བོད་པ་མང་པོ་ཞིག་གིས་ངོས་སྤྱན་རས་གཟིགས་སྐུ་ཤ་རློན་པ་རེད་ཟེར་གྱི་ཡོད།  

མདུན་ངོས། / བོད་པ་མང་པོ་ཞིག་གིས་ངོས་སྤྱན་རས་གཟིགས་སྐུ་ཤ་རློན་པ་རེད་ཟེར་གྱི་ཡོད།  



བོད་པ་མང་པོ་ཞིག་གིས་ངོས་སྤྱན་རས་གཟིགས་སྐུ་ཤ་རློན་པ་རེད་ཟེར་གྱི་ཡོད།  དེ་འདྲ་རང་ཡིན་མིན་གང་ཤེས།  དམིགས་བསལ་བོད་ནས་ཡོང་བའི་བོད་མི་ཚོས་༸རྒྱལ་བ་རིན་པོ་ཆེ་སྤྱན་རས་གཟིགས་ཀྱི་སྐུ་གསོན་པོར་རྩི་བཞིན་ཡོད།  སྔོན་མ་མོན་གྷོར་གཞིས་ཆགས་ཐོག་མར་ཚུགས་སྐབས་བལ་ཡུལ་ནས་རྒྱ་གར་ལ་ཐད་ཀར་ཡོང་བའི་གྲོང་གསེབ་པ་ཁག་ཅིག་ཡོད་པ་ངོས་རང་གཞིས་ཆགས་དེར་སླེབས་སྐབས་ཁོང་ཚོ་ཁ་ཤས་ཀྱིས་ཨ་ཙི་སྤྱན་རས་གཟིགས་གོམ་པ་བསྐྱོན་ནས་ཕེབས་ཀྱི་འདུག་ཅེས་ཤོད་ཀྱི་ཡོད།  (བཞད་མོ་བཞད།)  སྤྱན་རས་གཟིགས་ཞུ་བ་མཆོད་བཤོམས་ནང་བཞུགས་མཁན་གྱི་བསམ་བློ་འཁོར་གྱི་ཡོད་པ་རེད།  གང་ལྟར་ངོས་སྤྱན་རས་གཟིགས་ཡིན་མིན་མི་ཤེས་ཏེ།  འཕགས་པ་སྤྱན་རས་གཟིགས་དང་འབྲེལ་བ་ཤུགས་ཆེན་པོ་ཞིག་ཡོད།  དེ་ནི་ཆོས་རྒྱལ་སྲོང་བཙན་སྒམ་པོ་དང་།  ལྷག་པར་ཁྲི་སྲོང་ལྡེའུ་བཙན་གྱི་སྐབས་ངོས་དང་དམིགས་བསལ་འབྲེལ་བ་ཡོད་པའི་ཚོར་བ་ཤུགས་ཆེན་པོ་ཞིག་ཡོང་གི་འདུག །ལོ་ཤས་གོང་མཚོ་པདྨར་སླེབས་སྐབས་ཚོར་བ་ཧ་ཅང་ཤུགས་ཆེན་པོ་ཞིག་བྱུང་།  སློབ་དཔོན་རིན་པོ་ཆེ་དང་། ཁྲི་སྲོང་ལྡེའུ་བཙན།  མཁན་ཆེན་བྷོ་དྷི་སཏྭ་བཅས་མཁན་སློབ་ཆོས་གསུམ་དང་འབྲེལ་བ་ཐུན་མོང་མིན་པ་ཞིག་ཡོད་པ་ཧ་ཅང་གསལ་པོ་རེད།  སྐབས་དེར་ངོས་རང་ཚོར་བ་ཤུགས་ཆེ་སྐྱེས་ནས་མིག་ཆུ་ཤོར་བྱུང་། 


ཕྱི་ལོ་༢༠༡༨ ཟླ་༥ ཚེས་༢ ཉིན་བཞུགས་སྒར་ཕོ་བྲང་དུ་སྲི་ཞུའི་ལས་བྱེད་བགྲེས་ཡོལ་དུ་ཕེབས་མཁན་དང་བཀའ་བློན་ལས་ཟུར་སོགས་ལ་སྩལ་པ་ལས་བཏུས།