ཤེས་ཡོན་དང་བྱམས་བརྩེས་ཕྱུག་པའི་འཛམ་གླིང་ཞིག་ཡོང་ཐུབ་པའི་རེ་བ་བྱེད་དགོས།

མདུན་ངོས། / ཤེས་ཡོན་དང་བྱམས་བརྩེས་ཕྱུག་པའི་འཛམ་གླིང་ཞིག་ཡོང་ཐུབ་པའི་རེ་བ་བྱེད་དགོས།

བྱམས་བརྩེ་དང་ཡ་རབས་ཀྱི་བསམ་བློ་ཡོད་པའི་ཐོག་ནས་སློབ་སྦྱོང་བྱེད་ཐུབ་པ་ཞིག་བྱུང་ན་གོང་དུ་བཤད་པ་ལྟར་ཤེས་ཡོན་ལྡན་ལ་བྱམས་བརྩེ་ཡང་ལྡན་པའི་སྤྱི་ཚོགས་ཤིག་ཡོང་ཐུབ་ངེས་རེད། ཤེས་ཡོན་ཡོད་ཀྱང་བྱམས་བརྩེ་མེད་ན་ཡ་རབས་སྤྱོད་བཟང་གི་སྤྱི་ཚོགས་ཤིག་ཡོང་མི་ཐུབ། མི་ལ་བསྒྱུར་བཅོས་བཏང་ནས་འཛམ་གླིང་ཐོག་ག་ལེར་འགྱུར་བ་བཟང་ཕྱོགས་སུ་ཐེབས་ཐུབ་པར་ང་ཚོས་རེ་བ་བརྒྱག་དགོས།  དཔེར་ན། ད་ལྟ་ཕར་ཙམ་དེར་དམག་འཁྲུག་བརྒྱབ་ནས་མི་བརྒྱ་ཕྲག་གསོད་རེས་གཏོང་བ་དེ་དག་དེ་འདྲའི་ཐབས་རྡུགས་པ་ལ་ཨང་ཞེས་བཤད་པ་ཙམ་གྱིས་མི་ཕན།  དེ་ཐབས་རྡུགས་ཡིན་པ་ང་ཚོས་ཤེས་ཀྱི་ཡོད་ན་མ་འོངས་པར་དེ་འདྲ་ཞིག་མི་ཡོང་བ་བྱ་རྒྱུ་ཡིན་བསམ་པ་ཞིག་དང་།  བདེ་སྐྱིད་ལྡན་པའི་སྤྱི་ཚོགས་ཤིག་ཇི་ལྟར་བཟོ་དགོས་པའི་ཐད་བསམ་བློ་གཏང་རྒྱུ་དེ་གལ་ཆེན་པོ་རེད།  དེ་ཁྱེད་ཚོ་ཚང་མས་སེམས་ལ་ངེས་པར་གྱིས།  


བྱེ་བྲག་ཏུ་རང་རེ་བོད་ལ་མཚོན་ན།  སྤྱི་ཡོངས་ནས་བོད་མི་རིགས་ལ་སེམས་ཅན་ཞིག་འཆི་བཞིན་པ་མཐོང་ནའང། གང་དྲག  སྙིང་རྗེ་ཨང་ཟེར་བ་དང༌། འབུ་ཞིག་ཉེན་ཁ་ཡོད་སར་ཡོང་གི་ཡོད་ན་གང་ཐུབ་ཀྱིས་ཉེན་ཁ་མེད་ས་ཞིག་ལ་སྐྱེལ་བའི་གོམས་གཤིས་ཤིག་ཡོད། དེ་རྩ་ཆེན་པོ་རེད། ཁ་སྔོན་རྒྱ་གར་ལྷོ་ཕྱོགས་སུ་དུས་དབང་བསྐུར་སྐབས་རྒྱ་གར་བ་ཞིག་ཡོད། ངོས་དང་ངོ་ཤེས་སུ་གྱུར་པ་རེད། ཉིན་ཞིག་ཁོང་དང་མཉམ་ལམ་དུ་འགྲོ་བའི་སྐབས་ཤིག་ལམ་ཁའི་སྟེང་བབས་པའི་སྦྲང་བུ་ཞིག་རྒྱ་གར་བ་དེས་འཕྲལ་དུ་རྡོག་བརྫིས་བཏང་སོང་།  སྐབས་དེར་ངོས་རང་སྐད་ཤོར་བ་རེད། དེ་དུས་རྒྱ་གར་བ་དེས་མ་འོངས་པར་འབུ་གཏན་ནས་གསད་རྒྱུ་མིན་ཟེར།  ང་ཚོ་བོད་པའི་ལྷན་སྐྱེས་ཀྱི་གོམས་གཤིས་ནང་གཞན་གྱི་ཚེ་སྲོག་ལ་བརྩི་བཀུར་བྱེད་པའི་བསམ་བློ་ཞིག་ཡོད་པ་དེ་ཡག་པོ་རེད།  རྒྱ་རིགས་ནང་ཤ་མི་ཟ་མཁན་བསམ་པ་བཟང་པོ་དེ་འདྲ་འདུག   འོན་ཀྱང་སྤྱིར་བཏང་སེམས་ཅན་གསོད་པར་དོ་སྣང་དེ་ཙམ་མི་འདུག ཁྱེད་ཚོ་བོད་ནས་ཡོང་མཁན་ཚོས་ཤེས་ངེས་རེད།  དུད་འགྲོའི་ཚེ་སྲོག་ལ་ཡ་ང་བག་ཚ་མེད་པའི་མི་དེ་དག་རིམ་བཞིན་མིའི་ཚེ་སྲོག་ལའང་ཡ་ང་བག་ཚ་མེད་མཁན་ཞིག་ཏུ་འགྱུར་བཞིན་ཡོད། 

ཕྱི་ལོ་ ༢༠༠༦ ཟླ་ ༤ ཚེས་ ༤ ཉིན་རྡ་སྟེང་བོད་ཁྱིམ་དུ་ཞི་བདེའི་ལྷན་ཚོགས་ཐོག་སྩལ་པའི་བཀའ་སློབ་ལས་བཏུས།