སྐུའི་འཕྲོད་བཞེས་ལ་སེམས་འཚབ་མི་དགོས་པའི་བཀའ་ཕེབས་པ། 

མདུན་ངོས། / སྐུའི་འཕྲོད་བཞེས་ལ་སེམས་འཚབ་མི་དགོས་པའི་བཀའ་ཕེབས་པ། 

༄༅། །སྤྱི་ལོ་ ༢༠༡༩ ཟླ་ ༤ ཚེས་ ༡༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལིར་ཡོད་པའི་མེག་སུ་སྨན་ཁང་ནས་བཞུགས་གནས་མགྲོན་ཁང་(Sheraton Hotel) དུ་ཆིབས་བསྒྱུར་བསྐྱངས་ཡོད་པ་དང་། ཕེབས་ལམ་དུ་གསར་འགོད་པ་རྣམས་ལ་སྐུ་གཟུགས་གསལ་དྭངས་ཡིན་སྐོར་བཀའ་ལན་སྩལ་ཡོད་པ་རེད། 

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མགུལ་ཆམ་རྐྱེན་པས་སྙུང་གཞི་ཕྲན་བུ་བཞེས་ཏེ་ཟླ་འདིའི་ཕྱི་ཚེས་ ༩ ཉིན་གྱི་ཞོགས་པ་བཞུགས་སྒར་རྡ་རམ་ས་ལ་ནས་རྒྱ་གར་གྱི་རྒྱལ་ས་ལྡི་ལིར་༸སྐུའི་འཕྲོད་བཞེས་བརྟག་དཔྱད་སླད་ཆིབས་སྒྱུར་བསྐྱངས་ཡོད་པ་དང་། ཚེས་ ༡༢ ཉིན་སྨན་ཁང་ནས་ཆིབས་ཐོན་སྐབས་གསར་འགོད་པ་རྣམས་ལ་བཀའ་ལན་ཕེབས་དོན། 

ངོས་རང་ཏོག་ཙམ་མི་བདེ་བ་བྱུང་ནས་སྨན་ཁང་དུ་ཡོང་སྐབས་བོད་ཕྱི་ནང་གང་སར་གནས་པའི་བོད་རིགས་ཙམ་མིན་པར་ངོས་ལ་མོས་པ་བྱེད་མཁན་ཧ་ལམ་ས་ཡ་མང་པོས་སྨོན་ལམ་བརྒྱབ་པ་དེ་འདྲ་བྱས་འདུག ཚང་མར་ཐུགས་རྗེ་ཆེ་ཟེར་གྱི་ཡིན། ཐོག་མའི་རྐྱེན་རྩ་དེ་དེ་སྔོན་རྡོ་རྗེ་གདན་དུ་ཆམ་རིམས་ལྟ་བུ་ཞིག་བྱུང་ནས་མི་བདེ་བ་བྱུང་བ་རེད། དེ་མ་དྲག་པར་བསྡད་འདུག དེ་རིང་འདིར་གློག་པར་བརྒྱབ་པ་སོགས་ཞིབ་འཇུག་མཐིལ་ཕྱིན་པ་བྱེད་སྐབས་གློ་བར་གཉན་ཁ་ཕྲན་བུ་འདུག་ཟེར་བྱུང་། འོན་ཀྱང་ནད་ངོ་འཕྲོད་སྐབས་སྨན་བཅོས་དེ་དག་བྱས་ནས་ད་ཆ་རྒྱུན་ལྡན་ལྟ་བུ་ཞིག་ཆགས་ཡོད། ཧ་ཅང་ཡག་པོ་དྲག་འདུག ཁྱེད་རང་ཚོ་ཚང་མ་བློ་བདེ་པོ་བྱོས། ཁྱེད་ཚོ་ཚང་མས་སེམས་ཁུར་བླངས། སྨོན་ལམ་བརྒྱབ་བྱས་པ་དེར་ངོས་ཀྱིས་ཐུགས་རྗེ་ཆེ་ཟེར་གྱི་ཡིན། ཁྱེད་རང་ཚོས་དགེ་བ་བསགས་པ་དེ། འཇམ་དཔལ་དཔའ་བོས་ཇི་ལྟར་མཁྱེན་པ་དང་།། ཀུན་ཏུ་བཟང་པོ་དེ་ཡང་དེ་བཞིན་ཏེ།། དེ་དག་ཀུན་གྱི་རྗེས་སུ་བདག་སློབ་ཕྱིར།། དགེ་བ་དེ་དག་ཐམས་ཅད་རབ་ཏུ་བསྔོ།། ཞེས་གསུངས་པ་ལྟར་ངོས་ཀྱིས་བསྔོ་བ་བྱ་རྒྱུ་ཡིན། ངོས་ཀྱི་ལུས་བདེ་ཐང་དང་ཚེ་ལའང་ཁྱེད་རང་ཚོས་བསམ་པ་རྣམ་དག་གིས་སྨོན་ལམ་བརྒྱབ་པ་དེས་ཏན་ཏན་ཕན་ཐོགས་བྱུང་ཡོད། ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་གནང་ཡོད་པ་རེད།