འཚེ་བ་མེད་པ་དང་འཚེ་བ་ཞེས་པ་དེ་མིའི་རྣམ་དཔྱོད་ཁོ་ན་དང་འབྲེལ་ནས་ཡོང་བ་ཡིན།

མདུན་ངོས། / འཚེ་བ་མེད་པ་དང་འཚེ་བ་ཞེས་པ་དེ་མིའི་རྣམ་དཔྱོད་ཁོ་ན་དང་འབྲེལ་ནས་ཡོང་བ་ཡིན།

དེང་སང་རྒྱ་ནག་ལ་མཚོན་ནའང་རྙོག་དྲ་དང་དཀའ་ངལ་ཆེན་པོ་ཡོད། རང་རེ་བོད་པའི་ཁྲོད་དུ་ཇི་ཙམ་མི་འདུག་ཟེར་ནའང་ལྷན་སྐྱེས་ཀྱི་གོམས་གཤིས་ནང་བྱམས་བརྩེ་ཟེར་བ་ཞིག་ཡོད་པ་དེའི་དབང་གིས་སྤྱི་ཚོགས་ནང་ཕྲན་བུའི་ཞི་བདེ་ཆེ་བ་ཡོད་པ་ལྟ་བུ་ཞིག་ཕལ་ཆེར་རེད། རྒྱ་མི་ཤེས་ཡོན་ཅན་འགའ་ཞིག་གིས་བོད་པའི་སྤྱི་ཚོགས་ནང་ཇི་ཙམ་གྱིས་གདུག་རྩུབ་ཆེ་བའི་མི་ཞིག་ཡིན་ནའང་ཆོས་ཀྱི་བསླབ་བྱ་དང༌། སྤྱི་ཚོགས་ཀྱི་མིག་ལྟོས་བཟང་པོའི་འོག་ནས་མི་གཞན་ལ་ལྟོས་ཏེ།   ཕྲན་བུའི་བཟང་བ་དང་ཞི་བདེ་ཆེ་བ་ཞིག་འདུག་ཅེས་རྗོད་ཀྱི་འདུག རྒྱ་རིགས་རྩོམ་པ་པོ་འགའ་ཞིག་གིས་དེ་ལྟར་བྲིས་པའི་རྩོམ་ཡིག་དེ་འདྲ་ཡང་ཡོད། སྤྱིར་བཏང་མིའི་སྤྱི་ཚོགས་སུ་དཀའ་ངལ་མང་པོ་ཞིག་ཡོང་བ་དེ་ཕུགས་རྒྱང་རིང་པོའི་བསམ་བློ་འཁོར་མ་ཐུབ་པའི་སྐྱོན་ཡིན།   རང་རེར་ལྷན་སྐྱེས་ཀྱི་བསམ་བློའི་ནང་རང་བཞིན་བཟང་པོ་ཞིག་ཡོད་པ་དེ་ཁ་ཕྱོགས་སྡུག་སར་མི་འགྲོ་བའི་ཆེད་དུ་སོ་སོའི་རྣམ་དཔྱོད་ཀྱིས་སྟངས་འཛིན་ཐུབ་པ་ཞིག་དགོས་ཤིང་། མིའི་རྣམ་དཔྱོད་དེ་ཕན་པ་དང་དོན་སྙིང་ལྡན་པ་ཞིག་ཡོང་རྒྱུར་འབད་བརྩོན་བྱ་དགོས་པ་ཡིན། 


ཡ་ང་སྙིང་རྗེ་མེད་པའི་ཐོག་ནས་གཞན་ལ་དཀའ་ངལ་དང་རྙོག་དྲ་བཟོ་བ་དེ་འཚེ་བ་ཡིན། འཚེ་བས་ཞི་བདེ་བག་ཕེབས་ཀྱི་ཁོར་ཡུག་མེད་པར་བཟོ་བཞིན་ཡོད། སྤྱིར་བཏང་བཤད་ན་འཚེ་བའི་བསམ་བློ་འཁོར་བའི་སྐབས་སུ་མི་གསོད་པ་དང་ཉེས་རྡུང་གཏོང་བ་ལྟ་བུ་ཡོང་གི་ཡོད་པ་མ་གཏོགས་བྱམས་པ་དང་བརྩེ་བ། ཕན་པའི་བསམ་པ་ཡོད་བཞིན་དུ་འཚེ་བ་མི་འབྱུང་བས།  འཚེ་བ་ཞེས་པ་དེ་རྩ་བ་སེམས་ལ་ཐུག་ཡོད། སྤྱི་ཚོགས་ཀྱི་རྙོག་དྲ་དང་དཀའ་ངལ་སེལ་ཐབས་འཚེ་བའི་ཐབས་ལམ་ལ་མི་བརྟེན་པར་འཚེ་བ་མེད་པའི་ལམ་ལ་ཕྱིན་པ་ཡིན་ན་ཞི་བདེ་ཞེས་པ་དེ་ཡོང་གི་ཡོད།

 ཕྱི་ལོ་ ༢༠༠༦ ཟླ་ ༤ ཚེས་ ༤ ཉིན་རྡ་སྟེང་བོད་ཁྱིམ་དུ་ཞི་བདེའི་ལྷན་ཚོགས་ཐོག་སྩལ་པའི་བཀའ་སློབ་ལས་བཏུས།