གང་དུ་བྱམས་བརྩེ་ཡོད་སའི་སྤྱི་ཚོགས་དེར་ཕལ་ཆེར་རྙོག་དྲ་དང་དཀའ་ངལ་ཆུང་བ་ཡོད།  

མདུན་ངོས། / གང་དུ་བྱམས་བརྩེ་ཡོད་སའི་སྤྱི་ཚོགས་དེར་ཕལ་ཆེར་རྙོག་དྲ་དང་དཀའ་ངལ་ཆུང་བ་ཡོད།  

ངོས་ཀྱིས་འདིར་ཤོད་དགོས་པ་ཞིག་ནི། དགོས་སར་ཆད། མི་དགོས་སར་དམག་འཁྲུག་བརྒྱག་རྒྱུ་ལྟ་བུའི་ཆེད་དུ་མེ་མདའ་དང༌མདེའུ་སོགས་མཚོན་ཆ་བཟོ་བ་དང་། དེ་བཞིན་དུ་ཐོབ་གོ་སའི་དབང་ཆ་ཉོ་བ་ལ་སོགས་པ་འགྲོ་སོང་མང་པོ་གཏོང་བཞིན་ཡོད། རྐྱེན་ཕྲན་བུ་ཞིག་བྱུང་མ་ཐག་འཕྲལ་དུ་མེ་མདའ་བཟུང་ནས་གསོད་རེས་གཏོང་བ་སོགས་མི་དགོས་སར་འབད་བརྩོན་བྱས་ཏེ་མི་བརྒྱ་ཕྲག་སྟོང་ཕྲག་རྐྱེན་འདས་སུ་འགྲོ་བའི་གནས་ཚུལ་ཞིག་ཡོང་གི་ཡོད། དགོས་ས་དཔེར་ན།  འབྱུང་བའི་གནོད་པ་ཡོང་བའི་སྐབས་སུ་སྔོན་འགོག་གིས་གདོང་ལེན་བྱེད་པ་ལྟ་བུའི་ལས་ཀ་དེ་དག་ལ་ལྷོད་གཡེང་དུ་བཏང་སྟེ་མཐའ་མར་དཀའ་ངལ་ཆེན་པོའི་ནང་ལྷུང་བའི་གནས་ཚུལ་ཡོང་གི་ཡོད།  རྙོག་དྲ་དེ་དག་མིས་བཟོས་པའི་རྙོག་དྲ་རེད། དཔེར་ན། གླང་ཆེན་དང༌སྟག་ལ་སོགས་པ་རང་རེ་མི་ལས་ཀྱང་ལུས་པོའི་ཆ་ནས་ཤུགས་ཆེ་བ་དང༌འབུ་རྐང་བརྒྱ་ལག་བརྒྱ་ལྟ་བུ་རྐང་ལག་མང་བ། བྱ་དེ་ལྟ་བུ་གཤོག་པ་ཡོད་པས་འཕུར་ཐུབ་པ་སོགས་ལུས་པོའི་ཆ་ནས་རང་ཅག་མི་རྣམས་ལས་སེམས་ཅན་དེ་དག་ནུས་པ་ཆེ་བ་ཡོད། འོན་ཀྱང་དུད་འགྲོའི་ཀླད་པ་ལས་མིའི་ཀླད་པ་ཤུགས་ཆེ་བ་ཡོད་སྟབས། བསམ་བློ་རྒྱ་ཆེན་པོ་འཁོར་ཐུབ་པའི་ཀླད་པ་འདིར་བརྟེན་ནས་རྙོག་དྲ་དང་དཀའ་ངལ་དེ་རྣམས་སློང་བཞིན་ཡོད། མི་རྣམས་ལ་རང་བཞིན་ལྷན་སྐྱེས་ཀྱི་ཚུལ་དུ་རྣམ་དཔྱོད་དང་བརྩེ་བ་སོགས་བཟང་པོའི་གཤིས་ཀ་ཞིག་ཡོད་ཅིང་། ཡང་རྙོག་དྲ་དང་དཀའ་ངལ་བཟོ་བའི་ནུས་པ་ཞིག་ཀྱང་ལྷན་སྐྱེས་སུ་ཡོད་པ་རེད། གང་དུ་བྱམས་པ་དང་བརྩེ་བའི་བསམ་པ་ཤུགས་ཆེ་བ་ཡོད་སའི་སྤྱི་ཚོགས་དེར་ཕལ་ཆེར་རྙོག་དྲ་དང་དཀའ་ངལ་ཆུང་བ་ཡོད་ཅིང་། ཁྱིམ་ཚང་ཞིག་ལ་མཚོན་ནའང་བྱམས་བརྩེའི་བསམ་པ་ཕྲན་བུའི་ཤུགས་ཆེ་བ་ཡོད་ས་དེར་རྙོག་དྲ་དང་དཀའ་ངལ་ཉུང་བ་ཡོད།  

ཕྱི་ལོ་ ༢༠༠༦ ཟླ་ ༤ ཚེས་ ༤ ཉིན་རྡ་སྟེང་བོད་ཁྱིམ་དུ་ཞི་བདེའི་ལྷན་ཚོགས་ཐོག་སྩལ་པའི་བཀའ་སློབ་ལས་བཏུས།