དུད་འགྲོ་རྣམས་ལ་རང་གི་རིགས་མཐུན་ཙམ་ལས་སེམས་ཅན་ལ་བརྩེ་བའི་བསམ་པ་སྤེལ་པའི་ནུས་པ་མེད།

མདུན་ངོས། / དུད་འགྲོ་རྣམས་ལ་རང་གི་རིགས་མཐུན་ཙམ་ལས་སེམས་ཅན་ལ་བརྩེ་བའི་བསམ་པ་སྤེལ་པའི་ནུས་པ་མེད།

སྡུག་ས་ནས་བཤད་ན་མི་ནི་བསམ་རྒྱུ་དྲན་རྒྱུ་མང་བའི་རྐྱེན་གྱིས་རང་གཞན་གཉིས་ཀར་བདེ་སྐྱིད་མེད་པ་བཟོ་མཁན་ཞིག་ཏུ་གྱུར་ཡོད།  དུད་འགྲོ་རྣམས་བློ་སྣ་ཐུང་བའི་རྐྱེན་གྱིས་འཁྲིག་དུས་ལྟ་བུར་ལྷོད་པོ་མེད་ཙམ་ལས་གཞན་གནས་སྐབས་བཀྲེས་སྐོམ་གྱི་སྡུག་བསྔལ་མངོན་གསལ་མེད་ན་ལྷོད་པོར་འདུག་ཅིང་།  མི་ནི་དེ་ལས་ལྡོག་སྟེ།  རེ་དོགས་ལུ་གུ་རྒྱུད་ཀྱིས་བཅིངས་ནས་མི་ཚེ་སྐྱེལ་གྱིན་ཡོད། ཡང་ཕྱོགས་གཞན་ནས་མིའི་རྣམ་དཔྱོད་དེ་ལྷག་བསམ་གྱི་རྒྱབ་རྟེན་ཡོད་པའི་ཐོག་ནས་ལམ་ཡང་དག་པ་ཞིག་ལ་བེད་སྤྱོད་གཏོང་ཐུབ་ན་རང་གཞན་ལ་ཕན་པ་ཆེ།  སྦྲང་རྩི་གསོག་པའི་སྦྲང་མ་ལྟ་བུ་དུད་འགྲོའི་རིགས་དག་ལ་རྩ་ཁྲིམས་དང་ཆོས་མེད་ལ།  ཆེད་དུ་བཟོས་པའི་སྒྲིག་འཛུགས་ཀྱང་མེད་མོད།  དེ་དག་ནི་དུ་མ་ཚོགས་པའི་སྟེང་ནས་འཚོ་དགོས་སྟབས་རང་གི་ངང་གིས་ལུས་ཀྱི་གནས་སྟངས་ཀྱི་དབང་གིས་མཉམ་རུབ་ཀྱི་འདུ་ཤེས་ཤུགས་ཆེན་པོ་ཡོད།  དེའི་ཕྱིར་དུད་འགྲོའི་རིགས་ལ་ཕན་ཚུན་བརྩེ་བ་དང་རོགས་བྱེད་པ་ཡོད་ཀྱང་།  རང་རང་གི་རིགས་མཐུན་ཙམ་ལས་དེ་ལས་རྒྱ་ཆེ་བའི་སེམས་ཅན་ལ་བརྩེ་བའི་བསམ་པ་སྤེལ་པའི་ནུས་པ་མེད།  མི་ལ་ནི་རྣམ་དཔྱོད་ཀྱི་གྲོགས་དང་བཅས་ཏེ་བརྩེ་སེམས་གོམས་པ་མཐའ་མེད་དུ་སྤེལ་བའི་ནུས་པ་ཡོད་པས།  དེ་ནི་མིའི་ཡོན་ཏན་ཐུན་མོང་མ་ཡིན་པ་ཞིག་རེད་སྙམ།  ཚེ་གཅིག་ལ་འཚོ་བ་ཙམ་ནི་དུད་འགྲོས་ཀྱང་བྱེད་ཐུབ་ཅིང་།  ཆོས་ཁས་ལེན་མིན་ཇི་ལྟར་ཡང་སྡུག་བསྔལ་གྱིས་མནར་བའི་སེམས་ཅན་གྲོག་མ་ཚུན་ཆད་ལ་སྙིང་རྗེའི་བསམ་པའི་བརྩེ་བ་སྐྱེ་ཐུབ་པ་དང་།  སྐྱེས་ནས་དེས་དྲངས་པའི་ལུས་ངག་ཡིད་གསུམ་གྱི་སྒོ་ནས་གཞན་ལ་ཕན་བདེ་བསྒྲུབ་པ་མི་ལས་གཞན་སུས་ཀྱང་བྱེད་མི་ཐུབ།
           

                     
 (༡༩༩༧ ཟླ་༡༢  པའི་ནང་སེར་བྱེས་སུ་སྟོང་ཐུན་བཀའ་ཁྲིད་གནང་བ་ལས་བཏུས།  )