཡིན་ནའང་རང་གི་མ་འོངས་པའི་བདེ་སྡུག་གཞན་ལ་ལྟོས་ཚབས་ཆེན་པོ་ཡིན་པ་ང་ཚོ་ཚང་མས་མིག་མཐོང་ལག་ཟིན་རེད། བློ་སྦྱོང་རྣམས་ལས་རང་གཅེས་པར་འཛིན་པ་ཉེས་པ་ཀུན་གྱི་གཞི་དང་། གཞན་གཅེས་པར་འཛིན་པ་བདེ་སྐྱིད་ཀུན་གྱི་རྩ་བ་ཡིན་པར་གསུངས་པ་དེ་དངོས་ཡོད་གནས་ཚུལ་དུ་གྱུར་ཡོད། རང་ཉིད་བདེ་བར་འདོད་ན་དེའི་ཐབས་སུ་གཞན་ལ་ཕན་འདོགས་དགོས་པ་གསལ་པོ་རེད། གཞན་ལ་གནོད་པ་བྱས་ན་རང་ལ་སྡུག་བསྔལ་ཡོང་བ་དང་། གཞན་ལ་ཕན་བཏགས་ན་རང་ལ་བདེ་སྐྱིད་ཡོང་བས། འཚེ་བ་བྱེད་མི་རུང་བ་གསལ་པོ་ཆགས་པ་རེད།

དེས་ན་རྟེན་འབྱུང་གི་ལྟ་བ་དེ་དངོས་ཡོད་གནས་ཚུལ་རླབས་ཆེན་པོ་དང་མཐོང་ཆོས་ལ་ར་འཕྲོད་རྒྱུ་ཡོད། ད་དུང་ཟབ་ཏུ་བཏང་ནས་ལྟོས་ནས་གྲུབ་པ་དང་། བརྟེན་ནས་བཏགས་པ་ཞེས་བརྗོད་ཚེ་དེང་སང་ཚན་རིག་གི་སྡེ་ཚན་གལ་ཆེ་བ་(physics) ཡི་ནང་དུ་དངོས་པོའི་རྣམ་གཞག་ཕྲ་མོ་བཤད་ཡོད་པ་དང་དེའི་ཆེད་ལས་པ་རེ་ཟུང་གིས་ཚན་རིག་པའི་དངོས་པོའི་གནས་ཚུལ་གཏན་ལ་ཕབ་པའི་ལྟ་བ་ཕྲ་མོའི་ཐོག་ནས་བཤད་ན་དངོས་ཡོད་བདེན་པ་ཞིག་མེད་པར་གཙོ་བོ་སེམས་ཀྱིས་བཏགས་པ་དང་། ལྟོས་པའི་སྒོ་ནས་ཡོད་ཙམ་གྱི་ངོ་བོ་ཞིག་ཏུ་འཇོག་པ་ལས་བདེན་པའི་ངོ་བོ་ཞིག་འཇོག་རྒྱུ་ཡོད་པ་མ་རེེད་ཅེས་བཤད་འདུག །བརྟེན་ནས་བཏགས་པའི་རྟེན་འབྱུང་ཞེས་པ་ཁོང་ཚོས་བཤད་མི་ཤེས་པའམ་མི་བཤད་ཀྱང་བཏགས་དོན་བཙལ་ནས་རང་ཚུགས་ཐུབ་པའི་ངོ་བོ་རྙེད་རྒྱུ་མེད་པ་བཤད་ཡོང་གིན་འདུག །

ཕྱི་ལོ་༡༩༩༤ ཟླ་༡༠ ཚེས་༣༡ ནས་སེ་རར་གནང་བའི་དབུ་མ་དགོངས་པ་རབ་གསལ་གྱི་བཀའ་ཁྲིད་ལས་བཏུས།

སྟོང་ཉིད་ཀྱི་ལྟ་བའམ་རྟེན་འབྱུང་གི་དེ་ཁོ་ན་ཉིད་ཕྲ་མོའི་སྐོར་གསུངས་པའི་ཚེ་སློབ་དཔོན་ལེགས་ལྡན་འབྱེད་ལ་སོགས་པའི་ཐུགས་ལ་ཡང་ཅུང་ཟད་མི་ཤོང་བ་བྱུང་ཡོད་པས་རྩོད་པའི་གཞིར་གྱུར་པའི་སྐབས་དང་བཅས་ཤིང་། ལྷག་པར་ཡོངས་གྲགས་ཐོགས་མེད་སྐུ་མཆེད་ལ་སོགས་པའི་ཐུགས་ལ་མི་ཤོང་བའི་ཚུལ་མཛད་ཡོད། སྤྱིར་ཐོགས་མེད་ཀྱིས་སེམས་ཙམ་པའི་ལུགས་གསུངས་པ་གསུང་བ་པོའི་དགོངས་པ་མིན་པར་གདུལ་བྱའི་ངོ་དང་བསྟུན་པ་ཡིན་གསུངས་མོད། གང་ལྟར་ལྟ་བའི་སྐོར་མཐུན་མི་མཐུན་གྱི་སྐབས་ཡོད་ཅིང་རྩོད་པའི་གཞི་དང་བཅས་པ་ཡིན། འོན་ཀྱང་རང་ལས་གཞན་གཅེས་པར་འཛིན་པའི་བློ་ལ་རྩོད་པའི་གཞི་གང་ཡང་མེད། ཀླད་པ་དེ་ཙམ་མེད་པའི་འབུ་སྲིན་གྱི་རིགས་རྣམས་མི་ཤེས་མོད། དེ་མིན་ཐ་ན་གང་ཡང་མི་ཤེས་ཤིང་གླེན་ཞིང་གཏི་མུག་པ། སྐྱབས་མེད་མགོན་མེད། དཔུང་གཉེན་དང་བྲལ་བའི་ཁྱི་དང་བོང་བུ། བྱ་དང་རི་དྭགས། འབུ་སྲིན་ལ་སོགས་པའི་དུད་འགྲོ་ཚུན་ཚད་ཀྱིས་ཀྱང་ཕན་པའི་སེམས་ལ་དགའ་མོས་བྱེད་ཀྱི་ཡོད། དབང་སྡུད་དབང་སྡུད་ཅེས་པ་ཡང་འདི་འདྲ་ཞིག་ལ་བསམ་བློ་གཏོང་དགོས་པ་ཡིན། རང་རྒྱུད་ལ་ཞེ་སྡང་གི་མེ་འབར། ཐེ་ཚོམ་དང་རེ་དོགས་ལུ་གུ་རྒྱུད་དུ་བཅིངས་ཏེ་དབང་སྡུད་ཀྱི་ལྷ་བསྒྲུབས་ནས་སྲིད་གསུམ་དབང་དུ་བསྡུ་རྒྱུ་ཡིན་ཟེར་བ་ཡོང་རྒྱུ་མེད་པ་ཞིག་ཡིན། ཐོག་མར་རང་གི་སེམས་དབང་དུ་བསྡུས་ན་དབང་སྡུད་ཞར་ལ་ཡོང་ཐུབ། 

ལོ་ཧ་ཅང་མང་པོའི་སྔོན་ངོས་ཀྱིས་ཀུ་རུ་ཀུལླེའི་བསྙེན་པ་ཞིག་བཏང་སྟེ་སྔགས་གང་འཚམ་བསགས་པ་ཡིན། སྐབས་དེར་ཡོངས་འཛིན་རིན་པོ་ཆེ་ཀ་ལི་ཀ་ཏའམ་རྡོ་རྗེ་གདན་གང་རུང་ཞིག་ཏུ་བཞུགས་ཡོད་པར་ངོས་ཀྱིས་ཀུ་རུ་ཀུལླེའི་བསྙེན་པ་ཞིག་གཏོང་གི་ཡོད། གཞན་དབང་དུ་བསྡུ་རྒྱུའི་བསམ་བློ་གང་ཡང་གཏོང་གི་མེད། ངོས་རང་གི་སེམས་དབང་དུ་བསྡུ་རྒྱུའི་སྐྱབས་འཇུག་གནང་རོགས་ཞེས་ཕྱག་བྲིས་ཕུལ་བ་ཞིག་དྲན་གྱི་འདུག །རང་སེམས་དབང་དུ་བསྡུ་རྒྱུ་གལ་ཆེན་པོ་རེད། 

(ཕྱི་ལོ་ ༢༠༠༨ ཟླ་ ༡ ཚེས་ ༩ ནས་ཚེས་ ༡༣ བར་ཉིན་གྲངས་ལྔའི་རིང་མོན་གྷོ་འབྲས་སྤུངས་བློ་གསལ་གླིང་གི་འདུ་ཁང་གསར་པར་འཇིགས་བྱེད་ལྷ་བཅུ་གསུམ་མའི་བཀའ་དབང་གནང་སྐབས་ཀྱི་བཀའ་ཁྲིད་ལས་བཏུས།)

ང་ཚོ་འཆི་བདག་གི་ཉེ་འགྲམ་དུ་འགྲོ་སྐབས། རང་ཉིད་ལ་འགྱོད་གདུང་མེད་པའི་ཁག་ཐག་བྱེད་པར་ང་ཚོས་ད་ལྟ་ནས་གཞན་ལ་སྙིང་རྗེ་དང་རང་གི་བྱ་སྤྱོད་ལ་འགན་ཁུར་དགོས། དོན་དངོས་སུ་བརྗོད་ན། དེ་ལྟར་བྱེད་པ་ནི་སོ་སོའི་ཁེ་ཕན་ཞིག་ཀྱང་ཡིན་ལ། འདི་ནི་འབྱུང་འགྱུར་རང་ལ་ཕན་པའི་རྒྱུ་མཚན་གཅིག་པུས་མིན་ཞིང༌། ང་ཚོས་མཐོང་གསལ་ལྟར་སྙིང་རྗེས་ང་ཚོའི་མི་ཚེ་ལ་དོན་སྙིང་སྦྱིན་གྱི་ཡོད། སྙིང་རྗེ་ནི་ཡུན་དུ་བརྟན་པའི་དགའ་བདེའི་འབྱུང་ཁུངས་དང༌། གཞན་སེམས་སློང་བའི་གཞི་མའང་ཡིན། བདེན་པ་དང༌། དྲང་བདེན། གཡོ་སྒྱུ་མེད་པ། བྱམས་བརྩེ་སོགས་གཞན་གྱི་ཕྱོགས་ལ་བསྐྱེད་ན། ང་ཚོས་རང་ཉིད་ཀྱི་ཁེ་ཕན་སྲུང་གི་ཡོད། འདི་ནི་གཞུང་ལུགས་ཀྱི་རྙོག་འཛིང་གི་གནད་དོན་ཞིག་མ་ཡིན་པར། སྤྱིར་བཏང་གི་གོ་ཤེས་ཀྱི་གནད་དོན་ཞིག་ཡིན། གཞན་དག་གི་བདེ་སྡུག་ཁུར་དུ་ལེན་པའི་གཞན་སེམས་ནི། རིན་ཐང་ལྡན་པ་རང་སྟོབས་ཀྱིས་གྲུབ་ཡོད་པ་དང༌། ང་ཚོའི་བདེ་སྡུག་ནི་གཞན་གྱི་བདེ་སྡུག་དང་འབྲལ་ཐབས་མེད་པར་འབྲེལ་ཡོད་པ་ཁས་མི་ལེན་རང་ལེན་ཡིན། སྤྱི་ཚོགས་ཀྱིས་སྡུག་བསྔལ་མྱངས་ན། ང་ཚོས་ཀྱང་སྡུག་བསྔལ་མྱོང་དགོས་པ་ཡིན། ང་ཚོའི་བློ་ལ་ཉོན་མོངས་ཀྱིས་ཅི་ཙམ་གདུང་ན། དེ་ཙམ་གྱིས་ང་ཚོས་སྡུག་བསྔལ་མྱོང་བའང་མངོན་གསལ་ཡིན་ཕྱིར། ང་ཚོས་ཆོས་ལུགས་དང༌། གྲུབ་མཐའ། ཐུན་མོང་གིས་ཁས་ལེན་པའི་ཤེས་རབ་སོགས་ཐམས་ཅད་འདོར་རུང་ཡང༌། བྱམས་པ་དང་སྙིང་རྗེ་སོགས་མེད་དུ་མི་རུང་བའི་དངོས་ཡོད་གནས་ལུགས་ལས་ང་ཚོ་ཐར་ས་མེད་པ་ཡིན།

སྟོང་ལོ་གསར་བའི་ཀུན་སྤྱོད་ཀྱི་རྣམ་གཞག་ཅེས་པ་ལས་བཏུས།