བརྡབ་གསིག་དང་རྙོག་དྲ་ཆེ་ཤོས་བཟོ་མཁན་དེ་མི་ཡིན།

མདུན་ངོས། / བརྡབ་གསིག་དང་རྙོག་དྲ་ཆེ་ཤོས་བཟོ་མཁན་དེ་མི་ཡིན།

སྲོག་ཆགས་ཀྱི་རིགས་གཞན་དག་ལ་མཚོན་ན་རང་བཞིན་འབྱུང་བའི་འཕོ་འགྱུར་གྱི་ཐོག་ནས་དཀའ་ངལ་འཕྲད་པ་དང༌། ཡང་ན་སྲོག་ཆགས་ནང་ཕན་ཚུན་གཅིག་ལ་གཅིག་འཚེ་བའི་དཀའ་ངལ་དང་རྙོག་དྲ་ཡོད་པ་དེ་ཙམ་ལས། ནང་བསམ་བློ་གཏོང་སྟངས་དང་འབྲེལ་ནས་མི་རྣམས་ལ་འཕྲད་པ་ལྟ་བུའི་རྙོག་དྲ་ཞིག་དུད་འགྲོའི་སྤྱི་ཚོགས་ནང་མེད། རང་རེ་མི་རྣམས་ལ་མཚོན་ན་སྡུག་བསྔལ་མི་འདོད་པ་དང༌བདེ་བ་འདོད་པ་ཞིག་ངང་གིས་ཡོད་ཅིང་། བདེ་ཞིང་སྐྱིད་པའི་ཐོག་ནས་འཚོ་བ་སྐྱེལ་འདོད་ཅིག་སུ་ལའང་ཡོད། འོན་ཀྱང་འཛམ་གླིང་འདིར་འགྲོ་བ་མི་བྱུང་བ་ནས་བཟུང་། བརྡབ་གསིག་དང་རྙོག་དྲ་ཆེ་ཤོས་བཟོ་མཁན་དེ་མི་ཡིན།  ཁྱེད་ཚོར་མཚོན་ནའང་སྐྱེས་པའི་ཉིན་མོ་ནས་བཟུང་རང་དབང་མེད་པར་དངངས་སྐྲག་དང༌ཞེད་སྣང་། དོགས་ཟོན་བྱ་དགོས་པའི་འགོ་ཚུགས་པ་རེད། ངོས་ལ་མཚོན་ན་ལོ་བཅོ་ལྔ་བཅུ་དྲུག་ནས་བཟུང་རྙོག་དྲའི་འགོ་ཚུགས་པ་རེད། ད་ལྟ་ལོ་བདུན་ཅུར་བརྒལ་ཡོད། རྙོག་དྲ་དེ་གའི་སྟེང་ནས་མི་ཚེ་བསྐྱལ་བ་རེད། རྙོག་དྲ་དེ་རྣམས་མིས་བཟོས་པའི་རྙོག་དྲ་རེད་མ་གཏོགས་འབྱུང་བ་འཁྲུགས་པའི་རྙོག་དྲ་ལྟ་བུ་ཞིག་མིན། རང་རེ་བོད་པའི་སྤྱི་ཚོགས་ནང་གཅིག་ལྟོས་དང༌། མིས་སྡོད་མ་ཚུགས་པའི་ཐོག་ནས་བཟོས་པའི་རྙོག་དྲ་ཧ་ཅང་མང་པོ་ཞིག་ཡོད། དགོས་ས་དེར་དོ་སྣང་མི་བྱེད་པར་མི་དགོས་ས་དེར་འབད་བརྩོན་བྱས་པའི་འབྲས་བུར་རྙོག་དྲའི་རིགས་ཧ་ཅང་མང་པོ་ཞིག་ཡོང་གི་ཡོད། འབྲེལ་ཡོད་ཚོས་གནས་སྟངས་དེའི་རིགས་ལ་དམིགས་བསལ་དོ་སྣང་བྱས་ཏེ་དཀའ་ངལ་ལ་སྔོན་འགོག་གི་ལས་ཀ་ཚགས་ཚུད་པོ་བྱ་རྒྱུ་གལ་ཆེན་པོ་ཡིན། 


དཔེར་ན། ཨ་ཕི་རི་ཀའི་ནང་གི་ཐན་པའི་དཀའ་ངལ་དང་། བྷང་ལ་དེ་ཤིའི་ཆུ་ལོག་གི་དཀའ་ངལ་ལ་སོགས་པ་འདི་དག་མིའི་ཐབས་ཤེས་ཀྱི་ཐོག་ནས་ཏན་ཏན་ཉེན་ཚབས་ཆུང་དུ་གཏོང་ཐུབ་པའི་རེ་བ་ཡོད། འབྱུང་བའི་གནོད་འཚེ་ནམ་ཡོང་ང་ཚོས་མི་ཤེས་པས།  དང་པོ་ནས་གནོད་པ་ཡོང་བའི་ཚོད་དཔག་བྱས་ཏེ་སྔོན་འགོག་གི་བསམ་བློ་བཏང་ནས་དེའི་ཐོག་འགྲོ་སོང་བཏང་བ་ཡིན་ན་ལེགས་པོ་ཡོད།

ཕྱི་ལོ་ ༢༠༠༦ ཟླ་ ༤ ཚེས་ ༤ ཉིན་རྡ་སྟེང་བོད་ཁྱིམ་དུ་ཞི་བདེའི་ལྷན་ཚོགས་ཐོག་སྩལ་པའི་བཀའ་སློབ་ལས་བཏུས།